“പതിനാല് വയസ്സിൽ നിങ്ങൾ എന്ത് ചെയ്യുകയായിരുന്നു”…എന്നതാണ് കഴിഞ്ഞ കുറച്ച് ദിവസങ്ങളായി നേരിടുന്ന ഏറ്റവും വലിയ ചോദ്യം.

വൈഭവ് സൂര്യവംശി എന്ന കൗമാരക്കാരൻ(14), IPL ക്രിക്കറ്റ്‌ മത്സരങ്ങളിൽ കാഴ്ച്ച വെക്കുന്ന മിന്നുന്ന പ്രകടനങ്ങളാണ് ഈ ചോദ്യം ഉണ്ടാകാൻ കാരണം.

രാജസ്ഥാൻ റോയൽസിന് വേണ്ടി, ചെറുക്കൻ ഇന്നലെ ലോകോത്തര കളിക്കാരെയെല്ലാം അടിച്ച് പരത്തി ഏറ്റവും കുറഞ്ഞ പന്തുകളിൽ IPL സെഞ്ച്വറി നേടുന്ന രണ്ടാമത്തെ താരമായിരിക്കുന്നു. ആദ്യത്തെ കളിയിലെ ആദ്യ പന്ത് സിക്സർ അടിച്ചു കൊണ്ടാണ് ഈ യുവപ്രതിഭയുടെ തുടക്കം.

“ഇവൻ വീട്ടിൽ പറഞ്ഞിട്ടാണോ കളിക്കാൻ വന്നിരിക്കുന്നത്?”

“ചെറുക്കൻ്റെ കളി സ്ക്കൂൾ തുറക്കുന്നത് വരെയേ ഉള്ളൂ.”

എന്നൊക്കെയുള്ള രസകരമായ കമൻ്റുകളുമായാണ് കായിക ലോകം പയ്യൻസിൻ്റെ കളി ആഘോഷമാക്കുന്നത്.

പതിനാലാം വയസ്സിൽ, “ഇപ്പ വരാം” എന്ന് പറഞ്ഞ് ഒളിച്ച് പോയാണ് ചെറായി കടപ്പുറത്തും മാല്ല്യങ്കര കോളേജ് ഗ്രൗണ്ടിലും ക്രിക്കറ്റ് കളിച്ചിരുന്നത്. അതിൻ്റെ ഭാഗമായി കിട്ടിയതും ഇന്നും അസ്ക്കിതകൾ തരുന്നതുമായ രണ്ട് പരിക്കുകൾ മാത്രമാണ് ക്രിക്കറ്റിൽ നിന്നുള്ള ആകെ സമ്പാദ്യം.

പരിക്ക് 1:- ബൗണ്ടറി തടയാൻ പോയി ഇഴുകി വീണപ്പോൾ വലത് കൈയുടെ കുഴ തിരിഞ്ഞ് പോയി. വീട്ടിലറിയിതെക്കാതെ, പള്ളിപ്പുറം അങ്ങാടിയിലുള്ള ശിവദാസൻ എന്ന ഉഴിച്ചിലുകാരനെ കണ്ട് കുഴമ്പിട്ട് അത് റിപ്പയർ ചെയ്തെടുക്കാൻ മാസങ്ങളെടുത്തു. എന്തെങ്കിലും ഒന്ന് നീട്ടി എറിയുമ്പോൾ, വലത് കൈക്കുഴ ഇന്നും ആ പതിനാല് വയസ്സുകാരൻ്റെ വേദന മുഴുവൻ അയവിറക്കും.

പരിക്ക് 2:- ഫുൾ ടോസ് ബോൾ അതിർത്തി കടത്താൻ ശ്രമിച്ചെങ്കിലും സംഭവം കണക്റ്റ് ആയില്ല. ബോൾ വന്ന് ലാൻ്റ് ചെയ്തത് വായയിൽ. കുറെ നേരത്തേക്ക് മൊത്തം മരവിപ്പും ചോരയും മാത്രം. മരവിപ്പ് മാറിയപ്പോൾ മുകളിലെ പലകപ്പല്ല് ഒരെണ്ണം തൂങ്ങി ആടുന്നു. ചുണ്ട് കീറിപ്പറിഞ്ഞ് വീർത്തിരിക്കുന്നു. ഭാഗ്യം ബാക്കി പല്ലുകൾക്ക് ഒന്നും പറ്റിയിട്ടില്ല. ഒരാഴ്ച്ചയോളം പല്ല് നാക്കുകൊണ്ട് മുകളിലേക്ക് തള്ളിപ്പിടിച്ച് നടന്നു. പല്ലുതേക്കാൻ വയ്യ, എന്തെങ്കിലും ഒന്ന് കഴിക്കാനും വയ്യ. വീട്ടുകാരെ അറിയിക്കാതെ ആ കടമ്പയും ഒരു വിധം കടന്നുകൂടി. മുകൾ നിരയിലെ ആ പലകപ്പല്ലിന് ഇപ്പോഴും നിറവ്യത്യാസമുണ്ട്. 1mm താഴ്ന്നാണ് അത് ഇരിക്കുന്നത്.

പതിനാല് വയസ്സിൽ എന്ത് ചെയ്യുകയായിരുന്നു എന്ന് ചോദിച്ചാൽ ഇതൊക്കെയാണ് മറുപടി.

എന്തായാലും വൈഭവ് എന്ന മിടുക്കന് ഇനി സ്ക്കൂളിലൊന്നും പോകേണ്ടി വരില്ല. IPL ടീമുകൾ വലിയ തുകയ്ക്ക് അവനെ ലേലം വിളിക്കും. ഇന്ത്യൻ ടീമിലും പയ്യൻസ് കസറും. റെക്കോർഡുകൾ പലതും അവന് വഴിമാറും. വഴി തെറ്റി പോകാതിരുന്നാൽ, ഭാവിയിൽ ഇന്ത്യൻ ക്യാപ്റ്റൻ വരെ ആയെന്നിരിക്കും.

അഭിനന്ദനങ്ങൾ, ആശംസകൾ വൈഭവ് സൂര്യവംശി!

വാൽക്കഷണം:- 14 വയസ്സിൽ നിങ്ങൾ എന്ത് ചെയ്യുകയായിരുന്നു? അത് പറഞ്ഞിട്ട് പോയാമ്മതി.

വിഷയം ഗുസ്തി താരങ്ങൾക്ക് എതിരെ നടന്ന പീഡനമാണ്.

ആരോപണ വിധേയനായ ബ്രിജ് ഭൂഷൺ സിങ്ങിനെതിരെ ഒരന്വേഷണവും നടത്താതെ, അയാളെ ചേർത്ത് പിടിച്ച് സ്ത്രീപീഡനത്തെ പോത്സാഹിപ്പിക്കുന്നത്, രാജ്യത്തെ കായിക താരങ്ങളോട് ചെയ്യുന്ന കടുത്ത അനീതിയാണ്. ആരോപണ വിധേയൻ ഭരണകക്ഷിയുടെ ആളായതുകൊണ്ടും എം. പി. ആയതുകൊണ്ടും പൊലീസിനെ ഉപയോഗിച്ച് പരാതിക്കാരെ റോഡിൽ നേരിടുന്നത് ഒരു സർക്കാരിനും ഭൂഷണമല്ല.

ഈ വിഷയത്തിൽ പി. ടി. ഉഷയോടും ചിലത് പറയാനുണ്ട്. നിങ്ങളും ഒരു കായിക താരമായിരുന്നു. രാജ്യം ഏറ്റവും കൂടുതൽ ആഘോഷിച്ച ഒരു കായിക താരം. ഇപ്പോഴുള്ള എല്ലാ പത്രാസും പദവികളും ആ വഴിക്ക് വന്നതാണ്. എല്ലാം നിങ്ങളുടെ പരിശ്രമത്തിൻ്റെ ഫലം തന്നെ. പക്ഷേ, ഒക്കെയും നേടിക്കഴിയുമ്പോൾ വന്ന വഴി മറന്ന് പോകരുത്. ആരെങ്കിലും അധികാരത്തിൻ്റെ അപ്പക്കഷണങ്ങൾ നീട്ടിയിട്ടുണ്ടെങ്കിൽ അതിനായി മാത്രം കുരയ്ക്കരുത്.

നിങ്ങൾ സ്വന്തം നിലയ്ക്ക് അന്വേഷിക്കൂ പരാതിയിൽ പറഞ്ഞത് പോലെയുള്ള കാര്യങ്ങൾ നടന്നിട്ടുണ്ടോ എന്ന്. അത് സത്യമാണെന്ന് ബോദ്ധ്യമായാൽ പീഡിപ്പിക്കപ്പെട്ടവർക്ക് വേണ്ടി നിലവിലുള്ള മുഴുവൻ അധികാരവും ഉപയോഗിച്ച് പോരാടണം. എന്നിട്ടും വിജയിച്ചില്ലെങ്കിൽ ആ സ്ഥാനമാനങ്ങൾ ഇട്ടെറിഞ്ഞ് പയ്യോളിക്ക് പോരണം. അപ്പോളാണ് നിങ്ങൾ ശരിക്കുള്ള ഒരു കായിക താരമാവുക.

അതല്ലാതെയുള്ള ഏത് നടപടികളും, ഇതുവരെ നിങ്ങൾക്ക് നൽകിയ എല്ലാ കൈയടികളും മുൻകാല പ്രാബല്യത്തിൽ റദ്ദ് ചെയ്ത് പൂയ് പൂയ് വിളിക്കാൻ ഇടയാക്കുമെന്ന്, ഇന്നലെ ഒറ്റ ദിവസം കൊണ്ട് കിട്ടിയ ട്രോളുകൾ സാക്ഷ്യപ്പെടുത്തുന്നുണ്ടെന്ന് മനസ്സിലായിക്കാണുമല്ലോ?

കുറഞ്ഞ പക്ഷം ഒരു സ്ത്രീയുടെ മനസ്സോടെ ഇരകളുടെ സ്ഥാനത്ത് നിൽക്കുന്ന സ്ത്രീകൾക്ക് വേണ്ടി ചിന്തിക്കുക. അങ്ങനെ ചെയ്യുമ്പോളാണ് 10ൽ 1 സെക്കൻ്റിൽ വെങ്കലം നഷ്ടപ്പെട്ടിട്ടില്ല പി. ടി. ഉഷയ്ക്കെന്നും തനിത്തങ്ക മെഡലുമായാണ് ഞങ്ങളുടെ മനസ്സിലൊക്കെ നിങ്ങളുള്ളതെന്നും വീണ്ടും വീണ്ടും കൈയടിക്കാൻ ഞങ്ങൾക്കാവൂ.

എതിർപക്ഷക്കാർ പോലും ഉള്ളിൽ ആഗ്രഹിച്ചിരുന്നത് പോലെ മെസ്സി കപ്പിൽ മുത്തമിട്ടുകൊണ്ട് 2022ലെ ലോകകപ്പ് ഫുട്ബോൾ മാമാങ്കത്തിന് കൊടിയിറങ്ങി. രസം കൊല്ലിയായും ഏകപക്ഷീയമായും മുന്നോട്ട് നീങ്ങിക്കൊണ്ടിരുന്ന ഒരു കളിക്ക് എംമ്പാപ്പേ ജീവൻ പകർന്നു. ഇഞ്ചോടിഞ്ച് പോരാട്ടം കാണികളുടെ ഹൃദയമിടിപ്പ് കൂട്ടി. ഹൃദയം എന്നൊന്ന് ഇല്ലാത്ത എനിക്ക് പോലും രക്തസമ്മർദ്ദം കൂടിയത് തിരിച്ചറിയാനായി.

ഇനി ഇത്രയും ദിവസം ലോകരുടെ ഉറക്കം കെടുത്തുകയും ചങ്കിടിപ്പ് താളം തെറ്റിക്കുകയും ചെയ്ത ഈ കായിക മത്സരത്തിൻ്റെ അനുബന്ധ കാര്യങ്ങളെപ്പറ്റി ഒരു ചെറിയ വിലയിരുത്തലായാലോ?

ലോകകപ്പ് ക്രിക്കറ്റ് വരുമ്പോൾ ഇന്ത്യൻ കളിക്കാരെ പ്രോത്സാഹിപ്പിച്ചുകൊണ്ട് ഇത്രയധികം ഫ്ലക്സുകളും ബാനറുകളും കട്ടൗട്ടുകളും ഉയരാറുണ്ടോ എന്ന് ചോദിച്ചാൽ ഇല്ല എന്ന് തറപ്പിച്ച് ഉത്തരം തരാൻ ഏതൊരാൾക്കുമാകും. എന്തുകൊണ്ട് ?

ഒന്നാമത്തെ കാരണം, ഫുട്ബോൾ എന്നപോലെ അത്രയധികം രാജ്യങ്ങൾ ക്രിക്കറ്റ് കളിക്കുന്നില്ല. രണ്ടാമത്തെ കാരണം ഇന്ത്യ ലോകകപ്പ് ഫുട്ബോളിൽ യോഗ്യത നേടിയിട്ടില്ല, കളിക്കുന്നുമില്ല. ഇന്ത്യ കളിക്കുന്നുണ്ടെങ്കിൽ ഈ രാജ്യത്ത് ഇന്ത്യയുടെ ബാനറുകളും ഇന്ത്യൻ കളിക്കാരുടെ കട്ടൗട്ടുകളും മാത്രമേ ഉയർത്താനാകൂ. ഇന്ത്യ കളിക്കാൻ തുടങ്ങുകയും അക്കാലത്ത് അർജൻ്റീനയുടേയോ, ബ്രസിലിൻ്റേയോ, പോർച്ചുഗലിൻ്റേയോ ഫ്ലക്സ് വല്ലതും ഉയരുകയും ചെയ്താൽ, അത് സ്ഥാപിച്ചവനെ പാക്കിസ്ഥാനിലേക്ക് കെട്ടുകെട്ടിക്കാനുള്ള ആൾക്കാർ ഇവിടെ റെഡിയാണ്. സ്പോർട്ട്സ് ആണ് സ്പോർട്ട്സ്മാൻ സ്പിരിട്ട് വേണം എന്നൊന്നും പറഞ്ഞിട്ട് ഒരു കാര്യവുമില്ല.

പറഞ്ഞുവന്നത്, നമ്മൾക്ക് നദിയുടെ നടുക്കും തെരുവോരങ്ങളിലും ഇതര രാജ്യക്കാരുടെ കട്ടൗട്ടുകളും ഫ്ലക്സുകളും വെക്കാൻ പറ്റുന്നതും ഈ കളി പല പല രാജ്യക്കാരുടെ പക്ഷം പിടിച്ച് ആഘോഷമാക്കാൻ പറ്റുന്നതും നമ്മൾ ആ കളിയിൽ ഇല്ലാത്തതുകൊണ്ട് മാത്രമാണ്. അതിനൊരു പ്രത്യേക സുഖവും സന്തോഷവും ഇല്ലെന്ന് പറയാനാവില്ല. ഓൺലൈനിലും ഓഫ്ലൈനിലും സുഹൃത്തുക്കൾ തമ്മിൽ, തങ്ങൾ അനുകൂലിക്കുന്ന ടീമുകളേയും താരങ്ങളേയും മുൻനിർത്തി ട്രോളുകളും വാഗ്വാദങ്ങളും ടാഗുകളും കളിയാക്കലുകളുമൊക്കെയായി നല്ല കുറേ ദിവസങ്ങളായിരുന്നു കഴിഞ്ഞുപോയത്. കളിയൊക്കെ കഴിയുമ്പോൾ എല്ലാവരും പഴയത് പോലെ ചങ്ങാതിമാർ തന്നെയാണെന്നും ഇതൊക്കെ കളി കൊഴുപ്പിക്കാൻ വേണ്ടി പറഞ്ഞതും ചെയ്തതുമാണെന്ന് ആർക്കാണറിയാത്തത്?

ക്വാർട്ടർ ഫൈനൽ കഴിഞ്ഞതോടെ പലരുടേയും സ്വപ്ന ടീമുകൾ പുറത്തായി. അതോടെ മേൽപ്പടി സംഭവങ്ങളുടെ രസം ചാകാൻ തുടങ്ങി. പ്രത്യേകിച്ച് ഒരു ടീമിൻ്റേയും ആളല്ലാത്ത ഞാൻ ഈ സമയം നോക്കി ഫൈനലിൽ കടന്ന ഫ്രാൻസിൻ്റെ ആരാധകനാണെന്ന് പറഞ്ഞ് രംഗത്ത് വന്നു. അർജൻ്റീന ആരാധകരായ എൻ്റെ സുഹൃത്തുക്കളുടെ ട്രോളുകളും കളിയാക്കലും വാങ്ങിക്കൂട്ടുക തന്നെയായിരുന്നു ലക്ഷ്യം. ഫ്രാൻസ് തോറ്റാൽ കുറഞ്ഞത് 24 മണിക്കൂറെങ്കിലും എയറിൽ പോകുന്നതിൻ്റെ സുഖവും അനുഭവിക്കാം. ഇത്രയുമൊക്കെ ചെയ്ത് ഈ ആരവത്തിൻ്റെ ഭാഗമായില്ലെങ്കിൽപ്പിന്നെന്ത് രസം? ഉദ്ദേശിച്ചത് പോലെ എനിക്കും കിട്ടി ആവശ്യത്തിനുള്ളത്. ബാക്കിയുള്ളത് ഈ പോസ്റ്റ് കാണുന്നതോടെ കിട്ടിക്കോളും. ഇതെല്ലാം സ്പോർട്ട്സ്മാൻ സ്പിരിട്ടിൽ എടുക്കാൻ നമുക്കെല്ലാവർക്കും കഴിയുന്നുണ്ട് എന്നതാണ് വലിയ കാര്യം. പക്ഷേ……

പക്ഷേ, എല്ലായിടത്തും ഇങ്ങനെയല്ല കാര്യങ്ങൾ. നമ്മുടെ രാജ്യമേ കളിക്കാത്ത ഒരു കളിയിൽ മറ്റ് രാജ്യങ്ങളുടെ പേരും പറഞ്ഞ് തെരുവിൽ അടികൂടിയവരുണ്ട് ആദ്യകളിക്ക് വിസിൽ മുഴങ്ങുന്നതിന് മുന്നേ. ഇന്നലെ വിജയാഘോഷങ്ങൾ അതിരുകടന്നപ്പോൾ കണ്ണൂരിൽ മൂന്ന് പേർക്ക് വെട്ടേറ്റു. ഒരാളുടെ നില ഗുരുതരമാണ്. അതിരുവിട്ട് ആഘോഷം നടത്തിയതും പോരാഞ്ഞ് കൊച്ചിയിലും തിരുവനന്തപുരത്തും പോലീസിനുനേരെ ആക്രമണം ഉണ്ടായി. കൊല്ലത്ത് സംഘര്‍ഷമുണ്ടായി.

എന്തിനുവേണ്ടി? ആർക്കുവേണ്ടി വെട്ടി? അർജന്റീനയ്ക്ക് വേണ്ടിയോ? ഫ്രാൻസിന് വേണ്ടിയോ? കളിയിൽ പങ്കെടുക്കാത്ത നമ്മുടെ രാജ്യത്തിന് വേണ്ടിയോ ? ഇതിൽ എവിടെയാണ് സ്പോർട്ട്സ്മാൻ സ്പിരിട്ട് ? സ്വന്തം രാജ്യം കളിച്ചിരുന്നെങ്കിൽ ഇങ്ങനെ ഒരു സാദ്ധ്യതയേ ഇല്ല എന്ന കാര്യം വീണ്ടും ഓർമ്മിപ്പിക്കുന്നു.

ഈ പ്രവണത ശരിയല്ല. നാല് വർഷം കൂടുമ്പോൾ ഇനിയും ഫുട്ബോൾ വേൾഡ് കപ്പ് മത്സരങ്ങൾ വരും. മാറിയുടുക്കാൻ വേറൊരു നല്ല വസ്ത്രമില്ലാതിരുന്ന, മൂന്ന് നേരം പോയിട്ട് ഒരു നേരം പോലും നേരെ ചൊവ്വേ ഭക്ഷണം കഴിക്കാൻ ഇല്ലാതിരുന്ന അവസ്ഥയിൽ നിന്ന് മലയാളിക്കിപ്പോൾ മറ്റ് രാജ്യങ്ങൾ കളിക്കുന്ന കളിയുടെ പേരിൽ കട്ടൗട്ട് വെക്കാൻ ലക്ഷങ്ങൾ ചിലവാക്കാനുണ്ട്. ആ അഭിവൃദ്ധി ഇനിയങ്ങോട്ട് കൂടുകയേ ഉള്ളൂ. ഫിഫയുടെ അനുമോദനങ്ങൾ ഏറ്റ് വാങ്ങാൻ ഓരോ വേൾഡ് കപ്പ് വരുമ്പോഴും കൂടുതൽ പണമെറിഞ്ഞ് ഇപ്രാവശ്യത്തേക്കാൾ വലിയ കാര്യങ്ങൾ ചെയ്തുകൂട്ടാൻ നമ്മൾ മത്സരിക്കും. കൈയിൽ പണമുണ്ടെങ്കിൽ ആയിക്കോളൂ. അത് പക്ഷേ പരസ്പരം വെട്ടിപ്പരുക്കേൽപ്പിക്കാൻ ആകരുത്. ഒളിമ്പിക്സ് അടക്കം എല്ലാ കായികമത്സരങ്ങളുടേയും കായിക വിനോദങ്ങളുടെയും പരമമായ ലക്ഷ്യം രാജ്യങ്ങൾ തമ്മിലുള്ള സൗഹാർദ്ദപരമായ ഇടപെടലും മത്സരവുമാണ്. കൂടുതൽ ദൂരത്തിൽ, കൂടുതൽ ഉയരത്തിൽ എന്ന വാചകം മാനുഷികമായ മൂല്യങ്ങൾ നഷ്ടപ്പെടുത്താതെ വേണം ചെയ്യാൻ.

ഇനി അടുത്ത ഒരു കൂട്ടരിലേക്ക് കടക്കാം. മുതിർന്നവർ പോലും ഇങ്ങനെ അടിപിടിയിൽ ചെന്നവസാനിക്കുമ്പോൾ, ഇതേ അനുപാതത്തിൽ സമ്മർദ്ദത്തിലാകുന്ന മറ്റൊരു കൂട്ടർ കുട്ടികളാണ്. അവർക്ക് അത്രയല്ലേ മനസ്സുറപ്പുള്ളൂ. എതിർ ടീമിൻ്റെ അനുകൂലികൾ കളിയാക്കുമ്പോൾ പതറിപ്പോയ എത്രയെത്ര കുട്ടികളെയാണ് സോഷ്യൽ മീഡിയയിലൂടെ നമ്മൾ കണ്ടത്. കാണാത്തത് അതിനേക്കാൾ എത്രയോ അധികമുണ്ടാകുമെന്ന് ഒരു സംശയവും വേണ്ട. തൻ്റെ ടീം തോറ്റാൽ തല മൊട്ടിയടിക്കാമെന്ന് പറഞ്ഞ് പ്രശ്നത്തിലായവർ മുതൽ, നാളെ സ്ക്കൂളിൽ പോകാൻ പറ്റില്ലല്ലോ എന്ന പ്രശ്നം അഭിമുഖീകരിക്കുന്ന കുട്ടികൾ വരെ. നാളിത് വരെ താൻ സപ്പോർട്ട് ചെയ്ത ടീമൊന്നും ജയിച്ചിട്ടില്ലെന്നതിൻ്റെ പേരിൽ സമ്മർദ്ദമനുഭവിച്ച ഒരു കുട്ടിയുടെ അച്ഛൻ ഇട്ട പോസ്റ്റ് വായിച്ചാണ് ഇന്നത്തെ ദിവസം ആരംഭിച്ചത്. അങ്ങനെയങ്ങനെ എത്രയോ കുട്ടികൾ. ഒരു കളിയുടെ പേരിൽ അവർ മാനസ്സിക സമ്മർദ്ദത്തിനടിപ്പെടാതെ നോക്കണം. അവർക്ക് കൗൺസിലിങ്ങ് കൊടുക്കണമെങ്കിൽ കൊടുക്കണം. പക്ഷേ ആ അവസ്ഥ വന്നാൽത്തന്നെ ഒരു കായിക വിനോദം പരാജയമാകുന്നു അല്ലെങ്കിൽ രക്ഷകർത്താക്കൾ പരാജയമാകുന്നു എന്നാണർത്ഥം.

കുട്ടികൾക്ക് എക്കാലത്തും കാണിച്ച് കൊടുക്കാൻ ഒരുഗ്രൻ മാതൃകയുണ്ട്. ക്രൊയേഷ്യയോട് തോറ്റ് പുറത്തായി വിഷമിച്ച് നിൽക്കുന്ന ബ്രസീൽ താരം നെയ്മറെ തോളിൽത്തട്ടി ആശ്വസിപ്പിക്കുന്ന കൊയേഷ്യയുടെ നാലാം നമ്പർ കളിക്കാരൻ ഇവാൻ പെരിസിക്കിന്റെ പത്തുവയസ്സുകാരൻ മകൻ ലിയോ ആണ് എക്കാലത്തും കുട്ടികൾക്ക് പരിചയപ്പെടുത്താവുന്ന ഏറ്റവും വലിയ മാതൃക. ആ വീഡിയോ അല്ലെങ്കിൽ അതിൻ്റെ ചിത്രങ്ങൾ കാണിച്ച് വേണം, കുട്ടികളെ ഇത് കളിയാണെന്നും ഒരു പരിധിക്കപ്പുറം മനസ്സിലേക്ക് എടുക്കരുതെന്നും സ്പോർട്ട്സ്മാൻ സ്പിരിട്ട് എന്താണെന്നുമൊക്കെയുള്ള ബാലപാഠങ്ങൾ പഠിപ്പിക്കാൻ. കളിയിൽ ജയിച്ചവരും തോറ്റവരും പരസ്പരം ആശ്വസിപ്പിച്ച് മുന്നോട്ട് പോകുന്ന മാതൃക അവർക്കാകാമെങ്കിൽ നമുക്കെന്തുകൊണ്ട് പറ്റുന്നില്ല ? നമ്മളെന്തിന് പരസ്പരം വെട്ടിപ്പരുക്കേൽപ്പിക്കാനും പൊലീസുകാരെ ആക്രമിക്കാനും മുതിരണം? നമ്മുടെ കുട്ടികളെന്തിന് സ്ക്കൂളിൽ പോകാൻ മടിക്കണം?

ഏറെ പ്രധാന്യത്തോടെ പറയാനുള്ളത്, ഈ മാമാങ്കം അവസാനിക്കുമ്പോൾ ഖത്തറിനോടും നമ്മൾ ഓരോരുത്തരോടും ചില കാര്യങ്ങൾ പറയാതെ പറഞ്ഞ്, പക്ഷേ ചെയ്തുകാണിച്ച് പോയ ജപ്പാൻ എന്ന ടീമിനെക്കുറിച്ചാണ്, അഥവാ ആ രാജ്യത്തിൻ്റെ വൃത്തിയേയും വെടിപ്പിനേയും കുറിച്ചാണ്.

ഈ മത്സരം ഖത്തറിൽ എത്തിയത് ഒരുപാട് വെല്ലുവിളികളേയും വിമർശനങ്ങളേയും നേരിട്ടാണ്. പക്ഷേ ലോകോത്തര സംവിധാനങ്ങളോടെ ഇത് നടത്താൻ തങ്ങൾക്ക് കഴിയുമെന്ന് സംഘാടനമികവുകൊണ്ടും സൗകര്യങ്ങൾ കൊണ്ടും ഖത്തർ തെളിയിച്ചു. അതിൽ മലയാളികൾ വഹിച്ചിരിക്കുന്ന പങ്ക് വളരെ വലുതാണെന്നും നമുക്കറിയാം. മലയാളി പ്രാതിനിധ്യവും മലയാളി കാഴ്ച്ചക്കാരും ഇത്രയധികം ഉണ്ടായിട്ടുള്ള മറ്റൊരു ലോകകപ്പും ഇതുവരെയില്ല. എന്നിട്ടും…..

എന്നിട്ടുമെന്തേ ജപ്പാൻ ടീമിന് സ്റ്റേഡിയം വൃത്തിയാക്കി മാതൃക കാണിക്കേണ്ടി വന്നു. കളികാണാൻ പോയിരുന്നവരിൽ ഒരു ശതമാനമെങ്കിലും ആൾക്കാർ മാലിന്യം അലക്ഷ്യമായി വലിച്ചെറിഞ്ഞത് കൊണ്ടുതന്നെ. അങ്ങനെയൊരു കാഴ്ച്ച കാണാത്ത, അങ്ങനെയൊരു സംസ്ക്കാരം ഇല്ലാത്ത ജപ്പാനികൾക്ക് അതൊരു ബുദ്ധിമുട്ടായിക്കാണും. പരാതി പറഞ്ഞാൽ ചിലപ്പോൾ നടപടി ഉണ്ടായെന്ന് വരും. അതിലും നല്ലതല്ലേ പറയാതെ പറഞ്ഞ്, ചെയ്ത് ബോദ്ധ്യപ്പെടുത്തുന്നത്. അതവർ ചെയ്തിട്ട് പോയി. ഖത്തറുകാർക്ക് മനസ്സിലായോ, സംഘാടകർക്ക് മനസ്സിലായോ, മലയാളികൾക്ക് മനസ്സിലായോ എന്നൊന്നും നിശ്ചയമില്ല. മനസ്സിലാക്കിയാൽ നന്ന്. വൃത്തി അത്ര മോശം കാര്യമൊന്നുമല്ല.

പുരുഷന്മാർ തുട (ഔറത്ത്) കാണിച്ച് കളിക്കരുതെന്നും സ്ത്രീകളത് കാണാൻ പോകരുതെന്നും മറ്റുമുള്ള മതമൗലിക ഭ്രാന്തുകൾ പറയുന്നവരെപ്പറ്റി എന്തുപറയാൻ? ഫുട്ബോളിനെതിരെ അത്തരം ഭോഷ്ക്കുകൾ പറഞ്ഞവർക്കുള്ള മറുപടിയാണ്, മൊറോക്കോ സെമി ഫൈനലിലേക്ക് കടന്നപ്പോൾ, സോഫിയാൻ ബൗഫർ തൻ്റെ ഉമ്മയ്ക്കൊപ്പം മൈതാനത്ത് നൃത്തം ചെയ്യുന്ന രംഗം. ഇറാനിയൻ കളിക്കാൻ ദേശീയഗാനം ആലപിക്കാതിരുന്നതും ഇതേ കൂട്ടക്കൂർക്കുള്ള മറുപടിയാണ്. അതും പോരെങ്കിൽ ക്രൊയേഷ്യൻ മോഡൽ ഇവാന നോൾ അൽപ്പവസ്ത്രധാരിയായി സ്റ്റേഡിയത്തിൽ വന്നത് കൂടെ വരവ് വെച്ചോളൂ. നിങ്ങളുടെ ജൽപ്പനങ്ങളെ അവഗണിച്ച്, നിങ്ങളുടെ കൂട്ടത്തിലുള്ളവരെത്തന്നെ മുന്നിൽ നിർത്തി ലോകം മുന്നോട്ട് പൊയ്ക്കൊണ്ടേയിരിക്കും. നിങ്ങൾ മതത്തെ കൂട്ടുപിടിച്ചോ അല്ലാതെയൊ നിങ്ങൾക്കിഷ്ടമുള്ളത് പോലെ ജീവിക്കുക. മറ്റുള്ളവരെ അവർക്കിഷ്ടമുള്ളത് പോലെ ജീവിക്കാൻ വിടുക. അല്ലെങ്കിൽ പൊതുജനസമക്ഷം ഇളിഭ്യരായിക്കൊണ്ടേയിരിക്കാനായിരിക്കും യോഗം.

കാൽപ്പന്ത് എന്ന കളി മാത്രമല്ല കഴിഞ്ഞുപോയതെന്ന് മനസ്സിലാക്കുക. ലോകം ഒരു കൊച്ചുപന്തിൻ്റെ വലിപ്പത്തിലേക്ക് ചുരുങ്ങിയ ദിനങ്ങളിൽ കണ്ട് പഠിക്കേണ്ട ഒരുപാട് വലിയ പാഠങ്ങളും മാതൃകകളും കൂടെയാണ് മുന്നിൽ നിരന്നത്. പറ്റുമെങ്കിൽ അനുകരിക്കാൻ ശ്രമിക്കുക. ഗുണം ചെയ്യാതിരിക്കില്ല.

വാൽക്കഷണം:- ഉറക്കമിളച്ച് ഇത്രയേറെ കാണുകയും ആസ്വദിക്കുകയും ചെയ്ത മറ്റൊരു ലോകകപ്പ് ഫുട്ബോൾ വ്യക്തിജീവിതത്തിൽ ഇതുവരെയില്ല. ജനങ്ങൾക്ക് സ്പോർട്ട്സ്മാൻ സ്പിരിറ്റ് ലവലേശം ഇല്ലാതെ പോകുന്ന കാലത്ത് എത്രവലിയ കായിക വിനോദവും ബഹിഷ്ക്കരിക്കുക തന്നെ ചെയ്യും.

ഏതെങ്കിലും ഒരു ‘പഴയ’ കെട്ടിടം പൊളിക്കുന്നതിൽ ഇത്രയേറെ സന്തോഷം മുൻപൊരിക്കലും എനിക്കുണ്ടായിട്ടില്ല.

ഏകദേശം 40-45 വർഷം പുറകോട്ടുള്ള എൻ്റെ ഓർമ്മയിൽ പള്ളിപ്പുറം സർക്കാർ ആശുപത്രിക്ക് മുന്നിൽ ഒരു മൈതാനമുണ്ട്. വൈകുന്നേരങ്ങളിൽ യുവാക്കൾ ഫുട്ബോൾ കളിക്കുമായിരുന്നു അവിടെ. മൈതാനത്തിന്റെ ഒരു വശത്ത് സിനിമക്കൊട്ടകയുണ്ട്. സായാഹ്നങ്ങളിൽ സിനിമാപ്പാട്ടുകൾ കോളാമ്പിയിലൂടെ ഒഴുകിവരുന്നതും കേട്ട് ഒരുപാട് പേർ വെടിവട്ടം കൂടി ആ ഭാഗത്തുണ്ടാകുമായിരുന്നു.

പെട്ടെന്നൊരു ദിവസം മൈതാനത്തിന്റെ നടുവിൽ കൊൺക്രീറ്റ് മേൽക്കൂരയുള്ള ഒരു കെട്ടിടം ഉയരാൻ തുടങ്ങി. ഒരു മൈതാനം മരിച്ചു അഥവാ അതിനെ കൊന്നു. കെട്ടിടം പണി പൂർത്തിയായപ്പോൾ അതിൽ എഴുതിവെച്ചിരുന്നത് Disaster relief centre എന്നാണ്. സത്യത്തിൽ എനിക്കതിന്റെ അർത്ഥവും ആവശ്യകതയും അച്ഛനോട് ചോദിച്ച് മനസ്സിലാക്കേണ്ടി വന്നു. ഇന്നാട്ടിൽ എന്തെങ്കിലും അത്യാഹിതങ്ങൾ ഉണ്ടാകുമ്പോൾ ഉപയോഗിക്കാനുള്ളതാണ് പോലും!

ഇന്നാട്ടിൽ എന്തത്യാഹിതമുണ്ടാകാൻ? ഉണ്ടായാൽത്തന്നെ ഈ കെട്ടിടം എങ്ങനെ ഉപകരിക്കാൻ? ഒരു ശരാശരി ടീനേജുകാരന് മനസ്സിലാക്കാൻ ബുദ്ധിമുട്ടുള്ള കാര്യമായിത്തന്നെ അത് തുടർന്നു.

പോകപ്പോകെ ചുറ്റിനും കാടുകയറി, യാതൊരു ഉപകാരവും ആർക്കുമില്ലാത്ത ഒരു ഭാർഗ്ഗവീനിലയമായി ആ കെട്ടിടം മാറി. ക്ഷമിക്കണം; ഉള്ളത് പറയണമല്ലോ. സാമൂഹ്യ വിരുദ്ധർക്ക് ആ കെട്ടിടം നന്നായി ഉപകരിച്ചിട്ടുണ്ട്.

അതിനിടയ്ക്ക് 2004 ഡിസംബറിൽ, വേണമെങ്കിൽ കെട്ടിടം പ്രയോജനപ്പെടുത്താൻ പോന്ന ഒരത്യാഹിതം പള്ളിപ്പുറം പഞ്ചായത്തിൽ സംഭവിച്ചു. സുനാമി!! തീരദേശത്തും കടലോരത്തും താമസിക്കുന്നവർ താൽക്കാലികമായി അവിടം വിട്ടു. അവർക്ക് താമസിക്കാനായി വിട്ടുകൊടുത്തിരുന്നെങ്കിൽ പത്തിരുപത് കുടുംബങ്ങൾക്ക് പ്രയോജനപ്പെടുമായിരുന്നു. അതുണ്ടായില്ല. കൊറോണക്കാലത്ത്, എത്രയോ ആൾക്കാരെ ഐസൊലേറ്റ് ചെയ്യാനോ ക്വാറൻ്റൈനിൽ താമസിപ്പിക്കാനോ ഉപയോഗിക്കാമായിരുന്നു. ഒന്നുമില്ലെങ്കിലും തിരഞ്ഞെടുപ്പ് സമയങ്ങളിൽ പോളിങ്ങ് ബൂത്തുകളാക്കാൻ പറ്റുമായിരുന്നു. അതൊന്നുമുണ്ടായില്ല. ഇത്തരം കെട്ടിടങ്ങൾ പണിയുക, അതിന്റെ കമ്മീഷനടിക്കുക എന്നതിനപ്പുറം മറ്റൊരു സദുദ്ദേശവും ഇതിനൊക്കെ ചരട് വലിക്കുന്നവർക്കില്ലല്ലോ.

ഇപ്പോൾ ദാ യാതൊരു പ്രയോജനവുമില്ലാതെ മൂന്ന് വ്യാഴവട്ടത്തിലധികം പിന്നിട്ട ആ കെട്ടിടം പൊളിക്കാൻ പോകുന്നു. സന്തോഷിക്കുക തന്നെയല്ലേ വേണ്ടത്?

പക്ഷേ ആ സന്തോഷം നീണ്ട് നിൽക്കണമെങ്കിൽ അവിടെ ആ പഴയ മൈതാനം തിരിച്ച് വരണം. അപ്പുറത്തുള്ള സിനിമാത്തീയറ്റർ പൂട്ടിപ്പോയിരിക്കുന്നു. മൈതാനത്തിന്റെ ആ ഭാഗത്ത് ഒരു ഓപ്പൺ എയർ തീയറ്റർ കൂടെ വന്നാൽ എത്രയോ കലാപരിപാടികൾക്കും സമാഗമങ്ങൾക്കും വേദിയാക്കാൻ പറ്റിയെന്ന് വരും.

പൊതുജനത്തിന് ആഗ്രഹിക്കാനേ പറ്റൂ. തീരുമാനം എടുക്കുന്നതും നടപ്പിലാക്കുന്നതുമൊക്കെ കമ്മീഷനടിക്കുന്ന ടീംസ് തന്നെയാണ്. അവരാണെങ്കിൽ ഇപ്പോൾ എണ്ണത്തിൽ കൂടുതലും പഴയതിനേക്കാൾ ശക്തരുമാണ്. മൈതാനം തിരികെ വന്നാൽ ഭാഗ്യം. ഒരു പ്രതീക്ഷയുമില്ലെങ്കിലും വെറുതെ മോഹിക്കുന്നു. അതിന് നികുതി ഇടാക്കാത്തത് തന്നെ മഹാഭാഗ്യം.

കൊച്ചിൻ പോർട്ട് ട്രസ്റ്റിൽ നിന്ന് സൂപ്രണ്ടിങ് എൻജിനീയർ ആയി വിരമിച്ച വ്യക്തിയാണ് 67 കാരനായ പോളേട്ടൻ Paul Padinjarekara. തൻ്റെ അറുപതാം പിറന്നാൾ 60 മൈൽ (100കിമീ തികച്ച്) ഓടി അദ്ദേഹം ആഘോഷിച്ചത് അന്ന് വാർത്തയായിരുന്നു.

ഒരുപാട് മാരത്തോണുകളും (41 കിമീ) ഹാഫ് മാരത്തോണുകളും (21 കിമീ) അൾട്രാ മാരത്തോണുകളും (210, 161, 110, 100 കിമീ) മറ്റ് ദീർഘദൂര ഓട്ടങ്ങളും പൂർത്തിയാക്കിയിട്ടുള്ള പോളേട്ടൻ ഈ മാസം 21 ന് (21 Nov 2021) തൻ്റെ നൂറാമത്തെ മാരത്തോൺ ഓടാനുള്ള തയ്യാറെടുപ്പിലാണ്.

സ്പൈസ് കോസ്റ്റിൻ്റെ കൊച്ചിൻ മാരത്തോൺ റൂട്ടിലൂടെയുള്ള ഈ 42 കി.മീ. ഓട്ടത്തിൽ Soles Of Cochin (Cochin Runners) ക്ലബ്ബിന്റെ മറ്റ് 100 ഓട്ടക്കാരും പോളേട്ടനൊപ്പം 42 കിമീ ഓടുന്നു. കൂടാതെ 200ൽപ്പരം ഓട്ടക്കാർ 21 കിമീ ദൂരം ഓടുന്നു.

പ്രായം വെറുമൊരു നമ്പർ മാത്രമാണെന്ന് പലവട്ടം തെളിയിച്ചിട്ടുള്ള പോളേട്ടന് എല്ലാവിധ ആശംസകളും നേരുന്നു.

പോളേട്ടൻ ഇങ്ങനെയൊക്കെ ചെയ്യുമ്പോൾ മാനം കാക്കാൻ ഏത് കണ്ടം വഴി ഓടി രക്ഷപ്പെടണമെന്ന് അറിയാതെ പകച്ച് നിൽക്കുകയാണ് എൻ്റെ വാർദ്ധക്യം. എന്നിരുന്നാലും കേരളത്തിൽ ഉണ്ടായിരുന്നെങ്കിൽ, കിതച്ച് നുരയും പതയും തുപ്പിയിട്ടാണെങ്കിലും അര മാരത്തോൺ ഓടാൻ ഞാനും കൂടുമായിരുന്നു.

വാൽക്കഷണം:- കേരളത്തിൽ ആദ്യമായിട്ടാണ് ഒരു വ്യക്തിയും ഒരു ക്ലബ്ബും ഇങ്ങനെയൊരു നേട്ടം കൈവരിക്കാൻ പോകുന്നത്. ഇതിലൊരു വാർത്തയും സന്ദേശവും ഉണ്ടെന്ന് കരുതുന്ന മാദ്ധ്യമങ്ങൾ അതൊന്ന് ജനങ്ങളിലേക്ക് എത്തിച്ചിരുന്നെങ്കിലെന്ന് ആത്മാർത്ഥമായും ആഗ്രഹിക്കുന്നു.

ഭൂമി ചുറ്റിയുള്ള പായ് വഞ്ചി സഞ്ചാര മത്സരമാണ് ‘ഗോൾഡൻ ഗ്ലോബ് റേസ്‘.

പായ് വഞ്ചിയിൽ ഏകനായി ലോകം ചുറ്റി വന്ന ആദ്യത്തെ ഇന്ത്യക്കാരനായ കമാൻഡർ അഭിലാഷ് ടോമി, ഗോൾഡൻ ഗ്ലോബ് മത്സരത്തിനായി, സ്പോൺസർമാരെ തേടുന്നു എന്ന വാർത്ത, ഇന്ത്യയ്ക്ക് ഇത്ര ദാരിദ്യമോ എന്ന ആശങ്കയോടെയാണ് വായിച്ചത്.

സ്വാതന്ത്ര്യലഭ്ദ്ധിക്ക് ശേഷം ഇന്ത്യയിൽ നിന്ന് എത്ര പേർ ഇതുവരെ പങ്കെടുത്തിട്ടുണ്ട് അതീവ സാഹസികമായ ഈ കടൽ റേസിൽ ? കണക്ക് കൈവശമില്ല. എങ്കിലും ഒരൂഹം പറഞ്ഞാൽ ചിലപ്പോളത് വിരലിൽ എണ്ണാവുന്നവർ മാത്രമായിരിക്കാം. അല്ലെങ്കിൽ കമാൻഡർ അഭിലാഷ് ടോമി മാത്രമായ്രിക്കാം.

2018 ൽ ഇതേ മത്സരത്തിൽ ഇന്ത്യയിൽ നിന്ന് പങ്കെടുത്തത് അദ്ദേഹം മാത്രമായിരുന്നു. അന്ന് 150 കിലോമീറ്റർ വേഗത്തിൽ വീശിയടിച്ച കാറ്റിൽ പായ് വഞ്ചി തകരുകയും പായ് മരം വീണ് നടുവിന് ഗുരുതരമായി പരുക്കേൽക്കുകയും ചെയ്തപ്പോൾ മൂന്ന് ദിവസം അതേ പരിക്കുകളോടെ കടലിനെ അതിജീവിച്ച സാഹസികനാണ് അദ്ദേഹം. ചികിത്സകളെല്ലാം കഴിഞ്ഞ് വീണ്ടും ഗോൾഡൻ ഗ്ലോബ് മത്സരത്തിൽ (2022) പെങ്കെടുക്കാൻ ശ്രമിക്കുമ്പോളാണ് അദ്ദേഹത്തിന് സാമ്പത്തികം പ്രശ്നമാകുന്നത്.

ഇന്ത്യൻ സർക്കാറിന് തന്നെ ചിലവഴിക്കാവുന്നതല്ലേയുള്ളൂ ഇപ്പറഞ്ഞ 4 കോടി പണം ? സേനയിൽ സേവനമനുഷ്ടിച്ചിരുന്ന, റെക്കോഡ് ജേതാവായ ഒരു നാവികനോട് ചെയ്യാവുന്ന ആദരവ് കൂടെ ആകില്ലേ അത് ? ഇന്ത്യൻ സർക്കാറിന് പറ്റുന്നില്ലെങ്കിൽ 4 കോടി രൂപ ചിലവഴിക്കാൻ കേരള സർക്കാരിന് ആകില്ലെന്നുണ്ടോ ?

ഇന്ന് മുതൽ ഗ്യാസ് സ്റ്റേഷനുകളിൽ ഇന്ധനം നിറക്കാൻ എത്തുന്ന മലയാളികൾ അഭിലാഷ് ടോമിക്ക് വേണ്ടി 1 രൂപ ഒറ്റ പ്രാവശ്യം കൂടുതലായി അവിടെ കൊടുക്കാൻ തയ്യാറായാൽ ചിലപ്പോൾ അര ദിവസം കൊണ്ട് സമാഹരിക്കാവുന്നതേയുള്ളൂ ഈ തുക. 110 രൂപ പെട്രോളിന് നൽകുന്ന കൂട്ടത്തിൽ ഒരു സാഹസിക സ്പോർട്ട്സിന് 1 രൂപ കൂടുതൽ കൊടുക്കാൻ കുറഞ്ഞപക്ഷം സ്പോർട്ട്സ് പ്രേമികളെങ്കിലും തയ്യാ റാകും.

ഇതൊന്നും പറ്റുന്നില്ലെങ്കിൽ കേരളത്തിലെ പേരുകേട്ട വ്യവസായികൾ ആരെങ്കിലും ഒരാൾ വിചാരിച്ചാൽ അവരുടെ സ്ഥാപനത്തിൻ്റെ സ്പോൺസർഷിപ്പിൽ നടക്കാവുന്നതല്ലേയുള്ളൂ ഇക്കാര്യം. യൂസഫലിയും രവി പിള്ളയുമൊക്കെ ഇക്കാര്യം അറിഞ്ഞിട്ടില്ല എന്ന് കരുതാനാനിഷ്ടം.

ഇതിനേക്കാൾ വലിയ കാര്യങ്ങളുണ്ട് നടത്താൻ. അരപ്പട്ടിണിക്കാരൻ്റേയും കൂരയില്ലാത്തവൻ്റേയും പ്രശ്നങ്ങളുണ്ട് തീർക്കാൻ, അതിനിടയ്ക്ക് ഇയാളുടെ ആഡംബരച്ചുറ്റലിന് ഖജനാവിൽ നിന്ന് കൊടുക്കുന്നതും പിരിവിട്ട് കൊടുക്കുന്നതുമൊക്കെ ശുദ്ധ അസംബന്ധമാണെന്ന വാദങ്ങളും ഉയർന്ന് വന്നേക്കാം. അവരോട് പറയാനുള്ളത് ഇത്രമാത്രം. കഷ്ടപ്പാടുകാരുടേയും ദുരിതം അനുഭവിക്കുന്നവരുടേയും പ്രശ്നങ്ങളും പിരിവിട്ട് ഏറ്റെടുക്കുന്നുണ്ടല്ലോ നമ്മൾ. അതിനിടയിൽ ഒളിമ്പിക്സ് അടക്കമുള്ള കാര്യങ്ങളും രാജ്യം നടത്തുന്നില്ലേ ? ചൊവ്വയിലേക്ക് റോക്കറ്റ് വിടുന്നില്ലേ ? അത്തരത്തിലൊന്നായി കണ്ടാൽ മതി ഇതും. അല്ലെങ്കിൽപ്പിന്നെ നാളെ മുതൽ പട്ടിണി പ്രശ്നങ്ങൾ മാത്രം തീർപ്പാക്കിയാൽ മതി എന്ന് വെക്കണം.

വാൽക്കഷണം:- സോഷ്യൽ മീഡിയ കയറി വല്ല ഹാഷ് ടാഗ് ധനസമാഹരണ ചാലഞ്ച് തുടങ്ങുന്നതിനും മുന്നേ പണമിറക്കുന്നവർക്ക് സംഭവത്തിൻ്റെ മുഴുവൻ ക്രെഡിറ്റും സ്വന്തമാക്കാം. ഒരു മലയാളിയാണ് കമാൻഡർ അഭിലാഷ് ടോമി എന്ന നിലയ്ക്ക് കേരള സർക്കാർ തന്നെ പണമിറക്കണമെന്നാണ് എൻ്റെ പക്ഷം.

വ്യായാമത്തിന്റെ ഭാഗമായി നിത്യേന നടത്തുന്ന ഓട്ടത്തിന്റെ വിവരങ്ങൾ ഫേസ്ബുക്കിൽ പങ്കുവെക്കുമ്പോൾ പലരും വന്ന് അത്ഭുതം കൂറാറുണ്ട്. ഞാൻ ചെറിയ ഓട്ടക്കാരൻ മാത്രമാണ്. എന്നേക്കാൾ വലുതായി ഓടുന്നവർ അതിന്റെ വിശേഷങ്ങൾ പങ്കുവെച്ചിരുന്നെങ്കിൽ അത് വായിക്കുന്നവരുടെ അത്ഭുതം എവറസ്റ്റോളമാകുമായിരുന്നു. എന്തായാലും ഇതേപ്പറ്റി വിളിച്ചുപറയുന്ന ആളെന്ന നിലയ്ക്ക്, പലരുടേയും ചോദ്യങ്ങൾക്ക് മറുപടി പറയേണ്ട ബാദ്ധ്യതയും എനിക്കാണ്.

എങ്ങനെ ഓട്ടത്തിലേക്ക് അഥവാ ദീർഘദൂര ഓട്ടത്തിലേക്ക് കടക്കാം എന്ന് ആലോചനയുള്ളവർക്ക് വേണ്ടി ഫേസ്ബുക്കിൽ പങ്കുവെച്ച ഒരു കമന്റ് അൽപ്പം മാറ്റങ്ങളോടെയും കൂട്ടിച്ചേർക്കലുകളോടെയും ഇവിടെ എടുത്തെഴുതുന്നു.

1. മാനസ്സികമായി തയ്യാറെടുക്കുക. എനിക്ക് പറ്റും എന്ന് ഉറച്ച് തീരുമാനിക്കുക, മനസ്സിനെ ബോദ്ധ്യപ്പെടുത്തുക.

2. അതിരാവിലെ (രാവിലെ 6 മണിക്ക് മുൻപ്) ഓടാൻ ശ്രമിക്കുക. പ്രത്യേകിച്ച് കേരളത്തിലെ ചൂട് പരിഗണിച്ച്.

3. ആ സമയമായതുകൊണ്ട് കൂടെ ഓടാൻ ഒരാളെയെങ്കിലും സംഘടിപ്പിക്കുക. നമുക്കെന്തെങ്കിലും അപകടം ഓട്ടത്തിനിടയ്ക്ക് സംഭവിച്ചാൽ അതറിയാൻ ഒരാളെങ്കിലും ഉണ്ടാകണം എന്നതുകൊണ്ടാണ് പങ്കാളി ആവശ്യമാകുന്നത്.

4. പറ്റുന്ന ഏറ്റവും ചെറിയ വേഗത്തിൽ ഓടിത്തുടങ്ങുക. കിതപ്പ് വരുന്ന ഒരു പോയന്റിൽ ഓട്ടം നിർത്തരുത്. എന്തെന്നുവെച്ചാൽ ആ കിതപ്പ് ഇതുവരെ ചെയ്യാതിരുന്ന കടുത്ത ഒരു ജോലി ചെയ്യുന്ന ഒരു മെഷീൻ്റെ ചൂടും പുകയും മാത്രമാണ്. കുറച്ചുനേരം കൂടെ എങ്ങനെയെങ്കിലും പിടിച്ച് നിന്നാൽ ശരീരം (പ്രത്യേകിച്ച് ശ്വാസകോശം) ഹൃദയത്തിന്റെ ആ ഉയർന്ന പമ്പിങ്ങിനോട് താദാത്മ്യം പ്രാപിക്കും.

5. എങ്കിലും കിതപ്പ് തീരെ സഹിക്കാൻ പറ്റാത്ത ഒരു സമയം ഓട്ടം നിർത്താം. പക്ഷേ നിന്ന് കളയരുത്. നീട്ടി വലിച്ച് നടക്കണം. ഹാർട്ട് പമ്പിങ്ങ് തീരെയങ്ങ് കുറയാൻ അനുവദിക്കരുത്. കിതപ്പ് അൽപ്പം കുറഞ്ഞെന്ന് കാണുമ്പോൾ കടിച്ച് പിടിച്ച് വീണ്ടും ഓടുക.

6. തുടക്കക്കാരൻ/ക്കാരി എന്ന നിലയിൽ 1കിമീ ഇത്തരത്തിൽ ഓടിയും നടന്നും മുന്നോട്ട് പോകാൻ പറ്റിയാൽ വിജയിച്ചു.

7. ഈ ദൂരം ഒരാഴ്ച്ച തുടരുക. ഇതിനിടയ്ക്ക് കിതപ്പ് വരുമ്പോഴുള്ള നടത്തം കുറച്ച് കൊണ്ടുവരുക. പിന്നീടത് പൂർണ്ണമായും ഒഴിവാക്കുക. അപ്പോഴേക്കും കിതപ്പിന് ഒരു താളം വന്നിരിക്കും.

8. അങ്ങനെ നിർത്താതെ 1കിമീ ഓടുമെന്നായാൽ ദൂരം നേരെ 2 കിമീ ആക്കുക. 2 ആഴ്ച്ച ഇതേ മെത്തേഡ് ഉപയോഗിച്ച് ആ ദൂരം നിർത്താതെ ഓടുക. അങ്ങനെയങ്ങനെ ദൂരം കൂട്ടിക്കൊണ്ടേയിരിക്കുക.

9. ഓടുമ്പോൾ ഇടുന്ന ഷൂ ശ്രദ്ധിക്കണം. അധികം ഇറുകിയത് ഇട്ടാൽ ഷൂ ബൈറ്റ് ഉറപ്പ്. ചെറിയ ലൂസ് ഉണ്ടാകുന്നതാണ് നല്ലത്. സാധാരണ നടത്തത്തേക്കാൾ കാലുകൾ തീർച്ചയായും വികസിക്കും. അതുകൊണ്ട് ഷൂ ശ്രദ്ധിക്കണം. പാദരക്ഷ കാരണം പരിക്ക് പറ്റാതെ നോക്കണം. പറ്റിയാലും പാദരക്ഷകൾ മാറ്റി മാറ്റി ശരിയായത് കണ്ടെത്തണം.

10. ആഴ്ച്ചയിൽ ഒരു ദിവസം ഏത് വ്യായാമത്തിനും അവധി കൊടുക്കണം. അതെന്ന് വേണമെന്ന് മറ്റ് സൗകര്യങ്ങളും അസൗകര്യങ്ങളും കണക്കിലെടുത്ത് തീരുമാനിച്ചോളൂ.

11. ഇത്രയുമൊക്കെ ശരിയായാലും മുടങ്ങാതെ ഓടാൻ തുടങ്ങുന്നതോടെ പരിക്കുകൾ ഓരോന്നോരോന്നായി വരാൻ തുടങ്ങും. കണങ്കാൽ, മസിലുകൾ, കാഫ്, തുട, എന്ന് തുടങ്ങി ഐ.ടി.ബാൻഡ് വരെ പണി തന്നെന്നിരിക്കും. അങ്ങനെയൊരു വേദന വന്നാലുടനെ നിർത്തിക്കളയരുത്. അൽപ്പസ്വൽപ്പം വേദന സഹിച്ച് കുറച്ച് ദൂരമെങ്കിലും (അതായത് 2കിമീ ഓടുന്ന സമയത്ത് 1കിമീ എങ്കിലും) ഓടണം. മെല്ലെ മെല്ലെ വേദന വിട്ടൊഴിയും. അതല്ല നിയന്ത്രണം വിടുന്ന വേദനയാണെങ്കിൽ സ്വയം ജഡ്ജ് ചെയ്ത് വേണമെങ്കിൽ ഒരു മാസമോ വേദന മാറുന്നത് വരെയോ റസ്റ്റ് എടുക്കുക. പിന്നീട് വീണ്ടും ഒന്നേന്ന് തുടങ്ങുക. മതി. തിരിച്ചുവരവിൽ വേദനകൾ ഉണ്ടാകണമെന്നില്ല. ഉണ്ടായാൽ ഒരു സ്പോർട്ട് ഡോക്ടറുടെ വൈദ്യപരിശോധനയും ഉപദേശങ്ങളും സ്വീകരിക്കേണ്ടി വരും. ഭൂരിഭാഗം പേർക്കും ഈ മാർഗ്ഗനിർദ്ദേശം വഴി ദീർഘദൂര ഓട്ടം സ്വായത്തമാക്കാൻ കഴിയുക തന്നെ ചെയ്യും.

12. സ്ട്രാവ (Strava) പോലുള്ള ആപ്പുകൾ ഏതെങ്കിലും ഒന്ന് ഫോണിൽ ഇൻസ്റ്റാൾ ചെയ്യുക. നമ്മൾ ഓടുന്ന ദൂരം, സമയം, കത്തിക്കുന്ന കലോറി, എലിവേഷൻ, വേഗം, റൂട്ട് മാപ്പ് എന്നിങ്ങനെ അവശ്യമായ പല വിവരങ്ങളും അത് നമ്മൾക്ക് നൽകും. അത് സ്ഥിരമായി പരിശോധിക്കുന്നതിലൂടെ പുതിയൊരു കൌതുകവും ഓട്ടം മെച്ചപ്പെടുത്താനുള്ള ഊർജ്ജവും നമുക്കുണ്ടാകും.

വാൽക്കഷണം:- ഓടുന്ന ദിവസങ്ങളിൽ നേരെ ഒറ്റ ഓട്ടം വെച്ച് കൊടുക്കരുത്. കൈയും കാലും അരക്കെട്ടും കഴുത്തുമൊക്കെ ഒന്നിളക്കി അൽപ്പസ്വൽപ്പം വാമപ്പ് നടത്തിയശേഷം വേണം ഓടാൻ. ഓട്ടം കഴിഞ്ഞാൽ വാമപ്പിന് ചെയ്ത അതേ കാര്യങ്ങൾ ഒന്നോ രണ്ടോ പ്രാവശ്യം കൂടുതൽ ചെയ്യുകയും വേണം

തമിഴ് നടൻ വിജയ്, വോട്ട് ചെയ്യാൻ സൈക്കിളിൽ പോളിങ്ങ് ബൂത്തിലേക്ക് പോയതിന്റെ രാഷ്ട്രീയം, ഓൺലൈനിൽ പല സുഹൃത്തുക്കളും ചർച്ച ചെയ്ത് കണ്ടു. അതിലൂടെ അദ്ദേഹം നൽകാൻ ശ്രമിച്ച സന്ദേശത്തെ ഞാനും അനുകൂലിക്കുന്നു. പക്ഷേ ആ സൈക്കിൾ സവാരിയിൽ മറ്റ് ചില വിയോജിപ്പുകൾ എനിക്കുണ്ട്.

മേൽപ്പറഞ്ഞ സംഭവത്തിന്റെ ചിത്രങ്ങൾ കണ്ടിരുന്നെങ്കിലും വീഡിയോ അൽപ്പം മുൻപാണ് കണ്ടത്. അത് കണ്ടിട്ടുള്ളവർക്ക് മനസ്സിലാകും എത്ര അപകടകരമായ രീതിയിലാണ് അദ്ദേഹത്തെ പൊലീസുകാരും മാദ്ധ്യപ്രവർത്തകരും ആരാധകരും അടക്കമുള്ള സംഘം പിന്തുടരുന്നതെന്ന്. അദ്ദേഹത്തിന്റെ സൈക്കിളിന് മുന്നിൽ ഒരു സ്ക്കൂട്ടറിന്റെ പിൻസീറ്റിൽ ക്യാമറയുമായി ഒരാൾ പുറം തിരിഞ്ഞിരുന്ന് രംഗങ്ങൾ പകർത്തുന്നു. ചുറ്റുമുള്ള ഇരുചക്രവാഹനങ്ങൾ കാര്യമായ അകലം പാലിക്കാതെയാണ് വിജയിനൊപ്പം കത്തിച്ച് പിടിക്കുന്നത്. സാമാന്യം നല്ല വേഗത്തിലാണ് വിജയ് സൈക്കിൾ ഓടിക്കുന്നത്.

ആ പോകുന്ന പോക്കിൽ ഏതെങ്കിലും രണ്ട് വാഹനങ്ങൾ തമ്മിൽ ഒന്നുരസിയാൽ കളി കാര്യമാകാൻ അത് മതി. അദ്ദേഹത്തിന്റെ മുന്നിൽ പോകുന്ന വാഹനങ്ങൾക്ക് അവിചാരിതമായി ബ്രേക്കിടേണ്ടി വന്നാലും അത്യാഹിതങ്ങൾ സംഭവിക്കാം. അത്രയ്ക്ക് കട്ടകുത്തിയാണ് എല്ലാവരും സഞ്ചരിച്ചുകൊണ്ടിരിക്കുന്നത്. പാരീസിലെ പാപ്പരാസികൾ, ബൈക്കിൽ ഒരു വി.വി.ഐ.പി.യുടെ കാറിനെ പിന്തുടർന്ന് ജീവഹാനി വരെയുണ്ടാക്കിയ സംഭവം ചരിത്രത്തിലെ കറുത്ത ഏടുകളിലാണ് സ്ഥാനം പിടിച്ചിട്ടുള്ളതെന്ന് ഓർമ്മ വേണം.

എന്തെങ്കിലും അപകടം പിണഞ്ഞാൽ, അതിന്റെ ആഘാതം കുറച്ചേക്കാൻ ഉപകരിക്കുന്ന ഹെൽമെറ്റ് എന്ന ശിരോകവചം വിജയ് ധരിച്ചിട്ടില്ല എന്നതാണ് ഇടയ്ക്കൊക്കെ സൈക്കിൾ ഓടിക്കുന്ന ഒരാളെന്ന നിലയ്ക്ക് എന്നെ ഏറെ അലോസരപ്പെടുത്തിയത്. അദ്ദേഹം ഹെൽമറ്റ് വെച്ച് സൈക്കിൾ ചവിട്ടിയിരുന്നെങ്കിൽ, എത്ര ചെറിയ ദൂരം സഞ്ചരിക്കുമ്പോളും ഇരുചക്രവാഹനങ്ങൾ (മോട്ടോറും അല്ലാത്തതും) ഉപയോഗിക്കുന്നവർ ഹെൽമറ്റ് വെക്കേണ്ടതിന്റെ ആവശ്യകത കൂടെ ഒരു സന്ദേശമായി മാറുമായിരുന്നു.

വിജയ്, തമിഴിലെ താരമൂല്യവും സ്വീകാര്യതയുമുള്ള ഒരു സിനിമാക്കാരൻ മാത്രമല്ല. ഭാവിയിൽ കക്ഷി രാഷ്ട്രീയത്തിലിറങ്ങുമെന്നും അടുത്ത തലമുറയുടെ മുഖ്യമന്ത്രി വരെ ആയേക്കുമെന്നും തമിഴ് മക്കൾ ഉറ്റ് നോക്കുന്ന ഒരു വി.വി.ഐ.പിയാണ്. സിനിമാ സെറ്റുകളിൽ ഇതിനേക്കാൾ അപകടം പിടിച്ച സ്റ്റണ്ട് രംഗങ്ങളിൽ വിജയിനെപ്പോലുള്ള സൂപ്പർതാരങ്ങൾ തകർത്ത് അഭിനയിച്ചിട്ടുണ്ടാകാം. പക്ഷേ അപ്പോഴൊക്കെ അപകടസാദ്ധ്യതകൾ കണക്കിലെടുത്ത് എല്ലാ മുൻ‌കരുതലുകളും അവർ കൈക്കൊള്ളാറുണ്ട് എന്ന് തന്നെയാണ് ഞാൻ വിശ്വസിക്കുന്നത്. അത്രയ്ക്ക് പോലും കരുതൽ ഈ സമയത്ത് വിജയോ അദ്ദേഹത്തിന്റെ കൂടെയുള്ളവരോ കൈക്കൊണ്ടിട്ടില്ല. കോടികൾ കിടന്ന് മറിയുന്ന സിനിമാ വ്യവസായമാണ് ഇത്തരം സൂപ്പർതാരങ്ങൾക്ക് എന്തെങ്കിലും അപകടം സംഭവിച്ചാൽ സ്തംഭിക്കുന്നെതെന്ന് എല്ലാവർക്കും അറിയുന്ന കാര്യമാണെന്നിരിക്കേ തികച്ചും അശ്രദ്ധമായ ഒരു സൈക്കിൾ യാത്രയായിരുന്നു അതെന്ന് പറയാതെ വയ്യ.

തമ്പീ വിജയ്…… തമിഴ് എഴുത തെരിയാത്. ഇത് മൊഴിമാറ്റി ആരെങ്കിലും താങ്കളിലേക്ക് എത്തിച്ച് തന്നാൽ, ഇതുപോലുള്ള സന്ദർഭങ്ങളിൽ കൂടൂതൽ കരുതൽ വേണമെന്ന ഒരഭ്യർത്ഥനയായി ഇതിനെ കണക്കാക്കണം. അതിന് പല കാരണങ്ങളുണ്ട്. തമിഴ് സിനിമാ ലോകത്തിന് താങ്കൾ വെരുമൊരു നടികർ മാത്രമല്ല. ഞങ്ങൾ മലയാളികളുടെ തീയറ്ററുകളും പലപ്പോഴും നിറഞ്ഞോടുന്നത് താങ്കളുടെ സിനിമകൾ കാരണമാണ്. താങ്കളെപ്പോലുള്ളവരുടെ ഓരോ നീക്കങ്ങളിലും ചെയ്തികളിലും അനേകം പേരുടെ അന്നം കൂടെ പേരെഴുതി ചേർത്ത് വെച്ചിട്ടുണ്ട്. അതെപ്പോഴും ഓർമ്മയിലുണ്ടാകണം. നൺ‌റി. വണക്കം.

വരിവരിയായി ഒന്നിന് പിന്നാലെ ഒന്നായി നീങ്ങുന്ന 1995 സൈക്കിളിസ്റ്റുകളുടെ ഗിന്നസ് റെക്കോർഡ് തകർക്കാനായി കേരളത്തിലെ സൈക്കിളിസ്റ്റുകൾ തയ്യാറെടുക്കുന്ന വിവരം ഇതിനകം ചിലരെങ്കിലും അറിഞ്ഞുകാണുമല്ലോ ?  നിലവിൽ തുർക്കിമിനിസ്താന്റെ പേരിലാണ് 1995 പേരുടെ ഈ റെക്കോർഡ് ഉള്ളത്.

3500 സൈക്കിളിസ്റ്റുകളെ പങ്കെടുപ്പിച്ചുകൊണ്ട് 2020 ജനുവരി 26ന്, അതായത് റിപ്പബ്ലിക്ക് ദിനത്തിൽ, കൊച്ചിയിൽ വെച്ച് നടത്താൻ പോകുന്ന ഈ ഗിന്നസ് പരേഡിന്റെ ലോഗോ, 2019 ഒൿടോബർ 8ന് മുഖ്യമന്ത്രി  ശ്രീ.പിണറായി വിജയൻ തിരുവനന്തപുരത്ത് അദ്ദേഹത്തിന്റെ ഓഫീസിൽ വെച്ച് അനാച്ഛാദനം ചെയ്യുകയുണ്ടായി.

പരേഡിൽ പങ്കെടുക്കണമെന്നുള്ളവർക്ക് http://bicycleparade.com എന്ന വെബ് സൈറ്റ് വഴി പോയി രജിസ്റ്റർ ചെയ്യാം. സൈക്കിൾ കൂടാതെ സൈക്കിളിസ്റ്റിന് ഉണ്ടായിരിക്കേണ്ട അവശ്യവസ്തുക്കളും അവിടെച്ചെന്ന് വായിച്ച് മനസ്സിലാക്കാം.

ഇതുമായി ബന്ധപ്പെട്ട് പൊതുജനങ്ങൾക്ക് പലർക്കുമുള്ള പലതരം സംശയങ്ങൾ ദുരീകരിക്കുന്നതിന് വേണ്ടിയാണ് ഈ കുറിപ്പ് പ്രസിദ്ധീകരിക്കുന്നത്. കൂടുതൽ സംശയങ്ങൾ ഉള്ളവർക്ക് ചോദിക്കാം. അറിയുന്നത് പോലെ മറുപടി തരുന്നതാണ്. അറിയാത്ത കാര്യങ്ങൾ സംഘാടകരോട് അന്വേഷിച്ച് മറുപടി തരുന്നതാണ്.

ഈ സൈക്കിൾ പരേഡിന്റെ കാര്യങ്ങൾ ചർച്ച ചെയ്യാൻ ഇന്നലെ കലൂരിലെ ബൈക്ക് സ്റ്റോറിൽ വെച്ച് പരേഡ് ഡയറൿടർ നിഥിൻ പലാലിന്റെ നേതൃത്തിൽ ഒരു മീറ്റിങ്ങ് സംഘടിപ്പിക്കുകയുണ്ടായി. തൃപ്പൂണിത്തുറ സൈക്കിൾ ക്ലബ്ബ്, മുസ്‌രീസ് ബൈസിക്കിളേർസ് ക്ലബ്ബ്, സോൾസ് ഓൺ വീൽ‌സ്, കൊച്ചിൻ ബൈക്കേർസ് ക്ലബ്ബ്, വെനസ്‌ഡേ സൈക്കിൾ ക്ലബ്ബ്, എന്നീ സൈക്കിൾ ക്ലബ്ബുകളുടെ പ്രതിനിധികൾക്ക് പുറമേ എറണാകുളം ജില്ലാ സൈക്കിളിങ്ങ് അസോസിയേഷൻ പ്രതിനിധിയും ബൈക്ക് സ്റ്റോർ പ്രതിനിധികളും യോഗത്തിൽ പങ്കെടുത്തു. ഈ യോഗത്തിൽ പങ്കെടുത്തപ്പോൾ മനസ്സിലാക്കാനായ കാര്യങ്ങൾ താഴെ പങ്കുവെക്കുന്നു.

1. പരേഡിന്റെ ആവശ്യത്തിലേക്കായി എല്ലാ ജില്ലകളിലും ഇത്തരം യോഗങ്ങൾ സംഘടിപ്പിച്ച് പരേഡിന്റെ ലക്ഷ്യവും അതിന്റെ പിന്നിലെ സംഘാടനത്തിന്റെ വിഷയങ്ങളും ഇതുവരെ കൈക്കൊണ്ട നടപടികളും തുടർന്ന് കൈക്കൊള്ളേണ്ട കാര്യങ്ങളുമെല്ലാം വിശദീകരിക്കാനാണ് നിഥിൻ പലാൽ ഉദ്ദേശിക്കുന്നത്. എല്ലാ ജില്ലകളിലും കോർഡിനേറ്റർമാരെ നിയോഗിക്കും. അതാത് ജില്ലകളിൽ നിന്ന് രജിസ്റ്റർ ചെയ്യുന്നവരുടെ സൈക്കിളിങ്ങ് പ്രാവീണ്യവും സൈക്കിളുകളുടെ അവസ്ഥയും എല്ലാം പരേഡ് ദിനത്തിന് മുന്നേ തന്നെ ജില്ലകളിൽ വെച്ച് കോർഡിനേറ്റർമാർ പരിശോധിക്കും.

2. ഇങ്ങനെ ഒരു പദ്ധതി മനസ്സിൽ ഉടലെടുത്തതോടെ കേരളത്തിലെ വിവിധ സൈക്കിളിങ്ങ് ക്ലബ്ബുകളുടെ അംഗങ്ങളുമായി ബന്ധപ്പെടുകയാണ് ആദ്യം തന്നെ നിഥിൻ ചെയ്തത്. ചിലർ പൂർണ്ണ സഹകരണം വാഗ്ദാനം ചെയ്തു. ചിലർ വിട്ടുനിന്നു. ഒപ്പം ചേർന്നവരുമായ പതിമൂന്നോളം പേരുമായി ചർച്ച ചെയ്തും സഹകരിച്ചുമാണ് പരേഡിന്റെ ലോഗോ ഡിസൈൻ ചെയ്തതും മുന്നോട്ടുള്ള കാര്യങ്ങൾ നീക്കിത്തുടങ്ങിയതും.

3. നവംബർ 30 വരെ  900 രൂപയും അതിന് ശേഷം 1400 രൂപയുമായിരിക്കും ഗിന്നസ് പരേഡിന്റെ രജിസ്ട്രേഷൻ ഫീസ്. ഈ തുക  ഒഴിവാക്കി പരേഡ് സൌജന്യമായി നടത്താൻ ആകില്ലേയെന്ന ചോദ്യങ്ങൾ ഉയർന്ന് വന്നിട്ടുണ്ട്.

ഇത്തരം ഒരു പദ്ധതി മുൻപ് നടപ്പിലാക്കി പരിചയമില്ലാത്തതുകൊണ്ടോ അതിന്റെ പിന്നാമ്പുറത്ത് എന്തൊക്കെ നടക്കുന്നെന്നോ അറിയാത്തതുകൊണ്ടുകൊണ്ടുള്ള ആശങ്കകൾ മാത്രമാണത്. രജിസ്ട്രേഷൻ സൌജന്യമാക്കിയാൽ പതിനായിരക്കണക്കിന് സൈക്കിളിസ്റ്റുകൾ രജിസ്റ്റർ ചെയ്തെന്ന് വരാം. പക്ഷേ, പണം മുടക്കാത്ത സംരംഭം ആയതുകൊണ്ട് രജിസ്റ്റർ ചെയ്തവർ എല്ലാവരും പങ്കെടുക്കണമെന്ന് ഒരു നിർബന്ധബുമില്ല. ഇത്തരം എല്ലാ സ്പോർട്ട്സ് ഇവന്റുകളുടേയും കാര്യത്തിൽ ഈ സ്വഭാവം ഉണ്ടെന്നുള്ളത് ഒരു പ്രാവശ്യമെങ്കിലും ഇങ്ങനെ എന്തെങ്കിലുമൊന്ന് സംഘടിപ്പിച്ചിട്ടുള്ളവർക്ക് അറിയുന്നതാണ്. വരാൻ സാദ്ധ്യതയില്ലാത്തവർക്ക് വേണ്ടി ഭക്ഷണമടക്കമുള്ള സജ്ജീകരണങ്ങൾ ഒരുക്കുന്നത് പാഴ്‌വേലയും ബുദ്ധിശൂന്യതയുമാണ്. പണം മുടക്കിയ ഒരാൾ, ഒഴിവാക്കാൻ പറ്റാത്ത സാഹചര്യത്തിൽ മാത്രമേ പങ്കെടുക്കാതിരിക്കുകയുള്ളൂ. ഈ എണ്ണം തുലോം തുച്ഛമായിരിക്കും.

4. മൂവായിരം പേർ പങ്കെടുത്താൽ അവരുടെ രജിസ്ട്രേഷൻ ഫീസ് ഇനത്തിൽ 27 ലക്ഷം രൂപയാണ് പിരിഞ്ഞുകിട്ടുന്നത്. ഇത് ഭീമമായ ഒരു തുകയല്ലേ എന്നും, സ്പോർട്ട്സ് ഇവന്റ് എന്നതിലുപരി വൻ‌ലാഭമുണ്ടാക്കുന്ന ഒരു പരിപാടിയല്ലേ ഇതെന്നുമുള്ള ചോദ്യം പലയിടത്തുനിന്നും ഉയരുന്നുണ്ട്.

ഗിന്നസ് പ്രതിനിധി അഥവാ അഡ്ജൂഡിക്കേറ്റർ (Adjudicator) നേരിട്ട് വന്ന് വിലയിരുത്തി, റെക്കോഡ് തകർക്കപ്പെട്ടാൽ അവിടെ വെച്ച് തന്നെ റെക്കോഡ് പ്രഖ്യാപിക്കുന്ന പരിപാടിയാണിത്. ഇത്തരത്തിൽ ഒരു പരിപാടി നടത്തുമ്പോൾ ഗിന്നസ് അധികൃതർക്ക് നൽകേണ്ടി വരുന്നത് 15 ലക്ഷത്തിലധികം രൂപയാണ്. ഗിന്നസിന്റെ സർവ്വീസ് ചാർജ്ജ്, സൈക്കിളിസ്റ്റുകൾക്ക് നൽകുന്ന ടീഷർട്ടിൽ ഗിന്നസിന്റെ ലോഗോ അച്ചടിക്കുന്നതിന് ടീഷർട്ട് ഒന്നിന് 150 രൂപ നിരക്കിൽ ഗിന്നസിന് നൽകുന്ന തുക, കൊച്ചിയിലെത്തുന്ന ഗിന്നസ് വിധികർത്താവിന്റെ (Adjudicator) വിമാനടിക്കറ്റ്, താമസം, ഭക്ഷണം, മുതലായ ഫസ്റ്റ് ക്ലാസ്സ് ചിലവുകൾ, എന്നിവയെല്ലാം ഇതിൽ പെടും. ബാക്കിയുള്ള തുക വെച്ച് വേണം പങ്കെടുക്കുന്നവർക്കുള്ള രണ്ട് ദിവസത്തെ ഭക്ഷണം, വെള്ളം, റിഫ്രഷ്മെന്റ്, ടീ ഷർട്ട്, മെഡൽ, സൈക്കിൾ മെക്കാനിക്ക് ചിലവുകൾ വിശിഷ്ടാതിഥികളുടെ പോക്ക് വരവ്, ഇവന്റ് മാനേജ്‌മെന്റ്, മറ്റ് ചിലവുകൾ, എന്നിങ്ങനെ പരേഡിന്റെ മുഴുവൻ ചിലവുകളും നടത്താൻ.

5. മറ്റ് സംസ്ഥാനങ്ങളിൽ നിന്നും ധാരാളം സൈക്കിളിസ്റ്റുകൾ പങ്കെടുക്കുന്നുണ്ട്. അവർ അടക്കം സൈക്കിൾ ഇല്ലാത്തവർക്ക് എല്ലാവർക്കും സൈക്കിൾ നൽകുന്നതായിരിക്കും. പക്ഷേ സൈക്കിളിന് 500 രൂപ ഫീസ് ഈടാക്കുന്നതാണ്. ഈ സൈക്കിളുകൾ സംഘടിപ്പിച്ച് ട്രക്കിൽ കേരളത്തിൽ എത്തിക്കുന്നതിന് ശരാശരി 2000 രൂപയാണ് സൈക്കിൾ എത്തിക്കുന്നവർക്ക് നൽകുന്നതെങ്കിലും അത്രയും തുക പങ്കെടുക്കുന്നവരിൽ നിന്ന് ഇടാക്കാൻ ഉദ്ദേശിക്കുന്നില്ല. ബാക്കി തുക സ്പോൺസേർസിൽ നിന്ന് സംഘടിപ്പിക്കാനുള്ള പ്രവർത്തനങ്ങൾ നടന്നുകൊണ്ടിരിക്കുന്നു.

6. എറണാകുളത്തിന് വെളിയിലുള്ള മറ്റ് ജില്ലകളിൽ നിന്നും കേരളത്തിന് പുറത്തുനിന്നുള്ള സംസ്ഥാനങ്ങളിൽ നിന്നും വരുന്നവർക്ക് ആവശ്യമെങ്കിൽ രണ്ട് ദിവസത്തെ താമസസൌകര്യം സംഘാടകർ ഏർപ്പാടാക്കുന്നതാണ്. അതിന് രണ്ട് ദിവസത്തേക്ക് 300 രൂപ വേറെ നൽകണം. അത് ചിലപ്പോൾ ഡോർമിറ്ററി പോലുള്ള സൌകര്യമായിരിക്കും. രണ്ട് പേർ ഷെയർ ചെയ്യുന്ന മുറി ആവശ്യമുള്ളവർ രണ്ട് ദിവസത്തേക്ക് 600 രൂപയും. ഒറ്റയ്ക്ക് മുറി വേണമെന്നുള്ളവർ രണ്ട് ദിവസത്തേക്ക് 1200 രൂപയും നൽകണം. ഹൂബ്ലിയിൽ ഇതേ പരിപാടി നടന്നപ്പോൾ വലിയ ടെന്റുകളിൽ താമസസൌകര്യം സംഘാടകർ ഒരുക്കുകയാണുണ്ടായത്. ആൾക്കാർ രാത്രി ഏറെ വൈകി വെടിവട്ടം പറഞ്ഞിരിക്കുകയും അത് പരേഡിന്റെ സമയത്ത് അവർക്ക് ഉറക്കക്ഷീണം ഉണ്ടാക്കുകയും ചെയ്തു എന്ന അനുഭവത്തിന്റെ വെളിച്ചത്തിലാണ് വലിയ ടെന്റുകൾ സ്ഥാപിച്ച് അതിൽ താമസസൌകര്യം ഒരുക്കാത്തത്. അങ്ങനെ ചെയ്താൽ താമസച്ചിലവ് കുറക്കാമെങ്കിലും അത് ലക്ഷ്യത്തിലെത്താൻ തടസ്സമുണ്ടാക്കുന്നുണ്ട്.

7. ജനുവരി 26 ഞായറാഴ്ച്ചയാണ്. പക്ഷേ പങ്കെടുക്കുന്നവർ 25ന് ശനിയാഴ്ച്ച പകൽ തന്നെ കൊച്ചിയിൽ ഹാജരുണ്ടാകണം. ട്രയൽ പരേഡ് അഥവാ മോക്ക് പരേഡ് അടക്കമുള്ള കാര്യങ്ങളും സൈക്കിൾ പരിശോധനയുമെല്ലാം പലവട്ടം ചെയ്യേണ്ടതുണ്ട്. അതുകൊണ്ടാണ് പുറമെ നിന്ന് വരുന്നവർക്ക് രണ്ട് ദിവസത്തെ താമസ സൌകര്യം ഏർപ്പാടാക്കുന്നത്.

8. ഗ്ലൌസ്, പിന്നിലേയും മുന്നിലേയും ലൈറ്റുകൾ, കണ്ണട, സ്പെയർ പാർട്ട്സ്, എന്നിവ ഉണ്ടെങ്കിൽ നല്ലതാണെന്ന് നിർദ്ദേശിക്കുന്നുണ്ടെങ്കിലും(recommended) ഇതൊന്നും നിർബന്ധമല്ല. പക്ഷേ ഹെൽമറ്റ് നിർബന്ധമാണ്. സംഘാടകർ നൽകുന്ന പരേഡിന്റെ ടീഷർട്ട് മാത്രമേ മേൽക്കുപ്പായമായി ധരിക്കാൻ പാടുള്ളൂ. പരേഡ് നടക്കുമ്പോൾ മൊബൈൽ ഫോൺ ഉപയോഗിക്കാനേ പാടില്ല.

9. ഈ പരേഡിൽ പങ്കെടുക്കാൻ ഏതെങ്കിലും ക്ലബ്ബിന്റെ ഭാഗമാകേണ്ട ആവശ്യമില്ല. ഏതൊരു വ്യക്തിക്കും സ്വന്തം നിലയ്ക്ക് പങ്കെടുക്കാം. സൈക്കിൾ സ്വന്തമായി ഇല്ലാത്തവർക്കും പങ്കെടുക്കാം. ആ‍വശ്യമുള്ളവർക്ക് 500 രൂപ നിരക്കിൽ, സൈക്കിൾ സംഘാടകർ തരുന്നതാണ്. രജിസ്റ്റർ ചെയ്യുമ്പോൾ അക്കാര്യം സൂചിപ്പിച്ചാൽ മതി.

10. പരേഡ് നടക്കുന്ന സ്ഥലം ഇനിയും തീരുമാനിച്ച് ഉറപ്പിച്ചിട്ടില്ല. പൊതുഗതാഗതം കാര്യമായി തടസ്സപ്പെടാത്ത തരത്തിലുള്ള ഒരിടമാണ് ആവശ്യമുള്ളത്. അത്തരം സ്ഥലങ്ങൾ അധികൃതരുടെ അനുമതി ആവശ്യമുള്ളതാണെങ്കിൽ അത് നേടേണ്ടതുണ്ട്. 3.2 കിലോമീറ്റർ അഥവാ 2 മൈൽ ദൂരമാണ് ഗിന്നസിന് വേണ്ടി വരിവരിയായി സൈക്കിളിൽ നീങ്ങേണ്ടതെങ്കിലും എല്ലാവരും 5 കിലോമീറ്ററോ അതിലധികമോ ചവിട്ടാൻ തയ്യാറായിരിക്കണം.

11. മൂന്ന് പ്രാവശ്യം റെക്കോർഡ് ശ്രമം നടത്താൻ ഗിന്നസ് ബുക്ക് അനുവദിക്കുന്നുണ്ട്. ആദ്യ ശ്രമത്തിൽ പരാജയപ്പെട്ടാൽ രണ്ട് പ്രാവശ്യം കൂടെ ശ്രമിക്കാമെന്ന് സാരം. ആയതിനാൽ പങ്കെടുക്കുന്നവർക്ക് കൃത്യം 3.2 കിലോമീറ്ററല്ല ചവിട്ടേണ്ടി വരുന്നത്. മൂന്ന് പ്രാവശ്യവും ശ്രമിക്കേണ്ടി വന്നാൽ പത്ത് കിലോമീറ്ററിന് മേലെ ചവിട്ടേണ്ടതായി വരും. രാവിലെ മുതൽ മൂന്ന് പ്രാവശ്യമെന്ന് പറയുമ്പോൾ, ലൈൻ അപ്പ് അടക്കം വൈകീട്ട് നാല് മണി വരെയോ അതിന് ശേഷമോ നീണ്ട് പോയെന്ന് വരാം. ഓരോ സൈക്കിളിസ്റ്റുകളും ഇത് മനസ്സിലാക്കിയിരിക്കുക. അതിനനുസരിച്ച് പ്രാൿറ്റീസ് ചെയ്യുക. ദിവസം മുഴുവൻ നീളുന്ന തയ്യാറെടുപ്പിന് സജ്ജരാകുക; സൈക്കിളിങ്ങ് കാര്യക്ഷമത ഉണ്ടാക്കിയെടുക്കുക. ഇത്തരത്തിലുള്ള ബുദ്ധിമുട്ട് സഹിച്ച് പരേഡിൽ പങ്കെടുക്കാൻ ആവില്ലെന്ന് കണ്ടെത്തുന്നവരെ തലേന്ന് നടക്കുന്ന ട്രയൽ റണ്ണിൽ കണ്ടെത്തി ഒഴിവാക്കുന്നതാണ്. ഒരാൾ കാരണം മുഴുവൻ പേരുടേയും മറ്റുള്ള ഓരോ വ്യക്തികളുടേയും രാജ്യത്തിന്റെ തന്നെയും നേട്ടത്തിന് തടസ്സം ഉണ്ടാകരുത് എന്നതുകൊണ്ട് പങ്കെടുക്കുന്നവർ ഈ നിബന്ധനയുമായി പൂർണ്ണമായും സഹകരിക്കണമെന്ന് അഭ്യർത്ഥിക്കുന്നു.

12. റെക്കോഡ് സ്ഥാപിക്കാനായാൽ റെക്കോഡിന്റെ *ഭാഗമായവർക്കെല്ലാം ഗിന്നസിന്റെ സൈറ്റിൽ നിന്ന്, സ്വന്തം പേരുള്ള വ്യക്തിഗത സർട്ടിഫിക്കറ്റുകൾ സൌജന്യമായി  പ്രിന്റ് ചെയ്തെടുക്കാവുന്നതാണ്. മുൻപ് അത്തരത്തിൽ പെങ്കെടുത്ത ഒരു വ്യക്തിയുടെ ഗിന്നസ് സർട്ടിഫിക്കറ്റ് ചുവടെ ചേർക്കുന്നു. ഗിന്നസിൽ നിന്നുള്ള ഒറിജിനൽ സർട്ടിഫിക്കറ്റ് വേണമെന്നുള്ളവർ അത് സ്വന്തം അഡ്രസ്സിൽ എത്താനുള്ള തുക ഗിന്നസിൽ നൽകി തപാലിൽ വരുത്താവുന്നതാണ്. റെക്കോഡ് ഇടുന്ന വേളയിൽ ആ സ്ഥലത്ത് വെച്ച് ഗിന്നസ് നൽകുന്നത് മൊത്തത്തിൽ നടന്ന ഇവന്റിൽ റെക്കോഡ് നേടി എന്ന് കാണിക്കുന്ന ഒരു സർട്ടിഫിക്കറ്റ് മാത്രമായിരിക്കും.

13. പങ്കെടുക്കുന്നവരുടെ പ്രായത്തിന് മുകളിലേക്ക് പരിധിയൊന്നും ഇല്ലെങ്കിലും താഴേക്ക് അത് 15 എന്ന് ക്ലിപ്തപ്പെടുത്തിയിട്ടുണ്ട്. എന്നിരുന്നാലും 15 മുതൽ 18 വരെ പ്രാവമുള്ളവർ പങ്കെടുക്കുമ്പോൾ രക്ഷിതാക്കളിൽ ആരെങ്കിലും ഒരാൾ പരേഡ് നടക്കുന്ന സ്ഥലത്ത് ഉണ്ടായിരിക്കേണ്ടതാണ്. 15 വയസ്സിൽ താഴെയുള്ള കുട്ടികൾക്ക് പങ്കെടുക്കണമെങ്കിൽ അവർ ഏതെങ്കിലും അംഗീകൃത തലത്തിലുള്ള സൈക്കിളിങ്ങ് പരിശീലനം നേടിയതായോ മത്സരത്തിൽ പങ്കെടുത്തതായോ ഉള്ള സർട്ടിഫിക്കറ്റുകളും രേഖകളും ഹാജരാക്കണം. അതെല്ലാം പരിശോധിച്ച് സ്ഥിരീകരിച്ച ശേഷം മാത്രമേ പങ്കെടുപ്പിക്കൂ.

14. *പരേഡ് ആരംഭിച്ച ശേഷം ഇടയ്ക്ക് ഒരു സൈക്കിളിസ്റ്റ് സൈക്കിളുമായി വീഴുകയോ, പഞ്ചർ, ചെയിൻ പൊട്ടൽ, ചെയിൻ ലൂസാകൽ, ബ്രേക്ക് ജാം ആകൽ എന്നിങ്ങനെയുള്ള ഏതെങ്കിലും ഒരു കാരണത്താൽ പരേഡിൽ നിന്ന് പുറത്തേക്ക് പോകുകയോ ഉണ്ടായാൽ അയാൾക്ക് പിന്നിൽ വരുന്ന അത്രയും സൈക്കിളുകൾ പരേഡ് നിരയിൽ നിന്ന് പുറത്താകും. ഒന്നുകൂടെ വിശദമായി പറഞ്ഞാൽ. പരേഡിലെ 2500 -)മത്തെ ആളാണ് വീഴുന്നതെങ്കിൽ ഗിന്നസ് റെക്കോഡ് കിട്ടുക 2499 പേർക്കുള്ളതായിരിക്കും. അതിന് പിന്നാലെ വന്നവർക്ക് വ്യക്തിഗത സർട്ടിഫിക്കറ്റ് നഷ്ടമാകും. 1995 എന്ന റെക്കോഡാണ് ഭേദിക്കാൻ ശ്രമിക്കുന്നത്. ആയതുകൊണ്ടുതന്നെ. 1995 മുതൽ മുൻപിലുള്ള ഏതെങ്കിലും സൈക്കിളിസ്റ്റാണ് പുറത്താകുന്നതെങ്കിൽ റെക്കോർഡ് ഭേദിച്ചതായി കണക്കാക്കില്ല. ആയതിനാൽ രണ്ടാമത്തെ ശ്രമത്തിലേക്കും അതിലും പരാജയപ്പെട്ടാൽ മൂന്നാമത്തെ ശ്രമത്തിലേക്കും കടക്കും. മൂന്ന് ശ്രമങ്ങളും പരാജയപ്പെട്ടാൽ ഇതൊരു റെക്കോർഡ് ശ്രമം മാത്രമായി അവസാനിക്കും.

15. മേൽ‌പ്പറഞ്ഞ അനിഷ്ടങ്ങളിൽ പഞ്ചർ എന്ന ഒരു കാര്യം മാത്രം നമ്മൾ മനുഷ്യരുടെ നിയന്ത്രണത്തിന് വെളിയിലാണ്. മറ്റെല്ലാത്തരത്തിലും സൈക്കിൾ പൂർണ്ണ സജ്ജമാണെന്ന് ഓരോ സൈക്കിളിസ്റ്റുകളും സ്വയം ഉറപ്പ് വരുത്തുകയും സംഘാടകർ നിയമിച്ചിട്ടുള്ള സൈക്കിൾ മെക്കാനിക്കുകൾ ( 7 പേർ) വഴിയോ ഉറപ്പ് വരുത്തിയിരിക്കണം. ചെയിൻ കവർ ഉള്ള സൈക്കിളുകളിൽ നിന്ന് അതഴിച്ച് മാറ്റി പങ്കെടുത്താൽ, തെറ്റിപ്പോയ ചെയിൻ പെട്ടെന്ന് തന്നെ ഇടാൻ സൌകര്യമാകും. അഥവാ സൈക്കിൾ പഞ്ചറായാലും 3.2 കിലോമീറ്റർ പഞ്ചർ വെച്ചുകൊണ്ടുതന്നെ ചവിട്ട് പൂർത്തിയാക്കാൻ ശ്രമിക്കുകയാണ് വേണ്ടത്. അങ്ങനെ ചെയ്താൽ ടയറും ട്യൂബും റിമ്മും ഒക്കെ നാശമായെന്ന് വരാം. പക്ഷെ അത് നമുക്ക് നന്നാക്കിയെടുക്കാനാവും. ഇത്രയും പേരുടെ അദ്ധ്വാനവും സന്തോഷവും ഇല്ലാതായിപ്പോകാതിരിക്കാൻ അങ്ങനെ ഒരു ത്യാഗം പഞ്ചറാകുന്ന ആൾ സഹിക്കേണ്ടി വരും.

16. ഈ പരേഡിൽ നിന്ന് ഉണ്ടാക്കുന്ന സാമ്പത്തിക നേട്ടം മുഴുവൻ പരേഡിന്റെ ബാങ്ക് അക്കൌണ്ടിൽ നിക്ഷിപ്തമായിരിക്കും. അതിന്റെ മുഴുവൻ കണക്കുകളും ഓൺലൈനിൽ പബ്ലിഷ് ചെയ്യുന്നതാണ്. എന്തെങ്കിലും നഷ്ടമോ കടമോ ഉണ്ടായാൽ അത് സംഘാടകർ സഹിക്കുന്നതും ലാഭം ഉണ്ടായിട്ടുണ്ടെങ്കിൽ അത് സൈക്കിളിങ്ങ് സംബന്ധിയായ പരിപാടികൾക്ക് വിനിയോഗിക്കുന്നതുമായിരിക്കും. റെക്കോഡ് സ്ഥാപിക്കാനായില്ലെങ്കിൽ മറ്റൊരു റേക്കോഡ് ശ്രമം നടത്താനുള്ള ഫണ്ടിലേക്ക് ഈ തുക ഉപയോഗിക്കപ്പെടും. ഈ റെക്കോഡ് മറ്റൊരു കൂട്ടർ തകർത്താൽ ഒരിക്കൽക്കൂടെ റെക്കോഡ് ഭേദിക്കുന്ന ഒരു പരേഡിനെപ്പറ്റി ചിന്തിക്കുമ്പോൾ അതിലേക്ക് ഈ തുക വകയിരുത്തുന്നതാണ്. ഇത് കൂടാതെ സൈക്കിളിങ്ങ് സംബന്ധിയായ മറ്റ് പല ഗിന്നസ് റേക്കോഡുകളും നിലവിലുണ്ട്. വരുംകാലങ്ങളിൽ ആ റേക്കോഡുകൾ ഭേദിക്കുന്നതിനായുള്ള പ്രവർത്തനങ്ങൾക്ക് വേണ്ടി, ലാഭത്തിലൂടെ ബാക്കി വരുന്ന (ബാക്കി വന്നാൽ) തുക ഉപയോഗിക്കുന്നതാണ്.

17. നിലവിൽ 3500 പേരെ വെച്ചാണ് പരേഡ് പദ്ധതിയിടുന്നതെങ്കിലും ജനുവരി ആദ്യവാരം വരെ രജിസ്ട്രേഷൻ തുടർന്ന് പോകുന്നതാണ്. ജനുവരി  വരെ രജിസ്റ്റർ ചെയ്യുന്നത് 3500 മുകളിലുള്ള സൈക്കിളിസ്റ്റുകളായാലും അത്രയും പേരെ വെച്ച് പരേഡ് നടത്താൻ സംഘാടകർ സന്നദ്ധരാണ്. സ്പോട്ട് രജിസ്ട്രേഷൻ ഉണ്ടായിരിക്കുന്നതല്ല.

18. ഇതിന്റെ ഭാഗമായി രണ്ട് ദിവസം കൊച്ചിയിൽ എക്സ്പോ ഉണ്ടായിരിക്കുന്നതാണ്. പരേഡിൽ രജിസ്റ്റർ ചെയ്യുന്നവർക്ക് എക്സ്പോയിൽ പ്രവേശനം സൌജന്യമായിരിക്കും. കുറഞ്ഞ നിരക്കിൽ അല്ലെങ്കിൽ റിഡക്ഷൻ നിരക്കിൽ സ്പോർട്ട്സ് സാധനങ്ങൾ എക്സ്പോയിൽ ലഭ്യമാക്കാൻ നിർമ്മാതാക്കളുമായി ഏർപ്പാടുകൾ ചെയ്യുന്നതാണ്.

ജനുവരി 26ന് നടത്തുന്ന പരിപാടി ആയതുകൊണ്ട് തന്റെ രാജ്യസ്നേഹത്തിന്റേയും അഖണ്ഡതയുടേയുമൊക്കെ ഔന്നത്യത്തിൽ നിൽക്കുന്ന ഒരു പരേഡ് കൂടെയാണിത്. രണ്ട് വട്ടം ഇന്ത്യയിൽ ഉണ്ടായിരുന്ന ഒരു റെക്കോഡ് തിരികെ ഇന്ത്യയിലേക്ക് കൊണ്ടുവരാൻ നടത്തുന്ന ഈ പരേഡ് അത്തരത്തിൽത്തന്നെ രാജ്യശ്രദ്ധയും മാദ്ധ്യമശ്രദ്ധയും ആകർഷിക്കാൻ പോന്നതാണ്. വിജയിച്ചാലും പരാജയപ്പെട്ടാലും ഈ ശ്രമത്തിന്റെ ഭാഗമാകാൻ കഴിയുക എന്നത് ഇന്ത്യക്കാരനായ ഓരോ സൈക്കിളിസ്റ്റും അഭിമാനമായി കാണേണ്ട ഒന്നാണ്.

മുന്നറിയിപ്പ് & ബാദ്ധ്യതാ നിരാകരണം:- യോഗത്തിൽ പങ്കെടുത്ത ഒരു വ്യക്തി എന്ന നിലയ്ക്കും ഒരു സൈക്കിളിസ്റ്റ് എന്ന നിലയ്ക്കും സ്പോർട്ട്സ് പ്രേമി എന്ന നിലയ്ക്കുമാണ് ഇതിന്റെ സംഘാടകരുമായി വ്യക്തിപരമായി ഞാൻ സഹകരിക്കുന്നത്. ഏതെങ്കിലും ഒരു വിഷയത്തിൽ വ്യക്തിഗത ഗിന്നസ് റെക്കോഡ് നേടാനും മാത്രം പ്രാവീണ്യമോ കഴിവോ ആർജ്ജവവോ ഉള്ള വ്യക്തിയല്ല ഞാൻ. അതുകൊണ്ടുതന്നെ സംഘം ചേർന്നുള്ള ഈ പരേഡ് വഴി ഒരു ഗിന്നസ് റെക്കോഡിന്റെ ഭാഗമാകാനും ഒരു വ്യക്തിഗത ഗിന്നസ് റെക്കോഡ് കൈവശപ്പെടുത്താനുമുള്ള സാദ്ധ്യതയും അവസരവും ജിവിതത്തിൽ വീണ്ടുമൊരിക്കലോ ഇടയ്ക്കിടയ്ക്ക് പോലുമോ ഉണ്ടാകുമെന്ന് ഞാൻ കരുതുന്നില്ല. ഈ പരേഡിൽ പങ്കെടുത്ത് സഹകരിക്കുകയും സംഘാടകർക്ക് ആവശ്യമുള്ള മറ്റേതെങ്കിലും സഹായം നൽകിയും ഞാൻ പങ്കാളിയാകുന്നതിന്റെ പിന്നിലുള്ള ചേതോവികാരം ഇതെല്ലാമാണ്. അതല്ലാതെ ഈ പരേഡ് നടത്തിപ്പിന്റെ ഏതെങ്കിലും ഉത്തരവാദിത്വമോ സാമ്പത്തികം അടക്കമുള്ള കാര്യങ്ങളിലുള്ള ബാദ്ധ്യതയോ നിലവിൽ എന്നിൽ നിക്ഷിപ്തമല്ല. പങ്കെടുക്കുന്നവർ മേൽ‌പ്പറഞ്ഞ കാര്യങ്ങൾ എല്ലാം വായിച്ച് മനസ്സിലാക്കി ഇതിന്റെ വരും വരായ്കൾ സ്വയം ഉൾക്കൊണ്ട് ബോദ്ധ്യപ്പെട്ട് മാത്രം മുന്നോട്ട് നീങ്ങുക.

#CycleWithPride
www.bicycleparade.com
facebook.com/BicycleParade
instagram.com/bicycleparade
twitter.com/bicycle_parade
linkedin.com/groups/12302230

നവംബർ മുതൽ ഒൿടോബർ വരെയുള്ള ഒരു സീസണിൽ അഥവാ ഒരു വർഷത്തിൽ 200, 300, 400, 600 കിലോമീറ്റർ ദൂരങ്ങൾ യഥാക്രമം 13.5, 20, 27, 40 മണിക്കൂറുകൾക്കുള്ളിൽ പിന്നിടുന്നവർക്കാണ് ഫ്രാൻസിൽ നിന്നുള്ള Super Randennouer (SR) പട്ടം നൽകുന്നത്. എബ്രഹാം ഗാലിൻ ‌Eralilgalin Abraham ഈ നേട്ടം കൈവരിച്ചിരിക്കുന്നത് 11 ൽ അധികം പ്രാവശ്യമാണ്. അതിന് പുറമെ 100, 1200, 1400, ഡൽഹി നേപ്പാൾ ഡൽഹി, പാരീസ് ബ്രസ്റ്റ് പാരീസ് എന്നിങ്ങനെയുള്ള എണ്ണം പറഞ്ഞ നേട്ടങ്ങൾ 15ൽ അധികം വേറെയും. ഇതിനൊക്കെ പുറമെ ഒന്നിന് പുറകെ ഒന്നായി 200, 300, 400, 600 കിലോമീറ്ററുകൾ ചവിട്ടിക്കൊണ്ടുള്ള
5 Days SR പട്ടവും ഗാലിൻ കൈവരിച്ചിട്ടുണ്ട്. ഗാലിന്റെ നേട്ടങ്ങൾ ഞാൻ ഇപ്പറഞ്ഞതിൽ മാത്രം ഒതുങ്ങുന്നില്ല. എന്തായാലും, സൈക്കിളിങ്ങ് രംഗത്ത് ഇന്ത്യയിലുള്ള പറ്റാവുന്നത്രയും റെക്കോഡുകൾ മറികടക്കാനുള്ള ശ്രമത്തിലാണ് ഗാലിൻ ഇപ്പോൾ.

അതിന്റെ ഭാഗമാണ് ഒന്നിന് പിന്നാലെ മറ്റൊന്ന് ഘടിപ്പിച്ചിട്ടുള്ള Tandem സൈക്കിളിൽ Super Randennouer (SR) പട്ടത്തിനായുള്ള അദ്ദേഹത്തിന്റെ ശ്രമം. ഇതിൽ അദ്ദേഹത്തിനൊപ്പം കട്ടയ്ക്ക് നിൽക്കുന്നത് ലൊറേൻ Lorraine D’Costa – Trow എന്ന സുഹൃത്താണ്. രണ്ടുപേരും ചേർന്ന് Tandem സൈക്കിളിൽ 200, 300, 400, കിലോമീറ്ററുകൾ അനുവദിച്ചിരിക്കുന്ന സമയത്തിനുള്ളിൽ വിജയകരമായി പിന്നിട്ട് കഴിഞ്ഞു. 600 കിലോമീറ്റർ എന്ന കടമ്പ കൂടെ കഴിഞ്ഞാൽ ഇന്ത്യയിൽ ഈ നേട്ടം ആദ്യശ്രമത്തിൽത്തന്നെ കൈവരിക്കുന്നവർ എന്ന റെക്കോഡ് ഈ എറണാകുളം ജില്ലക്കാരുടെ പേരിലായിരിക്കും. ഈ നേട്ടം കൈവരിച്ചിട്ടുള്ളവർ 600 കിലോമീറ്ററിൽ ഒന്നിലധികം പ്രാവശ്യം ശ്രമിച്ച ശേഷമാണ് വിജയിച്ചിട്ടുള്ളത്. മറ്റൊരു ടീം 200, 300, കിലോമീറ്ററുകൾക്ക് ഒരു പാർട്ട്നറും 400, 600 കിലോമീറ്ററുകൾക്ക് മറ്റൊരു പാർട്ടണറേയുമാണ് ഉൾപ്പെടുത്തിയത്.

ഗാലിനും ലൊറേനും Tandem സൈക്കിളിൽ SR ആകുന്ന ഇന്ത്യയിലെ മൂന്നാമത്തെ ടീം ആണെങ്കിലും, ഈ നേട്ടം പരാജയം നുണയാതെ നേടുന്ന ആദ്യ ടീം ആകാൻ ഇനി മണിക്കൂറുകൾ മാത്രമേ ശേഷിക്കുന്നുള്ളൂ. കോയമ്പത്തൂരുനിന്ന് ഇന്നലെ ഇവർ 600 കിലോമീറ്റർ റൈഡ് ആരംഭിച്ചിരുന്നു. 35 മണിക്കൂർ കഴിഞ്ഞപ്പോൾ അവർ 540 കിലോമീറ്റർ പിന്നിട്ടുകഴിഞ്ഞു. ഇന്ന് വൈകുന്നതിന് മുൻപ്, അനിഷ്ടങ്ങൾ ഒന്നും സംഭവിച്ചില്ലെങ്കിൽ ബാക്കിയുള്ള 60 കിലോമീറ്റർ കൂടെ പിൻ‌തള്ളി ഇവർ ചരിത്രം രചിക്കും.

(അപ്ഡേറ്റ്:-അനുവദിച്ചിരുന്ന 40 മണിക്കൂറിലെ 38 മാത്രം എടുത്ത് ലൊറേനും ഗാലിനും ആ ചരിത്രനേട്ടത്തിന് ഉടമകളായിക്കഴിഞ്ഞിരിക്കുന്നു. അഭിനന്ദനങ്ങൾ!!)

കൊച്ചിയിലെ ചങ്കുകൾ സൈക്കിളിങ്ങിന്റെ ലോകത്ത് വലിയ മുന്നേറ്റമാണ് നടത്തിക്കൊണ്ടിരിക്കുന്നത്. ഇവരെല്ലാം സുഹൃത്തുക്കളാണെന്ന് പറയുന്നത് തന്നെ ഒന്നൊന്നര ഗർവ്വുള്ള കാര്യമാണ്.

വാൽക്കഷണം 1:- ഇവർ കോയമ്പത്തൂര് നിന്ന് കൊച്ചിയിൽ തിരിച്ചെത്തുമ്പോൾ ലൈവായിത്തന്നെ ഉൾക്കൊള്ളിക്കാവുന്ന ഒരു വാർത്തയ്ക്കുള്ള സ്ക്കോപ്പുണ്ടെന്ന് തോന്നുന്നുണ്ടോ ചാനലുകാരേ ? ഉണ്ടെങ്കിൽ നേരിട്ട് ചെന്ന് അതൊന്ന് വാർത്തയാക്കൂ. വാർത്തയ്ക്കുള്ളത് ഇതിലില്ലെങ്കിൽ ഈ പോസ്റ്റ് മറന്നേക്കൂ.

വാൽക്കഷണം 2:- ക്രിക്കറ്റും ഫുട്ട്ബോളും മാത്രമല്ല സൈക്കിളിങ്ങും ഒരു സ്പോർട്ട്സാണ്. ഇതിൽ വിജയം കൈവരിക്കുന്നവർക്ക് സർക്കാർ പ്രോത്സാഹനം നൽകണം. അവരുടെ മുന്നോട്ടുള്ള പ്രയാണങ്ങൾക്ക് സർക്കാർ സഹായമുണ്ടാകണം. സ്പോൺസേർസ് ഇതെല്ലാം കണ്ടറിഞ്ഞ് മുന്നോട്ട് വരണം.