മയക്കുമരുന്ന് ഉപയോഗിക്കുന്നവർക്ക് ഒപ്പം ഇനി മുതൽ സിനിമയിൽ അഭിനയിക്കില്ല, സഹകരിക്കില്ല എന്ന് പറഞ്ഞുകൊണ്ട്, നടി വിൻസി അലോഷ്യസ് അതിശക്തമായ ഒരു നീക്കം സധൈര്യം നടത്തി. ഒരുപക്ഷേ നാളെ തനിക്ക് സിനിമകൾ ഒന്നും കിട്ടില്ല എന്ന് അറിഞ്ഞുകൊണ്ട് തന്നെയാണ് വിൻസി അത്തരം ഒരു സാഹസത്തിന് മുതിർന്നത്. അതിന് ഒരു വലിയ കൈയ്യടി അവർ അർഹിക്കുന്നു.

ആ കേസ് എന്തായി, അതിന്റെ മെറിറ്റ് എന്താണ്, എന്നതല്ല ഇവിടെ പറയാൻ ഉദ്ദേശിക്കുന്നത്.

വിൻസി പറഞ്ഞത് പോലെയുള്ള ഒരു നടപടി സ്വീകരിക്കാൻ എത്ര നടിമാർ മുന്നോട്ട് വരും? എത്ര നടന്മാർ മുന്നോട്ടു വരും? ഞാൻ അഭിനയിക്കുന്ന സിനിമകളുടെ സെറ്റിൽ ലഹരി ഉപയോഗിക്കുന്നവർ ഉണ്ടെങ്കിൽ, ഞാൻ ആ സിനിമയിൽ നിന്ന് പിന്മാറും എന്ന് സധൈര്യം പറയാൻ നമ്മുടെ സൂപ്പർസ്റ്റാറുകൾ തയ്യാറാണോ?

ബുദ്ധിമുട്ടായിരിക്കും. താരസിംഹാസനത്തിന് കോട്ടം തട്ടുന്ന നടപടികൾ, സാമൂഹ്യ പ്രതിബദ്ധതയുടെ പേരിൽ താര രാജാക്കന്മാർ കൈക്കൊള്ളണമെന്നില്ല.

പക്ഷേ നമ്മൾ സിനിമാ പ്രേക്ഷകർക്ക് അത്തരം ചില നടപടികൾ സ്വീകരിക്കാൻ എളുപ്പമാണ്.

ഇന്ന് രാവിലെ മയക്കുമരുന്നും സിനിമയുമായി ചേർത്ത് കണ്ട ഒരു വാർത്തയുമായി ബന്ധപ്പെട്ടതാണ് ഇത്രയും പറഞ്ഞത്.

ഹൈബ്രിഡ് കഞ്ചാവുമായി രണ്ട് സംവിധായകരാണ് പിടിയിലായത്.

1. അനുരാഗ കരിക്കിൻ വെള്ളം, ഉണ്ട, ലവ്, തല്ലുമാല, ആലപ്പുഴ ജിംഖാന എന്നീ സിനിമകളുടെ സംവിധായകനായ ഖാലിദ് റഹ്മാൻ.

2. തമാശ, ഭീമൻ്റെ വഴി, സുലൈഖ മൻസിൽ, എന്നീ സിനിമകളുടെ സംവിധായകനായ അഷ്റഫ് ഹംസ.

…. എന്നിവരാണ് ഈ സംവിധായകർ. ക്യാമറാമാൻ സമീർ താഹിറിൻ്റെ ഫ്ലാറ്റിൽ നിന്നാണ്, രഹസ്യ വിവരത്തിന്റെ അടിസ്ഥാനത്തിൽ ഇവരടക്കം മൂന്ന് പേരെ ഹൈബ്രിഡ് കഞ്ചാവുമായി പിടികൂടിയത്.

രസകരമായ വസ്തുത, സ്റ്റേഷൻ ജാമ്യത്തിൽ തന്നെ ഇവരെ വിട്ടയച്ചു എന്നതാണ്.

നിശ്ചിത അളവിൽ കൂടുതൽ ലഹരി കൈവശം വെച്ചാൽ മാത്രമേ ഇതൊരു കുറ്റം ആകുന്നുള്ളൂ ഈ രാജ്യത്ത്! പിന്നെങ്ങനെ ലഹരിക്കെതിരെയുള്ള പോരാട്ടം വിജയിക്കുമെന്നാണ് നമ്മുടെ ഭരണകൂടം കരുതുന്നത്. ഏതൊരാളും നിശ്ചിത അളവിൽ താഴെയുള്ള ലഹരി പോക്കറ്റിൽ വെച്ച് നിർവിഘ്നം വിലസും. ഇതിലും ഭേദം ഈ സാധനം നിയമപരമാക്കി ആ ഇനത്തിൽ ടാക്സ് കൈപ്പറ്റുന്നതല്ലേ? സിനിമാ തിയേറ്ററിൽ ഇതിനെതിരെ ഒരു സ്ലൈഡ് കൂടുതലായി കാണിക്കേണ്ടി വരും. തീർന്നില്ലേ സർക്കാരിന്റെ ഉത്തരവാദിത്തം?!

ആദ്യം വേണ്ടത് മയക്കുമരുന്ന് ഒരു ഗ്രാം പോലും കൈവശം ഉണ്ടെങ്കിലും, പിടിച്ച് അകത്തിടാൻ പാകത്തിന് നിയമം ഭേദഗതി വരുത്തുകയാണ്.

‘ഞാൻ ഈ നിരോധിത സാധനം ഉപയോഗിച്ചിട്ടുണ്ട്, ഉപയോഗിക്കാറുണ്ട് ‘ എന്ന് പൊലീസിൽ മൊഴി കൊടുത്തവരേയും കുറ്റം ചാർത്തി അകത്തിടാൻ പാകത്തിന് നിയമം മാറ്റിയെഴുതണം. അതെ, ഈയടുത്ത് അങ്ങനെയൊരു മൊഴി നൽകിയ നടൻ ഷൈൻ ടോം ചാക്കോയെ ഉദ്ദേശിച്ച് തന്നെയാണ് പറഞ്ഞത്.

ലഹരി മാഫിയയുടെ ഒന്നാമത്തെ കണ്ണിക്കപ്പുറം മുകളിലുള്ള രണ്ടാമതൊരു കണ്ണിയെ ഇതുവരെ പിടിച്ചതായി വാർത്ത വന്നിട്ടുണ്ടോ? രണ്ടാമതൊരു കണ്ണിയിൽ നിന്ന് ആരെയും പിടിക്കില്ല. പിടിച്ചാൽ പല വമ്പന്മാരും കുടുങ്ങും. പല പകൽമാന്യന്മാരും അകത്താകും. ആതുകൊണ്ട് അങ്ങനെയൊരു സംഭവം ഉണ്ടാകില്ല. ആയതിനാൽ, ലഹരിക്കെതിരെയുള്ള സർക്കാരിന്റെ പോരാട്ടവും വീരസ്യം പറച്ചിലും ഒരു പ്രഹസനമായും പൊറാട്ട് നാടകമായും തുടരും.

പക്ഷേ, നമ്മൾ സാധാരണ മനുഷ്യന്മാർക്ക് ലഹരിക്കെതിരെ ചെയ്യാൻ പറ്റുന്ന ചില ചെറിയ കാര്യങ്ങളുണ്ട്. ലഹരി ഉപയോഗിക്കുന്നവരുമായി ഒരു തരത്തിലും സഹകരിക്കില്ല എന്ന് തീരുമാനമെടുക്കാൻ നമുക്ക് കഴിയും. വിൻസി അലോഷ്യസ് എന്ന ധൈര്യശാലിയായ നടി എടുത്ത തീരുമാനം പോലെ.

ഞാൻ എന്റെ കാര്യം പറയാം.

1. ഷൈൻ ടോം ചാക്കോ
2. ശ്രീനാഥ് ഭാസി
3. ഖാലിദ് റഹ്മാൻ
4. അഷ്‌റഫ്‌ ഹംസ
5. വിനായകൻ*

എന്നിവർ ക്യാമറയ്ക്ക് മുന്നിലോ പിന്നിലോ സഹകരിക്കുന്ന സിനിമകൾ ഞാനിനി കാണില്ല. അതിനി ഓസ്ക്കാർ കിട്ടിയ സിനിമകൾ ആണെങ്കിലും തീരുമാനത്തിൽ മാറ്റമില്ല. മയക്കുമരുന്ന് അടിച്ചു കയറ്റി നിങ്ങൾ ഉണ്ടാക്കുന്ന കലാസൃഷ്ടികൾ കണ്ട് ധന്യനാകാനോ കോരിത്തരിക്കാനോ ഞാൻ ഉദ്ദേശിക്കുന്നില്ല.

* ഈ ലിസ്റ്റിൽ വിനായകൻ കയറി വന്നത് മറ്റ് പല കാരണങ്ങൾ കൊണ്ടാണ്. അയാൾ കഞ്ചാവ് അടക്കമുള്ള മയക്കുമരുന്നുകൾ ഉപയോഗിക്കുന്ന ആളാണോ എന്ന് തീർച്ചയില്ല. പക്ഷേ, മദ്യലഹരിയിൽ തുണി പറിച്ചെറിഞ്ഞ് മറ്റുള്ളവരുടെ തള്ളയ്ക്ക് വിളിക്കുകയും പൊതുസമൂഹത്തിൽ സ്ഥിരമായി പ്രശ്നങ്ങളുണ്ടാക്കുകയും ചെയ്യുന്ന അയാളെ സഹിക്കേണ്ട കാര്യം ഒരു മലയാളിക്കും ഇല്ല. അതുകൊണ്ട് അയാളെയും മാറ്റി നിർത്തുന്നു.

ഖാലിദ് റഹ്മാനേയും അഷ്റഫ് ഹംസയെയും പിടികൂടിയത് സമീർ താഹിറിന്റെ ഫ്ലാറ്റിൽ നിന്ന് ആയതുകൊണ്ട് സമീറും വൈകാതെ തന്നെ ഈ ലിസ്റ്റിൽ കയറിക്കൂടിയേക്കാം. ഷൈയ്ൻ നിഗമും മറ്റ് ചില പ്രമുഖ നടന്മാരും വെയ്റ്റിംഗ് ലിസ്റ്റിൽ ഉണ്ട്. പിടികൂടപ്പെടുന്ന മുറയ്ക്ക് അവരും ലിസ്റ്റിൽ കയറിപ്പറ്റും.

(അപ്ഡേറ്റ്:- സമീർ താഹിറിനെ മുൻപ് മയക്കുമരുന്ന് കേസിൽ പിടികൂടിയിട്ടുണ്ടെന്ന് വിവരം ലഭിച്ചിരിക്കുന്നു. അതുകൊണ്ട് അയാളും ലിസ്റ്റിലേക്ക് കയറുന്നു.
6. സമീർ താഹിർ)

‘അങ്ങനെ നോക്കിയാൽ, നിരക്ഷരന് മലയാള സിനിമ തന്നെ കാണേണ്ടി വരില്ല’… എന്നൊരു അഭിപ്രായം ഞാൻ പ്രതീക്ഷിക്കുന്നുണ്ട്.

“ഓ.. മലയാള സിനിമ കണ്ട് പ്രബുദ്ധനായില്ലെങ്കിലും പുളകിതനായില്ലെങ്കിലും തട്ടിയും മുട്ടിയും ഞാനങ്ങ് ജീവിച്ച് പൊയ്ക്കോളാം. അതിൽക്കുറഞ്ഞുള്ള കലാസ്വാദനവും സിനിമാസ്വാദനവും മതിയെനിക്ക് ” എന്ന് മാത്രമേ അതിന് മറുപടിയുള്ളൂ.

അങ്ങനെയും സംഭവിക്കാം. മലയാള സിനിമയിൽ 80% പേരും ലഹരി ഉപയോഗിക്കുന്നവരാണ് എന്നൊരു വാർത്തയും ഈയടുത്ത് കണ്ടിരുന്നു. അങ്ങനെയാണെങ്കിൽ സർക്കാർ ആദ്യം ശുദ്ധീകരണം നടത്തേണ്ടത് സിനിമാ സെറ്റുകളിലും സിനിമാ കൂട്ടങ്ങളിലുമാണ്.

‘നിരക്ഷരൻ ഒരാൾ കുറേ സിനിമക്കാരെയും കുറച്ച് സിനിമകളേയും ബഹിഷ്കരിച്ചാൽ മലയാള സിനിമയ്ക്ക് പൂടയാണ് ‘…. എന്നൊരു അഭിപ്രായവും പ്രതീക്ഷിക്കുന്നുണ്ട്.

പൂടയേക്കാളും ചെറുത് എന്തെങ്കിലുമേ ആകൂ എന്ന് നല്ല ബോദ്ധ്യമുണ്ട്. പക്ഷേ, പല പൂടകൾ ചേർന്നാൽ ചിലപ്പോൾ വലിയൊരു കരിമ്പടം ആയാലോ? അതിട്ട് മൂടിയാൽ മയക്കുമരുന്ന് മാഫിയ അൽപ്പമെങ്കിലും ഒതുങ്ങിയാലോ?

വാൽക്കഷണം:- സിനിമാ കുടുംബത്തിൽ നിന്നുള്ള ഒരു പ്രമുഖ യുവനടനും ലഹരിക്ക് അടിമയാണെന്ന് കേൾക്കുന്നുണ്ട്. ആലപ്പുഴയിൽ നിന്നാണോ എറണാകുളത്ത് നിന്നാണോ ഈ സിനിമാ കുടുംബം എന്നത് വ്യക്തമല്ല.

#SayNoToDrugs

ദൈവത്തിൽ വിശ്വസിക്കുന്നവരുണ്ട്. വിശ്വാസിക്കാത്തവരും ഉണ്ട്. രണ്ടാമത് പറഞ്ഞ കൂട്ടത്തിലാണ് ഈയുള്ളവൻ.

ഈ രണ്ടുകൂട്ടർക്കും അവരവരുടെ ഭാഗങ്ങളും വാദങ്ങളും ചിന്തകളും കാഴ്ച്ചപ്പാടുകളും, ദേവാലയങ്ങളിലോ പൊതുവിടങ്ങളിലോ ആൾക്കൂട്ടം ഉള്ളയിടങ്ങളിലോ ഇല്ലാത്തയിടങ്ങളിലോ കമ്മ്യൂണിറ്റി ഹാളുകളിലോ സ്വകാര്യ ഇടങ്ങളിലോ, ഉച്ചഭാഷിണി വെച്ചോ വെക്കാതെയോ പ്രചരിപ്പിക്കാനും പ്രസംഗിക്കാനുമുള്ള സ്വാതന്ത്ര്യം ഈ രാജ്യത്തുണ്ട്.

ഒരു കൂട്ടർ അവരുടെ ഭാഗം പ്രചരിപ്പിക്കുമ്പോൾ കേട്ടിരിക്കണമെന്നുണ്ടെങ്കിൽ ഏതൊരാൾക്കും കേട്ടിരിക്കാം. താൽപ്പര്യമില്ലാത്തവർക്ക് ഒഴിഞ്ഞ് പോകുകയും ആവാം. അതിനുള്ള സ്വാതന്ത്ര്യവും ഇന്നാട്ടിലുണ്ട്. അങ്ങനെയങ്ങോട്ട് പോയാൽ ഒരു പ്രശ്നവുമില്ല ഹേ. അതിന് പകരം ഒറ്റയ്ക്കിരിക്കുന്ന ഒരാളിലേക്ക് കടന്നുകയറി സ്വന്തം വിശ്വാസമോ അവിശ്വാസമോ അടിച്ചേൽപ്പിക്കാനും ചെലുത്താനും നിൽക്കരുത്. സ്പർദ്ധ അവിടെത്തുടങ്ങുകയായി. വെറുതെ എന്തിനാണ് ചുമ്മാ ചൊറിഞ്ഞ് പുണ്ണാക്കി അതിൽ മുളകുപൊടി വിതറി രസിക്കുന്നത് ?

നാലര ബില്ല്യൺ വർഷങ്ങളായി ഇങ്ങനെ കറങ്ങിക്കൊണ്ടിരിക്കുന്ന ഭൂമിയിൽ മനുഷ്യനെന്ന ജന്തുവിന് കിട്ടിയിരിക്കുന്ന ശരാശരി ആയുസ്സ് എൺപതായോ നൂറായോ കണക്കിലാക്കിയാലും മനുഷ്യൻ അൽപ്പ ജീവിയാണ്. ഈ കുറഞ്ഞ നാളുകൾ ദൈവത്തിന്റെ പേര് പറഞ്ഞ് ഇടിച്ചുകയറി പരസ്പരം പോരടിക്കാതെ ജീവിച്ചു കൂടെ ? അതേപ്പറ്റിയുള്ള പ്രചരണങ്ങളും മറുപ്രചരണങ്ങളും ആയിക്കോളൂ. പക്ഷേ, സ്വകാര്യതയിലേക്ക് കടന്നു കയറി പ്രചരിപ്പിക്കാനോ ഉണ്ടാക്കാനോ വരരുത് എന്നാണ് ഉദ്ദേശിച്ചത്.

വിശ്വാസിയല്ലെങ്കിലും, സമയവും സൗകര്യവും പോലെ രണ്ട് കൂട്ടരുടേയും പ്രചാരണങ്ങളും വാദപ്രതിവാദങ്ങളും കേട്ടിരിക്കാറുണ്ട് ഞാൻ. വിശ്വാസിയല്ലെന്ന് ക്ലബ്ബ് ഹൗസ് പ്രൊഫൈലിൽ എഴുതി പ്രദർശിപ്പിച്ചിട്ടുമുണ്ട്. എന്നുവെച്ച്, അങ്ങനെയുള്ള ഒരാളെ മെസ്സേജ് ബോക്സിലൂടെ വന്ന് ഉദ്ധരിക്കേണ്ട കാര്യമൊന്നും ആർക്കുമില്ല. അങ്ങനെ ചെയ്താൽ അത് സ്വകാര്യതയിൽ ഇടിച്ച് കയറി നിങ്ങളുടെ ചിന്തകളും അഭിപ്രായങ്ങളും വിശ്വാസങ്ങളും ചെലുത്തുന്ന നടപടിയായി മാറുന്നു. അതനുവദിച്ച് തരുന്ന പ്രശ്നമില്ല. പ്രത്യേകിച്ച് ഏതെങ്കിലുമൊരു അപരിചിതന്.

അങ്ങനെയൊരു സംഭവം ഇന്നുണ്ടായി. അതാണ്  മുകളിലെ ചിത്രത്തിലുള്ളത്. അതിന് തക്ക മറുപടി (താഴെയുള്ള ചിത്രം നോക്കൂ) കൈയോടെ നൽകുകയും ചെയ്തു.

നാസ്തികനായ സനൽ ഇടമറുകിൻ്റെ ക്ലബ്ബ് ഹൗസ് പ്രഭാഷണങ്ങൾ സ്ഥിരമായി കേൾക്കുന്ന വരെ ടാർഗറ്റ് ചെയ്താണ് വിശ്വാസികളുടെ ഈ നീക്കമെന്ന് ഊഹിക്കുന്നതിൽ തെറ്റില്ലല്ലോ. അദ്ദേഹം പറഞ്ഞോട്ടെ. നിങ്ങൾക്ക് പറയാനുള്ളത് പരസ്യമായി നിങ്ങളും പറയുന്നുണ്ടല്ലോ.

അവസാനമായി അൽപ്പം കൂടെ വ്യക്തത തരാം. വിശ്വാസികളും അവിശ്വാസികളും അടക്കം പലതരക്കാരുള്ള സമൂഹത്തിലാണ് ജീവിക്കുന്നതെന്ന് നല്ല ബോദ്ധ്യമുണ്ട്. ഒരു കൂട്ടരെ മാറ്റി നിർത്തി മറ്റേ കൂട്ടർക്ക് മാത്രമായി നിലനിൽക്കാനാവില്ല. വിശ്വാസി ഓടിക്കുന്ന ബസ്സിൽ കയറില്ലെന്ന് അവിശ്വാസിയും, അവിശ്വാസിയുടെ മെഡിക്കൽ ഷോപ്പിൽ നിന്ന് മരുന്ന് വാങ്ങില്ലെന്ന് വിശ്വാസിയും തീരുമാനിച്ചാൽ സർവ്വതും അവതാളത്തിലാകുമെന്ന കാര്യത്തിൽ ഒരു സംശയവും വേണ്ട. ഇതൊക്കെ വിശ്വാസികളും അവിശ്വാസികളും ചെയ്യുന്നുണ്ട്. ആ ബസ്സുകൾ തിങ്ങിനിറഞ്ഞു തന്നെ ഓടുന്നുണ്ട്. അതിന്റെ പേരിൽ ഒരു മരുന്നു കടയും ഇന്നേവരെ പൂട്ടിപ്പോയിട്ടില്ല.

അവിശ്വാസിയാണെങ്കിലും ഒരു വിശ്വാസിക്കൊപ്പം അയാളുടെ ദേവാലയത്തിൽ പോകുന്നതിനോ വിശ്വാസപരമായ ചടങ്ങിന്റെ ഭാഗമാകുന്നതിനോ അതിൽ സഹകരിക്കുന്നതിനോ വ്യക്തിപരമായി യാതൊരു എതിർപ്പോ ബുദ്ധിമുട്ടോ എനിക്കില്ല. അത് ഞാനെന്ന സമൂഹജീവി വിശ്വാസികൾക്ക് തരുന്ന ബഹുമാനമാണ്, മാന്യതയാണ്. അങ്ങനെയൊന്ന് അതേ നാണയത്തിൽ തിരിച്ച് തന്നില്ലെങ്കിലും ഇടിച്ച് കയറി വിശ്വാസം അടിച്ചേൽപ്പിക്കുന്ന പരിപാടിയിൽ നിന്ന് ഒഴിവാകണം. അഭ്യർത്ഥനയാണ്. മനസ്സിലായിക്കാണുമെന്ന് കരുതുന്നു

വാൽക്കഷണം:- ലോകത്തിലെ സകല മനുഷ്യരും ദൈവത്തിൽ വിശ്വസിക്കുകയോ ഏതെങ്കിലും പ്രത്യേക മതത്തിന്റെ ദൈവത്തിൽ വിശ്വസിക്കുകയോ ചെയ്താൽ നാളെ മുതൽ, അല്ലെങ്കിൽ വേണ്ട, ഒരു വർഷത്തിനുള്ളിൽ ഈ ഭൂമിയിൽ കഷ്ടപ്പാടുകളും ദുരിതങ്ങളും പട്ടിണിയും കവർച്ചകളും കൊലപാതകങ്ങളും പീഡനങ്ങളുമെല്ലാം ഒഴിഞ്ഞ് ശാന്തിയും സമാധാനവും അഭിവൃദ്ധിയും പൂണ്ട് വിളയാടുമെന്ന് ഉറപ്പ് തരാമെങ്കിൽ, മറുത്തൊന്നും പറയാതെ, നിങ്ങൾ പറയുന്ന ദൈവത്തിൽ, പറയുന്ന മതത്തിന്റെ കീഴിൽ നിന്ന് വിശ്വാസമർപ്പിക്കാൻ ഞാൻ തയ്യാറാണ്.

കോവിഡ് മൂന്നാംഘട്ട വ്യാപനം ശക്തമാകുമ്പോൾ സംസ്ഥാനങ്ങൾ കൂടുതൽ കടുത്ത നടപടികളിലേക്ക് കടക്കുന്നത് സ്വാഭാവികം. പക്ഷേ, കേരളത്തിൽ തിരഞ്ഞെടുപ്പ് നടക്കുന്നതുകൊണ്ട് ഇപ്പോൾ പാർട്ടിക്കാർ പരസ്പരം കുറ്റപ്പെടുത്തുന്ന ഏർപ്പാട് നിർത്തി. കൂടുതൽ ആളെക്കൂട്ടുന്നവർ കൂടുതൽ ശക്തൻ എന്നത് മനസ്സിലാക്കി അന്തിച്ച് നിൽക്കുകയാണ് കൊറോണ വൈറസ്. അതിനുമുണ്ടാകില്ലേ മനുഷ്യൻ എന്ന ജന്തുവിനോട് സ്വാഭാവികമായ ഒരു ജീവഭയം !

കേരളത്തിൽ നിന്ന് കർണ്ണാടകത്തിലേക്ക് വരുന്നവർക്ക് കോവിഡ് ടെസ്റ്റ് റിസൽറ്റ് കൈവശം വേണമെന്ന നിയമം കഴിഞ്ഞ ഒരാഴ്ച്ചയായി നിലനിൽക്കുന്നുണ്ട്. ഇത് മുതലെടുത്തുകൊണ്ടിരിക്കുന്നത് കർണ്ണാടകയിലെ പൊലീസുകാരാണ്. ചെക്ക് പോസ്റ്റിൽ എത്തുന്ന ഓരോ ദീർഘദൂര ബസ്സുകളിലും പൊലീസുകാർ പരിശോധന നടത്തുന്നുണ്ട്. (മറ്റ് വാഹനങ്ങളുടെ കാര്യം എങ്ങനെയാണെന്ന് അറിയില്ല)

മൂന്ന് ദിവസം മുൻപ്, എന്റെ ഒരു സഹപ്രവർത്തകയുടെ ഭർത്താവ്, കേരളത്തിൽ ടെസ്റ്റ് നടത്തി സർട്ടിഫിക്കറ്റുമായി കർണ്ണാടകത്തിലേക്ക് വന്നു. ടെസ്റ്റ് റിസൽറ്റില്ലാതെ ബസ്സിലുണ്ടായിരുന്ന മറ്റ് യാത്രക്കാരിൽ നിന്ന് 200 രൂപ വീതമാണ് കർണ്ണാടക പൊലീസ് കൈക്കൂലി വാങ്ങുന്നത്. ഇങ്ങനെയൊരു സൌകര്യം ഉണ്ടെന്ന് അറിയുന്നതുകൊണ്ടുതന്നെ ഒരു ബസ്സിൽ അത്തരത്തിൽ 20 യാത്രക്കാരെങ്കിലുമുണ്ട്. ഒരു ദിവസം സ്റ്റേറ്റ് വിട്ട് സ്റ്റേറ്റിലേക്ക് കടക്കുന്ന ദീർഘദൂര ബസ്സുകൾ നൂറുകണക്കിനാണ്. അതിർത്തിയിൽ ചെക്കിങ്ങ് നടത്തുന്ന പൊലീസുകാർ ഒരൊറ്റ ദിവസമുണ്ടാക്കുന്നത് ലക്ഷങ്ങളാണെന്ന് മനസ്സിലാക്കാൻ കൂടുതൽ കണക്കുകളൊന്നും ആവശ്യമില്ലല്ലോ ?

കോവിഡ് പടരാതിരിക്കുകയാണ് യഥാർത്ഥ ലക്ഷ്യമെങ്കിൽ, ചെയ്യേണ്ട കാര്യങ്ങൾ അക്കമിട്ട് പറയാം.

1. ടെസ്റ്റ് റിസൽറ്റ് ഇല്ലാത്തവരെ ബസ്സിൽ കയറാൻ ബസ്സുകാർ അനുവദിക്കരുത്.

2. ടെസ്റ്റ് റിസൽറ്റിലും കള്ളത്തരം തുടങ്ങിയിട്ടുണ്ട്. ശരിക്കും ടെസ്റ്റ് നടത്തണമെങ്കിൽ 1400 രൂപ, ടെസ്റ്റ് നടത്താതെ നെഗറ്റീവ് റിപ്പോർട്ട് മാത്രം മതിയെങ്കിൽ 700 രൂപ എന്ന തരത്തിൽ പ്രവർത്തിക്കുന്ന ആശുപത്രികളുമുണ്ട് കേരളത്തിൽ. അത്തരം കേന്ദ്രങ്ങൾ കണ്ടെത്തി നടപടി സ്വീകരിക്കുക.

3. ഇതൊന്നും പറ്റുന്നില്ലെങ്കിൽ ചെക്ക് പോസ്റ്റിൽ കുറഞ്ഞപക്ഷം RTPCR ടെസ്റ്റെങ്കിലും നടത്താനുള്ള നടപടികൾ എല്ലാ സംസ്ഥാനങ്ങളും സ്വീകരിക്കുക. വാഹനത്തിൽ വരുന്ന ഏതെങ്കിലും ഒരാ‍ൾ പോസിറ്റീവാണെന്ന് കണ്ടാൽ അയാളെയും അടുത്ത സീറ്റിലിരുന്ന ആൾക്കാരെയും, അല്ലെങ്കിൽ ബസ്സിലുള്ള മുഴുവൻ പേരെയും ക്വാറന്റൈനിലേക്ക് മാറ്റുക.

കൂടുതൽ ഫലപ്രദമായ മാർഗ്ഗങ്ങൾ ഉണ്ടെങ്കിൽ അതും നടപ്പിലാക്കാം. അല്ലാതെ കൊറോണ വ്യാപനം, പൊലീസുകാർക്ക് കീശ വീർപ്പിക്കാനുള്ള ഒരു ഉപാധി മാത്രമാക്കി മാറ്റുന്നത് സകലമാന ജനങ്ങളോടും ആരോഗ്യരംഗത്തോടും ചെയ്യുന്ന ദ്രോഹമാണ്.

വാൽക്കഷണം:- കർണ്ണാടകയിൽ കോവിഡ് ടെസ്റ്റ് ചെയ്യാൻ 700 രൂപ മതിയെന്നിരിക്കെ കേരളത്തിൽ ഇരട്ടിപ്പണം ഇതേ ടെസ്റ്റിന് ഈടാക്കുന്നുണ്ടെന്നത് മറ്റൊരു തട്ടിപ്പ്. കോവിഡ് ആരംഭിച്ച് വർഷം ഒന്ന് കഴിഞ്ഞിട്ടും രാജ്യവ്യാപകമായി ടെസ്റ്റ് ചാർജ്ജ് ഏകീകരിക്കാതെ മറ്റൊരു തട്ടിപ്പിന് കൂട്ടുനിൽക്കുകയാണ് സർക്കാരുകൾ.

* പാചകത്തിനിടയ്ക്ക് എന്തോ ഒന്ന് എടുക്കാൻ വേണ്ടി ഫ്രിഡ്‌ജ് തുറന്നു. പക്ഷേ എന്താണെടുക്കേണ്ടതെന്ന് അപ്പോഴേക്കും മറന്നു.

* സ്വീകരണമുറിയിൽ നിന്ന് ബെഡ് റൂമിലേക്ക് പോയത് എന്തോ ആവശ്യത്തിനാണ്. അവിടെ ചെന്നപ്പോഴേക്കും അത് മറന്നു.

* കാര്യമായെന്തോ മരാമത്ത് പണി നടത്തിക്കൊണ്ടിരിക്കുകയായിരുന്നു. വീട്ടിലെ ടൂൾ കിറ്റിൽ ഇല്ലാത്ത ഒരുപകരണം കാറിന്റെ ടൂൾ കിറ്റിൽ ഉണ്ടെന്നറിയാം. അതെടുക്കാൻ താക്കോലുമെടുത്ത് കാറിനടുത്തേക്ക് ചെന്നപ്പോഴേക്കും എന്തിനാണ് അങ്ങോട്ട് പോയതെന്ന് മറന്നു.

* യാത്ര പുറപ്പെടാൻ വാഹനത്തിൽ കയറി ഇരുന്നപ്പോഴാണ് എന്തോ മറന്നത്. അതെടുക്കാൻ ഓടി വീട്ടിലേക്ക് ചെന്നെങ്കിലും അകത്ത് ചെന്നപ്പോൾ അതെന്തിനാണെന്ന് മറന്നു.

* നഗരത്തിനുള്ളിൽ തന്നെയുള്ള ചെറിയ യാത്രയ്ക്കിടയിൽ ഒരു ഫോൺ വരുന്നു. എവിടെയെത്തി എന്ന് മറുതലക്കൽ നിന്ന് ചോദിക്കുമ്പോൾ, കലൂർ, വൈറ്റില, പാലാരിവട്ടം, ഇടപ്പള്ളി, കളമശ്ശേരി, ആലുവ, എന്നിങ്ങനെയുള്ള ഏറ്റവും പരിചിതമായ സ്ഥലപ്പേരുകൾ പോലും മറന്ന് പോകുന്നു.

* അക്കങ്ങളുടെ കാര്യത്തിൽ പണ്ടേ വലിയ പരാജയമാണ്. പക്ഷേ വ്യക്തികളുടേയും സ്ഥലങ്ങളുടേയും പേരുകൾ മറക്കുന്ന പതിവില്ലായിരുന്നു. പേരുകൾ ഓർത്ത് വെക്കാൻ ഒരു സൂത്രപ്പണിയും എനിക്കുണ്ടായിരുന്നു. പക്ഷേ, ഇപ്പോൾ പാണ്ടൻ നായുടെ പല്ലിന്റെ അവസ്ഥയാണ്.

* ഓഫീസിൽ അധികം ഇടപഴകാത്ത, എന്നാൽ ദിവസത്തിൽ ഒരു പ്രാവശ്യമെങ്കിലും പറയേണ്ടി വരുന്ന സഹപ്രവർത്തകരുടെ പേരുകൾ മനസ്സിൽ (അതോ തലച്ചോറിലോ) നിൽക്കുന്നില്ല. നോട്ട് പാഡിൽ എഴുതിവെച്ചാണ് ഇപ്പോൾ കാര്യം സാധിക്കുന്നത്.

* ഔദ്യോഗികമായോ വ്യക്തിപരമോ ആയി ചെയ്യാനുള്ള കാര്യങ്ങൾ എഴുതിവെച്ച് ചെയ്യുന്ന ശീലം പണ്ടേയുണ്ട്. വാഹനം ഓടിക്കുകയോ മറ്റെന്തിലും ചെയ്യുമ്പോഴോ എഴുതി വെക്കാൻ പറ്റിയില്ലെങ്കിൽ പിന്നെയത് മറവിക്ക് സ്വന്തം. തലച്ചോറിൽ To Do List എഴുതിവെക്കേണ്ട ഭാഗം തീരെ ഉപയോഗപ്പെടുത്താത്തതുകൊണ്ട് അത് തുരുമ്പെടുത്ത് പോയിട്ടുണ്ടെങ്കിൽ കുറ്റം പറയാനാവില്ല. സാങ്കേതിക വിദ്യയും ഒരു പരിധി വരെ അക്കങ്ങളേയും പേരുകളേയും മറന്നുകളയുന്ന പ്രക്രിയക്ക് ആക്കം കൂട്ടിയിരിക്കാം.

* 2015 ഡിസംബറിലാണ് മറവി കാര്യമായി ബാധിച്ചുകൊണ്ടിരിക്കുന്നു എന്ന സത്യം ഒരു ഞെട്ടലോടെ മനസ്സിലാക്കിയത്. മുസ്‌രീസിലൂടെ എന്ന എന്റെ യാത്രാവിവരണത്തിന്റെ പ്രകാശനം തൃശൂർ സാഹിത്യ അക്കാഡമി ഹാളിൽ വെച്ച് നിർവ്വഹിക്കപ്പെട്ട ശേഷം എന്റെ ഓഫ്‌ലൈൻ സുഹൃത്ത് ഹേന ചന്ദ്രൻ Hena Chandran പുസ്തകത്തിന്റെ ഒരു കോപ്പിയിൽ ഒപ്പീടിക്കാനായി അടുത്തെത്തി. എത്ര ശ്രമിച്ചിട്ടും ഹേനയുടെ പേരെനിക്ക് ഓർമ്മ വന്നില്ല. പേരെന്താണെന്ന് ഹേനയോട് ചോദിച്ചാൽ അഹങ്കാരിയായോ നന്ദിയില്ലാത്തവനായോ അൽപ്പനായോ കരുതപ്പെടാം. അവസാനം പേരെഴുതാതെ ഒപ്പ് മാത്രമിട്ട് ഒരുവിധം തടിതപ്പി. ഹേനയ്ക്കെന്ത് തോന്നിയിരിക്കാമെന്ന് ഇപ്പോഴുമറിയില്ല. ആ ദിവസം അനുഭവിച്ച മറ്റ് സമ്മർദ്ദങ്ങളുടെ ഭാഗമായി വന്ന മറവിയാകാനും മതി. പക്ഷേ, അവിടന്നിങ്ങോട്ട് അത്തരം മറവികൾ ഏറിയേറി വന്നിട്ടുണ്ട്.

ഞാൻ മനോജ് രവീന്ദ്രൻ നിരക്ഷരൻ. വയസ്സ് 51. വാർദ്ധക്യത്തിലേക്ക് കാലൂന്നിക്കഴിഞ്ഞിരിക്കുന്നു എന്ന് നല്ല ബോദ്ധ്യമുണ്ട്. വയസ്സാകുമ്പോൾ മറവി സ്വാ‍ഭാവികമായിരിക്കാം. പക്ഷേ പുതിയ കാലഘട്ടത്തിൽ കാര്യങ്ങളുടെ പോക്ക് അത്ര പന്തിയല്ല. ഓരോ മൂന്ന് സെക്കന്റിലും ഒരാളെ മറവിരോഗം അഥവാ അൽഷിമേർസ് പിടികൂടുന്നു എന്നൊക്കെ കേൾക്കുന്നത് ശരിയാണെങ്കിൽ ഏതോ ഒരു മൂന്നാം സെക്കന്റിൽ ഞാനും ആ ലിസ്റ്റിൽ കയറിക്കൂടിയിട്ടുണ്ടെന്ന് സംശയിക്കാതെ വയ്യ.

ഇതിന്റെ ആഴവും ആക്കവും കൂടാതിരിക്കാൻ എന്താണ് ചെയ്യേണ്ടതെന്ന് ആലോചിച്ച് തുടങ്ങേണ്ടിയിരിക്കുന്നു. അതെങ്കിലും മറന്ന് പോകാതിരുന്നെങ്കിൽ എന്നാശിക്കുകയും ചെയ്യുന്നു.

കേൾക്കുമ്പോൾ ഇത്രയൊക്കെ മറവി എനിക്കുമുണ്ടല്ലോ എന്ന് പലർക്കും തോന്നിയേക്കാം. എത്രത്തോളമുണ്ടെന്നും ഏത് കാറ്റഗറിയിൽ വരുന്നെന്നും സ്വയം വിലയിരുത്തുക. പ്രതിവിധിയായി എന്തെങ്കിലും ചെയ്യാനുണ്ടെന്ന് വൈദ്യോപദേശം കിട്ടിയാൽ ഇപ്പോഴേ ചെയ്ത് തുടങ്ങുക.

അൽപ്പമെങ്കിലും മറവി കൈമുതലായുള്ള എല്ലാവർക്കും ലോക അൽഷിമേർസ് ദിനാശംസകൾ !!

മറവിയുടെ കയങ്ങളിൽ വീണ് ബുദ്ധിമുട്ടനുഭവിക്കുന്നവരെ ഇന്നൊരു ദിവസമെങ്കിലും ഓർക്കണമെന്ന് സൂചിപ്പിച്ചതായി ഈ പോസ്റ്റിനെ കണ്ടാൽ മതി. നിലവിൽ എനിക്കങ്ങനെ അറിയുന്ന ഒരേയൊരാൾ ബീനച്ചേച്ചിയുടെ Beena KA അമ്മ മാത്രമാണ്. മറവിയിൽ നിന്ന് ഓർമ്മയുടെ ലോകത്തേക്ക് ആ അമ്മയെപ്പോലുള്ളവർ തിരികെ വന്നാലും ഇല്ലെങ്കിലും ശിഷ്ടകാലം അവർക്കും അവരെ പരിചരിക്കുന്നവർക്കും കാര്യമായ ബുദ്ധിമുട്ടുകൾ ഇല്ലാതിരിക്കട്ടെ എന്ന് മാത്രമേ ഈ ദിവസത്തിൽ കൂടുതലായി ആശംസിക്കാനുള്ളൂ.

വാൽക്കഷണം:- ആരെയൊക്കെ മറന്നാലും സോരൂർ കാമനെ മറക്കരുത് എന്നൊരു ആഗ്രഹം ബാക്കിയുണ്ട്.

കൊറോണ ബാധിച്ച ഏതെങ്കിലുമൊരു സുഹൃത്തിനോടോ, കൊറോണയ്ക്കെതിരെ പോരാടുന്ന ഏതെങ്കിലും ആരോഗ്യ പ്രവർത്തകരോടോ ഇത്രയും ദിവസങ്ങൾക്കകം ഫോണിലോ നേരിട്ടോ നിങ്ങൾ സംസാരിച്ചിട്ടുണ്ടോ, ചാറ്റ് ചെയ്തിട്ടുണ്ടോ ? ഇല്ലെങ്കിൽ അങ്ങനെയൊരാളെ കണ്ടെത്തി സംസാരിക്കുക. തീർച്ചയായും ഗുണം ചെയ്യും.

ഞാൻ ഇതുവരെ….

1.രോഗബാധിതയാകുകയും, ആശുപത്രിയിൽ പോകാൻ പറ്റാത്തതുകൊണ്ട്, 28 ദിവസം സ്വന്തം മുറിയിൽ ഒറ്റയ്ക്ക് പൊരുതി രോഗവിമുക്തി നേടിയ നഴ്സ് സുഹൃത്തുമായി സംസാരിച്ചു.

2. വിശ്രമമില്ലാതെ ഇപ്പോഴും ആരോഗ്യ പ്രവർത്തനത്തിൽ തുടരുന്ന മറ്റൊരു നഴ്സ് സുഹൃത്തുമായി ചാറ്റ് ചെയ്തു.

3. രോഗബാധിതയായി വിമുക്തി നേടിയ ഒരു സുഹൃത്തിന്റെ ഭർത്താവുമായി സംസാരിച്ചു.

4. ആരോഗ്യ പ്രവർത്തനത്തിൽ മുൻനിരയിൽ നിൽക്കുന്ന രണ്ട് ഡോക്ടർമാരുമായി സംസാരിച്ചു. അതിലൊരു ഡോക്ടർ, അദ്ദേഹം ഡ്യൂട്ടി ചെയ്തിരുന്ന വിമാനത്താവളത്തിൽ നിന്ന് രോഗം പടർന്നിരിക്കാനുള്ള സാദ്ധ്യത കണക്കിലെടുത്ത് ക്വാറന്റൈയ്നിൽ പോകുകയും രോഗം പിടിപെട്ടിട്ടില്ല എന്ന് കണ്ടെത്തി വീണ്ടും ആരോഗ്യ പ്രവർത്തനങ്ങളിൽ മുഴുകുന്നു.

ഒരുപാട് കാര്യങ്ങൾ ഇവരിൽ നിന്നെല്ലാം മനസ്സിലാക്കാനായി. കൂടുതൽ പേരുമായി സംസാരിക്കാനുള്ള ശ്രമങ്ങൾ തുടർന്നു കൊണ്ടിരിക്കുന്നു.

മേൽപ്പറഞ്ഞ വിഭാഗങ്ങളിൽ ആർക്കെങ്കിലും സ്വന്തം അനുഭവങ്ങൾ പങ്കുവെക്കാൻ താല്പര്യവും സമയവും ഉണ്ടെങ്കിൽ അവർ പറയുന്ന സമയത്ത് ഞാൻ തയ്യാർ.
————————————–
ഫേസ്ബുക്കിൽ മുകളിലുള്ളത് പോസ്റ്റ് ചെയ്തപ്പോൾ അവിടെ വന്ന ചില പ്രതികരണങ്ങൾ ആ വ്യക്തികളുടെ ഫേസ്ബുക്ക് പ്രൊഫൈലിന്റെ ലിങ്കിനൊപ്പം എടുത്തെഴുതുന്നു.
————————————–
1. Shaan Navas:- ഡെയ്‌ലി നൂറുകണക്കിന് പേഷ്യന്റിന്റെ ഇടയിൽ ജോലി ചെയ്യുന്നു.  മനോജേട്ടനെ വിളിച്ചിട്ടു കുറെ ആയി. വിളിച്ചോളാം

2.  Mujeeb Koroth:-   മിഡിൽ ഈസ്റ്റിലെ ഏറ്റവും വലിയ കോവിഡ്‌ ഐസലോഷൻ സെന്ററിലാണ്. ഒരു മാസത്തിന്‌ മേലെയായി വീട്ടിൽ പോവാതെ ഇതിന്റെ അകത്ത്‌ തന്നെ താമസിച്ച്‌ വളന്റിയർ ചെയ്യുന്നു. മനോജേട്ടൻ ഈ പറഞ്ഞ പോലെ ദിവസവും പല ആളുകളും വിളിച്ചു സംസാരിക്കറുണ്ട്.  അങ്ങനെ ചേർത്ത്‌ നിർത്തുന്ന സൗഹൃദങ്ങൾ തന്നെയാണ്‌ ചെയ്യുന്ന കാര്യങ്ങൾക്കുള്ള ഏറ്റവും വലിയ ഇന്ധനം.

3.  Bindu KrishnaPrasad:-  ഞാൻ സംസാരിച്ചിട്ടുണ്ട്. ഇപ്പോഴും സംസാരിച്ചുകൊണ്ടിരിക്കുന്നു. മൂന്നാഴ്ച്ച മു‌മ്പ് രോഗലക്ഷണങ്ങൾ തുടങ്ങി, റിസൾട്ട് പോസറ്റീവ് ആയശേഷം ഒരാഴ്ചയോളം ഹോസ്പിറ്റലിൽ ചികിൽസ നേടിയശേഷം ഇപ്പോൾ ഒരാഴ്ചയായി വീട്ടിൽ വിശ്രമിക്കുന്ന സുഹൃത്തുമായി. ആ ആളുടെ രോഗലക്ഷണങ്ങളും ശാരീരിക അവസ്ഥകളും മാറ്റങ്ങളും ഒരോ ദിവസവും അതാതു നേരങ്ങളിൽ അറിയുകയും, അത് എനിക്കുതന്നെ പിടിപെട്ടാലെന്ന പോലെ അനുഭവിക്കുകയും ചെയ്തിട്ടുണ്ട്. ആ സുഹൃത്ത് എന്റെ ഭർത്താവു തന്നെയാണ് !

4. Deepa Vasudevan:- സുഹൃത്തിന്റെ റൂം മേറ്റിനും, കൂടെ ജോലി ചെയ്യുന്ന ആൾക്കും കോവിഡ്. അവനോട് സ്ഥിരം സംസാരിക്കാറുണ്ട്. ഇപ്പോഴും ജോലിക്ക് പോകുന്നു. കോവിഡ് നാണിച്ച് ഓടിക്കാണും എന്നാ പുള്ളിക്കാരൻ പറയുന്നത്.

5. Sarath Chandran:-  ഞങ്ങൾ സ്ഥിരം സംസാരിക്കുന്നു. ചേടത്തി കോവിഡ് വാർഡിൽ ആണ്. 

6. Anoop Irattel:- ആഴ്ചയിൽ നാലു തവണ എങ്കിലും സംസാരിക്കാറുണ്ട്. കസിൻ UAE ഇൽ കൊറോണ ബാധിച്ചു റൂമിൽ ഇരുപ്പാണ്. പുള്ളിക്ക് ഒരു ജലദോഷത്തിന്റെ ശല്യം പോലുമില്ല. കൂൾ.

7.  Sanal Janardanan:- ഞാൻ ഒരുപാടു പേരുമായി സംസാരിച്ചു . പലരും അസുഖം വച്ച് തന്നെ കോവിഡ് ബാധിതരെ ചികിത്സിക്കുന്നു . സ്വയം ചികിത്സാ പോലും കിട്ടാതെ.

8.  Arun Kumar T A:‌-  എനിക്ക് സംസാരിക്കാൻ വേറെ എവിടെയും പോകേണ്ട. ഭാര്യ നേഴ്സ് ആണ് ദുബായിൽ ജോലി ചെയ്യുന്നു. എന്നും സംസാരിക്കാറുണ്ട്. സ്ഥിതി വളരെ മോശം ആണ്.

9. Bency John:-  ഞാൻ പലരോട് സംസാരിച്ചു. കോവിഡിനെ ഭയക്കേണ്ടതില്ല.

10. Rakesh Pc:-  ഒരു പ്രവാസി സുഹൃത്തിന്റെ അനുഭവം, അതിജീവനം.

11.  ജോഷി ആർ:‌-  എന്റെ സുഹൃത്താണ്, സ്വന്തം അനുഭവം പറഞ്ഞപ്പോൾ അത് എഴുതാൻ പറഞ്ഞു ചെയ്യിച്ചത്.

12. Aneesh Kerala:- ഭാര്യയും ഭർത്താവും കുഞ്ഞുങ്ങളുമടക്കമുള്ള ആറേഴു കുടുംബങ്ങൾ ഇപ്പോഴും ചികിത്സയിൽ ഉണ്ട്. ഇതിൽ പലരും നഴ്സ് മാരാണ്. എല്ലാവരെയും ഇടക്കിടക്ക് വിളിക്കാറുണ്ട്. ഇതിൽ ആറേഴു മാസം പ്രായമുള്ള ഒരു കുഞ്ഞുമുണ്ട് പോസിറ്റീവ്. യുഎഇ യിലാണ്.

ലോക്ക് ഡൗൺ സമയത്ത് വായിക്കാൻ പറ്റിയ ഏറ്റവും ഉചിതമായ ഒരു പുസ്തകമാണ് ആൻഫ്രാങ്കിന്റെ ഡയറിക്കുറിപ്പുകൾ. മുൻപ് വായിച്ചിട്ടുണ്ടെങ്കിൽപ്പോലും ഒരിക്കൽക്കൂടി വായിക്കാൻ പോന്നത്. അടച്ചിരുപ്പിന്റെ വേദനയും ബുദ്ധിമുട്ടും എന്താണെന്ന് അക്ഷരാർത്ഥത്തിൽ വരച്ചിടുന്ന ഒന്ന്.

പുറത്തിറങ്ങാതെയും നാസിപ്പടയ്ക്ക് പിടികൊടുക്കാതെയും ഒളിച്ച് താമസിക്കേണ്ടി വരുന്ന ഒരു കുടുംബത്തിലെ ടീനേജുകാരി സ്വന്തം ഡയറിയിൽ കുറിച്ചിട്ട മാനസിക വ്യാപാരങ്ങളും ആകുലതകളും ലോകം ഏറ്റെടുക്കുക തന്നെ ചെയ്തു. ചരിത്രത്തിന്റെ ഭാഗമായി മാറിയ ഡയറിക്കുറിപ്പുകൾ !

കൊറോണക്കാലത്ത് ലോകം കടന്നുപൊയ്ക്കൊണ്ടിരിക്കുന്നത് ഏതാണ്ട് ആൻ ഫ്രാങ്കിന്റേയും കുടുംബത്തിന്റേയും, അത്തരം നൂറ് (അതോ ആയിരമോ) കണക്കിന് കുടുംബങ്ങളുടേയും അവസ്ഥയിലൂടെയാണ്.
അനാവശ്യമായി പുറത്തിറങ്ങിയാൽ നാസിപ്പടയ്ക്ക് പകരം പിടിക്കുന്നത് കൊറോണയല്ലെങ്കിൽ ലോക്കൽ പൊലീസ് ആയിരിക്കുമെന്ന് മാത്രം. വേറെയും ചില വ്യത്യാസങ്ങൾ കൂടെയുണ്ട്. എന്തായാലും ആ അവസ്ഥയേക്കാൾ ഭേദം ഇന്നത്തേത് തന്നെയാണ്.

ഈ കുറിപ്പ് വായിക്കുന്നവരിൽ ആൻ ഫ്രാങ്കിനെ വായിച്ചിട്ടില്ലാത്തവർ ആരുമുണ്ടാകാൻ സാദ്ധ്യതയില്ല. ആയതിനാൽ കൂടുതൽ വർണ്ണിക്കാൻ ഉദ്ദേശിക്കുന്നില്ല. വായിക്കാത്തവരുണ്ടെങ്കിൽ വായിക്കുക തന്നെ വേണം. കൊറോണക്കാലത്ത് ജീവിച്ചിട്ട് ആൻ ഫ്രാങ്കിന്റെ ഡയറിക്കുറിപ്പുകളിലൂടെ കടന്നുപോയിട്ടില്ലെങ്കിൽ പാൻഡമിക്ക് അപരാധമായി കണക്കാക്കപ്പെട്ടേക്കാം

ഇന്നലെ വരെയുള്ള ഒന്നാംഘട്ട ലോക്ക്ഡൗൺ ദിനങ്ങളിൽ തയ്യാറാക്കിയ ആക്രി വീഡിയോകൾ എല്ലാ ദിവസവും വൈകിട്ട് 7 മണിക്ക് യൂട്യൂബിൽ പോസ്റ്റ് ചെയ്തിരുന്നു. ആ 21 വീഡിയോ ലിങ്കുകൾ ഒരുമിച്ച് താഴെ കൊടുക്കുന്നു.

ആക്രിതൻ എന്നാൽ വൈവിദ്ധ്യമാർന്ന സാധനങ്ങൾ കൊണ്ടുനടന്ന് വിൽക്കുന്നയാൾ എന്നാണർത്ഥം. ആക്കിറി, ആക്രി എന്നീ പദങ്ങൾക്ക് അർത്ഥം തിരഞ്ഞാലും ഇതൊക്കെത്തന്നെയാണ് ലഭിക്കുക. ഉപയോഗശൂന്യമായ സാധനങ്ങൾ ആരെങ്കിലും വിൽക്കാൻ കൊണ്ടുനടക്കുമോ ? അത് ആരെങ്കിലും വാങ്ങുമോ ? പിന്നെങ്ങനെയാണ് ആക്കിറി/ആക്രി എന്ന പദത്തിന് ആവശ്യമില്ലാത്ത സാധനങ്ങൾ എന്ന രീതിയിലും പഴയതെന്ന നിലയ്ക്കും അർത്ഥങ്ങൾ നമ്മൾ സങ്കൽപ്പിച്ചുണ്ടാക്കിയതെന്ന് മാത്രം മനസ്സിലാകുന്നില്ല.

1. മാസ്ക്കുകൾ – https://m.youtube.com/watch?v=B3AhcXt1Z4Y

2. വിളക്കുകൾ – https://m.youtube.com/watch?v=PRzAK8Ttqu8

3. ലക്ഷ്മി ശിൽപ്പം – https://m.youtube.com/watch?v=EbUb2VZ-kaU

4. തേപ്പ് പെട്ടികൾ – https://m.youtube.com/watch?v=TXj7JN7SlTM

5. ഫോസിൽ പാത്രം – https://m.youtube.com/watch?v=Mmwgg2zKTNQ

6. എഴുത്തോലയും എഴുത്താണിയും – https://m.youtube.com/watch?v=UIw1zfIXSmo

7. ലൂം ഷട്ടിൽ – https://m.youtube.com/watch?v=LDrYI29d4MQ

8. മണൽ ഘടികാരം – https://m.youtube.com/watch?v=OQOS71y9VHU&t=2s

9. വടക്കുനോക്കി യന്ത്രം – https://m.youtube.com/watch?v=9UVgQ4IJctI

10. ഫ്രിഡ്ജ് മാഗ്നറ്റ് – https://m.youtube.com/watch?v=AabZ3osMly4

11. വാടാത്ത ഓർക്കിഡ് – https://m.youtube.com/watch?v=hNZJUiqAzZc

12. മോണോക്കുലർ – https://m.youtube.com/watch?v=hzDokr0EfQs

13. ടെലിഫോൺ – https://m.youtube.com/watch?v=yyHtAZce9XM

14. ഷേക്സ്പിയറിന്റെ ശിൽപ്പം – https://m.youtube.com/watch?v=0kXWsctJSY4

15. മണികൾ – https://m.youtube.com/watch?v=7gJcCp0b_ls&t=9s

16. തോക്ക് – https://m.youtube.com/watch?v=P1W3PxCnko0&t=18s

17. സിങ്ങിംങ്ങ് ബൗൾ – https://m.youtube.com/watch?v=V-4fmL3gaEE

18. ഗലീലിയോ തെർമോമീറ്റർ – https://m.youtube.com/watch?v=qMZVPkkPhgA

19. ഓണവില്ല് – https://m.youtube.com/watch?v=fCymRHlv6G8

20. ചൈനീസ് ബോൾ – https://m.youtube.com/watch?v=my8SLGVkDYw

21. മഴമൂളിയും കൂട്ടരും – https://m.youtube.com/watch?v=9AaSAEVcy8E&t=27s

വാൽക്കഷണം:- ലോക്ക്ഡൗൺ നീട്ടിയ സാഹചര്യത്തിൽ കൂടുതൽ ആക്രികൾ പരിചയപ്പെടുത്താൻ വകുപ്പുണ്ടായിരുന്നു. പക്ഷേ ലാപ്പ്ടോപ്പ് പണിമുടക്കിയത് മൂലം അത് സാദ്ധ്യമല്ലാതായിരിക്കുന്നു. പൊതുവെ തണുത്ത പ്രതികരണമായിരുന്നു എന്നതും ഒരു കാരണമായി കണക്കാക്കാം.

അവനവന്റെ താൽപ്പര്യങ്ങൾക്കപ്പുറം സ്വന്തം കുടുംബത്തിന്റെ പോലും ആരോഗ്യമോ സുരക്ഷയോ വിഷയമല്ലാത്ത സങ്കുചിത മനസ്സിനുടമകളാണ് ചുറ്റിലും. സമൂഹത്തിന്റെ നന്മയ്ക്കായി പ്രവർത്തിക്കുന്നവരെന്ന് നാം കരുതിപ്പോന്നിരുന്ന പുരോഹിതന്മാരിൽ നിന്നും ഉന്നത ഉദ്യോഗസ്ഥന്മാരിൽ നിന്നും പൊതുപ്രവർത്തകരിൽ നിന്നുമെല്ലാം ഇങ്ങനെയൊരു സന്നിഗ്ദ്ധ ഘട്ടത്തിൽപ്പോലും മോശം പെരുമാറ്റമാണ് കണ്ടുകൊണ്ടിരിക്കുന്നത്. പത്ത് ദിവസത്തെ ലോക്ക് ഡൌൺ കഴിഞ്ഞതോടെ വിലക്കുകൾ എല്ലാം ലംഘിച്ച് ജനങ്ങൾ വീണ്ടും കൂട്ടത്തൊടെ പുറത്തിറങ്ങാൻ തുടങ്ങിയിരിക്കുന്നു. അത്തരം സംഭവങ്ങളുടെ ചില വാർത്തകൾ താഴെ പങ്കുവെക്കുന്നു.

ആയതിനാൽ മനുഷ്യന്മാരിലുള്ള പ്രതീക്ഷ നഷ്ടമാകുന്നു. നമ്മൾ കരകേറിയേക്കാം. പക്ഷേ, നിശ്ചിത സമയത്തൊന്നും അതുണ്ടാകാൻ പോകുന്നില്ല. ഒരുപാട് മനുഷ്യജീവനുകൾ കുരുതി കൊടുത്തല്ലാതെ അതുണ്ടാകാൻ പോകുന്നുമില്ല. ആരെങ്കിലും കോവിഡിനെതിരെയുള്ള വാക്സിൻ കണ്ടുപിടിക്കുന്നത് വരെ നമ്മൾ കൈകാലിട്ടടിച്ച് കുഴയും. മരുന്നൊന്നും കണ്ടുപിടിക്കാനായില്ലെങ്കിൽ മഹാദുരന്തം ഇതിനേക്കാൾ വലിയ തോതിൽ പൂണ്ട് വിളയാടും. ഈ സമൂഹം നൽകുന്ന സന്ദേശം അതാണ്. ദൈവങ്ങൾ പോലും കൈയൊഴിഞ്ഞ അവസ്ഥയാണ്. അവനവൻ മാത്രമാണ് ഏക രക്ഷാമാർഗ്ഗം. ആ മാർഗ്ഗം അടക്കുന്നതും അവനവൻ തന്നെയാണ്.

ഇനി, ഇങ്ങനെ ചിന്തിക്കാൻ ഇടയാക്കിയ ആ വാർത്തകളിൽ ചിലത് വായിക്കൂ.

വാർത്ത 1:- കൊച്ചിയില്‍ വിലക്ക് ലംഘിച്ച് പ്രഭാത സവാരിക്കിറങ്ങിയ 41 പേര്‍ അറസ്റ്റില്‍.

വാർത്ത 2:- നിരോധനം ലംഘിച്ച് സ്‌കൂളിൽ ജുമാ നമസ്‌കാരം; ഈരാറ്റുപേട്ടയിൽ 23 പേർ അറസ്റ്റിൽ.

വാർത്ത 3:- നിരോധനാജ്ഞ ലംഘിച്ച് പുത്തൻ‌കുരിശ് പള്ളിയിൽ പ്രാർത്ഥന നടത്തിയ വികാരിയടക്കം ആറ് പേർക്കെതിരെ കേസ്.

വാർത്ത 4:- കൊറോണ നിരീക്ഷണത്തിലിരിക്കെ കൊല്ലം സബ് കളക്ടർ കാൺപൂരിലേക്ക് മുങ്ങി

വാർത്ത 5:- മാഹിയിൽ സംഘം ചേർന്ന് സി.പി.എം.കിറ്റ് വിതരണം; പൊലീസ് കേസെടുത്തു.

വാർത്ത 6:- കൊച്ചിയിൽ വാതുരുത്തിയിൽ വിലക്ക് ലംഘിച്ച് സർക്കാർ കിറ്റ് വിതരണം.

വാർത്ത 7:- ലോക്ക്ഡൗണിനിടെ തിരുവനന്തപുരത്തേക്ക്; കെ.സുരേന്ദ്രന്റെ യാത്ര വിവാദത്തില്‍.

വാർത്ത 8:- ബര്‍ത്ത്‌ഡേ പാര്‍ട്ടിക്ക്‌ ആളുകള്‍ കൂടി; അന്വേഷിക്കാനെത്തിയ ആരോഗ്യപ്രവര്‍ത്തകര്‍ക്ക് നേരേ കൈയേറ്റം.

വാർത്ത 9:- ലോക്ക്ഡൗണ്‍ ലംഘിച്ച് വീട് വിട്ടിറങ്ങുന്നു; മകന്റെ പരാതിയില്‍ അച്ഛനെതിരേ കേസെടുത്ത് പോലീസ്.

വാർത്ത 10:- വിലക്ക് ലംഘിച്ച് പള്ളിയില്‍ പ്രാര്‍ഥന നടത്തിയ ഡോക്ടര്‍ക്ക് സസ്‌പെന്‍ഷന്‍.

വാർത്ത 11:- കൊല്ലത്ത് നീരീക്ഷണത്തില്‍ കഴിയാതെ കറങ്ങിനടന്ന യുവതി അറസ്റ്റില്‍.

വാർത്ത 12:- പരിശോധനയ്ക്ക് തയ്യാറാവാതെ ഇരുന്നൂറോളം പേര്‍ ഒളിവില്‍, ആരാധനാലയങ്ങളില്‍ കയറാന്‍ പൊലീസ്.

വാർത്ത 13:- കര്‍ശ്ശന നീരീക്ഷണം അനുസരിക്കാതെ കൊവിഡ് രോഗിയുടെ മകന്‍, ജനകീയ സര്‍വേക്ക് അധികൃതര്‍.

വാൽക്കഷണം:- ഈ കൊച്ചുകുട്ടി പറയുന്നതൊന്ന് കേട്ട് നോക്കൂ. അത്രയ്ക്കെങ്കിലും വിവേകം മുതിർന്നവർക്കുണ്ടായിരുന്നെങ്കിൽ !!

പിടിച്ചു കൊണ്ടുവരാൻ രാജാവ് പറഞ്ഞാൽ, കൊന്നു കൊണ്ടുവരുന്ന പ്രജകളാണുള്ളത്.

ആരോഗ്യ പ്രവർത്തകരെ അനുമോദിക്കാൻ വേണ്ടി വീടിന് വെളിയിലും ബാൽക്കണിയിലും നിന്ന് കൈകളും പാത്രങ്ങളും കൊട്ടാൻ ആവശ്യപ്പെട്ടപ്പോൾ, സോഷ്യൽ ഡിസ്റ്റൻസിങ്ങ് കാറ്റിൽപ്പറത്തി വാദ്യമേളങ്ങളുമായി തെരുവിലിറങ്ങി ജാഥ നടത്തിയ ജനങ്ങളാണ്. ആദരിക്കേണ്ട ആരോഗ്യ പ്രവർത്തകരെ പിന്നീട് തെരുവിൽ ഓടിച്ചിട്ട് തല്ലുകയും ചെയ്തു.

ഏപ്രിൽ 5ന് (ഞായറാഴ്ച്ച) രാത്രി 9 മണിക്ക് ദിയ, ടോർച്ച്, മൊബൈൽ എന്നിവ പ്രകാശിപ്പിക്കാനാണ് പ്രധാനമന്ത്രി പുതുതായി ആവശ്യപ്പെട്ടിരിക്കുന്നത്.

ആഹ്വാനം കേട്ട് മേൽപ്പറഞ്ഞ പ്രജകൾ തെരുവിൽ പന്തംകൊളുത്തി ജാഥ നടത്താതിരുന്നാൽ നന്നായിരുന്നു. കയ്യിൽ കിട്ടാവുന്നതെല്ലാം പൊതുസ്ഥലങ്ങളിൽ വലിച്ചുവാരിയിട്ട് തീ കൊളുത്താതിരുന്നാൽ മതിയായിരുന്നു.

ഇങ്ങനെ ജ്വലിപ്പിക്കപ്പെടുന്ന വിളക്കുകളിൽ നിന്ന് വരുന്ന പ്രകാശത്തിന്റെ സൂക്ഷ്മവീചികൾ ഒരു ഹോമകുണ്ഡത്തിൽ നിന്നെന്ന പോലെ വലിയൊരു മന്ത്രമായി മാറി കോവിഡ് വൈറസിനെ തുരത്തുമെന്ന് മഹാനുഭാവന്മാരായ സെലിബ്രിറ്റികൾ മൊഴിയുക കൂടെ ചെയ്താൽ കൊറോണ മണ്ടത്തരങ്ങളിലേക്ക് മുതൽക്കൂട്ടായി.

രാജ്യം ഒറ്റക്കെട്ടായി നിന്ന് ഈ മഹാമാരിയെ നേരിടുകയാണെന്ന് തെളിയിക്കാനാണ് ഈ പരാക്രമങ്ങളെങ്കിൽ, ആദ്യം അതിർത്തി ലംഘനമില്ലാതെ, കൊറോണയില്ലാത്ത രോഗികൾക്കെങ്കിലും ഒരു സംസ്ഥാനത്തിൽ നിന്ന് മറ്റൊരു സംസ്ഥാനത്തേക്ക് ചികിത്സ തേടി പോകാനുള്ള സംവിധാനമുണ്ടാക്കുകയാണ് വേണ്ടത്. കോടതിയെപ്പോലും വകവെക്കാതെ സംസ്ഥാനങ്ങൾ വേർതിരിഞ്ഞ് നിന്ന് യൂണിയൻ സംവിധാനത്തിന് കോട്ടം വരുന്ന രീതിയിൽ സ്വന്തം താൽപ്പര്യങ്ങൾ മനുഷ്യത്വരഹിതമായി നടപ്പിലാക്കുന്ന രീതി അവസാനിപ്പിക്കാതെ രാജ്യം ഒറ്റക്കെട്ടാണെന്ന് വിളിച്ച് കൂവി വിളക്ക് തെളിയിക്കുന്നത് പൊറാട്ട് നാടകം മാത്രമാണ്.

ഇടയ്ക്കിടയ്ക്ക് പ്രതീകാത്മക നടപടികൾ ചെയ്തു കൊണ്ടിരുന്നാൽ കൊറോണയെ തുരത്താനാകുമോ? ഏറ്റവും കുറഞ്ഞപക്ഷം സ്വന്തം പാർട്ടിയുടെ കേരള നേതാവ്, കോഴിക്കോട് നിന്ന് തിരുവനന്തപുരത്തേക്ക് ‘അത്യാവശ്യ കാര്യങ്ങൾ’ക്കായി ലോക്ക്ഡൗൺ ലംഘിച്ച് യാത്ര ചെയ്യുന്നില്ലെന്നെങ്കിലും ഉറപ്പ് വരുത്തൂ. ജനങ്ങൾ മുഴുവൻ സ്വന്തം അത്യാവശ്യങ്ങളെല്ലാം ഒഴിവാക്കിയാണ് വീട്ടിൽ അടച്ചിരിക്കുന്നത്. ഭരിക്കുന്ന പാർട്ടിയുടെ നേതാവാണോ പൂജാരിയാണോ പുംഗവനാണോ എന്നൊന്നും കോവിഡിന് വ്യത്യാസമില്ല.

ചുരുക്കത്തിൽ പറഞ്ഞാൽ, കോവിഡിന്റെ അന്ധകാരം തുരത്താൻ വകതിരിവില്ലാത്ത നേതാക്കന്മാരുടേയും അൽപ്പജ്ഞാനികളായ ജനങ്ങളുടേയും തലച്ചോറിനകത്താണ് ആദ്യം വെളിച്ചം തെളിയിക്കേണ്ടത്. എണ്ണയിട്ട് തിരി തെളിയിക്കൽ, കോവിഡ് പൂർണ്ണമായും കെട്ടുകെട്ടിയ ശേഷം ദൈവങ്ങൾ തിരികെ വരുമ്പോൾ ആകാമല്ലോ.

വാൽക്കഷണം:- ശബ്ദവും വെളിച്ചവും കഴിഞ്ഞു. ഇനിയെന്ത് മാരണമാണാവോ ആവനാഴിയിൽ ബാക്കിയുള്ളത്?

കൊറോണയെ അതിജീവിക്കും തോൽപ്പിക്കും എന്നൊക്കെ ഇന്നലെവരെ ഉണ്ടായിരുന്ന പ്രതീക്ഷയും വിശ്വാസവും ഇന്നില്ല.

കഴിഞ്ഞ രണ്ട് ദിവസങ്ങളിൽ രോഗികളുടെ എണ്ണത്തിലുണ്ടായ കുതിച്ചുകയറ്റവും ഇന്ന് ‘ജനത കർഫ്യൂ’ കഴിയുന്നതിന് മുന്നേ പാത്രങ്ങളും കൊട്ടി കൂട്ടംചേർന്ന് തെരുവിലിറങ്ങിയ വിവരദോഷികളായ മനുഷ്യന്മാരുടെ കാഴ്ചയുമാണ് ആ വിശ്വാസം ഇല്ലാതാക്കിയത്. ജനതാ കർഫ്യൂ നടപ്പിലാക്കാൻ ആവശ്യമായ തീറ്റ സാധനങ്ങളും ‘കുടിവെള്ള’വും വാങ്ങാനായി ഉത്സവം പോലെയാണ്, തെരുവിലും ചന്തയിലും ആൾക്കാർ തടിച്ചുകൂടിയത്. കമ്മ്യൂണിറ്റി സ്പ്രെഡ് എന്ന ഭീകരാവസ്ഥ ഇന്ത്യ വിളിച്ചുവരുത്തിക്കഴിഞ്ഞു.

30 പേർ മാത്രം രോഗബാധിതരായി ഉണ്ടായിരുന്നപ്പോൾ ചാടിപ്പോയി രോഗം പടർത്തിയത് ഒന്നോ രണ്ടോ പേർ മാത്രമായിരുന്നു. ഇന്നിപ്പോൾ രോഗബാധിതരുടെ എണ്ണം 360 കടന്നിരിക്കുന്നു. ചാടിപ്പോയി രോഗം പടർത്താൻ പോന്നവരുടെ എണ്ണം അതേ തോതിലോ അതിനേക്കാൾ അധികമോ ആണ്.

വീട്ടിലുള്ളവർ പറഞ്ഞാലോ നാട്ടിലുള്ളവർ പറഞ്ഞാലോ നിയമങ്ങൾ വഴി സർക്കാർ തന്നെ പറഞ്ഞാലോ കടുകിട അനുസരിക്കാത്ത ഒരു ജനതയാണ്. ഈ കുറഞ്ഞ സമയം കൊണ്ട് അവരെ അനുസരണ പഠിപ്പിക്കുക ബുദ്ധിമുട്ടാണ്. ആരെങ്കിലും പറയുന്നത് അനുസരിച്ച് അവർക്ക് ശീലമില്ല; അനുസരിക്കില്ല.

ബോധം, വിവരം, വിവേകം എന്നുള്ളതൊന്നും അടുത്തുകൂടെ പോകാത്തവർ കൂടിയാകുമ്പോൾ കാര്യങ്ങൾ കീഴ്മേൽ മറിയുന്നു. കയ്യടിച്ചും പാത്രങ്ങൾ കൊട്ടിയും ആരോഗ്യ പ്രവർത്തകരെ അഭിനന്ദിക്കണം എന്ന് പ്രധാനമന്ത്രി പറഞ്ഞപ്പോൾ, ജാഥയായി തെരുവിലിറങ്ങി ആ പരിപാടി ആഘോഷമാക്കിയ ജനതയെ എങ്ങനെ കാര്യങ്ങൾ പറഞ്ഞ് മനസ്സിലാക്കുമെന്നാണ്. പോരാത്തതിന് അന്ധവിശ്വാസങ്ങളും തെറ്റായ വിവരങ്ങളും ആവശ്യത്തിലധികം കൂട്ടിനുണ്ട്. ആയതിനാൽ ആളപായം ലഘുവാക്കി രക്ഷപ്പെടുമെന്ന പ്രതീക്ഷ ഇല്ലാതായിരിക്കുന്നു.

രാജ്യം നീങ്ങിക്കൊണ്ടിരിക്കുന്നത് ലോക്ക്ഡൗൺ എന്ന അവസ്ഥയിലേക്ക് തന്നെയാണ്. ഒരു ദിവസമെങ്കിൽ ഒരു ദിവസം മുന്നേ അത് ചെയ്യാനായാൽ അത്രയെങ്കിലും ജീവനുകൾ രക്ഷിച്ചെടുക്കാനാവും. അത്രയ്ക്ക് അദ്ധ്വാനം കുറയും.

ആയതിനാൽ ഈ രാജ്യത്തെ ഒരു വ്യക്തി(പൗരൻ എന്നത് തീരുമാനമായിട്ടില്ലല്ലോ) എന്ന നിലയ്ക്ക് ഞാൻ ആഗ്രഹിക്കുന്നതും നിർദ്ദേശിക്കുന്നതും ലോക്ക്ഡൗൺ ആണ്. ജനങ്ങൾക്ക് ഒന്നോ രണ്ടോ ആഴ്ച്ചയിലേക്ക് വേണ്ട ഭക്ഷണസാമഗ്രികളുടെ കാര്യം ഏർപ്പാടാക്കി രാജ്യം അടച്ചുപൂട്ടി എല്ലാ വരേയും വീട്ടിലിരുത്തുക. ചുറ്റിയടിക്കാനായി പുറത്തിറങ്ങുന്നവരെ പിടിച്ച് തുറുങ്കിലടക്കുക.

ലോകത്തിന്റെ തന്നെ മൊത്തം സാമ്പത്തികാവസ്ഥ തകിടം മറിഞ്ഞിരിക്കുന്നതുകൊണ്ട് അതേപറ്റി ആലോചിച്ച് ബേജാറാകേണ്ട കാര്യമെന്തിരിക്കുന്നു. ജീവനോടെ ബാക്കിയുണ്ടെങ്കിൽ സാമ്പത്തികമൊക്കെ വീണ്ടും പടുത്തുയർത്താമല്ലോ.

ഈ പറയുന്നത് ആരെയും പേടിപ്പെടുത്താൻ വേണ്ടിയോ ഭീതി ജനിപ്പിക്കാൻ വേണ്ടിയോ അല്ല. എനിക്ക് പ്രതീക്ഷ നഷ്ടപ്പെട്ടു എന്ന കാര്യം പറയേണ്ട സമയത്ത് പറയുക എന്നത് എന്റെ അവകാശമാണ്. അതിന്റെ പേരിൽ എനിക്കെതിരെ നടപടി എടുക്കണമെന്നുള്ളവർക്ക് അതാകാം. പക്ഷേ, അഭിപ്രായത്തിൽ മാറ്റമില്ല. എത്രയും പെട്ടെന്ന് ലോക്ക്ഡൗൺ ഉണ്ടാകണം.

വാൽക്കഷണം:- വിവരദോഷം ഒരു കുറ്റമല്ല. മരണത്തെ ഭയക്കുന്നുമില്ല. പക്ഷേ നിയമം ഒരുതരത്തിലും അനുസരിക്കില്ല എന്ന കുറ്റം ഭൂഷണമായി കൊണ്ടുനടക്കുന്നവർക്കിടയിൽ ഒരു വിഡ്ഢിയായി മരണത്തെ പുൽകാൻ ആഗ്രഹിക്കുന്നില്ല. എത്രയും പെട്ടെന്ന് ലോക്ക്ഡൗൺ ഉണ്ടാകണം.