ഇന്നലെ മാദ്ധ്യമങ്ങളിലും നവമാദ്ധ്യമങ്ങളിലും നിറഞ്ഞു നിന്നത് മുഖ്യമന്ത്രി ശ്രീ. വി.ഡി.സതീശന്റെ ചുണ്ട് കടിച്ചുള്ള ചിരി ആയിരുന്നു. ചിരിക്കുകയും തോളിൽ കൈയിടുകയും കെട്ടിപ്പിടിക്കുകയും ചെയ്യുന്ന ഒരു മുഖ്യമന്ത്രിയെ കിട്ടിയതിലുള്ള സന്തോഷം നല്ലൊരു വിഭാഗം ജനങ്ങളെപ്പോലെ എനിക്കുമുണ്ട്.

ഇനി വിഷയത്തിലേക്ക് കടക്കാം.

വാഹനങ്ങളിൽ അപകടകരമല്ലാത്ത രീതിയിൽ മാറ്റങ്ങൾ വരുത്താൻ അനുവദിക്കുമെന്ന് ഇലക്ഷന് മുന്നേ തന്നെ ശ്രീ.വി.ഡി. സതീശൻ പറഞ്ഞിരുന്നു. അത് ഒരുപാട് ചെറുപ്പക്കാരുടെ വോട്ടുകൾ കിട്ടാൻ സഹായിച്ചിട്ടുണ്ടാകാം. വണ്ടിഭ്രാന്തന്മാരായ ചെറുപ്പക്കാർ അവരുടെ വാഹനങ്ങളിൽ മാറ്റങ്ങൾ വരുത്തുന്നത് ചില്ലറയൊന്നുമല്ല. പക്ഷേ അത്തരം മാറ്റങ്ങൾ മോട്ടോർ വെഹിക്കിൾ ഡിപ്പാർട്ട്മെന്റ്(MVD) കണ്ടാൽ ഫൈൻ അടിക്കാനും തുടർനടപടികൾക്കും വകുപ്പുള്ളതാണ്. ‘വാഹനങ്ങളിലെ അപകടകരമല്ലാത്ത മാറ്റങ്ങൾ അനുവദിക്കും’ എന്നാണ് മുഖ്യമന്ത്രി V D Satheesan പറഞ്ഞിരുന്നത്. പഴയ ഗതാഗത വകുപ്പ് മന്ത്രി ഗണേശൻ അപ്പോൾത്തന്നെ ഈ പ്രസ്താവനയ്ക്ക് എതിരെ വന്നിരുന്നു.

നമുക്ക് ഇതിന്റെ വസ്തുകൾ ഒന്ന് പരിശോധിച്ചാലോ?

അതിന് മുൻപ് ഒരു കാര്യം സൂചിപ്പിക്കട്ടെ. വാഹനം ഷോറൂമിൽ നിന്ന് വാങ്ങിയപടി ഉപയോഗിക്കുന്ന ശീലമാണ് സാധാരണ നിലയ്ക്ക് എനിക്കുള്ളത്. വിശ്വാസി അല്ലാത്തതുകൊണ്ട് ഡാഷ്ബോർഡിൽ ദൈവങ്ങളുടെ കുഞ്ഞ് പ്രതിമയോ ഫോട്ടോ പോലും കാണില്ല എന്റെ വാഹനത്തിൽ. പക്ഷേ കഴിഞ്ഞ 3 വർഷത്തിലേറെയായി ഇന്ത്യ മുഴുവൻ വിശദമായി ചുറ്റിക്കാണണം എന്നുള്ള ആഗ്രഹം നടപ്പിലാക്കാൻ, ഒരു മോട്ടോർ ഹോം അഥവാ കാരവാൻ സജ്ജമാക്കേണ്ടി വന്നു. വാഹനത്തിൽ (Bolero XL) അടുക്കളയും കിടക്കയും ശൗചാലയവും വാട്ടർ ടാങ്കും അടക്കമുള്ള സൗകര്യങ്ങൾ ഘടിപ്പിക്കേണ്ടി വന്നു. MVD പിടികൂടിയാൽ ഫൈന് പുറമേ വാഹനം കണ്ടുകെട്ടാൻ വരെ വകുപ്പുള്ള കുറ്റങ്ങളാണ് അത്. പക്ഷേ നമ്മുടെ നാട്ടിൽ കമ്പനി നിർമ്മിതമായ ചെറിയ കാരവാനുകൾ അല്ലെങ്കിൽ ക്യാമ്പർവാനുകൾ ലഭ്യമല്ലാത്തതുകൊണ്ടും സ്വന്തം വാഹനത്തിൽ മാറ്റങ്ങൾ വരുത്തി അത്തരത്തിൽ ഒന്ന് ഉണ്ടാക്കാൻ നിയമം അനുവദിക്കാത്തത് കൊണ്ടും, കാര്യം നടക്കണമെങ്കിൽ നിയമം ലംഘിക്കേണ്ടതായി വന്നു. പിടിക്കപ്പെട്ടാൽ മറുത്ത് ഒരക്ഷരം പറയാതെ നിയമത്തിന് കീഴടങ്ങാം എന്നുള്ള തീരുമാനത്തോടെയാണ് അങ്ങനെ ചെയ്തത്. അപ്പോൾ പോലും അപകടകരമായ രീതിയിലുള്ള മാറ്റങ്ങൾ ഒന്നും വാഹനത്തിൽ വരുത്തിയിരുന്നില്ല. പുറമേ നിന്ന് കണ്ടാൽ ഇത്രയും മാറ്റങ്ങൾ വരുത്തിയ വാഹനമാണെന്ന് മനസ്സിലാക്കാനും പറ്റുമായിരുന്നില്ല. അതിന്റെ ചിത്രങ്ങളും വീഡിയോകളും ധാരാളമായി ഞാൻ സോഷ്യൽ മീഡിയയിൽ പങ്കിട്ടിട്ടുള്ളതാണ്. https://www.facebook.com/share/v/1ChJ2mxDos/

രാജ്യത്ത് ഇപ്പോഴും മോട്ടോർ ഹോം അഥവാ കാരവൻ സംസ്കാരം ഇല്ലാത്തത്, മോട്ടോർ വാഹന വകുപ്പ്, ജാംബവാന്റെ കാലത്തെ മനോനില പിന്തുടരുന്നത് കൊണ്ടാണ് എന്നാണ് എന്റെ വിലയിരുത്തൽ. കാറ് പോലുള്ള LMV-യിൽ കാരവാനുകൾക്കായി മാറ്റം വരുത്താനേ പാടില്ല എന്നാണ് നിയമം. ടെമ്പോ മുതൽ മുകളിലേക്കുള്ള വലിയ വാഹനങ്ങളിൽ നിലവിലുള്ള നിബന്ധനകൾക്ക് അനുസരിച്ച് മാറ്റങ്ങൾ വരുത്തുകയും ആവാം. എൻജിനിലോ ചാസിയിലോ (chassis) മാറ്റം വരുത്താൻ പാടില്ല എന്ന് നിയമമുണ്ട്. എന്നുവെച്ചാൽ ബോഡിയിലും ഉള്ളിലും അത്യാവശ്യം മാറ്റങ്ങൾ ആവാം.

മുൻഗതാഗത വകുപ്പ് മന്ത്രി ഗണേശൻ പറഞ്ഞത് വസ്തുതയാണ്. വാഹന സംബന്ധിയായ ഈ നിയമങ്ങൾ കേന്ദ്രത്തിൽ നിന്നുള്ളതാണ്. കേരളത്തിന് അതിൽ മാറ്റങ്ങൾ വരുത്താൻ ആവില്ല. കേരളത്തിൻ്റെ എന്നല്ല ഒരു സംസ്ഥാന മുഖ്യമന്ത്രിക്കും അതിന് കഴിയില്ല. കേന്ദ്രം തീരുമാനിച്ച് മാറ്റം വരുത്തി നടപ്പിലാക്കേണ്ട നിയമമാണ് അത്.

എന്നിട്ടും ശ്രീ.വി.ഡി.സതീശൻ Chief Minister VDS എന്തുകൊണ്ട് ഈ വാഗ്ദാനം മുന്നോട്ട് വെച്ചു? അതാണ് വിശകലനം ചെയ്യാൻ ഉദ്ദേശിക്കുന്നത്.

മുകളിൽ ഞാൻ സൂചിപ്പിച്ച എന്റെ മോട്ടോർ ഹോമുമായി ഇന്ത്യയിലെ പല സംസ്ഥാനങ്ങളിലും ചുറ്റിയടിച്ചപ്പോൾ ഉണ്ടായ അനുഭവങ്ങളുടെ വെളിച്ചത്തിൽ ഇത് വിശദീകരിക്കാനും അപഗ്രഥിക്കാനും ശ്രമിക്കാം.

2024-ൽ രാജസ്ഥാനിലെ ജയ്സാൽമേറിൽ വെച്ച്, നോ പാർക്കിങിൽ എന്റെ മോട്ടോർ ഹോം വാഹനം ഇട്ടതിന് ലോക്കൽ പൊലീസ് എനിക്ക് ഫൈൻ ചീട്ട് എഴുതാൻ തുടങ്ങി. സത്യത്തിൽ, നോ പാർക്കിംഗ് ബോർഡ് ഇല്ലാത്ത ചെറിയ ഒരു മൈതാനം ആയിരുന്നു അത്. ഇക്കാര്യം സൂചിപ്പിച്ച് ഞാൻ തർക്കം തുടങ്ങി.

“ഇത് നോ പാർക്കിങ്ങ് ആണെന്ന് ഇവിടെ എല്ലാവർക്കും അറിയുന്ന കാര്യമാണ് “…. എന്നായിരുന്നു പൊലീസിൻ്റെ മറുപടി.

“കേരളത്തിൽ നിന്നും ഇത്തരത്തിൽ ഒരു മോട്ടോർഹോമിൽ യാത്ര ചെയ്ത് വരുന്ന ഞാൻ, ബോർഡ് ഇല്ലെങ്കിൽ എങ്ങനെയാണ് ഇത് നോ പാർക്കിംഗ് ആണെന്ന് അറിയുക?”

പൊലീസുകാർ വീണ്ടും എൻ്റെ വാഹനത്തിനടുത്തേക്ക് വന്ന് അതിനെ വിശദമായി പരിശോധിച്ചു. മോട്ടോർ ഹോം സൗകര്യങ്ങൾ കണ്ട് ആശ്ചര്യം പ്രകടിപ്പിച്ചു. അതിന്റെ പടങ്ങൾ എടുത്ത് വീട്ടിലുള്ള വണ്ടിഭ്രാന്തന്മാർ മക്കൾക്കും മറ്റ് സുഹൃത്തുക്കൾക്കും അയച്ചു കൊടുത്തു. ശേഷം, എന്റെ ഫൈൻ റദ്ദാക്കി, യാത്രയുടെ വിശദാംശങ്ങൾ ചോദിച്ചറിഞ്ഞ് എന്നെ പോകാൻ അനുവദിച്ചു.

പറഞ്ഞുവന്നത്…. രാജസ്ഥാൻ പൊലീസുകാർക്ക് വേണമെങ്കിൽ, വാഹനത്തിൽ മോഡിഫിക്കേഷൻ നടത്തിയെന്ന് പറഞ്ഞ് ഫൈൻ അടിച്ചേൽപ്പിക്കാമായിരുന്നു. നിയമത്തിലുള്ള അജ്ഞത കൊണ്ടാണോ അതോ എന്നെപ്പോലൊരു സഞ്ചാരിയോട് കാണിച്ച അനുകമ്പ കൊണ്ടാണോ അങ്ങനെയൊരു നടപടി ഉണ്ടായില്ല. MVD ചെയ്യേണ്ട ജോലി പൊലീസുകാർ ചെയ്യേണ്ട എന്ന് തീരുമാനിച്ചതാകാനും മതി. അതെന്തായാലും തൽക്കാലം ഞാൻ രക്ഷപ്പെട്ടു.

തികച്ചും വ്യത്യസ്തമായ ഒരനുഭവം ഹരിയാനയിൽ വെച്ചും ഉണ്ടായി. അപ്പോൾ ഞാൻ ഓടിച്ചിരുന്നത് മേൽപ്പറഞ്ഞ അതേ കാരവൻ തന്നെ. ആ സമയത്ത്, ഹരിയാനയിലുള്ള മലയാളി സുഹൃത്ത് ബ്രിട്ടോയും Britto Zacharias വാഹനത്തിൽ ഉണ്ടായിരുന്നു. ഇപ്രാവശ്യം പൊലീസ് പിടിച്ചത് 10 വർഷത്തിൽ അധികം പഴക്കമുള്ള വാഹനം ഓടിച്ചതിനാണ്. നാഷണൽ ക്യാപ്പിറ്റൽ റീജിയണിൽ (NCR), അത്രയും പഴക്കമുള്ള വാഹനങ്ങൾ നിരോധിച്ചിട്ടുണ്ട്. ഡൽഹിയും പരിസരപ്രദേശങ്ങളും ആണ് NCR എന്ന് എനിക്കറിയാമായിരുന്നു എങ്കിലും ഹരിയാനയിലെ ഗുഡ്ഗാവിൽ ഈ പ്രശ്നം ഉണ്ടെന്ന് അറിയില്ലായിരുന്നു.

₹25000 ഫൈനിന് പുറമേ വാഹനം കണ്ടുകെട്ടുമെന്നും പൊലീസുകാർ പറഞ്ഞു. അപ്പോൾപ്പോലും വാഹനത്തിലെ മോഡിഫിക്കേഷൻ്റെ പേരിൽ ഒരു പ്രശ്നവും അവർ ഉന്നയിച്ചില്ല. രാജസ്ഥാൻ പൊലീസിനെപ്പറ്റിയുള്ള മേൽപ്പറഞ്ഞ എന്റെ നിഗമനങ്ങൾ പോലെ തന്നെ ആയിരിക്കാം ഹരിയാന പോലീസിന്റെ കാര്യത്തിലും ഉണ്ടായത്. കാര്യമായ പരുക്കില്ലാതെ അവിടന്നും ഞാൻ തടിയൂരി. (ഇത് വിശദമായി തന്നെ മുൻപ് എഴുതിയിരുന്നു.)

മടക്കയാത്രയിൽ പനാജി കഴിഞ്ഞതും ഗോവൻ പോലീസ് പൊക്കി. അമിതവേഗം ആയിരുന്നു കാരണം പറഞ്ഞത്. പക്ഷേ അവരുടെ ക്യാമറ വിശദമായി പരിശോധിച്ചപ്പോൾ അമിതവേഗത്തിൽ കടന്നുപോയത് മറ്റൊരു കാറുകാരൻ ആയിരുന്നു. ഞാൻ വേഗ പരിധി തെറ്റിച്ചിട്ടില്ലായിരുന്നു. പക്ഷേ അതിനിടയ്ക്ക് പൊലീസുകാരൻ എന്റെ വാഹനത്തിനുള്ളിലെ മാറ്റങ്ങൾ ശ്രദ്ധിച്ചു.

” ഇതെല്ലാം നിയമവിരുദ്ധമാണ്. ഇതിന് വേറെ ഫൈൻ ഉണ്ട്. “ എന്നായി പൊലീസുകാരൻ.

“സഞ്ചാരിയാണ്. നിരക്ഷരനാണ്. ഒരു ഗതിയും പരഗതിയും ഇല്ലാത്തവനാണ്.”…. എന്നൊക്കെ ഞാൻ പ്രാരാബ്ദ്ധങ്ങളുടെ ഭാണ്ഡം തുറന്നു.

സത്യത്തിൽ ഗോവൻ പൊലീസിന് ഫൈൻ അടിക്കാമായിരുന്നു. അങ്ങേർക്ക് നിയമം അറിയാമെന്ന് വ്യക്തം. പക്ഷേ…

“ഇതെല്ലാം MVD-യുടെ ജോലിയാണ്. മാത്രമല്ല താങ്കളുടെ യാത്ര അലോസരപ്പെടുത്താൻ ഞാൻ ആഗ്രഹിക്കുന്നില്ല.”… എന്ന് പറഞ്ഞ് പൊലീസുകാരൻ ദയ കാണിച്ചു. നന്ദി പറഞ്ഞ് ഞാൻ സ്കൂട്ടായി.

ഈ അനുഭവങ്ങളിൽ നിന്ന് ഞാൻ മനസ്സിലാക്കുന്നത്, നിയമം കേന്ദ്രത്തിന്റേത് ആണെങ്കിലും, അത് നടപ്പിലാക്കേണ്ടത് അതാത് സംസ്ഥാനങ്ങളാണ്. ഏത് തരത്തിലുള്ള മോഡിഫിക്കേഷനുകൾ വരെ അനുവദിക്കാം അല്ലെങ്കിൽ കണ്ണടയ്ക്കാം എന്ന വിവേചന അധികാരം അല്ലെങ്കിൽ ഔദാര്യം സംസ്ഥാന സർക്കാരിനുണ്ട്. അതുതന്നെ ആകും തന്റെ പ്രസ്താവനയിലൂടെ ശ്രീ.വി.ഡി.സതീശൻ ഉദ്ദേശിച്ചതും.

അപകടകരമായ മാറ്റങ്ങൾ വരുത്തിയിട്ടുള്ള വാഹനങ്ങൾ പിടികൂടും. അതായത്……

1. പുറത്തേക്ക് ചാടി നിൽക്കുന്ന ടയറുകളോ വാഹനഭാഗങ്ങളോ ഉള്ള വാഹനങ്ങൾ.

2. ചാസികളിലും എൻജിനിലും മാറ്റം വരുത്തിയിട്ടുള്ള വാഹനങ്ങൾ.

3. കാതടപ്പിക്കുന്ന ശബ്ദമുള്ള എക്ട്രാ ഹോണുകൾ പിടിപ്പിച്ച വാഹനങ്ങൾ.

4. സൈലൻസറിൽ മാറ്റം വരുത്തി വായു മലിനീകരണം ഉണ്ടാക്കുന്ന വാഹനങ്ങൾ.

5. മോഡിഫിക്കേഷൻ കാരണം റോഡിലുള്ള മറ്റ് വാഹനങ്ങൾക്കോ കാൽനടക്കാർക്കോ അപകടങ്ങൾ ഉണ്ടാക്കാൻ പോന്ന തരത്തിലുള്ള വാഹനങ്ങൾ.

എന്നിങ്ങനെയുള്ള വാഹനങ്ങൾ നിരത്തിൽ അനുവദിച്ചെന്ന് വരില്ല. അല്ലാതെയുള്ള വാഹനങ്ങളെ ഒഴിവാക്കിയെന്ന് വരാം. ഇത്തരത്തിൽ സർക്കാർ തീരുമാനിച്ച് കണ്ണടയ്ക്കേണ്ട വാഹനങ്ങൾ ഒഴിവാക്കി വിടാൻ MVD-ക്ക് നിർദ്ദേശം നൽകിയാൽ, മുഖ്യമന്ത്രി കണ്ണിറുക്കി കാണിച്ച ആ വാഗ്ദാനം സുഖസുന്ദരമായി നടപ്പിലാക്കാനാവും. കേന്ദ്രത്തിൽ നിന്ന് ആരും വന്ന് ചോദ്യം ചെയ്യാൻ പോകുന്നില്ല. അഥവാ അങ്ങനെയൊരു ചോദ്യം ചെയ്യൽ ഉണ്ടായാൽ കേരളത്തിന് പുറത്തുള്ള സംസ്ഥാനങ്ങളിലെ നല്ലൊരു ശതമാനം വാഹനങ്ങൾ നിരത്തിലിറക്കാൻ പറ്റില്ല. മറ്റ് സംസ്ഥാനങ്ങളിൽ മോഡിഫിക്കേഷൻ്റെ അയ്യര് കളിയാണ്. വാളയാറിന് പുറത്തേക്ക് വാഹനം ഓടിച്ചിട്ടുള്ളവർക്ക് അത് കൃത്യമായി ബോദ്ധ്യമുള്ള കാര്യമായിരിക്കും.

(മുകളിലെ 5 ഇനങ്ങൾ ഞാൻ ഊഹിക്കുന്നത് മാത്രമാണ്. MVD-യ്ക്ക് അതിൽ കൂടുതലും ലിസ്റ്റിൽ ചേർക്കാം. കാരണം ഇത് സർക്കാരിന്റെ ഒരു വരുമാന മാർഗ്ഗം കൂടെയാണ്.)

ചെറുപ്പക്കാർക്ക് മുഖ്യമന്ത്രി നൽകിയ വാഗ്ദാനം ഇത്തരത്തിലാണ് നടപ്പിലാക്കാൻ പോകുന്നത് എന്നാണ് ഞാൻ ഊഹിക്കുന്നത്. ഷഷ്ടിപൂർത്തിയുടെ വക്കത്ത് എത്തിനിൽക്കുന്ന എനിക്കും മുഖ്യമന്ത്രിയുടെ ഈ വാഗ്ദാനം ഏറെ ആശ്വാസം നൽകുന്നുണ്ട്. കാരണം, ഹരിയാന പോലീസ് പിടികൂടിയ വാഹനം മൈസൂരിൽ കൊണ്ടുചെന്ന് സ്ക്രാപ്പ് ചെയ്ത് കളഞ്ഞെങ്കിലും അതിനുശേഷം വാങ്ങിയ വാഹനത്തിൻ്റെ ഉള്ളിലും കിടക്കാനും പാചകം ചെയ്യാനുമുള്ള സൗകര്യങ്ങൾ ഒരുക്കി തന്നെയാണ് ഞാൻ യാത്ര തുടർന്നത്. ഇനിയങ്ങോട്ടുള്ള രണ്ടോ മൂന്നോ വർഷങ്ങളിലും, ഇതുപോലുള്ള മാറ്റങ്ങൾ വാഹനത്തിൽ വരുത്തിയാൽ മാത്രമേ Great Indian Expedition എന്ന എന്റെ ഇന്ത്യൻ യാത്രകൾ തുടരാനും പൂർത്തിയാക്കാനും കഴിയൂ.

ആയതിനാൽ, ഇന്നലെ മുഖ്യമന്ത്രി കണ്ണിറുക്കി ചിരിച്ചത് എന്റെ കൂടെ പ്രതീക്ഷകൾക്ക് നേരെയാണ് എന്നുള്ളതിൽ സംശയമില്ല. എത്തരത്തിലുള്ള മാറ്റങ്ങൾ വരെ അനുവദിക്കും, അപകടകരമായ ഏതെല്ലാം മാറ്റങ്ങൾ അനുവദിക്കില്ല എന്ന കൃത്യമായ നിബന്ധനയോടെ മോട്ടോർ വാഹന വകുപ്പിലേക്ക് മുഖ്യമന്ത്രിയുടെ നിർദ്ദേശം ഉണ്ടാകും എന്ന് പ്രതീക്ഷയോടെ ഞാനും കാത്തിരിക്കുന്നു.

ഇനി അഥവാ ഈ പ്രതീക്ഷ ആസ്ഥാനത്തായാലും, എനിക്ക് യാത്ര തുടരാതിരിക്കാൻ ആവില്ല. അതിനായി ചില്ലറ മാറ്റങ്ങൾ വാഹനത്തിൽ വരുത്തിയേ പറ്റൂ. മാറ്റങ്ങൾ വരുത്തിയ വാഹനം പിന്നെ ഞാൻ കേരളം കാണിക്കില്ല. കേരളത്തിന് പുറത്ത് ഈ നിയമങ്ങളൊക്കെ എത്തരത്തിലാണ് പരിപാലിക്കപ്പെടുന്നതെന്ന് മുകളിലെ ഉദാഹരണങ്ങളിൽ നിന്ന് വ്യക്തമാണല്ലോ. അത്രേയുള്ളൂ കാര്യം.

നിയമലംഘനം അല്പം പോലും ആഗ്രഹിക്കുന്നില്ല. പക്ഷേ കാലത്തിനനുസരിച്ച് നിയമങ്ങൾ മാറിയില്ലെങ്കിൽ, ഒഒരാൾ മണ്ണടിഞ്ഞ് പോകുന്നതിന് മുൻപ് മറ്റാർക്കും ഉപദ്രവമില്ലാതെ ചെയ്യാൻ ആഗ്രഹിക്കുന്ന കാര്യങ്ങൾ എങ്ങനെ നടപ്പിലാക്കുമെന്നാണ്?

വാൽക്കഷണം:- ചെറു വാഹനങ്ങളിലും കാര്യമായ മാറ്റങ്ങൾ വരുത്താനുള്ള നിയമങ്ങൾ കേന്ദ്രത്തിന്റെ ഭാഗത്തു നിന്ന് കൊണ്ടുവരണമെന്ന് അഭ്യർത്ഥിച്ച്, കേന്ദ്ര ഗതാഗത വകുപ്പ് മന്ത്രിക്ക് ഒരു കത്ത് എഴുതി തുടങ്ങിയിട്ട് കുറച്ചുനാളായി. മടിയും നിരക്ഷരത്വവുമാണ് ആ കത്ത് പൂർത്തിയാക്കുന്നതിൽ നിന്ന് പിന്നോട്ടടിപ്പിക്കുന്നത്. കേരളത്തിലെ വണ്ടി ഭ്രാന്തന്മാർ എല്ലാവരും കൂട്ടത്തോടെ അത്തരത്തിലുള്ള കത്തുകൾ കേന്ദ്രത്തിലേക്ക് അയച്ച് കാലഘട്ടത്തിന് അനുയോജ്യമായ നിയമ മാറ്റങ്ങൾ ഉണ്ടാകണമെന്ന് അഭ്യർത്ഥിക്കാൻ വൈകിയിരിക്കുന്നു. കാരവൻ പോലുള്ള സംവിധാനങ്ങൾ വന്നാൽ ഇന്ത്യയുടെ സഞ്ചാര ഭൂപടത്തിന് തന്നെയാണ് മാറ്റം ഉണ്ടാകാൻ പോകുന്നത്. ആഡംബര കാറുകളിൽ സഞ്ചരിക്കുന്ന മന്ത്രിമാർക്ക് അത് സ്വയം മനസ്സിലാകണമെന്നില്ല. നമ്മൾ പറഞ്ഞ് ബോദ്ധ്യപ്പെടുത്തി കൊടുക്കേണ്ടി വരും.

* വരുമാനത്തിൽ കവിഞ്ഞ സ്വത്ത് സമ്പാദനം.

* സ്വന്തം ശമ്പള വർദ്ധനവ് സ്വയം തീരുമാനിച്ച് എഴുതിയെടുക്കൽ.

* മുട്ടിൽ മരംമുറിക്കാർക്ക് വേണ്ട എല്ലാ ഒത്താശകളും ചെയ്ത് കൊടുക്കൽ.

എന്നിങ്ങനെയുള്ള എണ്ണിയാൽ ഒടുങ്ങാത്ത അഴിമതികൾക്കും തട്ടിപ്പുകൾക്കും നിയമം ലംഘിച്ചുള്ള അഴിഞ്ഞാടലിനും ശേഷം കേരളത്തിന്റെ ചീഫ് സെക്രട്ടറി, വിരമിക്കുകയാണ്.  മൂന്ന് മാസത്തിന് ശേഷം പെൻഷൻ പറ്റാനുള്ള വ്യക്തി ഇപ്പോൾത്തന്നെ മുൻകൂറായി പെൻഷൻ കടലാസ്സുകൾ എല്ലാം ശരിയാക്കിയിരിക്കുന്നു!

ധാരാളം ആരോപണങ്ങളും പരാതികളും ഇദ്ദേഹത്തിനെതിരെ ഉണ്ടായിരുന്നിട്ടും അതിലൊന്നും അന്വേഷണം നടത്താതെ പിണാറായി സർക്കാർ ഇദ്ദേഹത്തെ സംരക്ഷിച്ച് പോരുകയും തട്ടും തടവുമില്ലാതെ വിരമിച്ച് പെൻഷൻ പറ്റാനുള്ള വഴികൾ തുറന്നിട്ട് കൊടുക്കുകയും ചെയ്തിരിക്കുന്നു.

ഒരു സംസ്ഥാനത്തിലെ ഏറ്റവും ഉന്നതനായ സർക്കാർ ഉദ്യോഗസ്ഥനാണ് ആ പദവിയുടെ അന്തസത്ത കളയുന്ന രീതിയിലുള്ള പ്രവൃത്തികൾ ചെയ്തുകൂട്ടിയിരിക്കുന്നത്. ‘കൊല്ലുന്ന രാജാവിന് തിന്നുന്ന മന്ത്രി’ എന്ന് കേട്ടിട്ടില്ലേ? പിണറായി വിജയൻ്റെ തണലിൽ ജയ്തിലക് നടപ്പിലാക്കിയിരിക്കുന്നത് അത്തരം കാര്യങ്ങളാണ്.

ഡോ ബി.അശോക് IAS, എൻ. പ്രശാന്ത് എന്നിവർ ഇതുവരെ സമൂഹമാദ്ധ്യമങ്ങളിലൂടെ ജയ്തിലകിന് എതിരെ പറഞ്ഞതെല്ലാം ചേർത്തുവെച്ച് വേണം ഈ അഴിമതിക്കാരനെ കൂടുതലായി മനസ്സിലാക്കാനും വിലയിരുത്താനും. ഇത്തരം കാര്യങ്ങൾ തുറന്ന് പറഞ്ഞതുകൊണ്ട് തന്നെ ഈ രണ്ട് IASകാരും ഇപ്പോഴും സസ്പെൻഷനിലാണ്. കള്ളൻ അകത്തും കള്ളത്തരം ചൂണ്ടിക്കാട്ടിയവർ പുറത്തും! എന്തൊരു വിരോധാഭാസം ആണിത്.

പുതിയ സർക്കാർ അധികാരത്തിലേറിയാൽ ഉടനെ ചീഫ് സെക്രട്ടറി ജയ് തിലകിനെതിരെ അന്വേഷണം ഉണ്ടാകണം. അദ്ദേഹത്തിന്റെ പെൻഷൻ കടലാസ്സുകൾ ശരിവെച്ച പിണറായി സർക്കാറിൻ്റെ ഉത്തരവ് റദ്ദാക്കണം. പണി മുഴുവൻ ചെയ്ത് തീർത്തിട്ട് മതി പെൻഷൻ പറ്റൽ.

ഇദ്ദേഹം ചെയ്തു വെച്ചിട്ടുള്ള എല്ലാ കള്ളത്തരങ്ങൾക്കുമുള്ള ശിക്ഷ കൊടുക്കണം. ചീഫ് സെക്രട്ടറിയുടെ സ്ഥാനത്തിരുന്ന് മേലിൽ ഒരാളും ഇത്തരം കള്ളത്തരങ്ങൾ ചെയ്യാൻ പാടില്ലാത്തവിധം മാതൃകാപരമായ ശിക്ഷ ജയ്തിലകിന് ലഭിക്കണം. സർക്കാർ ഖജനാവിൽ ഇദ്ദേഹം ഉണ്ടാക്കിയിട്ടുള്ള നഷ്ടങ്ങളെല്ലാം ഇയാളുടെ സ്വത്തു വകകൾ കണ്ടുകെട്ടി ഈടാക്കണം.

ചീഫ് സക്രട്ടറി ജയ്തിലകിൻ്റെ അഴിമതികളും കള്ളത്തരങ്ങളും മഞ്ഞുമലയുടെ ഒരറ്റം മാത്രമാണ്. അതിൽ നിന്ന് തുടങ്ങിയാൽ കേരളത്തിൽ കഴിഞ്ഞ 10 വർഷം നടന്ന എല്ലാ അഴിമതികളും പകൽക്കൊള്ളകളും ഒന്നൊന്നായി വെളിയിൽ വരും.

വാൽക്കഷണം:- ശബരിമല സ്വർണ്ണക്കൊള്ള കേസിൽ പത്മകുമാർ പറഞ്ഞ ‘ദൈവതുല്യനായ ആൾ’ ആരാണെന്ന് അറിയാനും കേരള ജനതയ്ക്ക് താല്പര്യമുണ്ട്. ആ കേസിലും അന്വേഷണം ഊർജ്ജിതമാക്കണം.

കേരളത്തിൻ്റെ നിയുക്ത മുഖ്യമന്ത്രി ശ്രീ.വി.ഡി. സതീശന് അഭിനന്ദനങ്ങൾ!!

11 ദിവസം വൈകിയെങ്കിലും, തലങ്ങും വിലങ്ങും ചർച്ചകൾ നടത്തി, ഉചിതമായ തീരുമാനം തന്നെയാണ് AICC എടുത്തിരിക്കുന്നതെന്നാണ് ഞാൻ വിശ്വസിക്കുന്നത്.

ഉചിതം എന്ന് പറയാനുള്ള കാരണങ്ങൾ ഇപ്രകാരമാണ്.

കാരണം 1:- ജനങ്ങൾ ജയിപ്പിച്ച് വിടാത്ത ഒരാളേയും നൂലിൽ കെടിയിറക്കി മുഖ്യമന്ത്രി ആക്കിയില്ല. (അങ്ങനെയും ഉണ്ടായിട്ടുള്ള സംസ്ഥാനമാണ് കേരളം. ഉദാ:- 1996ലെ മുഖ്യമന്ത്രി നായനാർ)

കാരണം 2:- സീനിയോരിറ്റി അല്ല, പണിയെടുത്തത് ആരെന്നതാണ് മുഖ്യമന്ത്രി ആകാനുള്ള മാനദണ്ഡം. ഞാൻ ഉദ്ദേശിച്ച സീനിയർക്ക് ഇതിന് മുൻപ് അവസരം കിട്ടിയിട്ടുണ്ട്.

കാരണം 3:- രാജസ്ഥാനും മദ്ധ്യപ്രദേശും അടക്കമുള്ള മറ്റ് സംസ്ഥാനങ്ങളിൽ പറ്റിപ്പോയ തെറ്റ് AICC ആവർത്തിച്ചില്ല.

കാരണം 4:- കോൺഗ്രസ്സ് MLA മാരുടെ മാത്രമല്ല, ഘടക കക്ഷികളുടേയും പ്രവർത്തകരുടേയും സാധാരണ സമ്മതിദായകരുടേയും കോൺഗ്രസ്സ് അല്ലാത്ത ജനങ്ങളുടേയും ആഗ്രഹവും ഇഷ്ടവും താൽപ്പര്യവും മനസ്സിലാക്കി തീരുമാനമെടുത്തു.

തീരുമാനം അൽപ്പം വൈകി എന്ന് വേണമെങ്കിൽ പറയാമെങ്കിലും കേരളത്തിൽ ഇതിന് മുൻപും ഇതിൽക്കൂടുതൽ വൈകിയ മുഖ്യമന്ത്രി തീരുമാനം ഉണ്ടായിട്ടുണ്ടെന്ന് കണക്കുകൾ നോക്കിയാൽ മനസ്സിലാക്കാം. (ലിങ്ക് https://www.facebook.com/share/v/1GGLVrX3dk/ ) ആ കണക്കുകൾ ജനം മറന്നത് പോലെ തന്നെ ഈ കാലതാമസവും വൈകാതെ ജനം മറക്കും.

ഇതുവരെ ശുഭകരം എന്ന് ആശ്വസിച്ചാലും ശ്രീ. വി. ഡി. സതീശനെ കാത്തിരിക്കുന്നത് വലിയ വെല്ലുവിളികളാണ്.

വെല്ലുവിളി 1:- മുഖ്യമന്ത്രി പദം കിട്ടാതെ പോയവരുടേയും അവരുടെ അഭ്യുദയകാംക്ഷികളുടേയും തൊഴുത്തിൽക്കുത്തും കുതികാൽവെട്ടലും നിസ്സഹകരണവും.

വെല്ലുവിളി 2:- കാലിയായ,…. സതീശൻ്റെ ഭാഷയിൽ പറഞ്ഞാൽ പൂച്ച പെറ്റ് കിടക്കുന്ന ഖജനാവ് വെച്ച് സംസ്ഥാനത്തെ മുന്നോട്ട് നയിക്കുക എന്ന വെല്ലുവിളി.

വെല്ലുവിളി 3:- തെരഞ്ഞെടുപ്പ് വാഗ്ദാനങ്ങൾ പാലിക്കുക എന്നതിന് പുറമേ കേരളത്തിൽ കൊണ്ടുവരുമെന്ന് പറഞ്ഞ സമഗ്രമായ മാറ്റങ്ങളും പദ്ധതികളും നടത്തിയെടൂക്കണമെന്ന വെല്ലുവിളി.

വെല്ലുവിളി 4:- ജനാധിപത്യത്തിനും മുകളിലാണ് തങ്ങളെന്ന് കരുതുന്ന രണ്ട് വൃത്തികെട്ട സമുദായ നേതാക്കന്മാർ വലിയ വെല്ലുവിളി ഇതുവരെ ഉയർത്തിയതെങ്കിലും അതെല്ലാം ഭംഗിയായി നേരിടാൻ VDSന് കഴിഞ്ഞു. എന്നിരുന്നാലും നേരും നെറിയും ഇല്ലാത്ത ആ രണ്ട് പുംഗവന്മാർ കുത്തിത്തിരുപ്പുകൾ തുടർന്നുകൊണ്ടിരിക്കും. അതിന് അർഹമായ അവഗണനയും ശ്രദ്ധയും കൊടുത്ത് മുന്നേറേണ്ടി വരും.

വെല്ലുവിളി 5:- കഴിഞ്ഞ 10 വർഷമായി നിർത്തി വെച്ചിരിക്കുന്ന ഹർത്താലുകളും സമരങ്ങളും പൊതുമുതൽ നശിപ്പിക്കലും, പൂർവ്വകാല പ്രാബല്യത്തിൽ പുറത്തെടുക്കാൻ തയ്യാറായിരിക്കുന്ന പ്രതിപക്ഷത്തെ കൈകാര്യം ചെയ്യുക എന്ന വെല്ലുവിളി.

ഇത്രയുമോ ഇതിനപ്പുറമോ ഉള്ള വെല്ലുവിളികൾ നേരിട്ട്, കഴിഞ്ഞ രണ്ട് വർഷത്തിനകമെങ്കിലും പ്രതീക്ഷയുടെ പുതുനാളം നീട്ടാൻ സതീശന് കഴിഞ്ഞാൽ അദ്ദേഹത്തിൻ്റെ തേരോട്ടം തടയാൻ ബുദ്ധിമുട്ടാകുന്ന കാലം വരും.

കാര്യങ്ങൾ പറഞ്ഞത് പോലെ നടത്തിയെടുക്കാൻ അദ്ദേഹത്തിന് കഴിഞ്ഞില്ലെങ്കിൽ, 100 സീറ്റ് മറ്റേതെങ്കിലും ഒരു മുന്നണിക്കോ പാർട്ടിക്കോ നൽകി 2031ൽ ഭരണം സതീശൻ്റെ കൈയിൽ നിന്ന് ഒഴിവാക്കാൻ പോന്നവരാണ് കേരള ജനത എന്ന് ഈ തെരഞ്ഞെടുപ്പ് തെളിയിച്ചതാണ്. അത് ഓരോ നിമിഷവും ഓർമ്മയുണ്ടായാൽ നന്ന്. എന്നെപ്പോലുള്ള ഒരുപാട് പേർ പ്രതിപക്ഷത്ത് തന്നെയാണ് തുടരുക.

എന്തായാലും ഇന്ന് മുതൽ മുഖ്യമന്ത്രി ഇല്ലാത്തവനേ / ഇല്ലാത്തവളേ എന്ന് വിളിച്ച് ആരും മലയാളികളെ അധിക്ഷേപിക്കില്ല എന്ന തമാശ കൂടെ പങ്കിട്ട് ഈ കുറിപ്പ് ചുരുക്കുന്നു.

ശ്രീ.വി.ഡി. സതീശന് V D Satheesan ഒരിക്കൽക്കൂടെ അഭിനന്ദനങ്ങൾ !!
നല്ലൊരു ഭരണം കാഴ്ച്ച വെക്കാൻ അദ്ദേഹത്തിന് കഴിയുമാറാകട്ടെ എന്ന് ആശംസിക്കുന്നു!!

വാൽക്കഷണം:- ജനാധിപത്യം സമ്പൂർണ്ണമായി കൊടിനാട്ടിയ ഒരു പൊതുതെരഞ്ഞെടുപ്പും മുഖ്യമന്ത്രി തെരഞ്ഞെടുപ്പും ആയിരുന്നു ഇപ്രാവശ്യത്തേത് എന്നത് സന്തോഷമുള്ള കാര്യം തന്നെ.

#CMKerala
#cmkerala2026
#VDSatheesan

UDFൽ മുഖ്യമന്ത്രി പദവിക്ക് വേണ്ടി നടക്കുന്ന തർക്കങ്ങൾ, ജനാധിപത്യത്തിന്റെ ഭാഗമാണെന്ന് കരുതുന്ന ആളാണ് ഞാൻ. അങ്ങനെ പറയാനും തർക്കിക്കാനും പോന്ന ഉൾപ്പാർട്ടി ജനാധിപത്യമാണ് UDFന്റെ പ്രത്യേകത. പാർട്ടി നേതാക്കൾ പറയുന്ന കാര്യങ്ങൾ റാൻ മൂളി കേട്ട്, എതിർപ്പ് ഉള്ളിലൊതുക്കി അനുസരിക്കുമ്പോൾ ജനാധിപത്യം പിൻബഞ്ചിലാണെന്നും ഞാൻ വിശ്വസിക്കുന്നു. ആയതിനാൽ അവർ തർക്കിച്ച് തീരുമാനിക്കട്ടെ. തീരുമാനം അധികം വൈകരുതെന്ന് മാത്രം.

MLAമാരെ തെരഞ്ഞെടുത്ത് കഴിഞ്ഞാൽ പൊതുജനത്തിന് പിന്നീട് ഒരു അഭിപ്രായം പറയാനുള്ള ഇടമില്ലായിരുന്നു കുറച്ചുനാൾ മുൻപ് വരെ. നമ്മൾ തെരഞ്ഞെടുത്ത MLAമാർ വേണം അവിടന്നങ്ങോട്ടുള്ള മറ്റ് കാര്യങ്ങൾ തീരുമാനിക്കാൻ. പക്ഷേ ഇന്നങ്ങനെയല്ല അവസ്ഥ. പൊതുജനത്തിന് പറയാനുള്ളത് അവതരിപ്പിക്കാൻ സമൂഹമാധ്യമങ്ങൾ ഉണ്ട്. അതിലൂടെ ജനത്തിന്റെ പൾസ് എന്താണെന്ന് നേതാക്കന്മാർക്ക് കൃത്യമായും പിടികിട്ടും. ആ ഒരു മാദ്ധ്യമവും അവസരവും ഉപയോഗിച്ചാണ് ഞാനിത് പറയുന്നത്.

ജനങ്ങൾ MLA പദവി നൽകാത്ത ഒരാൾ മുഖ്യമന്ത്രിയായി വരുന്നതിനോട് എനിക്ക് യോജിക്കാനാവില്ല. ഭരണഘടനയിൽ എഴുതി വച്ചിരിക്കുന്ന അത്തരം ഒരു ഭോഷ്ക്ക് നീക്കം ചെയ്യണമെന്ന അഭിപ്രായക്കാരനും കൂടിയാണ് ഞാൻ.

ആയതിനാൽ, നിലവിൽ കേരള സംസ്ഥാനത്തിലെ ഒരു MLA അല്ലാത്ത കെ. സി. വേണുഗോപാൽ മുഖ്യമന്ത്രി ആകാൻ പാടില്ല. 102 സീറ്റ് എന്ന സർവ്വകാല റെക്കോർഡ് സമ്മാനിച്ച ജനങ്ങളോട് കാണിക്കുന്ന നീതികേടായിരിക്കും കെ. സി. വേണുഗോപാൽ എന്ന മുഖ്യമന്ത്രി.

MPമാരെ നിയമസഭാ തിരഞ്ഞെടുപ്പിൽ മത്സരിപ്പിക്കേണ്ട എന്ന കർശന തീരുമാനം എടുത്ത കോൺഗ്രസ് പാർട്ടി വേണുഗോപാലിന്റെ കാര്യത്തിൽ എന്തിന് ഇളവ് കാണിക്കണം? ഇവിടെ മുഖ്യമന്ത്രി ആകാൻ പ്രാപ്തരായവർ ഇല്ലയെന്നുണ്ടോ? ഇപ്പറഞ്ഞ നിരവധി കാരണങ്ങളാൽ, കെ.സി. വേണുഗോപാലിനെ മുഖ്യമന്ത്രി ആയി അംഗീകരിക്കാൻ ആവില്ല.

അഥവാ കെ.സി.വേണുഗോപാൽ മുഖ്യമന്ത്രിയായി അവതരിച്ചാൽ, രണ്ട് ഉപതെരഞ്ഞെടുപ്പുകളുടെ അധികഭാരമാണ് ജനങ്ങളുടെ മേൽ വന്ന് ചേരുന്നത്. നിങ്ങൾക്ക് ഇങ്ങനെ അധികാര രാഷ്ട്രീയം കളിച്ച് പാഴാക്കാനുള്ളതല്ല ഞങ്ങളുടെ നികുതിപ്പണം.

കെ. സി. വേണുഗോപാൽ മുഖ്യമന്ത്രി ആയാൽ, തെരഞ്ഞെടുപ്പിൽ അദ്ദേഹത്തെ തോൽപ്പിക്കും എന്ന് കോൺഗ്രസ്സ് പ്രവർത്തകരും അനുയായികളും ഇതിനകം തന്നെ പറഞ്ഞു കഴിഞ്ഞിട്ടുണ്ട്. കണ്ണ് തുറന്ന് സോഷ്യൽ മീഡിയയിലൂടെ കടന്നുപോയാൽ അത് മനസ്സിലാക്കാം. കെ. സി. ഏത് മണ്ഡലത്തിൽ മത്സരിച്ചാലും, എനിക്കവിടെ പരിചയമുള്ള 10 പേരോട് സംസാരിച്ച് അയാൾക്കെതിരെ വോട്ട് ശേഖരണം ഞാനും നടത്തും. നേതൃത്വം ഇതെല്ലാം കാണുന്നുണ്ടെങ്കിൽ കോൺഗ്രസിന് കൊള്ളാം.

ഇനി മറ്റ് രണ്ട് മുഖ്യമന്ത്രി സ്ഥാനാർത്ഥികളിലേക്ക് വരാം.

അവശേഷിക്കുന്ന രണ്ട് പേരിൽ സീനിയർ സ്ഥാനാർത്ഥി രമേശ് ചെന്നിത്തല തന്നെ ആണ്. പക്ഷേ അദ്ദേഹത്തിന് ഒരു ചാൻസ് ഉണ്ടായിരുന്നല്ലോ. പതിനാലാം അസംബ്ലിയിൽ അദ്ദേഹം പ്രതിപക്ഷ നേതാവായി പ്രവർത്തിച്ചതല്ലേ? അതിന് തൊട്ടടുത്ത വന്ന തെരഞ്ഞെടുപ്പിൽ പാർട്ടിയെ വിജയിപ്പിച്ച് മുഖ്യമന്ത്രി ആകാമായിരുന്നല്ലോ. അത് നടന്നില്ല. പിന്നീട് അദ്ദേഹത്തിന് പ്രതിപക്ഷ നേതാവിൻ്റെ സ്ഥാനം കിട്ടിയതുമില്ല. പ്രതിപക്ഷ നേതാവായി പ്രവർത്തിച്ച് പാർട്ടിയെ അധികാരത്തിലേക്ക് കൊണ്ടുവരാൻ വിയർപ്പൊഴുക്കിയ വി.ഡി. സതീശനെ മാറ്റി നിർത്തി രമേശ് ചെന്നിത്തലയെ മുഖ്യമന്ത്രി ആക്കുന്നത് ധാർമികമായി ശരിയല്ല. സീനിയോറിറ്റി ആണ് വിഷയമെങ്കിൽ ചെന്നിത്തലയെ തന്നെ പ്രതിപക്ഷ നേതാവായി വാഴിക്കാമായിരുന്നില്ലേ?

ചുരുക്കത്തിൽ പറഞ്ഞാൽ മുഖ്യമന്ത്രി ആകണമെന്ന് ഞാൻ ആഗ്രഹിക്കുന്നത് വി.ഡി.സതീശൻ തന്നെയാണ്. അതിപ്പോൾ അദ്ദേഹത്തിന് എന്തൊക്കെ കുറവുകളും കുറ്റങ്ങളും ഉണ്ടെന്ന് പറഞ്ഞാലും, അതേ പോരായ്മകളോടെ തന്നെയാണ് ജനം അദ്ദേഹത്തേയും മുന്നണിയേയും പാർട്ടിയേയും ജയിപ്പിച്ചിരിക്കുന്നത്. ആ വിയർപ്പിന്റെ പങ്ക് മറ്റുള്ളവർ പറ്റുന്നത് നീതികേടാണ്. നൂറിലധികം സീറ്റിൽ UDF ജയിച്ചു വന്നില്ലെങ്കിൽ, അതിന്റെ ഉത്തരവാദിത്വം ഏറ്റെടുത്ത് രാഷ്ട്രീയ വനവാസത്തിന് പോകുമെന്ന് പറഞ്ഞത് പ്രതിപക്ഷ നേതാവ് സതീശനാണ്, ചെന്നിത്തലയല്ല.

തെരഞ്ഞെടുപ്പ് കാലത്ത് വി.ഡി. സതീശൻ പല സിദ്ധാന്തങ്ങളും മുന്നോട്ട് വെച്ചിരുന്നു. കാലിയായ ഖജനാവ് നിറക്കുന്നത് മുതൽ, കേരളത്തിന്റെ സമൂലവും സമഗ്രവുമായ പരിവർത്തനത്തിന് ഉതകുന്ന തരത്തിലുള്ള കരടുകൾ തയ്യാറാക്കിയിട്ടുണ്ടെന്ന് സമർത്ഥിക്കുകയും അതിന്റെ ചില സൂചനകൾ നൽകുകയും ചെയ്തിരുന്നു. അതെല്ലാം എത്തരത്തിൽ നടത്തിയെടുക്കാൻ അദ്ദേഹത്തിന് ആകുമെന്ന് കൂടെയാണ് ജനം ആകാംഷയോടെ കാത്തിരിക്കുന്നത്. ആ അവസരം തല്ലിക്കെടുത്തരുത്. ചെന്നിത്തല വന്നാൽ ആ പദ്ധതികൾ നടപ്പിലാകും എന്ന് ഞാൻ കരുതുന്നില്ല. ചെന്നിത്തല, പരമ്പരാഗത കോൺഗ്രസ് രീതിയിലുള്ള ഒരു ഭരണവുമായി മുന്നോട്ടു പോകും. പ്രത്യേക പദ്ധതികളൊന്നും അദ്ദേഹം വിഭാവനം ചെയ്തിട്ടുമില്ല പറഞ്ഞിട്ടുമില്ല.

ലളിതമായി പറഞ്ഞാൽ വി.ഡി. സതീശൻ അല്ലാതെ മറ്റാര് മുഖ്യമന്ത്രി ആയാലും അത് 102 സീറ്റിന്റെ ഉന്നത വിജയം സമ്മാനിച്ച പൊതുജനത്തിനോടുള്ള കൊഞ്ഞനംകുത്തൽ ആയിരിക്കും.

കോൺഗ്രസ്‌ ഹൈക്കമാഡിനേക്കാളും മുകളിൽ കമാൻഡിങ് പവർ ഉള്ളവരാണ് ഇവിടത്തെ ജനങ്ങൾ എന്ന് ഈ തെരഞ്ഞെടുപ്പിലൂടെയെങ്കിലും മനസ്സിലാക്കിയിട്ടില്ലെങ്കിൽ ജനം അത് കൃത്യമായി മനസ്സിലാക്കി തരുക തന്നെ ചെയ്യും. ജനങ്ങൾ ആ സൂപ്പർ ഹൈക്കമാൻഡിങ്ങ് അധികാരം വീണ്ടും പുറത്തെടുക്കും. അത് കെ.സി വേണുഗോപാലിന്റെ പാർലമെന്റ് മണ്ഡലത്തിലും അദ്ദേഹതിൻ്റെ നിയമസഭാ മണ്ഡലത്തിലും കേരളം കണ്ടറിയും. ആ വിചാരം ഉണ്ടായാൽ നന്ന്.

ഇപ്പോൾ കിട്ടിയ വിജയം നിങ്ങളുടെ കഴിവിന്റെ പ്രതിഫലനമല്ലെന്ന് ഇന്നാട്ടിലെ കൊച്ചു കുട്ടികൾക്ക് പോലും അറിയാം. അത് മനസ്സിലാക്കി തീരുമാനങ്ങൾ എടുക്കുക. തീക്കൊള്ളി കൊണ്ട് തല ചൊറിയാതിരിക്കുക. നിങ്ങൾ മന്ത്രിമാർ മാത്രമാണ്. ജനമാണ് ഇപ്പോഴും ഇവിടത്തെ രാജാവ്.

വാൽക്കഷണം:- മറുവശത്ത് പ്രതിപക്ഷ നേതാവിന് വേണ്ടിയുള്ള ചർച്ചകൾ നടക്കുന്നുണ്ടെന്ന് കേൾക്കുന്നു! പ്രായാധിക്യവും അരോഗാവസ്ഥയും അവഗണിച്ച് മൂന്നാമതും മുഖ്യമന്ത്രി ആകാൻ തയ്യാറായ വ്യക്തി, പ്രതിപക്ഷ നേതാവ് ആകാൻ തയ്യാറല്ല എന്നത് വലിയ തമാശയാണ്. എന്തായാലും ഏകാധിപത്യ പ്രവണത മാറി ജനാധിപത്യ സ്വഭാവ കാണിക്കുന്നത് തീർച്ചയായും നല്ലത് തന്നെ.

തിരഞ്ഞെടുപ്പ് കാലത്ത്, സമൂഹമാദ്ധ്യമങ്ങളിൽ തലങ്ങും വിലങ്ങും പോസ്റ്റുകൾ ഇട്ട് അർമ്മാദിച്ചില്ലെങ്കിലും, അത്യാവശ്യം ഒരു പോസ്റ്റൊക്കെ ഇടാനുള്ള അവകാശം വോട്ടെണ്ണൽ കഴിഞ്ഞിരിക്കുന്ന ഈ സാഹചര്യത്തിൽ എനിക്കും ഉണ്ടെന്ന സ്വാതന്ത്ര്യത്തിൽ കുറച്ച് കാര്യങ്ങൾ പറയുന്നു.

എന്റെ സ്പേസിൽ പറയുന്നത് എന്റെ ബോദ്ധ്യങ്ങൾ ആണ്. അത് നിങ്ങളുടെ ബോദ്ധ്യങ്ങളുമായി ഒത്തുപോകില്ലെന്ന് കണ്ടാൽ വിറളി പിടിക്കേണ്ടതില്ല.

എന്തുകൊണ്ട് തോറ്റു എന്ന ചോദ്യത്തിന് ഒരുപാട് കാരണങ്ങളും ഉത്തരങ്ങളും ഉണ്ട്. ശ്രദ്ധയിൽപ്പെട്ട പല തോൽവികളും ഉൾപ്പെടുത്തിയിട്ടുണ്ട്.

ചില വിജയ കാരണങ്ങളും അല്പസ്വല്പം വിലയിരുത്തലുകളും കൂട്ടത്തിൽ ചേർത്തിട്ടുണ്ട്.

1. ജനം ആർക്കും വോട്ടുകൾ കാലാകാലത്തേക്ക് എഴുതിക്കൊടുത്തിട്ടില്ല. ഏത് കോട്ടയും തകരും. തകർന്ന ചരിത്രമുണ്ട്.

2. തെരഞ്ഞെടുപ്പ് കാലത്ത് പ്രചരിച്ച ഒരു പോസ്റ്റർ (കമൻ്റിൽ നോക്കുക) പ്രകാരം, അതിലുള്ള 50 മണ്ഡലങ്ങളിൽ സുനാമി വന്നാൽപ്പോലും LDFനെ തോൽപ്പിക്കാൻ പറ്റില്ല എന്നായിരുന്നു! എന്നിട്ടോ? ഏറ്റവും വലിയ കമ്യൂണിസ്റ്റ് കോട്ടകളായ പയ്യന്നൂരിലും തളിപ്പറമ്പിലും തൃക്കരിപ്പൂരിലും അമ്പലപ്പുഴയിലും അടക്കം ആ ലിസ്റ്റിലെ 21 മണ്ഡലങ്ങളിൽ ഭേഷായിട്ട് തോറ്റു. ധർമ്മടത്ത് പിണറായി വിജയന് ആദ്യത്തെ ഏഴ് റൗണ്ടിൽ പിന്നിൽ നിൽക്കേണ്ടി വന്നു. സുനാമിയൊന്നും വേണ്ട. ഒരു വേലിയേറ്റം ധാരാളം മതിയാകും. ഒരു മണ്ഡലവും ജനങ്ങൾ ആർക്കും തീറെഴുതി കൊടുത്തിട്ടില്ല.

3. LDF അല്ലാതെ മറ്റാരുണ്ട് എന്ന ചോദ്യത്തിന് ഉത്തരം കിട്ടി. കേരളത്തിൽ LDFഉം UDFഉം മാറിമാറി ഭരിച്ചിട്ടുണ്ട്. LDF മാത്രമാണ് ഇവിടെയുള്ളത് എന്ന വിഡ്ഢിച്ചിന്ത പിന്നെങ്ങനെ വന്നു; എവിടന്ന് വന്നു? നികേഷ് കുമാറാണ് അതിന് പിന്നിലെങ്കിൽ, അയാൾ തന്റെ അച്ഛന്റെ എതിരാളികൾക്ക് മടയിൽക്കയറി പണികൊടുത്തു എന്ന് തമാശയായി വേണമെങ്കിൽ പറയാം. അഥവാ അയാളാണ് പരാജയത്തിൻ്റെ മറ്റൊരു വലിയ കാരണം.

4. കേരളത്തിൽ അങ്ങോളമിങ്ങോളം എൻ്റെ മോന്ത, എൻ്റെ ഫുൾ ഫിഗർ പരസ്യങ്ങൾ വെച്ചാലൊന്നും ആരും ജയിക്കണമെന്നില്ല. പൊതുഖജനാവ് ധൂർത്തടിച്ചുകൊണ്ടുള്ള PR വർക്കുകൾ കണ്ടാൽ സാക്ഷരകേരളത്തിന് തിരിച്ചറിയാനാവും.

5. എത്ര നല്ല കാര്യങ്ങൾ ചെയ്താലും എത്ര വലിയ ആശയങ്ങൾ മുന്നോട്ട് വെച്ചാലും, അതിനിടയിലൂടെ ബാങ്കുകളും ആരാധനാലയങ്ങളും രക്തസാക്ഷി ഫണ്ടുകളും അടക്കം പറ്റാവുന്ന സ്ഥലങ്ങളിലൊക്കെ മോഷണം നടത്തിയാൽ…, സ്വജനപക്ഷപാതം ബെല്ലും ബ്രേക്കുമില്ലാതെ നടപ്പിലാക്കിയാൽ…, അങ്ങനെയുള്ളവരെ ജനാധിപത്യ ബോധമുള്ള വോട്ടർമാർ തോൽപ്പിച്ച് വീട്ടിലിരുത്തും. മോഷ്ടാക്കൾ പിന്നീട് എത്ര വലിയ കാര്യങ്ങൾ ചെയ്താലും ഏശില്ല.

6. ചോദ്യങ്ങൾ ചോദിക്കുമ്പോൾ ‘വീട്ടിൽ പോയി ചോദിച്ചാൽ മതി’ എന്ന ധാർഷ്ട്യം പറഞ്ഞാലും, ജനം തോൽപ്പിച്ച് വീട്ടിൽ ഇരുത്തും. ധാർഷ്ട്യം ഒരു കാരണവശാലും വെച്ച് പൊറുപ്പിക്കില്ല.

7. പെണ്ണുപിടിയന്മാരെ ഇടം വലം നോക്കാതെ ജനം തൂക്കിയെറിയും. അതെ, പി. കെ. ശശിയുടേയും ഗണേഷ്കുമാറിൻ്റേയും പരാജയങ്ങളെപ്പറ്റി തന്നെയാണ് പറയുന്നത്.

8. ജനങ്ങളുടെ തോളോടുതോൾ ചേർന്ന് നിന്ന് അവരുടെ പ്രശ്നങ്ങൾ കേൾക്കുകയും മനസ്സിലാക്കുകയും ചെയ്യുന്നതിന് പകരം 40 കാറുകളുടെ അകമ്പടിയോടെ 110 കിലോമീറ്റർ വേഗതയിൽ അവരിൽ നിന്ന് അകന്ന് പോയാൽ, ആ അകലം ജനം എന്നെന്നേക്കുമായി നിലനിർത്തും.

9. ഏതൊരു മണ്ഡലത്തിലും ഒരു രാഷ്ട്രീയപ്രവർത്തകൻ അഞ്ച് വർഷം ഇറങ്ങി നിന്ന് പ്രവർത്തിച്ചാൽ, അത് എത്ര വലിയ കോട്ടയാണെങ്കിലും ജയിച്ചു കയറാൻ പറ്റും. ഉദാഹരണം ജ്യോതികുമാർ ചാമക്കാല തന്നെ. എല്ലാ ജനപ്രതിനിധികളും ഇങ്ങനെ വിചാരിച്ചാൽ അഞ്ചുകൊല്ലം കൊണ്ട് വേറൊരു തലത്തിൽ എത്താൻ കഴിയും കേരളത്തിന്.

10. ഒരു ഫ്ലക്സ് ബോർഡ് പോലും വെക്കാതെയും പ്രചരണ കൊട്ടിക്കലാശ മാമാങ്കം നടത്താതെയും, ആർഭാടങ്ങൾ ഇല്ലാതെയും, വേണമെങ്കിൽ ഒരു സ്ഥാനാർത്ഥിക്ക് റെക്കോർഡ് വിജയം കൈവരിക്കാനാവും. അതെ, ചാണ്ടി ഉമ്മനെ തന്നെയാണ് ഉദ്ദേശിച്ചത്.

11. അങ്ങോട്ടുമിങ്ങോട്ടും ചാടിക്കളിച്ച് അധികാരത്തിന്റെ സുഖസൗകര്യങ്ങൾ വരുതിയിലാക്കി ജീവിക്കുന്ന കൗശലക്കാരായ മുതലാളിമാരോട് ജനത്തിന് അല്പം പോലും താല്പര്യമില്ല. ഉദാഹരണം പി. വി. അൻവറിന്റെ അർഹമായ തോൽവി.

12. ഇത്ര വലിയ ഭൂരിപക്ഷം UDFന് കിട്ടിയപ്പോഴും ടി. എൻ. പ്രതാപൻ എന്ന UDFന്റെ മുതിർന്ന നേതാവ് എന്തുകൊണ്ട് തോറ്റു? “കുറച്ചുപേരെ എല്ലാക്കാലവും എല്ലാവരേയും കുറച്ചുകാലവും കബളിപ്പിച്ച് നടക്കാൻ പറ്റും; പക്ഷേ എല്ലാവരേയും എല്ലാക്കാലവും കബളിപ്പിക്കാൻ പറ്റില്ല”.. എന്നൊരു സിദ്ധാന്തമുണ്ട്. അത് ചേർത്ത് വായിച്ചാൽ ഈ പരാജയത്തിനുള്ള ഉത്തരമായി.

13. ലീഡറുടെ മകൾ ആയതുകൊണ്ട് മാത്രം കോൺഗ്രസിലോ മറ്റേതെങ്കിലും പാർട്ടിയിലോ കയറിക്കൂടി സാരി ചുളിയാതെയും മേക്കപ്പ് ഇളകാതെയും ജയിച്ച് കയറാനാവില്ലെന്ന് ഇനിയെങ്കിലും പത്മജ വേണുഗോപാൽ മനസ്സിലാക്കണം. കേരള രാഷ്ട്രീയത്തിൽ നിങ്ങൾക്കുള്ള സ്ഥാനം ചവറ്റുകുട്ടയിലാണ്. മറ്റേതെങ്കിലും സംസ്ഥാനത്ത് ഗവർണ്ണറായി ശ്രമിക്കാവുന്നതാണ്.

14. പണം കൊടുത്ത് വോട്ടർമാരെ സ്വാധീനിക്കാൻ ശ്രമിക്കുന്നത് പൊതുജനം മനസ്സിലാക്കിയാൽ തോറ്റത് തന്നെ. ശോഭാ സുരേന്ദ്രൻ്റെ തോൽവിയുടെ കാര്യമാണ് സൂചിപ്പിച്ചത്. NDA ജയിക്കുമെന്ന് ഏറെക്കുറെ എല്ലാവരും ഉറപ്പിച്ചിരുന്ന മണ്ഡലമാണ് അത്.

15. പയ്യന്നൂരിൽ വി. കുഞ്ഞികൃഷ്ണന്റെ വിജയം (7487ഭൂരിപക്ഷം) കാണിക്കുന്നത്, രക്തസാക്ഷി ഫണ്ട് സഖാക്കൾ മോഷ്ടിച്ചു എന്ന് തെളിവുകൾ നിരത്തിയുള്ള അദ്ദേഹത്തിന്റെ ആരോപണം ജനങ്ങൾക്ക് ബോദ്ധ്യമായി എന്നാണ്. മോഷ്ടിച്ചവന് പാർട്ടിയുടെ വക സീറ്റ്; അത് ചൂണ്ടിക്കാണിച്ചവൻ പാർട്ടിക്ക് പുറത്ത്. പണത്തിന്റെ കണക്ക് ഞങ്ങൾ വേണ്ടപ്പെട്ടവരെ ബോധിപ്പിച്ചോളാം എന്ന ധാർഷ്ട്യം. തോൽക്കാൻ രണ്ടാമതൊരു കാരണം വേണോ?

16. തൊഴിലാളി വർഗ്ഗ പാർട്ടിയാണ് പാവങ്ങളുടെ പാർട്ടിയാണ് എന്നെല്ലാം പറഞ്ഞിട്ട്, അതേ പാവങ്ങളുടെ നികുതിപ്പണം ധൂർത്തടിച്ച് മുതലാളിത്ത ജീവിതം നയിച്ചാൽ അത് മനസ്സിലാക്കാനുള്ള ബോധവും പൊക്കണവുമൊക്കെ കേരള സമൂഹത്തിനുണ്ട്. മുണ്ട് മുറുക്കി ഉടുക്കേണ്ട ഇടങ്ങളിലൊന്നും അത് ചെയ്യാതെ കടമെടുത്ത പണം കൊണ്ട് ധൂർത്ത് തുടർന്നു.

17. പല എക്സിറ്റ് പോളുകളേയും കവച്ചു വെച്ചുള്ള വിജയം UDF ന് കിട്ടാനുള്ള കാരണം, LDF ന് വോട്ട് ചെയ്യേണ്ട എന്ന് തീരുമാനിച്ച പലരും അത് സർവ്വേകളിൽ തുറന്നു പറയാൻ മടിക്കുന്നു അല്ലെങ്കിൽ ഭയക്കുന്നു എന്നതാണ്.

18. അവസാനമായി പറയാനുള്ളത് സ്വരാജിനോടാണ്. മേൽപ്പറഞ്ഞതിന്റെ ഇരട്ടി കാര്യങ്ങൾ ചൂണ്ടിക്കാണിച്ച്, കേരള ജനതയുടെ വോട്ടിംഗ് കൃത്യമായിരുന്നു എന്ന് യാഥാർത്ഥൃ ബോധമുള്ളവർക്ക് സമർത്ഥിക്കാനാവും. താങ്കൾക്ക് പക്ഷേ വോട്ടർമാരോട് പുച്ഛം. താങ്കളുടെ പാർട്ടിക്ക് വോട്ട് ചെയ്തില്ലെങ്കിൽ ഉടനെ ജനങ്ങൾ ഉദാസീനരും അരാഷ്ട്രീയവാദികളുമാകുന്നു. അതെന്തോന്ന് ന്യായീകരണമാണ് ഹേ. താങ്കളുടെ പാർട്ടി എല്ലാം തികഞ്ഞ പാർട്ടിയാണോ? ആദ്യം പരാജയം അംഗീകരിക്കാൻ പഠിക്കുക. എന്നിട്ടാണ് കാരണം തിരയലും വിശകലനവും തെറ്റ് തിരുത്തലുമൊക്കെ. അതിന് മനസ്സില്ലാത്ത താങ്കളെപ്പോലുള്ളവർ ഏത് പാർട്ടിയിൽ ഉണ്ടായാലും പരാജയം വീണ്ടും വീണ്ടും ഉണ്ടായിക്കൊണ്ടിരിക്കും. ഇത്രയൊക്കെ ആയാലും തെല്ല് പോലും മാറരുത്. ചതുരവടിവിൽ ഇങ്ങനെ തന്നെ തുടരുക. ‘ഒന്ന് ചീഞ്ഞാലേ മറ്റൊന്നിന് വളമാകൂ’ എന്ന പ്രപഞ്ചസത്യം മാറ്റാൻ ഒരു പൂമരനും പുംഗവനും കഴിയില്ല.

വാൽക്കഷണം:- UDF ന് ഈ ‘വലിയ’ വിജയത്തിൽ അഹങ്കരിക്കാൻ ഒന്നുമില്ല. LDF ൻ്റെ ധാർഷ്ട്യവും തെമ്മാടിത്തരങ്ങളും സ്വജനപക്ഷപാതവും പകൽക്കൊള്ളയും പോരാഞ്ഞ് പിണറായി വിജയൻ എന്ന ഏകാധിപതിയുടെ ചെയ്തികളും നിങ്ങൾക്ക് അനുകൂലമായി ഭവിച്ചു എന്ന് മാത്രം. അത് മനസ്സിലാക്കി കൊള്ളാവുന്ന ഭരണം കാഴ്ചവെച്ചാൽ നിങ്ങൾക്ക് കൊള്ളാം, ജനങ്ങൾക്കും കൊള്ളാം. അല്ലെങ്കിൽ, അഞ്ച് വർഷത്തിന് ശേഷം ഇതേ മാതൃകയിൽ ചെവിക്ക് പിടിച്ച് തൂക്കി വെളിയിൽ കളയാൻ ഇതേ സമ്മതിദായകർ മുന്നിട്ട് നിൽക്കും.

അല്പം ചരിത്രം പറയട്ടെ.

പതിനഞ്ചാം നൂറ്റാണ്ടിൽ നടന്ന സംഭവമാണ്. അതായത് ഏതാണ്ട് 500 വർഷങ്ങൾക്ക് മുൻപ്.

പോർച്ചുഗീസുകാർ ഇന്ത്യയിൽ എത്തിയ കോളനിക്കാലം. അന്ന് ഇവിടെയുള്ള ക്രൈസ്തവരുടെ വേഷഭൂഷാദികളും ആചാര അനുഷ്ഠാനങ്ങളും കലാപരമായ ഇടപെടലുകളും കണ്ട് പോർച്ചുഗീസുകാർക്ക് കലികയറി.

അക്കാലത്ത് കളരികളിൽ പരദേവതകളെ വെച്ച് പൂജിക്കുക, ബലിയിടുക എന്നതടക്കം തീണ്ടൽ, അയിത്തം, പുലകുടി, പുണ്യാഹം എന്നിങ്ങനെ ഹൈന്ദവരുടേതായ ആചാരങ്ങൾ ക്രിസ്ത്യാനികളും അനുഷ്ഠിച്ചു പോന്നിരുന്നു. വിവാഹത്തിന് മുൻപ് ലക്ഷണം നോക്കിക്കുക, പഴുതൊക്കുക എന്നതും പോരാഞ്ഞ് ആഭിചാര പ്രവർത്തികൾ ചെയ്യുക, യന്ത്രങ്ങൾ ശരീരത്തിൽ കെട്ടുക എന്നീ ക്രൈസ്തവോചിതമല്ലാത്ത പല പ്രവർത്തികളും അന്നത്തെ ക്രിസ്ത്യാനികൾ ചെയ്തിരുന്നു.

“സുനഹദോസ് കാലഘട്ടത്തിലെ നസ്രാണി മാപ്പിളമാർ, പുറമേ ക്രിസ്തുമതവും അകമേ സവർണ്ണ ഹിന്ദുത്വവും, പുറത്ത് പള്ളിയും അകത്ത് അമ്പലവുമായി കഴിഞ്ഞുകൂടിയ പച്ച സവർണ്ണ നായരും നമ്പൂതിരിയും ആയിരുന്നു എന്ന് ‘പുരാതന ക്രിസ്ത്യാനികളുടെ പുണ്യാഹ കർമ്മങ്ങൾ’ എന്ന മലയാള മനോരമ (1938) ലേഖനത്തിൽ സൂചിപ്പിക്കുന്നുണ്ട്.

ഇവിടെയുള്ള മറ്റ് ഏതൊരു മനുഷ്യരേയും പോലെ തന്നെയുള്ള വേഷങ്ങളായിരുന്നു ക്രൈസ്തവന്റേയും. അവർ ആസ്വദിക്കുന്നത് ക്ഷേത്ര കലകൾ, ആചരിക്കുന്നത് ഹൈന്ദവാചാരങ്ങൾ. ഒറ്റനോട്ടത്തിൽ ഹിന്ദുവേത് ക്രൈസ്തവനേത് എന്ന് തിരിച്ചറിയാൻ പോലും പറ്റുന്നില്ല.

പോർച്ചുഗീസുകാർ ഇടപെട്ടു. ക്ഷേത്ര കലകളിൽ നിന്ന് ക്രൈസ്തവരെ വിലക്കി. പകരം ക്രൈസ്തവരുടേതായ ഒരു കലാരൂപം ഉണ്ടാക്കാൻ ചിന്നത്തമ്പി അണ്ണാവി എന്ന വറീച്ചൻ അണ്ണാവിയെ ഏർപ്പാടാക്കി. അദ്ദേഹം ക്രൈസ്തവർക്ക് വേണ്ടി ചിട്ടപ്പെടുത്തിയ കലാരൂപമാണ് ചവിട്ടുനാടകം. അതുകൊണ്ടാണ് ചവിട്ടുനാടകത്തിലെ കഥകളെല്ലാം ബൈബിളിനെ ആധാരമാക്കി ആയത്.

ഇനി 21-)ം നൂറ്റാണ്ടിലേക്ക് വരാം. ഗോതുരുത്തിലെ ‘ചുവടി’ ചവിട്ടുനാടക ഫെസ്റ്റിവൽ ആണ് വേദി. കൃത്യമായി പറഞ്ഞാൽ 2014 ഡിഡംബർ 26.

അന്നേ ദിവസം ഫെസ്റ്റിവലിൽ അവതരിപ്പിച്ച ചവിട്ടുനാടകത്തിൻ്റെ പേര് ‘ശബരിമല ശ്രീ ധർമ്മശാസ്താവ് ‘ എന്നായിരുന്നു. കഥയും അത് തന്നെ. പുലിപ്പുറത്ത് കയറി അയ്യപ്പൻ സ്റ്റേജിലേക്ക് വരുന്ന ത്രസിപ്പിക്കുന്ന രംഗങ്ങൾ പോലും ആവിഷ്ക്കരിച്ചിരുന്നു അതിൽ. ചുവടി ചവിട്ടുനാടക ഫെസ്റ്റിവൽ അരങ്ങേറുന്നത് ഗോതുരുത്തിലെ ക്രൈസ്തവ ദേവാലയത്തിൻ്റെ ചുമരിനോട് ചേർന്നുള്ള വളപ്പിലാണെന്ന് ശ്രദ്ധിക്കണം.

ഭൂഗോളം ഒരുപാട് മുന്നോട്ട് തിരിഞ്ഞപ്പോൾ, കലയിൽ ജാതിമത വേർതിരിവുകൾ കൊണ്ടുവരാൻ ശ്രമിച്ചതിൻ്റെ കാരണം പോലും കാലയവനികയ്ക്ക് പിന്നിൽ മറഞ്ഞു പോയതിൻ്റെ ഉദാഹരണമാണ് മേൽപ്പറഞ്ഞത്.

ക്രൈസ്തവരെ ഹിന്ദു കലാരൂപങ്ങളിൽ നിന്ന് അകറ്റി നിർത്താൻ ശ്രമിച്ച പറങ്കികൾ അപ്പോൾ ആരായി? കാലം അവരെ കശൂമ്മാവിൻ തോപ്പ് വഴി പോർച്ചുഗീസിലേക്ക് തന്നെ ഓടിച്ചു.

ഇനി കുറച്ച് തെക്കോട്ട് സഞ്ചരിച്ച്, പോർച്ചുഗീസുകാർ തന്നെ സ്ഥാപിച്ച വല്ലാർപാടം ക്രൈസ്തവ ദേവാലയത്തിൽ ചെല്ലാം.

1676 ലെ വെള്ളപ്പൊക്കത്തിൽ ഈ ക്രൈസ്തവ ദേവാലയം മുങ്ങിപ്പോകുകയും നശിച്ച് പോകുകയും ചെയ്തു. അൾത്താരയിൽ ഉണ്ടായിരുന്ന വല്ലാർപാടത്തമ്മയുടെ ചിത്രം ഒഴുകി നടന്നപ്പോൾ അത് കണ്ടെടുത്തത് പാലിയത്തത് രാമൻ വല്യച്ചൻ.

വല്ലാർപാടത്ത് പുതിയ പള്ളി സ്ഥാപിക്കാനുള്ള സ്ഥലം വിട്ടു നൽകിയത് പാലിയത്തച്ചൻ ആണ്. വിശ്വാസികൾക്ക് അദ്ദേഹം മാതാവിന്റെ ചിത്രം തിരികെ നൽകിയ സ്ഥലത്ത് കൊടിമരം നാട്ടി അവിടെ പുതിയ പള്ളി നിർമ്മിച്ചു. ദേവാലയത്തിന്റെ ആശീർവാദത്തിൽ പാലിയത്തച്ചൻ പങ്കെടുക്കുകയും പള്ളിയിലേക്ക് ഒരു കെടാവിളക്ക് നൽകുകയും അതിൽ ഒഴിക്കാനുള്ള എണ്ണ കൊട്ടാരത്തിൽ നിന്ന് നൽകുമെന്ന് പ്രഖ്യാപിക്കുകയും ചെയ്തു. ഇടക്കാലത്ത് ആ ചടങ്ങ് നിന്നു പോയെങ്കിലും 1994 മുതൽ പാലിയം കൊട്ടാരത്തിൽ നിന്ന് എണ്ണ കൊണ്ടുവരുന്ന ചടങ്ങ് പുനസ്ഥാപിച്ചു.

വല്ലാർപാടം പള്ളിയിലെ പെരുന്നാൾ കൊടിയേറുമ്പോൾ, കുരുത്തോല നൽകാനുള്ള അവകാശം ഇന്നും ഒരു ഹൈന്ദവ കുടുംബത്തിനാണ്.

അയ്യപ്പനും വാവരും, ഹരിവരാസനം പാടുന്ന ക്രൈസ്തവനായ യേശുദാസ്, ഹൈന്ദവ ഭക്തി ഗീതങ്ങൾ ചിട്ടപ്പെടുത്തിയ യൂസഫലി, ഇസ്ലാം ഭക്തിഗാനം പാടുന്ന മാർക്കോസ്, അങ്ങനെയങ്ങനെ നൂറുദാഹരണങ്ങൾ ഈ കൊച്ചു കേരളത്തിൽ എടുത്തു പറയാനുണ്ട്.

അവനവന്റെ മതത്തിനും ആചാരത്തിനും വിശ്വാസത്തിനും ഒക്കെ ഉപരിയായി, ആഘോഷങ്ങളിലും സന്തോഷങ്ങളിലും സന്താപത്തിലുമെല്ലാം വിവിധ മതസ്ഥർ തോളോട് തോൾ ചേർന്ന് നിന്ന് പച്ച മനുഷ്യരായി സ്നേഹം പങ്കിടുന്ന ഉദാത്ത ഉദാഹരണങ്ങൾ!

അക്കൂട്ടത്തിൽ ഒന്നാണ് ഇക്കഴിഞ്ഞ ദിവസവും സംഭവിച്ചത്. താൻ പഠിച്ച വിദ്യാലയത്തോടുള്ള ആദരസൂചകമായി, തങ്ങൾക്ക് ഭജന നടത്താനുള്ള സൗകര്യങ്ങൾ ചെയ്തുതന്ന ക്രൈസ്തവ ദേവാലയത്തോടുള്ള നന്ദി സൂചകമായി, ഒരു ക്രൈസ്തവ ഭക്തിഗാനം ഹിന്ദു ദേവാലയത്തിന്റെ മതിൽക്കെട്ടിന് വെളിയിൽ ‘നന്ദഗോവിന്ദം ഭജൻസ് ‘ പാടി. അവിടെയുണ്ടായിരുന്നവരും അത് കേട്ട് ആസ്വദിച്ചവരും ഹർഷാരവത്തോടെ അതിനെ നെഞ്ചേറ്റി.

പക്ഷേ ഒരു കൂട്ടർക്ക് മാത്രം ഇത് അത്ര പിടിച്ചില്ല. അവരുടെ മതവികാരം ഇക്കിളിപ്പെട്ടു.

ശ്രദ്ധിച്ചു നോക്കിയാൽ ഒരു കാര്യം കൃത്യമായി മനസ്സിലാകും. മനുഷ്യർക്കിടയിൽ ജാതിയുടേയും മതത്തിന്റേയും പേരിൽ സ്പർദ്ധ പടർത്തുന്നത് കക്ഷിരാഷ്ട്രീയക്കാരോ രാജ്യം പിടിച്ചടക്കാൻ വന്നവരോ അധികാര മോഹികളോ ആണ്. പക്ഷേ കലയുടെ മുന്നിൽ പിടിച്ചുനിൽക്കാൻ അവർക്കാവില്ല. കാലവും കലയും മനുഷ്യരും തോളോട് തോൾ ചേർന്ന്, അവരെ തള്ളിപ്പറയുകയും തൂത്തെറിയുകയും തന്നെ ചെയ്യും.

ഭജന കലയല്ല എന്ന് പറഞ്ഞ് കുറച്ച് നാൾ കൂടെ എതിർത്ത് നോക്കാമെന്ന് മാത്രം. പക്ഷേ ഫലമുണ്ടാകില്ല. കേരളത്തിൻ്റെ മതേതര മനസ്സ് തള്ളിക്കളയും.

ചേർത്തു പിടിക്കുമ്പോൾ കിട്ടാത്ത എന്ത് സുഖവും സന്തോഷവുമാണ് ഹേ തള്ളിമാറ്റുമ്പോൾ കിട്ടുന്നത്? ഏത് ദൈവമാണ് മാറ്റി നിർത്താൻ ആഹ്വാനം ചെയ്തിട്ടുള്ളത്?

വാൽക്കഷണം:- മേൽപ്പറഞ്ഞ സംഭവങ്ങൾ എല്ലാം പോരാഞ്ഞിട്ട്, ശ്രീനാരായണ ഗുരുവും അയ്യങ്കാളിയും ചട്ടമ്പി സ്വാമികളും വാഗ്ഭടാനന്ദനും തൈക്കാട് അയ്യയും ഡോക്ടർ പൽപ്പുവും വൈകുണ്ഠ സ്വാമികളും ഒക്കെ ചേർന്ന് നവോത്ഥാനം നടപ്പിലാക്കിയ കേരളമാണിത്. ചില പ്രത്യേകതരം പരിപ്പുകൾ ഈ കലത്തിൽ ഒരു കാലത്തും വേവാൻ പോകുന്നില്ല.

#മതേതരകേരളം
#secular
#secularism
#SecularKerala

ഇതിപ്പോൾ പൊതുജനം അറിഞ്ഞുകൊണ്ട് തുറക്കുന്ന രണ്ടാമത്തെ സ്ട്രോങ്ങ് റൂം ആണ്. അറിയാതെ ഏതൊക്കെ സ്ട്രോങ്ങ് റൂമുകൾ തുറന്നിട്ടുണ്ടെന്ന് കണക്കില്ല.

ഈ വിഷയത്തിൽ ചില ചോദ്യങ്ങളുണ്ട്…

1. ഇത്രയേ ഉള്ളോ ഈ സ്ട്രോങ്ങ് റൂം? (ഒരു ഓഫീസർ മറന്നു വെച്ച ഡയറി എടുക്കാൻ ആണത്രേ സ്ട്രോങ്ങ് റൂം തുറക്കുന്നത്!) ഒരു ഉദ്യോഗസ്ഥൻ ഒരു സാധനം മറന്നു വെച്ചാൽ അത് തിരികെ എടുക്കാൻ വേണ്ടി സീല് പൊളിച്ച് തുറക്കാവുന്നതേ ഉള്ളോ ഈ സ്ട്രോങ്ങ് റൂം?

2. അത് ഉദ്യോഗസ്ഥന്റെ ഔദ്യോഗിക
ഡയറി ആണോ അതോ വ്യക്തിപരമായ ഡയറിയാണോ?

3. ഔദ്യോഗിക ഡയറി ആയാലും വ്യക്തിഗത ഡയറി ആയാലും, മെയ് 4ന് മുന്നേ തുറന്ന് എടുക്കേണ്ട എന്ത് അത്യാവശ്യം ആണ് ആ ഡയറിയിൽ ഉള്ളത്? അത് പൊതുജനത്തിനെ ബോധ്യപ്പെടുത്തുമോ?

4. വോട്ടിങ്ങ് കഴിഞ്ഞ്, സ്ട്രോങ്ങ്‌ റൂം അടച്ച് 12 ദിവസം കഴിഞ്ഞപ്പോഴാണോ ഡയറി സ്ട്രോങ്ങ് റൂമിൽ ആയിപ്പോയതെന്ന് ഉദ്യോഗസ്ഥൻ അറിഞ്ഞത്?

5. ഇക്കഴിഞ്ഞ 12 ദിവസം ആ ഡയറിയില്ലാതെ ഉദ്യോഗസ്ഥൻ എങ്ങനെ മുന്നോട്ടു നീങ്ങി?

6. അടുത്ത 14 ദിവസം കൂടി അതേ നിലയ്ക്ക് തുടരാൻ അദ്ദേഹത്തിന് പറ്റുമായിരുന്നില്ലേ?

7. ആ ഡയറി എടുക്കാൻ സ്ട്രോങ്ങ് റൂമിലേക്ക് പോകുന്ന വ്യക്തിയുടെ/ വ്യക്തികളുടെ ശരീര പരിശോധന നടത്തി ഉടായിപ്പ് ഒന്നുമില്ല എന്ന് തീർപ്പാക്കുമോ?

8. ഡയറി എടുക്കാൻ സ്ട്രോങ്ങ് റൂമിലേക്ക് പോകുന്നവർ ഉടായിപ്പ് ഒന്നും കാണിക്കുന്നില്ല എന്ന് ഉറപ്പാക്കാൻ പൊലീസും അകത്തേക്ക് പോകുമോ?

9. പൊലീസിനും ഒരു ഉടായിപ്പിൻ്റെ ഭാഗമാകാമല്ലോ. ആ നിലയ്ക്ക് എല്ലാ പാർട്ടികളുടേയും ഒരു പ്രതിനിധിയെ സ്ട്രോങ്ങ്‌ റൂമിന് അകത്തേക്ക് അനുവദിക്കുമോ?

10. ഈ നടപടിക്രമങ്ങൾ മുഴുവൻ റെക്കോർഡ് ചെയ്യാൻ മാധ്യമങ്ങളെ അനുവദിക്കുമോ?

11. ഡയറിയോ മടിശ്ശീലയോ ബാഗോ ഫോണോ കൗപീനമോ എന്തുമാകട്ടെ, സ്ട്രോങ്ങ് റൂമിൽ മറന്നു വെച്ചത് മൂലം അത് രണ്ടാമത് തുറക്കേണ്ടി വന്നതിൽ ഈ ഉദ്യോഗസ്ഥനെതിരെ നടപടി ഉണ്ടാകുമോ? ഇത് അയാളുടെ വീഴ്ച ആയിട്ടല്ലേ കണക്കാക്കേണ്ടത്. ഡയറി മറന്ന് വെച്ചത് മനുഷ്യസഹജമായി കണക്കാക്കാമെങ്കിലും അതിന്റെ പേരിൽ, ഇത്രയും വലിയ ഒരു ജനാധിപത്യ പ്രക്രിയയെ സംശയത്തിൽ ആക്കുന്ന തരത്തിൽ സ്ട്രോങ്ങ് റൂം തുറക്കേണ്ടി വരുന്നത് അയാളുടെ വീഴ്ചയല്ലേ?

12. ഈ സ്ട്രോങ്ങ് റൂം തുറക്കൽ ഇനിയുള്ള കാലങ്ങളിലും സ്ഥിരം കലാപരിപാടി ആയേക്കാം. തിരഞ്ഞെടുപ്പ് തന്നെ അട്ടിമറിക്കപ്പെട്ടേക്കാം. ആയതിനാൽ വോട്ട് ചെയ്ത് പരമാവധി മൂന്ന് ദിവസത്തിനകം വോട്ട് എണ്ണുന്ന തരത്തിലുള്ള സംവിധാനമല്ലേ ഇനിയുള്ള കാലത്ത് അഭികാമ്യം?

13. ഇത്തരം പരിപാടികൾ ഇനിയും തുടർന്നേക്കാം എന്നതുകൊണ്ട് വോട്ടിംഗ് മെഷീനുകൾ മാറ്റി ബാലറ്റ് പേപ്പറിലേക്ക് തിരികെ പോകുന്നല്ലേ ഉചിതം? ഇതുപോലുള്ള തട്ടിപ്പ് സാധ്യതകളിൽ നിന്ന് രക്ഷപ്പെടാൻ അതല്ലേ ഏകമാർഗ്ഗം?

വാൽക്കഷണം:- ചോദ്യങ്ങൾ ചോദിച്ചു കൊണ്ടേയിരിക്കണം. അല്ലെങ്കിൽ ഇവന്മാർ ചിലപ്പോൾ ജനാധിപത്യത്തെ നാലായി മടക്കി താറ് ഉടുക്കും.

#StrongRoom
#Polling
#election
#BalletPaper

മലയത്ത്, മുതുകാട്, സാമ്രാജ്, എന്നിങ്ങനെ പല മാജിഷ്യന്മാരുടേയും മാജിക്‌ പ്രോഗ്രാമുകൾ കണ്ടിട്ടുണ്ട്.

ആദ്യമാദ്യം ഇവരൊക്കെ ഇത് എങ്ങനെ ചെയ്യുന്നു എന്ന് വല്ലാതെ അത്ഭുതപ്പെട്ടിട്ടുണ്ട്, അമ്പരന്നിട്ടുമുണ്ട്. പോകപ്പോകെ ഇതൊക്കെ ഉപകരണങ്ങളുടേയും സഹായികളുടേയും സാധ്യതയും കയ്യടക്കവും കൈയൊതുക്കവും എല്ലാം ചേർന്നുള്ള വിദ്യകൾ ആണെന്ന് മനസ്സിലാക്കാൻ പറ്റി.

ഒരിക്കൽ, മുഖംമൂടിയണിഞ്ഞ ഒരു മാജിഷ്യൻ, ലോകത്തിൽ ഇതുവരെ അവതരിപ്പിക്കപ്പെട്ടിട്ടുള്ള ഒരുവിധം എല്ലാ ഗംഭീര മാജിക് പ്രോഗ്രാമുകളേയും പൊളിച്ചടുക്കിക്കൊണ്ട് അതിന്റെ പിന്നിലെ തന്ത്രങ്ങൾ വെളിപ്പെടുത്തുന്ന ഒരു വീഡിയോ കാസറ്റ് കാണുകയുണ്ടായി. വിശ്വവിഖ്യാത മാജിഷ്യനായ ഡേവിഡ് കോപ്പർഫീൽഡ് തന്നെയാണ് മുഖംമൂടിയിട്ട് വന്ന് ആ പരിപാടി ചെയ്തത് എന്നാണ് കേട്ടത്. പക്ഷേ സത്യാവസ്ഥ അറിയില്ല.

ഇത്തരം പരിപാടികൾ കണ്ട് വന്നാൽ അത് എങ്ങനെ ചെയ്യുന്നു എന്ന് ഒരു ഏകദേശ ധാരണയെങ്കിലും ഉണ്ടാകുന്നതുവരെ എനിക്ക് ഉറക്കം നഷ്ടപ്പെടും. പലരുമായി അതേപ്പറ്റി സംസാരിക്കും. അങ്ങനെ ചില ആശയങ്ങൾ കിട്ടും. മെല്ലെ മെല്ലെ ഉറക്കം തിരികെ പിടിക്കും.

പറഞ്ഞു വരുന്നത് ഇന്നലെ മുതൽ നഷ്ടപ്പെട്ടിരിക്കുന്ന ഉറക്കത്തെ പറ്റിയാണ്.

കുറേയേറെ മാസങ്ങളായി മെന്റലിസ്റ്റ് ആദിയുടെ Mentalist Aathi സ്റ്റേജ് പ്രോഗ്രാമിന്റെ റീലുകൾ കാണുന്നു. എന്താണ് അവിടെ സംഭവിക്കുന്നത് എന്ന് റീലുകളിൽ കാണിക്കുന്നില്ലയെങ്കിലും, കണ്ടവർ കണ്ടവർ രേഖപ്പെടുത്തുന്ന അഭിപ്രായങ്ങളും അവരുടെ മുഖഭാവങ്ങളുമാണ് ഈ പരിപാടിയിലേക്ക് പിടിച്ചടുപ്പിച്ചത്. കൊച്ചിയിൽ ആദിയുടെ ഇൻസോംനിയ (Insomnia)* എന്ന പരിപാടി വരുമ്പോൾ കണ്ടിട്ട് തന്നെ ബാക്കി കാര്യം എന്ന് ഉറപ്പിച്ചു.

ഇന്നലെ വൈകിട്ട് അഞ്ചര മണിക്ക് തൃപ്പൂണിത്തുറ JT Pac-ൽ ആയിരുന്നു പ്രോഗ്രാം. 5 മണിക്ക് ഗേറ്റ് അടക്കും എന്നാണ് അറിയിച്ചിരുന്നത്. അങ്ങനെയൊരു സാഹചര്യം ഉണ്ടാകാൻ അനുവദിക്കാതെ നേരത്തെ കാലത്തെ ഓഡിറ്റോറിയത്തിൽ ഇടംപിടിച്ചു. എല്ലാ ടിക്കറ്റുകളും അതിവേഗം വിറ്റ് തീരുന്ന ഒരു ഷോ ആണിത് എന്ന് പ്രത്യേകം ശ്രദ്ധിക്കുക.

മാജിക്കാണോ എന്ന് ചോദിച്ചാൽ അല്ല. പക്ഷേ മാജിക്കും ഉണ്ടെന്നു തോന്നുന്നു.

ഹിപ്നോട്ടൈസ് ചെയ്യുന്നുണ്ടോ എന്ന് ചോദിച്ചാൽ ഇല്ല. പക്ഷേ അതും സംഭവിക്കുന്നുണ്ടെന്ന് തോന്നുന്നു.

മെന്റലിസം ആണോ എന്ന് ചോദിച്ചാൽ, ആദി മെന്റലിസ്റ്റ് ആയതുകൊണ്ട് അതെ എന്ന് തന്നെ ആണ് ഉത്തരം. പക്ഷേ വെറും മെൻ്റലിസം മാത്രമല്ല.

ഇതൊക്കെ എങ്ങനെ സാധ്യമാകുന്നു?

വർഷങ്ങളുടെ തഴക്കവും പഴക്കവും പരിചയസമ്പന്നതയും കൊണ്ട്, സ്റ്റേജിലേക്ക് വിളിച്ചു വരുത്തുന്ന കാണികളുടെ മനസ്സ് വായിക്കാൻ പറ്റുമായിരിക്കാം. എന്നാലും ദൂരെയിരിക്കുന്ന ഒരാളോട് ഫോണിൽ സംസാരിച്ച് അയാളുടെ മനസ്സ് വായിക്കുന്നതെങ്ങനെ?

ആ രണ്ടര മണിക്കൂർ സംഭവിച്ച കാര്യങ്ങൾ, എങ്ങനെ ആദി സാദ്ധ്യമാക്കി എന്ന് ഇപ്പോഴും പിടി കിട്ടുന്നില്ല. പോകാതിരുന്നാൽ മതിയായിരുന്നു. ഒരു മനുഷ്യന്റെ ജീവിതത്തിലെ ഏറ്റവും പ്രധാനപ്പെട്ട കാര്യം ഉറക്കമാണ്. തീറ്റ പോലും അത് കഴിഞ്ഞേ വരൂ. (തീറ്റ കിട്ടിയില്ലെങ്കിൽ ക്ഷീണിച്ചു കിടന്നു ഉറങ്ങിക്കോളും. ഉറക്കം കഴിഞ്ഞാലേ പിന്നെ വിശപ്പ് വരൂ)

പോയ ബുദ്ധി ആന പിടിച്ചാൽ കിട്ടില്ലല്ലോ. ഉറക്കം പോയി. പോയേ പോച്ച്. ഇത് മറന്നാലേ ഇനി ഉറക്കം തിരികെ വരൂ. ഇതാണെങ്കിൽ ചോദ്യചിഹ്നങ്ങളായി തലയ്ക്കുചുറ്റും ആർത്ത് പറക്കുന്നു. ഉടനെയെങ്ങും തലയിൽ നിന്ന് പോകില്ല.

നിങ്ങൾ ജീവിതത്തിൽ ഉറക്കത്തിന് പ്രാധാന്യം നൽകുന്നവർ ആണെങ്കിൽ, ഒരു സംഭവം നടന്നാൽ അതെങ്ങനെ നടന്നു എന്ന് ലോജിക്കൽ തിങ്കിംഗ് നടത്തി അതിനുത്തരം കണ്ടെത്താൻ ശ്രമിക്കുന്ന ഒരാളാണെങ്കിൽ, ഈ പരിപാടി കാണാൻ ഒരിക്കലും പോകരുത്. ഉറക്കം നഷ്ടപ്പെടും.

വാൽക്കഷണം:- * Insomnia is a common sleep disorder characterized by persistent difficulty falling asleep, staying asleep, or waking up too early.

#mentalistaathi
#mentalist

സർക്കാർ സംവിധാനത്തിൽ ഉണ്ടാക്കിയ ശേഷം പൊളിഞ്ഞ് തകരുന്നതായി ഏറ്റവും കൂടുതലായി നാം കാണുന്നത് റോഡുകളാണ്. റോഡുപണി എന്ന് പറഞ്ഞാൽത്തന്നെ അഴിമതിയുടെ കൂത്തരങ്ങാണ്. PWD എന്ന വെള്ളാന ഒരുകാലത്തും കറുക്കാൻ പോകുന്നില്ല.

ഹൈക്കോടതി കെട്ടിടവും നിയമസഭാ കെട്ടിടവും ചോർന്നൊലിക്കാത്തതും ഇടിഞ്ഞ് വീഴാത്തതും ഇരിക്കുന്ന കൊമ്പ് മുറിക്കരുത് എന്ന സമാന്യബുദ്ധി അഴിമതിക്കാർക്ക് ഉള്ളതുകൊണ്ട് മാത്രമാണ്. ഹൈക്കോടതി കെട്ടിടത്തിൻ്റെ അവസ്ഥയും അത്ര ഗംഭീരമൊന്നും അല്ല. അതുകൊണ്ടുകൂടെ ആകണം അവിടന്ന് മാറാനുള്ള ശ്രമങ്ങൾ നടത്തുന്നത്.

എന്തായാലും പാവപ്പെട്ടവന് വേണ്ടി പണിയുന്ന വീടുകളും ഫ്ലാറ്റുകളുമൊക്കെ ചെറുചില്ലകൾ മാത്രമാണ്. അതിൽ നിന്ന് കക്കാനുള്ളതിൻ്റെ പരമാവധി ഈ അഴിമതിക്കാർ കട്ട് കീശയിലാക്കും. അതിൻ്റെ ഏറ്റവും പുതിയ തെളിവാണ് ഒരു വർഷം മാത്രം പഴക്കമുള്ള മുണ്ടൻവേലിയിൽ ലൈഫ് പദ്ധതി പ്രകാരം ഉണ്ടാക്കിയ ഫ്ലാറ്റുകൾ.

കനാലിൻ്റെ പുറമ്പോക്കിൽ ജീവിച്ചിരുന്നപ്പോൾ, കനാലിൽ വെള്ളം പൊങ്ങുമ്പോൾ മാത്രമാണ് അവർക്ക് ദുരിതം ഉണ്ടായിരുന്നത്. പക്ഷേ ലൈഫിൻ്റെ ഫ്ലാറ്റിൽ ഒരോ ചെറുമഴയും അവർക്ക് പേടിസ്വപ്നമാണ്.

1. ചോർന്നൊലിക്കുന്ന മേൽക്കൂര.

2. അടുക്കളയിൽ ഭക്ഷണം പാകം ചെയ്യണമെങ്കിൽ കുടപിടിച്ച് നിൽക്കണമെന്ന അവസ്ഥ.

3. ബ്ലോക്ക് ആകുന്ന ശുചിമുറി സംവിധാനങ്ങൾ.

4. സെപ്റ്റിക്ക് ടാങ്കുകളുടെ അവസ്ഥയും പരിതാപകരം.

5. ഓടകളോ കാനകളോ കെട്ടിടത്തിന് ചുറ്റും ഇല്ല.

അധികം വൈകാതെ ഈ കെടിടം നിലം പൊത്തുക തന്നെ ചെയ്യും. അതിന് മുന്നേ ജീവഭയം കാരണം ഇവിടത്തെ അന്തേവാസികൾ മറ്റേതെങ്കിലും പുറമ്പോക്കിലേക്ക് ചേക്കേറും.

കേരളത്തിൽ വീട് ഇല്ലാത്തവർ ആരുമില്ല എന്ന സ്ഥാപിച്ചെടുക്കാനും പ്രഖ്യാപനം നടത്താനുമൊക്കെ എളുപ്പമാണ്. പക്ഷേ, പ്രഖ്യാപനം കഴിഞ്ഞ് അധികം വൈകാതെ കൂട്ടത്തോടെ വീടില്ലാതായിപ്പോകുന്ന ഏക സംസ്ഥാനം എന്ന ചീത്തപ്പേരും കേരളത്തിനുണ്ടാകും.

ലൈഫ് പദ്ധതിയുടെ ഓരോ നിർമ്മാണവും ഇത്തരത്തിൽ അഴിമതി നിറഞ്ഞതാണ്. ഇതിൽ നിന്നൊരു മോചനം കേരളജനതയ്ക്ക് ഇല്ലേ? ഇതിനൊന്നും ഒരു പരിഹാരവും ഇല്ലെന്നാണോ? വോട്ട് ചോദിച്ച് പോലും അങ്ങോട്ട് ആരും ചെല്ലാത്ത അവസ്ഥ. സ്വന്തമായി സ്ഥാനാർത്ഥികളെ നിർത്തി പോരാടാൻ തയ്യാറെടുക്കുന്ന പൊതുജനം വേദനിപ്പിക്കുന്ന കാഴ്ച്ച തന്നെയാണ്.

ആരാധനാലയങ്ങൾ കട്ട് കടത്തിയാലും ചോർന്നൊലിച്ചാലും അതിനകത്തിരിക്കുന്ന (ഇരിക്കുന്നുണ്ടെങ്കിൽ) ദേവീദേവന്മാർക്ക് ഒന്നും സംഭവിക്കാൻ പോകുന്നില്ല. തോർത്ത് മാത്രം ചുറ്റി പൂജ ചെയ്യുന്ന ശാന്തിക്കാരൻ ചെറുതായൊന്ന് നനഞ്ഞെന്ന് വരും. അത്രേയുള്ളൂ.

പക്ഷേ അതുപോലല്ല ജനങ്ങൾ വസിക്കുന്ന ഇടങ്ങൾ ചോർന്നൊലിച്ചാൽ. ഇതൊക്കെ കട്ട് മുടിച്ചവരോടും കൃത്യമായി ജോലി ചെയ്യാതെ പോയവരോടുമൊക്കെ കാലം കണക്ക് ചോദിക്കുക തന്നെ ചെയ്യും. അക്കാലം അത്ര വിദൂരമൊന്നുമല്ല.

വീഡിയോ കണ്ട് മനസ്സിലാക്കൂ…

വോട്ടേഴ്സ് ലിസ്റ്റ് പരിഷ്ക്കരിക്കുന്നതിന്റെ ഭാഗമായി നടക്കുന്ന SIR(Special Intensive Revision) ഫോം പൂരിപ്പിക്കുന്നതിലുള്ള പ്രശ്നങ്ങളെപ്പറ്റി കഴിഞ്ഞ ദിവസം ഞാനൊരു പോസ്റ്റ് ഇട്ടിരുന്നു. ഒരുപാട് ആശങ്കകളും സങ്കീർണ്ണതകളും ആണ് പലരും അതിന് താഴെ പങ്കുവെച്ചത്.

ഗസറ്റഡ് റാങ്കിന് താഴെ നിന്ന് തുടങ്ങി ഓഫീസ് അറ്റൻ്റഡ് വരെയുള്ള സർക്കാർ ഉദ്യോഗസ്ഥർക്കും ആശാ ജീവനക്കാർക്കും അംഗൻവാടി ജീവനക്കാർക്കും ആണ് BLO ഡ്യൂട്ടി നൽകിയിരിക്കുന്നത്. ഇപ്രാവശ്യം അദ്ധ്യാപകരെ വലിയ തോതിൽ ഒഴിവാക്കിയിട്ടുണ്ട്.

എൻ്റെ പോസ്റ്റ്‌ വായിച്ച ശേഷം എറണാകുളത്തുള്ള ഒരു BLO സുഹൃത്ത് ഇന്ന് രാവിലെ എന്നെ വിളിച്ച് സംസാരിച്ചു. ഈ ജോലി അയാൾക്ക് നൽകിക്കൊണ്ടിരിക്കുന്ന സമ്മർദ്ദമാണ് മുഴുനീളെ പറഞ്ഞത്. എത്ര മോശം അവസ്ഥയിലൂടെ ആണ് അയാൾ പോയിക്കൊണ്ടിരിക്കുന്നത് എന്ന് ഒറ്റയടിക്ക് എനിക്ക് ബോദ്ധ്യമായി. എങ്കിലും അതൊന്ന് അനുഭവിച്ചറിയാൻ തന്നെ തീരുമാനിച്ച് ഞാൻ അദ്ദേഹത്തോടൊപ്പം ഇന്ന് ഫീൽഡിൽ സഹായിക്കാൻ ചെല്ലാമെന്ന് ഏറ്റു.

എൻ്റെ BLO സുഹൃത്ത് ഏത് ബൂത്തിലെ ഓഫീസർ ആണെന്നും അദ്ദേഹത്തിന്റെ പേര് എന്താണെന്നും അദ്ദേഹത്തിന്റെ ജോലിയുടെ സുരക്ഷ പരിഗണിച്ച് ഞാൻ ഇവിടെ വെളിവാക്കുന്നില്ല. തൽക്കാലം നമുക്കദ്ദേഹത്തെ മിഥുൻ എന്ന് വിളിക്കാം. 1400ൽപ്പരം വോട്ടർമാരാണ് അദ്ദേഹത്തിൻ്റെ ബൂത്തിൽ ഉള്ളത്. അദ്ദേഹത്തിൻ്റെ ബൂത്ത് നമ്പർ ‘തൃത്താല 2X’ എന്ന് സങ്കൽപ്പിക്കുക.

തുടർന്നങ്ങോട്ട് അദ്ദേഹത്തിനൊപ്പം ഇന്ന് രാവിലെ 10 മണി മുതൽ വൈകീട്ട് 5 മണിവരെ ഫീൽഡിൽ വോട്ടർമാരെ കാണാൻ പോയ അനുഭവവും അദ്ദേഹം നേരിടുന്ന ജോലി സമ്മർദ്ദവുമാണ് ഞാൻ അക്കമിട്ട് പങ്കുവെക്കുന്നത്.

1. ഒരു വോട്ടർക്ക് രണ്ട് അപേക്ഷാ ഫോം (ഒന്ന് വോട്ടറുടെ കോപ്പി, ഒന്ന് ഇലക്ഷൻ കമ്മീഷൻ്റെ കോപ്പി) എന്ന തോതിൽ 2800 A4 ഷീറ്റുകളും ചുമന്ന് വേണം മിഥുൻ ഫീൽഡിൽ പോകാൻ. ഓരോ BLOയും അത്തരത്തിൽ ശരാശരി 2500 ഷീറ്റുകൾ ചുമന്നു കൊണ്ടാണ് ഫീൽഡിൽ നടക്കുന്നത്.

2. ‘തൃത്താല 2X’ ബൂത്തിലെ ഒരു വോട്ടറുടെ അഡ്രസ്സ് വോട്ടേർസ് ലിസ്റ്റിൽ ഉള്ളത് അതേപടി (ഇത് ശരിക്കുള്ള പേരും വയസ്സും അഡ്രസ്സും ആണ്.) ഞാൻ ചിത്രം 2ൽ ചേർക്കുന്നു. അതിങ്ങനെയാണ്.

പേര്:- തോമസ്
അച്ഛന്റെ പേര്:- തോമസ്
വീട്ടു നമ്പർ:- 0/
പ്രായം:- 72
ലിംഗം:- പുരുഷൻ

സ്ഥലം ‘തൃത്താല’ ആണെന്ന് അറിയാം ബൂത്ത് ’2X’ ആണെന്ന് അറിയാം. ഇങ്ങനെ ഒരു വോട്ടർ തൃത്താല എന്ന ആ പ്രദേശത്ത് ഏതു വീട്ടിൽ ജീവിക്കുന്നു എന്ന് എങ്ങനെ കണ്ടുപിടിക്കും?

ഓരോ വോട്ടർമാരുടെയും കഥ ഇങ്ങനെയാണ്. അവരുടെ പോസ്റ്റൽ അഡ്രസ്സൊന്നും വോട്ടേഴ്സ് ലിസ്റ്റിൽ ഇല്ല. ഉണ്ടെങ്കിൽ തന്നെ പോസ്റ്റൽ ജീവനക്കാരെപ്പോലെ ആ വീട് കണ്ടുപിടിക്കാൻ ഒരു BLOയ്ക്ക് കഴിയുമോ? കഴിഞ്ഞാൽത്തന്നെ അതിന് മണിക്കൂറുകളോളം സമയം എടുക്കും.

3. ശരാശരി 45 വോട്ടർമാരെയെങ്കിലും ഒരു ദിവസം കണ്ട് തീർത്താൽ ഒരു മാസം കൊണ്ട് 1400 വോട്ടർമാർക്കും SIR ഫോം വിതരണം ചെയ്യാൻ മിഥുന് കഴിയും. ഇന്ന് ഞായറാഴ്ച ദിവസം പോലും മിഥുൻ ജോലിയെടുക്കുകയാണ് എന്ന് മറക്കരുത്. 8 മണിക്കൂർ ജോലി ചെയ്ത്, ഒരു വീട് കണ്ടെത്താൻ ഏറ്റവും കുറഞ്ഞത് 30 മിനിറ്റ് സമയം എടുത്താൽ 16 വീടുകളിൽ എത്താം. ഓരോ വീട്ടിലും ശരാശരി 3 വോട്ടർമാരെ കിട്ടിയാൽ 48 വോട്ടർമാർക്ക് ഫോമുകൾ നൽകാം. പക്ഷേ അത് സാധിക്കുന്നില്ല. മിഥുനും ഞാനും കിണഞ്ഞ് പരിശ്രമിച്ചിട്ട് ഇന്ന് കാണാൻ സാധിച്ചത് 28 വോട്ടർമാരെ മാത്രമാണ്. പത്തോളം വോട്ടർമാരിൽ നിന്ന് പൂരിപ്പിച്ചുവെച്ച ഫോം ശേഖരിക്കുകയും ചെയ്തു. അതിൽ കൂടുതൽ വോട്ടർമാരെ ഒരു BLO ഒറ്റ ദിവസം കൊണ്ട് കാണുന്നുണ്ടെങ്കിൽ അത് ഏതെങ്കിലും ഫ്ലാറ്റ് സമുച്ചയത്തിൽ അല്ലാതെ സാദ്ധ്യമല്ല.

4. മിഥുന് 300 ഫോമുകൾ ലഭിക്കുന്നത് നവംബർ 4ന് ആണ്. ഡിസംബർ നാലിന് മുൻപ് ജോലി തീർക്കണം എന്നാണ് അറിയിച്ചിരുന്നത്. മിഥുന്റെ ശരിയായ സർക്കാർ ജോലിയിൽ നിന്ന് പൂർണ്ണമായ വിടുതൽ നൽകിയിട്ടുണ്ട്. നവംബർ 7ന് 400 ഫോമുകൾ കൂടെ മിഥുന് ലഭിക്കുന്നു. ബാക്കിയുള്ള 700 ഫോമുകൾ ലഭിക്കുന്നത് നവംബർ 8ന് ആണ്. അപ്പോഴേക്കും കുറെ വീടുകൾ സന്ദർശിച്ച് ആ വീടുകളിലെ ചില ഫോമുകൾ മിഥുൻ നൽകിക്കഴിഞ്ഞു. അപ്പോഴാണ് അതേ വീട്ടിലെ മറ്റ് വോട്ടർമാരുടെ ഫോമുകൾ കയ്യിൽ വരുന്നത്. ആ വീടുകളിൽ വീണ്ടും പോകേണ്ടി വരുന്നു. ചുരുക്കിപ്പറഞ്ഞാൽ ഇരട്ടിപ്പണി. ഇങ്ങനെ മൂന്ന് പ്രാവശ്യം പോയ വീടുകൾ വരെ ഉണ്ട്.

5. വീടുകൾ തപ്പി കണ്ടുപിടിച്ച് ചെന്നാലുള്ള അവസ്ഥ പറയുകയും വേണ്ട. അടച്ചിട്ട വീടുകൾ, നായ്ക്കൾ ഉള്ള വീടുകൾ, അകത്തുനിന്ന് ശബ്ദം കേൾക്കാമെങ്കിലും ബെല്ലടിച്ചാൽ തുറക്കാത്ത വീടുകൾ, അൽപ്പം തിരക്കിലാണ് പോയിട്ട് പിന്നെ വരൂ എന്ന് പറയുന്നവർ, നൂറായിരം സംശയങ്ങൾ ഉള്ള വോട്ടർമാർ, BLOയുടെ ഐഡി കാർഡ് കാണിക്കൂ എന്ന് പറഞ്ഞ് ഒരു BLO സഹോദരിയുടെ ചുരിദാറിൻ്റെ ഷോള് പിടിച്ചു വലിച്ച വോട്ടർക്കെതിരെ BLO പരാതി നൽകിയിട്ടുണ്ട് ഇന്ന്.

6. ആദ്യമാദ്യം ഫോമുകൾ ഒറ്റയടിക്ക് പൂരിപ്പിച്ച് കൊണ്ടുവരുകയാണ് മിഥുൻ ചെയ്തിരുന്നത്. രണ്ടാമത് ആ വീട്ടിൽ പോകാതിരിക്കാൻ ആ നടപടിയാണ് നല്ലത്. അപ്പോഴേക്കും മുകളിൽ നിന്ന് ഉത്തരവ് വന്നു. “ഫോമുകൾ നൽകി മടങ്ങി പോരുക പൂരിപ്പിച്ച ഫോമുകൾ വാങ്ങാനായി പിന്നീട് വീണ്ടും പോകുക.” വീണ്ടും ഇരട്ടിപ്പണി. ഓരോ ദിവസവും ഇത്രയധികം ഫോമുകൾ വിതരണം ചെയ്തു എന്ന് മേനി നടിക്കാൻ വേണ്ടി മാത്രമായിരുന്നു ഈ നടപടി. എന്നിട്ടോ?…

7. എന്നിട്ടും മേൽ ഉദ്യോഗസ്ഥന്മാർ ഉദ്ദേശിച്ച ടാർഗറ്റ് എത്താതെ വന്നപ്പോൾ, BLO മാരും അവരെ നയിക്കുന്ന വില്ലേജ് ഓഫീസർമാർ അടക്കമുള്ള വാട്സ്ആപ്പ് ഗ്രൂപ്പുകളിൽ സന്ദേശം വന്നു. “നിങ്ങൾ ഫോം വിതരണം ചെയ്തിട്ടില്ലെങ്കിലും എല്ലാ ദിവസവും നിശ്ചിത എണ്ണം ഫോമുകൾ നൽകിയെന്ന് കള്ളക്കണക്ക് സമർപ്പിക്കുക. ഇവിടുന്നാണ് ജോലി സമ്മർദ്ദത്തിൻ്റെ മറ്റൊരു വശം ആരംഭിക്കുന്നത്. കള്ളക്കണക്ക് പ്രകാരമുള്ള അത്രയും ഫോമുകൾ ശരിക്കും വിതരണം ചെയ്യാൻ പിന്നെ എപ്പോൾ സമയം കിട്ടും ഒരു BLOയ്ക്ക്? ഈ കള്ളക്കണക്കുകൾ കാണിച്ച് ഏറ്റവും മുകളിലുള്ള ഉദ്യോഗസ്ഥരായ ജില്ലാ കളക്ടർമാരെ പ്രീണിപ്പിക്കുകയാണ് ഇടയിലുള്ള ഉദ്യോഗസ്ഥന്മാർ.

8. അപ്പോഴേക്കും മുകളിൽ നിന്ന് ഉത്തരവ് വന്നു. നവംബർ 15ന് മുൻപ് എല്ലാ ഫോമുകളും വിതരണം ചെയ്യണം. അതോടൊപ്പം ഫോമുകൾ 10% വെച്ച് തിരികെ ശേഖരിക്കുകയും വേണം. 46 വോട്ടർമാർക്ക് പകരം 92 വോട്ടർമാരെ ഒരു ദിവസം കാണണമെന്ന അവസ്ഥ. പാവം BLO-മാർ നിന്ന് വിയർത്തു.

9. എന്തായാലും മേൽപ്പടി കള്ളക്കണക്ക് പ്രകാരമുള്ള എണ്ണമാണ്, എറണാകുളം ജില്ലാ കളക്ടർ ടിവിയിൽ വന്നിരുന്ന് മേനി പറഞ്ഞത്. “26 ലക്ഷം വോട്ടർമാരിൽ 20 ലക്ഷം വോട്ടർമാർക്ക് ഫോമുകൾ വിതരണം ചെയ്തു കഴിഞ്ഞു എന്നായിരുന്നു എറണാകുളം ജില്ലാ കളക്ടർ പ്രിയങ്ക ഇന്നലെ പറഞ്ഞത്. അത് കള്ളക്കണക്കാണ് മാഡം. A day with BLO എന്ന താങ്കളുടെ വീഡിയോ റീലുകളും കള്ളത്തരമാണ്. ഏതെങ്കിലും ഒരു BLOയുടെ കൂടെ 8 മണിക്കൂർ പൂർണ്ണമായും സഞ്ചരിച്ച് മറ്റാരുടെയും സഹായമില്ലാതെ 50ന് മുകളിൽ വോട്ടർമാരെ ഒരു ദിവസം കാണാൻ പറ്റുമോ എന്ന് മാഡം ഒന്ന് ശ്രമിച്ചു നോക്കൂ. അപ്പോൾ പിടികിട്ടും ആ കള്ളത്തരത്തിന്റെ ആഴം. മാഡത്തിനും BLO-മാർക്കും ഇടയിലുള്ള ഉദ്യോഗസ്ഥരുടെ പൂച്ച് അപ്പോൾ പുറത്ത് ചാടും. ഞാൻ വെല്ലുവിളിക്കുന്നു അങ്ങനെ ഒന്ന് ചെയ്യാൻ. ആ ദിവസം ഞാനും കൂടാം നിങ്ങൾക്കൊപ്പം. ഇപ്പോൾ വീഡിയോകളിൽ മാഡം കാണിക്കുന്നത് കൃത്യമായ അഡ്രസ്സ് മനസ്സിലാക്കിയ വോട്ടർമാരുടെ അടുത്തേക്ക് ചെന്ന് കയറി ഫോം നൽകുന്നതായിട്ടാണ്. അങ്ങനെ ഒന്നല്ല യഥാർത്ഥത്തിൽ സംഭവിക്കുന്നത്. കളക്ടർ വന്നതുപോലെ ഒരു കൂട്ടം ആൾക്കാർ വരുമെന്നാണ് പല വോട്ടർമാരും കരുതി വെച്ചിരിക്കുന്നത്. “ഒറ്റയ്ക്ക് ഉള്ളോ? ബാക്കിയുള്ളവർ എവിടെ? ” എന്നാണ് BLO-മാരോട് വോട്ടർമാർ ചോദിക്കുന്നത്. കളക്ടർ ചെല്ലുമ്പോൾ ഉള്ള ആർഭാടമൊന്നും BLO-മാർക്ക് ഇല്ലല്ലോ. അത് പ്രിയങ്കാ മാഡം മനസ്സിലാക്കണം.

10. അത് അടക്കം BLO-മാർ നേരിടുന്ന പ്രശ്നങ്ങൾ കളക്ടർമാരും വില്ലേജ് ഓഫീസർമാരും മനസ്സിലാക്കിയിരുന്നെങ്കിൽ, ഇന്ന് പയ്യന്നൂരിൽ അനീഷ് ജോർജ് എന്ന BLO, ജോലി സമ്മർദ്ദം കാരണം ആത്മഹത്യ ചെയ്യേണ്ട അവസ്ഥ ഉണ്ടാകുമായിരുന്നില്ല. ജോലി സമ്മർദ്ദം ഉണ്ടെന്ന് ഒരിടത്തു നിന്നും പരാതി കിട്ടിയിട്ടില്ല എന്നാണ് കേരള ഇലക്ഷൻ കമ്മീഷൻ രത്തൻ കേൽക്കർ ആ ആത്മഹത്യയെപ്പറ്റി അഭിപ്രായപ്പെട്ടത്. താഴേക്കിടയിലുള്ള ഈ ജീവനക്കാർ ആരെങ്കിലും ജോലി സമ്മർദ്ദം ഉണ്ടെന്ന് നിങ്ങളോട് പരാതിപ്പെടും എന്ന് കരുതുന്നുണ്ടോ? അങ്ങനെ പറയുന്നതും ആത്മഹത്യാപരമല്ലേ? പിന്നെ എന്താകും ജോലിസ്ഥലത്ത് അവരുടെ അവസ്ഥ? നിങ്ങൾ ഇവരെയൊക്കെ വെച്ചു പൊറുപ്പിക്കുമോ?

11. കളക്ടറുമായി നേരിട്ട് സംസാരിക്കാൻ ഇട നൽകണമെന്ന് വാട്സ്ആപ്പ് ഗ്രൂപ്പിൽ BLOമാർ അഭിപ്രായപ്പെട്ടിട്ട് അതിനുള്ള അവസരം ഇടയിലുള്ള ഉദ്യോഗസ്ഥന്മാർ നൽകിയിട്ടില്ല. എന്തുകൊണ്ട്?

12. പല വാട്സ്ആപ്പ് ഗ്രൂപ്പുകളിലും BLOമാർ ചോദിക്കുന്ന ചോദ്യങ്ങൾ ഗ്രൂപ്പ് അഡ്മിൻമാർ ഡിലീറ്റ് ചെയ്ത് കളയുകയാണ്. എന്തുകൊണ്ട്? സംശയമുണ്ടെങ്കിൽ കളക്ടർ BLO-മാരുടെ വാട്സ്ആപ്പ് ഗ്രൂപ്പുകൾ പരിശോധിക്കൂ. പാറാവും അകമ്പടിയും വാഹനവും പത്രാസും ഒക്കെയായി നടന്നാൽ ബ്യൂറോക്രസിയുടെ താഴെത്തട്ടിലുള്ള കദനകഥകൾ അറിവിൽപ്പെടില്ല മാഡം.

13. ഇങ്ങനെയൊരു കള്ളക്കണക്ക് ഉണ്ടാക്കി ഒരു മാസത്തിന് മുന്നേ തന്നെ ഞങ്ങൾ എല്ലാ ഫോമുകളും വിതരണം ചെയ്ത് SIR പൂർത്തിയാക്കി എന്ന് കാണിച്ചിട്ട് എന്ത് നേട്ടമാണ് ബഹുമാനപ്പെട്ട കളക്ടർക്ക് ഉള്ളത്? ഈ അതിവേഗ നടപടി കളക്ടറുടെ സ്വന്തം തീരുമാനമാണോ അതോ ഭരണതലത്തിൽ മുകളിൽ നിന്നുള്ള ഉത്തരവോ? SIR എന്ന ഈ ധൃതഗതിയിലുള്ള പരിപാടി സംശയദൃഷ്ടിയോടെ പൊതുജനങ്ങൾ നോക്കിക്കാണുമ്പോൾ, ഇത്തരം തിരക്കുപിടിച്ചുള്ള നടപടികൾ അനീഷിനെ പോലുള്ളവരുടെ മരണത്തിലേ കലാശിക്കൂ.

14. എല്ലാ ഫോമിൻ്റേയും മുകളിൽ BLO-മാരുടെ മൊബൈൽ ഫോൺ അച്ചടിച്ചിട്ടുണ്ട്. ഫോം കൈപ്പറ്റിയ വോട്ടർമാർ അത് പൂരിപ്പിക്കാനുള്ള ആശങ്കയിൽ വിളിക്കുന്ന ഫോണുകളുടെ എണ്ണം കുറച്ചൊന്നുമല്ല. അതിനും സമയം കണ്ടെത്തണം BLO-മാർ.

15. BLO-മാർക്ക് ജോലി സമ്മർദ്ദം ഉണ്ടോ എന്ന് മനസ്സിലാക്കാനായി അതിൽ ഒരാൾക്കൊപ്പം പോയ ഞാൻ ഉച്ചയോടെ അനീഷിന്റെ ആത്മഹത്യാ വിവരം കേൾക്കുന്നു. ഇനിയും അത്തരം മോശം വാർത്തകൾക്ക് സാദ്ധ്യതയുണ്ടെന്ന് നേരിട്ട് മനസ്സിലാക്കുന്നു. ഇതൊന്നും എന്നെപ്പോലുള്ള സാധാരണ പൗരന്മാർ ഏറ്റെടുത്ത് ചെയ്യേണ്ട ജോലിയല്ല. നാലാം തൂണുകൾ ആകുന്ന മാധ്യമങ്ങൾക്ക് നല്ല സ്കോപ്പുള്ള വിഷയമാണ്. നിങ്ങളാരെങ്കിലും ഏറ്റെടുക്കണമെന്ന് അപേക്ഷിക്കുന്നു. അല്ലെങ്കിൽ നമുക്കുള്ള വോട്ട് തയ്യാറാക്കി തീർക്കുമ്പോഴേക്കും ഒരുപാട് അനീഷുമാർ, ജോലി സമ്മർദ്ദം താങ്ങാനാവാതെ ഇവിടെ കുഴഞ്ഞ് വീണിരിക്കും. അതുണ്ടാകാൻ പാടില്ല.

16. ഇന്നത്തെ ജോലിക്ക് വേണ്ടി 2 ലിറ്ററിന് മുകളിൽ പെട്രോൾ മിഥുൻ ചിലവഴിച്ചിട്ടുണ്ട്. മിഥുന്റെ സ്കൂട്ടറിൽ ആയിരുന്നു ഞങ്ങൾ രണ്ടുപേരും ഫീൽഡിൽ പോയത്. 30 ദിവസം അങ്ങനെ ഫീൽഡിൽ സഞ്ചരിച്ചാൽ 6000 രൂപയെങ്കിലും മിഥുന് ചിലവുണ്ട്. അത്രയും തുക BLOമാർക്ക് നൽകും എന്ന് ഔദ്യോഗികമായി എവിടെ നിന്നും അറിയിപ്പുകൾ വന്നിട്ടില്ല. ₹7000 രൂപ കൊടുക്കും എന്ന് ചില അശരീരികൾ മാത്രമാണ് ഉള്ളത്. സ്വന്തമായി ഒരു സ്കൂട്ടറോ മറ്റ് എന്തെങ്കിലും വാഹനമോ ഇല്ലാത്തവർ 3000 ഷീറ്റുകൾ താങ്ങിപ്പിടിച്ച് എങ്ങനെയാണ് ഫീൽഡിൽ സഞ്ചരിക്കുക. അതുകൂടെ ഇലക്ഷൻ കമ്മീഷനും കളക്ടറും സർക്കാരും ഒന്ന് പറഞ്ഞു തരണം.

SIR നടപ്പിലാക്കാൻ കേന്ദ്രം കാണിക്കുന്ന തിടുക്കത്തേക്കാൾ വലിയ തിടുക്കം സംസ്ഥാനം കാണിക്കുന്നത് എന്തിനാണ്? BLO-മാർക്ക് ആവശ്യത്തിന് സമയം നൽകണം. ‘ആരും തിരക്കു പിടിച്ചിട്ടില്ല’ എന്ന് ഇലക്ഷൻ കമ്മീഷണർ പറയുന്നതിൽ വാസ്തവം ഉണ്ടെങ്കിൽ ഇപ്പോൾ കാണിക്കുന്ന തിരക്ക് കളക്ടർമാർ ഒഴിവാക്കണം. സർക്കാർ അല്ല തിരക്ക് പിടിക്കുന്നതെങ്കിൽ കളക്ടർമാരെ നിലയ്ക്ക് നിർത്തണം.

ഫോം നൽകിയ വീടുകളിൽ വീണ്ടും പോയി, പൂരിപ്പിച്ച ഫോമുകൾ തിരിച്ച് വാങ്ങിയശേഷം അതിനെ ഡിജിറ്റൈസ് ചെയ്യുന്നത് അടക്കമുള്ള ഒരുപാട് പണികൾ BLO-മാർക്ക് ബാക്കിയുണ്ട്. ഇതൊന്നും അവർ സ്ഥിരം ചെയ്യുന്ന ജോലികൾ അല്ല. ഇത്രയും കാരണങ്ങൾ പോരേ അവർക്ക് ജോലി സമ്മർദ്ദം ഉണ്ടെന്ന് മനസ്സിലാക്കാൻ?

അനീഷിന്റെ ആത്മഹത്യയിൽ അനുശോചനം രേഖപ്പെടുത്തിക്കൊണ്ടും സർക്കാറിനോട് പ്രതിഷേധം അറിയിച്ചുകൊണ്ടും നാളെ കേരളത്തിൽ BLO-മാർ പണിമുടക്കുന്നു എന്നാണ് ഞാൻ മനസ്സിലാക്കുന്നത്. അവരെല്ലാവരും സമ്മർദ്ദത്തിലാണ്. ഇനിയും ആത്മഹത്യകൾ ഉണ്ടാകാതിരിക്കാൻ അവരുടെ പ്രശ്നങ്ങൾ മനസ്സിലാക്കി അവർക്കൊപ്പം നിൽക്കണമെന്ന് സർക്കാരിനോടും കളക്ടർമാരോടും ഇലക്ഷൻ കമ്മീഷനോടും അഭ്യർത്ഥിക്കുന്നു.

ഈ ജോലിയിൽ BLO-മാരെ കാര്യമായി സഹായിക്കാൻ പറ്റുന്നത്, BLA(Booth Level Agent)മാർക്ക് ആണ്. അവർക്ക് എല്ലാ വീടുകളും ഏറെക്കുറെ അറിയാം. ഇന്ന് മിഥുനും എനിക്കും അങ്ങനെ ചില ബൂത്ത് ഏജന്റുമാരുടെ സഹായം അല്പസ്വല്പം ലഭിച്ചു. ചില വീടുകൾ അവർ കാണിച്ചു തന്നു. പക്ഷേ അവർക്ക് കൂടുതൽ സഹായിക്കാൻ പറ്റുന്നില്ല. കാരണം അവർ പഞ്ചായത്ത് തെരഞ്ഞെടുപ്പിന്റെ പ്രചാരണത്തിലും പോസ്റ്റർ ഒട്ടിക്കുന്നതിന്റെ തിരക്കിലും ആണ്.

ഇന്നലെ ഒരു പാർട്ടിയുടെ ബൂത്ത് ഏജന്റ് മിഥുനെ സഹായിക്കാൻ ഉണ്ടായിരുന്നു. അപ്പോൾ മറ്റൊരു പ്രശ്നം തലപൊക്കി. മിഥുൻ എന്ന BLO- യുമായി ചേർന്ന്, ബൂത്ത് ഏജന്റ് ഇലക്ഷൻ പ്രചരണം നടത്തുകയാണ് എന്നൊരു ആരോപണം വന്നു. ചുരുക്കി പറഞ്ഞാൽ എല്ലാ പാർട്ടികളുടെയും ബൂത്ത് ഏജന്റുമാരും ചേർന്ന് സഹകരിച്ച് മാത്രമേ BLOയ്ക്ക് അവരുടെ പണി ചെയ്യാൻ പറ്റൂ. അല്ലെങ്കിൽ അത് പാർട്ടി പ്രവർത്തനമായി ചിലരെങ്കിലും കണക്കാക്കും.

ഒരു കാര്യം ബൂത്ത് ഏജന്റുമാരും മനസ്സിലാക്കുക. ഈ വോട്ടേഴ്സ് ലിസ്റ്റ് നല്ല നിലക്ക് തയ്യാറാക്കാൻ സാധിച്ചില്ലെങ്കിൽ അടുത്ത നിയമസഭാ തിരഞ്ഞെടുപ്പിന് ബൂത്ത് ഏജന്റുമാർ എന്ന നിലയ്ക്ക് നിങ്ങൾക്ക് കാര്യമായ പണിയൊന്നും ഉണ്ടാകില്ല. ജനത്തിന് വോട്ട് ഉണ്ടെങ്കിലല്ലേ ബൂത്ത് ഏജന്റുമാരെ ആവശ്യമുള്ളൂ.

പൊതുജനത്തിനോട് മറ്റൊരു അഭ്യർത്ഥനയാണ് എനിക്കുള്ളത്. നിങ്ങളുടെ പരിസരത്ത് ഈ ദിവസങ്ങളിൽ കാണാനിടയാകുന്ന ഏതൊരു BLO-യ്ക്കും, തൊട്ടടുത്ത വീടുകളും അവിടെയുള്ള വോട്ടർമാരെയും കണ്ടെത്താൻ സഹായിക്കൂ. ഒരു മണിക്കൂറെങ്കിലും അവർക്കൊപ്പം പ്രവർത്തിക്കൂ. നമ്മുടെ പൗരാവകാശത്തിന് വേണ്ടിയാണ് അവർ ഈ ജോലി സമ്മർദ്ദം നേരിടുന്നത്. അവർക്ക് ഒരു താങ്ങ് കൊടുക്കേണ്ട ചുമതല നമുക്കുണ്ട്. ജനാധിപത്യം സംരക്ഷിക്കപ്പെടാനുള്ള ഒരു വലിയ പോരാട്ടത്തിന്റെ ഭാഗമായാണ് BLO-മാർ ഇക്കണ്ട സമ്മർദ്ദമെല്ലാം സഹിക്കുന്നത്. അതിനൊരു അയവ് വരുത്താൻ നമ്മളെക്കൊണ്ട് കഴിയുന്ന പോലെ സഹായിക്കേണ്ട ഉത്തരവാദിത്വം നമുക്കുമുണ്ട്. BLO-മാരെ കൈവിടരുത്. അവരുടെ ജീവനെടുക്കരുത്.

അനീഷ് ജോർജ്ജിന് ആദരാഞ്ജലികൾ.