തടവുകാരുടെ ഭക്ഷണത്തിൽ നിന്ന് മട്ടനും മീനും വെട്ടിച്ചുരുക്കാൻ ജയിൽ വകുപ്പ് ശുപാർശ ചെയ്തിരിക്കുന്നു. ആ വകയിൽ 10 കോടി രൂപ ലാഭിക്കാം എന്നാണ് കണക്കാക്കുന്നത്.

ജയിൽപ്പുള്ളികൾക്ക് കഴിഞ്ഞ സർക്കാർ വർദ്ധിപ്പിച്ച് നൽകിയ കൂലി പഴയത് പോലെ ആക്കിയാൽ ഇതിൽക്കൂടുതൽ തുക ലാഭിക്കാൻ പറ്റും.

പെട്രോൾ ബങ്കിൽ ജോലി ചെയ്യുന്ന ഒരു സ്ത്രീക്ക് കിട്ടുന്ന ദിവസക്കൂലി 450 രൂപയാണ്. അവരുടെ കറൻസി ബാഗ് തട്ടിപ്പറിച്ചതിൻ്റെ പേരിൽ ജയിലിൽ ആകുന്ന ഒരു ക്രിമിനലിന് 530 – 620 രൂപ ശമ്പളം കിട്ടും. അതിലും കുറഞ്ഞ ശമ്പളത്തിൽ പണിയെടുക്കുന്ന എത്രയോ അയ്യോ പാവങ്ങൾ ജയിലിന് വെളിയിലുണ്ട്. അത് അനീതിയാണ്.

വിദഗ്ദ്ധ തൊഴിലാളികൾക്ക് 620 രൂപയും, അർദ്ധവിദഗ്ദ്ധ തൊഴിലാളികൾക്ക് 560 രൂപയും അവിദഗ്ദ്ധ തൊഴിലാളികൾക്ക് 530 രൂപയുമാണ് ജയിലിലെ പുതുക്കിയ കൂലി നിരക്ക്. അത് പഴയത് പോലെ 63 – 163 – 230 രൂപ നിരക്കുകൾ ആക്കണമെന്നാണ് എൻ്റെ പക്ഷം.

എൻ്റെ ഈ അഭിപ്രായം, മേൽപ്പടി വാർത്തയുടെ അടിയിൽ കമന്റായി പറഞ്ഞപ്പോൾ, ജയിൽ തൊഴിലാളികൾക്ക് 100 രൂപ മാത്രമാണ് ശമ്പളം എന്ന് എതിരഭിപ്രായവും വന്നു. ജയിലിൽ കിടക്കുന്ന ക്രിമിനൽക്കുവേണ്ടി വാദിക്കാനും സോഷ്യൽ മീഡിയയിൽ ആൾക്കാരുണ്ട് എന്നതാണ് തമാശ.

ഒരു കാര്യം ശരിയാണ്; ഈ തുക മുഴുവനും കുറ്റവാളികൾക്ക് കിട്ടില്ല. 30% ഇവർ കാരണം ദുരിതമനുഭവിക്കുന്നവരുടെ വീട്ടിലേക്ക് പോകും. കുറച്ച് പണം ജയിലിൽ ഇവരുടെ ഭക്ഷണത്തിനും മറ്റു കാര്യങ്ങൾക്കുമായി എടുക്കും. അത് കഴിഞ്ഞുള്ള തുകയാണ് തടവുകാർക്ക് കിട്ടുക.

കൂട്ടത്തിൽ മറ്റൊരു കാര്യം കൂടി പറയാം. ജയിലിൽ, മെനു പ്രകാരമുള്ള മട്ടനും ചിക്കനും മീനും മറ്റും ആഴ്ച്ചതോറും നൽകുന്നില്ല. ജയിൽ ഉദ്യോഗസ്ഥന്മാരും മേസ്തിരിമാരും കുശാലായി അവർക്ക് ആവശ്യമുള്ള ഭക്ഷണം അടിക്കുന്നുണ്ട്. വല്ലപ്പോഴെല്ലാം ജയിൽവാസികൾക്കും കിട്ടുമായിരിക്കും. പക്ഷേ ഇതിനാവശ്യമായ തുക കൃത്യമായി എഴുതിയെടുക്കുന്നുണ്ട്. അത് എങ്ങോട്ട് പോകുന്നു എന്ന് പ്രത്യേകം പറയേണ്ടതില്ലല്ലോ. (എല്ലാ ജയിലിലും കാര്യങ്ങൾ ഇങ്ങനെ ആകണമെന്നില്ല. ഉദ്യോഗസ്ഥന്മാടെ ഇടപെടൽ പോലെയിരിക്കും.) ഇക്കാര്യം ഞാൻ മനസ്സിലാക്കിയത് ജയിൽ കിടന്നിട്ടുള്ള ഒരാളുടെ കമന്റിൽ നിന്ന് തന്നെയാണ്. (കർമ്മവശാൽ ഞാൻ ഇതുവരെ ജയിലിൽ കിടന്നിട്ടില്ല.) അഴിമതി എന്ന് പറയുന്ന സംഭവം പുരാണത്തിലെ ഹിരണ്യകശിപു പറഞ്ഞത് പോലെയാണ്. അത് തൂണിലും തുരുമ്പിലും മാത്രമല്ല ജയിലിലുമുണ്ട് നമ്മുടെ രാജ്യത്ത്.

അതൊക്കെ എന്തായാലും ജയിലിൽ തുച്ഛശമ്പളം മാത്രമേ കൊടുക്കാൻ പാടുള്ളൂ. ജയിലിൽ അയക്കുന്നത്, ചെയ്ത കുറ്റത്തിൻ്റെ ശിക്ഷ എന്ന നിലയ്ക്കാണ്. സുഖിച്ച് ജീവിക്കാനും പുറത്ത് ജീവിക്കുന്നവരേക്കാൾ കൂടുതൽ സമ്പാദിക്കാനുമല്ല. ശിക്ഷ കഴിഞ്ഞ് പുറത്തിറങ്ങുമ്പോൾ ആദ്യത്തെ കുറച്ച് ദിവസങ്ങൾ പിടിച്ച് നിൽക്കാനും ജീവിക്കാനും അൽപ്പം പണം കയ്യിൽ വേണം. അത് തീരുമ്പോഴേക്കും, പണ്ട് ചെയ്തിരുന്ന പണിയോ (കളവും തട്ടിപ്പും കൊട്ടേഷനും അല്ല ഉദ്ദേശിച്ചത്) മറ്റൊരു ജോലിയോ കണ്ടുപിടിച്ച് ജീവിതം മുന്നോട്ടു നീക്കേണ്ടത് ജയിലിൽ നിന്നും പുറത്തു വരുന്ന വ്യക്തിയുടെ മാത്രം ബാദ്ധ്യതയാണ്.

വാൽക്കഷണം:- മൂന്ന് നേരം ഭക്ഷണവും ആവശ്യമെങ്കിൽ മരുന്നും പണി ചെയ്യുന്നവർക്ക് ചെറിയൊരു കൂലിയും കൊടുക്കുന്നുണ്ടെങ്കിൽ മനുഷ്യാവകാശം സംരക്ഷിക്കുകയും നടപ്പിലാകുകയും ചെയ്ത് കഴിഞ്ഞു. ജയിൽപ്പുള്ളികളും മനുഷ്യരല്ലേ എന്ന ചോദ്യം ഉയർന്നാൽ അതിനുള്ള മറുപടിയാണ്.

ഡി.സി.ബുക്ക്സ് 7 വാള്യമായി ഇറക്കാൻ പോകുന്ന 4000 പേജുള്ള ‘ആധികാരിക കേരള ചരിത്രം’ എന്ന പുസ്തകത്തിൻ്റെ പ്രമോഷണൽ വീഡിയോ https://www.facebook.com/share/v/1UYWXjvYYL/ കണ്ടത് മുതൽ ഉണ്ടായ ചില സംഭവവികാസങ്ങൾ ആണ് ഈ പോസ്റ്റിന് ആധാരം.

ആ വീഡിയോയിൽ വസ്തുതാപരമായ ഒരു പിശകുണ്ട്. അത് ചൂണ്ടിക്കാണിച്ച് ആ വീഡിയോ ഫേസ്ബുക്കിൽ ഷെയർ ചെയ്തുകൊണ്ട് താഴെക്കാണുന്ന വരികൾ ഞാൻ എഴുതി.
**********
പള്ളിപ്പുറം കോട്ടയിൽ നിന്ന് കൊടുങ്ങല്ലൂർ കോട്ടയിലേക്ക് ഭൂഗർഭതുരങ്കം ഉണ്ടെന്ന് പറയുന്നത് അടിസ്ഥാനരഹിതമായ കാര്യമാണ്. കോട്ടയുടെ കീഴ്ഭാഗത്ത് കാണുന്ന ഇടുങ്ങിയ മുറി വെടിമരുന്ന് ശേഖരിക്കാൻ വേണ്ടി മാത്രമുള്ള ഒരു ഇടമാണ്. അത് ഒരു തുരങ്കത്തിന്റെ കവാടമാണ് എന്ന് തെറ്റിദ്ധരിക്കുന്നവർ ധാരാളമുണ്ട്.

ഇത്തരം ഭോഷ്ക്കുകൾ പ്രചരിപ്പിക്കുന്നതിന് മുൻപ് അല്പം കൂടെ ചരിത്രം പഠിച്ചിരുന്നെങ്കിൽ!
അടിസ്ഥാനമില്ലാത്തതും വസ്തുതാപരമല്ലാത്തതുമായ മുത്തശ്ശിക്കഥകൾ പോലുള്ള പൊള്ളത്തരങ്ങൾ, നല്ല മുഴങ്ങുന്ന ശബ്ദത്തിൽ DCയെപ്പൊലുള്ള പ്രസാധകരുടെ ലേബലിൽ ജനങ്ങളിലേക്ക് പടർത്തുന്നതും പ്രചരിപ്പിക്കുന്നതും അപലപനീയമാണ്.

വാൽകഷണം:- ‘ആധികാരിക കേരള ചരിത്രം’ എന്ന പേരിൽ ആ പുസ്തകത്തിൽ ഇനി എന്തൊക്കെയാണ് എഴുതി വെച്ചിരിക്കുന്നത് എന്ന് കണ്ടറിയണം.
************
ഒരു പോസ്റ്റ് ഷെയർ ചെയ്താൽ അതിന് വളരെ മോശം റീച്ച് ആണ് ഫേസ്ബുക്ക് നൽകുന്നതെന്ന് നമുക്കറിയാമല്ലോ ? അതുകൊണ്ട് എൻ്റേതായി ഒരു പോസ്റ്റാക്കിത്തന്നെ ഈ വിഷയം എഴുതിയിടാൻ തയ്യാറെടുക്കുമ്പോഴേക്കും, ഷെയർ ചെയ്ത പോസ്റ്റ് കാണാനിടയായ എൻ്റെ സുഹൃത്ത് റാണി ബി. മേനോൻ Rani B Menon അതിവേഗം ഇടപെട്ടു. ഡി.സി.ബുക്സിൽ പരിചയമുള്ളവരിലേക്ക് ഇത് അറിയിച്ച്, ഇക്കാര്യം ശ്രദ്ധിക്കണം; നടപടി ഉണ്ടാകണം എന്ന് അവർ അറിയിച്ചു.

ഡി.സി.അത് വലിയ പ്രാധാന്യത്തോടെ തന്നെ പരിഗണിച്ചു. അര മണിക്കൂറിനകം ഡീ.സി.യിൽ നിന്ന് ശ്രീ.രാമദാസ് ആർ. എന്ന വ്യക്തിയുടെ ഫോൺ എനിക്ക് വന്നു. ഞങ്ങൾ ഇതേപ്പറ്റി സംസാരിച്ചു. അക്കാര്യങ്ങളുടെ ഉള്ളടക്കമാണ് താഴെ സൂചിപ്പിക്കുന്നത്.

രാമദാസ്:- ആ വീഡിയോ ഒരു പ്രമോഷൻ്റെ ഭാഗമായി ഉണ്ടാക്കിയതാണ്. അൽപ്പം ജിജ്ഞാസ ഉണർത്താൻ വേണ്ടിയുള്ള തരത്തിലാണ് അത് ചെയ്തിരിക്കുന്നത്. അതുകൊണ്ടാണ് തുരങ്കം ഉണ്ട് എന്ന രീതിയിൽ പറഞ്ഞത്.

നിരക്ഷരൻ:- താളിയോലകളിലും ചെമ്പുതാളുകളിലും പുസ്തകങ്ങളിലും എഴുതി വെക്കുന്നത് മാത്രമല്ല ചരിത്രം. കാലം കടന്ന് പോകുമ്പോൾ ഡിജിറ്റൽ മീഡിയയിൽ വരുന്നതും ചരിത്രത്തിൻ്റെ ഭാഗമാകും. അങ്ങനെ നോക്കിയാൽ പ്രമോഷന് വേണ്ടി ഉണ്ടാക്കിയ ആ വീഡിയോ തെറ്റായ ചരിത്രമാണ് പറയുന്നത്. അതും പ്രചരിപ്പിക്കപ്പെട്ട് മുന്നോട്ട് നീങ്ങി നാളെ ചരിത്രത്തിൻ്റെ ഭാഗമാകും.

രാമദാസ്:- പുസ്തകത്തിൻ്റെ ആ ഭാഗത്ത് ഇതേ പിശക് വന്നിട്ടില്ല എന്ന് ഞങ്ങൾ പരിശോധിച്ച് ഉറപ്പ് വരുത്തുന്നതാണ്.

നിരക്ഷരൻ:- അങ്ങനെയാണെങ്കിൽ ആ വീഡിയോയിൽ വീണ്ടും പിശകുകൾ ഉണ്ട്. ഫോർട്ട് കൊച്ചിയിലെ പരദേശി സിന്നഗോഗ് കഴിഞ്ഞാൽപ്പിന്നെ കേരളത്തിലെ ഏറ്റവും വലിയ സിന്നഗോഗ് ചേന്ദമംഗലത്തേത് ആണെന്നാണ് വീഡിയോയിൽ പറയുന്നത്. അതും വസ്തുതാവിരുദ്ധമാണ്. ചേന്ദമംഗലം സിന്നഗോഗിനേക്കാൾ മൂന്നിരട്ടിയെങ്കിലും വലിപ്പമുണ്ട് പറവൂർ സിന്നഗോഗിന്. പുരയിടത്തിൻ്റെ വലിപ്പവും കെട്ടിടത്തിൻ്റെ വലിപ്പവും വെച്ച് നോക്കിയാൽ പറവൂർ സിന്നഗോഗ് ആണ് കേരളത്തിലെ തന്നെ ഏറ്റവും വലിയ സിന്നഗോഗ്.

രാമദാസ്:- ഇക്കാര്യവും അച്ചടിയിൽ വരുന്നുണ്ടോ എന്ന് പരിശോധിക്കുന്നതാണ്.

നിരക്ഷരൻ:- എങ്കിൽ ഒരു കാര്യം കൂടെ പരിശോധിക്കണം. പള്ളിപ്പുറം കോട്ടയ്ക്ക് ആയക്കോട്ട എന്നൊരു പേര് കൂടെ ഉള്ളതായി സർക്കാരിൻ്റെ ഭാഗത്ത് നിന്നും ആ ഭാഗത്തുള്ള ബോർഡുകളിലും ഒക്കെ പ്രചരണമുണ്ട്. സത്യത്തിൽ അതല്ല ആയക്കോട്ട. മുനമ്പം അഴിമുഖത്ത് ഉണ്ടായിരുന്ന തെങ്ങുകൊണ്ട് ഉണ്ടാക്കിയ ഒരു കോട്ടയാണ് ആയക്കോട്ട. അത് പിന്നീട് തീയിട്ട് നശിപ്പിക്കപ്പെട്ടു. അങ്ങനെ ഒരു കോട്ട അവിടെ ഉണ്ടായിരുന്നതായി പ്രൊഫ: എൻ. ആർ. പ്രഭാകരൻ അടക്കമുള്ള പ്രാദേശിക ചരിത്രകാരന്മാർ അടയാളപ്പെടുത്തുന്നുണ്ട്. അക്കാലത്തെ ഡച്ച് ഗവർണ്ണർമാർ ആയിരുന്ന ആഡ്രിയൻ മോയൻസ്, ഗലാറ്റി എന്നിവരുടെ രേഖകളിലും ഇക്കാര്യം ക്യത്യമായി സൂചിപ്പിക്കുന്നുണ്ട്. നശിപ്പിക്കപ്പെട്ട് പോയ ഒരു കോട്ടയുടെ പേര് മറ്റൊരു കോട്ടയ്ക്ക് ചാർത്തിക്കൊടുക്കുകയാണ് ഉണ്ടായത്. നിങ്ങളുടെ പുസ്തകത്തിൽ എവിടെയെങ്കിലും പള്ളിപ്പുറം കോട്ടയെ ആയക്കോട്ട എന്ന് പരാമർശിക്കുന്നുണ്ടെങ്കിൽ അത് വസ്താപരമായി ശരിയല്ല. പ്രാദേശിക ചരിത്രകാരന്മാർ തെളിവടക്കം നിരത്തി സൂചിപ്പിക്കുന്ന കാര്യങ്ങൾ കൂടെ ആധികാരിക ചരിത്രം എന്ന് പറയുന്ന ഒരു പുസ്തകത്തിനായി പരിഗണിക്കപ്പെടേണ്ടതാണ്.

രാമദാസ്:- ഇക്കാര്യവും ഞങ്ങൾ പരിശോധിക്കുന്നതാണ്. ഞങ്ങൾ അവലംബിച്ചിട്ടുള്ളത് കൊളോണിയർ ആർക്കൈവ്സ് ആണ്.

നിരക്ഷരൻ:- കൊളോണിയൽ ആർക്കൈവ്സ് പരിഗണിച്ചിട്ടുണ്ടെങ്കിൽ ആയക്കോട്ട വിഷയം കൃത്യതയോടെ വരേണ്ടതാണ്. പള്ളിപ്പുറം കോട്ടയെ ആയക്കോട്ട എന്ന് പുസ്തകത്തിൽ എവിടെയെങ്കിലും പരാമർശിക്കുന്നുണ്ടെങ്കിൽ, കൊളോണിയർ ആർക്കൈവ്സ് പരിഗണിച്ചിട്ടില്ല എന്നാണ് സാരം. അങ്ങനെയെങ്കിൽ ഈ പുസ്തകത്തെ ആധികാരിക കേരള ചരിത്രം എന്ന് പറയുന്നത് ശരിയല്ല. സത്യത്തിൽ എനിക്ക് താൽപ്പര്യമുള്ള വിഷയമാണ് കോട്ടകളും ചരിത്രവുമൊക്കെ. അതുകൊണ്ട് തന്നെ ഈ പുസ്തകം ഞാൻ വാങ്ങേണ്ട ഒന്നുതന്നെയാണ്. പക്ഷേ, ഒരു കൊച്ച് വീഡിയോയിൽ മാത്രം രണ്ട് പിശകുകൾ കാണാൻ പറ്റിയ നിലയ്ക്ക് ഈ പുസ്തകത്തിൻ്റെ കാര്യത്തിൽ എനിക്ക് ആശങ്കയുണ്ട്. ഞാനതിൻ്റെ കോപ്പി സ്വന്തമായി വാങ്ങുന്നില്ല. ലൈബ്രറിയിൽ നിന്നോ മറ്റോ എടുത്ത് വായിച്ചതിന് ശേഷം മേൽപ്പറഞ്ഞ പിശകുകൾ അതേപടി നിലനിൽക്കുന്നുണ്ടെങ്കിൽ ഒരു പ്രസ്സ് മീറ്റ് വിളിച്ച് ഇക്കാര്യം എല്ലാവരിലേക്കും എത്തിക്കാൻ ശ്രമിക്കുന്നതാണ്.
………..
…..
..
ഞങ്ങളുടെ സംസാരത്തിൻ്റെ രത്നച്ചുരുക്കം മാത്രമാണ് മുകളിലുള്ളത്.

ഈ പുസ്തകത്തിനായി കാത്തിരിക്കുന്നു. ഒരു ചരിത്രപുസ്തകം തയ്യാറാക്കുന്നത് അങ്ങേയറ്റം ശ്രമകരമായ ജോലി തന്നെയാണെന്ന് നന്നായി അറിയാം. പ്രമോഷന് വേണ്ടി വീഡിയോകൾ ഉണ്ടാക്കുമ്പോൾ പോലും തെറ്റ് പറ്റാൻ പാടില്ലാത്തതാണ്. എന്നിരുന്നാലും പുസ്തകത്തിൽ ആ പിശകുകൾ കയറി വരാതിരിക്കാൻ എൻ്റെ പോസ്റ്റും റാണി ബി.മേനോൻ്റെ ഇടപെടലും ഡീ.സി.യിൽ നിന്നുണ്ടായ പ്രതികരണവും ഇടയാക്കുമെങ്കിൽ വളരെ സന്തോഷം; വളരെ നല്ലത്. ഇത്രയും സംഭവിച്ചിട്ടും അതേ പിശകുകൾ പുസ്തകത്തിൽ ആവർത്തിക്കുന്നുണ്ടെങ്കിൽ നിരാശാജനകം എന്ന് പറയേണ്ടി വരും.

എന്തായാലും ഒരു പ്രശ്നം അവതരിപ്പിച്ചപ്പോൾ, അതിൻ്റെ മെറിറ്റ് നോക്കുക പോലും ചെയ്യാതെ, ഇങ്ങോട്ട് വിളിച്ച് അതേപ്പറ്റി അന്വേഷിക്കാൻ ഡി.സി.കാണിച്ച ശുഷ്ക്കാന്തി അഭിനന്ദനാർഹമാണ്. നന്ദി.

വാൽക്കഷണം:- ഡി.സി.യിൽ നിന്ന് ഇങ്ങോട്ട് വിളിച്ച് സംസാരിച്ച സ്ഥിതിയ്ക്ക്, ഇനി ഇതേപ്പറ്റി പുസ്തകം വന്നതിന് ശേഷം എഴുതിയാൽ മതി എന്നാണ് ആദ്യം കരുതിയതെങ്കിലും, നാളെ എന്ന ദിവസത്തേക്ക് ആയുസ്സ് നീട്ടിക്കിട്ടിയിട്ടുണ്ടോ എന്ന് ഉറപ്പില്ലാത്തതിനാൽ കൈയോടെ പറഞ്ഞ് പോകുന്നു എന്ന് മാത്രം.

ഭാഗി 3.0 (ഥാർ) വാങ്ങാൻ മഹീന്ദ്ര ഷോറൂമിൽ പോയപ്പോളാണ് ഞാനത് ശ്രദ്ധിച്ചത്. അവിടെയുള്ളവരെല്ലാം ഫോർ വീൽ ഡ്രൈവ് വാഹനത്തെ 4 ഇൻ്റു 4 (4×4) എന്നാണ് പറയുന്നത്.

അങ്ങനെ പറയുന്നത് തെറ്റാണെന്നും കണക്ക് വിഷയമായി വരുമ്പോൾ മാത്രമാണ് 4 ഇൻ്റു 4 എന്ന് പറയുക. അല്ലാത്തപ്പോൾ 4 ബൈ 4 എന്ന് പറയണമെന്നും നെറ്റിൽ നിന്ന് തെളിവടക്കം എടുത്ത് കാണിച്ച് അവരെ ബോദ്ധ്യപ്പെടുത്തി. എന്നിട്ട് അവരിപ്പോൾ ശരിയായി പറയുന്നുണ്ടോയെന്ന് ഉറപ്പൊന്നുമില്ല. എന്തെങ്കിലും പറയട്ടെ. ഞാൻ വിട്ടുപിടിച്ചു.

വർഷങ്ങൾക്ക് മുൻപ് കെട്ടിടം പണിയുമായി ബന്ധപ്പെട്ട് ടൈൽ വാങ്ങാൻ പോയപ്പോൾ ഇതേ അനുഭവം ഉണ്ടായിട്ടുണ്ട്. ടൈൽ ഷോറൂമിലെ ജീവനക്കാർ ടൈലിൻ്റെ അളവിനെ പറയുന്നത് 2 ഇൻ്റു 2, 1 ഇൻ്റു 1 എന്നൊക്കെയാണ്. അതും തെറ്റാണ്. 2 ബൈ 2, 1 ബൈ 1 എന്ന് വേണം അളവുകൾ വരുമ്പോൾ പറയാൻ. എഴുതുന്നത് പക്ഷേ x ഇട്ട് തന്നെ. വായിക്കുമ്പോളാണ് ശ്രദ്ധിക്കേണ്ടത്.

ഇത്രയും ഇപ്പോൾ പറയാൻ കാരണം, ബിഗ് ബോസ് സീസൺ 8ൻ്റെ പരസ്യ ടീസറുമായി ലാലേട്ടനെ കാണാൻ ഇടയായതുകൊണ്ടാണ്. അതിൽ ലാലേട്ടൻ പറയുന്നു 24 ഇൻ്റു 7 (24×7) എന്ന്.

എൻ്റെ പൊന്ന് ലാലേട്ടാ…. എത്രയോ സിനിമകളിൽ അങ്ങ് അഭിനയിച്ചിരിക്കുന്നു. എത്രയോ കഥകളിലൂടെയും തിരക്കഥകളിലൂടെയും കടന്ന് പോയിരിക്കുന്നു. ഇതിനൊക്കെ അപ്പുറമല്ലേ ഇക്കാലമത്രയും അങ്ങ് ഉണ്ടാക്കിയെടുത്ത ലോകപരിചയം. ഇതൊക്കെ എഴുതി കാർഡിലാക്കി തരുന്നവന്മാർക്ക് അത്രയ്ക്കൊന്നും ലോകപരിചയമോ ജ്ഞാനമോ വിവരമോ ഇല്ലെന്ന് എല്ലാവർക്കുമറിയാം. അവർക്ക് തെറ്റ് പറ്റിപ്പോയാലും അങ്ങേയ്ക്ക് അത് തിരുത്താമല്ലോ?

“മോനേ/മോളേ…. 24 ഇൻ്റു 7 എന്നല്ല, 24 ബൈ 7 എന്ന് വേണം പറയാൻ.” എന്ന് അവരെ പറഞ്ഞ് മനസ്സിലാക്കാനും കാർഡ് തിരുത്തി വായിക്കാനും അങ്ങേയ്ക്ക് കഴിയുമായിരുന്നല്ലോ? ഇനി അങ്ങേയ്ക്കും ഇത് അറിയില്ല എന്നാണോ? എങ്കിൽ ഞാൻ സുല്ലിടുന്നു, പൂർവ്വാധികം നിരക്ഷരനായി പിൻവാങ്ങുന്നു.

വാൽക്കഷണം:- ബിഗ് ബോസ് എന്ന പരിപാടി കാണാറില്ല. പണ്ട് ബിഗ് ബ്രദർ എന്ന സംഭവം വന്നപ്പോൾ കഷ്ടി അര മണിക്കൂർ കണ്ടിട്ടുണ്ട്. അതോടെ മതിയായി. സഞ്ചാരസ്വഭാവം ഉള്ളതുകൊണ്ടാകാം അടച്ചിട്ട മുറിയിൽ ഒരു പരിധി കഴിഞ്ഞാൽ ശ്വാസം മുട്ടും. അത്തരം ഇടങ്ങളിൽ ദീർഘകാലം കിടക്കുന്നവരെ കണ്ടാലും ശ്വാസം മുട്ടും. എന്നാലും ഇതിൻ്റെയൊക്കെ പരസ്യങ്ങൾ കയറി വരുമല്ലോ? ആ വഹയിൽ സാബുമോൻ, അഖിൽ മാരാർ എന്നിവർ ബിഗ് ബോസ് വിജയികളാണെന്ന് അറിയാം. അതിനപ്പുറം നിരക്ഷരനാണ്.

#4×4
#2×2
#24×7

ആദ്യകാലത്തെ AI ഇമേജുകളെപ്പോലെയല്ല ഇപ്പോളുള്ളത്. കുറേക്കൂടെ കൃത്യത വന്നിട്ടുണ്ട്. ഇനിയങ്ങോട്ട് ആ കൃത്യത കൂടിക്കൂടി വരുകയും ചെയ്യും. എന്നാലും ശ്രദ്ധിച്ചു നോക്കുന്നവർക്ക് നെല്ലും പതിരും തിരിച്ചറിയാൻ ബുദ്ധിമുട്ടൊന്നുമില്ല.

ഇത്തരം AI ഇമേജുകൾക്കടിയിൽ പോയി കമൻ്റിട് ഇളിഭ്യരാകുന്ന മലയാളികളെ കാണുമ്പോൾ സഹതാപവും സങ്കടവും തോന്നുന്നതിനാലാണ് ഈ പോസ്റ്റിടുന്നത്.

318K ഫോളോവേർസ് ഉള്ള ‘WORLD മലയാളി’ എന്നൊരു പേജ് പരിചയപ്പെടുത്താം. AI ഇമേജുകളിലൂടെ മനുഷ്യന്മാരെ വിഡ്ഢികളാക്കുന്ന ഒരു കൂട്ടരാണിവർ. അവരുടെ അത്തരം ഇമേജുകളിൽ ഒന്നാണ് ഈ പോസ്റ്റിനൊപ്പം കൊടുത്തിരിക്കുന്നത്. സുഖം ഇല്ലാത്ത കുടുംബം ആണെന്ന മുഖവുരയോടെ ഒരു അച്ഛനേയും അമ്മയേയും കുട്ടിയേയുമാണ് കാണിച്ചിരിക്കുന്നത്. മൂന്ന് പേർക്കും ഇരുകൈകളും ഇല്ല. ഞങ്ങൾക്ക് ഒരു ഹായ് തന്നുകൂടെ എന്ന് മാത്രമാണ് ഈ ‘കുടുംബം’ ചോദിക്കുന്നത്. അനുകമ്പ വഴിഞ്ഞൊഴുകുന്ന മണ്ടൻ മലയാളിക്കൂട്ടം കമൻ്റുകളും ആശംസകളും കൊണ്ട് ആ പോസ്റ്റിനെ വൈറലാക്കുന്നു. AI പോസ്റ്റ് പടച്ചുണ്ടാക്കിയ WORLD മലയാളിക്ക് അതിലൂടെ ഫേസ്ബുക്കിൽ നിന്ന് പണം ലഭിക്കുന്നു. പോരേ പൂരം?

വിജ്ഞാനപ്രദമായ പോസ്റ്റുകളും വീഡിയോകളും ഇട്ട് പണമുണ്ടാക്കിക്കൂടെ പരാന്നഭോജികളേ. ജനങ്ങളെ വിഡ്ഢികളാക്കിക്കൊണ്ടും വ്യാജ ഇമേജുകൾ പടച്ചുണ്ടാക്കിയും പണമുണ്ടാക്കുന്നത് എന്തിനാണ്?

മേൽപ്പറഞ്ഞ പേജും സമാനമായ പേജുകളും സബ്സ്ക്രൈബ് / ഫോളോ ചെയ്തിട്ടുള്ളവരുണ്ടെങ്കിൽ അതിൽ നിന്ന് വിട്ട് നിൽക്കുക. നാളെ ഇതുപോലുള്ള ഒരു കുടുംബത്തിന് ധനസഹായം ആവശ്യമുണ്ടെന്ന് ഒരു പോസ്റ്റ് കണ്ടാൽ പലരും പണമയച്ചെന്നും വരും. പണം കൊടുക്കുന്നതോ ഉണ്ടാക്കുന്നതോ എന്നതിലുമപ്പുറം മലയാളികൾ വിഡ്ഢികളാക്കപ്പെടുന്നത് കാണുമ്പോൾ വിഷമമുണ്ട്.

അവരുടെ ഇത്തരം പല പോസ്റ്റുകളിലും പോയി “ഇത് AI പോസ്റ്റാണ്, മലയാളികളെ ഇങ്ങനെ വിഡ്ഡികളാക്കുന്നത് എന്തിനാണ്?” എന്ന് കമൻ്റിട്ടു ഞാൻ. അങ്ങനെ കമൻ്റിടുന്നത് പോലും മറ്റൊരു വിഡ്ഢിത്തമാണെന്ന് അറിഞ്ഞുകൊണ്ട് തന്നെയാണ് അങ്ങനെ ചെയ്തത്. എൻ്റെ ആ കമൻ്റിലൂടെ അവർക്ക് കൂടുതൽ റീച്ച് കിട്ടും എന്നതാണ് വാസ്തവം. നമ്മളിടുന്ന ഓരോ ലൈക്കും കമൻ്റും അവരുടെ റീച്ച് കൂടുകയാണ്. പക്ഷേ ഇനിയങ്ങോട്ട് ആ പോസ്റ്റുകൾ കാണുന്നവരെങ്കിലും എൻ്റെ കമൻ്റിലൂടെ യാഥാർത്ഥ്യം മനസ്സിലാക്കട്ടെ എന്ന് കരുതിയാണ് അങ്ങനെ ചെയ്തത്. അത് ഒന്നാം ഘട്ടം മാത്രമായിരുന്നു. രണ്ടാം ഘട്ടമെന്ന നിലയ്ക്കാണ് ഈ പോസ്റ്റ് ഇടുന്നത്.

AI വ്യാജ വീഡിയോക്കാരെ സമൂഹത്തിൽ നിന്നും സമൂഹമാദ്ധ്യമങ്ങളിൽ നിന്നും അകറ്റി നിർത്തിയില്ലെങ്കിൽ ദൂരവ്യാപകമായ ഭവിഷ്യത്തുകളാണ് ഉണ്ടാകാൻ പോകുന്നത്. അത് അറിഞ്ഞ് മനസ്സിലാക്കി നീങ്ങിയാൽ അവനവന് കൊള്ളാം. ഈ പോസ്റ്റ് ഇടുന്നതോടെ എൻ്റെ ടൈം ലൈനിൽ ഇനിയൊരിക്കലും കയറിവരാൻ കഴിയാത്തവിധം അവന്മാരെ ഞാൻ ബ്ലോക്ക് ചെയ്യുകയാണ്.

അൽപ്പവസ്ത്രധാരികളായ AI സ്ത്രീകളുടെ പേജുകൾ ഫോളോ ചെയ്യുകയും സബ്സ്ക്രൈബ് ചെയ്യുന്നവരും ധാരാളമായി വേറെയുമുണ്ട്; ഒറിജിനൽ വേറെങ്ങും കിട്ടാനില്ലാത്തത് പോലെ!

വാൽക്കഷ്ണം:- കഴിഞ്ഞ ദിവസം ത്രിപുരയിലെ ഉനക്കോടി എന്ന സ്ഥലത്തെപ്പറ്റിയുള്ള ഒരു വീഡിയോ കാണാനിടയായി. വീഡിയോയിൽ പറയുന്ന കാര്യങ്ങളെല്ലാം ശരിയാണ്. പക്ഷേ അതിന്റെ വിഷ്വൽ എല്ലാം AI ആണ്. അതിന് ഉനക്കോടി എന്ന സ്ഥലവുമായി പുലബന്ധം പോലുമില്ല. അവിടെ പോയിട്ടുള്ളതുകൊണ്ട് എനിക്കത് മനസ്സിലായി. പോകാത്തവർ ആ വ്യാജ വിഷ്വൽ കണ്ട് മോഹിച്ച് നേരിട്ട് ചെല്ലുമ്പോളാണ് അമളി പിണഞ്ഞത് തിരിച്ചറിയുക. കാരൂർ സോമൻ്റെ പരിസരത്ത് കൂടെ പോലും സാങ്കേതിക വിദ്യ കടന്ന് പോകാത്തത് സമൂഹമാദ്ധ്യമങ്ങളിലുള്ളവരുടെ സുകൃതം.

#fakeaiposts

അബുദാബിയിലെ അൽ മൻസൂരി സ്പെഷ്യലൈസ്ഡ് എൻജിനീയറിങ് എന്ന കമ്പനിക്ക് വേണ്ടി ഗൾഫ് രാജ്യങ്ങളിലെ പല പല എണ്ണപ്പാടങ്ങളിൽ ജോലി ചെയ്യുന്ന കാലം. യമനിലെ ഏഡൻ, സന എന്നിവിടങ്ങളിലൊക്കെ ജോലി സംബന്ധമായി ഇടയ്ക്കിടക്ക് പോകുമായിരുന്നു.

അങ്ങനെയൊരു ഏഡൻ സന്ദർശനത്തിൻ്റെ ഇടയിലാണ്, ഒരു ഗ്യാസ് സ്റ്റേഷനിൽ ജോലി ചെയ്യുന്ന ധീരുബായി അംബാനിയെ ഞാൻ ആദ്യമായി കാണുന്നത്. ഞാൻ സഞ്ചരിച്ചിരുന്ന വാഹനം പെട്രോൾ അടിക്കാൻ വേണ്ടി ആ ഗ്യാസ് സ്റ്റേഷനിൽ എത്തിയപ്പോൾ ആയിരുന്നു ആ കൂടിക്കാഴ്ച്ച.

പെട്രോൾ അടിച്ച് തരാൻ വന്ന ആ മനുഷ്യനെ കണ്ടപ്പോൾ ഇന്ത്യക്കാരനെപ്പോലെ എനിക്ക് തോന്നി. അതുകൊണ്ടാണ് അദ്ദേഹത്തിനോട് ഹിന്ദിയിൽ പേര് ചോദിച്ചത്. ധീരുബായ് എന്ന് മറുപടി കിട്ടി. ഞങ്ങൾ പിന്നെയും കുറെ നേരം സംസാരിച്ചു നിന്നു. മുംബൈയിലെ കഷ്ടപ്പാടും ദുരിതവും ഒക്കെ കാരണമാണ് യമനിലേക്ക് വരേണ്ടി വന്നത് എന്ന് ദു:ഖത്തോടെ അദ്ദേഹം പറഞ്ഞു.

യമനിയായ ഗ്യാസ് സ്റ്റേഷൻ മുതലാളി കണ്ണുരുട്ടിയതോടെ ഞങ്ങളുടെ സംസാരം മുറിഞ്ഞു. “ഞാൻ കുറച്ചു ദിവസം ഏഡനിൽ ഉണ്ടാകും വീണ്ടും കാണാം” എന്ന് പറഞ്ഞാണ്, അഡ്രസ്സും ഫോൺ നമ്പറും കൈമാറിയ ശേഷം അന്ന് പിരിഞ്ഞത്.

പിന്നീട് പലവട്ടം ഞങ്ങൾ കണ്ടു. ഗ്യാസ് സ്റ്റേഷൻ്റെ തൊട്ടടുത്തുള്ള ചെറിയ റസ്റ്റോറൻ്റിൽ നിന്ന് കാവ കുടിച്ച് മുംബൈ വിശേഷങ്ങൾ പറഞ്ഞ് ചിരിച്ചും നൊമ്പരപ്പെട്ടും എത്രയോ രാത്രികൾ. എന്തെങ്കിലും ചെറിയ ബിസിനസ്സ് ചെയ്തിട്ടാണെങ്കിലും മുംബൈയിലേക്ക് മടങ്ങണമെന്ന് എന്നും അദ്ദേഹം പറയുമായിരുന്നു.

സൗഹൃദം വളർന്ന് വന്നതോടെ ഞാൻ അദ്ദേഹത്തെ ധീരു എന്നും അദ്ദേഹം എന്നെ മന്നു എന്നും വിളിക്കാൻ തുടങ്ങി. അന്നദ്ദേഹത്തിന് തല നിറയെ മുടി ഉണ്ടായിരുന്നത് എൻ്റെ ഓർമ്മയിലുണ്ട്.

യമനിലേക്കുള്ള എന്റെ യാത്രകൾ കുറഞ്ഞതോടെ ഞങ്ങളുടെ കൂടിക്കാഴ്ചകൾക്ക് വിരാമമായി. പാവം അവിടെ ആ ഗ്യാസ് സ്റ്റേഷനിൽത്തന്നെ ജോലി എടുക്കുന്നുണ്ടാകും എന്നാണ് ഒരുപാട് കാലം ഞാൻ കരുതിയിരുന്നത്.

കുറച്ചു വർഷങ്ങൾക്കകം അംബാനി സാമ്രാജ്യം ഉയർന്നു വന്നപ്പോഴും അത് ആ പഴയ ധീരുബായ് ആണെന്ന് ഞാൻ ഊഹിച്ചതേയില്ല. എന്തൊരു മാറ്റമാണ് അദ്ദേഹത്തിന്റെ പ്രകൃതത്തിന്. മുടി നന്നായി കൊഴിഞ്ഞിരിക്കുന്നു. മേദസ് വീണിട്ടുണ്ട്.

പക്ഷേ സ്വഭാവത്തിന് ഒരു മാറ്റവും ഇല്ല. സരസൻ, ലളിതൻ. ഇടയ്ക്ക് എന്റെ അബുദാബി നമ്പറിൽ വിളിക്കുമായിരുന്നു. ഞാൻ അവിടെ നിന്ന് പോന്നതിനു ശേഷം കേരളത്തിലെ നമ്പർ തപ്പി കണ്ടുപിടിച്ച് വിളിക്കാൻ തുടങ്ങി. ഞാൻ മുംബൈയിൽ ചെല്ലുമ്പോൾ അദ്ദേഹത്തെ കാണാതെ പോരുന്നതിൽ നല്ല വിഷമമുണ്ട് കക്ഷിക്ക്. ഭർത്താവ് എപ്പോഴും പറയാറുള്ള മന്നു എന്ന യമൻ-ഇന്ത്യൻ സുഹൃത്തിനെ നേരിൽ പരിചയപ്പെടുത്താത്തതിൽ കോകിലയ്ക്കും പരാതിയുണ്ട് പോലും! കടന്നുവന്ന വഴികൾ ഒന്നും അദ്ദേഹം മറന്നിട്ടില്ല എന്നതായിരുന്നു എൻ്റെ ഏറ്റവും വലിയ സന്തോഷം.

പക്ഷേ എനിക്കെന്തോ അദ്ദേഹത്തിന്റെ സമയം കളയാൻ തോന്നാറില്ലായിരുന്നു. വലിയ തിരക്കുള്ള ആളല്ലേ? അവരുടെ ഓരോ മിനിറ്റുകൾക്കും കോടികൾ വിലയുണ്ട്. അതുകൊണ്ടാണ് ഒഴിഞ്ഞുമാറി നിന്നതും നിൽക്കുന്നതും.

എന്തായാലും Great Indian Expedition മുംബൈയിൽ എത്തുമ്പോൾ അംബാനി കുടുംബത്തിന് പിടി കൊടുക്കേണ്ടി വരും. ങ്ഹാ… എന്തായാലും രാത്രി ഭാഗിയെ പാർക്ക് ചെയ്യാൻ ഒരു സ്ഥലം വേണമല്ലോ. അത് Antilla യുടെ പോർച്ചിൽത്തന്നെ ആയിക്കോട്ടെ. പക്ഷേ, നിർബന്ധിച്ചാലും വീടിന് അകത്ത് ഞാൻ കിടക്കില്ല. എനിക്ക് ഭാഗിയിലെ സൗകര്യങ്ങൾ തന്നെ ധാരാളം.

നന്ദി പറയാനുള്ളത് ശ്രീമതി ബീന കണ്ണനോടാണ്,.. പഴയ കാര്യങ്ങൾ എല്ലാം ഓർമ്മിപ്പിച്ചതിന്. പുള്ളിക്കാരി എയറിൽ നിന്ന് ഇറങ്ങുമ്പോൾ ഒന്ന് നേരിട്ട് പോയിക്കണ്ട് നന്ദി പറയണമെന്നുണ്ട്. “ഇതിലും ഭേദം ലെന ആയിരുന്നു” എന്ന് നേരിട്ട് തന്നെ പറയണം.

ജാമ്യം:- ചേരമാൻ പെരുമാൾ മക്കത്ത് പോയപ്പോൾ നബിയെ കണ്ടു എന്നൊരു പറച്ചിലുണ്ട്. ചരിത്രം പരിശോധിച്ചാൽ രണ്ടാളും ജീവിച്ചിരുന്ന വർഷങ്ങൾ ഒത്തുപോകില്ല എന്ന് മാത്രം. അതുപോലെ കണക്കാക്കിയാൽ മതി ഇതും.

#beenakannanonair
#amabani
#mydheeru
#തള്ളോട്തള്ള്

മലയാള സാഹിത്യത്തെപ്പറ്റിയും കോപ്പിയടിയെപ്പറ്റിയും സോഷ്യൽ മീഡിയയെപ്പറ്റിയും, വിശ്വസാഹിത്യകാരൻ എന്ന് അവകാശപ്പെടുന്ന മലയാളത്തിലെ ഏറ്റവും വലിയ സാഹിത്യ ചോരൻ്റെ വരികൾ ശ്രദ്ധിക്കുക.

• സാഹിത്യം സത്യമാണ് പോലും!

• സോഷ്യൽ മീഡിയയോട് പുച്ഛം.
(അവിടുന്നാണ് വിശ്വ സാഹിത്യകാരൻ നിർദാക്ഷിണ്യം മോഷണം നടത്തിയിരുന്നത്).

• ഇന്ന് നമ്മൾ പൊക്കി നടക്കുന്ന പലരും സർഗ്ഗ സാഹിത്യം അടിച്ചുമാറ്റി അവാർഡ് വരെ നേടിയിട്ടുള്ളവരാണ് പോലും! (ആരാണ് പറയുന്നതെന്ന് പ്രത്യേകം ശ്രദ്ധിക്കുക).

• ഭാഷ നേരിടുന്ന പ്രതിസന്ധിയെപ്പറ്റിയും ഗീർവാണം ഉണ്ട്.

വിശ്വസാഹിത്യകാരൻ പുതിയ മന്ത്രിസഭയിലെ പ്രമുഖരുമായി ചേർന്ന് നിന്ന് ഷാൾ പുതപ്പിക്കലും പുസ്തക പ്രകാശനങ്ങളും തുടങ്ങിയിട്ടുണ്ട്. അതിന്റെ ചിത്രം കമന്റിൽ ഇട്ടിട്ടുണ്ട്. പുതിയ ഭരണകൂടത്തിലെ ഭരണാധികാരികളും മന്ത്രിമാരും സൂക്ഷിച്ചാൽ കൊള്ളാം. പ്രത്യേകിച്ച് സാഹിത്യ അക്കാദമിയുമായി ബന്ധപ്പെട്ടവർ. സമഗ്ര സംഭാവനയ്ക്ക് അർഹനായിട്ടുള്ള മറ്റൊരാൾ ഇന്ന് മലയാളത്തിൽ ഇല്ല എന്നാണ് ആശാൻ സ്വയം പറഞ്ഞു നടക്കുന്നത്.

സമർപ്പണം:- സോമനടി എന്ന് ഇതുവരെ കേട്ടിട്ടില്ലാത്ത മലയാളത്തിലെ പ്രമുഖ എഴുത്തുകാർക്കായി ഈ കുറിപ്പ് സമർപ്പിക്കുന്നു.

സാഹിത്യചോരൻ്റെ ആ വൃത്തികേട് മൊത്തത്തിൽ വായിക്കണമെന്നുള്ളവർക്കായി താഴെ ചേർക്കുന്നു. അരപ്പേജിൽ എത്ര അക്ഷരത്തെറ്റുകളും വ്യാകരണ പിശകുകളും ഉണ്ടെന്ന് കണ്ടുപിടിക്കുന്നവർക്ക് എന്റെ വക ഒരു പുസ്തകം സമ്മാനം. ഇനി താഴെ വായിക്കൂ.
**********
മണിയയും കലയും വാക്കുകൾ സൂക്ഷിച്ചു ഉപയോഗിച്ച് എഴുതണമെന്ന് എഴുതി കണ്ടു. അതെ അക്ഷരം അഗ്നിയാണ്. ഈ ലോകത്തിന്റെ വളർച്ചയും താഴ്ച്ചയും അക്ഷരമാണ്. ഇന്ത്യ താഴെക്ക് പോകുന്ന പ്രധാന കാരണം ഇവിടെ നല്ല വായനയില്ല. ഇവിടെ വളരുന്നത് ചീഞ്ഞ രാഷ്ട്രീയം, ജാതി മതം, സിനിമയാണ്. ഒപ്പം എ ഐ എഴുത്തുകാർ.
പശ്ചാത്യർ വായിച്ചു വളരുന്നു.

ഇത് എഴുതാൻ കാരണം റാണിജി ഒരു പ്രയോഗം നടത്തി. “എഴുത്തിന്റെ എഴുത്തച്ഛനായി മാറി കഴിഞ്ഞു”. ഇതുപോലുള്ള പ്രയോഗം തലയില്ലാത്ത സോഷ്യൽ മീഡിയ എഴുത്തുകാർക്ക് സുഖിക്കും. അതിനാൽ വാക്കുകൾ സൂക്ഷിച്ചു എഴുതുക. സാഹിത്യം സത്യമാണ്. ഈശ്വരനാണ്. അതിന് വിപരീതമാണ് എഴുത്ത് രംഗത്ത് ഇന്ന് കാണുന്നത്. സോഷ്യൽ മീഡിയ അതിനൊരു കാരണമാണ്. എന്തും അതിൽ തള്ളാം. സ്തുതി ക്കാൻ പാണന്മാർ ധാരാളം.

ഭാഷാ സാഹിത്യത്തിൽ ആർക്കും എഴുത്തച്ഛനാകാൻ സാധിക്കില്ല. 1985 ൽ ശ്രീ. ശ്രീമുല നഗരം വിജയൻ എന്റെ “കടൽക്കര” സംഗീത നാടകത്തിന് അവതരിക എഴുതി. അതിലെ ഒരു വാചകം ഇങ്ങനെ “ഈ പ്രപഞ്ച സത്യം കണ്ടെത്തുന്ന കരുത്തനായ അന്വേഷകനാണ് കവി. ആഴ കടലിൽ ആയിരം ചിപ്പികൾ ചികഞ്ഞാലും അപൂർവ്വമായല്ലേ മുത്തു നേടാൻ പറ്റു”. എഴുത്തിന്റെ ലോകം ഈ മുത്തുകൾ തേടിയുള്ള യാത്രയാണ്. കാളിദാസനെപ്പോലുള്ള മഹാന്മാർ ലോകത്തെ കണ്ടത് എഴുത്തിലു ടെയാണ് അല്ലാതെ കച്ചവട അവാർഡ് വാങ്ങി പത്രക്കാരന് കാശ് കൊടുത്തു പത്രത്തിൽ പരസ്യം നടത്തി ഗ്രൂപ്പുകളിൽ ചാർത്തി എഴുത്തുകാർ ആയവരല്ല. എഴുത്തച്ഛനാകാൻ ആർക്കും സാധിക്കില്ല. ഭാഷാ സാഹിത്യം അത്രമാത്രം ആഴത്തിലാണ്. അപൂർവ്വം എഴുത്തുകാർ മുത്തിന്റെ പരിസരത്തു് എത്തിയിട്ടുണ്ട് ഇല്ലെന്നല്ല.

കേരള സാഹിത്യം പതിനാലാം നൂറ്റാണ്ടു മുതൽ ഇംഗ്ലീഷിൽ നിന്ന് കോപ്പി ചെയ്തു എഴുതി വന്നവരാണ്. അതിന് ധാരാളം തെളിവുകളുണ്ട്. ഇന്ന് നമ്മൾ പൊക്കി നടക്കുന്ന പലരും മുൻപുള്ള പലരും സർഗ്ഗ സാഹിത്യം അടിച്ചു മാറ്റി അവാർഡ് വരെ വാങ്ങിയിട്ടുണ്ട്. സർഗ്ഗ സാഹിത്യം നാടകം, നോവൽ, കഥ, കവിതയാണ്. മുമ്പ് സംസ്‌കൃത സാഹിത്യം ഇവിടെ പച്ച പിടിച്ചു. അതൊന്നും ജനകിയമല്ലായിരുന്നു. രാജകീയമായിരുന്നു. ഇപ്പോൾ രാഷ്ട്രീയക്കാർ സാഹിത്യ മേഖലയിൽ കടന്നു കയറി കുറെ അടിമ എഴുത്തുകാരെ വളർത്തി പുകഴ്ത്തലും പുരസ്‌കാരങ്ങളും നടത്തി ഭാഷാ സാഹിത്യത്തെ അപമാനിക്കുന്നു. എം. കൃഷ്ണൻ നായരോ, സുകുമാർ അഴിക്കോടോ, പാട്ടിലൂടെ എത്തിക്കാൻ വയലാറോ ഇല്ല. ഇതാണ് നമ്മുടെ ഭാഷ നേരിടുന്ന പ്രതിസന്ധി. ദുരവസ്ഥ.
***********

കാരൂർ സോമൻ, അദ്ദേഹം പലരിൽ നിന്ന് കട്ടെടുത്തത് പ്രസിദ്ധീകരിച്ച മാതൃഭൂമി, ഭാഷാ ഇൻസ്റ്റിറ്റ്യൂട്ട്, എന്നീ കക്ഷികൾക്ക് എതിരെയുള്ള എൻ്റെ കേസുകൾ തീർപ്പായതിന് ശേഷം ‘മലയാളത്തിലെ സാഹിത്യ ചോരണങ്ങൾ’ എന്ന പേരിലോ ‘സാഹിത്യ ചോരണത്തിൻ്റെ കാണാപ്പുറങ്ങൾ’ എന്ന പേരിലോ ഒരു പുസ്തകം ഇറക്കാൻ പദ്ധതിയുണ്ട്.

പല ഭാഗങ്ങളാണ് മേൽപ്പറഞ്ഞ പുസ്തകത്തിൽ ഉണ്ടാകുക.

ഭാഗം 1:- എന്താണ് സാഹിത്യ ചോരണം? അത് എത്ര വിധം?

ഭാഗം 2:- മലയാളത്തിലെ (കു)പ്രശസ്തമായ സാഹിത്യ ചോരണങ്ങൾ.

(a) മോഷ്ടാവ് ചോരണം സമ്മതിച്ചത്.
(b) മോഷ്ടാവ് ചോരണം സമ്മതിക്കാത്തത്.

ഭാഗം 3:- എൻ്റെ ഭാര്യയേയും മകളേയും പേരടക്കമുള്ള വരികളും 55 പേജുകളും മോഷ്ടിച്ച കേരളത്തിലെ ഏറ്റവും വലിയ സാഹിത്യ ചോരനും അയാളുടെ മറ്റ് അൽപ്പത്തരങ്ങളും. സുപ്രീം കോടതി വരെ നീണ്ട ആ കേസുകളുടെ നാൾവഴികൾ.

ഭാഗം 4:- ഒരാൾ സാഹിത്യ ചോരണം നടത്താൻ ചാലകമാകുന്ന ഘടകങ്ങളും അതിൻ്റെ കാരണങ്ങളും.

ഭാഗം 5:- സാഹിത്യ ചോരണം മലയാള ഭാഷയ്ക്ക് സമ്മാനിച്ച പദപ്രയോഗങ്ങൾ.

ഭാഗം 6:- സാഹിത്യചോരണവും ഇന്ത്യൻ ശിക്ഷാ നിയമവും.

ഭാഗം 7:- എൻ്റെ നിയമ യുദ്ധത്തിൽ കൂടെ നിന്നവരും അതിനെ പരിഹസിച്ചവരും.

ഭാഗം 8:- സാഹിത്യം മോഷ്ടിക്കുന്നവരെ സംരക്ഷിക്കുന്നവരുടെ മനശാസ്ത്രം.

മേൽപ്പറഞ്ഞ പുസ്തകത്തിൻ്റെ ഭാഗം2-ലേക്ക് പുതിയ ഒരു അദ്ധ്യായം കൂടെ എഴുതിച്ചേർക്കാനുള്ള സാദ്ധ്യത കഴിഞ്ഞ ദിവസങ്ങളിൽ ഉടലെടുത്തത് കൊണ്ടാണ് ഈ കുറിപ്പ് എഴുതുന്നത്.

ഇങ്ങനെ പോയാൽ കേസുകൾ തീരുമ്പോഴേക്കും എൻ്റെ പുസ്തകത്തിലെ അദ്ധ്യായങ്ങളുടെ എണ്ണം വർദ്ധിക്കുമല്ലോ എന്നത് അൽപ്പം ആശങ്കയോടെയാണ് കാണുന്നത്. സാഹിത്യ മോഷ്ടാക്കൾ ഇത്തരത്തിൽ ശുഷ്ക്കാന്തി കാണിച്ചാൽ പല വാള്യങ്ങളായി പുസ്തകം ഇറക്കേണ്ടി വരുമല്ലോ എന്നതും അലട്ടുന്നുണ്ട്.

ഞാൻ 4 കേസുകൾ കൊടുത്തു. എനിക്കെതിരെ 3 കേസുകൾ വന്നു. എൻ്റെ സുഹൃത്തുക്കളായ സുരേഷ് നെല്ലിക്കോട് 2 കേസുകളും വിനീത് എടത്തിൽ 2 കേസുകളുമാണ് നടത്തിക്കൊണ്ടിരിക്കുന്നത്. സുരേഷിനും വിനീതിനും എതിരെ 2 കേസുകൾ ഉണ്ട്. അങ്ങനെ 13 കേസുകളാണ് മൊത്തത്തിൽ ഉള്ളത്. അതിൽ എനിക്കെതിരെയുള്ള ഒരു കേസ് സുപ്രീം കോടതി വരെ പോയി. കേസുകളുടെ വിശദ വിവരങ്ങൾ പങ്കുവെക്കാൻ തൽക്കാലം നിർവ്വാഹമില്ല.

ഇതിനിടയിലൊക്കെ ഉണ്ടായത് രസകരവും സങ്കടകരവുമായ സംഭവ വികാസങ്ങളാണ്. അതുകൊണ്ട് തന്നെയാണ് ഇത് ഒരു പുസ്തകത്തിനുള്ളത് ഉണ്ടെന്ന് തോന്നിയത്. ഈ കേസുകൾ കഴിയുന്നതോടെ മലയാളത്തിലെ ആദ്യത്തെ സാഹിത്യ ചോരണ കേസ് എന്ന നിലയ്ക്ക് ഇതൊരു ബഞ്ച് മാർക്ക് കേസ് ആയി മാറും.

സാഹിത്യചോരണം, ക്രിമിനൽ കേസായിട്ട് തന്നെയാണ് കോടതി പരിഗണിക്കുന്നത്. അതായത്, ഒരാൾ നിങ്ങളുടെ വീട് കുത്തിത്തുറന്ന് പണവും സ്വർണ്ണവും മോഷ്ടിച്ചാൽ ഉണ്ടാകുന്ന ക്രിമിനൽ കേസ് തന്നെയാണ് സാഹിത്യ ചോരണം നടത്തിയാലും ഉണ്ടാവുക. കുറ്റവാളികൾക്ക് സാമാന്യം ഭേദപ്പെട്ട ശിക്ഷ കോടതിയിൽ നിന്ന് വാങ്ങിക്കൊടുക്കാനായാൽ ഭാവിയിൽ മലയാള സാഹിത്യം മോഷ്ടിക്കാൻ പോകുന്നതിന് മുൻപ് രണ്ടാമതൊരു വട്ടം മോഷ്ടാക്കൾ ആലോചിക്കാനുള്ള ഒരു സാദ്ധ്യതയെങ്കിലും ഉണ്ടായാൽ, അത് മലയാള സാഹിത്യത്തെ അൽപ്പമെങ്കിലും ശുദ്ധീകരിക്കുമെന്ന് പ്രതീക്ഷിക്കുന്നു.

കേസും കൂട്ടവുമായി പോയാൽ, തീർപ്പാകാൻ കാലം ഒരുപാട് എടുക്കും; ഒരുപാട് പണവും ചെലവാകും. അതുകൊണ്ടുതന്നെയാണ് പലരും കേസ് കൊടുക്കാത്തത്. അത് പക്ഷേ കോപ്പിയടിക്കാർക്ക് ഒരു സൗകര്യമായി മാറിയിരിക്കുകയാണ്.
ക്രിമിനൽ കേസുകൾ ഒരു വർഷത്തിനകം തീർപ്പാക്കണം എന്നാണ് ചട്ടം. എന്നിട്ടും ഞാൻ കൊടുത്തിരിക്കുന്ന ക്രിമിനൽ കേസുകൾ 5 വർഷത്തിലധികമായി ഇഴഞ്ഞു നീങ്ങുന്നു.

പെട്ടെന്നൊരു തീർപ്പ് ഉണ്ടാക്കാൻ പറ്റുക കേരള സാഹിത്യ അക്കാദമിക്ക് ആണ്. അവാർഡുകൾ നൽകുകയും സാഹിത്യ സദസ്സുകൾ സംഘടിപ്പിക്കുന്നതും പോലെ തന്നെ, അക്കാദമി ഇടപെടേണ്ട ഒരു വിഷയമാണ് ഇത്. ഇതിനായി അക്കാദമിയിൽ ഒരു പ്രത്യേക സെല്ല് രൂപീകരിക്കണം. നിയമവിദഗ്ദ്ധർ അടക്കമുള്ളവർ അതിൽ ഉണ്ടാകണം. വലിയ ചട്ടക്കൂടുകൾ ഒന്നുമില്ലാതെ പരാതിക്കാർക്ക് ആ സെല്ലിനെ സമീപിക്കാൻ കഴിയണം. അവിടെ പെട്ടെന്ന് തീർപ്പ് ഉണ്ടാകണം; മുഖം നോക്കാതെ നടപടിയും ഉണ്ടാകണം. കോപ്പിയടിക്കാർ ആണെന്ന് കണ്ടെത്തുന്നവരെ പിന്നീട് അക്കാഡമിയുടെ ഏഴയലത്ത് അടുപ്പിക്കരുത്. അവരുടെ പുസ്തകങ്ങൾ അവാർഡുകൾക്കായി പരിഗണിക്കരുത്. അവരെ സാഹിത്യ സദസ്സുകളിൽ ക്ഷണിതാക്കൾ ആക്കരുത്. അങ്ങനെ എന്തെങ്കിലുമൊക്കെ ചെയ്യണം, ശ്രേഷ്ഠ മലയാളം ചീഞ്ഞ് നാറാതിരിക്കാൻ. വാളെടുത്തവരെല്ലാം വെളിച്ചപ്പാട് ആയിരിക്കുകയാണ് നവമാദ്ധ്യമങ്ങളുടെ ഈ കാലത്ത്. ഇതിലും വലിയ കോപ്പിയടികൾക്കുള്ള സാദ്ധ്യതകളാണ് കാലം തുറന്ന് വെച്ചിരിക്കുന്നത്. ഇതിനൊരു തടയിടാതെ ഇങ്ങനെ തന്നെ പോയാൽ മതി എന്നാണോ?

വാൽക്കഷണം:- പ്രശസ്തരുടെ കൃതികൾ മോഷണം പോയാൽ വലിയ ചർച്ചയാണ് മലയാളത്തിൽ. അക്ഷരാഭ്യാസം ഇല്ലാത്തവരുടെ കൃതികൾ മോഷണം പോയാൽ ങേ ഹേ! ആദ്യത്തേത് ബർബുഡ, രണ്ടാമത്തേത് വള്ളിക്കളസം.

* വരുമാനത്തിൽ കവിഞ്ഞ സ്വത്ത് സമ്പാദനം.

* സ്വന്തം ശമ്പള വർദ്ധനവ് സ്വയം തീരുമാനിച്ച് എഴുതിയെടുക്കൽ.

* മുട്ടിൽ മരംമുറിക്കാർക്ക് വേണ്ട എല്ലാ ഒത്താശകളും ചെയ്ത് കൊടുക്കൽ.

എന്നിങ്ങനെയുള്ള എണ്ണിയാൽ ഒടുങ്ങാത്ത അഴിമതികൾക്കും തട്ടിപ്പുകൾക്കും നിയമം ലംഘിച്ചുള്ള അഴിഞ്ഞാടലിനും ശേഷം കേരളത്തിന്റെ ചീഫ് സെക്രട്ടറി, വിരമിക്കുകയാണ്.  മൂന്ന് മാസത്തിന് ശേഷം പെൻഷൻ പറ്റാനുള്ള വ്യക്തി ഇപ്പോൾത്തന്നെ മുൻകൂറായി പെൻഷൻ കടലാസ്സുകൾ എല്ലാം ശരിയാക്കിയിരിക്കുന്നു!

ധാരാളം ആരോപണങ്ങളും പരാതികളും ഇദ്ദേഹത്തിനെതിരെ ഉണ്ടായിരുന്നിട്ടും അതിലൊന്നും അന്വേഷണം നടത്താതെ പിണാറായി സർക്കാർ ഇദ്ദേഹത്തെ സംരക്ഷിച്ച് പോരുകയും തട്ടും തടവുമില്ലാതെ വിരമിച്ച് പെൻഷൻ പറ്റാനുള്ള വഴികൾ തുറന്നിട്ട് കൊടുക്കുകയും ചെയ്തിരിക്കുന്നു.

ഒരു സംസ്ഥാനത്തിലെ ഏറ്റവും ഉന്നതനായ സർക്കാർ ഉദ്യോഗസ്ഥനാണ് ആ പദവിയുടെ അന്തസത്ത കളയുന്ന രീതിയിലുള്ള പ്രവൃത്തികൾ ചെയ്തുകൂട്ടിയിരിക്കുന്നത്. ‘കൊല്ലുന്ന രാജാവിന് തിന്നുന്ന മന്ത്രി’ എന്ന് കേട്ടിട്ടില്ലേ? പിണറായി വിജയൻ്റെ തണലിൽ ജയ്തിലക് നടപ്പിലാക്കിയിരിക്കുന്നത് അത്തരം കാര്യങ്ങളാണ്.

ഡോ ബി.അശോക് IAS, എൻ. പ്രശാന്ത് എന്നിവർ ഇതുവരെ സമൂഹമാദ്ധ്യമങ്ങളിലൂടെ ജയ്തിലകിന് എതിരെ പറഞ്ഞതെല്ലാം ചേർത്തുവെച്ച് വേണം ഈ അഴിമതിക്കാരനെ കൂടുതലായി മനസ്സിലാക്കാനും വിലയിരുത്താനും. ഇത്തരം കാര്യങ്ങൾ തുറന്ന് പറഞ്ഞതുകൊണ്ട് തന്നെ ഈ രണ്ട് IASകാരും ഇപ്പോഴും സസ്പെൻഷനിലാണ്. കള്ളൻ അകത്തും കള്ളത്തരം ചൂണ്ടിക്കാട്ടിയവർ പുറത്തും! എന്തൊരു വിരോധാഭാസം ആണിത്.

പുതിയ സർക്കാർ അധികാരത്തിലേറിയാൽ ഉടനെ ചീഫ് സെക്രട്ടറി ജയ് തിലകിനെതിരെ അന്വേഷണം ഉണ്ടാകണം. അദ്ദേഹത്തിന്റെ പെൻഷൻ കടലാസ്സുകൾ ശരിവെച്ച പിണറായി സർക്കാറിൻ്റെ ഉത്തരവ് റദ്ദാക്കണം. പണി മുഴുവൻ ചെയ്ത് തീർത്തിട്ട് മതി പെൻഷൻ പറ്റൽ.

ഇദ്ദേഹം ചെയ്തു വെച്ചിട്ടുള്ള എല്ലാ കള്ളത്തരങ്ങൾക്കുമുള്ള ശിക്ഷ കൊടുക്കണം. ചീഫ് സെക്രട്ടറിയുടെ സ്ഥാനത്തിരുന്ന് മേലിൽ ഒരാളും ഇത്തരം കള്ളത്തരങ്ങൾ ചെയ്യാൻ പാടില്ലാത്തവിധം മാതൃകാപരമായ ശിക്ഷ ജയ്തിലകിന് ലഭിക്കണം. സർക്കാർ ഖജനാവിൽ ഇദ്ദേഹം ഉണ്ടാക്കിയിട്ടുള്ള നഷ്ടങ്ങളെല്ലാം ഇയാളുടെ സ്വത്തു വകകൾ കണ്ടുകെട്ടി ഈടാക്കണം.

ചീഫ് സക്രട്ടറി ജയ്തിലകിൻ്റെ അഴിമതികളും കള്ളത്തരങ്ങളും മഞ്ഞുമലയുടെ ഒരറ്റം മാത്രമാണ്. അതിൽ നിന്ന് തുടങ്ങിയാൽ കേരളത്തിൽ കഴിഞ്ഞ 10 വർഷം നടന്ന എല്ലാ അഴിമതികളും പകൽക്കൊള്ളകളും ഒന്നൊന്നായി വെളിയിൽ വരും.

വാൽക്കഷണം:- ശബരിമല സ്വർണ്ണക്കൊള്ള കേസിൽ പത്മകുമാർ പറഞ്ഞ ‘ദൈവതുല്യനായ ആൾ’ ആരാണെന്ന് അറിയാനും കേരള ജനതയ്ക്ക് താല്പര്യമുണ്ട്. ആ കേസിലും അന്വേഷണം ഊർജ്ജിതമാക്കണം.

UDFൽ മുഖ്യമന്ത്രി പദവിക്ക് വേണ്ടി നടക്കുന്ന തർക്കങ്ങൾ, ജനാധിപത്യത്തിന്റെ ഭാഗമാണെന്ന് കരുതുന്ന ആളാണ് ഞാൻ. അങ്ങനെ പറയാനും തർക്കിക്കാനും പോന്ന ഉൾപ്പാർട്ടി ജനാധിപത്യമാണ് UDFന്റെ പ്രത്യേകത. പാർട്ടി നേതാക്കൾ പറയുന്ന കാര്യങ്ങൾ റാൻ മൂളി കേട്ട്, എതിർപ്പ് ഉള്ളിലൊതുക്കി അനുസരിക്കുമ്പോൾ ജനാധിപത്യം പിൻബഞ്ചിലാണെന്നും ഞാൻ വിശ്വസിക്കുന്നു. ആയതിനാൽ അവർ തർക്കിച്ച് തീരുമാനിക്കട്ടെ. തീരുമാനം അധികം വൈകരുതെന്ന് മാത്രം.

MLAമാരെ തെരഞ്ഞെടുത്ത് കഴിഞ്ഞാൽ പൊതുജനത്തിന് പിന്നീട് ഒരു അഭിപ്രായം പറയാനുള്ള ഇടമില്ലായിരുന്നു കുറച്ചുനാൾ മുൻപ് വരെ. നമ്മൾ തെരഞ്ഞെടുത്ത MLAമാർ വേണം അവിടന്നങ്ങോട്ടുള്ള മറ്റ് കാര്യങ്ങൾ തീരുമാനിക്കാൻ. പക്ഷേ ഇന്നങ്ങനെയല്ല അവസ്ഥ. പൊതുജനത്തിന് പറയാനുള്ളത് അവതരിപ്പിക്കാൻ സമൂഹമാധ്യമങ്ങൾ ഉണ്ട്. അതിലൂടെ ജനത്തിന്റെ പൾസ് എന്താണെന്ന് നേതാക്കന്മാർക്ക് കൃത്യമായും പിടികിട്ടും. ആ ഒരു മാദ്ധ്യമവും അവസരവും ഉപയോഗിച്ചാണ് ഞാനിത് പറയുന്നത്.

ജനങ്ങൾ MLA പദവി നൽകാത്ത ഒരാൾ മുഖ്യമന്ത്രിയായി വരുന്നതിനോട് എനിക്ക് യോജിക്കാനാവില്ല. ഭരണഘടനയിൽ എഴുതി വച്ചിരിക്കുന്ന അത്തരം ഒരു ഭോഷ്ക്ക് നീക്കം ചെയ്യണമെന്ന അഭിപ്രായക്കാരനും കൂടിയാണ് ഞാൻ.

ആയതിനാൽ, നിലവിൽ കേരള സംസ്ഥാനത്തിലെ ഒരു MLA അല്ലാത്ത കെ. സി. വേണുഗോപാൽ മുഖ്യമന്ത്രി ആകാൻ പാടില്ല. 102 സീറ്റ് എന്ന സർവ്വകാല റെക്കോർഡ് സമ്മാനിച്ച ജനങ്ങളോട് കാണിക്കുന്ന നീതികേടായിരിക്കും കെ. സി. വേണുഗോപാൽ എന്ന മുഖ്യമന്ത്രി.

MPമാരെ നിയമസഭാ തിരഞ്ഞെടുപ്പിൽ മത്സരിപ്പിക്കേണ്ട എന്ന കർശന തീരുമാനം എടുത്ത കോൺഗ്രസ് പാർട്ടി വേണുഗോപാലിന്റെ കാര്യത്തിൽ എന്തിന് ഇളവ് കാണിക്കണം? ഇവിടെ മുഖ്യമന്ത്രി ആകാൻ പ്രാപ്തരായവർ ഇല്ലയെന്നുണ്ടോ? ഇപ്പറഞ്ഞ നിരവധി കാരണങ്ങളാൽ, കെ.സി. വേണുഗോപാലിനെ മുഖ്യമന്ത്രി ആയി അംഗീകരിക്കാൻ ആവില്ല.

അഥവാ കെ.സി.വേണുഗോപാൽ മുഖ്യമന്ത്രിയായി അവതരിച്ചാൽ, രണ്ട് ഉപതെരഞ്ഞെടുപ്പുകളുടെ അധികഭാരമാണ് ജനങ്ങളുടെ മേൽ വന്ന് ചേരുന്നത്. നിങ്ങൾക്ക് ഇങ്ങനെ അധികാര രാഷ്ട്രീയം കളിച്ച് പാഴാക്കാനുള്ളതല്ല ഞങ്ങളുടെ നികുതിപ്പണം.

കെ. സി. വേണുഗോപാൽ മുഖ്യമന്ത്രി ആയാൽ, തെരഞ്ഞെടുപ്പിൽ അദ്ദേഹത്തെ തോൽപ്പിക്കും എന്ന് കോൺഗ്രസ്സ് പ്രവർത്തകരും അനുയായികളും ഇതിനകം തന്നെ പറഞ്ഞു കഴിഞ്ഞിട്ടുണ്ട്. കണ്ണ് തുറന്ന് സോഷ്യൽ മീഡിയയിലൂടെ കടന്നുപോയാൽ അത് മനസ്സിലാക്കാം. കെ. സി. ഏത് മണ്ഡലത്തിൽ മത്സരിച്ചാലും, എനിക്കവിടെ പരിചയമുള്ള 10 പേരോട് സംസാരിച്ച് അയാൾക്കെതിരെ വോട്ട് ശേഖരണം ഞാനും നടത്തും. നേതൃത്വം ഇതെല്ലാം കാണുന്നുണ്ടെങ്കിൽ കോൺഗ്രസിന് കൊള്ളാം.

ഇനി മറ്റ് രണ്ട് മുഖ്യമന്ത്രി സ്ഥാനാർത്ഥികളിലേക്ക് വരാം.

അവശേഷിക്കുന്ന രണ്ട് പേരിൽ സീനിയർ സ്ഥാനാർത്ഥി രമേശ് ചെന്നിത്തല തന്നെ ആണ്. പക്ഷേ അദ്ദേഹത്തിന് ഒരു ചാൻസ് ഉണ്ടായിരുന്നല്ലോ. പതിനാലാം അസംബ്ലിയിൽ അദ്ദേഹം പ്രതിപക്ഷ നേതാവായി പ്രവർത്തിച്ചതല്ലേ? അതിന് തൊട്ടടുത്ത വന്ന തെരഞ്ഞെടുപ്പിൽ പാർട്ടിയെ വിജയിപ്പിച്ച് മുഖ്യമന്ത്രി ആകാമായിരുന്നല്ലോ. അത് നടന്നില്ല. പിന്നീട് അദ്ദേഹത്തിന് പ്രതിപക്ഷ നേതാവിൻ്റെ സ്ഥാനം കിട്ടിയതുമില്ല. പ്രതിപക്ഷ നേതാവായി പ്രവർത്തിച്ച് പാർട്ടിയെ അധികാരത്തിലേക്ക് കൊണ്ടുവരാൻ വിയർപ്പൊഴുക്കിയ വി.ഡി. സതീശനെ മാറ്റി നിർത്തി രമേശ് ചെന്നിത്തലയെ മുഖ്യമന്ത്രി ആക്കുന്നത് ധാർമികമായി ശരിയല്ല. സീനിയോറിറ്റി ആണ് വിഷയമെങ്കിൽ ചെന്നിത്തലയെ തന്നെ പ്രതിപക്ഷ നേതാവായി വാഴിക്കാമായിരുന്നില്ലേ?

ചുരുക്കത്തിൽ പറഞ്ഞാൽ മുഖ്യമന്ത്രി ആകണമെന്ന് ഞാൻ ആഗ്രഹിക്കുന്നത് വി.ഡി.സതീശൻ തന്നെയാണ്. അതിപ്പോൾ അദ്ദേഹത്തിന് എന്തൊക്കെ കുറവുകളും കുറ്റങ്ങളും ഉണ്ടെന്ന് പറഞ്ഞാലും, അതേ പോരായ്മകളോടെ തന്നെയാണ് ജനം അദ്ദേഹത്തേയും മുന്നണിയേയും പാർട്ടിയേയും ജയിപ്പിച്ചിരിക്കുന്നത്. ആ വിയർപ്പിന്റെ പങ്ക് മറ്റുള്ളവർ പറ്റുന്നത് നീതികേടാണ്. നൂറിലധികം സീറ്റിൽ UDF ജയിച്ചു വന്നില്ലെങ്കിൽ, അതിന്റെ ഉത്തരവാദിത്വം ഏറ്റെടുത്ത് രാഷ്ട്രീയ വനവാസത്തിന് പോകുമെന്ന് പറഞ്ഞത് പ്രതിപക്ഷ നേതാവ് സതീശനാണ്, ചെന്നിത്തലയല്ല.

തെരഞ്ഞെടുപ്പ് കാലത്ത് വി.ഡി. സതീശൻ പല സിദ്ധാന്തങ്ങളും മുന്നോട്ട് വെച്ചിരുന്നു. കാലിയായ ഖജനാവ് നിറക്കുന്നത് മുതൽ, കേരളത്തിന്റെ സമൂലവും സമഗ്രവുമായ പരിവർത്തനത്തിന് ഉതകുന്ന തരത്തിലുള്ള കരടുകൾ തയ്യാറാക്കിയിട്ടുണ്ടെന്ന് സമർത്ഥിക്കുകയും അതിന്റെ ചില സൂചനകൾ നൽകുകയും ചെയ്തിരുന്നു. അതെല്ലാം എത്തരത്തിൽ നടത്തിയെടുക്കാൻ അദ്ദേഹത്തിന് ആകുമെന്ന് കൂടെയാണ് ജനം ആകാംഷയോടെ കാത്തിരിക്കുന്നത്. ആ അവസരം തല്ലിക്കെടുത്തരുത്. ചെന്നിത്തല വന്നാൽ ആ പദ്ധതികൾ നടപ്പിലാകും എന്ന് ഞാൻ കരുതുന്നില്ല. ചെന്നിത്തല, പരമ്പരാഗത കോൺഗ്രസ് രീതിയിലുള്ള ഒരു ഭരണവുമായി മുന്നോട്ടു പോകും. പ്രത്യേക പദ്ധതികളൊന്നും അദ്ദേഹം വിഭാവനം ചെയ്തിട്ടുമില്ല പറഞ്ഞിട്ടുമില്ല.

ലളിതമായി പറഞ്ഞാൽ വി.ഡി. സതീശൻ അല്ലാതെ മറ്റാര് മുഖ്യമന്ത്രി ആയാലും അത് 102 സീറ്റിന്റെ ഉന്നത വിജയം സമ്മാനിച്ച പൊതുജനത്തിനോടുള്ള കൊഞ്ഞനംകുത്തൽ ആയിരിക്കും.

കോൺഗ്രസ്‌ ഹൈക്കമാഡിനേക്കാളും മുകളിൽ കമാൻഡിങ് പവർ ഉള്ളവരാണ് ഇവിടത്തെ ജനങ്ങൾ എന്ന് ഈ തെരഞ്ഞെടുപ്പിലൂടെയെങ്കിലും മനസ്സിലാക്കിയിട്ടില്ലെങ്കിൽ ജനം അത് കൃത്യമായി മനസ്സിലാക്കി തരുക തന്നെ ചെയ്യും. ജനങ്ങൾ ആ സൂപ്പർ ഹൈക്കമാൻഡിങ്ങ് അധികാരം വീണ്ടും പുറത്തെടുക്കും. അത് കെ.സി വേണുഗോപാലിന്റെ പാർലമെന്റ് മണ്ഡലത്തിലും അദ്ദേഹതിൻ്റെ നിയമസഭാ മണ്ഡലത്തിലും കേരളം കണ്ടറിയും. ആ വിചാരം ഉണ്ടായാൽ നന്ന്.

ഇപ്പോൾ കിട്ടിയ വിജയം നിങ്ങളുടെ കഴിവിന്റെ പ്രതിഫലനമല്ലെന്ന് ഇന്നാട്ടിലെ കൊച്ചു കുട്ടികൾക്ക് പോലും അറിയാം. അത് മനസ്സിലാക്കി തീരുമാനങ്ങൾ എടുക്കുക. തീക്കൊള്ളി കൊണ്ട് തല ചൊറിയാതിരിക്കുക. നിങ്ങൾ മന്ത്രിമാർ മാത്രമാണ്. ജനമാണ് ഇപ്പോഴും ഇവിടത്തെ രാജാവ്.

വാൽക്കഷണം:- മറുവശത്ത് പ്രതിപക്ഷ നേതാവിന് വേണ്ടിയുള്ള ചർച്ചകൾ നടക്കുന്നുണ്ടെന്ന് കേൾക്കുന്നു! പ്രായാധിക്യവും അരോഗാവസ്ഥയും അവഗണിച്ച് മൂന്നാമതും മുഖ്യമന്ത്രി ആകാൻ തയ്യാറായ വ്യക്തി, പ്രതിപക്ഷ നേതാവ് ആകാൻ തയ്യാറല്ല എന്നത് വലിയ തമാശയാണ്. എന്തായാലും ഏകാധിപത്യ പ്രവണത മാറി ജനാധിപത്യ സ്വഭാവ കാണിക്കുന്നത് തീർച്ചയായും നല്ലത് തന്നെ.

തിരഞ്ഞെടുപ്പ് കാലത്ത്, സമൂഹമാദ്ധ്യമങ്ങളിൽ തലങ്ങും വിലങ്ങും പോസ്റ്റുകൾ ഇട്ട് അർമ്മാദിച്ചില്ലെങ്കിലും, അത്യാവശ്യം ഒരു പോസ്റ്റൊക്കെ ഇടാനുള്ള അവകാശം വോട്ടെണ്ണൽ കഴിഞ്ഞിരിക്കുന്ന ഈ സാഹചര്യത്തിൽ എനിക്കും ഉണ്ടെന്ന സ്വാതന്ത്ര്യത്തിൽ കുറച്ച് കാര്യങ്ങൾ പറയുന്നു.

എന്റെ സ്പേസിൽ പറയുന്നത് എന്റെ ബോദ്ധ്യങ്ങൾ ആണ്. അത് നിങ്ങളുടെ ബോദ്ധ്യങ്ങളുമായി ഒത്തുപോകില്ലെന്ന് കണ്ടാൽ വിറളി പിടിക്കേണ്ടതില്ല.

എന്തുകൊണ്ട് തോറ്റു എന്ന ചോദ്യത്തിന് ഒരുപാട് കാരണങ്ങളും ഉത്തരങ്ങളും ഉണ്ട്. ശ്രദ്ധയിൽപ്പെട്ട പല തോൽവികളും ഉൾപ്പെടുത്തിയിട്ടുണ്ട്.

ചില വിജയ കാരണങ്ങളും അല്പസ്വല്പം വിലയിരുത്തലുകളും കൂട്ടത്തിൽ ചേർത്തിട്ടുണ്ട്.

1. ജനം ആർക്കും വോട്ടുകൾ കാലാകാലത്തേക്ക് എഴുതിക്കൊടുത്തിട്ടില്ല. ഏത് കോട്ടയും തകരും. തകർന്ന ചരിത്രമുണ്ട്.

2. തെരഞ്ഞെടുപ്പ് കാലത്ത് പ്രചരിച്ച ഒരു പോസ്റ്റർ (കമൻ്റിൽ നോക്കുക) പ്രകാരം, അതിലുള്ള 50 മണ്ഡലങ്ങളിൽ സുനാമി വന്നാൽപ്പോലും LDFനെ തോൽപ്പിക്കാൻ പറ്റില്ല എന്നായിരുന്നു! എന്നിട്ടോ? ഏറ്റവും വലിയ കമ്യൂണിസ്റ്റ് കോട്ടകളായ പയ്യന്നൂരിലും തളിപ്പറമ്പിലും തൃക്കരിപ്പൂരിലും അമ്പലപ്പുഴയിലും അടക്കം ആ ലിസ്റ്റിലെ 21 മണ്ഡലങ്ങളിൽ ഭേഷായിട്ട് തോറ്റു. ധർമ്മടത്ത് പിണറായി വിജയന് ആദ്യത്തെ ഏഴ് റൗണ്ടിൽ പിന്നിൽ നിൽക്കേണ്ടി വന്നു. സുനാമിയൊന്നും വേണ്ട. ഒരു വേലിയേറ്റം ധാരാളം മതിയാകും. ഒരു മണ്ഡലവും ജനങ്ങൾ ആർക്കും തീറെഴുതി കൊടുത്തിട്ടില്ല.

3. LDF അല്ലാതെ മറ്റാരുണ്ട് എന്ന ചോദ്യത്തിന് ഉത്തരം കിട്ടി. കേരളത്തിൽ LDFഉം UDFഉം മാറിമാറി ഭരിച്ചിട്ടുണ്ട്. LDF മാത്രമാണ് ഇവിടെയുള്ളത് എന്ന വിഡ്ഢിച്ചിന്ത പിന്നെങ്ങനെ വന്നു; എവിടന്ന് വന്നു? നികേഷ് കുമാറാണ് അതിന് പിന്നിലെങ്കിൽ, അയാൾ തന്റെ അച്ഛന്റെ എതിരാളികൾക്ക് മടയിൽക്കയറി പണികൊടുത്തു എന്ന് തമാശയായി വേണമെങ്കിൽ പറയാം. അഥവാ അയാളാണ് പരാജയത്തിൻ്റെ മറ്റൊരു വലിയ കാരണം.

4. കേരളത്തിൽ അങ്ങോളമിങ്ങോളം എൻ്റെ മോന്ത, എൻ്റെ ഫുൾ ഫിഗർ പരസ്യങ്ങൾ വെച്ചാലൊന്നും ആരും ജയിക്കണമെന്നില്ല. പൊതുഖജനാവ് ധൂർത്തടിച്ചുകൊണ്ടുള്ള PR വർക്കുകൾ കണ്ടാൽ സാക്ഷരകേരളത്തിന് തിരിച്ചറിയാനാവും.

5. എത്ര നല്ല കാര്യങ്ങൾ ചെയ്താലും എത്ര വലിയ ആശയങ്ങൾ മുന്നോട്ട് വെച്ചാലും, അതിനിടയിലൂടെ ബാങ്കുകളും ആരാധനാലയങ്ങളും രക്തസാക്ഷി ഫണ്ടുകളും അടക്കം പറ്റാവുന്ന സ്ഥലങ്ങളിലൊക്കെ മോഷണം നടത്തിയാൽ…, സ്വജനപക്ഷപാതം ബെല്ലും ബ്രേക്കുമില്ലാതെ നടപ്പിലാക്കിയാൽ…, അങ്ങനെയുള്ളവരെ ജനാധിപത്യ ബോധമുള്ള വോട്ടർമാർ തോൽപ്പിച്ച് വീട്ടിലിരുത്തും. മോഷ്ടാക്കൾ പിന്നീട് എത്ര വലിയ കാര്യങ്ങൾ ചെയ്താലും ഏശില്ല.

6. ചോദ്യങ്ങൾ ചോദിക്കുമ്പോൾ ‘വീട്ടിൽ പോയി ചോദിച്ചാൽ മതി’ എന്ന ധാർഷ്ട്യം പറഞ്ഞാലും, ജനം തോൽപ്പിച്ച് വീട്ടിൽ ഇരുത്തും. ധാർഷ്ട്യം ഒരു കാരണവശാലും വെച്ച് പൊറുപ്പിക്കില്ല.

7. പെണ്ണുപിടിയന്മാരെ ഇടം വലം നോക്കാതെ ജനം തൂക്കിയെറിയും. അതെ, പി. കെ. ശശിയുടേയും ഗണേഷ്കുമാറിൻ്റേയും പരാജയങ്ങളെപ്പറ്റി തന്നെയാണ് പറയുന്നത്.

8. ജനങ്ങളുടെ തോളോടുതോൾ ചേർന്ന് നിന്ന് അവരുടെ പ്രശ്നങ്ങൾ കേൾക്കുകയും മനസ്സിലാക്കുകയും ചെയ്യുന്നതിന് പകരം 40 കാറുകളുടെ അകമ്പടിയോടെ 110 കിലോമീറ്റർ വേഗതയിൽ അവരിൽ നിന്ന് അകന്ന് പോയാൽ, ആ അകലം ജനം എന്നെന്നേക്കുമായി നിലനിർത്തും.

9. ഏതൊരു മണ്ഡലത്തിലും ഒരു രാഷ്ട്രീയപ്രവർത്തകൻ അഞ്ച് വർഷം ഇറങ്ങി നിന്ന് പ്രവർത്തിച്ചാൽ, അത് എത്ര വലിയ കോട്ടയാണെങ്കിലും ജയിച്ചു കയറാൻ പറ്റും. ഉദാഹരണം ജ്യോതികുമാർ ചാമക്കാല തന്നെ. എല്ലാ ജനപ്രതിനിധികളും ഇങ്ങനെ വിചാരിച്ചാൽ അഞ്ചുകൊല്ലം കൊണ്ട് വേറൊരു തലത്തിൽ എത്താൻ കഴിയും കേരളത്തിന്.

10. ഒരു ഫ്ലക്സ് ബോർഡ് പോലും വെക്കാതെയും പ്രചരണ കൊട്ടിക്കലാശ മാമാങ്കം നടത്താതെയും, ആർഭാടങ്ങൾ ഇല്ലാതെയും, വേണമെങ്കിൽ ഒരു സ്ഥാനാർത്ഥിക്ക് റെക്കോർഡ് വിജയം കൈവരിക്കാനാവും. അതെ, ചാണ്ടി ഉമ്മനെ തന്നെയാണ് ഉദ്ദേശിച്ചത്.

11. അങ്ങോട്ടുമിങ്ങോട്ടും ചാടിക്കളിച്ച് അധികാരത്തിന്റെ സുഖസൗകര്യങ്ങൾ വരുതിയിലാക്കി ജീവിക്കുന്ന കൗശലക്കാരായ മുതലാളിമാരോട് ജനത്തിന് അല്പം പോലും താല്പര്യമില്ല. ഉദാഹരണം പി. വി. അൻവറിന്റെ അർഹമായ തോൽവി.

12. ഇത്ര വലിയ ഭൂരിപക്ഷം UDFന് കിട്ടിയപ്പോഴും ടി. എൻ. പ്രതാപൻ എന്ന UDFന്റെ മുതിർന്ന നേതാവ് എന്തുകൊണ്ട് തോറ്റു? “കുറച്ചുപേരെ എല്ലാക്കാലവും എല്ലാവരേയും കുറച്ചുകാലവും കബളിപ്പിച്ച് നടക്കാൻ പറ്റും; പക്ഷേ എല്ലാവരേയും എല്ലാക്കാലവും കബളിപ്പിക്കാൻ പറ്റില്ല”.. എന്നൊരു സിദ്ധാന്തമുണ്ട്. അത് ചേർത്ത് വായിച്ചാൽ ഈ പരാജയത്തിനുള്ള ഉത്തരമായി.

13. ലീഡറുടെ മകൾ ആയതുകൊണ്ട് മാത്രം കോൺഗ്രസിലോ മറ്റേതെങ്കിലും പാർട്ടിയിലോ കയറിക്കൂടി സാരി ചുളിയാതെയും മേക്കപ്പ് ഇളകാതെയും ജയിച്ച് കയറാനാവില്ലെന്ന് ഇനിയെങ്കിലും പത്മജ വേണുഗോപാൽ മനസ്സിലാക്കണം. കേരള രാഷ്ട്രീയത്തിൽ നിങ്ങൾക്കുള്ള സ്ഥാനം ചവറ്റുകുട്ടയിലാണ്. മറ്റേതെങ്കിലും സംസ്ഥാനത്ത് ഗവർണ്ണറായി ശ്രമിക്കാവുന്നതാണ്.

14. പണം കൊടുത്ത് വോട്ടർമാരെ സ്വാധീനിക്കാൻ ശ്രമിക്കുന്നത് പൊതുജനം മനസ്സിലാക്കിയാൽ തോറ്റത് തന്നെ. ശോഭാ സുരേന്ദ്രൻ്റെ തോൽവിയുടെ കാര്യമാണ് സൂചിപ്പിച്ചത്. NDA ജയിക്കുമെന്ന് ഏറെക്കുറെ എല്ലാവരും ഉറപ്പിച്ചിരുന്ന മണ്ഡലമാണ് അത്.

15. പയ്യന്നൂരിൽ വി. കുഞ്ഞികൃഷ്ണന്റെ വിജയം (7487ഭൂരിപക്ഷം) കാണിക്കുന്നത്, രക്തസാക്ഷി ഫണ്ട് സഖാക്കൾ മോഷ്ടിച്ചു എന്ന് തെളിവുകൾ നിരത്തിയുള്ള അദ്ദേഹത്തിന്റെ ആരോപണം ജനങ്ങൾക്ക് ബോദ്ധ്യമായി എന്നാണ്. മോഷ്ടിച്ചവന് പാർട്ടിയുടെ വക സീറ്റ്; അത് ചൂണ്ടിക്കാണിച്ചവൻ പാർട്ടിക്ക് പുറത്ത്. പണത്തിന്റെ കണക്ക് ഞങ്ങൾ വേണ്ടപ്പെട്ടവരെ ബോധിപ്പിച്ചോളാം എന്ന ധാർഷ്ട്യം. തോൽക്കാൻ രണ്ടാമതൊരു കാരണം വേണോ?

16. തൊഴിലാളി വർഗ്ഗ പാർട്ടിയാണ് പാവങ്ങളുടെ പാർട്ടിയാണ് എന്നെല്ലാം പറഞ്ഞിട്ട്, അതേ പാവങ്ങളുടെ നികുതിപ്പണം ധൂർത്തടിച്ച് മുതലാളിത്ത ജീവിതം നയിച്ചാൽ അത് മനസ്സിലാക്കാനുള്ള ബോധവും പൊക്കണവുമൊക്കെ കേരള സമൂഹത്തിനുണ്ട്. മുണ്ട് മുറുക്കി ഉടുക്കേണ്ട ഇടങ്ങളിലൊന്നും അത് ചെയ്യാതെ കടമെടുത്ത പണം കൊണ്ട് ധൂർത്ത് തുടർന്നു.

17. പല എക്സിറ്റ് പോളുകളേയും കവച്ചു വെച്ചുള്ള വിജയം UDF ന് കിട്ടാനുള്ള കാരണം, LDF ന് വോട്ട് ചെയ്യേണ്ട എന്ന് തീരുമാനിച്ച പലരും അത് സർവ്വേകളിൽ തുറന്നു പറയാൻ മടിക്കുന്നു അല്ലെങ്കിൽ ഭയക്കുന്നു എന്നതാണ്.

18. അവസാനമായി പറയാനുള്ളത് സ്വരാജിനോടാണ്. മേൽപ്പറഞ്ഞതിന്റെ ഇരട്ടി കാര്യങ്ങൾ ചൂണ്ടിക്കാണിച്ച്, കേരള ജനതയുടെ വോട്ടിംഗ് കൃത്യമായിരുന്നു എന്ന് യാഥാർത്ഥൃ ബോധമുള്ളവർക്ക് സമർത്ഥിക്കാനാവും. താങ്കൾക്ക് പക്ഷേ വോട്ടർമാരോട് പുച്ഛം. താങ്കളുടെ പാർട്ടിക്ക് വോട്ട് ചെയ്തില്ലെങ്കിൽ ഉടനെ ജനങ്ങൾ ഉദാസീനരും അരാഷ്ട്രീയവാദികളുമാകുന്നു. അതെന്തോന്ന് ന്യായീകരണമാണ് ഹേ. താങ്കളുടെ പാർട്ടി എല്ലാം തികഞ്ഞ പാർട്ടിയാണോ? ആദ്യം പരാജയം അംഗീകരിക്കാൻ പഠിക്കുക. എന്നിട്ടാണ് കാരണം തിരയലും വിശകലനവും തെറ്റ് തിരുത്തലുമൊക്കെ. അതിന് മനസ്സില്ലാത്ത താങ്കളെപ്പോലുള്ളവർ ഏത് പാർട്ടിയിൽ ഉണ്ടായാലും പരാജയം വീണ്ടും വീണ്ടും ഉണ്ടായിക്കൊണ്ടിരിക്കും. ഇത്രയൊക്കെ ആയാലും തെല്ല് പോലും മാറരുത്. ചതുരവടിവിൽ ഇങ്ങനെ തന്നെ തുടരുക. ‘ഒന്ന് ചീഞ്ഞാലേ മറ്റൊന്നിന് വളമാകൂ’ എന്ന പ്രപഞ്ചസത്യം മാറ്റാൻ ഒരു പൂമരനും പുംഗവനും കഴിയില്ല.

വാൽക്കഷണം:- UDF ന് ഈ ‘വലിയ’ വിജയത്തിൽ അഹങ്കരിക്കാൻ ഒന്നുമില്ല. LDF ൻ്റെ ധാർഷ്ട്യവും തെമ്മാടിത്തരങ്ങളും സ്വജനപക്ഷപാതവും പകൽക്കൊള്ളയും പോരാഞ്ഞ് പിണറായി വിജയൻ എന്ന ഏകാധിപതിയുടെ ചെയ്തികളും നിങ്ങൾക്ക് അനുകൂലമായി ഭവിച്ചു എന്ന് മാത്രം. അത് മനസ്സിലാക്കി കൊള്ളാവുന്ന ഭരണം കാഴ്ചവെച്ചാൽ നിങ്ങൾക്ക് കൊള്ളാം, ജനങ്ങൾക്കും കൊള്ളാം. അല്ലെങ്കിൽ, അഞ്ച് വർഷത്തിന് ശേഷം ഇതേ മാതൃകയിൽ ചെവിക്ക് പിടിച്ച് തൂക്കി വെളിയിൽ കളയാൻ ഇതേ സമ്മതിദായകർ മുന്നിട്ട് നിൽക്കും.