15 വർഷമായി കുഞ്ഞഹമ്മദിക്ക എന്ന ഈ മനുഷ്യൻ ഓണം ആഘോഷിക്കുന്നത് ഇങ്ങനെയാണ്. വയനാട്ടിലെ ചിതലയത്തും പരിസരത്തുമുള്ള 50 ഓളം ആദിവാസി കൂരകളിലേക്ക് ഓണക്കിറ്റുകൾ എത്തിക്കും. പറ്റേ കിടപ്പിലായി പോയവരെ തിരഞ്ഞെടുത്താണ് ഇപ്പോൾ പ്രധാനമായും കിറ്റ് നൽകുന്നത്.

അതൊരു സാധാരണ കിറ്റൊന്നുമല്ല. 4 പേരുള്ള ഒരു കുടുംബത്തിന് ഓണക്കാലം മുഴുവൻ ആഘോഷമാക്കാനുള്ള എല്ലാ പലവ്യഞ്ജനങ്ങളും അതിൽ ഉണ്ടാകും. ഇതെല്ലാം കൊടുക്കുന്നതിന്റെ ചിത്രങ്ങൾ കുഞ്ഞഹമ്മദിക്ക എടുക്കുമെങ്കിലും അത് പ്രദർശിപ്പിക്കാറില്ല. കൊടുത്തു എന്നതിൻ്റെ തെളിവിലേക്ക് സൂക്ഷിക്കുക മാത്രമാണ് ഇപ്പോൾ ചെയ്യുന്നത്. എങ്കിലും ആ ഭാഗത്തുള്ള പത്രക്കാർക്ക് ഇപ്പോൾ കൃത്യമായി ഇക്കാര്യം അറിയാം. ഓണക്കാലത്ത് കുഞ്ഞഹമ്മദിക്കയെ പിന്തുടർന്ന് അവർ അത് വാർത്തയാക്കും. അത്തരത്തിൽ ഒരു വാർത്തയാണ് ഈ ചിത്രത്തിൽ ഉള്ളത്.

ഇടയ്ക്കെപ്പോഴോ ഞാനും ഈ ഓണാഘോഷത്തിൻ്റെ ഓരം ചേർന്നു. എന്നിലൂടെ അറിഞ്ഞ് മറ്റൊരുപാട് സൃഹൃത്തുക്കളും അതിൻ്റെ ഭാഗമായി. ഇതിനായുള്ള സ്ഥിരം ഫണ്ട്, നിക്ഷേപം എന്ന നിലയിലേക്ക് കാര്യങ്ങൾ വളർന്നു. കേട്ടറിഞ്ഞ് ബ്രിട്ടീഷ് മലയാളി എന്ന UK സംഘടന 7 ലക്ഷത്തോളം വരുന്ന വലിയൊരു തുക ഇതിലേക്ക് തന്നു. അത് സ്ഥിരനിക്ഷേപമാക്കി അതിൻ്റെ പലിശ കൊണ്ടാണ് ഇപ്പോൾ ഈ ഓണാഘോഷം നടക്കുന്നത്.
കുഞ്ഞഹമ്മദിക്കയുടെ ആദിവാസി സേവനങ്ങൾ ഇതിൽ ഒതുങ്ങി എന്ന് കരുതരുത്. സ്ക്കുൾ തുറക്കുമ്പോൾ കുട്ടികൾക്ക് സ്ക്കൂൾ ബാഗ്, പുസ്തകങ്ങൾ, കുട, യൂണിഫോം എന്നിങ്ങനെയുള്ള സാമഗ്രികളും കുഞ്ഞഹമ്മദിക്ക എത്തിക്കുന്നു. ബ്രിട്ടീഷ് മലയാളി തന്ന സ്ഥിരനിക്ഷേപം കഴിഞ്ഞ കുറെ വർഷങ്ങളായി അതിന് വേണ്ടിയും ചിലവഴിക്കുന്നുണ്ട്.

പ്രളയം വരുമ്പോഴും മഹാമാരി വരുമ്പോഴും പ്രതീക്ഷിക്കാത്ത കാറ്റും മഴയും വരുമ്പോൾ ചോരുന്ന കൂരകൾക്ക് വേണ്ടിയും ഉള്ള പ്രവർത്തനങ്ങൾ വേറെയുമുണ്ട് കഥാനായകന്. ഒരിക്കൽ ഇക്കാര്യങ്ങൾ കേട്ടറിഞ്ഞ കിറ്റക്സ് ഉടമ ശ്രീ.സാബുവും കുഞ്ഞഹമ്മദിക്കയുമായി കൈകോർത്തിട്ടുണ്ട്. ഒരു ലക്ഷത്തിന് മുകളിൽ വരുന്ന സഹായങ്ങൾ ആണ് അന്ന് അദ്ദേഹം നൽകിയത്.

സർക്കാരിന്റെ ഓണക്കിറ്റുകളുമായി, ഓണക്കോടിയുടുത്ത് ചിലർ നിൽക്കുന്ന ചിത്രങ്ങൾ കണ്ടപ്പോഴാണ് ഇത് പറയണമെന്ന് തോന്നിയത്. സർക്കാരിന്റെ ഓണക്കിറ്റുകൾ കിട്ടാത്ത ആദിവാസികളെ കൃത്യമായി തപ്പി കണ്ടുപിടിച്ചാണ് കുഞ്ഞഹമ്മദിക്കയുടെ പ്രവർത്തനം. ആദിവാസി ക്ഷേമ പ്രവർത്തനങ്ങൾക്ക് വേണ്ടി ശമ്പളം പറ്റുന്ന എത്രയോ സർക്കാർ ഉദ്യോഗസ്ഥന്മാർ ഉണ്ട്. അവർക്ക് ആർക്കും എന്തേ കുഞ്ഞഹമ്മദിക്കയുടെ ലിസ്റ്റിലുള്ള ആദിവാസികൾക്കായി കുറച്ച് ഓണക്കിറ്റുകൾ സംഘടിപ്പിച്ച് കൊടുക്കാൻ ആകുന്നില്ല? ഇവരുടെ വോട്ടുകൾ കൊണ്ട് ഒരു പഞ്ചായത്ത് വാർഡ് പോലും ജയിക്കാൻ ആവില്ല എന്നതുകൊണ്ടാണോ? എല്ലാറ്റിനുമുപരി വോട്ട് ആണല്ലോ മുഖ്യം!

ഒരു കാര്യം കൂടെ പറഞ്ഞുകൊണ്ട് ഈ ഉപന്യാസം അവസാനിപ്പിക്കാം.

കുഞ്ഞഹമ്മദിക്കയുടെ ഈ പ്രവർത്തനങ്ങൾ അദ്ദേഹത്തിന് തന്നെ താങ്ങാൻ പറ്റാത്ത അവസ്ഥയിലേക്ക് എത്തിയിരിക്കുകയാണ്. അതിന് പല കാരണങ്ങളുണ്ട്.

കാരണം 1:- ആ ഭാഗത്ത് ഏതൊരു ജീവകാരുണ്യ സഹായം ആവശ്യം വന്നാലും ആദിവാസികളും പൊതുജനങ്ങളും സ്ക്കൂളുകാരും ഒക്കെ വിളിക്കുന്നത്, സ്വന്തം കുടുംബത്തിലെ കാര്യങ്ങൾ രണ്ടറ്റം മുട്ടിക്കാൻ ബദ്ധപ്പെടുന്ന ഈ മനുഷ്യനെയാണ്.

കാരണം 2:- അത്രയ്ക്ക് ഭദ്രമായ സാമ്പത്തിക അവസ്ഥ അദ്ദേഹത്തിനില്ല; അദ്ദേഹം സമാഹരിച്ചിട്ടുള്ള സ്ഥിരം ഫണ്ടിനുമില്ല.

കാരണം 3:- പഴയത് പോലെ നല്ല ആരോഗ്യാവസ്ഥയിൽ അല്ല അദ്ദേഹം. ഇത് എത്രനാൾ തുടർന്ന് പോകാൻ പറ്റും എന്ന കാര്യത്തിൽ അദ്ദേഹത്തിന് നല്ല ആശങ്കയുണ്ട്.

എങ്കിലും ജീവനോടെ ഇരിക്കുന്ന കാലത്തോളം ഇത് ഭംഗിയായിത്തന്നെ കൊണ്ടുപോകാൻ ഈ മനുഷ്യൻ ആഗ്രഹിക്കുന്നു. അതിന് ചെയ്യേണ്ടത് സ്ഥിരനിക്ഷേപം വർദ്ധിപ്പിക്കുക എന്നതാണ്.

ആയതിനാൽ, സാമ്പത്തികമായി സഹായിക്കാൻ പറ്റുമെന്നുള്ളവർ, ഈ ഓണത്തിൻ്റെ പൊട്ടും പൊടിയും വല്ലതും ബാക്കി ഇരിക്കുന്നുണ്ടെങ്കിൽ അദ്ദേഹത്തിന് അയച്ച് കൊടുക്കണമെന്ന് അഭ്യർത്ഥിക്കുന്നു. ഈ തുകയുടെ ഉത്തരവാദിത്തം എന്നിലും നിക്ഷിപ്തമാണ്. ഇതിൻ്റെ കണക്കുകൾ സൂക്ഷിക്കുന്നത് ഞാനാണ്. കുഞ്ഞഹമ്മദിക്കയുടെ ബാങ്ക് നോമിനിയും ഞാനാണ്. അദ്ദേഹത്തിന് ഇത് തുടർന്ന് കൊണ്ടുപോകാൻ പറ്റാത്ത ഒരു അവസ്ഥ ഉണ്ടാകുന്ന കാലത്ത് ഈ തുക, അത് തന്നവർക്ക് തന്നെ തിരികെ നൽകാനാണ് ഉദ്ദേശിക്കുന്നത്. ഇക്കാരണങ്ങളാൽ, ഇങ്ങനെ കിട്ടുന്ന തുകയുടെ കണക്ക് ഞങ്ങൾ പരസ്യമായി പറയുന്നതായിരിക്കും. ആയതിനാൽ പേര് രഹസ്യമാക്കി വെക്കണമെന്നുള്ളവർ ആദ്യമേ അറിയിക്കണം. തുക തന്നവർക്ക് മാത്രം മനസ്സിലാകുന്ന ഒരു പ്രത്യേക കോഡ് സഹിതം ഞങ്ങളത് രഹസ്യമാക്കി വെക്കുന്നതാണ്.

ഈ പ്രവർത്തനങ്ങളിൽ സഹകരിക്കാൻ താൽപ്പര്യം ഉള്ളവർക്ക് വേണ്ടി കുഞ്ഞഹമ്മദിക്കയുടെ ബാങ്ക് വിവരങ്ങളും UPI നമ്പറും താഴെ ചേർക്കുന്നു. എല്ലാവർക്കും നന്ദി. ഓണാശംസകൾ!

UPI Number – 9645238180
Bank name – Central bank of India
Account # 3227581510
Account Name – Kunji Muhammed
Branch – Thottakkara
IFSC – CBIN0283040

2018 പ്രളയ കാലത്ത്, മുഖ്യമന്ത്രിയുടെ ദുരിതാശ്വാസ നിധിയിലേക്ക് ഒട്ടുമിക്ക ആൾക്കാരും കൈയയച്ചും ശമ്പളത്തിൽ നിന്ന് പിടിച്ചും പണം നൽകിയപ്പോൾ, ആ ഫണ്ടിലേക്ക് സഹായം നൽകേണ്ടതില്ല എന്ന് വളരെ ആലോചിച്ച് തീരുമാനമെടുത്ത വ്യക്തിയാണ് ഞാൻ. അത്രയും തുക ആലപ്പുഴയിലും റാന്നിയിലും പിറവത്തും മറ്റുമായി പ്രളയത്തിൽ വലഞ്ഞവരിലേക്ക് പണമായും ഭക്ഷണസാധനങ്ങളായും നിത്യോപയോഗ സാധനങ്ങളായും നേരിട്ട് എത്തിക്കുകയും ചെയ്തു.

2017 ൽ അന്തരിച്ച NCP നേതാവ് ഉഴവൂർ വിജയൻ്റെ കുടുംബത്തിന് 25 ലക്ഷം രൂപ മുഖ്യമന്ത്രിയുടെ ദുരിതാശ്വാസ നിധിയിൽ നിന്ന് സഹായം നൽകാൻ തീരുമാനിച്ച ഒറ്റക്കാരണം കൊണ്ടാണ് മുഖ്യമന്ത്രിയുടെ ദുരിതാശ്വാസ നിധിയിലേക്ക് പണം നൽകേണ്ടതില്ല എന്ന് ഞാൻ തീരുമാനിച്ചത്. നമുക്ക് ജീവകാരുണ്യപ്രവർത്തനം സ്വയം ചെയ്യാൻ പറ്റാത്ത അവസ്ഥ വരുമ്പോൾ മാത്രം ആ തുക മറ്റൊരാളെ ഏൽപ്പിച്ചാൽ മതിയല്ലോ എന്ന ചിന്തയും ഉണ്ടായിരുന്നു.

ഉഴവൂർ വിജയൻ എനിക്ക് ഏറെ ഇഷ്ടമുണ്ടായിരുന്ന ഒരു നേതാവായിരുന്നു. ഏറെ നർമ്മം സംഭാഷണ മദ്ധ്യേ അനായാസമായി കൊണ്ടുവരുന്ന മറ്റൊരു രാഷ്ട്രീയ നേതാവുണ്ടായിരുന്നില്ല എന്നതായിരുന്നു ആ ഇഷ്ടത്തിന് കാരണം. അതല്ലാതെ അദ്ദേഹത്തിൻ്റെ രാഷ്ട്രീയത്തോട് പ്രത്യേകിച്ച് ഇഷ്ടമോ ഇഷ്ടക്കേടോ ഉണ്ടായിരുന്നില്ല താനും.

NCP എന്ന പാർട്ടിയുടെ സംസ്ഥാന അദ്ധ്യക്ഷനായിരുന്നു എന്നതുകൊണ്ടും NCP ഇടതുപക്ഷ മുന്നണിയുടെ ഭാഗമായിരുന്നു എന്നതുകൊണ്ടും മാത്രം അദ്ദേഹത്തിൻ്റെ മരണശേഷം കുടുംബത്തിന് 25 ലക്ഷം രൂപ നൽകുന്നതിൽ ഒരു നീതിയും ന്യായവും ഞാൻ കണ്ടിരുന്നില്ല.

അദ്ദേഹത്തിൻ്റെ ചികിത്സാച്ചിലവ് എന്ന നിലയ്ക്കാണ് 5 ലക്ഷം രൂപ നൽകിയത്. അത്രയും തുക നൽകാൻ NCPക്ക് കഴിയില്ലേ എന്ന ചോദ്യം മാറ്റി നിർത്തി, ആ തുക നൽകിയത് മനസ്സില്ലാ മനസ്സോടെ സമ്മതിച്ച് കൊടുത്താൽപ്പോലും, അദ്ദേഹത്തിൻ്റെ രണ്ട് പെൺ മക്കൾക്ക് പഠിക്കാൻ 10 ലക്ഷം രൂപ വീതം അനുവദിച്ചതിന് ഒരു ന്യായീകരണവും ഇല്ലായിരുന്നു.

മക്കൾക്ക് പഠിക്കാൻ പണമില്ലാത്തതുകൊണ്ട് ബാങ്കിൽ നിന്നും അല്ലാതെയും വായ്പയെടുത്ത് പലിശയും പലിശയ്ക്ക് മുകളിൽ പലിശയും കയറി ജപ്തി നടപടി ആയവരും ജപ്തിയുടേയും ആത്മഹത്യയുടേയും വക്കത്ത് എത്തിയവരുമായ എത്രയോ അച്ഛനമ്മമാരും കുടുംബങ്ങളും ഇന്നാട്ടിലുണ്ടെന്നോ?! അവർക്കാർക്കെങ്കിലും ധൃതഗതിയിൽ ഇത്രയും പണം ദുരിതാശ്വാസ നിധിയിൽ നിന്ന് അനുവദിച്ചതായി കേട്ടിട്ടുണ്ടോ ? ഉഴവൂർ വിജയൻ മരിച്ച് ഒന്നോ രണ്ടോ മാസങ്ങൾക്കുള്ളിൽ ഈ തുക അനുവദിക്കുകയായിരുന്നു. അക്കാലത്ത് ആ ഓർഡർ സോഷ്യൽ മീഡിയയിൽ പ്രചാരത്തിലുണ്ടായിരുന്നു. കുറച്ച് കാലം സൂക്ഷിച്ച ശേഷം ഞാനത് ഒഴിവാക്കുകയായിരുന്നു.

ചുരുക്കിപ്പറഞ്ഞാൽ മുഖ്യമന്ത്രിയുടെ ദുരിതാശ്വാസ ഫണ്ട് ഇങ്ങനെയൊക്കെത്തന്നെയാണ് പലപ്പോഴും ചിലവഴിക്കപ്പെട്ടിട്ടുള്ളത്. ഇനിയും വലിയ വ്യത്യാസമൊന്നും പ്രതീക്ഷിക്കേണ്ടതില്ല.

ഇപ്പോൾ ദാ കള്ള സർട്ടിഫിക്കറ്റുകളും സത്യവാങ്ങ്മൂലവുമൊക്കെ പടച്ചുണ്ടാക്കി അതേ ദുരിതാശ്വാസ ഫണ്ട് കൊള്ളയടിച്ചിരിക്കുന്നു. വിജിലൻസ് അത് കണ്ടെത്തിയിരിക്കുന്നു. ഇങ്ങനെ ധനസഹായം കിട്ടിയത് ഭരണത്തിലിരിക്കുന്നവരുടെ വേണ്ടപ്പെട്ടവർക്ക് മാത്രമാണെങ്കിൽ, വിജിലൻസിൻ്റെ അന്വേഷണം കഴിയുമ്പോഴേക്കും തെളിവുകളൊക്കെ ഇല്ലാതാകുമെന്ന് ആരോപണങ്ങൾ ഇതിനകം വന്ന് കഴിഞ്ഞു. സർക്കാരിന്റെ ഇപ്പോഴത്തെ പോക്ക് വെച്ച് നോക്കിയാൽ കുറ്റം പറയാനാകുമോ ആരോപിക്കുന്നവരെ ?

എന്തായാലും ആടിനെ വിറ്റ കാശ് മുഖ്യൻ്റെ ഫണ്ടിലേക്ക് സംഭാവന ചെയ്ത സുബൈദയുടേയും സൈക്കിൾ വാങ്ങാൻ കുടുക്കയിൽ സൂക്ഷിച്ച പണം നൽകിയ കൗമാരക്കാരുടേയും ഒരു മാസത്തെ ശമ്പളം വീതം നൽകിയ സർക്കാർ സർക്കാരിതര ജീവനക്കാരുടേയുമൊക്കെ പണം വല്ലവനുമൊക്കെ പറ്റിച്ച് കൊണ്ടുപോകുകയും മുഖ്യമന്ത്രിയുടെ ദുരിതാശ്വാസ നിധിയുടെ വിശ്വാസ്യത നഷ്ടപ്പെടുകയും ചെയ്ത ഈ അവസരത്തിൽ എനിക്കശേഷം വൈക്ലബ്യമില്ല. ഞാൻ ഏറെ ആലോചിച്ച് എടുത്ത തീരുമാനം അൽപ്പം പോലും തെറ്റിയിട്ടില്ല.

സർക്കാരിൻെറ ഓണക്കിറ്റുകൾ എല്ലാവർക്കും കിട്ടിയെന്ന് കരുതുന്നു. സന്തോഷം. എല്ലാവർക്കും ഓണാശംസകൾ!

APL കാരും BPL കാരും കിറ്റുകൾ കൈപ്പറ്റി ഓണം കെങ്കേമമാക്കുമ്പോൾ സർക്കാരിന്റെ ഈ ഓണക്കിറ്റുകൾക്ക് ഏറ്റവും അർഹരായ ചിലർക്ക് അത് കിട്ടുന്നതേയില്ല എന്നതാണ് യാഥാർത്ഥ്യം. ശമ്പളം കിട്ടാത്ത KSRTC കുടുംബളിലേക്ക് പോലും കിറ്റുകൾ എത്തിക്കഴിഞ്ഞിരിക്കും ഇതിനകം.

റേഷൻ കാർഡ് ഉള്ളവർക്കാണ് ഓണക്കിറ്റുകൾ ലഭിക്കുക. റേഷൻ കാർഡ് ഇല്ലാത്തവർക്ക് സർക്കാരിന്റെ പുറമ്പോക്കിൽ പോലും സ്ഥാനമില്ല. അത്തരത്തിലുള്ള മനുഷ്യരും ഈ കേരള സംസ്ഥാനത്തിൽ ജീവിക്കുന്നുണ്ടെന്ന് അറിയുക.

വയനാട്ടിൽ (ചെതലയം – ബത്തേരി) റേഷൻ കാർഡ് ഇല്ലാത്തതുകൊണ്ട് മാത്രം ഓണക്കിറ്റ് ലഭിക്കാതെ പോകുന്ന ആദിവാസി കുടുംബങ്ങൾക്ക് വേണ്ടി, അന്നാട്ടിലെ സാമൂഹ്യ പ്രവർത്തകനായ കുഞ്ഞഹമ്മദിക്ക തയ്യാറാക്കിയ ഓണക്കിറ്റുകൾ ചിത്രത്തിൽ കാണാം. ഇന്നത് വിതരണം ചെയ്യപ്പെട്ടു കഴിഞ്ഞു.

കേന്ദ്രവും കേരളവും കോടിക്കണക്കിന് രൂപ ആദിവാസികൾക്ക് വേണ്ടി ചിലവഴിച്ചിട്ടും ഓണക്കിറ്റുകൾ പോലും അവരിലേക്ക് എത്തുന്നില്ല എന്നതിനേക്കാൾ ലജ്ജാവഹം, അവരിൽ പലർക്കും ഇപ്പോഴും റേഷൻ കാർഡ് ഇല്ല എന്നതാണ്.

അതൊരു പരിഷ്കൃത സമൂഹമല്ല. കാട്ടിൽ കഴിയുന്നവരാണ്. അവരുടെ ശീലവും സന്തോഷവുമെല്ലാം ആ ജീവിതം തന്നെയാണ്. ചുരുക്കം ചിലർ മാത്രമേ പരിഷ്കരിക്കപ്പെട്ടിട്ടുള്ളൂ. ആയതുകൊണ്ട് തന്നെ അവർക്ക് റേഷൻ കാർഡ് എടുക്കാൻ മെനക്കെടാനോ, അല്ലെങ്കിൽ അതെങ്ങനെ ചെയ്യണമെന്നോ പോലും അറിയില്ല എന്നതാണ് വസ്തുത.

എങ്കിലും കനേഷുമാരിയിൽ ഇവരുടെയൊക്കെ പേരുണ്ട്. വോട്ട് കളയാൻ ആവില്ലല്ലോ. അതാണല്ലോ ഇപ്പുറത്തുള്ളവർക്ക് എല്ലാമെല്ലാം.

ഒരൊറ്റ അപേക്ഷയേ ഉള്ളൂ. സംസ്ഥാനത്തെ അർഹതപ്പെട്ടവർക്കെല്ലാം ഓണക്കിറ്റ് കൊടുക്കുമ്പോൾ അതിനെക്കാൾ കൂടുതൽ അർഹതയുള്ള ആദിവാസി സമൂഹത്തിന് റേഷൻ കാർഡ് ഇല്ല എന്ന കാരണത്താൽ ഓണക്കിറ്റ് നൽകാതിരിക്കുന്നത് അനീതിയാണ്. ഒന്നുകിൽ ആ ഭാഗത്തെ പഞ്ചായത്ത് മെമ്പർമാരോ മറ്റ് അധികാരികളോ ഇടപെട്ട് ഇവർക്ക് റേഷൻ കാർഡ് ഉണ്ടാക്കാനുള്ള നടപടി സ്വീകരിക്കണം. അത് പറ്റില്ലെങ്കിൽ, റേഷൻകാർഡ് ഇല്ലെങ്കിലും അവർക്ക് ഓണക്കിറ്റ് അവകാശമായിത്തന്നെ നൽകണം.

അത് ചെയ്യാത്തിടത്തോളം കാലം സംസ്ഥാനമൊട്ടാകെ ഒണക്കിറ്റ് വിതരണം ചെയ്ത കൂട്ടർക്ക് ഒരുതരത്തിലും കൈയ്യടി തരാനാവില്ല. കിറ്റ് വേവിച്ച് കൂട്ടിക്കുഴച്ചുണ്ട് നമ്മളാഘോഷിക്കുന്ന ഈ ഓണത്തിന് ഒരു മാറ്റുമില്ല എന്ന് കടുപ്പിച്ച് തന്നെ പറയേണ്ടി വരും. സർക്കാർ ഇങ്ങനെ ലക്ഷക്കണക്കിന് ഓണക്കിറ്റുകൾ കൊട്ടിഘോഷിച്ച് വിതരണം ചെയ്യുമ്പോൾ, ഏതെങ്കിലും സന്നദ്ധസംഘടന സമാന്തരമായി ഒരു കിറ്റെങ്കിലും വിതരണം ചെയ്യുന്നുണ്ടെങ്കിൽ അത് സർക്കാരിനും ഭൂഷണമല്ല.

ബ്രിട്ടീഷ് മലയാളി എന്ന സംഘടനയുടെ സാമ്പത്തിക സഹായത്തോടെയാണ് ഈ കിറ്റുകൾ വിതരണം ചെയ്യുന്നത്. കഴിഞ്ഞ ഏതാനും വർഷങ്ങളിലായി ഈ സേവനം കുഞ്ഞഹമ്മദിക്ക തുടർന്നു പോരുന്നു. ഇപ്രാവശ്യം കിറ്റ് നൽകിയത് റേഷൻ കാർഡില്ലാത്ത 16 കുടുംബങ്ങൾക്കും വാർദ്ധക്യം ആയതുകൊണ്ട് സഹായമെത്താത്ത 34 ആദിവാസി കൂരകളിലേക്കും ആണ്.

വാൽക്കഷണം:- 163552 രൂപയാണ് അലവൻസുകൾ അടക്കം, പട്ടിക ജാതി പട്ടികവർഗ്ഗ വകുപ്പ് ഡയറക്ടറുടെ ശംബളം എന്നാണ് വിവരാവകാശം വഴി മനസ്സിലാക്കിയത്. റേഷൻ കാർഡ് ഇല്ലാത്ത ആദിവാസികൾക്ക് അതുണ്ടാക്കാനുള്ള നടപടി സ്വീകരിക്കാൻ, ലക്ഷങ്ങൾ ശംബളം വാങ്ങുന്ന ഡയറക്ടർക്ക് ഒന്നും ചെയ്യാനാവില്ലേ ?

തമിഴ് നാട്ടിൽ മാത്രം കണ്ടിരുന്ന പത്ത് രൂപയുടെ മഞ്ഞ സഞ്ചിയും തൂക്കി, വിജയ് മല്ലിയ വിമാനത്തിൽ യാത്ര ചെയ്തത് ചിത്രസഹിതം വലിയ വാർത്തയായിരുന്നു ഒരിക്കൽ. മല്ലിയ ചെയ്താൽ ഫാഷൻ, നമ്മൾ സാധാരണക്കാർ ചെയ്താൽ ദാരിദ്ര്യം, എന്നാരെങ്കിലും കരുതുന്നുണ്ടെങ്കിൽ അങ്ങനെയല്ല.

അത്തരം സാധാരണ സഞ്ചികളെ ഒഴിവാക്കിയതിൻ്റെ ഫലമാണ്, ഒരളവ് വരെ പ്ലാസ്റ്റിക്ക് മാലിന്യത്തിന്റെ രൂപത്തിൽ നാമിന്ന് അനുഭവിക്കുന്നത്. ഇത്തരം ധാരാളം സഞ്ചികൾ പല അളവിലുള്ളത് വീടുകളിലും വാഹനങ്ങളിലും അത്യാവശ്യം വേണ്ടയിടങ്ങളിലുമെല്ലാം കരുതുക. ഷോപ്പിങ്ങിനും ഓഫീസിലേക്കും സങ്കോചമേതുമില്ലാതെ അഭിമാനത്തോടെ കൂടെത്തന്നെ അതുപയോഗിക്കൂ. വീട്ടിലേക്ക് വന്ന് കയറുന്ന (കുറഞ്ഞത്) 10 പ്ലാസ്റ്റിക്ക് സഞ്ചിയെങ്കിലും ഒരു മാസം നമുക്കൊഴിവാക്കാൻ കഴിയും.

അഞ്ജലി ചന്ദ്രൻ പറഞ്ഞതനുസരിച്ച് കുറച്ച് സഞ്ചികൾ ഞാൻ വാങ്ങി. ഇനിയുള്ള ദിവസങ്ങളിൽ എൻ്റെ ഓഫീസ് ബാഗ് ഈ സെക്സി സഞ്ചികളാണ്.

അഞ്ജലി എന്താണ് പറഞ്ഞതെന്നറിയാൻ തുടർന്ന് വായിക്കുക. സഹകരിക്കുക.

CARE – E – BAGS
————————–
ഫോർട്ട് കൊച്ചിയിലും മട്ടാഞ്ചേരിയിലും ഉള്ള കുറച്ച് അമ്മമാർ ബുദ്ധി വളർച്ചയെത്താത്ത, ശാരീരികമായ പ്രശ്നങ്ങൾ കൊണ്ട് കിടന്നകിടപ്പിൽ നിന്ന് എണീക്കാൻ പോലും കഴിയാത്ത, പരസഹായമില്ലാതെ ഒരുനേരത്തെ ഭക്ഷണം കഴിക്കാൻ പോലും കഴിയാത്ത, പ്രാഥമിക ആവശ്യങ്ങൾക്ക് മറ്റുള്ളവരുടെ സമയത്തിന് കാത്തുകിടക്കുന്ന തങ്ങളുടെ കുഞ്ഞുങ്ങൾക്ക് മാത്രമായി ജീവിക്കുന്നുണ്ട്. വീട്ടിലിരുന്ന് തയ്ച്ചുണ്ടാക്കുന്ന തുണിസഞ്ചികൾ വിറ്റാണ് ഇവർ ഈ കുഞ്ഞുങ്ങൾക്കാവശ്യമുള്ള മരുന്ന് ഡയപ്പർ അടക്കമുള്ള കാര്യങ്ങൾ, തെറാപ്പികൾ എന്നിവക്കുള്ള പണം കണ്ടെത്തുന്നത്. ഇതിനുള്ള വക എത്തിക്കണേയെന്ന പ്രാർത്ഥനയിൽ കഴിയുന്നവർക്ക് കൂനിൻമേൽ കുരു എന്ന് പറയുന്ന തോതിലാണ് കൊറോണ ബാധിച്ചത്.

അവർക്കൊരു താങ്ങാവാൻ ഇംപ്രസയുടെ വെബ്സൈറ്റ് www.impresa.in വഴി അവരുടെ തുണി സഞ്ചികൾ വില്പനക്ക് ലഭ്യമാക്കിയിട്ടുണ്ട്. മൂന്നു വ്യത്യസ്ത സൈസിലുള്ള, നിലവാരമുള്ള തുണിയിലുള്ള 6 തുണിസഞ്ചികളുടെ പാക്കറ്റ് ആയാണ് അവരുടെ കയ്യിൽ ഉള്ളത്. ഇതൊരു ബിസിനസ് അല്ല. മറ്റുള്ളവരുടെ ഔദാര്യം പറ്റി ജീവിക്കാൻ ആഗ്രഹിക്കാത്ത, എന്നാൽ സ്വന്തം കുഞ്ഞുങ്ങളുടെ മരുന്നും പ്രാഥമിക ആവശ്യങ്ങളെങ്കിലും നിറവേറ്റണമെന്ന് അതിതീവ്രമായി ആഗ്രഹിക്കുന്ന ഒരുകൂട്ടം അമ്മമാരുടെ ജീവിതത്തോടുള്ള പൊരുതലാണ്. കൂടെ നിൽക്കാൻ ആഗ്രഹിക്കുന്നവർ അവരുടെ ഈ സംരംഭത്തിൽ പങ്കാളികളാകൂ. അവരുടെ ഉൽപന്നം വാങ്ങി സഹായിക്കൂ.

#happinesschallenge

ഓണക്കാലത്ത് വയനാട്ടിലെ ചില ആദിവാസി ഊരുകളിൽ ഓണക്കിറ്റ് വിതരണം ചെയ്യുന്ന ഏർപ്പാടുണ്ട് കുഞ്ഞഹമ്മദിക്കയ്ക്ക്. 10-15 ദിവസം നാലഞ്ച് പേരുള്ള ഒരു കുടുംബത്തിന് വേണ്ടുന്ന എല്ലാ പലചരക്ക് സാമഗ്രികളും അത്യാവശ്യം പച്ചക്കറികളും ആ കിറ്റിലുണ്ടാകും.

ഉരുൾപൊട്ടി മണ്ണിനടിയിൽ പെടുകയോ പട്ടിണി കിടന്ന് ചത്തുപോകുകയോ ചെയ്താൽ, പെട്ടിമുടിയിലും കരിപ്പൂരിലും മൃതിയടഞ്ഞവർക്ക് കിട്ടിയ സർക്കാർ സഹായം പോലും ഇപ്പറഞ്ഞ ആദിവാസി ജന്മങ്ങൾക്ക് കിട്ടിയെന്ന് വരില്ല. ആ പലവ്യഞ്ജനപ്പൊതികളിൽ ചിലതെങ്കിലും കൈപ്പറ്റുന്നവർ കനേഷുമാരിയിൽപ്പോലും ഇല്ലാത്തവരാണ് എന്നതുതന്നെ കാരണം. അങ്ങനേയും മനുഷ്യർ ജീവിക്കുന്നുണ്ട്, ഈ പടവലങ്ങാ കേരളത്തിൽ. വോട്ടിന്റെ ആവശ്യത്തിന് പോലും കക്ഷിരാഷ്ട്രീയക്കാർക്ക് വേണ്ടാത്തവർ. കുറേക്കൂടെ തെളിച്ച് പറഞ്ഞാൽ, കുഞ്ഞഹമ്മദിക്ക ഒഴികെ ആരുടേയും ദൃഷ്ടിയിൽപ്പെടാതെ കാടിനുള്ളിൽ കഴിയുന്ന പുറമ്പോക്കുകൾ.

2018, 2019 വർഷങ്ങളിൽ പ്രളയവും ഉരുൾപൊട്ടലും കാരണം ഓൺക്കിറ്റ്, ഓണത്തിന് കുറേ മുൻപേ വിതരണം ചെയ്തു. 2018ലെ കിറ്റുകൾക്ക് വേണ്ടിയുള്ള വസ്തുവഹകൾക്കായി സഹായഹസ്തം നീട്ടിയത് സജിത മഠത്തിൽ, റീമ കല്ലിങ്കൽ, രമ്യാ നമ്പീശൻ, പാർവ്വതി തിരുവോത്ത്, എന്നിങ്ങനെ കുറേയേറെ സിനിമാക്കാരാണ്. അതെല്ലാം കൊച്ചിയിൽ നിന്ന് വയനാട്ടിൽ എത്തിക്കാൻ സഹായിച്ചത് അൻപോട് കൊച്ചിയും ഗോപിയുമാണ്.

കഴിഞ്ഞ വർഷം മുതൽ ആ ചുമതല ബ്രീട്ടിഷ് മലയാളി സംഘടന ഏറ്റെടുത്തു. ഇക്കൊല്ലം കോവിഡ്, പ്രളയം, ഉരുൾപൊട്ടൽ എന്നിങ്ങനെ എല്ലാ പ്രശ്നങ്ങളും മൂർദ്ധന്യത്തിലാണ്. എന്നാലും കുഞ്ഞഹമ്മദിക്കയ്ക്ക് കുലുക്കമില്ല. ഇന്നലെയും ഇന്നുമായി മുണ്ട് മാടിക്കുത്തിയിറങ്ങി ഭക്ഷ്യപ്പൊതികൾ അദ്ദേഹം തയ്യാറാക്കിക്കഴിഞ്ഞു. ഇക്കൊല്ലവും പതിവുപോലെ വയനാട്ടിലെ ആദിവാസികളുടെ മാവേലിയായ കുഞ്ഞഹമ്മദിക്കയ്ക്ക് കൈത്താങ്ങാകുന്നതിന് ബ്രിട്ടീഷ് മലയാളി സുഹൃത്തുക്കൾക്കും ഷാജിക്കും Shaji Lukose നന്ദി.

ഇതിന് പുറമേ, പതിവിന് വിപരീതമായി, ഇക്കൊല്ലം ലോക്ക് ഡൌൺ കാലത്തും ഓണക്കിറ്റിന്റെ പകുതിയോളം പോന്ന കിറ്റൊരെണ്ണം ഊരുകളിൽ എത്തിച്ചിരുന്നു കുഞ്ഞഹമ്മദിക്ക. ആ കർമ്മമെല്ലാം കഴിഞ്ഞ് മടങ്ങിയ അദ്ദേഹത്തെ, ബാക്കി വല്ലതും ഉണ്ടെങ്കിൽ ഞങ്ങൾക്ക് നൽകണമെന്ന് ആവശ്യപ്പെട്ടുകൊണ്ട് ഒരു കൂട്ടർ സമീപിച്ചു. നമുക്ക് പരിചയമുള്ളവർ തന്നെ. കമ്മ്യൂണിറ്റി അടുക്കളക്കാർ !!

അവരുടെ പ്രവർത്തിയിലോ ചിന്തയിലോ പോലും മേൽപ്പറഞ്ഞ ആദിവാസികളില്ല. ആദിവാസികൾക്കാണെങ്കിൽ കമ്മ്യൂണിറ്റിയും ഇല്ല. വീണേടം വിഷ്ണുലോകം. ഒന്നും കിട്ടിയില്ലെങ്കിൽ വല്ല ഞണ്ടോ ഞവണിയോ തിന്നായാലും പിടിച്ച് നിൽക്കും. ചാവ് പോലും പുറം‌ലോകം അറിഞ്ഞെന്ന് വരില്ല.

വാൽക്കഷണം:- ഈ ഭൂമിയിങ്ങനെ ചരിഞ്ഞ് കറങ്ങിക്കൊണ്ടേയിരിക്കുന്നത് ഇതുപോലുള്ള ചില മനുഷ്യന്മാർ സർവ്വതും മറന്ന് ആഞ്ഞ് ഉത്സാഹിക്കുന്നതുകൊണ്ട് കൂടെയാണ്.