വാർത്ത 1:- കോളേജ് വിദ്യാര്‍ത്ഥിനികളെ പ്രലോഭിപ്പിച്ച് കൊണ്ടുപോകുമായിരുന്നു; പ്രമുഖ നടനെതിരെ മേരി ജോര്‍ജ്.
കമൻ്റ് 1:- പ്രമുഖ നടൻ്റെ പേർ പറയൂ ടീച്ചറേ.

വാർത്ത 2:- വ്യക്തിപരമായി നിന്ദിക്കുന്ന ആരോപണം, എന്റെ പേരില്‍ സര്‍ക്കാരിനെ ചെളിവാരി എറിയേണ്ടെന്ന് രഞ്ജിത്ത്.
കമൻ്റ് 2:- ഹൗ… എത്ര വലിയ പ്രശ്നങ്ങൾ നേരിടുമ്പോളും പ്രസ്ഥാനത്തോട് കാണിക്കുന്ന ആ കൂറുണ്ടല്ലോ. അത് ഇതുവരെ എഴുതിയ എല്ലാ സംഭാഷണങ്ങളേക്കാളും ഗംഭീരം.

വാർത്ത 3:- ഉടയേണ്ട വി​ഗ്രഹങ്ങൾ ഉടയണം; മോഹൻലാലിന് പ്രതികരണശേഷി നഷ്ടപ്പെട്ടു – ഷമ്മി തിലകൻ.
കമൻ്റ് 3:- ഈ വിഷയത്തിൽ കമ്പ്ലീറ്റ് ആക്ടർ പ്രതികരിക്കില്ല. നഹീന്ന് പറഞ്ഞാൽ നഹി. അതങ്ങനെയാണ്.

വാർത്ത 4:- ഹേമ കമ്മിറ്റി റിപ്പോര്‍ട്ട്: ഒരുഭാഗവും വെട്ടിയിട്ടില്ല, കേസുകള്‍ മുമ്പും എടുത്തിട്ടുണ്ട്:- MV ഗോവിന്ദൻ.
കമൻ്റ് 4:- ഏത് സ്ക്കൂളിലെ മാഷായിരുന്നെന്നാണ് പറഞ്ഞത് ?

വാർത്ത 5:- സഹകരിക്കുന്ന കൂട്ടുകാരികൾ ഉണ്ടെങ്കിൽ പരിചയപ്പെടുത്താൻ റിയാസ് ഖാൻ ആവശ്യപ്പെട്ടു-ആരോപണങ്ങളുമായി യുവനടി.
കമൻ്റ് 5:- സിനിമയിലും ജീവിതത്തിലും വില്ലനാകാൻ കഴിയുന്നതെങ്ങനെ റിയാസ് ഖാൻ ?

വാർത്ത 6:- ‘സിനിമയിൽ നല്ല അനുഭവങ്ങളല്ല ഉണ്ടായിട്ടുള്ളത്, ആളുകളെ വിശ്വസിക്കാൻ കൊള്ളില്ല‘; 32വർഷം മുൻപ് ഉഷ പറഞ്ഞു.
കമൻ്റ് 6:- അന്നും ഇന്നും ഒരു മാറ്റവുമില്ല. കൂടുതൽ വഷളായിട്ടുണ്ടെങ്കിലേ ഉള്ളൂ.

വാർത്ത 7:- ഇടതുപക്ഷ രാഷ്ട്രീയവും മനസും സ്ത്രീക്കൊപ്പം; സർക്കാർ ഇരയ്ക്കൊപ്പം, വേട്ടക്കാരനൊപ്പമല്ല- സജി ചെറിയാൻ.
കമൻ്റ് 7:- നാലു വർഷം വേട്ടക്കാർക്കൊപ്പം നിന്നിട്ടും അവരെ രക്ഷിക്കാൻ പറ്റില്ലെന്നായപ്പോൾ, ഇരയ്ക്കൊപ്പമാണെന്ന നാടകം.

വാർത്ത 8:- ആരും കതകില്‍ മുട്ടിയിട്ടില്ല, സഹകരണം ആവശ്യപ്പെട്ടിട്ടില്ല: ജോമോള്‍.
കമൻ്റ് 8:- എത്രയോ വർഷമായി സിനിമാ ക്യാമറ കണ്ടിട്ടില്ലാത്ത ഒരു നടി ഇത്രയും വലിയ വിഷയത്തിൽ പത്രസമ്മേളനം നടത്തുന്നതാണ് ഏറ്റവും വലിയ അശ്ലീലം.

വാർത്ത 9:- സിദ്ദിഖിന് പിന്നാലെ രഞ്ജിത്തും; ചലച്ചിത്ര അക്കാദമി ചെയര്‍മാന്‍ സ്ഥാനം രാജിവെച്ചു.
കമൻ്റ് 9:- ഇനിയും പല വിഗ്രഹങ്ങളും വീണുടയാനുണ്ട്.

വാർത്ത 10:- യുവ സൂപ്പർസ്റ്റാർ സെറ്റിൽവെച്ച് കടന്നുപിടിച്ചു’; ​ഗുരുതര ആരോപണവുമായി നടി സോണിയ മൽഹാർ.
കമൻ്റ് 10:- കയറിപ്പിടിക്കാത്തവരെ കാണണമെങ്കിൽ മഷിയിട്ട് നോക്കണമെന്നായിരിക്കുന്നു.

വാർത്ത 1:- ഇരട്ടിത്തുക തിരിച്ചു നൽകാമെന്ന് വാഗ്ദാനം; 30 കോടിയുടെ തട്ടിപ്പ്, വ്യവസായി സുന്ദര്‍ മേനോന്‍ അറസ്റ്റിൽ.
കമൻ്റ് 1:- പത്മശ്രീ നേടിയ ഒരാൾ ഇത്തരത്തിൽ തട്ടിപ്പ് നടത്തുന്ന ഒരു നാടായി മാറിക്കഴിഞ്ഞിരിക്കുന്നു കേരളം.

വാർത്ത 2:- ഷോറൂമിലെ ശൗചാലയത്തില്‍വെച്ച് ലൈംഗികമായി പീഡിപ്പിച്ചെന്ന് യുവതിയുടെ പരാതി; പ്രതി അറസ്റ്റില്‍.
കമൻ്റ് 2:- ബസ്സിൽ, നിരത്തിൽ, ജോലി സ്ഥലത്ത്, ആശുപത്രിയിൽ, ദേവാലയത്തിൽ എന്നിങ്ങനെ പോരാഞ്ഞ് ശൗചാലയത്തിൽ പോലും സ്ത്രീകൾ പീഡിപ്പിക്കപ്പെടുന്ന കെട്ട കാലം.

വാർത്ത 3:- ഖുശ്ബു തമിഴ്നാട് ബി.ജെ.പി. അദ്ധ്യക്ഷയാകുമെന്നു സൂചന.
കമൻ്റ് 3:- ഒരു കാലത്ത് തമിഴ്നാട്ടിൽ ദൈവമായിരുന്ന ഖുശ്ബുവിന് ഒരു പാർട്ടിയുടെ അദ്ധ്യക്ഷയാകാൻ എന്താ ബുദ്ധിമുട്ട് ?

വാർത്ത 4:- ലഹരി മാഫിയയുടെ കേന്ദ്രമായി മാറി; ഒടുവിൽ ‘പ്രേമം പാല’ത്തിന് പൂട്ട് വീണു.
കമൻ്റ് 4:- എന്തെങ്കിലും ഒന്ന് പൂട്ടിക്കുന്ന കാര്യത്തിൽ മലയാളി കഴിഞ്ഞേ ലോകത്ത് മറ്റാരുമുള്ളൂ.

വാർത്ത 5:- മാധ്യമപ്രവർത്തകനെ കാറിടിച്ചു കൊലപ്പെടുത്തിയ കേസ്: കുറ്റം നിഷേധിച്ച് ശ്രീറാം വെങ്കിട്ടരാമൻ.
കമൻ്റ് 5:- വാഹനം താനെ ഓടിപ്പോയി പത്രപ്രവർത്തകനെ കൊലപ്പെടുത്തിയതാണെന്ന് വിധി വരുന്നതിനായി കാത്തിരിക്കുന്നു.

വാർത്ത 6:- പത്ത് കോടി പുതിയ അംഗങ്ങളെ ലക്ഷ്യം വെച്ച് ബി.ജെ.പി., പുതിയ അധ്യക്ഷനേയും തിരഞ്ഞെടുത്തേക്കും.
കമൻ്റ് 6:- എന്തിന് 10 കോടിയിൽ നിർത്തണം? 100 കോടിയേയും ലക്ഷ്യം വെച്ചോളൂ.

വാർത്ത 7:- പിക്കപ്പ് കണ്ടാൽ പൊക്കും! മുൻ സൈനികനടക്കം പിക്കപ്പ് സ്‌പെഷ്യലിസ്റ്റ് മോഷ്ടാക്കളായ രണ്ടുപേർ പിടിയിൽ.
കമൻ്റ് 7:- പട്ടാള പരിശീലനം കിട്ടിയ വ്യക്തി കള്ളനാകുമ്പോൾ യുദ്ധകാലാടിസ്ഥാനത്തിൽ മോഷണം നടത്താമല്ലോ?

വാർത്ത 8:- ആഫ്രിക്കയിൽ അവഗണിച്ചു; എംപോക്സ് അടുത്ത മഹാമാരിയായേക്കും.
കമൻ്റ് 8:- മനുഷ്യരാശി ഇനിയുമെത്രയോ മഹാമാരികൾ നേരിടാനിരിക്കുന്നു!

വാർത്ത 9:- ‘പോരാട്ടം അവസാനിച്ചിട്ടില്ല, ഈ സ്‌നേഹത്തിന് എനിക്ക് കടംവീട്ടണം, ഗുസ്തിയിലേക്ക് മടങ്ങാൻ കഴിയും’- വിനേഷ് ഫോഗട്ട്.
കമൻ്റ് 9:- കടം വീട്ടണം, എതിരുനിന്ന ദേശദ്രോഹികളോട് പകരവും വീട്ടണം.

വാർത്ത 10:- ഡ്രൈവിംങ് സ്‌കൂള്‍ വാഹനങ്ങള്‍ക്ക് ഇനി മഞ്ഞനിറം; നടപ്പിലാക്കാന്‍ ഒരുമാസം സമയം.
കമൻ്റ് 10:- നിറം മാറ്റിയിട്ടെന്ത് കാര്യം? പഠിപ്പിക്കുന്ന ഡ്രൈവിങ്ങ് രീതികൾക്ക് ഒരു മാറ്റവും ഇല്ലല്ലോ ?

#വാർത്തേംകമൻ്റും

വാർത്ത 1:- RSS പരിപാടികളില്‍ പങ്കെടുക്കുന്നതിന് സർക്കാർ ജീവനക്കാർക്കുണ്ടായിരുന്ന വിലക്ക് നീക്കി കേന്ദ്രസർക്കാർ.
കമൻ്റ് 1:- ഹിന്ദുരാഷ്ട്രമാക്കാൻ അങ്ങനെ എന്തെല്ലാം വേലകൾ!

വാർത്ത 2:- ഗുജറാത്തില്‍ 12ാം ക്ലാസില്‍ തോറ്റ കുട്ടിക്ക് നീറ്റ് യു.ജിയില്‍ 705 മാര്‍ക്ക്
കമൻ്റ് 2:- നീറ്റ് പേപ്പറുകൾ ലീക്കായി എന്നതിന് ഇതിലും വലിയ തെളിവ് ആവശ്യമുണ്ടോ?

വാർത്ത 3:- പിണറായി ശൈലി മാറ്റേണ്ട ഒരു കാര്യവുമില്ല, മൂന്നാംതവണയും ഇടതുസർക്കാർ തുടരും- വെള്ളാപ്പള്ളി നടേശൻ.
കമൻ്റ് 3:- മൂന്നാം തവണയും തുടരുക തന്നെ വേണം വെള്ളാപ്പള്ളി സാറേ. എന്നാലേ ഈ വിപ്ലവഗാനം മംഗളം പാടി അവസാനിപ്പിക്കാൻ പറ്റൂ.

വാർത്ത 4:- ഓണ്‍ലൈന്‍ തട്ടിപ്പില്‍ തിരുവനന്തപുരത്ത് സൈബർ കേസുകളിൽ ഹാജരാകുന്ന അഭിഭാഷകന് നഷ്ടമായത് ഒരുകോടി രൂപ.
കമൻ്റ് 4:- കനൽക്കട്ടയിൽ ഉറുമ്പ് അരിച്ചിരിക്കുന്നു.

വാർത്ത 5:- കുണ്ടന്നൂർ മേൽപ്പാലത്തിന്റെ കൈവരിയിൽ വിള്ളൽ; മണ്ണ് പരിശോധന നടത്തി.
കമൻ്റ് 5:- പാലാരിവട്ടം പാലത്തിൻ്റെ പിൻഗാമി.

വാർത്ത 6:- ഡി.ജെ. പാർട്ടിക്ക് മയക്കുമരുന്ന്, കൊച്ചിയിൽ നാലുപേർ പിടിയിൽ; പാർട്ടിയിൽ പങ്കെടുത്തത് നൂറോളംപേർ.
കമൻ്റ് 6:- ഇതിൽ എന്തോന്നാണ് വാർത്ത?

വാർത്ത 7:- ‘മലയാളികളിൽ നിന്ന് ഇത്രയും സ്നേഹം ലഭിക്കാൻ എന്താണ് ചെയ്തതെന്ന് അറിയില്ല, മനം നിറഞ്ഞു’- രശ്മിക മന്ദാന.
കമൻ്റ് 7:- ഓ. ഞങ്ങൾക്കങ്ങളെയൊന്നും ഇല്ല. സിനിമാ നടി ആണെങ്കിൽപ്പിന്നെ സ്നേഹം വാരിക്കോരി ചൊരിയും.

വാർത്ത 8:- ഡിസാസ്റ്റര്‍ ടൂറിസം വേണ്ട; രക്ഷാപ്രവര്‍ത്തകര്‍ക്ക് തടസ്സം സൃഷ്ടിച്ചാല്‍ കര്‍ശന നടപടി- പോലീസ്.
കമൻ്റ് 8:- ഇതൊക്കെ കുറേ കേട്ടിട്ടുണ്ട്. കർശന നടപടി സ്വീകരിച്ച് കണ്ടാൽ വിശ്വസിക്കും.

വാർത്ത 9:- പ്രതികരിക്കാനുള്ള മാനസികാവസ്ഥയിലല്ല: മാധവ് ഗാഡ്ഗില്‍.
കമൻ്റ് 9:- താങ്കളുടെ മുന്നറിയിപ്പ് അവഗണിച്ചവരോട് ഇനിയെന്ത് പ്രതികരിക്കാൻ?

വാർത്ത 10:- ആരോഗ്യ പ്ലസ് ഹെല്‍ത്ത് ഇന്‍ഷുറന്‍സ് പിന്‍വലിച്ചു: പോളിസി ഉടമകള്‍ ഇനി എന്തുചെയ്യും?
കമൻ്റ് 10:- ആരോഗ്യ മൈനസ് ഹെൽത്ത് ഇൻഷൂറൻസ് എന്ന് അക്ഷരം തെട്ടാതെ വിളിക്കാം. വേറെന്ത് ചെയ്യാൻ?

വാർത്ത 1:- ദുരിതാശ്വാസ നിധിയിലേക്ക് നൽകുന്ന സഹായം സുരക്ഷിതം; കണക്കുകള്‍ നോക്കാമെന്ന് മുഖ്യമന്ത്രി.
കമൻ്റ് 1:- കഴിഞ്ഞ കണക്കുകൾ നോക്കിയപ്പോളാണല്ലോ തട്ടിപ്പുകൾ പുറത്ത് വന്നതും കേസായതും.

വാർത്ത 2:- താമരശ്ശേരി ചുരത്തിൽ വിള്ളൽ; ഭാരവാഹനങ്ങൾക്ക് നിയന്ത്രണം.
കമൻ്റ് 2:- ആ ചുരത്തിന് വല്ലതും സംഭവിച്ചാൽ കേരളക്കര ഇതിലും വലിയ ദുരിതത്തിലേക്ക് കടക്കും.

വാർത്ത 3:- പെരിയാർ കരകവിഞ്ഞു; 2019നുശേഷം ഇത്രയും ജലനിരപ്പുയരുന്നത് ആദ്യം, ആലുവ ശിവക്ഷേത്രം വെള്ളത്തിനടിയിൽ.
കമൻ്റ് 3:- 2018 ലേക്കാൾ വലിയ പ്രളയം വരുന്നുണ്ടെന്നാണോ?

വാർത്ത 4:- ചെമ്പരത്തിച്ചായ നല്ലതെന്ന് നയന്‍താര, രൂക്ഷവിമര്‍ശനവുമായി ലിവര്‍ ഡോക്ടര്‍.
കമൻ്റ് 4:- ചെമ്പരത്തിപ്പൂവ് വെക്കേണ്ടി വരുമോ എന്ന് പൊതുജനം.

വാർത്ത 5:- 55 കോടി വരെ വില വരുന്ന വാച്ചും ആനന്ദ് അംബാനി-രാധിക മെര്‍ച്ചന്റ് വിവാഹവും.
കമൻ്റ് 5:- സമയത്തിന് നല്ല വിലയുണ്ടെന്ന് മനസ്സിലായില്ലേ ?

വാർത്ത 6:- സുരക്ഷിതമല്ല പതിമൂന്ന് ജില്ലകള്‍, അപകടമുനയിലാണ് കേരളം, മുന്നിലുണ്ട് കേദാര്‍നാഥ്.
കമൻ്റ് 6:- ബാക്കിയുള്ളത് ഒരു ജില്ല മാത്രം. അത് അയൽസംസ്ഥാനത്തോട് ചേർത്താൽ കേരളം എന്ന സംസ്ഥാനം പിന്നെ ചരിത്രത്താളുകളിൽ മാത്രം.

വാർത്ത 7:- വയനാട്ടിൽ വൻഉരുൾപൊട്ടൽ; നിരവധി മരണം, വ്യാപക നാശനഷ്ടം.
കമൻ്റ് 7:- മഴക്കാലത്ത് കേരളമിങ്ങനെ ഒരു ദുരന്തഭൂമിയായി മാറാതിരിക്കട്ടെ.

വാർത്ത 8:- നിയന്ത്രണങ്ങൾ പാലിക്കാത്ത ട്രക്ക് ഉടമകൾക്ക് കനത്ത പിഴ.
കമൻ്റ് 8:- സംഭവം ദുബായിയിൽ ആയതുകൊണ്ട് പറഞ്ഞത് പോലെ നടന്നിരിക്കും. വേണമെങ്കിൽ ഇന്നാട്ടുകാർക്ക് കണ്ട് പഠിക്കാം.

വാർത്ത 9:- ‘പറഞ്ഞതിലും കൂടുതലാണ് കണക്ക്, മുണ്ടക്കൈയിലെ ഓരോ വീടും എനിക്കറിയാം, അഭയം തേടിവന്നവർ നിരവധിയാണ്’:- രക്ഷപ്പെട്ട പ്രവാസി.
കമൻ്റ് 9:- മരണക്കണക്കുകൾ കു റച്ച് പറയുക എന്നതാണ് കാലാകാലങ്ങളായുള്ള സമ്പ്രദായം. സ്ഥിരീകരിക്കാൻ സമയമെടുക്കുമെന്നതാണ് വിശദീകരണം.

വാർത്ത 10:- മനു ഭാക്കറിന്റെ പരിശീലനത്തിനായി ചെലവഴിച്ചത് 2 കോടിയോളം രൂപ; വെളിപ്പെടുത്തലുമായി കായിക മന്ത്രി……
കമൻ്റ് 10:- ഇതുപോലെ എല്ലാ കായിക താരങ്ങൾക്ക് വേണ്ടിയും ചിലവഴിച്ചാൽ എത്രയെത്ര ഒളിമ്പിക് മെഡലുകൾ ഇന്ത്യയ്ക്ക് നേടാനാകും!

വാർത്ത 1:- ‘തോൽവിക്ക് ശേഷവും ധാർഷ്ട്യം’; സിപിഐ ജില്ലാ എക്‌സിക്യുട്ടിവിൽ മുഖ്യമന്ത്രിക്ക് രൂക്ഷവിമർശനം.
കമൻ്റ് 1:- ആരൊക്കെ എത്ര വിമർശിച്ചാലും അപ്പുറത്ത് മാറ്റം ഉണ്ടാകുമെന്ന് പ്രതീക്ഷയില്ല.

വാർത്ത 2:- ഇനി തിരഞ്ഞെടുപ്പില്‍ മത്സരിക്കില്ല, സാധാരണ പ്രവര്‍ത്തകനായി തുടരും; തീരുമാനത്തിലുറച്ച് മുരളീധരന്‍.
കമൻ്റ് 2:- കോൺഗ്രസ്സിൽ മുരളിയേക്കാൾ സീനിയറായ ഒരുപാട് നേതാക്കന്മാർ ഇങ്ങനെ സ്വയം പിന്മാറിയാൽ ആ പാർട്ടി രക്ഷപ്പെട്ടെന്ന് വരും.

വാർത്ത 3:- ‘തെറ്റ് സമ്മതിക്കുന്നു’; ഇനി തിരഞ്ഞെടുപ്പ് പ്രവചനം നടത്തില്ലെന്ന് പ്രശാന്ത് കിഷോര്‍.
കമൻ്റ് 3:- പ്രവാചകന്മാർക്കിത് മോശം കാലം. ജനാധിപത്യത്തെ വിലയിരുത്തുമ്പോൾ സൂക്ഷിക്കുക.

വാർത്ത 4:- അഞ്ചുദിവസത്തിനിടെ 858 കോടിയുടെ വർധനവ്; കുതിച്ചുകയറി ചന്ദ്രബാബു നായിഡുവിന്റെ കുടുംബത്തിന്റെ സ്വത്ത്.
കമൻ്റ് 4:- ജനാധിപത്യത്തെ കുടുംബ സ്വത്തായി മാറ്റിയെടുക്കുന്ന വിധം.

വാർത്ത 5:- സീബ്രാലൈൻ മുറിച്ചുകടക്കുമ്പോൾ ബസ് ഇടിച്ചുതെറിപ്പിച്ചു; സ്കൂൾ വിദ്യാർഥിനി അത്ഭുതകരമായി രക്ഷപ്പെട്ടു.
കമൻ്റ് 5:- പോത്തിനെന്ത് ഏത്തവാഴ? കേരളത്തിലെ ബസ്സ് ഡ്രൈവർമാർക്കെന്ത് സീബ്രാ ലൈൻ?

വാർത്ത 6:- രാജ്യസഭാ തിരഞ്ഞെടുപ്പ്: ‘ത്യാഗം സഹിക്കാൻ’ സി.പി.എം.; കേരള കോൺഗ്രസിന് സീറ്റ് നൽകിയേക്കും.
കമൻ്റ് 6:- ജനങ്ങളെ സേവിക്കാൻ വേണ്ടിയാണല്ലോ ഈ ത്യാഗങ്ങൾ എന്നാലോചിക്കുമ്പോളാണ് ഒരാശ്വാസം.

വാർത്ത 7:- സ്വർണക്കടത്തുമായി ബന്ധപ്പെട്ട തർക്കം; ഗുണ്ടാസംഘങ്ങൾ തമ്മിൽ ഏറ്റുമുട്ടൽ: നാലുപേർകൂടി അറസ്റ്റിൽ.
കമൻ്റ് 7:- നിയമപരമായ ഒരു കാര്യം ചെയ്യുന്നത് പോലെയാണ് പോക്ക്.

വാർത്ത 8:- 5,700 കോടി രൂപയുടെ ആസ്തി; മൂന്നാം മോദി സര്‍ക്കാരില്‍ മന്ത്രിയാകാന്‍ ഏറ്റവും ധനികനായ എം.പി.യും.
കമൻ്റ് 8:- എല്ലാ ധനാഡ്യന്മാർക്കും ധനം ഇരട്ടിപ്പിക്കാനും സംരക്ഷിക്കാനും അധികാരം അത്യാവശ്യമാണല്ലോ?

വാർത്ത 9:- തരിമ്പെങ്കിലും മനുഷ്യത്വം ഉണ്ടെങ്കിൽ ജോയിയുടെ കുടുംബത്തിന് റെയിൽവേ നഷ്ടപരിഹാരം നൽകണം- എഎ റഹീം.
കമൻ്റ് 9:- മനുഷ്യത്ത്വത്തെപ്പറ്റി സംസാരിക്കുന്നത് യാതൊരു ദാക്ഷിണ്യവും ഇല്ലാതെ രാഷ്ട്രീയ എതിരാളികളെ കൊന്നുതള്ളുന്നവർ ആകുമ്പോൾ കേൾക്കുന്നവർക്ക് ലജ്ജയാകുന്നു.

വാർത്ത 10:- പതിനാറുകാരിയോട് ലൈംഗികാതിക്രമം, പോലീസുകാരൻ അറസ്റ്റിൽ.
കമൻ്റ് 10:- പത്ത് വർഷത്തിനപ്പു റം ഇതേ പൊലീസുകാരൻ ഉയർന്ന് പദവിയിൽ പൊലീസ് സേനയിൽത്തന്നെ തുടരുന്നത് കാണേണ്ടി വരാതിരിക്കട്ടെ.

വാർത്ത 1:- തിരുവനന്തപുരത്തുതന്നെ മത്സരിക്കും, എതിരേ മോദിയാണെങ്കിലും ഞാന്‍ ജയിക്കും- തരൂര്‍.
കമൻ്റ് 1:- തിരഞ്ഞെടുപ്പ് പ്രഖ്യാപിച്ചിട്ടുപോലും ഇല്ല. അതിന് മുന്നേ കോൺഗ്രസ്സുകാർ അവരവർക്ക് വേണ്ട സീറ്റുകൾ വിഭജിച്ചെടുത്ത് തുടങ്ങി.

വാർത്ത 2:- ‘ഒറ്റുകൊടുക്കരുത്, ഒറ്റക്കെട്ടായി നില്‍ക്കണം’; കരുവന്നൂര്‍ കേസില്‍ എം.വി ഗോവിന്ദന്റെ താക്കീത്.
കമൻ്റ് 2:- പാവപ്പെട്ട ജനങ്ങളുടെ കോടികൾ ബാങ്കിൽ നിന്ന് കൊള്ളയടിച്ചിട്ട് ഒറ്റുകൊടുക്കരുതെന്ന് പരസ്യമായി ആഹ്വാനം ചെയ്യുന്ന കൊള്ളസംഘം.

വാർത്ത 3:- ഗോവയില്‍ വിനോദയാത്രപോയി തിരിച്ചെത്തിയ ബസില്‍ 50 കുപ്പി മദ്യം; പ്രിന്‍സിപ്പലടക്കം 4 പേര്‍ അറസ്റ്റില്‍.
കമൻ്റ് 3:- പ്രിൻസിപ്പൽ തന്നെ മദ്യപാനത്തിന് വഴികാട്ടിയാകുന്ന കെട്ടകാലം.

വാർത്ത 4:- അനിലിന്റെ രാഷ്ട്രീയ സ്വപ്‌നത്തിന് ആന്റണി അവസരം നല്‍കിയില്ല.-എലിസബത്ത്.
കമൻ്റ് 4:- കു റേനാൾ കോൺഗ്രസ്സിൻ്റെ സൈബർ തലവനായി ഇരുന്നത് അവസരമല്ലേ ? ഓട് പൊളിച്ച് നൂലിൽ കെട്ടി അതിലും സ്ഥാനങ്ങളിൽ ഇരുത്തിയില്ല. അതിനാണ്.

വാർത്ത 5:- കരുവന്നൂർ ബാങ്ക്: കൊടുക്കാനുള്ളത് 320 കോടി; നട്ടംതിരിഞ്ഞ് 5400 പേർ.
കമൻ്റ് 5:- എന്നാലെന്താ സോഷ്യലിസം നടപ്പിലാക്കി നേതാക്കന്മാരെല്ലാം കോടീശ്വരന്മാർ ആയില്ലേ ?

വാർത്ത 6:- ആ മലയാളി സുന്ദരിയെ കണ്ടുപിടിച്ച് രാംഗോപാല്‍ വര്‍മ; സിനിമയില്‍ അഭിനയിക്കാനും ക്ഷണം.
കമൻ്റ് 6:- അതിന് ഇദ്ദേഹം ഇപ്പോൾ സിനിമകൾ പിടിക്കുന്നുണ്ടോ ?

വാർത്ത 7:- DYFI പ്രവര്‍ത്തകർ പോലീസ് ജീപ്പ് തകർത്തത് ഹെല്‍മറ്റില്ലാത്തതിന് പിഴയടപ്പിച്ചതിന്.
കമൻ്റ് 7:- ഭരിക്കുന്ന പാർട്ടിയുടെ ഗുണ്ടാസംഘത്തെ ഹെൽമെറ്റ് വെക്കാത്തതിന് പൊലീസ് പിടിക്കുകയോ ? കേരളം നിന്ന് കത്താത്തത് ഭാഗ്യം.

വാർത്ത 8:- ലൈഫ് വീടിന് കിട്ടിയത് 40000,അതില്‍ നിന്ന് 10000 കൈക്കൂലി വേണം: വഴിക്കടവ് വി.ഇ.ഒ. പിടിയിൽ.
കമൻ്റ് 8:- കൈക്കൂലിയിൽ മുങ്ങി നിവരുന്ന കേരളം.

വാർത്ത 9:- മുഖ്യമന്ത്രിക്കായി കാരവൻ വേണമെന്ന് എ.ഡി.ജി.പി.
കമൻ്റ് 9:- മുഖ്യമന്ത്രിക്ക് ഹെലിക്കോപ്റ്റർ, കാരവാൻ, തൊഴുത്ത്,… ഇനിയെന്താണാവോ ബാക്കി.

വാർത്ത 10:- എക്സാലോജിക്കിന് അബുദാബിയിലെ ബാങ്കിൽ അക്കൗണ്ട്, വീണയും സുനീഷും അക്കൗണ്ട് ഉടമകൾ- ഷോൺ ജോർജ്.
കമൻ്റ് 10:- സ്വിസ്സ് ബാങ്ക് അക്കൗണ്ട് വെളിപ്പെട്ടാലും നാല് തലമുറയ്ക്കുള്ളത് കട്ട് കടത്തിയവർ പാറ പോലെ ഉ റച്ച് നിൽക്കും, അവർക്ക് പിന്നിൽ അണികളും.

വാർത്ത 1:- ‘സേവന നിലവാരത്തെക്കുറിച്ച് ജനങ്ങള്‍ക്ക് പരാതി’; ഭരണസംവിധാനത്തെ വിമര്‍ശിച്ച് തോമസ് ഐസക്.
കമൻ്റ് 1:- അകത്തുള്ളവർക്ക് പോലും കാര്യങ്ങൾ ബോദ്ധ്യമായിത്തുടങ്ങി.

വാർത്ത 2:- ചാക്കിലോട്ടത്തില്‍നിന്ന് പിന്മാറി; സംസ്‌കൃത കോളജില്‍ CPM നേതാവിന്റെ മകനെ എസ്എഫ്‌ഐക്കാര്‍ മര്‍ദിച്ചു.
കമൻ്റ് 2:- മർദ്ദനം ഞങ്ങളുടെ മെയിൻ ആണ്.

വാർത്ത 3:- പേരുമാറ്റം ജി20-യില്‍; ഉച്ചകോടിയിലെ മോദിയുടെ ഇരിപ്പിടത്തില്‍ ‘ഭാരത്’.
കമൻ്റ് 3:- പേരുമാറ്റുന്നതിന് മുൻപ് കാണിക്കുന്ന ഈ കോപ്രായങ്ങൾ, അധികാരം കൈയിലുണ്ടെന്ന അഹങ്കാരം മാത്രം.

വാർത്ത 4:- ‘പി.കെ. ബിജു പറയുന്നത് കല്ലുവെച്ച നുണ’; രേഖ പുറത്തുവിട്ട് അനില്‍ അക്കര.
കമൻ്റ് 4:- അനിൽ അക്കരയും കുഴൽനാടനും കൂടെ ഇവന്മാരെ ജീവിക്കാൻ സമ്മതിക്കത്തില്ലല്ലോ.

വാർത്ത 5:- സോളാര്‍ പീഡനക്കേസ്:- ഉമ്മന്‍ചാണ്ടിയെ കുടുക്കാന്‍ ഗണേഷ് അടക്കം ഗൂഢാലോചന നടത്തിയെന്ന് CBI.
കമൻ്റ് 5:- ഉമ്മൻ ചാണ്ടി കല്ലറയിൽ കിടന്ന് ആഞ്ഞടിക്കുകയാണ്.

വാർത്ത 6:- മാസ് ആക്ഷനുമായി ‘കടകൻ’ വരുന്നു, പോസ്റ്റർ പുറത്തിറക്കി ലോകേഷ് കനകരാജും ലിജോയും.
കമൻ്റ് 6:- ജയ് ലർ, കോത്ത, RDX, ജവാൻ എന്നീ സിനിമകളിലെ ആക്ഷൻ ഏറ്റ് അവശതയായി ഇരിക്കുന്ന കാണികളുടെ കാര്യം എന്താകുമോ എന്തോ?

വാർത്ത 7:- ലോകകേരളസഭ; മുഖ്യമന്ത്രിയും മന്ത്രിമാരും സൗദിയിലേക്ക്, കേന്ദ്രത്തോട് യാത്രാനുമതി തേടി.
കമൻ്റ് 7:- കടക്കെണിയിൽ സംസ്ഥാനം പൊറുതി മുട്ടുമ്പോൾ മുണ്ട് മുറുക്കി ഉടുക്കാതെ പാൻ്റിട്ടുള്ളവിദേശ യാത്രകൾ.

വാർത്ത 8:- രൂപ റെക്കോഡ് താഴ്ചയില്‍: വിദേശ യാത്രയും വിദ്യാഭ്യാസവും ചെലവേറും, നേട്ടമാക്കാന്‍ പുതുവഴികള്‍.
കമൻ്റ് 8:- എന്തൊരു തിളക്കമാണ് ഇന്ത്യയ്ക്ക്.

വാർത്ത 9:- കരുവന്നൂരില്‍ പ്രതിരോധമില്ലാതെ CPM; തട്ടിപ്പ് തുറന്നുപറഞ്ഞ് നാലുപേര്‍.
കമൻ്റ് 9:- പദ്ധതിയിട്ട് തട്ടിപ്പ് നടത്തിയവർ എത്രകാലം പ്രതിരോധിക്കും?

വാർത്ത 10:- ഇ.ഡി.യുടെപേരിൽ കേസെടുത്തെന്ന് എം.വി. ഗോവിന്ദൻ, ഇല്ലെന്ന്‌ പോലീസ്.
കമൻ്റ് 10:- ഗോവിന്ദൻ ടീച്ചറുടെ ഓരോരോ ആഗ്രഹങ്ങളേയ്.

#വാർത്തേം_കമൻ്റും

വാർത്ത 1:- മുഖ്യമന്ത്രി ഒരു ‘പത്രപ്പുത്ര’നല്ല, ആരോപണങ്ങൾക്ക് അദ്ദേഹം മറുപടിപറയേണ്ട കാര്യമില്ല- മന്ത്രി വാസവന്‍.
കമൻ്റ് 1:- ഉവ്വേ. ആരോഗ്യമന്ത്രിയെങ്ങാനും ആളായിപ്പോയാലോ എന്ന് കരുതി കോവിഡ് കാലത്ത് മുഖ്യമന്ത്രി നടത്തിയിരുന്ന പത്രസമ്മേളനങ്ങൾ ആരും കാണാത്തതല്ലല്ലോ.

വാർത്ത 2:- ‘ഓനാരെടാ വെല്ലുവിളിക്കാന്‍’ എന്ന മറുപടിയല്ല കമ്യൂണിസ്റ്റ് പ്രസ്ഥാനത്തില്‍ നിന്ന് പ്രതീക്ഷിക്കുന്നത്. – സി. പി. ജോൺ.
കമൻ്റ് 2:- നിലവിലുള്ള കമ്മ്യൂണിസ്റ്റുകളിൽ നിന്ന് അത് മാത്രം പ്രതിക്ഷിച്ചാൽ മതി സി. പി. ജോൺ

വാർത്ത 3:- വായിൽ തോന്നുന്നത് വിളിച്ചുപറയുന്നു, വീണയെ വേട്ടയാടുന്നത് മുഖ്യമന്ത്രിയുടെ മകളായതുകൊണ്ട്- എ.കെ. ബാലൻ.
കമൻ്റ് 3:- മുഖ്യമന്ത്രി, സ്വന്തം മകളുടെ കമ്പനി വഴി കോഴയോ ദമ്പിടിയോ വാങ്ങിയാൽ അതേപ്പറ്റി കമാന്ന് മിണ്ടരുതെന്ന് ചുരുക്കം. ബാലൻ എന്നുള്ള പേര് ഉചിതം.

വാർത്ത 4:- മകൻ ഇതരമതത്തില്‍പ്പെട്ട പെണ്‍കുട്ടിയുമായി ഒളിച്ചോടി; യു.പി.യിൽ ദമ്പതിമാരെ അയല്‍ക്കാര്‍ അടിച്ചുകൊന്നു.
കമൻ്റ് 4:- ഇതാണ് ജാതി മത പേക്കൂത്തുകൾ കൊടികുത്തി വാഴുന്ന യഥാർത്ഥ ഇന്ത്യ.

വാർത്ത 5:- CPM ഓഫീസ് നിർമാണത്തിൽ നിയമലംഘനം; 3 മാസംമുമ്പ് തഹസിൽദാർ ശുപാർശ ചെയ്തിട്ടും നടപടിയെടുക്കാതെ കളക്ടർ.
കമൻ്റ് 5:- ഭരിക്കുന്ന പാർട്ടിയുടെ തോന്ന്യാസങ്ങൾക്കെതിരെ കളക്ടർ നടപടിയെടുക്കാനോ? നല്ല കഥ.

വാർത്ത 6:- ഉത്തരവിന് പുല്ലുവില; ഒറ്റ രാത്രികൊണ്ട് CPM ഓഫീസ് നിര്‍മാണം പൂര്‍ത്തിയാക്കി, രോഷമറിയിച്ച് ഹൈക്കോടതി.
കമൻ്റ് 6:- കേരളം ഇപ്പോൾ മറ്റൊരു ഉത്തര കൊറിയ ആണ്. കോടതിക്ക് പുല്ലുവിലയേ കിട്ടൂ ഏകാധിപധികൾ ഭരിക്കുമ്പോൾ.

വാർത്ത 7:- വികസന പദ്ധതികള്‍ എണ്ണിപ്പറഞ്ഞ് മുഖ്യമന്ത്രി; ഉമ്മന്‍ചാണ്ടിയെപ്പറ്റിയും മാസപ്പടി വിവാദവും മിണ്ടിയില്ല.
കമൻ്റ് 7:- സ്വന്തം മോഷണകഥകൾ വെളിപ്പെടുത്താനും സംസാരിക്കാനും എല്ലാവരും മോഷ്ടാവ് മണിയൻപിള്ള അല്ലല്ലോ?

വാർത്ത 8:- സൈബർ ആക്രമണം: അച്ചു ഉമ്മൻ പരാതി നൽകി, പിന്നാലെ മാപ്പ് പോസ്റ്റുമായി സെക്രട്ടേറിയറ്റ് മുൻ ഉദ്യോഗസ്ഥൻ.
കമൻ്റ് 8:- അത്രയ്ക്ക് ധൈര്യമേ ഉള്ളെങ്കിലും വിടുവായത്തരങ്ങൾ സമൂഹമാദ്ധ്യമങ്ങളിൽ വിളമ്പാൻ വലിയ മിടുക്കാണ്.

വാർത്ത 9:- പുതുപ്പള്ളിയില്‍ ഓണക്കിറ്റ് നല്‍കാം, രാഷ്ട്രീയ മുതലെടുപ്പ് പാടില്ല- തിരഞ്ഞെടുപ്പ് കമ്മിഷന്‍.
കമൻ്റ് 9:- അങ്ങനെ പറഞ്ഞാലെങ്ങനാ കോടതീ? കിറ്റ് കൊടുത്ത് മുതലെടുത്ത് വോട്ടാക്കി ജയിക്കുന്നതാണ് ഞങ്ങളുടെ മെയിൻ.

വാർത്ത 10:- പിന്നെങ്ങനെയാണ് സർ പുതുതലമുറ കൃഷിയിലേക്ക് വരിക; മന്ത്രിമാരെ വേദിയിലിരുത്തി വിമർശനവുമായി ജയസൂര്യ.
കമൻ്റ് 10:- ജയസൂര്യയുടെ കായൽത്തീരത്തുള്ള വീട് ഒന്നൂടെ അളക്കാൻ സമയമായി.

#വാർത്തേം_കമൻ്റും

വാർത്ത 1:- ഉന്നാവ് അതിജീവിതയുടെ വീടിന് തീയിട്ടു; രണ്ടുകുഞ്ഞുങ്ങൾ ഗുരുതരാവസ്ഥയിൽ.
കമൻ്റ് 1:- ജാമ്യത്തിലിറങ്ങിയ പ്രതികൾ വാദിയുടെ വീടിന് തീയിടുമ്പോൾ നിയമവാഴ്ച്ച നിലംപരിശാകുന്നു.

വാർത്ത 2:- ഐ.എന്‍.എക്സ്. കള്ളപ്പണക്കേസ്; കാര്‍ത്തി ചിദംബരത്തിന്റെ സ്വത്ത് ഇ.ഡി കണ്ടുകെട്ടി.
കമൻ്റ് 2:- ഓ. അതൊന്നും സാരമില്ല. ഇതിൻ്റെ പതിന്മടങ്ങ് ബിനാമി സമ്പാദ്യം ഉണ്ടാകും.

വാർത്ത 3:- ചോദിച്ചപ്പോൾ ഫോൺ കൊടുത്തില്ല; ഭർത്താവിനെ ഭാര്യ കത്രികകൊണ്ട് കുത്തി.
കമൻ്റ് 3:- കത്രികയേക്കാളും അപകടകാരിയായ ഉപകരണമായി മാറിയിരിക്കുന്നു ഫോൺ.

വാർത്ത 4:- ട്വിറ്റര്‍ ലെഗസി ബ്ലൂ ടിക്കുകള്‍ ഇന്ന് മുതല്‍ നീക്കം ചെയ്യും; പണം നല്‍കിയാല്‍ മാത്രം വെരിഫിക്കേഷന്‍.
കമൻ്റ് 4:- പണം മുടക്കി നീലടിക്ക് വേണ്ടെന്ന് പ്രൊഫൈൽ ഉടമകൾ തീരുമാനിച്ചാൽ തീരും ഈ ആക്രാന്തം.

വാർത്ത 5:- വോട്ടര്‍മാര്‍ക്ക് പണം വിതരണം; കര്‍ണാടകയില്‍ ബി.ജെ.പി. പ്രവര്‍ത്തകരെ പിന്തുടര്‍ന്ന് പിടികൂടി കളക്ടര്‍.
കമൻ്റ് 5:- പണം നൽകി വോട്ട് വാങ്ങൽ അന്നാട്ടിൽ പുത്തരിയൊന്നുമല്ല. ഇങ്ങനെ പിടികൂടാൻ തുടങ്ങിയാൽ UPI വഴി പണം കൈമാറാൻ തുടങ്ങും. അത്രേയുള്ളൂ.

വാർത്ത 6:- ഇമ്രാന്‍ ഖാന്റെ അറസ്റ്റിൽ പാകിസ്താനിൽ കലാപം; സൈനിക ആസ്ഥാനത്തേക്ക് ഇരച്ചുകയറി ജനക്കൂട്ടം.
കമൻ്റ് 6:- ഒരു രാജ്യം നാശത്തിൽ നിന്ന് നാശത്തിലേക്ക്….

വാർത്ത 7:- ഷാനവാസിന് അനുകൂലമായി പോലീസ് റിപ്പോര്‍ട്ട്; കരുനാഗപ്പള്ളി ലഹരിക്കടത്ത് കേസ് അട്ടിമറിയിലേക്ക്.
കമൻ്റ് 7:- എൻ്റെ പാർട്ടി ഭരിക്കുമ്പോൾ എനിക്കെതിരെ നടപടിയോ, അസംഭവ്യം.

വാർത്ത 8:- നാടിന്റെ കണ്ണിലുണ്ണിയായ പി.കെ. കുഞ്ഞനന്തനെ ഭീകരവാദിയായി അവതരിപ്പിച്ചു- എം.വി. ഗോവിന്ദന്‍.
കമൻ്റ് 8:- കൊലപാതകിയെ വെളുപ്പിച്ചെടുത്ത് പുണ്യാളനാക്കുന്ന പരിപാടി തുടങ്ങിക്കഴിഞ്ഞു.

വാർത്ത 9:- ചന്ദ്രയാന്‍ 3 നാളെ കുതിക്കും; മിനിയേച്ചര്‍ മോഡലുമായി തിരുപ്പതി ക്ഷേത്ര ദര്‍ശനം നടത്തി ശാസ്ത്രജ്ഞര്‍.
കമൻ്റ് 9:- ശാസ്ത്രജ്ഞരാണ് പോലും!

വാർത്ത 10:- ഹിമാചലില്‍ മേഘവിസ്‌ഫോടനം: ക്ഷേത്രം തകര്‍ന്നുവീണു, രണ്ട് വീടുകള്‍ ഒഴുകിപ്പോയി, 16 മരണം.
കമൻ്റ് 10:- ദൈവം ജീവനും കൊണ്ട് ഓടി രക്ഷപ്പെട്ടു.

#വാർത്തേം_കമൻ്റും

വാർത്ത 1:- കരമടക്കാന്‍ ചെന്ന വീട്ടമ്മക്ക് നഗരസഭാ അധികൃതരുടെ പരിഹാസവും അവഗണനയും.
കമൻ്റ് 1:- പരിഹസിച്ച് വാങ്ങുന്ന ഈ കരം കൊണ്ട് വേണം സംസ്ഥാനം മുന്നോട്ട് നീക്കാൻ.

വാർത്ത 2:- കൊന്ന് നുറുക്കി പെട്ടിയിലാക്കി; രണ്ട് പതിറ്റാണ്ടിനിപ്പുറവും കാണാമറയത്ത് കഴിയുന്ന കൊടുംകുറ്റവാളി ഡോ: ഓമന.
കമൻ്റ് 2:- മറ്റൊരു സുകുമാരക്കുറുപ്പ്.

വാർത്ത 3:- മാതൃഭൂമി കേരളത്തിന്റെ എല്ലാ ജീവിതമണ്ഡലങ്ങളിലും വ്യാപരിച്ച മാധ്യമം- പ്രൊഫ. വി. മധുസൂദനന്‍ നായര്‍.
കമൻ്റ് 3:- ശരിയാണ് മലയാളം കണ്ട ഏറ്റവും വലിയ കോപ്പിയടിക്കാരനായ കാരൂർ സോമനൊപ്പം നിന്ന് കോപ്പിയടിച്ച പുസ്തകം വരെ അച്ചടിച്ചിറക്കിയിട്ടുണ്ട് മാതൃഭൂമി.

വാർത്ത 4:- ഓരോ വോട്ടിനും 6,000 രൂപവെച്ച് തരും’; കര്‍ണാടകയില്‍ വോട്ടിന് പണം വാഗ്ദാനം ചെയ്ത് BJP നേതാവ്.
കമൻ്റ് 4:- ജനാധിപത്യം പണാധിപത്യമായി അധപതിച്ചിരിക്കുന്നു.

വാർത്ത 5:- ഇന്ധനച്ചെലവ് ലാഭിക്കാന്‍ യൂണിറ്റുകള്‍ താല്‍കാലികമായി അടച്ചു: പാകിസ്താനില്‍ വൈദ്യുത ബന്ധം താറുമാറായി.
കമൻ്റ് 5:- രാജ്യപുരോഗതിക്ക് പകരം തീവ്രവാദം മാത്രം പ്രോത്സാഹിപ്പിച്ച് വളമിട്ട് വെള്ളമൊഴിച്ച് ഒരു രാജ്യം തകർന്നടിയുന്ന കാഴ്ച്ച.

വാർത്ത 6:- 30 വര്‍ഷം മുമ്പ് 100 രൂപ കൈക്കൂലി വാങ്ങിയ കേസ്‌; 82-കാരനായ റിട്ട. റെയില്‍വേ ജീവനക്കാരന് തടവുശിക്ഷ.
കമൻ്റ് 6:- ശിക്ഷ നൽകിയതിൽ സന്തോഷം, പക്ഷേ നീതിന്യായ വ്യവസ്ഥ അതിന് 30 വർഷമെടുത്തു എന്നത് മറ്റൊരു വലിയ കുറ്റമാണ്.

വാർത്ത 7:- തോക്കുകളും, 1,35,040 രൂപയും കണ്ടെത്തി; നഗരമധ്യത്തില്‍ റിട്ട.SIയുടെ നേതൃത്വത്തില്‍ ചൂതാട്ടം.
കമൻ്റ് 7:- പൊലീസിലെ റിട്ടയർ ആയ ക്രിമിനലുകളെയെങ്കിലും നിലയ്ക്ക് നിർത്തിക്കൂടെ ?

വാർത്ത 8:- കോടികളുടെ തിരിമറി, പാര്‍ട്ടിയറിയാതെ 35 നിയമനങ്ങള്‍, വ്യാജരേഖ; പി.കെ ശശിക്കെതിരായ തെളിവുകള്‍ പുറത്ത്‌.
കമൻ്റ് 8:- എന്തൊക്കെ തെളിവ് വന്നാലും ശശി പിന്നേം അകത്ത് തന്നെ കാണും. ശശിയെ പുറത്താക്കിയാൽപ്പിന്നെ പാർട്ടി ഇല്ല.

വാർത്ത 9:- താൻ തിരിച്ചെത്തിയാൽ ഇന്ത്യയിൽ കോവിഡ് ഇല്ലാതാകുമെന്ന് നിത്യാനന്ദ.
കമൻ്റ് 9:- വേണ്ട. വരണ്ട. ഞങ്ങൾ കോവിഡ് സഹിച്ചോളാം.

വാർത്ത 10:- ‘പെണ്‍കുട്ടികള്‍ ഷര്‍ട്ടും പാന്റുമിട്ട് ആണ്‍കുട്ടികളാണെന്ന് ധരിപ്പിച്ച് സമരത്തിനിറങ്ങുന്നു’ -ഇ.പി. ജയരാജൻ.
കമൻ്റ് 10:- ഞങ്ങൾടെ പാർട്ടിയിലെ പെൺകുട്ടികളാണെങ്കിൽ ഏത് വേഷമിട്ട് സമരം ചെയ്താലും അതാണ് സമരം.