കേരളത്തിൻ്റെ നിയുക്ത മുഖ്യമന്ത്രി ശ്രീ.വി.ഡി. സതീശന് അഭിനന്ദനങ്ങൾ!!

11 ദിവസം വൈകിയെങ്കിലും, തലങ്ങും വിലങ്ങും ചർച്ചകൾ നടത്തി, ഉചിതമായ തീരുമാനം തന്നെയാണ് AICC എടുത്തിരിക്കുന്നതെന്നാണ് ഞാൻ വിശ്വസിക്കുന്നത്.

ഉചിതം എന്ന് പറയാനുള്ള കാരണങ്ങൾ ഇപ്രകാരമാണ്.

കാരണം 1:- ജനങ്ങൾ ജയിപ്പിച്ച് വിടാത്ത ഒരാളേയും നൂലിൽ കെടിയിറക്കി മുഖ്യമന്ത്രി ആക്കിയില്ല. (അങ്ങനെയും ഉണ്ടായിട്ടുള്ള സംസ്ഥാനമാണ് കേരളം. ഉദാ:- 1996ലെ മുഖ്യമന്ത്രി നായനാർ)

കാരണം 2:- സീനിയോരിറ്റി അല്ല, പണിയെടുത്തത് ആരെന്നതാണ് മുഖ്യമന്ത്രി ആകാനുള്ള മാനദണ്ഡം. ഞാൻ ഉദ്ദേശിച്ച സീനിയർക്ക് ഇതിന് മുൻപ് അവസരം കിട്ടിയിട്ടുണ്ട്.

കാരണം 3:- രാജസ്ഥാനും മദ്ധ്യപ്രദേശും അടക്കമുള്ള മറ്റ് സംസ്ഥാനങ്ങളിൽ പറ്റിപ്പോയ തെറ്റ് AICC ആവർത്തിച്ചില്ല.

കാരണം 4:- കോൺഗ്രസ്സ് MLA മാരുടെ മാത്രമല്ല, ഘടക കക്ഷികളുടേയും പ്രവർത്തകരുടേയും സാധാരണ സമ്മതിദായകരുടേയും കോൺഗ്രസ്സ് അല്ലാത്ത ജനങ്ങളുടേയും ആഗ്രഹവും ഇഷ്ടവും താൽപ്പര്യവും മനസ്സിലാക്കി തീരുമാനമെടുത്തു.

തീരുമാനം അൽപ്പം വൈകി എന്ന് വേണമെങ്കിൽ പറയാമെങ്കിലും കേരളത്തിൽ ഇതിന് മുൻപും ഇതിൽക്കൂടുതൽ വൈകിയ മുഖ്യമന്ത്രി തീരുമാനം ഉണ്ടായിട്ടുണ്ടെന്ന് കണക്കുകൾ നോക്കിയാൽ മനസ്സിലാക്കാം. (ലിങ്ക് https://www.facebook.com/share/v/1GGLVrX3dk/ ) ആ കണക്കുകൾ ജനം മറന്നത് പോലെ തന്നെ ഈ കാലതാമസവും വൈകാതെ ജനം മറക്കും.

ഇതുവരെ ശുഭകരം എന്ന് ആശ്വസിച്ചാലും ശ്രീ. വി. ഡി. സതീശനെ കാത്തിരിക്കുന്നത് വലിയ വെല്ലുവിളികളാണ്.

വെല്ലുവിളി 1:- മുഖ്യമന്ത്രി പദം കിട്ടാതെ പോയവരുടേയും അവരുടെ അഭ്യുദയകാംക്ഷികളുടേയും തൊഴുത്തിൽക്കുത്തും കുതികാൽവെട്ടലും നിസ്സഹകരണവും.

വെല്ലുവിളി 2:- കാലിയായ,…. സതീശൻ്റെ ഭാഷയിൽ പറഞ്ഞാൽ പൂച്ച പെറ്റ് കിടക്കുന്ന ഖജനാവ് വെച്ച് സംസ്ഥാനത്തെ മുന്നോട്ട് നയിക്കുക എന്ന വെല്ലുവിളി.

വെല്ലുവിളി 3:- തെരഞ്ഞെടുപ്പ് വാഗ്ദാനങ്ങൾ പാലിക്കുക എന്നതിന് പുറമേ കേരളത്തിൽ കൊണ്ടുവരുമെന്ന് പറഞ്ഞ സമഗ്രമായ മാറ്റങ്ങളും പദ്ധതികളും നടത്തിയെടൂക്കണമെന്ന വെല്ലുവിളി.

വെല്ലുവിളി 4:- ജനാധിപത്യത്തിനും മുകളിലാണ് തങ്ങളെന്ന് കരുതുന്ന രണ്ട് വൃത്തികെട്ട സമുദായ നേതാക്കന്മാർ വലിയ വെല്ലുവിളി ഇതുവരെ ഉയർത്തിയതെങ്കിലും അതെല്ലാം ഭംഗിയായി നേരിടാൻ VDSന് കഴിഞ്ഞു. എന്നിരുന്നാലും നേരും നെറിയും ഇല്ലാത്ത ആ രണ്ട് പുംഗവന്മാർ കുത്തിത്തിരുപ്പുകൾ തുടർന്നുകൊണ്ടിരിക്കും. അതിന് അർഹമായ അവഗണനയും ശ്രദ്ധയും കൊടുത്ത് മുന്നേറേണ്ടി വരും.

വെല്ലുവിളി 5:- കഴിഞ്ഞ 10 വർഷമായി നിർത്തി വെച്ചിരിക്കുന്ന ഹർത്താലുകളും സമരങ്ങളും പൊതുമുതൽ നശിപ്പിക്കലും, പൂർവ്വകാല പ്രാബല്യത്തിൽ പുറത്തെടുക്കാൻ തയ്യാറായിരിക്കുന്ന പ്രതിപക്ഷത്തെ കൈകാര്യം ചെയ്യുക എന്ന വെല്ലുവിളി.

ഇത്രയുമോ ഇതിനപ്പുറമോ ഉള്ള വെല്ലുവിളികൾ നേരിട്ട്, കഴിഞ്ഞ രണ്ട് വർഷത്തിനകമെങ്കിലും പ്രതീക്ഷയുടെ പുതുനാളം നീട്ടാൻ സതീശന് കഴിഞ്ഞാൽ അദ്ദേഹത്തിൻ്റെ തേരോട്ടം തടയാൻ ബുദ്ധിമുട്ടാകുന്ന കാലം വരും.

കാര്യങ്ങൾ പറഞ്ഞത് പോലെ നടത്തിയെടുക്കാൻ അദ്ദേഹത്തിന് കഴിഞ്ഞില്ലെങ്കിൽ, 100 സീറ്റ് മറ്റേതെങ്കിലും ഒരു മുന്നണിക്കോ പാർട്ടിക്കോ നൽകി 2031ൽ ഭരണം സതീശൻ്റെ കൈയിൽ നിന്ന് ഒഴിവാക്കാൻ പോന്നവരാണ് കേരള ജനത എന്ന് ഈ തെരഞ്ഞെടുപ്പ് തെളിയിച്ചതാണ്. അത് ഓരോ നിമിഷവും ഓർമ്മയുണ്ടായാൽ നന്ന്. എന്നെപ്പോലുള്ള ഒരുപാട് പേർ പ്രതിപക്ഷത്ത് തന്നെയാണ് തുടരുക.

എന്തായാലും ഇന്ന് മുതൽ മുഖ്യമന്ത്രി ഇല്ലാത്തവനേ / ഇല്ലാത്തവളേ എന്ന് വിളിച്ച് ആരും മലയാളികളെ അധിക്ഷേപിക്കില്ല എന്ന തമാശ കൂടെ പങ്കിട്ട് ഈ കുറിപ്പ് ചുരുക്കുന്നു.

ശ്രീ.വി.ഡി. സതീശന് V D Satheesan ഒരിക്കൽക്കൂടെ അഭിനന്ദനങ്ങൾ !!
നല്ലൊരു ഭരണം കാഴ്ച്ച വെക്കാൻ അദ്ദേഹത്തിന് കഴിയുമാറാകട്ടെ എന്ന് ആശംസിക്കുന്നു!!

വാൽക്കഷണം:- ജനാധിപത്യം സമ്പൂർണ്ണമായി കൊടിനാട്ടിയ ഒരു പൊതുതെരഞ്ഞെടുപ്പും മുഖ്യമന്ത്രി തെരഞ്ഞെടുപ്പും ആയിരുന്നു ഇപ്രാവശ്യത്തേത് എന്നത് സന്തോഷമുള്ള കാര്യം തന്നെ.

#CMKerala
#cmkerala2026
#VDSatheesan

UDFൽ മുഖ്യമന്ത്രി പദവിക്ക് വേണ്ടി നടക്കുന്ന തർക്കങ്ങൾ, ജനാധിപത്യത്തിന്റെ ഭാഗമാണെന്ന് കരുതുന്ന ആളാണ് ഞാൻ. അങ്ങനെ പറയാനും തർക്കിക്കാനും പോന്ന ഉൾപ്പാർട്ടി ജനാധിപത്യമാണ് UDFന്റെ പ്രത്യേകത. പാർട്ടി നേതാക്കൾ പറയുന്ന കാര്യങ്ങൾ റാൻ മൂളി കേട്ട്, എതിർപ്പ് ഉള്ളിലൊതുക്കി അനുസരിക്കുമ്പോൾ ജനാധിപത്യം പിൻബഞ്ചിലാണെന്നും ഞാൻ വിശ്വസിക്കുന്നു. ആയതിനാൽ അവർ തർക്കിച്ച് തീരുമാനിക്കട്ടെ. തീരുമാനം അധികം വൈകരുതെന്ന് മാത്രം.

MLAമാരെ തെരഞ്ഞെടുത്ത് കഴിഞ്ഞാൽ പൊതുജനത്തിന് പിന്നീട് ഒരു അഭിപ്രായം പറയാനുള്ള ഇടമില്ലായിരുന്നു കുറച്ചുനാൾ മുൻപ് വരെ. നമ്മൾ തെരഞ്ഞെടുത്ത MLAമാർ വേണം അവിടന്നങ്ങോട്ടുള്ള മറ്റ് കാര്യങ്ങൾ തീരുമാനിക്കാൻ. പക്ഷേ ഇന്നങ്ങനെയല്ല അവസ്ഥ. പൊതുജനത്തിന് പറയാനുള്ളത് അവതരിപ്പിക്കാൻ സമൂഹമാധ്യമങ്ങൾ ഉണ്ട്. അതിലൂടെ ജനത്തിന്റെ പൾസ് എന്താണെന്ന് നേതാക്കന്മാർക്ക് കൃത്യമായും പിടികിട്ടും. ആ ഒരു മാദ്ധ്യമവും അവസരവും ഉപയോഗിച്ചാണ് ഞാനിത് പറയുന്നത്.

ജനങ്ങൾ MLA പദവി നൽകാത്ത ഒരാൾ മുഖ്യമന്ത്രിയായി വരുന്നതിനോട് എനിക്ക് യോജിക്കാനാവില്ല. ഭരണഘടനയിൽ എഴുതി വച്ചിരിക്കുന്ന അത്തരം ഒരു ഭോഷ്ക്ക് നീക്കം ചെയ്യണമെന്ന അഭിപ്രായക്കാരനും കൂടിയാണ് ഞാൻ.

ആയതിനാൽ, നിലവിൽ കേരള സംസ്ഥാനത്തിലെ ഒരു MLA അല്ലാത്ത കെ. സി. വേണുഗോപാൽ മുഖ്യമന്ത്രി ആകാൻ പാടില്ല. 102 സീറ്റ് എന്ന സർവ്വകാല റെക്കോർഡ് സമ്മാനിച്ച ജനങ്ങളോട് കാണിക്കുന്ന നീതികേടായിരിക്കും കെ. സി. വേണുഗോപാൽ എന്ന മുഖ്യമന്ത്രി.

MPമാരെ നിയമസഭാ തിരഞ്ഞെടുപ്പിൽ മത്സരിപ്പിക്കേണ്ട എന്ന കർശന തീരുമാനം എടുത്ത കോൺഗ്രസ് പാർട്ടി വേണുഗോപാലിന്റെ കാര്യത്തിൽ എന്തിന് ഇളവ് കാണിക്കണം? ഇവിടെ മുഖ്യമന്ത്രി ആകാൻ പ്രാപ്തരായവർ ഇല്ലയെന്നുണ്ടോ? ഇപ്പറഞ്ഞ നിരവധി കാരണങ്ങളാൽ, കെ.സി. വേണുഗോപാലിനെ മുഖ്യമന്ത്രി ആയി അംഗീകരിക്കാൻ ആവില്ല.

അഥവാ കെ.സി.വേണുഗോപാൽ മുഖ്യമന്ത്രിയായി അവതരിച്ചാൽ, രണ്ട് ഉപതെരഞ്ഞെടുപ്പുകളുടെ അധികഭാരമാണ് ജനങ്ങളുടെ മേൽ വന്ന് ചേരുന്നത്. നിങ്ങൾക്ക് ഇങ്ങനെ അധികാര രാഷ്ട്രീയം കളിച്ച് പാഴാക്കാനുള്ളതല്ല ഞങ്ങളുടെ നികുതിപ്പണം.

കെ. സി. വേണുഗോപാൽ മുഖ്യമന്ത്രി ആയാൽ, തെരഞ്ഞെടുപ്പിൽ അദ്ദേഹത്തെ തോൽപ്പിക്കും എന്ന് കോൺഗ്രസ്സ് പ്രവർത്തകരും അനുയായികളും ഇതിനകം തന്നെ പറഞ്ഞു കഴിഞ്ഞിട്ടുണ്ട്. കണ്ണ് തുറന്ന് സോഷ്യൽ മീഡിയയിലൂടെ കടന്നുപോയാൽ അത് മനസ്സിലാക്കാം. കെ. സി. ഏത് മണ്ഡലത്തിൽ മത്സരിച്ചാലും, എനിക്കവിടെ പരിചയമുള്ള 10 പേരോട് സംസാരിച്ച് അയാൾക്കെതിരെ വോട്ട് ശേഖരണം ഞാനും നടത്തും. നേതൃത്വം ഇതെല്ലാം കാണുന്നുണ്ടെങ്കിൽ കോൺഗ്രസിന് കൊള്ളാം.

ഇനി മറ്റ് രണ്ട് മുഖ്യമന്ത്രി സ്ഥാനാർത്ഥികളിലേക്ക് വരാം.

അവശേഷിക്കുന്ന രണ്ട് പേരിൽ സീനിയർ സ്ഥാനാർത്ഥി രമേശ് ചെന്നിത്തല തന്നെ ആണ്. പക്ഷേ അദ്ദേഹത്തിന് ഒരു ചാൻസ് ഉണ്ടായിരുന്നല്ലോ. പതിനാലാം അസംബ്ലിയിൽ അദ്ദേഹം പ്രതിപക്ഷ നേതാവായി പ്രവർത്തിച്ചതല്ലേ? അതിന് തൊട്ടടുത്ത വന്ന തെരഞ്ഞെടുപ്പിൽ പാർട്ടിയെ വിജയിപ്പിച്ച് മുഖ്യമന്ത്രി ആകാമായിരുന്നല്ലോ. അത് നടന്നില്ല. പിന്നീട് അദ്ദേഹത്തിന് പ്രതിപക്ഷ നേതാവിൻ്റെ സ്ഥാനം കിട്ടിയതുമില്ല. പ്രതിപക്ഷ നേതാവായി പ്രവർത്തിച്ച് പാർട്ടിയെ അധികാരത്തിലേക്ക് കൊണ്ടുവരാൻ വിയർപ്പൊഴുക്കിയ വി.ഡി. സതീശനെ മാറ്റി നിർത്തി രമേശ് ചെന്നിത്തലയെ മുഖ്യമന്ത്രി ആക്കുന്നത് ധാർമികമായി ശരിയല്ല. സീനിയോറിറ്റി ആണ് വിഷയമെങ്കിൽ ചെന്നിത്തലയെ തന്നെ പ്രതിപക്ഷ നേതാവായി വാഴിക്കാമായിരുന്നില്ലേ?

ചുരുക്കത്തിൽ പറഞ്ഞാൽ മുഖ്യമന്ത്രി ആകണമെന്ന് ഞാൻ ആഗ്രഹിക്കുന്നത് വി.ഡി.സതീശൻ തന്നെയാണ്. അതിപ്പോൾ അദ്ദേഹത്തിന് എന്തൊക്കെ കുറവുകളും കുറ്റങ്ങളും ഉണ്ടെന്ന് പറഞ്ഞാലും, അതേ പോരായ്മകളോടെ തന്നെയാണ് ജനം അദ്ദേഹത്തേയും മുന്നണിയേയും പാർട്ടിയേയും ജയിപ്പിച്ചിരിക്കുന്നത്. ആ വിയർപ്പിന്റെ പങ്ക് മറ്റുള്ളവർ പറ്റുന്നത് നീതികേടാണ്. നൂറിലധികം സീറ്റിൽ UDF ജയിച്ചു വന്നില്ലെങ്കിൽ, അതിന്റെ ഉത്തരവാദിത്വം ഏറ്റെടുത്ത് രാഷ്ട്രീയ വനവാസത്തിന് പോകുമെന്ന് പറഞ്ഞത് പ്രതിപക്ഷ നേതാവ് സതീശനാണ്, ചെന്നിത്തലയല്ല.

തെരഞ്ഞെടുപ്പ് കാലത്ത് വി.ഡി. സതീശൻ പല സിദ്ധാന്തങ്ങളും മുന്നോട്ട് വെച്ചിരുന്നു. കാലിയായ ഖജനാവ് നിറക്കുന്നത് മുതൽ, കേരളത്തിന്റെ സമൂലവും സമഗ്രവുമായ പരിവർത്തനത്തിന് ഉതകുന്ന തരത്തിലുള്ള കരടുകൾ തയ്യാറാക്കിയിട്ടുണ്ടെന്ന് സമർത്ഥിക്കുകയും അതിന്റെ ചില സൂചനകൾ നൽകുകയും ചെയ്തിരുന്നു. അതെല്ലാം എത്തരത്തിൽ നടത്തിയെടുക്കാൻ അദ്ദേഹത്തിന് ആകുമെന്ന് കൂടെയാണ് ജനം ആകാംഷയോടെ കാത്തിരിക്കുന്നത്. ആ അവസരം തല്ലിക്കെടുത്തരുത്. ചെന്നിത്തല വന്നാൽ ആ പദ്ധതികൾ നടപ്പിലാകും എന്ന് ഞാൻ കരുതുന്നില്ല. ചെന്നിത്തല, പരമ്പരാഗത കോൺഗ്രസ് രീതിയിലുള്ള ഒരു ഭരണവുമായി മുന്നോട്ടു പോകും. പ്രത്യേക പദ്ധതികളൊന്നും അദ്ദേഹം വിഭാവനം ചെയ്തിട്ടുമില്ല പറഞ്ഞിട്ടുമില്ല.

ലളിതമായി പറഞ്ഞാൽ വി.ഡി. സതീശൻ അല്ലാതെ മറ്റാര് മുഖ്യമന്ത്രി ആയാലും അത് 102 സീറ്റിന്റെ ഉന്നത വിജയം സമ്മാനിച്ച പൊതുജനത്തിനോടുള്ള കൊഞ്ഞനംകുത്തൽ ആയിരിക്കും.

കോൺഗ്രസ്‌ ഹൈക്കമാഡിനേക്കാളും മുകളിൽ കമാൻഡിങ് പവർ ഉള്ളവരാണ് ഇവിടത്തെ ജനങ്ങൾ എന്ന് ഈ തെരഞ്ഞെടുപ്പിലൂടെയെങ്കിലും മനസ്സിലാക്കിയിട്ടില്ലെങ്കിൽ ജനം അത് കൃത്യമായി മനസ്സിലാക്കി തരുക തന്നെ ചെയ്യും. ജനങ്ങൾ ആ സൂപ്പർ ഹൈക്കമാൻഡിങ്ങ് അധികാരം വീണ്ടും പുറത്തെടുക്കും. അത് കെ.സി വേണുഗോപാലിന്റെ പാർലമെന്റ് മണ്ഡലത്തിലും അദ്ദേഹതിൻ്റെ നിയമസഭാ മണ്ഡലത്തിലും കേരളം കണ്ടറിയും. ആ വിചാരം ഉണ്ടായാൽ നന്ന്.

ഇപ്പോൾ കിട്ടിയ വിജയം നിങ്ങളുടെ കഴിവിന്റെ പ്രതിഫലനമല്ലെന്ന് ഇന്നാട്ടിലെ കൊച്ചു കുട്ടികൾക്ക് പോലും അറിയാം. അത് മനസ്സിലാക്കി തീരുമാനങ്ങൾ എടുക്കുക. തീക്കൊള്ളി കൊണ്ട് തല ചൊറിയാതിരിക്കുക. നിങ്ങൾ മന്ത്രിമാർ മാത്രമാണ്. ജനമാണ് ഇപ്പോഴും ഇവിടത്തെ രാജാവ്.

വാൽക്കഷണം:- മറുവശത്ത് പ്രതിപക്ഷ നേതാവിന് വേണ്ടിയുള്ള ചർച്ചകൾ നടക്കുന്നുണ്ടെന്ന് കേൾക്കുന്നു! പ്രായാധിക്യവും അരോഗാവസ്ഥയും അവഗണിച്ച് മൂന്നാമതും മുഖ്യമന്ത്രി ആകാൻ തയ്യാറായ വ്യക്തി, പ്രതിപക്ഷ നേതാവ് ആകാൻ തയ്യാറല്ല എന്നത് വലിയ തമാശയാണ്. എന്തായാലും ഏകാധിപത്യ പ്രവണത മാറി ജനാധിപത്യ സ്വഭാവ കാണിക്കുന്നത് തീർച്ചയായും നല്ലത് തന്നെ.

തിരഞ്ഞെടുപ്പ് കാലത്ത്, സമൂഹമാദ്ധ്യമങ്ങളിൽ തലങ്ങും വിലങ്ങും പോസ്റ്റുകൾ ഇട്ട് അർമ്മാദിച്ചില്ലെങ്കിലും, അത്യാവശ്യം ഒരു പോസ്റ്റൊക്കെ ഇടാനുള്ള അവകാശം വോട്ടെണ്ണൽ കഴിഞ്ഞിരിക്കുന്ന ഈ സാഹചര്യത്തിൽ എനിക്കും ഉണ്ടെന്ന സ്വാതന്ത്ര്യത്തിൽ കുറച്ച് കാര്യങ്ങൾ പറയുന്നു.

എന്റെ സ്പേസിൽ പറയുന്നത് എന്റെ ബോദ്ധ്യങ്ങൾ ആണ്. അത് നിങ്ങളുടെ ബോദ്ധ്യങ്ങളുമായി ഒത്തുപോകില്ലെന്ന് കണ്ടാൽ വിറളി പിടിക്കേണ്ടതില്ല.

എന്തുകൊണ്ട് തോറ്റു എന്ന ചോദ്യത്തിന് ഒരുപാട് കാരണങ്ങളും ഉത്തരങ്ങളും ഉണ്ട്. ശ്രദ്ധയിൽപ്പെട്ട പല തോൽവികളും ഉൾപ്പെടുത്തിയിട്ടുണ്ട്.

ചില വിജയ കാരണങ്ങളും അല്പസ്വല്പം വിലയിരുത്തലുകളും കൂട്ടത്തിൽ ചേർത്തിട്ടുണ്ട്.

1. ജനം ആർക്കും വോട്ടുകൾ കാലാകാലത്തേക്ക് എഴുതിക്കൊടുത്തിട്ടില്ല. ഏത് കോട്ടയും തകരും. തകർന്ന ചരിത്രമുണ്ട്.

2. തെരഞ്ഞെടുപ്പ് കാലത്ത് പ്രചരിച്ച ഒരു പോസ്റ്റർ (കമൻ്റിൽ നോക്കുക) പ്രകാരം, അതിലുള്ള 50 മണ്ഡലങ്ങളിൽ സുനാമി വന്നാൽപ്പോലും LDFനെ തോൽപ്പിക്കാൻ പറ്റില്ല എന്നായിരുന്നു! എന്നിട്ടോ? ഏറ്റവും വലിയ കമ്യൂണിസ്റ്റ് കോട്ടകളായ പയ്യന്നൂരിലും തളിപ്പറമ്പിലും തൃക്കരിപ്പൂരിലും അമ്പലപ്പുഴയിലും അടക്കം ആ ലിസ്റ്റിലെ 21 മണ്ഡലങ്ങളിൽ ഭേഷായിട്ട് തോറ്റു. ധർമ്മടത്ത് പിണറായി വിജയന് ആദ്യത്തെ ഏഴ് റൗണ്ടിൽ പിന്നിൽ നിൽക്കേണ്ടി വന്നു. സുനാമിയൊന്നും വേണ്ട. ഒരു വേലിയേറ്റം ധാരാളം മതിയാകും. ഒരു മണ്ഡലവും ജനങ്ങൾ ആർക്കും തീറെഴുതി കൊടുത്തിട്ടില്ല.

3. LDF അല്ലാതെ മറ്റാരുണ്ട് എന്ന ചോദ്യത്തിന് ഉത്തരം കിട്ടി. കേരളത്തിൽ LDFഉം UDFഉം മാറിമാറി ഭരിച്ചിട്ടുണ്ട്. LDF മാത്രമാണ് ഇവിടെയുള്ളത് എന്ന വിഡ്ഢിച്ചിന്ത പിന്നെങ്ങനെ വന്നു; എവിടന്ന് വന്നു? നികേഷ് കുമാറാണ് അതിന് പിന്നിലെങ്കിൽ, അയാൾ തന്റെ അച്ഛന്റെ എതിരാളികൾക്ക് മടയിൽക്കയറി പണികൊടുത്തു എന്ന് തമാശയായി വേണമെങ്കിൽ പറയാം. അഥവാ അയാളാണ് പരാജയത്തിൻ്റെ മറ്റൊരു വലിയ കാരണം.

4. കേരളത്തിൽ അങ്ങോളമിങ്ങോളം എൻ്റെ മോന്ത, എൻ്റെ ഫുൾ ഫിഗർ പരസ്യങ്ങൾ വെച്ചാലൊന്നും ആരും ജയിക്കണമെന്നില്ല. പൊതുഖജനാവ് ധൂർത്തടിച്ചുകൊണ്ടുള്ള PR വർക്കുകൾ കണ്ടാൽ സാക്ഷരകേരളത്തിന് തിരിച്ചറിയാനാവും.

5. എത്ര നല്ല കാര്യങ്ങൾ ചെയ്താലും എത്ര വലിയ ആശയങ്ങൾ മുന്നോട്ട് വെച്ചാലും, അതിനിടയിലൂടെ ബാങ്കുകളും ആരാധനാലയങ്ങളും രക്തസാക്ഷി ഫണ്ടുകളും അടക്കം പറ്റാവുന്ന സ്ഥലങ്ങളിലൊക്കെ മോഷണം നടത്തിയാൽ…, സ്വജനപക്ഷപാതം ബെല്ലും ബ്രേക്കുമില്ലാതെ നടപ്പിലാക്കിയാൽ…, അങ്ങനെയുള്ളവരെ ജനാധിപത്യ ബോധമുള്ള വോട്ടർമാർ തോൽപ്പിച്ച് വീട്ടിലിരുത്തും. മോഷ്ടാക്കൾ പിന്നീട് എത്ര വലിയ കാര്യങ്ങൾ ചെയ്താലും ഏശില്ല.

6. ചോദ്യങ്ങൾ ചോദിക്കുമ്പോൾ ‘വീട്ടിൽ പോയി ചോദിച്ചാൽ മതി’ എന്ന ധാർഷ്ട്യം പറഞ്ഞാലും, ജനം തോൽപ്പിച്ച് വീട്ടിൽ ഇരുത്തും. ധാർഷ്ട്യം ഒരു കാരണവശാലും വെച്ച് പൊറുപ്പിക്കില്ല.

7. പെണ്ണുപിടിയന്മാരെ ഇടം വലം നോക്കാതെ ജനം തൂക്കിയെറിയും. അതെ, പി. കെ. ശശിയുടേയും ഗണേഷ്കുമാറിൻ്റേയും പരാജയങ്ങളെപ്പറ്റി തന്നെയാണ് പറയുന്നത്.

8. ജനങ്ങളുടെ തോളോടുതോൾ ചേർന്ന് നിന്ന് അവരുടെ പ്രശ്നങ്ങൾ കേൾക്കുകയും മനസ്സിലാക്കുകയും ചെയ്യുന്നതിന് പകരം 40 കാറുകളുടെ അകമ്പടിയോടെ 110 കിലോമീറ്റർ വേഗതയിൽ അവരിൽ നിന്ന് അകന്ന് പോയാൽ, ആ അകലം ജനം എന്നെന്നേക്കുമായി നിലനിർത്തും.

9. ഏതൊരു മണ്ഡലത്തിലും ഒരു രാഷ്ട്രീയപ്രവർത്തകൻ അഞ്ച് വർഷം ഇറങ്ങി നിന്ന് പ്രവർത്തിച്ചാൽ, അത് എത്ര വലിയ കോട്ടയാണെങ്കിലും ജയിച്ചു കയറാൻ പറ്റും. ഉദാഹരണം ജ്യോതികുമാർ ചാമക്കാല തന്നെ. എല്ലാ ജനപ്രതിനിധികളും ഇങ്ങനെ വിചാരിച്ചാൽ അഞ്ചുകൊല്ലം കൊണ്ട് വേറൊരു തലത്തിൽ എത്താൻ കഴിയും കേരളത്തിന്.

10. ഒരു ഫ്ലക്സ് ബോർഡ് പോലും വെക്കാതെയും പ്രചരണ കൊട്ടിക്കലാശ മാമാങ്കം നടത്താതെയും, ആർഭാടങ്ങൾ ഇല്ലാതെയും, വേണമെങ്കിൽ ഒരു സ്ഥാനാർത്ഥിക്ക് റെക്കോർഡ് വിജയം കൈവരിക്കാനാവും. അതെ, ചാണ്ടി ഉമ്മനെ തന്നെയാണ് ഉദ്ദേശിച്ചത്.

11. അങ്ങോട്ടുമിങ്ങോട്ടും ചാടിക്കളിച്ച് അധികാരത്തിന്റെ സുഖസൗകര്യങ്ങൾ വരുതിയിലാക്കി ജീവിക്കുന്ന കൗശലക്കാരായ മുതലാളിമാരോട് ജനത്തിന് അല്പം പോലും താല്പര്യമില്ല. ഉദാഹരണം പി. വി. അൻവറിന്റെ അർഹമായ തോൽവി.

12. ഇത്ര വലിയ ഭൂരിപക്ഷം UDFന് കിട്ടിയപ്പോഴും ടി. എൻ. പ്രതാപൻ എന്ന UDFന്റെ മുതിർന്ന നേതാവ് എന്തുകൊണ്ട് തോറ്റു? “കുറച്ചുപേരെ എല്ലാക്കാലവും എല്ലാവരേയും കുറച്ചുകാലവും കബളിപ്പിച്ച് നടക്കാൻ പറ്റും; പക്ഷേ എല്ലാവരേയും എല്ലാക്കാലവും കബളിപ്പിക്കാൻ പറ്റില്ല”.. എന്നൊരു സിദ്ധാന്തമുണ്ട്. അത് ചേർത്ത് വായിച്ചാൽ ഈ പരാജയത്തിനുള്ള ഉത്തരമായി.

13. ലീഡറുടെ മകൾ ആയതുകൊണ്ട് മാത്രം കോൺഗ്രസിലോ മറ്റേതെങ്കിലും പാർട്ടിയിലോ കയറിക്കൂടി സാരി ചുളിയാതെയും മേക്കപ്പ് ഇളകാതെയും ജയിച്ച് കയറാനാവില്ലെന്ന് ഇനിയെങ്കിലും പത്മജ വേണുഗോപാൽ മനസ്സിലാക്കണം. കേരള രാഷ്ട്രീയത്തിൽ നിങ്ങൾക്കുള്ള സ്ഥാനം ചവറ്റുകുട്ടയിലാണ്. മറ്റേതെങ്കിലും സംസ്ഥാനത്ത് ഗവർണ്ണറായി ശ്രമിക്കാവുന്നതാണ്.

14. പണം കൊടുത്ത് വോട്ടർമാരെ സ്വാധീനിക്കാൻ ശ്രമിക്കുന്നത് പൊതുജനം മനസ്സിലാക്കിയാൽ തോറ്റത് തന്നെ. ശോഭാ സുരേന്ദ്രൻ്റെ തോൽവിയുടെ കാര്യമാണ് സൂചിപ്പിച്ചത്. NDA ജയിക്കുമെന്ന് ഏറെക്കുറെ എല്ലാവരും ഉറപ്പിച്ചിരുന്ന മണ്ഡലമാണ് അത്.

15. പയ്യന്നൂരിൽ വി. കുഞ്ഞികൃഷ്ണന്റെ വിജയം (7487ഭൂരിപക്ഷം) കാണിക്കുന്നത്, രക്തസാക്ഷി ഫണ്ട് സഖാക്കൾ മോഷ്ടിച്ചു എന്ന് തെളിവുകൾ നിരത്തിയുള്ള അദ്ദേഹത്തിന്റെ ആരോപണം ജനങ്ങൾക്ക് ബോദ്ധ്യമായി എന്നാണ്. മോഷ്ടിച്ചവന് പാർട്ടിയുടെ വക സീറ്റ്; അത് ചൂണ്ടിക്കാണിച്ചവൻ പാർട്ടിക്ക് പുറത്ത്. പണത്തിന്റെ കണക്ക് ഞങ്ങൾ വേണ്ടപ്പെട്ടവരെ ബോധിപ്പിച്ചോളാം എന്ന ധാർഷ്ട്യം. തോൽക്കാൻ രണ്ടാമതൊരു കാരണം വേണോ?

16. തൊഴിലാളി വർഗ്ഗ പാർട്ടിയാണ് പാവങ്ങളുടെ പാർട്ടിയാണ് എന്നെല്ലാം പറഞ്ഞിട്ട്, അതേ പാവങ്ങളുടെ നികുതിപ്പണം ധൂർത്തടിച്ച് മുതലാളിത്ത ജീവിതം നയിച്ചാൽ അത് മനസ്സിലാക്കാനുള്ള ബോധവും പൊക്കണവുമൊക്കെ കേരള സമൂഹത്തിനുണ്ട്. മുണ്ട് മുറുക്കി ഉടുക്കേണ്ട ഇടങ്ങളിലൊന്നും അത് ചെയ്യാതെ കടമെടുത്ത പണം കൊണ്ട് ധൂർത്ത് തുടർന്നു.

17. പല എക്സിറ്റ് പോളുകളേയും കവച്ചു വെച്ചുള്ള വിജയം UDF ന് കിട്ടാനുള്ള കാരണം, LDF ന് വോട്ട് ചെയ്യേണ്ട എന്ന് തീരുമാനിച്ച പലരും അത് സർവ്വേകളിൽ തുറന്നു പറയാൻ മടിക്കുന്നു അല്ലെങ്കിൽ ഭയക്കുന്നു എന്നതാണ്.

18. അവസാനമായി പറയാനുള്ളത് സ്വരാജിനോടാണ്. മേൽപ്പറഞ്ഞതിന്റെ ഇരട്ടി കാര്യങ്ങൾ ചൂണ്ടിക്കാണിച്ച്, കേരള ജനതയുടെ വോട്ടിംഗ് കൃത്യമായിരുന്നു എന്ന് യാഥാർത്ഥൃ ബോധമുള്ളവർക്ക് സമർത്ഥിക്കാനാവും. താങ്കൾക്ക് പക്ഷേ വോട്ടർമാരോട് പുച്ഛം. താങ്കളുടെ പാർട്ടിക്ക് വോട്ട് ചെയ്തില്ലെങ്കിൽ ഉടനെ ജനങ്ങൾ ഉദാസീനരും അരാഷ്ട്രീയവാദികളുമാകുന്നു. അതെന്തോന്ന് ന്യായീകരണമാണ് ഹേ. താങ്കളുടെ പാർട്ടി എല്ലാം തികഞ്ഞ പാർട്ടിയാണോ? ആദ്യം പരാജയം അംഗീകരിക്കാൻ പഠിക്കുക. എന്നിട്ടാണ് കാരണം തിരയലും വിശകലനവും തെറ്റ് തിരുത്തലുമൊക്കെ. അതിന് മനസ്സില്ലാത്ത താങ്കളെപ്പോലുള്ളവർ ഏത് പാർട്ടിയിൽ ഉണ്ടായാലും പരാജയം വീണ്ടും വീണ്ടും ഉണ്ടായിക്കൊണ്ടിരിക്കും. ഇത്രയൊക്കെ ആയാലും തെല്ല് പോലും മാറരുത്. ചതുരവടിവിൽ ഇങ്ങനെ തന്നെ തുടരുക. ‘ഒന്ന് ചീഞ്ഞാലേ മറ്റൊന്നിന് വളമാകൂ’ എന്ന പ്രപഞ്ചസത്യം മാറ്റാൻ ഒരു പൂമരനും പുംഗവനും കഴിയില്ല.

വാൽക്കഷണം:- UDF ന് ഈ ‘വലിയ’ വിജയത്തിൽ അഹങ്കരിക്കാൻ ഒന്നുമില്ല. LDF ൻ്റെ ധാർഷ്ട്യവും തെമ്മാടിത്തരങ്ങളും സ്വജനപക്ഷപാതവും പകൽക്കൊള്ളയും പോരാഞ്ഞ് പിണറായി വിജയൻ എന്ന ഏകാധിപതിയുടെ ചെയ്തികളും നിങ്ങൾക്ക് അനുകൂലമായി ഭവിച്ചു എന്ന് മാത്രം. അത് മനസ്സിലാക്കി കൊള്ളാവുന്ന ഭരണം കാഴ്ചവെച്ചാൽ നിങ്ങൾക്ക് കൊള്ളാം, ജനങ്ങൾക്കും കൊള്ളാം. അല്ലെങ്കിൽ, അഞ്ച് വർഷത്തിന് ശേഷം ഇതേ മാതൃകയിൽ ചെവിക്ക് പിടിച്ച് തൂക്കി വെളിയിൽ കളയാൻ ഇതേ സമ്മതിദായകർ മുന്നിട്ട് നിൽക്കും.

ഇതിപ്പോൾ പൊതുജനം അറിഞ്ഞുകൊണ്ട് തുറക്കുന്ന രണ്ടാമത്തെ സ്ട്രോങ്ങ് റൂം ആണ്. അറിയാതെ ഏതൊക്കെ സ്ട്രോങ്ങ് റൂമുകൾ തുറന്നിട്ടുണ്ടെന്ന് കണക്കില്ല.

ഈ വിഷയത്തിൽ ചില ചോദ്യങ്ങളുണ്ട്…

1. ഇത്രയേ ഉള്ളോ ഈ സ്ട്രോങ്ങ് റൂം? (ഒരു ഓഫീസർ മറന്നു വെച്ച ഡയറി എടുക്കാൻ ആണത്രേ സ്ട്രോങ്ങ് റൂം തുറക്കുന്നത്!) ഒരു ഉദ്യോഗസ്ഥൻ ഒരു സാധനം മറന്നു വെച്ചാൽ അത് തിരികെ എടുക്കാൻ വേണ്ടി സീല് പൊളിച്ച് തുറക്കാവുന്നതേ ഉള്ളോ ഈ സ്ട്രോങ്ങ് റൂം?

2. അത് ഉദ്യോഗസ്ഥന്റെ ഔദ്യോഗിക
ഡയറി ആണോ അതോ വ്യക്തിപരമായ ഡയറിയാണോ?

3. ഔദ്യോഗിക ഡയറി ആയാലും വ്യക്തിഗത ഡയറി ആയാലും, മെയ് 4ന് മുന്നേ തുറന്ന് എടുക്കേണ്ട എന്ത് അത്യാവശ്യം ആണ് ആ ഡയറിയിൽ ഉള്ളത്? അത് പൊതുജനത്തിനെ ബോധ്യപ്പെടുത്തുമോ?

4. വോട്ടിങ്ങ് കഴിഞ്ഞ്, സ്ട്രോങ്ങ്‌ റൂം അടച്ച് 12 ദിവസം കഴിഞ്ഞപ്പോഴാണോ ഡയറി സ്ട്രോങ്ങ് റൂമിൽ ആയിപ്പോയതെന്ന് ഉദ്യോഗസ്ഥൻ അറിഞ്ഞത്?

5. ഇക്കഴിഞ്ഞ 12 ദിവസം ആ ഡയറിയില്ലാതെ ഉദ്യോഗസ്ഥൻ എങ്ങനെ മുന്നോട്ടു നീങ്ങി?

6. അടുത്ത 14 ദിവസം കൂടി അതേ നിലയ്ക്ക് തുടരാൻ അദ്ദേഹത്തിന് പറ്റുമായിരുന്നില്ലേ?

7. ആ ഡയറി എടുക്കാൻ സ്ട്രോങ്ങ് റൂമിലേക്ക് പോകുന്ന വ്യക്തിയുടെ/ വ്യക്തികളുടെ ശരീര പരിശോധന നടത്തി ഉടായിപ്പ് ഒന്നുമില്ല എന്ന് തീർപ്പാക്കുമോ?

8. ഡയറി എടുക്കാൻ സ്ട്രോങ്ങ് റൂമിലേക്ക് പോകുന്നവർ ഉടായിപ്പ് ഒന്നും കാണിക്കുന്നില്ല എന്ന് ഉറപ്പാക്കാൻ പൊലീസും അകത്തേക്ക് പോകുമോ?

9. പൊലീസിനും ഒരു ഉടായിപ്പിൻ്റെ ഭാഗമാകാമല്ലോ. ആ നിലയ്ക്ക് എല്ലാ പാർട്ടികളുടേയും ഒരു പ്രതിനിധിയെ സ്ട്രോങ്ങ്‌ റൂമിന് അകത്തേക്ക് അനുവദിക്കുമോ?

10. ഈ നടപടിക്രമങ്ങൾ മുഴുവൻ റെക്കോർഡ് ചെയ്യാൻ മാധ്യമങ്ങളെ അനുവദിക്കുമോ?

11. ഡയറിയോ മടിശ്ശീലയോ ബാഗോ ഫോണോ കൗപീനമോ എന്തുമാകട്ടെ, സ്ട്രോങ്ങ് റൂമിൽ മറന്നു വെച്ചത് മൂലം അത് രണ്ടാമത് തുറക്കേണ്ടി വന്നതിൽ ഈ ഉദ്യോഗസ്ഥനെതിരെ നടപടി ഉണ്ടാകുമോ? ഇത് അയാളുടെ വീഴ്ച ആയിട്ടല്ലേ കണക്കാക്കേണ്ടത്. ഡയറി മറന്ന് വെച്ചത് മനുഷ്യസഹജമായി കണക്കാക്കാമെങ്കിലും അതിന്റെ പേരിൽ, ഇത്രയും വലിയ ഒരു ജനാധിപത്യ പ്രക്രിയയെ സംശയത്തിൽ ആക്കുന്ന തരത്തിൽ സ്ട്രോങ്ങ് റൂം തുറക്കേണ്ടി വരുന്നത് അയാളുടെ വീഴ്ചയല്ലേ?

12. ഈ സ്ട്രോങ്ങ് റൂം തുറക്കൽ ഇനിയുള്ള കാലങ്ങളിലും സ്ഥിരം കലാപരിപാടി ആയേക്കാം. തിരഞ്ഞെടുപ്പ് തന്നെ അട്ടിമറിക്കപ്പെട്ടേക്കാം. ആയതിനാൽ വോട്ട് ചെയ്ത് പരമാവധി മൂന്ന് ദിവസത്തിനകം വോട്ട് എണ്ണുന്ന തരത്തിലുള്ള സംവിധാനമല്ലേ ഇനിയുള്ള കാലത്ത് അഭികാമ്യം?

13. ഇത്തരം പരിപാടികൾ ഇനിയും തുടർന്നേക്കാം എന്നതുകൊണ്ട് വോട്ടിംഗ് മെഷീനുകൾ മാറ്റി ബാലറ്റ് പേപ്പറിലേക്ക് തിരികെ പോകുന്നല്ലേ ഉചിതം? ഇതുപോലുള്ള തട്ടിപ്പ് സാധ്യതകളിൽ നിന്ന് രക്ഷപ്പെടാൻ അതല്ലേ ഏകമാർഗ്ഗം?

വാൽക്കഷണം:- ചോദ്യങ്ങൾ ചോദിച്ചു കൊണ്ടേയിരിക്കണം. അല്ലെങ്കിൽ ഇവന്മാർ ചിലപ്പോൾ ജനാധിപത്യത്തെ നാലായി മടക്കി താറ് ഉടുക്കും.

#StrongRoom
#Polling
#election
#BalletPaper

ഇന്നലെ വൈകീട്ട് മുളന്തുരുത്തിയിലെ ALA സെൻ്ററിൽ വെച്ച് കണ്ട Hand of God എന്ന നാടകത്തെപ്പറ്റി ഒരുപാട് പറയണമെന്നുണ്ട്. അത്രയ്ക്ക് ഗംഭീര അനുഭവമായിരുന്നു അത്.

പക്ഷേ, എന്തെങ്കിലും കാര്യമായി പറഞ്ഞാൽ അത് Spoiler Alert ആയിപ്പോകും. അതുകൊണ്ട് ചില സൂചനകൾ മാത്രം നൽകാം.

അൻപതിൽ താഴെ കാണികൾക്ക് മാത്രം ഇരിക്കാൻ പറ്റുന്ന ഒരു മുറിയിലാണ് നാടകം അരങ്ങേറുന്നത്. ‘നാടകവുമായി ഇടപഴകാനും സംവദിക്കാനും പറ്റുന്നവർ മാത്രം നാടകത്തിന് വരുക’ എന്ന മുന്നറിയിപ്പ് സംഘാടകർ കാണികൾക്ക് കൊടുക്കുന്നത് തന്നെ ആദ്യാനുഭവമാണ്.

നമ്മൾ ജീവിക്കുന്നത് ജനാധിപത്യ രാജ്യത്തിലാണെന്നാണല്ലോ വെപ്പ്. കൂട്ടത്തിൽ ദൈവവിശ്വാസികളുടേയും നാട്. അതുകൊണ്ട് തന്നെ പ്രാർത്ഥനകളുടേയും നാട്. ദൈവം എത്രത്തോളം പ്രാർത്ഥനകൾ കേൾക്കും? ആരോടൊപ്പം നിൽക്കും? ദൈവത്തിന് സ്വന്തം ലൈംഗിക താൽപ്പര്യങ്ങൾ പോലും ശമിപ്പിക്കാനുള്ള സമയം കൊടുക്കാതെ ശല്യം ചെയ്യുന്ന പ്രാർത്ഥനകൾ! ഈ നാടകത്തിൽ ദൈവത്തിൻ്റെ റോൾ ഒരു സ്ത്രീയ്ക്കാണ്.

ഒരേ വിഷയത്തിൽ ദൈവത്തിന് മുന്നിൽ വരുന്ന മൂന്ന് പ്രാർത്ഥനകളിൽ ഏതിനൊപ്പം നിൽക്കണമെന്ന് ജനങ്ങളോട് ദൈവം ചോദിക്കുന്ന ഇടത്താണ് ഈ നാടകം ഒരു Interactive Illustrative Play ആയി മാറുന്നത്. കാണികളായി ചെന്നിരിക്കുന്ന നമ്മൾ ഓരോരുത്തരും സ്റ്റേജിലേക്ക് കടന്ന് ചെന്ന് വോട്ട് ചെയ്യണം. അതിന് മുന്നേ സ്ഥാനാർത്ഥികൾ ജനങ്ങളാകുന്ന നമുക്കിടയിലേക്ക് കടന്നുവന്ന് വോട്ട് പിടിക്കുന്നുണ്ട്. ലൈംഗികത കലർന്ന ഒരു വിഷയമായതുകൊണ്ട് തന്നെ മൂന്ന് പേരുടേയും വോട്ട് പിടുത്തം കാണികളിൽ പലപ്പോഴും നല്ല തോതിൽ ചിരിയുണർത്തും.

വോട്ടിങ്ങ് അത്ര എളൂപ്പമൊന്നും അല്ല. മൂന്ന് പേരിൽ ആർക്കൊപ്പം നിൽക്കണം, ആർക്ക് വോട്ട് ചെയ്യണം എന്ന് തീരുമാനിക്കണമെങ്കിൽ കൂലംകഷമായിത്തന്നെ ആലോചിക്കണം. ന്യായത്തിൻ്റെ നേർത്ത അതിർവരമ്പ് മാത്രമാണ് മൂന്ന് സ്ഥാനാർത്ഥികൾക്കും ഇടയ്ക്കുള്ളത്.

സത്യത്തിൽ നമ്മുടെ നാടിൻ്റെ സമീപകാല അവസ്ഥയിലേക്കും കുറേക്കൂടെ വിശാലമായി പറഞ്ഞാൽ എക്കാലത്തേയും ജനാധിപത്യ പ്രക്രിയയുടെ അവസ്ഥയിലേക്കുമാണ് നാടകം വിരൽചൂണ്ടുന്നത്. എത്ര ഗംഭീരമായി ആലോചിച്ച് വോട്ട് ചെയ്താലും വിജയിയെ പ്രഖ്യാപിച്ചതിന് ശേഷം വിജയിക്കാതെ പോകുന്ന സ്ഥാനാർത്ഥികളും ദൈവവും നമുക്ക് നേരെ തൊടുക്കുന്ന ചോദ്യങ്ങൾ നമ്മെ ശരിക്കും ധർമ്മസങ്കടത്തിലാക്കുന്നു. ചെയ്ത വോട്ട് തെറ്റിപ്പോയില്ലേ എന്ന ചോദ്യം വലുതായിത്തന്നെ മുന്നിൽ ഉയർത്തുന്നു. ജയിക്കാതെ പോയ സ്ഥാനാർത്ഥിയുടെ ഭാഗത്തും ശരിയുണ്ടായിരുന്നില്ലേ എന്ന ചോദ്യം നമുക്ക് മുന്നിൽ ഉയരുന്നു.

ഇതിൽക്കൂടുതൽ ഭംഗിയായി എങ്ങനെയാണ് നിലവിലെ ജനാധിപത്യ പ്രക്രിയയെ ഒരു നാടകത്തിൻ്റെ രൂപത്തിൽ നമുക്ക് മുന്നിൽ അവതരിപ്പിച്ച് നമ്മെക്കൊണ്ട് വീണ്ടും വീണ്ടും ചിന്തിപ്പിക്കുക? ചെയ്യുന്ന ഓരോ വോട്ടും കിറുകൃത്യമായിരിക്കണമെന്ന് എങ്ങനെയാണ് നെഞ്ചിൽ തൊട്ടുകൊണ്ട് കാണികളോട് പറയാൻ ആവുക? വോട്ട് ചെയ്യുന്ന ആ കൈകൾ ദൈവത്തിൻ്റേതല്ല, നിങ്ങളുടേത് തന്നെയാണെന്ന് ഇതിൽക്കൂടുതൽ ഭംഗിയായി എങ്ങനെയാണ് പറയുക? സംവിധായകൻ പി.പി.അരുണിനും അദ്ദേഹത്തിൻ്റെ സഹപ്രവർത്തകർക്കും ഒരായിരം അഭിനന്ദനങ്ങൾ.

മൂന്ന് സ്ഥാനാർത്ഥികളിൽ ഏതൊരു സ്ഥാനാർത്ഥി ജയിച്ചാലും അതിനനുസരിച്ചാണ് നാടകത്തിൻ്റെ അന്ത്യഭാഗം ക്രമീകരിച്ചിരിക്കുന്നത്. ചുരുക്കിപ്പറഞ്ഞാൽ നാം കാണുന്ന അന്ത്യഭാഗം നമ്മുടെ വോട്ടെടുപ്പിൻ്റെ ഫലമാണ്. ഈ നാടകത്തിന് മറ്റ് രണ്ട് അന്ത്യഭാഗങ്ങൾ കൂടെ ഉണ്ടെന്ന് സാരം. രണ്ട് പ്രാവശ്യം കൂടെ ഈ നാടകം കണ്ടാലും, മറ്റ് രണ്ട് അന്ത്യഭാഗങ്ങൾ ഒരാൾക്ക് കാണാൻ പറ്റണമെന്നില്ല. അങ്ങനെയങ്ങനെ ഒരുപാട് പ്രത്യേകതകൾ ഇതേപ്പറ്റി പറയാനുണ്ട്. അതുകൊണ്ട് തന്നെ ഈ നാടകത്തിൻ്റെ പേര് ഓർത്ത് വെക്കുക. ഇവിടന്നങ്ങോട്ട് എവിടെ ഈ നാടകം കളിക്കുന്നുണ്ടെന്ന് അറിഞ്ഞാലും കാണാൻ അമാന്തിക്കരുത്.

ഗാർഹിക പീഢനങ്ങൾക്കോ അല്ലെങ്കിൽ നാടകത്തിൽ പരാമർശിക്കുന്ന തരത്തിലുള്ള സ്ത്രീപീഡനങ്ങൾക്കോ ഇരയാകുന്നവർക്ക് തുണയാകാൻ വേണ്ടി കൂടെ ഇതിൻ്റെ പിന്നണിപ്രവർത്തകർ തീരുമാനിച്ചിട്ടുണ്ട് എന്നതാണ് എടുത്ത് പറയേണ്ട മറ്റൊരു വലിയ കാര്യം. പേര് ഓർത്ത് വെക്കുക. Hands Of God.

എന്നെ ഏറെ സന്തോഷിപ്പിച്ച ഒരു കാര്യം, നാടകത്തിലെ പ്രധാനവേഷങ്ങളിൽ ഒന്ന് ചെയ്തിരിക്കുന്ന സിദ്ധാർത്ഥ് വർമ്മയും ഞാനും ഒരുമിച്ച് ഒരു മെഡിക്കൽ കമ്പനിയുടെ പരസ്യ ചിത്രത്തിൽ, ജൂനിയർ – സീനിയർ ഡോക്ടർമാരായി വേഷമിട്ടിട്ടുണ്ട് എന്നതാണ്. സ്റ്റേജിൽ പ്രത്യക്ഷപ്പെട്ട സിദ്ധാർത്ഥിനെ നല്ല മുഖപരിചയം തോന്നിയെങ്കിലും അദ്ദേഹത്തിൻ്റെ ശബ്ദം പുറത്ത് വന്നതോടെ എനിക്ക് ആളെ കൃത്യമായി മനസ്സിലായി. അഭിനന്ദനങ്ങൾ സിദ്ധാർത്ഥ്. മറ്റൊരു പ്രധാന കഥാപാത്രത്തെ അവതരിപ്പിക്കുന്നത് പ്രശസ്ത സിനിമാ സംവിധായകൻ ജിയോ ബേബി ആണ്.

വാൽക്കഷണം:- പഞ്ചായത്ത് തെരഞ്ഞെടുപ്പിന് വോട്ട് ചെയ്യാൻ സ്ഥലത്തുണ്ടാകില്ല എന്ന വിഷമം ചെറിയ തോതിലെങ്കിലും തീർക്കാൻ ഇന്നലെ ഈ നാടകത്തിൽ ചെയ്ത ഒരു വോട്ടും വിരലിലെ മഷിയടയാളവും സഹായിച്ചു. ഞാൻ വോട്ട് ചെയ്ത സ്ഥാനാർത്ഥി വലിയ ഭൂരിപക്ഷത്തിന് ജയിക്കുകയും ചെയ്തു.

#handofgod
#voting
#votingday
#Drama

ഇന്ത്യ മുഴുവൻ അരിച്ചുപെറുക്കി കാണുക എന്ന ജീവിതാഭിലാഷം നടപ്പാക്കുന്നതിനോടൊപ്പം അത് ഡോക്യുമെൻ്റ് ചെയ്യുക എന്ന പദ്ധതിയും താലോലിച്ച് തുടങ്ങുന്ന കാലത്തെ സംഭവമാണ്. ഒരു ബ്ലോഗർ എന്ന നിലയ്ക്ക് നിത്യേന യാത്രാവിവരണങ്ങൾ എഴുതിയിടുക എന്നതായിരുന്നു ആദ്യകാലത്ത് മനസ്സിൽ ഉണ്ടായിരുന്ന പദ്ധതി. കാലം മുന്നോട്ട് പോകെ യൂട്യൂബ് പോലുള്ള സൗകര്യങ്ങളും അഭിവൃദ്ധി പ്രാപിച്ചു. എഴുത്തിനൊപ്പം വീഡിയോയും ആകാമെന്ന് തീരുമാനിച്ചു.

ആദ്യത്തെ പത്ത് ദിവസം ടെസ്റ്റ് ഡ്രൈവ് ചെയ്തപ്പോൾ ഇത് രണ്ടും നടപ്പിലാക്കി നോക്കിയെങ്കിലും രണ്ട് പരിപാടിയും ഒരുമിച്ച് മുന്നോട്ട് നീക്കുക ബുദ്ധിമുട്ടാണെന്ന് ബോദ്ധ്യമായി. പോരാത്തതിന് എഴുതിയിട്ടത് മുഴുവൻ കാരൂർ സോമൻ മോഷ്ടിച്ച് കൊണ്ടുപോയി പുസ്തകമാക്കുന്ന നിലയ്ക്ക് ഇനിയെന്തിന് യാത്രാവിവരണങ്ങൾ എഴുതണം എന്ന ചിന്തയും ശക്തമായിരുന്നു. അങ്ങനെ നിത്യേനയുള്ള യാത്രാവിവരണങ്ങൾ അവസാനിപ്പിച്ച് വീഡിയോകൾ മാത്രം ചെയ്താൽ മതിയെന്ന് നിശ്ചയിച്ചു.

Great Indian Expedition എന്നാണ് യൂ ട്യൂബ് ചാനലിന് പേരിട്ടത്. അതിനായുള്ള ലോഗോയും മറ്റും നന്ദൻ ഉണ്ടാക്കിത്തരുകയും ചെയ്തു. പക്ഷേ ഏതാണ്ട് അതേ സമയത്ത് റൂട്ട് റെക്കോർഡ്സ് എന്ന പേരിൽ വ്ലോഗ് ചെയ്യുന്ന അഷ്റഫ് അലി തൻ്റെ ഇന്ത്യൻ പര്യടനത്തിന് Great India Expedition എന്ന പേർ നൽകി മുന്നോട്ട് പോകുന്നതായി മനസ്സിലാക്കി. (Indian/India എന്നത് മാത്രമാണ് പേരിലുള്ള വ്യത്യാസം) ആരാണ് ആ പേർ ആദ്യം മനസ്സിൽ കണ്ടതെന്നും ആദ്യം പബ്ലിക്ക് ആക്കിയതെന്നും വലിയ നിശ്ചയമൊന്നും എനിക്കിന്നുമില്ല. യൂ ട്യൂബിൽ തപ്പിയാൽ സമാനമായ പേരുള്ള പല ചാനലുകളും യാത്രാ സംരംഭങ്ങളും അന്നേ തന്നെ ഉണ്ടായിരുന്നു എന്നത് മറ്റൊരു തമാശ.

എന്തായാലും കേരളത്തിൽ നിന്ന് രണ്ട് വ്യക്തികൾ ഒരേ പേരിൽ യാത്രാപദ്ധതി നടപ്പിലാക്കി വ്ലോഗ് ചെയ്താൽ അത് കാണികളിലും സബ്സ്ക്രൈബേർസിലും ചിന്താക്കുഴപ്പം ഉണ്ടാക്കാൻ സാദ്ധ്യതയുണ്ടെന്ന് എനിക്ക് തോന്നി. പക്ഷേ, അതിലെ മുഴുവൻ സാഹചര്യവും എനിക്കനുകൂലമായിരുന്നു എന്നതാണ് യാഥാർത്ഥ്യം. അത് വ്യക്തമാക്കാം.

അഷ്റഫ് എന്നേക്കാൾ എത്രയോ മുന്നേ യൂ ട്യൂബിൽ മനോഹരമായ യാത്രാ വീഡിയോകൾ ഇടുന്ന വ്യക്തിയാണ്. എൻ്റെ ചാനൽ സബ്സ്ക്രെബേർസ് പൂജ്യമായിരിക്കുന്ന സമയത്തും അഷ്റഫിനെ ഞാനടക്കം ലക്ഷങ്ങൾ കാണുന്നുണ്ട്. പക്ഷേ ഞങ്ങൾ തമ്മിൽ ആ സമയത്ത് ഓൺലൈനിലെ ഏതെങ്കിലും ഒരു സങ്കേതം വഴി സൗഹൃദമോ ആത്മബന്ധമോ ഇല്ല. എന്തായാലും ആ സാഹചര്യത്തിൽ രണ്ടുപേരും സമാനമായ യാത്രാ പേരുമായി നീങ്ങിയാൽ, പുതുതായി Great Indian Expedition എന്ന വരികൾ/ചാനൽ സെർച്ച് ചെയ്ത് നോക്കുന്ന ഒരാൾക്ക് അഷ്റഫിൻ്റെ എന്നത് പോലെ തന്നെ എൻ്റേയും ചാനൽ കിട്ടാൻ സാദ്ധ്യതയുണ്ട്. ഞങ്ങളെ രണ്ട് പേരെയും ചാനലുകളിലൂടെ അറിയാത്ത ഒരാൾക്ക് ആരെ വേണമെങ്കിലും സബ്സ്ക്രെബ് ചെയ്യാം. റൂട്ട് റെക്കോഡ്സ് എന്ന് ടൈപ്പ് ചെയ്ത് അഷ്റഫിനെ പരതുന്നതിന് പകരം Great India/Indian Expedition എന്ന് ആരൊക്കെ പരതിയാലും അവർ എൻ്റെ ചാനലിലേക്ക് എത്താനാണ് സാദ്ധ്യത കൂടുതൽ. അങ്ങനെ അഷ്റഫിനെ പിന്തുടരാൻ ഉദ്ദേശിച്ച് യൂട്യൂബിൽ വന്ന ഒരാളെങ്കിലും അബദ്ധവശാൽ എന്നെ പിന്തുടർന്നാൽ എനിക്കാണ് മെച്ചം. അഷ്റഫിന് നഷ്ടവും.

ഒരേ പേർ ഉണ്ടാക്കാൻ സാദ്ധ്യതയുള്ള ഈ ചിന്താക്കുഴപ്പം ഇതേപടി തന്നെ ഞാൻ അഷ്റഫിനെ അറിയിച്ചു. ഇത്തരത്തിൽ എനിക്ക് എന്തെങ്കിലും മെച്ചമുണ്ടാകുന്നുണ്ടെങ്കിൽ അഷ്റഫിന് യാതൊരു വൈക്ലബ്യവും ഇല്ലെന്ന് അദ്ദേഹം മറുപടി നൽകി. രണ്ടുപേരും യാത്രാപദ്ധതിയുടെ പേരുകൾ മാറ്റേണ്ടതില്ലെന്ന് സസന്തോഷം ധാരണയായി. അവിടന്നങ്ങോട്ട് ഞങ്ങൾ ഓൺലൈൻ സുഹൃത്തുക്കളായി. നേരിൽ കണ്ടു; ഓഫ് ലൈനാക്കി. ഒരു ചടങ്ങെന്ന നിലയ്ക്ക് എൻ്റെ യാത്ര, കലൂരിൽ വെച്ച് അഷ്റഫ് ഫ്ലാഗ് ഓഫ് ചെയ്തു. യാത്രാ സംബന്ധിയായ കാര്യങ്ങൾക്ക് ഞങ്ങളിന്നും ചർച്ച ചെയ്യുന്നു, സഹകരിക്കുന്നു, ഇടയ്ക്ക് ഫോൺ ചെയ്യുന്നു, നല്ല നിലയിൽ സൗഹൃദം മുന്നോട്ട് നീക്കുന്നു.

ഇത്രയും പറഞ്ഞത് എൻ. എസ്. മാധവൻ്റെ ഹിഗ്വിറ്റ പേർ വിവാദവുമായി ബന്ധപ്പെട്ടാണ്. ഒരേ മീഡിയയിലുള്ള പ്രശസ്തനും അപ്രശസ്തനുമായ രണ്ടുപേർക്ക്, അവരുടെ യാത്രാപദ്ധതികൾക്ക് ഒരേ പേർ നൽകി സ്വരുമയോടെ മുന്നോട്ട് പോകാമെങ്കിൽ, അവർക്കുള്ള പങ്ക് അവരിലേക്കും സീസറിൻ്റെ പങ്ക് സീസറിലേക്കും സ്വാഭാവികമായിത്തന്നെ പോകുമെന്ന് ആത്മവിശ്വാസമുണ്ടെങ്കിൽ, ലോകം മുഴുവൻ അതേ പേരുള്ള കലാസൃഷ്ടികളോ സാഹിത്യസൃഷ്ടികളോ നിറഞ്ഞാലും ഒന്നും സംഭവിക്കാനില്ല.

വാൽക്കഷണം:- നിരക്ഷരൻ എന്ന തൂലികാ നാമത്തിൽ നാളെ മറ്റൊരു വ്യക്തി അയാളുടെ സൃഷ്ടികളുമായോ അല്ലെങ്കിൽ സാമൂഹിക മാദ്ധ്യമങ്ങളിൽ എവിടെയെങ്കിലും ഒരു പ്രൊഫൈലുമായോ വന്നാലും എനിക്കൊരു അലോഹ്യവുമില്ല. ആ സുഹൃത്ത് എന്നേക്കാൾ നിരക്ഷരനാണെങ്കിൽ അയാൾ മിന്നിക്കും. ഞാനെത്ര മിന്നിച്ചാലും അതിനൊരു ലിമിറ്റുണ്ടെന്ന് നല്ല ബോദ്ധ്യമുണ്ട്.

ഇന്ന് രാവിലെ വാട്ട്സ് ആപ്പിൽ ലഭിച്ച രണ്ട് സന്ദേശങ്ങളാണ് ചിത്രത്തിൽ. ഒന്ന് തൃക്കാക്കര നിയോജക മണ്ഡലത്തിൽ ഉപതിരഞ്ഞെടുപ്പിനായുള്ള (31 മെയ് 2022) എൻ്റെ വോട്ടേർസ് സ്ലിപ്പ്. രണ്ടാമത്തേത് എൻ്റെ ബൂത്തും ബൂത്ത് നമ്പറും.

ഇത് പരസ്യപ്പെടുത്താൻ ഒരു പ്രത്യേക കാരണമുണ്ട്. വിശദമാക്കാം.

പണ്ട് വോട്ടേർസ് സ്ലിപ്പുകൾ കക്ഷിരാഷ്ട്രീയക്കാർ വീടുകളിൽ കൊണ്ടുവന്ന് തരുന്നതായിരുന്നു പതിവ്. ഇന്നും നല്ലൊരുപങ്ക് അങ്ങനെ തന്നെയാണെന്ന് ബോദ്ധ്യമുണ്ട്. പക്ഷേ സാങ്കേതികവിദ്യ വികസിച്ചപ്പോൾ ഒരാൾക്ക് അയാളുടെ മേശപ്പുറത്ത് ഈ സ്ലിപ്പുകൾ നിരത്തിവെച്ച് ഫോട്ടോ എടുത്ത് എല്ലാ വോട്ടേർസിനും അയച്ച് കൊടുക്കാമെന്ന അവസ്ഥ വന്നിരിക്കുന്നു. ആ സൗകര്യം എൻ്റെ തൃക്കാക്കര കൗൺസിലർ കൃത്യമായി പ്രയോജനപ്പെടുത്തുകയും ചെയ്യുന്നു.

എന്നുവെച്ച് അദ്ദേഹം തിരഞ്ഞെടുപ്പ് സമയത്ത് മാത്രമാണ് ഇത്തരം മെസ്സേജുകൾ അയക്കുന്നതെന്ന് കരുതരുത്. തൃക്കാക്കര മണ്ഡലവുമായി ബന്ധപ്പെട്ട് വരുന്ന എല്ലാ സംഭവവികാസങ്ങളും പത്രവാർത്തകളും അദ്ദേഹം പങ്കുവെക്കാറുണ്ട്. സാധാരണ നിലയ്ക്ക് എനിക്ക് ഇത്തരം സന്ദേശങ്ങൾ അലോസരം ഉണ്ടാക്കാറുണ്ടെങ്കിലും ഇദ്ദേഹം അയക്കുന്ന സന്ദേശങ്ങളോട് അൽപ്പം പോലും ഈർഷ്യയില്ല. അതിന് പല കാരണങ്ങളുണ്ട്.

പ്രധാന കാരണം, പത്രം വായിക്കാതെ തന്നെ എൻ്റെ മണ്ഡലത്തിലെ കാര്യങ്ങൾ അറിയാൻ കഴിയുന്നു എന്നതുതന്നെ. ഞാൻ കച്ചേരിപ്പടിയിലെ അഡ്രസ്സിൽ നിന്ന് തൃക്കാക്കരയിലേക്ക് സ്ഥിരതാമസം ആക്കിയപ്പോൾ, പലപല ആവശ്യങ്ങൾക്കായി അഡ്രസ്സ് പ്രൂഫ് എന്നൊരു കടമ്പ ഉണ്ടായിരുന്നു. ആധാർ കാർഡും ഡ്രൈവിങ്ങ് ലൈസൻസും അടക്കം പലതും കച്ചേരിപ്പടിയിലെ പഴയ അഡ്രസ്സിലാണ്. എന്ത് ചെയ്യണമെന്ന് ഫ്ലാറ്റ് സമച്ചയത്തിലെ ഒരു സ്യഹൃത്തിനോട് ചോദിച്ചത് മാത്രം ഓർമ്മയുണ്ട്. അടുത്ത ദിവസം മേൽപ്പടി കൗൺസിലർ ഫ്ലാറ്റിലെത്തി എൻ്റെ രേഖകൾ സംഘടിപ്പിച്ച് പോകുകയും നിശ്ചിതസമയത്തിനുള്ളിൽ ആധാർ കാർഡ് തൃക്കാക്കര അഡ്രസ്സിലേക്ക് മാറ്റിത്തരുകയും ചെയ്തു. പിന്നീട് അതിൻ്റെ ചുവട് പിടിച്ച് വോട്ട് തൃക്കാക്കരയിലേക്ക് മാറ്റാനും അദ്ദേഹം സഹായിച്ചു. ആ സമയത്താണ് അദ്ദേഹത്തിന് ഞാൻ ഫോൺ നമ്പർ കൈമാറിയത്. ഒരു കൗൺസിലറെക്കൊണ്ട് ഇത്രയെങ്കിലും ഗുണങ്ങൾ എനിക്കുണ്ടാകുന്നുണ്ടെങ്കിൽ തീർച്ചയായും ഞാൻ അയാൾക്കൊപ്പം നിൽക്കും. അയാൾ തിരഞ്ഞെടുപ്പിൽ മത്സരിക്കുന്നുണ്ടെങ്കിൽ അയാൾക്ക് വോട്ട് ചെയ്തെന്ന് വരും. ഉപതിരഞ്ഞെടുപ്പ്, പാർലമെൻ്റ് തിരഞ്ഞെടുപ്പ് അല്ലെങ്കിൽ മറ്റ് തിരഞ്ഞെടുപ്പുകൾ വരുമ്പോൾ അയാൾ നിദ്ദേശിക്കുന്ന സ്ഥാനാർത്ഥികൾ പ്രശ്നക്കാരല്ലെന്നും ഗുണം ചെയ്യാൻ പോന്നവരാണെന്നും എനിക്ക് ബോദ്ധ്യമുണ്ടെങ്കിൽ അവർക്ക് വോട്ട് ചെയ്തെന്ന് വരും.

(എനിക്ക് ബോദ്ധ്യമല്ലാത്ത ഒരു സ്ഥാനാർത്ഥിക്ക് കൗൺസിലറുടെ നിർദ്ദേശമോ സമ്മർദ്ദമോ പരിഗണിച്ച് വോട്ട് ചെയ്യുന്ന പ്രശ്നവുമില്ല. പ്രശ്നക്കാരല്ലാത്ത, അഴിമതിക്കാരനല്ലാത്ത, കേസും കൂട്ടവും കച്ചറയും ഇല്ലാത്ത, എത്ര അധികാരം കിട്ടിയാലും പോരെന്ന തരത്തിൽ ആക്രാന്തം കാണിക്കാത്ത, സൗമ്യരും കാര്യപ്രാപ്തരുമായ സ്ഥാനാർത്ഥികൾ തിരഞ്ഞെടുപ്പ് ഗോദയിലേക്ക് വരേണ്ടതിൻ്റെ ആവശ്യകത ഇവിടെയാണ്. ഉദാ:- ഈയിടെ ഒരു പാർട്ടിയിൽ നിന്ന് പുറത്താക്കപ്പെട്ട മത്സ്യത്തിന്റെ ഇരട്ടപ്പേരുള്ള നേതാവിനെപ്പോലുള്ളവർക്ക്, അവരേത് കൂട്ടത്തിൽ ചേർന്നാലും തുടർന്നാലും വോട്ട് ചെയ്യുന്ന പ്രശ്നമില്ല.)

ഇങ്ങനെയൊക്കെത്തന്നെ ആകണം കക്ഷിരാഷ്ട്രീയക്കാർ അവരവരുടെ വോട്ടുകൾ ഉറപ്പിക്കുന്നതും അവരുടെ പാർട്ടിയുടെ സീറ്റുകൾ ഉറപ്പിക്കുന്നതും. എല്ലാ പാർട്ടികളിലും ഏതെങ്കിലുമൊക്കെ തിരഞ്ഞെടുക്കപ്പെട്ട നേതാവോ അല്ലാത്ത പ്രവർത്തകരോ ഇതേ നിലയ്ക്ക് പ്രവർത്തനങ്ങൾ നടത്തുന്നുണ്ടാകാം.

പക്ഷേ, ഞാനിത് ഇപ്പോൾ പറയാൻ കാരണം, ഇന്നാട്ടിൽ ഇത് ആദ്യാനുഭവം ആയതുകൊണ്ടാണ്. ഇങ്ങനേയും വേണമെങ്കിൽ ആകാം എന്നുള്ളതുകൊണ്ടാണ്. ഇങ്ങനെ പോലും ജനപ്രതിനിധികളെക്കൊണ്ട് സേവനം ലഭിക്കാത്തവർ ഇത് വായിക്കുണ്ടെങ്കിൽ, അവരുടെ അറിവിലേക്കാണ്.

വാൽക്കഷണം:- വർഷങ്ങൾക്ക് മുൻപ് അൽപ്പകാലം ഇംഗ്ലണ്ടിൽ (പീറ്റർബറോ) കുടുംബസമേതം കഴിഞ്ഞിരുന്നപ്പോൾ, അവിടത്തെ കൗൺസിലറുടെ സന്ദേശങ്ങൾ ഇത്തരത്തിൽ വന്നിരുന്നു. ഇന്ന് വെള്ളമുണ്ടാകില്ല, പൈപ്പ് പൊട്ടി പണി നടക്കുകയാണ്, റോഡിൽ അറ്റകുറ്റപ്പണികൾ നടക്കുന്നുണ്ട്, എന്ന് തുടങ്ങി നമ്മളെ ബാധിക്കുന്ന കാര്യങ്ങളൊക്കെ അദ്ദേഹം SMS വഴി അറിയിക്കുമായിരുന്നു. എന്തെങ്കിലും പ്രശ്നങ്ങളുണ്ടെങ്കിൽ അത് SMS വഴി അറിയിച്ചാൽ അതിനദ്ദേഹം മറുപടി അയക്കുകയും, തീർപ്പുണ്ടാക്കുകയും ചെയ്യുമായിരുന്നു. എങ്കിലും, ഒരിക്കൽപ്പോലും ആ കൗൺസിലറെ ഞാൻ നേരിൽ കണ്ടിട്ടില്ല.

തമിഴ് നടൻ വിജയ്, വോട്ട് ചെയ്യാൻ സൈക്കിളിൽ പോളിങ്ങ് ബൂത്തിലേക്ക് പോയതിന്റെ രാഷ്ട്രീയം, ഓൺലൈനിൽ പല സുഹൃത്തുക്കളും ചർച്ച ചെയ്ത് കണ്ടു. അതിലൂടെ അദ്ദേഹം നൽകാൻ ശ്രമിച്ച സന്ദേശത്തെ ഞാനും അനുകൂലിക്കുന്നു. പക്ഷേ ആ സൈക്കിൾ സവാരിയിൽ മറ്റ് ചില വിയോജിപ്പുകൾ എനിക്കുണ്ട്.

മേൽപ്പറഞ്ഞ സംഭവത്തിന്റെ ചിത്രങ്ങൾ കണ്ടിരുന്നെങ്കിലും വീഡിയോ അൽപ്പം മുൻപാണ് കണ്ടത്. അത് കണ്ടിട്ടുള്ളവർക്ക് മനസ്സിലാകും എത്ര അപകടകരമായ രീതിയിലാണ് അദ്ദേഹത്തെ പൊലീസുകാരും മാദ്ധ്യപ്രവർത്തകരും ആരാധകരും അടക്കമുള്ള സംഘം പിന്തുടരുന്നതെന്ന്. അദ്ദേഹത്തിന്റെ സൈക്കിളിന് മുന്നിൽ ഒരു സ്ക്കൂട്ടറിന്റെ പിൻസീറ്റിൽ ക്യാമറയുമായി ഒരാൾ പുറം തിരിഞ്ഞിരുന്ന് രംഗങ്ങൾ പകർത്തുന്നു. ചുറ്റുമുള്ള ഇരുചക്രവാഹനങ്ങൾ കാര്യമായ അകലം പാലിക്കാതെയാണ് വിജയിനൊപ്പം കത്തിച്ച് പിടിക്കുന്നത്. സാമാന്യം നല്ല വേഗത്തിലാണ് വിജയ് സൈക്കിൾ ഓടിക്കുന്നത്.

ആ പോകുന്ന പോക്കിൽ ഏതെങ്കിലും രണ്ട് വാഹനങ്ങൾ തമ്മിൽ ഒന്നുരസിയാൽ കളി കാര്യമാകാൻ അത് മതി. അദ്ദേഹത്തിന്റെ മുന്നിൽ പോകുന്ന വാഹനങ്ങൾക്ക് അവിചാരിതമായി ബ്രേക്കിടേണ്ടി വന്നാലും അത്യാഹിതങ്ങൾ സംഭവിക്കാം. അത്രയ്ക്ക് കട്ടകുത്തിയാണ് എല്ലാവരും സഞ്ചരിച്ചുകൊണ്ടിരിക്കുന്നത്. പാരീസിലെ പാപ്പരാസികൾ, ബൈക്കിൽ ഒരു വി.വി.ഐ.പി.യുടെ കാറിനെ പിന്തുടർന്ന് ജീവഹാനി വരെയുണ്ടാക്കിയ സംഭവം ചരിത്രത്തിലെ കറുത്ത ഏടുകളിലാണ് സ്ഥാനം പിടിച്ചിട്ടുള്ളതെന്ന് ഓർമ്മ വേണം.

എന്തെങ്കിലും അപകടം പിണഞ്ഞാൽ, അതിന്റെ ആഘാതം കുറച്ചേക്കാൻ ഉപകരിക്കുന്ന ഹെൽമെറ്റ് എന്ന ശിരോകവചം വിജയ് ധരിച്ചിട്ടില്ല എന്നതാണ് ഇടയ്ക്കൊക്കെ സൈക്കിൾ ഓടിക്കുന്ന ഒരാളെന്ന നിലയ്ക്ക് എന്നെ ഏറെ അലോസരപ്പെടുത്തിയത്. അദ്ദേഹം ഹെൽമറ്റ് വെച്ച് സൈക്കിൾ ചവിട്ടിയിരുന്നെങ്കിൽ, എത്ര ചെറിയ ദൂരം സഞ്ചരിക്കുമ്പോളും ഇരുചക്രവാഹനങ്ങൾ (മോട്ടോറും അല്ലാത്തതും) ഉപയോഗിക്കുന്നവർ ഹെൽമറ്റ് വെക്കേണ്ടതിന്റെ ആവശ്യകത കൂടെ ഒരു സന്ദേശമായി മാറുമായിരുന്നു.

വിജയ്, തമിഴിലെ താരമൂല്യവും സ്വീകാര്യതയുമുള്ള ഒരു സിനിമാക്കാരൻ മാത്രമല്ല. ഭാവിയിൽ കക്ഷി രാഷ്ട്രീയത്തിലിറങ്ങുമെന്നും അടുത്ത തലമുറയുടെ മുഖ്യമന്ത്രി വരെ ആയേക്കുമെന്നും തമിഴ് മക്കൾ ഉറ്റ് നോക്കുന്ന ഒരു വി.വി.ഐ.പിയാണ്. സിനിമാ സെറ്റുകളിൽ ഇതിനേക്കാൾ അപകടം പിടിച്ച സ്റ്റണ്ട് രംഗങ്ങളിൽ വിജയിനെപ്പോലുള്ള സൂപ്പർതാരങ്ങൾ തകർത്ത് അഭിനയിച്ചിട്ടുണ്ടാകാം. പക്ഷേ അപ്പോഴൊക്കെ അപകടസാദ്ധ്യതകൾ കണക്കിലെടുത്ത് എല്ലാ മുൻ‌കരുതലുകളും അവർ കൈക്കൊള്ളാറുണ്ട് എന്ന് തന്നെയാണ് ഞാൻ വിശ്വസിക്കുന്നത്. അത്രയ്ക്ക് പോലും കരുതൽ ഈ സമയത്ത് വിജയോ അദ്ദേഹത്തിന്റെ കൂടെയുള്ളവരോ കൈക്കൊണ്ടിട്ടില്ല. കോടികൾ കിടന്ന് മറിയുന്ന സിനിമാ വ്യവസായമാണ് ഇത്തരം സൂപ്പർതാരങ്ങൾക്ക് എന്തെങ്കിലും അപകടം സംഭവിച്ചാൽ സ്തംഭിക്കുന്നെതെന്ന് എല്ലാവർക്കും അറിയുന്ന കാര്യമാണെന്നിരിക്കേ തികച്ചും അശ്രദ്ധമായ ഒരു സൈക്കിൾ യാത്രയായിരുന്നു അതെന്ന് പറയാതെ വയ്യ.

തമ്പീ വിജയ്…… തമിഴ് എഴുത തെരിയാത്. ഇത് മൊഴിമാറ്റി ആരെങ്കിലും താങ്കളിലേക്ക് എത്തിച്ച് തന്നാൽ, ഇതുപോലുള്ള സന്ദർഭങ്ങളിൽ കൂടൂതൽ കരുതൽ വേണമെന്ന ഒരഭ്യർത്ഥനയായി ഇതിനെ കണക്കാക്കണം. അതിന് പല കാരണങ്ങളുണ്ട്. തമിഴ് സിനിമാ ലോകത്തിന് താങ്കൾ വെരുമൊരു നടികർ മാത്രമല്ല. ഞങ്ങൾ മലയാളികളുടെ തീയറ്ററുകളും പലപ്പോഴും നിറഞ്ഞോടുന്നത് താങ്കളുടെ സിനിമകൾ കാരണമാണ്. താങ്കളെപ്പോലുള്ളവരുടെ ഓരോ നീക്കങ്ങളിലും ചെയ്തികളിലും അനേകം പേരുടെ അന്നം കൂടെ പേരെഴുതി ചേർത്ത് വെച്ചിട്ടുണ്ട്. അതെപ്പോഴും ഓർമ്മയിലുണ്ടാകണം. നൺ‌റി. വണക്കം.

വാന്റെ ഒരു സഹപ്രവർത്തകന് രണ്ട് ദിവസം മുൻപ് 9311527064 എന്ന നമ്പറിൽ നിന്ന് ഒരു വിളി വന്നു. റെക്കോഡ് ചെയ്ത സന്ദേശമായതുകൊണ്ടും ചോദ്യങ്ങളുടെ സ്വഭാവം കൊണ്ടും, തന്നെ അതൊരു സർവ്വേ ആണെന്ന് തുടക്കത്തിൽത്തന്നെ വ്യക്തമായിരുന്നു. ഒബ്‌ജൿറ്റീവ് ടൈപ്പ് ഉത്തരങ്ങൾ അവർ തന്നെ നിരത്തുന്നുമുണ്ട്.

ചോദ്യങ്ങൾ തുടങ്ങുന്നത് ഏതാണ് ഇപ്രകാരമാണ്. (ക്രമനമ്പറുകൾ കൃത്യമായുള്ളതല്ല).

1. നിങ്ങളുടെ ഇപ്പോഴത്തെ പ്രശ്നം കോവിഡാണോ അതോ ഒരു ജോലിയാണോ?

തുടർന്ന് അത് സർക്കാരിനെപ്പറ്റിയും ഭരണത്തിന്റെ പ്രശ്നങ്ങളെപ്പറ്റിയുമുള്ള ചോദ്യങ്ങളായി മാറുന്നു.

2. സാധാരണ ജനത്തിന്റെ പ്രശ്നങ്ങൾ എന്റെല്ലാമാണ് ?

3. ഭരണത്തിന്റെ പ്രശ്നങ്ങൾ എന്തെല്ലാമാണ് ?

4. പിണറായി വിജയൻ ഭരണം നല്ലതോ മോശമോ ?

അവിടന്നങ്ങോട്ട് ചോദ്യങ്ങളുടെ സ്വഭാവം മാറുന്നു.

5. നിങ്ങൾ അവസാനം വോട്ട് ചെയ്തത് LDF നാണോ, UDF നാണോ, BJP ക്കാണോ ?

6. നിങ്ങളുടെ ജില്ലയേതാണ് ?

സമ്മതിദാന അവകാശത്തിന് ഒരു സ്വകാര്യസ്വഭാവമുണ്ടെന്ന് നല്ല ബോദ്ധ്യമുള്ളതുകൊണ്ട് സഹപ്രവർത്തകൻ അവിടം മുതൽ സർവ്വേയെ വഴി തെറ്റിച്ചുവിടാൻ പ്രത്യേകം ശ്രദ്ധിച്ചു. വൈകാതെ ഫോൺ കട്ട് ചെയ്തുകയും ചെയ്തു. ആയതിനാൽ വില്ലേജ്, വാർഡ്, അഡ്രസ്സ് അടക്കമുള്ള കാര്യങ്ങൾ ചോദിക്കുന്നുണ്ടോ എന്ന് മനസ്സിലാക്കാനായില്ല.

വോട്ട് പിടിക്കാനായി എന്ത് തോന്ന്യാസവും ചെയ്യാൻ മടിക്കാത്ത കക്ഷിരാഷ്ട്രീയക്കാർ, ജനാധിപത്യത്തെ കശാപ്പ് ചെയ്യുന്ന ഇതിലപ്പുറമുള്ള വേലത്തരങ്ങൾ ചെയ്തില്ലെങ്കിലേ അതിശയമുള്ളൂ. അന്യസംസ്ഥാനങ്ങളിൽ നിന്നുള്ള വോട്ടർ‌മാർ സമ്മദിദാനം നിർവ്വഹിക്കാൻ കേരളത്തിൽ എത്തുമോ ഇല്ലയോ എന്ന് കൃത്യമായി അന്വേഷിച്ച് കണ്ടുപിടിച്ച്, ചെല്ലാത്തവരുടെ കള്ളവോട്ട് കുത്താനുള്ള സംവിധാനം വരെ കക്ഷിരാഷ്ട്രീയക്കാർക്കുണ്ടെന്ന് കണ്ണൂർക്കാരനായ സഹപ്രവർത്തകന് നല്ല ബോദ്ധ്യമുണ്ട്. ഈ സർവ്വേ ഉപയോഗിച്ച് അങ്ങനെയൊരു കള്ളവോട്ട് സാദ്ധ്യത പോലും നിലനിൽക്കുന്നെന്ന് അദ്ദേഹം പറയുന്നു.

ഇത്തരത്തിൽ ഫോൺ വിളികൾ നിങ്ങൾക്കാർക്കെങ്കിലും കിട്ടിയിരുന്നോ? വിളി കിട്ടിയാലും ഇല്ലെങ്കിലും ഇത് വോട്ടിന്റെ രഹസ്യസ്വഭാവം നഷ്ടപ്പെടുത്തുന്നതും വോട്ടിങ്ങ് സംബന്ധിയായ മറ്റ് തട്ടിപ്പുകൾക്കും വഴിവെക്കാൻ പോന്ന ഒരു സർവ്വേ അല്ലേ? 9311527064 എന്ന ഈ നമ്പറിന്റെ ചുവട് പിടിച്ചെങ്കിലും അന്വേഷണം ഉണ്ടാകേണ്ടതല്ലേ? അതിനായി പരാതി കൊടുക്കാൻ എന്റെ സഹപ്രവർത്തകൻ തയ്യാറാണ്. എവിടെ പരാതി കൊടുക്കണമെന്ന് അറിയുമോ? ഇലക്ഷൻ കമ്മീഷന് ഇക്കാര്യത്തിൽ എന്തെങ്കിലും ചെയ്യാനാവുമോ? ടിക്കാറാം മീനയ്ക്ക് പരാതി കൊടുക്കേണ്ടത് ഏത് വഴിക്കാണ്? വിലയേറിയ അഭിപ്രായങ്ങളും നിർദ്ദേശങ്ങളും പ്രതീക്ഷിക്കുന്നു.

വാൽക്കഷണം:- ഈ നമ്പറിലേക്ക് തിരിച്ച് വിളിച്ചു നോക്കി. Please dial the extension number എന്ന് ഇംഗ്ലീഷിലുള്ള മറുപടിയാണ് കിട്ടുന്നത്.

അപ്ഡേറ്റ്:- അനൂപ് ടെക്നോളജിസ്റ്റ് റെക്കോർഡ് ചെയ്ത ഈ സർവ്വേ കേൾക്കണമെന്നുള്ളവർ ഈ ലിങ്ക് വഴി പോകുക.

നിയമസഭാ തിരഞ്ഞെടുപ്പിൽ എറണാകുളത്ത് സീറ്റ് കിട്ടിയില്ലെങ്കിൽ, ഇത്രയും കാലം കോൺഗ്രസ്സിന്റെ ടിക്കറ്റിൽ MLA, MP, സംസ്ഥാനമന്ത്രി, കേന്ദ്രമന്ത്രി എന്നിങ്ങനെ പലതരം സ്ഥാനമാനങ്ങൾ കൈയ്യാളിയ കെ.വി.തോമസ് ഇടതുപക്ഷത്തേക്ക് പോകുമത്രേ !

കെ.വി.തോമസിന് കോൺഗ്രസ്സ് സീറ്റ് കൊടുക്കരുത്. അതിന്റെ പേരിൽ കെ.വി.തോമസ് ഇടതുപക്ഷത്തേക്ക് പോകുക തന്നെ വേണം. അങ്ങനെ ചെല്ലുന്ന കെ.വി.തോമസിനെ ഇടതുപക്ഷം പരവതാനി വിരിച്ച് പൂവിട്ട് സ്വീകരിക്കണം. (അത്തരം ചില നീക്കങ്ങളും സംസാരങ്ങളും കേട്ട് തുടങ്ങിക്കഴിഞ്ഞു.)

കക്ഷി രാഷ്ട്രീയക്കാർ അധികാരത്തിനും സ്ഥാനമാനങ്ങൾക്കും വേണ്ടി എത്ര നെറികെട്ട കളിയും കളിക്കും എന്നതിന്റെ ഏറ്റവും പുതിയ ഉദാഹരണമാണ് കെ. വി. തോമസിന്റെ ഈ ഭീഷണിയും അത് കേട്ടയുടനെ സ്വാഗതം ചെയ്ത് നിൽക്കുന്നവരും. അധികാരം പിടിച്ചടക്കാനും, നിലനിർത്താനും, പുതിയ മേച്ചിൽപ്പുറങ്ങൾ വെട്ടിപ്പിടിക്കാനും വേണ്ടി, അതുവരെ കൊട്ടിഘോഷിച്ച പ്രത്യയശാസ്ത്രവും മൂല്യങ്ങളുമെല്ലാം കാറ്റിൽപ്പറത്താൻ ഇക്കൂട്ടർക്കൊരു മടിയുമില്ല. അതല്ലാതെ ജനസേവനമൊന്നും ഇവരുടെ ചിന്തയിലെങ്ങുമില്ല. അതിന് വേണ്ടി മറുകണ്ടം ചാടുന്നതുമല്ല. ചാകുന്നത് വരെ അധികാരത്തിന്റെ ശീതളച്ഛായയിൽ വിരാജിക്കണം. അത്രേയുള്ളൂ.

ഇനിയുള്ള കാലം പ്രൊഫസർക്ക് നല്ലൊരു വിശ്രമ ജീവിതമാണ് ഇടത് വലത് കക്ഷിരാഷ്ട്രീയക്കാർ മനസ്സറിഞ്ഞ് സമ്മാനിക്കേണ്ടത്. നിങ്ങളെക്കൊണ്ടതിന് പറ്റിയില്ലെങ്കിൽ ജനങ്ങൾ തന്നെ ഏറ്റെടുത്ത് അത് ചെയ്യും; ചെയ്തിരിക്കും. ജനങ്ങളെ സേവിക്കാൻ വേണ്ടിയാണല്ലോ വാർദ്ധക്യത്തിലും പ്രൊഫസർ ഇങ്ങനെ കഷ്ടപ്പെടുന്നത്. അങ്ങനാകുമ്പോൾ പ്രൊഫസറെ ഇനിയും ബുദ്ധിമുട്ടിക്കാതിരിക്കാൻ ജനങ്ങളും ശ്രദ്ധിക്കണമല്ലോ.

വാൽക്കഷണം:- എന്തെങ്കിലുമൊന്ന് നേടിയെടുക്കാൻ നിനച്ചാൽ, ആ കളികളുടെ ഭാഗമായി റോഡ് നിറയെ ഫ്ലക്സ് ബോർഡ് നിരത്തുന്ന ആളാണ് ഫ്ലക്സിൻ്റെ ദൂഷ്യവശങ്ങൾ ബാധകമല്ലാത്ത ഈ രസതന്ത്രം പ്രൊഫസർ. അക്കാര്യത്തിലാണ് കൂടുതൽ പേടിക്കേണ്ടത്.