ഈ വിഷയത്തെപ്പറ്റി ഒരു കുറിപ്പ് മുൻപ് ഞാൻ എഴുതിരുന്നു. അത് വിനയശ്രീ വായിച്ചതിന് ശേഷം ഞാനും വിനയശ്രീയും ഈ വിഷയത്തിൽ ഒരുപാട് നേരം ഫോണിൽ സംസാരിച്ചിട്ടുണ്ട്. അതിൻ്റെ വിശദാംശങ്ങൾ ഇവിടെ പറഞ്ഞാൽ തീരില്ല. എന്നാലും ചുരുക്കത്തിൽ ചിലത് പറയാം.

കോപ്പിയടിയുടെ കാര്യത്തിൽ കോടതിയുടെ വിഖ്യാതമായ ഒരു വാചകമുണ്ട്. ” Great minds think alike”. ഈ കേസിൽ അതിനേക്കാൾ ഭംഗിയായി കോടതി ആ വാചകം ഉപയോഗിക്കും. കാരണം, രാജശ്രീയും വിനയശ്രീയും ആശയം കടം കൊണ്ടിരിക്കുന്നത് മഹാഭാരതത്തിൽ നിന്നാണ്.

എൻ്റെ ഭാര്യയുടേയും മകളുടേയും പേര് 11 ഇടത്ത് അതേപടി പകർത്തി വെച്ച് എൻ്റെ 55 പേജുകൾ മോഷ്ടിച്ച കാരൂർ സോമൻ Karoor Soman Soman എന്ന ലണ്ടൻ പ്രവാസിയുമായി 2018 മുതൽ ഞാൻ നടത്തുന്ന കേസുകൾ 13 എണ്ണമാണ്. അതിലൊന്ന് സുപ്രീം കോടതി വരെ നീണ്ടു. അത് ഇതുവരെ എവിടെയും എത്തിയിട്ടില്ല. ആ ഒരു അനുഭവം വെച്ച് പറയുകയാണെങ്കിൽ 10 വർഷം കഴിഞ്ഞാലും ഈ കേസ് എങ്ങുമെത്തില്ല. അവസാനം തള്ളിപ്പോകുകയും ചെയും.

രാജശ്രീയുടെ മാനനഷ്ടക്കേസും തള്ളിപ്പോകും. കാരണം, രണ്ട് പുസ്തകങ്ങളുടെ മൗലികത്തർക്കം എന്നതിനപ്പുറം വിനയശ്രീ രാജശ്രീയെ ഏതെങ്കിലും തരത്തിൽ വ്യക്തിപരമായി അധിക്ഷേപിച്ചതായി ശ്രദ്ധയിൽ പെട്ടിട്ടില്ല. മാനനഷ്ടക്കേസ് എന്ന് പറയുന്നത് സത്യത്തിൽ എന്തെങ്കിലും നഷ്ടപരിഹാരം നേടിയെടുക്കാൻ വേണ്ടിയുള്ള ഒന്നല്ല. എനിക്കെതിരെ ഒരാൾ ആരോപണവുമായി വരുമ്പോൾ ആ ആരോപണത്തിന് മറുപടിയൊന്നും പറയാതിരുന്നാൽ അതിൽ ഒരു ഭംഗിക്കേടുണ്ട്. “നിങ്ങൾ എന്താണ് റിയാക്ട് ചെയ്യാതിരിക്കുന്നത് ” എന്ന് ആരെങ്കിലും ചോദിച്ചാൽ ഒരു മറുപടി വേണം. അതിൻ്റെ പേരിൽ ചെയ്യുന്ന ഒരു കാര്യം മാത്രമാണ് മാനനഷ്ടക്കേസുകൾ. കാരൂർ സോമനെ അധിക്ഷേപിച്ചെന്ന് പറഞ്ഞ് മാവേലിക്കര കോടതിയിൽ അയാൾ എനിക്കെതിരെ മാനനഷ്ട കേസ് കൊടുത്തിട്ടുണ്ട്. ഒരു മോഷ്ടാവിനെ മോഷ്ടാവ്, കള്ളൻ എന്നൊക്കെ വിളിക്കാനേ എനിക്കറിയൂ. അതിനാണ് ഞാൻ മാനനഷ്ടക്കേസ് നേരിടുന്നത്. അത് സാരമാക്കുനില്ല.

എന്റെ അറിവിൽ ഒരു മാനനഷ്ട കേസിന് വിധി വന്നിട്ടുള്ളത്, നടി സുകന്യ നടത്തിയ കേസിൻ്റേതാണ്. (എന്റെ അറിവിൽ എന്ന് എടുത്തുപറയുന്നു). അവർക്ക് 10 ലക്ഷം രൂപ നഷ്ടപരിഹാരം നൽകാൻ വിധി വന്നു. അതല്ലാതെ ഏതെങ്കിലും രാഷ്ട്രീയക്കാർ അന്യോന്യം കൊടുക്കുന്ന മാനനഷ്ട കേസിലോ സാഹിത്യകാരി/രന്മാർ പരസ്പരം കൊടുക്കുന്ന മാനനഷ്ട കേസിലോ ഒരു വിധി നിങ്ങളുടെ ശ്രദ്ധയിൽപ്പെട്ടിട്ടുണ്ടോ? ഉണ്ടെങ്കിൽത്തന്നെ വിരളമായിരിക്കും.

ചുരുക്കിപ്പറഞ്ഞാൽ രാജശ്രീയും വിനയശ്രീയും പരസ്പരം നൽകിയിട്ടുള്ള ഈ രണ്ട് കേസുകളും തള്ളിപ്പോകും. സത്യത്തിൽ തന്റെ കഥാപാത്രവും കഥാസന്ദർഭവും എടുത്ത് മറ്റൊരു കഥ ഉണ്ടാക്കി, മറ്റൊരു പുസ്തകം ഉണ്ടാക്കി എന്ന് പറഞ്ഞ് ഇവർക്ക് രണ്ടുപേർക്കും എതിരെ കേസ് കൊടുക്കേണ്ടത് വേദവ്യാസനാണ്. കൂട്ടത്തിൽ രണ്ടാമൂഴം മുൻനിർത്തി എം.ടി.ക്ക് എതിരേയും വ്യാസന് കോടതി കയറേണ്ടി വരും. പക്ഷേ മൺമറഞ്ഞ വ്യാസൻ നേരിട്ടവതരിച്ച് കേസ് കൊടുത്താലും നിലവിലെ നിയമസംഹിത വെച്ച് ഈ കേസുകൾ തള്ളിപ്പോകും. രചയിതാവ് മരിച്ച് 60 വർഷം കഴിഞ്ഞാൽപ്പിന്നെ പകർപ്പാവകാശ നിയമം നിലനിൽക്കുന്നില്ല ഇന്ത്യൻ നീതിന്യായ വ്യവസ്ഥയിൽ എന്നതാണ് കാരണം.

എനിക്ക് വിനയശ്രീയോട് ഒരഭിപ്രായം പറയാനുള്ളത്, പുരാണകഥകളുടെ പുനരാഖ്യാനങ്ങൾ മാത്രം നടത്തിക്കൊണ്ടിരിക്കാതെ സ്വന്തം ഭാവനയെ സ്വന്തം കഥാതന്തുവിൽ നിന്ന് നിർലോഭം മേയാൻ വിട്ടാൽ ഇത്തരം പ്രശ്നങ്ങൾ ഒരു പരിധിവരെ ഒഴിവാകും എന്നതാണ്. വിനയശ്രീയുടെ രചനകൾ മിക്കവാറും എല്ലാം ഹിന്ദു പുരാണങ്ങളെ ആശ്രയിച്ച് നിൽക്കുന്നു എന്നതുകൊണ്ടാണ് ഇത് പറയേണ്ടി വന്നത്.

വാൽക്കഷണം:- വിനയശ്രീയുടെ പോസ്റ്റിൽ ഇന്നിട്ട ഏറെ ദൈർഘ്യമുള്ള ഒരു കമൻ്റാണ് ഈ പോസ്റ്റായി മാറിയത്.

ഏഷ്യാനെറ്റ് ന്യൂസിൽ കാണാനിടയായ ഒരു വാർത്തയുടെ സ്ക്രീൻഷോട്ടാണ് ആദ്യത്തെ ചിത്രത്തിൽ.

അത് പ്രകാരം പുതുതായി നിർമ്മിച്ച ആറുവരി പാതയിലൂടെ പോകുന്ന ഒരു കാറിന്റെ സ്റ്റിയറിങ് നിയന്ത്രിക്കുന്നത് ഒരു കൊച്ചുകുട്ടി. തൊട്ടടുത്ത വരിയിൽ പോകുന്ന കാറിൽ നിന്ന് പകർത്തിയ രംഗമാണ് ന്യൂസിൽ കാണിക്കുന്നത്. കഴിഞ്ഞ രണ്ടാഴ്ചക്കുള്ളിൽ ഏഴിൽപ്പരം ജീവനുകളാണ് ഇത്തരക്കാർ കാരണം റോഡിൽ പൊലിഞ്ഞത്. എന്നിട്ടും ഒരിഞ്ച് പുറകോട്ടില്ല.

അതിൽ അധികം ശ്രദ്ധിക്കപ്പെടാതെ പോയ മൂന്ന് അപകടങ്ങൾ താഴെ കുറിക്കുന്നു.

* മാനന്തവാടിയിൽ, നിയന്ത്രണം വിട്ട് തെറ്റായ ദിശയിൽ അതിവേഗം പാഞ്ഞ് വന്ന കാറിടിച്ച് 11 വയസ്സുകാരി കൊല്ലപ്പെട്ടു. (25.10.2026)

* തിരൂരങ്ങാടിയിൽ മദ്യലഹരിയിൽ യുവാവ് ഓടിച്ച കാറിടിച്ച് താൽക്കാലിക അദ്ധ്യാപകൻ കൊല്ലപ്പെട്ടു. (24.10.2026)

* 17കാരൻ ഓടിച്ച ബൈക്ക് നിയന്ത്രണം വിട്ട് പോസ്റ്റിലിടിച്ചു; വിദ്യാർത്ഥിക്ക് ദാരുണാന്ത്യം. (26.10.2026)

ഇതിനൊരു അന്ത്യം വേണമെന്ന് പൊതുസമൂഹമോ ഭരണകൂടമോ ആഗ്രഹിക്കുന്നുണ്ടെങ്കിൽ 3 നിർദ്ദേശങ്ങൾ പറയാം.

നിർദ്ദേശം 1:- നിയമങ്ങൾ കർശനമാക്കുക; അതുപോലെ തന്നെ നടപ്പിലാക്കുക.

* മദ്യപിച്ച് വാഹനമോടിക്കുന്നവരുടെ ലൈസൻസ് ആയുഷ്ക്കാലം റദ്ദ് ചെയ്യുക.

* പ്രായപൂർത്തി ആകാതെയോ ലൈസൻസ് ഇല്ലാതെയോ വാഹനമോടിക്കുന്നവർക്ക് ആജീവനാന്തകാലം ലൈസൻസ് കൊടുക്കാതിരിക്കുക.

* അമിതവേഗത്തിൽ വാഹനം ഓടിക്കുന്നവരുടെ ലൈസൻസ് കുറഞ്ഞത് ഒരു വർഷത്തേക്കെങ്കിലും റദ്ദ് ചെയ്യുക.

* ബാംഗ്ലൂർ പോലുള്ള വലിയ നഗരങ്ങളിൽ വാഹന ഗതാഗത നിയമലംഘനം നടത്തുന്നവരുടെ ചിത്രങ്ങൾ എടുത്ത് ആപ്പിൽ ലോഡ് ചെയ്താൽ പൊലീസ് നടപടി ഉണ്ടാകാറുണ്ട്. അത്തരം ഒരു ആപ്പ് കേരളത്തിലും തയ്യാറാക്കുക. പൊലീസിനോ എംവിഡിക്കോ പിടികൂടാൻ കഴിയാത്തവരെ പൊതുജനം പിടികൂടി മുന്നിൽ നിർത്തിത്തരും. അവരിൽ നിന്ന് കനത്തപിഴ ഈടാക്കുക; കടുത്ത ശിക്ഷ നൽകുക.

നിർദ്ദേശം 2:- രണ്ടാമത്തെ ചിത്രത്തിൽ കാണുന്നത് കേരളത്തിലെ ഒരു ജില്ലാ പോലീസ് ഏമ്മാൻ, 19.01.2024ൽ പുറത്തിറക്കിയ ഒരു ഉത്തരവാണ്. ഈ ഉത്തരവ് പുറത്തുവിട്ട ഉമേഷ് വള്ളിക്കുന്ന് Umesh Vallikkunnu എന്ന പോലീസ് ഉദ്യോഗസ്ഥന് രണ്ട് പ്രാവശ്യം ഇൻക്രിമെന്റ് നഷ്ടമായി. ഈ ഉത്തരവിൽ പറയുന്നത്, ‘പൊലീസ് വാഹന പരിശോധനയും പട്രോളിങ്ങും നടത്തുന്ന അവസരങ്ങളിൽ അംഗീകൃത ബാറുകളുടെ ഉള്ളിൽ നിന്നോ അവയുടെ അധികാരപരിധിയിൽ നിന്നോ മദ്യപിച്ച് ഇറങ്ങുന്ന വ്യക്തികളെ പിടികൂടരുത് ‘ എന്നാണ്. പൊലീസുകാർ തന്നെ ഇത്തരത്തിൽ ഉത്തരവിടുന്ന ഒരു സംസ്ഥാനത്ത് ജനങ്ങൾ മദ്യപിച്ച് വാഹനമോടിച്ച് തെരുവിലൂടെ നടക്കുന്ന പാവങ്ങളെ കൊന്നില്ലെങ്കിലേ അത്ഭുതമുള്ളൂ. ഇത്തരം നിർദ്ദേശങ്ങൾ പുറപ്പെടുവിക്കുന്ന പോലീസുകാർക്ക് എതിരെ നടപടി ഉണ്ടാകണം. ബാറിൽ നിന്ന് മദ്യപിച്ചിറങ്ങി വാഹനത്തിൽ കയറുന്നവരെ, വാഹനം സ്റ്റാർട്ട് ചെയ്യുന്ന നിമിഷം അറസ്റ്റ് ചെയ്ത് തുറുങ്കിലടക്കാനുള്ള നടപടിയും ഉണ്ടാകണം.

നിർദ്ദേശം 3:- പറയാൻ വിട്ടുപോയ ഒരു നിർദ്ദേശം കൂടെയുണ്ട്. വെള്ളമടിച്ചവർക്കും ലൈസൻസ് ഇല്ലാത്തവർക്കും അമിതവേഗക്കാർക്കും വാഹനങ്ങൾ ഓടിച്ചേ പറ്റൂ എന്നാണെങ്കിൽ, അവർക്കുവേണ്ടി മാത്രം വളച്ചു കെട്ടിയ കുറച്ച് സ്ഥലം സജ്ജമാക്കി കൊടുക്കുക. അതിനകത്ത് ഓടിച്ച് പരസ്പരം ഇടിച്ച് ഒടുങ്ങിക്കോട്ടെ നാശങ്ങൾ. കണ്ണൂരിൽ കിഫ്ബി അനധികൃതമായി വാങ്ങിക്കൂട്ടിയ സ്ഥലം ഒരു പ്രയോജനവും ഇല്ലാതെ കിടക്കുകയാണെന്ന് കേട്ടു.

ഇതൊന്നും പറ്റുന്നില്ലെങ്കിൽ……

നിർദ്ദേശം 4:- ഇത്തരത്തിൽ ഗതാഗത നിയമലംഘനം നടത്തുന്നവരെ കൈകാര്യം ചെയ്യാനുള്ള അവകാശം പൊതുജനത്തിന് വിട്ടുകൊടുക്കുക. അരാജകത്വം എന്ന് മറ്റൊരു പേരുണ്ട് അതിന്. നിയമം നടമാടാത്തിടത്ത് അരാജകത്വം സ്വാഭാവികമായും ഉടലെടുത്തെന്നും വരും. അതുണ്ടാകാതെ നോക്കുക.

വാൽക്കഷണം :- ചിത്രത്തിൽ കാണുന്ന വീഡിയോ ഏഷ്യാനെറ്റിൽ നിന്ന് തപ്പിയെടുത്ത് ആ വാഹനത്തിന്റെ ഉടമയുടെ ലൈസൻസ് റദ്ദാക്കാനും വാഹനത്തിന്റെ രജിസ്ട്രേഷൻ റദ്ദാക്കാനും എംവിഡിക്ക് കഴിയുമെങ്കിൽ മുകളിൽ പറഞ്ഞ ആപ്പിൻ്റെ പ്രാഥമിക രൂപമായി.

#കേരളത്തിലെ_റോഡുകൾ

നെടുമ്പാശ്ശേരി വാഹനാപകടത്തിലെ പ്രതികളുടെ റിമാൻഡ് കാലാവധി കഴിയുന്നതിന് മുന്നേ അടുത്ത വാഹനാപകടം സംഭവിച്ചിരിക്കുന്നു. ക്ഷമിക്കണം ഇതിനെ രണ്ടിനേയും വാഹനാപകടം എന്നതിലുപരി വാഹനക്കൊലപാതകങ്ങൾ എന്നാണ് പറയേണ്ടത്.

ആദ്യത്തെ കൊലപാതകത്തിൽ അമിതവേഗവും മദ്യപിച്ചുള്ള ഡ്രൈവിങ്ങും ആയിരുന്നു കാരണങ്ങൾ. ഇന്ന് വെളുപ്പിന് 3 മണിക്ക് ചേരാനല്ലൂരിൽ ഉണ്ടായ നടന്ന വാഹനക്കൊലപാതകത്തിൻ്റെ കാരണം ലൈസൻസില്ലാത്ത; ലൈസൻസിന് പ്രായമാകാത്ത പയ്യൻ (17 വയസ്സ്) അമിത വേഗത്തിൽ ആഡംബര വാഹനം ഓടിച്ചു എന്നതാണ്. ഇതെല്ലാം നിയമവിരുദ്ധമായ കാര്യങ്ങളാണെന്ന് അറിഞ്ഞുകൊണ്ടുതന്നെ ചെയ്യുന്നതിനാലാണ് കൊലപാതകങ്ങൾ എന്ന് വിശേഷിപ്പിച്ചത്. നമ്മൾ എന്തൊക്കെ വിശേഷിപ്പിച്ചാലും മനപ്പൂർവ്വമല്ലാത്ത നരഹത്യ എന്നായിരിക്കുമല്ലോ കേസ് ചാർജ്ജ് ചെയ്യുക.

നെടുമ്പാശ്ശേരി കൊലപാതകത്തിൽ മൂന്ന് ചെറുപ്പക്കാരാണ് മരിച്ചതെങ്കിൽ ഇന്ന് ചേരാനെല്ലൂരിൽ മരിച്ചത് തട്ടുകട നടത്തി ജീവിക്കുന്ന മാഞ്ഞാലിക്കാരനായ ജയബാലകൃഷ്ണൻ എന്ന പാവപ്പെട്ട ഒരു മനുഷ്യനാണ്. തട്ടുകട അടച്ച് സ്ക്കൂട്ടറിൽ വീട്ടിലേക്ക് മടങ്ങുമ്പോളാണ് കൊലപാതകം. അമിതവേഗത്തിൽ വന്ന ബെൻസ് കാർ അപകടശേഷം നിർത്താതെ പോയെങ്കിലും 200 മീറ്റർ കഴിഞ്ഞപ്പോൾ വാഹനം താനെ നിന്ന് പോയതുകൊണ്ട് മാത്രമാണ് പ്രതി പിടിക്കപ്പെട്ടത്. Hit & Run കൂറേക്കൂടെ ഗുരുതരമായ കുറ്റകൃത്യമാണെന്ന് മനസ്സിലാക്കുക.

സത്യത്തിൽ നെടുമ്പാശ്ശേരി കൊലപാതകത്തേക്കാൾ ഒപ്പമോ അതിന് മുകളിലോ നിൽക്കുന്ന ഒരു കൊലയല്ലേ ഇത്? പ്രതി, ഇരിങ്ങാലക്കുട അഡീഷണൽ ജഡ്ജ് റിനോ ഫ്രാൻസിസിൻ്റെ മകനാണ് എന്നതുകൊണ്ടാണ് ന്യായമായ ഈ സംശയം? നീതിന്യായ നിർവ്വഹണം നടത്തുന്നവർ തന്നെ തങ്ങളുടെ സന്തതികളെ നിയമം കയ്യിലെടുക്കാൻ വേണ്ടി അഴിച്ചുവിടുമ്പോൾ എന്ത് സുരക്ഷയാണ് സാധാരണ ജനങ്ങൾക്ക് ഇന്നാട്ടിലുള്ളത്. എന്ത് വിലയാണ് ഇക്കൂട്ടർ നിയമവാഴ്ച്ചയ്ക്ക് നൽകുന്നത്? തങ്ങൾ കൈയാളുന്ന നിയമം തങ്ങൾക്ക് ബാധകമല്ല എന്നുണ്ടോ ഇന്നാട്ടിൽ?

പാതിരാ കഴിഞ്ഞാൽ റോഡിൽ ഇറങ്ങി നടക്കാൻ പറ്റില്ല എന്നല്ലേ ഈ രണ്ട് അപകടങ്ങളും കാണിക്കുന്നത്? ആഡംബര വാഹനങ്ങളുമായി ധനിക കുടുംബങ്ങളിലെ ടീനേജുകാർ ആളെക്കൊല്ലാൻ നിരത്തിലിറങ്ങുന്ന സമയമാണത് എന്ന് വേണ്ടേ മനസ്സിലാക്കാൻ?

‘ലൈസൻസിന് പ്രായമാകാത്ത പയ്യൻ്റെ കയ്യിൽ വാഹനം കൊടുത്തു വിടുന്ന നിങ്ങളല്ലേ കുറ്റക്കാരൻ ‘ എന്ന് ജഡ്ജിയെ ചോദ്യം ചെയ്തിരുന്നു, കൊല്ലപ്പെട്ട വ്യക്തിയുടെ ബന്ധുവായ സ്ത്രീ. ‘നിങ്ങൾ എന്നെ ചോദ്യം ചെയ്യേണ്ട ‘ എന്ന മട്ടിലായിരുന്നു ആ സമയത്ത് പൊലീസ് സ്റ്റേഷനിൽ വെച്ച് ജഡ്ജിയുടെ അഹങ്കാരം നിറഞ്ഞ മറുപടി. ജഡ്ജിമാർ എന്ത് തോന്ന്യാസം ചെയ്താലും ചോദ്യം ചെയ്യാൻ പാടില്ല എന്ന് നിയമമുണ്ടോ ഇവിടെ? നിയമം ലംഘിക്കാൻ കൂട്ട് നിന്നതിന് ന്യായാധിപ സ്ഥാനത്ത് നിന്ന് അദ്ദേഹത്തെ നിഷ്ക്കാസിതൻ ആക്കാനുള്ള നിയമം ഇല്ലെങ്കിൽ, അങ്ങനെയൊന്ന് ഉണ്ടാക്കുകയാണ് വേണ്ടത്? പ്രതിയായ മകനെ സ്വാഭാവികമായും ജുവനൈൽ ജയിലിൽ റിമാൻഡ് ചെയ്യുമായിരിക്കും. ഈ നിയമലംഘനം നടത്താൻ മകന് കൂട്ടുനിന്ന പിതാവായ ജഡ്ജിനേയും ജയിലിലാക്കാണം. അതിനുള്ള വകുപ്പില്ലെങ്കിൽ അത് ഉണ്ടാക്കുക കൂടെ വേണം, ഇത്തരം അനുഭവങ്ങളുടെ വെളിച്ചത്തിലെങ്കിലും.

ലൈസൻസ് ഇല്ലാത്ത ചെറുപ്പക്കാരെ വാഹനം കൊടുത്ത് നിരത്തിലേക്ക് വിടുന്നവർക്ക് നേരെ, അത് ഏത് വലിയ ജഡ്ജി ആയാലും, കർശനമായ നടപടി ഉണ്ടാകുമോ എന്ന് കണ്ടറിയണം. വെറുമൊരു IAS കാരനായ ശ്രീറാം വെങ്കിട്ടരാമന് തൻ്റെ വാഹനാപകടക്കേസ് അട്ടിമറിക്കാൻ കഴിയുമെങ്കിൽ, ജഡ്ജിന് അതിനേക്കാൾ കേമമായി കഴിയും. പക്ഷേ അങ്ങനെ സംഭവിക്കാൻ വിടരുത്.

നെടുമ്പാശ്ശേരി കൊലപാതകത്തേക്കാൾ പൊതുജനം ശക്തമായി അപലപിക്കേണ്ടത് ജഡ്ജിൻ്റെ മകൻ നടത്തിയ ഈ കൊലപാതകമാണ്. സുഹൈലിൻ്റെ ഉമ്മാൻ്റെ തുണിക്കടയിലേക്ക് മാർച്ച് നടത്തിയ എത്ര പേർ റിനോ ഫ്രാൻസിസ് എന്ന ജഡ്ജിൻ്റെ വീട്ടിലേക്ക് മാർച്ച് നടത്തുമെന്ന് കാത്തിരുന്ന് കാണാം. കൊലപാതകിക്ക് പരമാവധി ശിക്ഷ നേടിക്കൊടുക്കുമെന്നുള്ള ആഭ്യന്തരമന്ത്രിയുടെ പ്രഖ്യാപനം കേൾക്കാനും, നാലാം തൂണായ മാദ്ധ്യമങ്ങൾ ഈ കേസ് എങ്ങനെ കൈകാര്യം ചെയ്യുന്നെന്ന് കാണാനും കാത്തിരിക്കുന്നു.

കേരളത്തിലെ റോഡിൽ കാര്യങ്ങളുടെ പോക്ക് ഇങ്ങനെയാണെങ്കിൽ സ്വരക്ഷയ്ക്ക് വേണ്ടി പൊതുജനം പല അക്രമങ്ങളിലേക്കും കടന്നെന്ന് വരും. വാഹനങ്ങളുമായി പൊതുനിരത്തിൽ അഭ്യാസങ്ങൾ കാണിക്കുന്നത് ജഡ്ജിൻ്റെ മകനായാലും വ്യവസായിയുടെ മകനായാലും മന്ത്രിയുടെ മകനായാലും പോലീസേമാൻ്റെ മകനായാലും, സാധാരണക്കാരൻ്റെ മകനായാലും ഒരൊറ്റ രീതിയിൽ പൊതുജനം കൈകാര്യം ചെയ്തെന്നിരിക്കും, നിയമം ഇക്കൂട്ടർക്ക് കൂച്ചുവിലങ്ങ് ഇട്ടില്ലെങ്കിൽ. ശ്രീ. ജയബാലകൃഷ്ണന് ആദരാഞ്ജലികൾ.

വാൽക്കഷണം:- കൊല നടത്തിയ ചെറുക്കൻ്റെ പേര് ഇതുവരെ പുറത്ത് വന്നിട്ടില്ല. അവനെ കാണാനും ആരേയും അനുവദിച്ചിട്ടില്ല. അവനെ മെഡിക്കലിന് കൊണ്ടുപോകുമ്പോൾ കൂടുതൽ സുരക്ഷ നൽകാനും പൊലീസ് മറക്കരുത്. ജഡ്ജിയുടെ മകനല്ലേ? വാപ്പാമാരുടെ കാലമാണല്ലോ ഇത്.

#ആഡംബരവാഹനക്കൊല

നെടുമ്പാശ്ശേരി വാഹനാപകടവുമായി ബന്ധപ്പെട്ട്, പ്രതി സുഹൈലിനെ ബോസ്റ്റൽ സ്ക്കൂളിൽ റിമാൻഡ് ചെയ്തത് വിവാദമായിരിക്കുന്നതിൻ്റെ അടിസ്ഥാനത്തിലാണ് ഈ പോസ്റ്റ്.

ജുവനൈൽ ഹോം, ബോസ്റ്റൽ സ്ക്കൂൾ, സാധാരണ ജയിൽ എന്നിവയെക്കുറിച്ച് പൊതുജനത്തിന് കാര്യമായ ധാരണ ഉണ്ടാകണമെന്ന് നിർബന്ധമില്ല. പക്ഷേ മാദ്ധ്യമങ്ങൾക്കും ഇതേപ്പറ്റി അറിയില്ല എന്ന് വന്നാൽ, ജനങ്ങൾക്കിടയിലേക്ക് തെറ്റായ ധാരണ കൂടുതലായി പ്രചരിക്കും എന്നതുകൊണ്ട് കൂടെയാണ് ഇതേപ്പറ്റി വിശദമാക്കുന്നത്. തുടർന്ന്. ശ്രദ്ധിച്ച് വായിക്കണമെന്ന് അപേക്ഷ.

വസ്തുത 1 (ജയിൽ)
—————–
പ്രതിയുടെ പ്രായം 21 വയസ്സിന് മുകളിൽ ആണെങ്കിൽ സാധാരണ ജയിലുകളിലേക്കാണ് റിമാൻഡ് / ശിക്ഷ ചെയ്യുന്നത്. ജയിലുകളുടെ കൂട്ടത്തിൽ സെൻട്രൻ ജയിലുകളും (4) ജില്ലാ ജയിലുകളും (13) സബ് ജയിലുകളും (17) ഉണ്ട്. കണ്ണൂർ (പള്ളിക്കുന്ന്), മലപ്പുറം (തവനൂർ), ത്രിശൂർ (വിയ്യൂർ), തിരുവനന്തപുരം (പൂജപ്പുര) എന്നിവിടങ്ങളിലാണ് കേരളത്തിൽ സെൻട്രൽ ജയിലുകൾ ഉള്ളത്.

വസ്തുത 2 (ഒബ്സർവേഷൻ ഹോം)
—————-
കേസുകളിൽ കുറ്റാരോപിതരാകുന്നവരും ശിക്ഷിക്കപ്പെടുന്നവരുമായ 18 വയസ്സിൽ താഴെ പ്രായമുള്ളവരെ വനിത-ശിശു വകുപ്പിന് കീഴെ വരുന്ന ഒബ്സർവേഷൻ ഹോം / ചിൽഡ്രൻസ് ഹോം / ശിശുസദനം / ശിശുഭവനം എന്നയിടത്തേക്കാണ് പ്രവേശിപ്പിക്കുക. ഇതേ സ്ഥാപനത്തിൻ്റെ മറ്റ് ചില പേരുകൾ കൂടെ താഴെ കുറിക്കാം.
CCL (Child in conflict with the Law,
Juvenile Delinquent,
Juvenile in conflict with law,
Juvenile Justice (Care & Protection of children – Act 2015.

ഒരു സാധാരണക്കാരൻ ചിന്താക്കുഴപ്പത്തിൽ ആകാൻ ഇത്രയും പേരുകൾ തന്നെ ധാരാളമാണ്. പക്ഷേ മാദ്ധ്യമങ്ങൾക്ക് അങ്ങനെയൊരു ചിന്താക്കുഴപ്പം ഉണ്ടാകുന്നത് അഭിലഷണീയമല്ല.

ജുവനൈൽ ആക്റ്റ് തന്നെ വ്യത്യസ്തമാണ്. അവിടെയുള്ള കുട്ടികൾക്ക് തങ്ങൾ കുറ്റവാളികൾ അണെന്ന തോന്നൽ ഉണ്ടാകാൻ പാടില്ല എന്നാണ് ചട്ടം. പേരിൽ പോലും ആ തോന്നൽ ഉണ്ടാകാതിരിക്കാൻ പല പ്രാവശ്യം അതിൻ്റെ പേരുകൾ മാറ്റിമറിച്ചിട്ടുണ്ട്. അങ്ങനെയാണ് ഇപ്പോളുള്ള ഒബ്സർവേഷൻ ഹോം എന്ന പേരിൽ എത്തി നിൽക്കുന്നത്. (പൊളിറ്റിക്കൽ കറക്റ്റ്നെസ്സ് കൊണ്ടുവരാൻ വേണ്ടി വികലാംഗർ എന്ന പദത്തെ ഭിന്നശേഷിക്കാർ എന്നാക്കിയത് പോലെ.) അവിടെ ജയിൽ പോലെ യൂണിഫോം ഉണ്ടാകില്ല. പൊലീസ് യൂണിഫോമിലും മറ്റും ആരും അങ്ങോട്ട് ചെല്ലരുതെന്ന് ചട്ടമുണ്ട്. കേസ് നടത്തിപ്പും ഒക്കെ അങ്ങോട്ട് ചെന്ന് നടത്തുന്നത് ജുവനൈൽ ജസ്റ്റിസ് ബോർഡ് ആണ്. ഇവിടെയുള്ള കുട്ടികളെ കേസിൻ്റെ ഭാഗമായി കോടതിയിലേക്ക് കൊണ്ടുവരാറില്ല. 18 വയസ്സ് കഴിഞ്ഞാൽ മാത്രമേ ഇവരെ മറ്റ് ജയിലുകളിലേക്ക് മാറ്റിപ്പാർപ്പിക്കൂ.

ചുരുക്കിപ്പറഞ്ഞാൽ സുഹൈൽ എന്ന നെടുമ്പാശേരി വാഹനക്കേസ് പ്രതിയെ റിമാൻഡ് ചെയ്തിരിക്കുന്നത് ജുവനൈൽ ഹോമിലേക്കല്ല. പിന്നെവിടെയാണ്? തുടർന്ന് വായിക്കൂ.

വസ്തുത 3 (ബോസ്റ്റൽ സ്ക്കൂൾ)
———————
പ്രതിയുടെ പ്രായം 18 വയസ്സിനും 21 വയസ്സിനും ഇടയിലാണെങ്കിൽ അവരെ ബോസ്റ്റൽ (Borstal*) സ്ക്കൂൾ എന്ന ജയിലിലേക്കാണ് റിമാൻഡ് ചെയ്യുക. അത് ഒരു കറക്ഷണൽ ഹോം ആണ്. എന്തായാലും അത് വസ്തുത 2ൽ പറയുന്ന കുട്ടികളുടേതായ ജുവനൈൽ ഹോം/ഒബ്സർവ്വേഷൻ ഹോം അല്ല. 18-21 പ്രായക്കാർക്ക് ബോസ്റ്റൽ സ്ക്കൂളാണ് നിയമം അനുശാസിക്കുന്നത്. എത്ര വ്യത്യസ്തമോ വൈകാരികമോ ആയ കേസ് ആണെങ്കിലും നിയമത്തിനും കോടതിക്കും അങ്ങനെയൊരു നടപടിയേ സ്വീകരിക്കാനാവൂ. അത് തീരുമാനിക്കുന്നത് പൊലീസല്ല, കോടതിയാണ്.

നിലവിൽ കേരളത്തിൽ ഒരേയൊരു ബോസ്റ്റൽ സ്ക്കൂൾ മാത്രമേയുള്ളൂ. കാക്കനാട് ജില്ലാ ജെയിലിനോട് ചേർന്നാണ് അത് നിലകൊള്ളുന്നത്. അടുത്തടുത്ത വളപ്പുകൾ എന്ന് പറയാം. സത്യത്തിൽ കാക്കനാട് ആദ്യം ഉണ്ടായിരുന്നത് ബോസ്റ്റൽ സ്ക്കൂൾ മാത്രമായിരുന്നു. ജില്ലാ ജെയിൽ ഉണ്ടാക്കേണ്ടി വന്നപ്പോൾ ബോസ്റ്റൽ സ്ക്കൂളിൻ്റെ വളപ്പ് പകുത്ത് മതിൽ കെട്ടി ജില്ലാ ജെയിൽ സ്ഥാപിക്കുകയായിരുന്നു. ഇത് രണ്ടും രണ്ട് സ്ഥാപനങ്ങളാണ്. ബോസ്റ്റൽ സ്ക്കൂളിൽ CI റാങ്കിലുള്ള ജയിൽ സൂപ്രണ്ടും ജില്ലാ ജയിലിൽ DYSP റാങ്കിലുള്ള ജയിൽ സൂപ്രണ്ടുമാണ് ഉണ്ടാകുക.

കേരളത്തിൽ ആദ്യം ബോസ്റ്റൽ സ്ക്കൂൾ ഉണ്ടായിരുന്നത് കണ്ണൂർ സെൻട്രൽ ജയിലിനോട് ചേർന്നാണ്. സിബി മലയിൽ സംവിധാനം ചെയ്ത് മമ്മൂട്ടി, ബൈജു, സുധീഷ്, എന്നിവർ അഭിനയിച്ച മുദ്ര എന്ന സിനിമയിൽ കാണിക്കുന്നത് ആ ബോസ്റ്റൽ സ്ക്കൂൾ ആണ്. പിന്നീട് 1995ൽ അത് പൂട്ടിയശേഷമാണ് ബോസ്റ്റൽ സ്ക്കൂൾ കാക്കനാട് തുറന്നത്. കാക്കനാട്ടെ അഥവാ കേരളത്തിലുള്ള ഒരേയൊരു ബോസ്റ്റൽ സ്ക്കൂളിലെ സൗകര്യം പരമാവധി 60 പേർക്കാണ്. എന്നിരുന്നാലും 85-90 പേരെ വരെ ഇവിടെ താമസിപ്പിക്കാറുണ്ട്. എന്നിരുന്നാലും ഇവിടെ സ്ത്രീ തടവുകാർക്ക് താമസസൗകര്യം ഇല്ല. അവർ ജില്ലാ ജയിലിലോ സബ് ജയിലിലോ തന്നെ കഴിയണം.

കേരളത്തിലെ മറ്റ് ജില്ലകളിലും ശിക്ഷിക്കപ്പെടുന്ന 18-21 വയസ്സുകാർ എല്ലാവരേയും പാർപ്പിക്കാൻ കാക്കനാട് ബോസ്റ്റൽ സ്ക്കൂളിൽ സൗകര്യമുണ്ടാകാറില്ല. ഉണ്ടെങ്കിൽത്തന്നെ ആലപ്പുഴയിൽ നിന്നോ തൃശൂർ നിന്നോ ചുരുക്കം കുറ്റവാളികളെ പാർപ്പിച്ചെന്നിരിക്കും. മറ്റ് ജില്ലകളിലെ 18-21 വയസ്സുള്ള കുറ്റവാളികൾ അതാത് ജില്ലാ ജയിലുകളിലെ പ്രമുഖ തടവുകാർക്കൊപ്പം തന്നെയാണ് പാർക്കുന്നത്. ഇവർ ബോസ്റ്റൽ തടവുകാരാണെന്ന് ജയിൽ വകുപ്പിനുള്ള പൂർണ്ണബോദ്ധ്യത്തോടെയും കോടതിയുടെ അറിവോടും കൂടെത്തന്നെയാണ് ഇങ്ങനെ പാർപ്പിക്കുന്നത്. ഈ തടവുകാർ മറ്റ് വലിയ ക്രിമിനലുകളുമായി ഇടപഴകി നിലവിലുള്ളതിനേക്കാൾ വലിയ ക്രിമിനലുകൾ ആകാതെ നോക്കുക. സ്വവർഗ്ഗാനുരാഗികളായ മുതിർന്ന തടവുകാരിൽ നിന്ന് പരിരക്ഷിക്കുക എന്നിങ്ങനെ നിയമത്തിൻ്റേതായ കരുതലുകൾ ഇവർക്കുണ്ട്. അതുകൊണ്ട് തന്നെ ബോസ്റ്റൽ സ്ക്കൂൾ ഇല്ലാത്തയിടങ്ങളിലെ മറ്റ് ജയിലുകളിൽ ഈ പ്രായക്കാരെ താമസിപ്പിക്കുന്നത് ഒരേ സെല്ലുകളിൽ ആയിരിക്കും. CCTV ക്യാമറയ്ക്ക് അടുത്തുള്ള സെല്ലുകളിലോ വാർഡന്മാരുടെ നോട്ടം പെട്ടെന്ന് കിട്ടുന്ന സെല്ലുകളിലോ താമസിപ്പിക്കും.

പറഞ്ഞുവന്നത്, മേൽപ്പറഞ്ഞ വസ്തുതകളും നിയമങ്ങളും വെച്ച് നോക്കുമ്പോൾ സുഹൈലിനെ കാക്കനാട്ടെ ബോസ്റ്റൽ സ്ക്കൂളിലേക്ക് അയക്കാൻ മാത്രമേ പൊലീസിനും കോടതിക്കും നിയമത്തിനും സാധിക്കൂ. അങ്ങനെ ചെയ്തില്ലെങ്കിൽ ന്യായാധിപൻ അടക്കമുള്ളവർക്ക് പ്രശ്നമുണ്ട്. സുഹൈലിൻ്റെ കുടുംബത്തിൻ്റെ പണമോ സ്വാധീനമോ ബോസ്റ്റൽ സ്ക്കൂളിലേക്കുള്ള അയാളുടെ റിമാൻഡിനെ സ്വാധീനിച്ചിട്ടില്ല എന്ന് സാരം.

സുഹൈൽ മദ്യപിച്ച് അമിതവേഗത്തിൽ കാറോടിച്ച് മനുഷ്യജീവനുകളെടുത്തത് കണ്ണൂരിൽ വെച്ചായിരുന്നെങ്കിൽ അയാൾ കണ്ണൂർ ജില്ലാ ജെയിലിലേക്ക് പോകുമായിരുന്നു. സുഹൈലിന് എന്നല്ല, ധനാഢ്യനോ അല്ലാത്തതോ ആയ മറ്റൊരു ചെറുപ്പക്കാരൻ്റെ കാര്യത്തിലും ഇങ്ങനെ തന്നെയാകും കോടതി നടപടി വരുക. ബോസ്റ്റൽ സൗകര്യം ഉള്ളയിടമാണെങ്കിൽ അങ്ങോട്ട്, ആ സൗകര്യം ഇല്ലെങ്കിൽ സാധാരണ ജയിലിലേക്ക്.

ആയതിനാൽ, സുഹൈലിനെ ജയിലിലേക്ക് അയച്ച കാര്യത്തിൽ വഴിവിട്ട് എന്തെങ്കിലും സംഭവിച്ചതായി കരുതേണ്ടതില്ല.

എന്നിരുന്നാലും ഈ നിയമവുമായി ബന്ധപ്പെട്ട് ഒരു തിരുത്തൽ അല്ലെങ്കിൽ മാറ്റം ഉണ്ടാകേണ്ടിയിരിക്കുന്നു എന്ന് ഞാൻ കരുതുന്നു. തികച്ചും വ്യക്തിപരമായി ഒരഭിപ്രായം മാത്രം. 18 വയസ്സുകാർക്ക് ഡ്രൈവിങ്ങ് ലൈസൻസ് കൊടുക്കാമെങ്കിൽ അവർ ചെയ്യുന്ന ഏതൊരു ഗതാഗത കുറ്റകൃത്യവും മുതിർന്നവരെപ്പൊലെ വിചാരണയ്ക്കും തടവിനും ശിക്ഷയ്ക്കും വിടാനുള്ള വകുപ്പ് ഉണ്ടാകണം. ആ സമയത്ത് മാത്രം അവർ ഇള്ളക്കുട്ടികളാണ് കുപ്പിപ്പാൽ കുടിച്ചോട്ടെ എന്ന നിലയ്ക്കുള്ള ആനുകൂല്യങ്ങൾ പാടില്ല. അവരെ മറ്റുള്ള തടവുകാർ കിടക്കുന്ന സാധാരണ ജയിലിലേക്ക് തന്നെ വിടണം. അല്ലെങ്കിൽ അവർക്ക് 21 വയസ്സിന് ശേഷമേ ലൈസൻസ് കൊടുക്കൂ എന്ന നിയമം വന്നാലും മതി. ഇതിൽ ഏതെങ്കിലും ഒരു നിയമനിർമ്മാണം ഉണ്ടാകാനുള്ള നടപടി വേണ്ടതാണ്. (വേണമെങ്കിൽ ബോസ്റ്റൽ സ്ക്കൂൾ 18-21 വയസ്സുള്ള മറ്റ് തടവുകാർക്കായി തുടർന്നോളൂ.)

ജയിലിൻ്റെ കാര്യം വിശദീകരിച്ചത് സുഹൈലിൻ്റെ പക്ഷം ചേർന്നല്ല. സുഹൈലിനെപ്പോലുള്ള പണമുള്ള വീട്ടിലെ ചെറുക്കന്മാർക്ക് തുലച്ച് കളയാനുള്ളതല്ല നിരത്തിലിറങ്ങി നടക്കുന്ന ഓരോ സാധാരണക്കാരുടേയും ജീവിതം. അയാൾക്ക് പരമാവധി ശിക്ഷ കിട്ടണെമെന്ന് തന്നെയാണ് ഞാനും ആഗ്രഹിക്കുന്നത്. പക്ഷേ, ജയിലുകളെ സംബന്ധിച്ച് മാദ്ധ്യമങ്ങൾ അടക്കം നമ്മളിൽ പലർക്കുമുള്ള അറിവുകേട് അൽപ്പമെങ്കിലും പരിഹരിക്കാൻ വേണ്ടിയാണ് ഇത് എഴുതേണ്ടി വന്നത്. സുഹൈലിന് ശരിയായ ശിക്ഷതന്നെ കിട്ടണമെന്ന് ഏതൊരു മനുഷ്യനേയും പോലും ഞാനും ആഗ്രഹിക്കുന്നു. കൊല്ലപ്പെട്ട കുട്ടികൾക്കും അവരുടെ കുടുംബങ്ങൾക്കും നീതി ലഭിക്കുക തന്നെ വേണം.

സുഹൈലിനെ ജുവനൈൽ ഹോമിലേക്ക് വിടുന്നു എന്ന് എഴുതിയ ഒരു മാദ്ധ്യമത്തിൻ്റെ കാർഡ് എന്നേയും തെറ്റിദ്ധരിപ്പിച്ചിരുന്നു തുടക്കത്തിൽ. പിന്നീട് ഞാനതേപ്പറ്റി കൂടുതൽ അന്വേഷിക്കുകയായിരുന്നു. വിയ്യൂർ സെൻട്രൽ ജയിൽ സൂപ്രണ്ടായി വിരമിച്ച അനിൽകുമാർ സാറാണ് Anil Kumar എൻ്റെ സംശയങ്ങൾ ദുരീകരിച്ചത്. അദ്ദേഹത്തിന് നന്ദി.

*ബോസ്റ്റൽ സ്ക്കൂൾ എന്ന പേർ എങ്ങനെ വന്നു എന്ന് കൂടെ പറഞ്ഞ് അവസാനിപ്പിക്കാം. ഇംഗ്ലണ്ടിൽ നിന്നാണ് അതിൻ്റെ തുടക്കം. 1902ൽ സർ.എവിലിൻ റഗ്ഗിൾസ് എന്ന സായിപ്പാണ് ആദ്യത്തെ ബോസ്റ്റൽ സ്ക്കൂളിന് പരീക്ഷണാർത്ഥത്തിൽ തുടക്കമിട്ടത്. ഇംഗ്ലണ്ടിലെ റോച്ചെസ്റ്റർ തുറമുഖ നഗരത്തിന് സമീപമുള്ള ബോസ്റ്റൽ എന്ന ഗ്രാമത്തിലായിരുന്നു ഗ്ലാഡ്സ്റ്റോൺ കമ്മറ്റിയുടെ നിർദ്ദേശാർത്ഥം ആദ്യത്തെ ആ ബോസ്റ്റൽ സ്ക്കൂൾ സർ.എവിലിൻ റഗ്ഗിൾസ് ആരംഭിച്ചത്.

വാൽക്കഷണം:- മാദ്ധ്യമങ്ങളെ തിരുത്താനാണെങ്കിൽ, FIR-ൽ സുഹൈലിൻ്റെ പേരില്ല, അയാൾ മദ്യപിച്ചിരുന്നു എന്ന് പരാമർശമില്ല, കേസ് അട്ടിമറിക്കാൻ പോകുന്നു എന്നൊക്കെ പറഞ്ഞ് പുതിയ മുറവിളിയും കാർഡുകളും വന്നിട്ടുണ്ട്. എങ്ങനെയാണ് എത്തരത്തിലാണ് ഒരു FIR ഉണ്ടാകുന്നത്/ഉണ്ടാക്കുന്നത് എന്ന് എതെങ്കിലും ഒരു പൊലീസ് ഉദ്യോഗസ്ഥനോട് ചോദിച്ചാൽ വിശദമായി പറഞ്ഞ് തരും. എല്ലാ സാധാരണക്കാർക്കും അത് കഴിയണമെന്നില്ല. പക്ഷേ മാദ്ധ്യമങ്ങൾക്ക് കഴിയും, കഴിഞ്ഞേ പറ്റൂ. അതൊന്നും മനസ്സിലാക്കാതെ തെറ്റായ ചിന്തകളും വിവരങ്ങളും ജനങ്ങൾക്കിടയിലേക്ക് പടർത്തുന്നതിനെ മാദ്ധ്യമപ്രവർത്തനം എന്ന് പറയാനാവില്ല.

(ചിത്രം:- കാക്കനാട്ടുള്ള കേരളത്തിലെ ഏക ബോസ്റ്റൽ സ്ക്കൂളിൻ്റെ കവാടം.)

#borstalschool
#borstal

നെടുമ്പാശ്ശേരിയിൽ സുഹൈൽ സജീവ് എന്ന 19കാരൻ അമിതവേഗത്തിൽ വണ്ടിയോടിച്ച് മൂന്ന് ചെറുപ്പക്കാരുടെ ജീവനെടുത്ത കേസിൽ ചില നിരീക്ഷണങ്ങൾ പറയാനുണ്ട്.

1. പ്രതിയെ തെളിവെടുപ്പിന് കൊണ്ടുപോയ പോലീസുകാർ, കേസ് നിഷ്പ്രഭമാക്കാൻ പോന്ന തരത്തിൽ സംസാരിക്കുന്നത് വീഡിയോയിൽ സുവ്യക്തമാണ്. സ്പീഡ് 100ന് താഴെ ആക്കി കൊണ്ടുവരാൻ പോലീസുകാരൻ കിണഞ്ഞു പരിശ്രമിക്കുന്നത് മനസ്സിലാക്കാൻ ഒരു ബുദ്ധിമുട്ടുമില്ല. കുറ്റവാളിയുടെ ധനാഢ്യരായ രക്ഷകർത്താക്കൾ ഇതിനകം പണം വാരി എറിഞ്ഞിട്ടില്ലെങ്കിലേ അത്ഭുതമുള്ളൂ. ഇന്ന് മനോരമ ചാനൽ വാർത്തയിൽ 100 കിലോമീറ്ററിൽ അധികം വേഗത എന്ന് വന്ന് കഴിഞ്ഞു. അതിനേക്കാളൊക്കെ ഒരുപാട് അധികം വേഗത ഉണ്ടായിരുന്നു എന്ന് സൂചനകളുണ്ട്.

2. മിനി കൂപ്പർ വാഹനം പരിശോധനയ്ക്ക് വിടുന്നുണ്ട് എന്ന് അറിയാൻ കഴിഞ്ഞു. അപകടം നടക്കുമ്പോൾ എത്ര വേഗത ഉണ്ടായിരുന്നു എന്ന് പരിശോധനയിൽ നിന്ന് മനസ്സിലാക്കാൻ കഴിയും. ആ റിസൽറ്റ് പണമെറിഞ്ഞ് അട്ടിമറിക്കപ്പെടാതിരിക്കട്ടെ എന്ന് ആഗ്രഹിക്കുന്നു.

3. കുറ്റവാളിയുടെ സോഷ്യൽ മീഡിയ അക്കൗണ്ട് മുക്കി കഴിഞ്ഞിരിക്കുന്നു. അയാൾ 220 കിലോമീറ്റർ സ്പീഡിൽ വാഹനമോടിച്ചുകൊണ്ട് എടുത്തിരിക്കുന്ന മുൻ വീഡിയോ മുക്കുകയായിരിക്കാം പ്രധാന ഉദ്ദേശം. പക്ഷേ മിടുക്കുള്ളവർ ആ വീഡിയോ സോഷ്യൽ മീഡിയയിൽ തിരികെ കൊണ്ടുവന്നിട്ടുണ്ട്. ഹാറ്റ്സ് ഓഫ് കൂട്ടരേ.

4. നമുക്ക് സാധിക്കുമെങ്കിൽ കുട്ടികളുടെ ആഗ്രഹങ്ങൾ നടപ്പിലാക്കി കൊടുക്കണമെന്നാണ് പ്രതി സുഹൈലിൻ്റെ അമ്മ തന്റെ വീഡിയോയിൽ ആഹ്വാനം ചെയ്യുന്നത്. നല്ല ബെസ്റ്റ് മദർ. അമ്മമാരായാൽ ഇങ്ങനെ തന്നെ വേണം. മകനുമൊത്തുള്ള അവരുടെ വീഡിയോകളിൽ നിന്ന് ആ ചെറുക്കനെ അവർ എത്രത്തോളം ലാളിച്ച് വഷളാക്കിയിട്ടുണ്ടെന്ന് സ്പഷ്ടമാണ്. അതിന്റെ ഫലമാണ് ഇപ്പോൾ അവർ അനുഭവിക്കുന്നത്.

5. ബോത്തിക്ക് നടത്തുന്ന ആ സ്ത്രീ, തങ്ങൾക്കെതിരെ നെഗറ്റീവ് കമന്റ് ഇട്ടവർക്കെതിരെയെല്ലാം മാനനഷ്ടത്തിന് കേസ് കൊടുക്കും എന്നാണ് പറയുന്നത്. പണത്തിന്റെ ഹുങ്കാണ് അവർ പ്രകടിപ്പിക്കുന്നതെന്ന് സ്പഷ്ടം. “എന്റെ ബാപ്പ നോക്കിക്കോളും” എന്ന് പ്രതിയായ സുഹൈൽ പറഞ്ഞതും ഇതേ ഹുങ്കിന്റെ പിൻബലത്തിലാണ്.

6. മക്കൾ ആവശ്യപ്പെടുന്നത് എന്തായാലും അതെല്ലാം അപ്പപ്പോൾ വാങ്ങിക്കൊടുക്കുക എന്നല്ലാതെ ഈ നാട്ടിലെ നിയമവ്യവസ്ഥയെ അനുസരിക്കാൻ ഇക്കൂട്ടർക്ക് സാദ്ധ്യമല്ല എന്ന് വാഹനത്തിന്റെ നമ്പർ പ്ലേറ്റ് തെളിയിക്കുന്നു. ആ വാഹനത്തിന് HSRP നമ്പർ പ്ലേറ്റ് ഇല്ല. അവർക്ക് തോന്നിയ കണക്കുള്ള ഒരു ഫാൻസി നമ്പർ പ്ലേറ്റും ഫോണ്ടുമാണ് പിടിപ്പിച്ചിരിക്കുന്നത്. നിയമത്തിന് പുല്ലുവില.

7. ഈ ചെറുക്കന് കഷ്ടി ഒരു വർഷത്തെ ഡ്രൈവിംഗ് പരിചയമേ ഉള്ളൂ. അപ്പോഴേക്കും ഇതാണ് അവസ്ഥയെങ്കിൽ, നാലഞ്ചു കൊല്ലം കൂടി കഴിയുമ്പോൾ എന്താകുമായിരുന്നു സ്ഥിതി!?

8. മദ്യപിച്ച് വാഹനമോടിച്ച് മൂന്നാളെ കൊന്നാലും, കുറച്ചു ദിവസം കഴിയുമ്പോൾ റദ്ദ് ചെയ്ത ലൈസൻസ് (ചെയ്താലായി) ഇയാൾക്ക് തിരികെ കിട്ടും. ആജീവനാന്ത ലൈസൻസ് ബാൻ അടിക്കാനൊന്നും ഇന്ത്യാ മഹാരാജ്യത്ത് വകുപ്പില്ല. അതുതന്നെയാണ് ഇതുപോലുള്ള ആൾക്കാർക്ക് വളം. ഇവിടെ ഗതാഗത നിയമങ്ങൾ കർശനമല്ല. പണവും സ്വാധീനവും ഉള്ളവർക്ക് വേറെ നിയമമാണ്. സൽമാൻ ഖാൻ, ജോസ് കെ. മാണി ജൂനിയർ, ശ്രീറാം വെങ്കിട്ടരാമൻ IAS എന്നിവർക്ക് എതിരെയുള്ള നിയമനടപടികൾ ഉദാഹരണം.

9. ഏതൊരു വാഹനാപകടക്കേസും പോലെ തന്നെ, മനപൂർവ്വമല്ലാത്ത നരഹത്യ ആയിരിക്കണം നെടുമ്പാശ്ശേരിയിലും ചാർജ് ചെയ്തിരിക്കുക. അങ്ങനെ ആണെങ്കിലും അല്ലെങ്കിലും പണം വാരിയെറിഞ്ഞ് സുഹൈൽ എന്ന പ്രതി ഈ കേസിൽ നിന്ന് ഊരിപ്പോരും. മൂന്ന് ചെറുപ്പക്കാരുടെ കുടുംബത്തിന് പോയി. അത്രതന്നെ.

10. ഇരുപത്തിമൂന്ന് വയസ്സ് ആകാത്ത ചെറുക്കന് മദ്യം കൊടുത്തതിൻ്റെ പേരിൽ ബാറുകാർക്ക് എതിരെ കേസ് ചാർജ്ജ് ചെയ്യും എന്നൊരു കോമഡി മറ്റൊരു ഭാഗത്ത് തകർക്കുന്നുണ്ട്. നാട്ടിൽ ഒരാൾക്ക് മദ്യം കിട്ടാൻ ബാറ് മാത്രമാണ് അവലംബം എന്ന് തോന്നും ഇതൊക്കെ കേട്ടാൽ. നിയമവിരുദ്ധമായ മയക്കുമരുന്നുകൾ യഥേഷ്ടം ലഭ്യമായ ഒരു സംസ്ഥാനത്ത്, കരം ഈടാക്കി സർക്കാർ തന്നെ വിൽക്കുന്ന മദ്യം, ഏതൊരു പ്രായക്കാർക്കും കിട്ടാൻ എന്താണ് ബുദ്ധിമുട്ട്?!

11. ട്രാഫിക് നിയമങ്ങൾ പാലിക്കാത്തതിന്, മദ്യപിച്ചു വാഹനം ഓടിച്ചതിന്, വാഹനത്തിന് ശരിയായ രജിസ്ട്രേഷൻ നമ്പർ പിടിപ്പിക്കാത്തതിന്, ഇതൊക്കെ ചേർത്ത്, ആജീവനാന്തകാലം ചെറുക്കൻ്റെ ലൈസൻസ് റദ്ദാക്കാൻ വകുപ്പുണ്ടോ ഇന്നാട്ടിൽ. എങ്കിൽ മനുഷ്യർക്ക് സ്വസ്ഥമായി റോഡിൽ ഇറങ്ങി നടക്കാനാവും. അല്ലാത്തിടത്തോളം ഇതെല്ലാം തുടർക്കഥകളാകും.

12. മക്കൾ രണ്ടുപേരും വണ്ടിഭ്രാന്തന്മാരാണെന്ന് സുഹൈലിൻ്റെ അമ്മ അഭിമാനത്തോടെ പറയുന്നുണ്ട് ഒരു വീഡിയോയിൽ. ആ വണ്ടി പ്രാന്തിനെ കൈയയച്ച് പ്രോത്സാഹിപ്പിച്ചപ്പോൾ മകൻ കയ്യാമം വെച്ച് നടക്കുന്നത് കാണാനായില്ലേ മാഡം? അല്പം കൂടി അഭിമാനിച്ചോളൂ.

13. ഇന്നാട്ടിൽ ഗതാഗത നിയമങ്ങൾ കൃത്യമായി പാലിക്കപ്പെടുന്നുണ്ടോ? 79 കോടി രൂപയോ മറ്റോ ചിലവഴിച്ച് നിരത്തുകളിൽ പിടിപ്പിച്ച AI ക്യാമറകൾ വല്ലതും ഇപ്പോൾ പണിയെടുക്കുന്നുണ്ടോ? അക്കാലത്ത് കുട്ടികൾക്ക് വരെ ഹെൽമെറ്റ് വാങ്ങിവെച്ചവർ ഇപ്പോൾ പഴയതുപോലെയായി. നിലവിൽ കുട്ടികൾക്കും വലിയവർക്കും ഹെൽമറ്റ് ഇല്ല.

14. അപകടത്തിൽപ്പെട്ട് മരിച്ച മൂന്ന് പേരും നിയമം ലംഘിച്ചിരുന്നു. ഒരു ടൂ വീലറിൽ മൂന്ന് പേരാണ് സഞ്ചരിച്ചിരുന്നത്. നിയമം കർശനമല്ലാത്തതിന്റെ കുഴപ്പം. 19 വയസുള്ള ഈ പ്രതിയെ ജയിലിലേക്ക് വിടാതെ ദുർഗ്ഗണ പരിഹാര പാഠശാലയിലേക്കാണ് റിമാൻഡ് ചെയ്തിരിക്കുന്നത് എന്നാണ് ഏറ്റവും പുതിയ വാർത്ത. 18 വയസ്സ് കഴിഞ്ഞവർക്ക് വോട്ടവകാശം നൽകാമെങ്കിൽ, അവർക്ക് ലൈസൻസ് നൽകാമെങ്കിൽ, അവർ ചെയ്യുന്ന കുറ്റങ്ങൾക്ക് ജയിലിലേക്ക് തന്നെ അയക്കാനുള്ള നിയമം ഉണ്ടാകണം. ആ സമയത്ത് മാത്രം, കുപ്പിപ്പാൻ കുടിക്കുന്ന കുഞ്ഞു കുട്ടികളായി അവരെ പരിഗണിക്കരുത്.

15. മക്കൾ ആവശ്യപ്പെടുന്നതെന്തും തൽക്ഷണം സാധിച്ച് കൊടുക്കുന്ന വീണ്ടുവിചാരമില്ലാത്ത മാതാപിതാക്കളും നിയമത്തിന് പുല്ലുവില നൽകാത്ത ഇത്തരം ചെറുപ്പക്കാരെ നിലയ്ക്ക് നിർത്താൻ പോന്ന കർശനമായ നിയമസംവിധാനം ഇല്ലാത്തതുമാണ് ഇതുപോലുള്ള അപകടങ്ങളുടെ മൂലകാരണം.

വാൽക്കഷണം:- വാഹനമിടിച്ച് ഒരാളെ കൊന്നതിൻ്റെ പേരിൽ മുഹമ്മദ് നിഷാം എന്നൊരു കോടീശ്വരനെങ്കിലും അഴിയെണ്ണുന്നുണ്ട് എന്നതാണ് ഇത്തരം കേസുകളിലെ ഏക ആശ്വാസം. അത് മനപ്പൂർവ്വമുള്ള നരഹത്യ ആയതുകൊണ്ടാകാം ശിക്ഷിക്കപ്പെട്ടത്. അതുപോലെ പത്ത് ധനാഢ്യരെങ്കിലും ഇത്തരം കേസുകളിൽ അഴിയെണ്ണുന്ന അവസ്ഥ ഉണ്ടായാൽ എന്തെങ്കിലും മാറ്റം കേരളത്തിലെ നിരത്തുകളിൽ പ്രതീക്ഷിക്കാം. അല്ലെങ്കിൽ നാല് ദിവസത്തെ വാർത്തയ്ക്ക് ശേഷം ഇതും ഒതുങ്ങും. മറ്റൊരു വേഷത്തിൽ മറ്റൊരു ഹെയർസ്റ്റൈലിൽ വീണ്ടും അമിതവേഗത്തിലും മദ്യലഹരിയിലും ആഡംബര കാറിൽ പാഞ്ഞെത്തുന്ന സുഹൈലിനെ ജനം തിരിച്ചറിയില്ല. അന്ത്യശ്വാസം വലിക്കുന്നതിനിടയിൽ, അവന്റെ വാഹനത്തിന്റെ ചക്രങ്ങൾക്കിടയിൽ പെടുന്നവർ ഒട്ടും തിരിച്ചറിയില്ല.

തടവുകാരുടെ ഭക്ഷണത്തിൽ നിന്ന് മട്ടനും മീനും വെട്ടിച്ചുരുക്കാൻ ജയിൽ വകുപ്പ് ശുപാർശ ചെയ്തിരിക്കുന്നു. ആ വകയിൽ 10 കോടി രൂപ ലാഭിക്കാം എന്നാണ് കണക്കാക്കുന്നത്.

ജയിൽപ്പുള്ളികൾക്ക് കഴിഞ്ഞ സർക്കാർ വർദ്ധിപ്പിച്ച് നൽകിയ കൂലി പഴയത് പോലെ ആക്കിയാൽ ഇതിൽക്കൂടുതൽ തുക ലാഭിക്കാൻ പറ്റും.

പെട്രോൾ ബങ്കിൽ ജോലി ചെയ്യുന്ന ഒരു സ്ത്രീക്ക് കിട്ടുന്ന ദിവസക്കൂലി 450 രൂപയാണ്. അവരുടെ കറൻസി ബാഗ് തട്ടിപ്പറിച്ചതിൻ്റെ പേരിൽ ജയിലിൽ ആകുന്ന ഒരു ക്രിമിനലിന് 530 – 620 രൂപ ശമ്പളം കിട്ടും. അതിലും കുറഞ്ഞ ശമ്പളത്തിൽ പണിയെടുക്കുന്ന എത്രയോ അയ്യോ പാവങ്ങൾ ജയിലിന് വെളിയിലുണ്ട്. അത് അനീതിയാണ്.

വിദഗ്ദ്ധ തൊഴിലാളികൾക്ക് 620 രൂപയും, അർദ്ധവിദഗ്ദ്ധ തൊഴിലാളികൾക്ക് 560 രൂപയും അവിദഗ്ദ്ധ തൊഴിലാളികൾക്ക് 530 രൂപയുമാണ് ജയിലിലെ പുതുക്കിയ കൂലി നിരക്ക്. അത് പഴയത് പോലെ 63 – 163 – 230 രൂപ നിരക്കുകൾ ആക്കണമെന്നാണ് എൻ്റെ പക്ഷം.

എൻ്റെ ഈ അഭിപ്രായം, മേൽപ്പടി വാർത്തയുടെ അടിയിൽ കമന്റായി പറഞ്ഞപ്പോൾ, ജയിൽ തൊഴിലാളികൾക്ക് 100 രൂപ മാത്രമാണ് ശമ്പളം എന്ന് എതിരഭിപ്രായവും വന്നു. ജയിലിൽ കിടക്കുന്ന ക്രിമിനൽക്കുവേണ്ടി വാദിക്കാനും സോഷ്യൽ മീഡിയയിൽ ആൾക്കാരുണ്ട് എന്നതാണ് തമാശ.

ഒരു കാര്യം ശരിയാണ്; ഈ തുക മുഴുവനും കുറ്റവാളികൾക്ക് കിട്ടില്ല. 30% ഇവർ കാരണം ദുരിതമനുഭവിക്കുന്നവരുടെ വീട്ടിലേക്ക് പോകും. കുറച്ച് പണം ജയിലിൽ ഇവരുടെ ഭക്ഷണത്തിനും മറ്റു കാര്യങ്ങൾക്കുമായി എടുക്കും. അത് കഴിഞ്ഞുള്ള തുകയാണ് തടവുകാർക്ക് കിട്ടുക.

കൂട്ടത്തിൽ മറ്റൊരു കാര്യം കൂടി പറയാം. ജയിലിൽ, മെനു പ്രകാരമുള്ള മട്ടനും ചിക്കനും മീനും മറ്റും ആഴ്ച്ചതോറും നൽകുന്നില്ല. ജയിൽ ഉദ്യോഗസ്ഥന്മാരും മേസ്തിരിമാരും കുശാലായി അവർക്ക് ആവശ്യമുള്ള ഭക്ഷണം അടിക്കുന്നുണ്ട്. വല്ലപ്പോഴെല്ലാം ജയിൽവാസികൾക്കും കിട്ടുമായിരിക്കും. പക്ഷേ ഇതിനാവശ്യമായ തുക കൃത്യമായി എഴുതിയെടുക്കുന്നുണ്ട്. അത് എങ്ങോട്ട് പോകുന്നു എന്ന് പ്രത്യേകം പറയേണ്ടതില്ലല്ലോ. (എല്ലാ ജയിലിലും കാര്യങ്ങൾ ഇങ്ങനെ ആകണമെന്നില്ല. ഉദ്യോഗസ്ഥന്മാടെ ഇടപെടൽ പോലെയിരിക്കും.) ഇക്കാര്യം ഞാൻ മനസ്സിലാക്കിയത് ജയിൽ കിടന്നിട്ടുള്ള ഒരാളുടെ കമന്റിൽ നിന്ന് തന്നെയാണ്. (കർമ്മവശാൽ ഞാൻ ഇതുവരെ ജയിലിൽ കിടന്നിട്ടില്ല.) അഴിമതി എന്ന് പറയുന്ന സംഭവം പുരാണത്തിലെ ഹിരണ്യകശിപു പറഞ്ഞത് പോലെയാണ്. അത് തൂണിലും തുരുമ്പിലും മാത്രമല്ല ജയിലിലുമുണ്ട് നമ്മുടെ രാജ്യത്ത്.

അതൊക്കെ എന്തായാലും ജയിലിൽ തുച്ഛശമ്പളം മാത്രമേ കൊടുക്കാൻ പാടുള്ളൂ. ജയിലിൽ അയക്കുന്നത്, ചെയ്ത കുറ്റത്തിൻ്റെ ശിക്ഷ എന്ന നിലയ്ക്കാണ്. സുഖിച്ച് ജീവിക്കാനും പുറത്ത് ജീവിക്കുന്നവരേക്കാൾ കൂടുതൽ സമ്പാദിക്കാനുമല്ല. ശിക്ഷ കഴിഞ്ഞ് പുറത്തിറങ്ങുമ്പോൾ ആദ്യത്തെ കുറച്ച് ദിവസങ്ങൾ പിടിച്ച് നിൽക്കാനും ജീവിക്കാനും അൽപ്പം പണം കയ്യിൽ വേണം. അത് തീരുമ്പോഴേക്കും, പണ്ട് ചെയ്തിരുന്ന പണിയോ (കളവും തട്ടിപ്പും കൊട്ടേഷനും അല്ല ഉദ്ദേശിച്ചത്) മറ്റൊരു ജോലിയോ കണ്ടുപിടിച്ച് ജീവിതം മുന്നോട്ടു നീക്കേണ്ടത് ജയിലിൽ നിന്നും പുറത്തു വരുന്ന വ്യക്തിയുടെ മാത്രം ബാദ്ധ്യതയാണ്.

വാൽക്കഷണം:- മൂന്ന് നേരം ഭക്ഷണവും ആവശ്യമെങ്കിൽ മരുന്നും പണി ചെയ്യുന്നവർക്ക് ചെറിയൊരു കൂലിയും കൊടുക്കുന്നുണ്ടെങ്കിൽ മനുഷ്യാവകാശം സംരക്ഷിക്കുകയും നടപ്പിലാകുകയും ചെയ്ത് കഴിഞ്ഞു. ജയിൽപ്പുള്ളികളും മനുഷ്യരല്ലേ എന്ന ചോദ്യം ഉയർന്നാൽ അതിനുള്ള മറുപടിയാണ്.

കേരളത്തിലെ ആറുവരി ദേശീയപാത മുഴുവനായി പണി തീർന്നിട്ടില്ല. അതിന് മുന്നേതന്നെ ഒരുവരിപ്പാത ഹെവി വാഹനങ്ങൾ പാർക്ക് ചെയ്യാൻ ഉപയോഗിച്ച് തുടങ്ങിക്കഴിഞ്ഞിരിക്കുന്നു. കൊല്ലത്ത് ചിത്രീകരിച്ചിരിക്കുന്ന ഈ വീഡിയോ https://www.facebook.com/share/v/1Cbaz4GGwD/ കണ്ടാൽ അതിന്റെ ഭീകരാവസ്ഥ മനസ്സിലാക്കാനാവും.

അത്തരത്തിൽ പാർക്ക് ചെയ്തിരുന്ന ഒരു ട്രക്കിൽ കാറിടിച്ചാണ് ഇന്നലെ കൈപ്പമംഗലത്ത് 8 വിദ്യാർത്ഥികൾ കൊല്ലപ്പെട്ടത്.

ഈ ആറുവരിപ്പാതയിലേക്ക് വാഹനങ്ങൾ കയറുന്നതും ഇറങ്ങുന്നതും കണ്ടാൽ, നിയമം തൊട്ടടുത്തുള്ള ഏതെങ്കിലുമൊരു കിണറ്റിലേക്ക് ചാടിച്ചാകും. എക്സിറ്റിലൂടെ എൻട്രി അടിക്കുന്നതും എൻട്രിയിലൂടെ എക്സിറ്റ് ചെയ്യുന്നതും ഒരു സ്ഥിരം കാഴ്ച്ചയാണ്. അത് തടയാൻ വെച്ചിരിക്കുന്ന പ്ലാസ്റ്റിക്ക് പോസ്റ്റുകൾ എല്ലാം ഇടിച്ച് തെറിപ്പിച്ച് നശിപ്പിച്ച് കഴിഞ്ഞിരിക്കുന്നു.

എൻട്രി, എക്സിറ്റ് ഇടങ്ങളിൽ ട്രാഫിക് പൊലീസിങ്ങ് നടത്തി അത്തരക്കാരുടെ ലൈസൻസും വാഹന പെർമിറ്റും റദ്ദ് ചെയ്താൽ, സ്വിച്ചിട്ട പോലെ ഇത്തരം നിയമലംഘനങ്ങൾ അവസാനിക്കും. ഇതിനായി ട്രാഫിക് പൊലീസുകാരെയോ ട്രാഫിക് വാർഡൻമാരെയോ വിന്യസിക്കാൻ ബുദ്ധിമുട്ടുണ്ടെങ്കിൽ ക്യാമറകൾ സ്ഥാപിച്ചിട്ടെങ്കിലും നിയമം കർശനമായി നടപ്പിലാക്കരുതോ?.

സ്റ്റിയറിങ് പിടിച്ച് വാഹനം ഇടത്തോട്ടും വലത്തോട്ടും തിരിക്കാൻ കഴിഞ്ഞാൽ ഡ്രൈവിംഗ് ആയി എന്നാണ് പലരുടേയും വിചാരം. നിലവിൽ വാഹനമോടിച്ചു കൊണ്ടിരിക്കുന്നവർക്ക് ഒരു റീടെസ്റ്റ് കൊടുത്താൽ പകുതി പേർ ലൈസൻസ് ടെസ്റ്റ് തോറ്റ് വീട്ടിലിരിക്കും. ബാക്കിയുള്ള കുറെ പേർ കള്ളും കഞ്ചാവും മയക്കുമരുന്നും അടിച്ചാണ് നിരത്തിലിറങ്ങുന്നത്. ഇതിനെല്ലാം ഇടയിൽക്കൂടെ, ഏത് കൊടികെട്ടിയ ഡ്രൈവറും വാഹനമെടുത്ത് പുറത്തിറങ്ങി കാര്യം സാധിച്ച് ജീവനോടെ വീട്ടിൽ തിരിച്ചെത്തിയാൽ മഹാഭാഗ്യം.

* പറ്റുമെങ്കിൽ പരിചയമില്ലാത്ത റോഡുകളിൽ രാത്രി കാലങ്ങളിൽ വാഹനം ഓടിക്കാതിരിക്കുക.

* അമിതവേഗം എടുത്താലും ചവിട്ടി നിർത്താനോ സ്വന്തം നിയന്ത്രണത്തിൽ കൊണ്ടുവരാനോ പറ്റില്ല എന്നുണ്ടെങ്കിൽ ആ പണിക്ക് പോകാതിരിക്കുക.

* നാലുവരിയിലും ആറുവരിയിലും വാഹനം ഓടിക്കേണ്ടത് എങ്ങനെയെന്ന് ഏതെങ്കിലും ട്യൂട്ടോറിയലോ വീഡിയോ എടുത്ത് കാണുക.

നിയമം നടപ്പിലാക്കപ്പെട്ടാലും ഇല്ലെങ്കിലും ജീവനോടെ ഇരിക്കണമെന്ന് ആഗ്രഹമുണ്ടെങ്കിൽ ഇങ്ങനെയൊക്കെ ചെയ്യേണ്ടിവരും.

എന്തായാലും, ഇന്നലെ നടന്ന അപകടത്തിന്റെ ചുവടുപിടിച്ച്, ദേശീയപാതയിൽ വാഹനങ്ങൾ പാർക്ക് ചെയ്യുന്നവർക്കെതിരെ കർശന നടപടി എടുക്കാൻ ആഭ്യന്തരമന്ത്രി രമേഷ് ചെന്നിത്തലയോ ഗതാഗത വകുപ്പുമന്ത്രി സി.പി.ജോണോ തയ്യാറാകണം. നിയമം നെരേ ചൊവ്വേ നടപ്പാക്കാത്ത ഒരിടത്ത് ആറല്ല അറുപത് വരി പാത ഉണ്ടായിട്ടും ഒരു കാര്യവുമില്ല.

വാൽക്കഷണം:- ഇന്നലെ പാലാരിവട്ടം പാലത്തിലെ ഇരട്ട ട്രാക്കിൻ്റെ നടുവിലെ വെളുത്ത വരയുടെ ഒത്ത നടുവിലൂടെ വാഹനമോടിച്ചിരുന്ന ഒരു വനിതയുടെ പിന്നിൽ ചെന്ന് ഹോൺ അടിച്ചപ്പോൾ, തല ചെരിച്ച് അവർ നോക്കിയ നോട്ടം, നേർക്ക് നേരെ കിട്ടിയിരുന്നെങ്കിൽ മുക്കണ്ണൻ വരെ ദഹിച്ചു പോകുമായിരുന്നു.

യാത്രകളിൽ, പ്രത്യേകിച്ച് ഗ്രാമങ്ങളിലേക്കും ഉൾപ്രദേശങ്ങളിലേക്കുമുള്ള യാത്രകളിൽ, മൊബൈൽ സിഗ്നലുകൾ ഇല്ലാത്ത ഇടങ്ങളിലേക്കുള്ള യാത്രകളിൽ, ഉൾക്കാടുകളിലേക്കുള്ള യാത്രകളിൽ, ട്രക്കിങ്ങ് സമയങ്ങളിൽ, കോട്ടകളിലേക്കുള്ള യാത്രകളിൽ, പുറംലോകവുമായുള്ള ബന്ധം വിച്ഛേദിക്കപ്പെടുന്ന അവസരങ്ങളിൽ, ഒരു വാക്കിടോക്കി (റേഡിയോ) ഉണ്ടായിരുന്നെങ്കിൽ എന്ന് പലപ്പോഴും ഞാൻ ആഗ്രഹിച്ചിട്ടുണ്ട്.

ഇത് കൂടാതെ മറ്റ് പല സന്ദർഭങ്ങളിലും ഒരു വാക്കിടോക്കി ഉണ്ടായിരുന്നെങ്കിൽ എന്ന് എനിക്ക് തോന്നിയിട്ടുണ്ട്. ഉദാ:- വഴി കാണിച്ച് ഒരു ഇരുചക്രവാഹനമോ കാറുകാരനോ മുന്നിൽ പോകുന്നു. പെട്ടെന്ന് അയാൾ പ്രത്യക്ഷനാകുന്നു. മൊബൈൽ സിഗ്നൽ ഇല്ല. പെട്ടത് തന്നെ.

ഇത്തരം സന്ദർഭങ്ങളിൽ, മുന്നിൽ പോകുന്ന ആളുടെ കയ്യിൽ വാക്കിടോക്കി ഉണ്ടെങ്കിൽ കാര്യങ്ങൾ എളുപ്പമാണ്. അൽപ്പം സുരക്ഷിതത്വം അനുഭവപ്പെടുകയും ചെയ്യും.

പക്ഷേ വാക്കി ടോക്കികൾ അങ്ങനെ എല്ലാവർക്കും ഉപയോഗിക്കാൻ പറ്റില്ല. അതിന് ധാരാളം നിയന്ത്രണങ്ങളും നിയമപരമായ പ്രശ്നങ്ങളും ഉണ്ട്.

പൊലീസ്, പട്ടാളം, മറ്റ് ഫോർസുകൾ ഒക്കെ ഉപയോഗിക്കുന്നത് പോലെ സാധാരണക്കാർക്ക് എല്ലാ വാക്കിടോക്കികളും ഉപയോഗിക്കാൻ പറ്റില്ല.

പിന്നെന്ത് ചെയ്യും?

അതേപ്പറ്റി കൂടുതൽ മനസ്സിലാക്കാൻ ശ്രമിച്ചപ്പോൾ എനിക്ക് കിട്ടിയ വിവരങ്ങൾ പങ്കുവെക്കാം. ഇതിൽ തെറ്റുണ്ടെങ്കിൽ തിരുത്താം. കൂടുതൽ അറിവുള്ളവർക്ക് കൂട്ടിച്ചേർക്കാം.

പലതരം വാക്കിടോക്കികൾ വിപണിയിൽ ഉണ്ട്.

1. ലൈസൻസ് ആവശ്യമുള്ള വാക്കിടോക്കികൾക്ക് റെയ്ഞ്ച് കൂടുതൽ കിട്ടും. പക്ഷേ ലൈസൻസിന് അപേക്ഷിക്കുന്ന പ്രദേശത്ത് മാത്രമേ അത് ഉപയോഗിക്കാനാവൂ. ഇന്ത്യ മുഴുവൻ കൊണ്ടുനടക്കാൻ ആവില്ല എന്ന് സാരം. ചുരുക്കിപ്പറഞ്ഞാൽ എന്റെ ആവശ്യത്തിന് ഉപകരിക്കില്ല.

2. ലൈസൻസ് ആവശ്യം ഇല്ലാത്ത വാക്കിടോക്കികൾക്ക് റെയ്ഞ്ച് കുറവാണ്. റെയ്ഞ്ച് കൂടുന്നതിനനുസരിച്ച് വിലയും കൂടും. പക്ഷേ ഇന്ത്യയിൽ എവിടെ വേണമെങ്കിലും കൊണ്ടു പോകാം. ഇത് എന്റെ ആവശ്യത്തിന് ഉപകരിക്കും എന്ന് തോന്നി.

3. SIM ഉപയോഗിച്ച് പ്രവർത്തിക്കുന്ന വാക്കിടോക്കികളും ഉണ്ട്. പക്ഷേ, അതുകൊണ്ട് തന്നെ ഇതിന് മൊബൈൽ സിഗ്നൽ ആവശ്യമാണ്. ഇത് ദീർഘദൂര സന്ദേശ വിനിമയത്തിന് ഉപയോഗിക്കാൻ പറ്റും. ഉദാഹരണത്തിന് ഡൽഹിയിലുള്ള ഒരു ഓഫീസിൽ നിന്ന് കേരളത്തിലുള്ള ഒരു ഓഫീസുമായി ബന്ധപ്പെടാൻ പറ്റും. മൊബൈൽ ഫോണിൽ നിന്ന് വിരുദ്ധമായി ഒരൊറ്റ പ്രസ്സിൽ സംസാരിക്കാം എന്നതാണ് പ്രയോജനവും പ്രത്യേകതയും. ഇതിനും ലൈസൻസ് ആവശ്യമില്ല. (ഇത് ഏറെക്കുറെ ഒരു മൊബൈൽ ഫോൺ തന്നെയാണ്.)

എന്തായാലും ഇനിയുള്ള യാത്രകളിൽ എൻ്റെ കൂടെ Access എന്ന ജപ്പാൻ കമ്പനിയുടെ P2 എന്ന മോഡൽ വാക്കിടോക്കി (റേഡിയോ) ഉണ്ടാകും.

* 446-446.2Mhz എന്ന ഫ്രീക്വൻസി റെയ്ഞ്ച് ആണ് ഈ റേഡിയോ ഉപയോഗിക്കാനായി ഭാരത സർക്കാറിൻ്റെ Ministry of Communication അനുവദിച്ചിരിക്കുന്നത്.

* പരമാവധി 3 കിലോമീറ്റർ ദൂരപരിധി ഇതിന് കിട്ടും.

* ഹാൻസെറ്റുകൾ പരസ്പരം encrypt ചെയ്തിരിക്കുന്നതിനാൽ, ഇതേ ഹാൻഡ് സെറ്റ് ഇതേ ഫ്രീക്വൻസിയിൽ ഉപയോഗിക്കുന്ന മറ്റാർക്കും ഇതിൽ നിന്നുള്ള സന്ദേശങ്ങൾ കിട്ടില്ല. തിരിച്ചും അങ്ങനെ തന്നെ.

* അവശ്യാനുസരണം കൂടുതൽ ഹാൻഡ്സെറ്റുകൾ എൻക്രിപ്റ്റ് ചെയ്ത് ഈ നെറ്റ്‌വർക്കിലേക്ക് ചേർക്കാവുന്നതാണ്.

* ഒരുവട്ടം ചാർജ്ജ് ചെയ്താൽ 16 മണിക്കൂർ വരെ ഉപയോഗിക്കാം.

* ചാർജ്ജ് ചെയ്യാനുള്ള ഹോൾഡറും C-ടൈപ്പ് ചാർജ്ജിങ് സംവിധാനവും ഉണ്ട്.

* കേന്ദ്രസർക്കാർ നൽകിയിട്ടുള്ള ലൈസൻസ് ഇതിനൊപ്പം ഡീലർ തരുന്നുണ്ട്.

* കേരളത്തിലെ പല കൊച്ചുകൊച്ചു നഗരങ്ങളിലും ഇത് യഥേഷ്ടം വിറ്റഴിക്കുന്നുമുണ്ട്.

* ഇതൊക്കെ ആണെങ്കിലും, പൊലീസ് അടക്കം ഔദ്യോഗിക സ്ഥാനങ്ങളിൽ ഇരിക്കുന്ന എല്ലാവർക്കും ഇതേപ്പറ്റി ധാരണ ഉണ്ടാകണമെന്നില്ല. അവരെ പറഞ്ഞു മനസ്സിലാക്കുന്നത് ഒരു കടമ്പയായിരിക്കും. വാക്കിടോക്കി എന്നാൽ ലൈസൻസ് ആവശ്യമുള്ള ഒന്നാണ്, എന്ന് ധരിച്ചു വെച്ചിരിക്കുന്നവർ ധാരാളമുണ്ട്.

* ഹോട്ടലുകൾ, ആശുപത്രികൾ, റിസോർട്ടുകൾ, നിർമ്മാണ മേഖലകൾ, കൃഷിയിടങ്ങൾ, ഇവൻ്റ് മാനേജ്മെന്റ് ടീം എന്നിങ്ങനെ പലരും നിലവിൽ, ഇത്തരം ലൈസൻസ് ആവശ്യമില്ലാത്ത വാക്കിടോക്കികൾ ധാരാളമായി ഉപയോഗിക്കുന്നുണ്ട്.

യാത്രികർക്കും മേൽപ്പറഞ്ഞ കൂട്ടർക്കും മാത്രമല്ല, വെള്ളപ്പൊക്കവും പ്രകൃതിക്ഷോഭവും ഒക്കെ ഉണ്ടായി മൊബൈൽ സിഗ്നൽ നഷ്ടപ്പെടുന്ന സ്ഥലങ്ങളിലും റേഡിയോ ഇനിയങ്ങോട്ട് ആവശ്യം വന്നേക്കാം.

ഓവർ, ഓവർ.

വാൽക്കഷണം:- കഴിഞ്ഞ ദിവസം ഈ വാക്കിടോക്കിയുടെ ഒരു വിദൂര ചിത്രം പങ്കുവെച്ചപ്പോൾ, ഇതേപ്പറ്റി കൂടുതൽ അറിയണമെന്ന് ആവശ്യപ്പെട്ടവർക്ക് വേണ്ടി തയ്യാറാക്കിയത്.

#walkietalkie
#radio

ഏറ്റവും പുതിയ ഹോബി, സ്പാം നമ്പറുകളെ ബ്ലോക്ക് ചെയ്യുക എന്നതാണ്. ഒരാഴ്ച്ചയിൽ കുറഞ്ഞത് 2 ഡസൺ എന്ന തോതിൽ ഈ കലാപരിപാടി നടക്കുന്നുണ്ട്.

1. ബാങ്ക് ലോൺ ഏജൻ്റുകൾ
2. ട്രാവൽ കമ്പനികൾ
3. ഇൻഷൂറൻസ് കമ്പനികൾ
4. ബ്ലേഡ് കമ്പനികൾ
5. വാഹന ഡീലർമാർ
6. വാഹന വിൽപ്പന ഏജൻ്റുകൾ
7. മാട്രിമോണി കമ്പനികൾ
8. ചാരിറ്റി ഏജൻ്റുകൾ
9. ഫ്ലാറ്റ് വിൽപ്പനക്കാർ
10. സൈബർ ക്രിമിനലുകൾ

എന്നിങ്ങനെ പോകുന്നു….,

ഒരു വ്യക്തിയുടെ ഫോണിലേക്ക് യാതൊരു ഔചിത്യവും ഇല്ലാതെ വിളിക്കുന്ന….

മറ്റൊരാളുടെ സ്വകാര്യതയെപ്പറ്റിയോ സമയത്തെപ്പറ്റിയോ യാതൊരു ചിന്തയുമില്ലാത്ത….

സ്വകാര്യതയിലേക്കുള്ള കടന്നുകയറ്റം എന്താണെന്ന് കേട്ടിട്ടു പോലുമില്ലാത്ത….

“താങ്കൾ തിരക്കിലല്ലെങ്കിൽ രണ്ട് മിനിറ്റ് സംസാരിക്കാമോ? ” എന്ന് ഔപചാരികതയുടെ പേരിൽ പോലും ചോദിക്കാത്ത… ഇക്കൂട്ടരുടെ നീണ്ട നിര.

ആദ്യമാദ്യം ഫോൺ മര്യാദകളും സാമാന്യ മര്യാദകളും പഠിപ്പിക്കാൻ ശ്രമിച്ചിരുന്നു. പെട്ടെന്നാണ് അതെല്ലാം ഒഴിവാക്കി ബ്ലോക്കിംഗ് നടപടികളിലേക്ക് കടന്നത്. അതിന് കാരണമുണ്ട്.

ഒരു മര്യാദാ പഠന ക്ലാസിന്റെ അവസാനം, അങ്ങേ തലക്കലുള്ള പെൺകൊടിയുടെ മറുചോദ്യം ഇങ്ങനെ.

“എന്നാൽപ്പിന്നെ നിങ്ങളുടെ ഫോണിന് ഔട്ട്ഗോയിങ് മാത്രം വെച്ചാൽ പോരേ? ഇൻകമിംഗ് കൂടെ ഉണ്ടെങ്കിൽ ഇങ്ങനെ ചില വിളികളും വരും.”

തിരിച്ചെന്തെങ്കിലും പറയുന്നതിന് മുന്നേ, ഫോൺ കട്ട് ചെയ്ത് ലലനാമണി കണ്ടം വഴി ഓടി.

എന്റെ ഭാഗത്തും തെറ്റുണ്ട്. ഇവരെയൊന്നും മര്യാദ പഠിപ്പിക്കാൻ നിൽക്കരുതായിരുന്നു.

ആ തെറ്റ് ഞാൻ തിരുത്തി തുടങ്ങിയിരിക്കുന്നു. ബ്ലോക്കിംഗ് തുടങ്ങിയതിനുശേഷം നല്ല ആശ്വാസമുണ്ട്. തുടരും…..

#spamcalls
#UnknownCalls

അല്പം മുൻപ് സമൂഹമാദ്ധ്യമങ്ങളിൽ കണ്ട ഒരു പോസ്റ്റർ ആണ് ചിത്രത്തിലുള്ളത്. ശ്രദ്ധേയമായ കാര്യം ആ പോസ്റ്ററിന് തന്തയില്ല എന്നതാണ്. ഏതെങ്കിലും ചാനലുകാരുടേയോ പത്രത്തിന്റെയോ ലേബൽ ആ പോസ്റ്ററിൽ ഇല്ല. 21.5.2026 എന്ന തീയതി മാത്രമാണ് അതിലുള്ളത്. അതിന് ശേഷം രണ്ടാമത്ത ദിവസമായിട്ടും അങ്ങനെയൊരു വിഷയത്തെപ്പറ്റി ഒരു പ്രമുഖ മാധ്യമവും ചർച്ച ചെയ്യുന്നത് ഞാൻ കണ്ടിട്ടില്ല.

അഥവാ അങ്ങനെ ഒരു പൊലീസ് / MVD നടപടി മാദ്ധ്യമങ്ങളോ പുതിയ സർക്കാരോ അറിയാതെ നടക്കുന്നുണ്ടോ? ഉണ്ടാകാം. ഉണ്ടെങ്കിൽ അത് ഇതുവരെ പൊലീസും MVDയും ചെയ്ത് പോന്നിരുന്നതിൻ്റെ തുടർ നടപടി മാത്രമാകാനാണ് സാദ്ധ്യത. പുതിയ മന്ത്രിസഭയ്ക്ക് അതിൽ എന്തെങ്കിലും പങ്കുണ്ടെന്ന് ഞാൻ കരുതുന്നില്ല. കാരണം അവർ ഭരണത്തിലേറിയിട്ട് ഒരാഴ്ച പോലും ആയില്ല, അവർ ഈ വിഷയത്തിൽ ഒരു തീരുമാനവും നടപടിയും എടുത്തിട്ടില്ല എന്നതുതന്നെ.

അല്പം മുമ്പ് ഗതാഗത വകുപ്പ് മന്ത്രി ശ്രീ.സി.പി.ജോൺ CP John ഏഷ്യാനെറ്റിന് നൽകിയ ഒരു ചെറിയ അഭിമുഖം കാണുകയുണ്ടായി. (പോസ്റ്റ്‌ സമയം ~10:30am 23.05.2026 https://www.facebook.com/share/v/1C6ydeE8dW/ )

ഇതേ വിഷയമാണ് ഏഷ്യാനെറ്റ് അദ്ദേഹത്തോട് ചോദിച്ചത്. ‘അതിന്റെ നടപടികൾ ഒന്നും ആയിട്ടില്ല. തീരുമാനം എടുത്ത ശേഷം പ്രസ്സ് മീറ്റ് വഴി അറിയിക്കുന്നതാണ്. നിലവിൽ ഞാൻ അത്തരം ഒരു മാദ്ധ്യമസമ്മേളനം നടത്തിയിട്ടില്ല എന്ന് നിങ്ങൾക്ക് അറിയാമല്ലോ?’ എന്നൊക്കെയാണ് അദ്ദേഹം പ്രതികരിച്ചത്.

എന്നുവെച്ചാൽ നിലവിലുള്ള നിയമ നടപടിക്ക് എതിരെയോ അനുകൂലമായോ ഒരു തീരുമാനവും പുതിയ സർക്കാർ എടുത്തിട്ടില്ല.

അതേസമയം ഈ ഒരൊറ്റ വിഷയത്തിൽ മുഖ്യമന്ത്രി വി.ഡി.സതീശന് V D Satheesan കിട്ടിയ മൈലേജും അദ്ദേഹത്തിനെ പൂക്കി മുഖ്യമന്ത്രിയായി യുവ തലമുറ ഏറ്റെടുത്തതും സഹിക്കാൻ പറ്റാത്തവർ കുത്തിത്തിരിപ്പുമായി ഇറങ്ങിയിരിക്കുകയാണ്. ആടിനെ പട്ടിയാക്കാൻ പ്രത്യേക പരിശീലനം ലഭിച്ചിട്ടുള്ള ഒരു കൂട്ടർ കേരളത്തിൽ ഉണ്ടെന്നത് എനിക്ക് ബോദ്ധ്യമുള്ള കാര്യമാണ്. അത്തരക്കാരുടെ വ്യാജ പ്രചരണങ്ങളിൽ വീഴാതിരിക്കുക.

ഈ പോസ്റ്ററിൽ കാണുന്ന വാർത്ത അടിസ്ഥാന രഹിതമാണെന്ന് തന്നെ ഞാൻ വിശ്വസിക്കുന്നു. മുഖ്യമന്ത്രിയും ഗതാഗത വകുപ്പ് മന്ത്രിയും ഇടപെട്ട് ഈ വിഷയത്തിൽ എത്രയും പെട്ടെന്ന് ഗതാഗത വകുപ്പിന് നിർദ്ദേശം നൽകിയില്ലെങ്കിൽ തിരിച്ചടി ഉണ്ടാകുമെന്ന കാര്യത്തിൽ സംശയം വേണ്ട. ഉദ്യോഗസ്ഥ തലത്തിലും സർക്കാരിന് ശത്രുക്കൾ ഉണ്ടെന്ന കാര്യം അറിയാവുന്നതല്ലേ?

മറ്റ് പല വിഷയങ്ങളിലും തന്തയില്ലാത്ത ഇത്തരം പോസ്റ്ററുകൾ കറങ്ങി നടക്കുന്നുണ്ട്. അതിന്റെയെല്ലാം ഉറവിടം കണ്ടെത്തി അക്കൂട്ടർക്ക് കൃത്യമായ ശിക്ഷ നൽകാൻ അമാന്തം ഉണ്ടായാൽ വരുന്ന അഞ്ചുവർഷം ഭരണം മുന്നോട്ട് കൊണ്ടു പോകുന്നത് എളുപ്പമാകില്ല. ഭരണകൂടം വൈകുന്ന ഓരോ നിമിഷവും കള്ളങ്ങൾ ലോകം ചുറ്റി വന്ന് കഴിഞ്ഞിട്ടുണ്ടാവും. കുറച്ചെങ്കിലും ജാഗ്രത പുലർത്തിയാൽ ഗുണം ചെയ്യും.

ഏത് മാദ്ധ്യമത്തിൻ്റേത് എന്ന് ലേബലില്ലാത്ത ഒരു പോസ്റ്റർ, പ്രതിപക്ഷ നേതാവ് പിണറായി വിജയൻ്റെ ആസ്തിയുടെ കണക്ക് എന്ന രീതിയിൽ പ്രചരിപ്പിക്കുന്നതും കണ്ടിരുന്നു. അതിൻ്റേയും ഉറവിടം കണ്ടെത്തി നടപടി സ്വീകരിക്കേണ്ടതാണ്.

വാൽക്കഷണം:- വാഹന മോഡിഫിക്കേഷൻ വിഷയത്തിൽ സർക്കാരിന്റെ തീരുമാനം അറിയാൻ കാത്തിരിക്കുന്ന ഒരാളാണ് ഞാനും. ആ വിഷയത്തിൽ, പറഞ്ഞ വാക്ക് പാലിച്ചില്ലെങ്കിൽ ഉണ്ടായേക്കാവുന്ന ഭവിഷ്യത്തുകളെപ്പറ്റി മുഖ്യമന്ത്രിക്ക് നല്ല ബോദ്ധ്യമുണ്ടാകുമെന്നും ഞാൻ വിശ്വസിക്കുന്നു.