കരയിലൂടെയുള്ള പല പല യാത്രകളെപ്പറ്റിയും യാത്രാ സ്വപ്നങ്ങളെപ്പറ്റിയും വീമ്പിളക്കിക്കൊണ്ടിരിക്കാൻ അത്ര വലിയ ബുദ്ധിമുട്ടൊന്നുമില്ല.

പക്ഷേ, യാത്ര ആകാശത്തിലൂടെയോ കടലിലൂടെയോ ആകുമ്പോൾ അത്ര സുഖകരമായ അനുഭവങ്ങളല്ല എനിക്കുള്ളത്. ഉയരം പേടിയാണ്; ടർബുലൻസ് പേടിയാണ്. കടൽച്ചൊരുക്ക് പോയിട്ട് ഒരു ചെറിയ തിര പോലും പേടിയാണ്. എന്നിട്ടും, എണ്ണപ്പാടത്തെ ജോലി സംബന്ധമായി ഇതുപോലുള്ള അവസ്ഥകളിലൂടെയെല്ലാം നിർബന്ധിതമായി കടന്ന് പോകേണ്ടി വന്നിട്ടുണ്ട്. ഓർക്കുമ്പോൾ ഇപ്പോളും വിറങ്ങലിപ്പുണ്ടാകുന്ന അനുഭവങ്ങളാണ് അതിൽ ചിലതെങ്കിലും.

അതുകൊണ്ടുതന്നെ, 1968ൽ ഉണ്ടായിരുന്ന നാവിക സൗകര്യങ്ങൾ മാത്രം ഉപയോഗിച്ച് കടലിലൂടെ ഒറ്റയ്ക്ക് ലോകം ചുറ്റുന്നത് വെറുമൊരു യാത്രയല്ലെന്ന് നന്നായറിയാം. അതിസാഹസികമായ, ലോകത്ത് അധികം പേർക്കൊന്നും ചെയ്ത് മുഴുമിപ്പിക്കാനാവാത്ത, മജ്ജ മരവിച്ച് പോകുന്ന അനുഭവങ്ങൾ തരാൻ പോന്ന ഭയാനകമായ സഞ്ചാരമാണ് ഗോൾഡൻ ഗ്ലോബ് റേസ്.

ഇന്ത്യക്കാരനായ കമാൻഡർ അഭിലാഷ് ടോമി, 2018 ലെ ഗോൾഡൻ ഗ്ലോബ് റേസിൽ അപകടം പറ്റി പുറത്തായപ്പോൾ പൊലിഞ്ഞുപോയത് മലയാളികൾക്ക് കൂടെ അഭിമാനിക്കാൻ പോന്ന ഒരു വലിയ നേട്ടമായിരുന്നു.

പക്ഷേ, പൂർവ്വാധികം ശക്തനായി, അനുഭവങ്ങളുടെ പിൻബലത്തോടെ കമാൻഡർ അഭിലാഷ് ടോമി, ഗോൾഡൻ ഗ്ലോബ് 2022 റേസിൽ വീണ്ടും പങ്കെടുത്തു കൊണ്ടിരിക്കുകയാണെന്ന് മാത്രമല്ല, രണ്ടാം സ്ഥാനത്ത് നീങ്ങിക്കൊണ്ടിരിക്കുകയുമാണ്.

നാവികരുടെ എവറസ്റ്റ് എന്നറിയപ്പെടുന്ന കേപ്ഹോൺ അദ്ദേഹം പിന്നിട്ടുകഴിഞ്ഞു. മുന്നിൽ മറ്റൊരു സഞ്ചാരി മാത്രമേയുള്ളൂ. ആ സഞ്ചാരിയെ മറികടന്ന് ഒന്നാം സ്ഥാനത്ത് എത്തിയാലും ഇല്ലെങ്കിലും ഈ യാത്ര അദ്ദേഹം പൂർത്തിയാക്കിയാൽ, ആ നേട്ടം കൈവരിക്കുന്ന ആദ്യത്തെ ഏഷ്യക്കാരനായിരിക്കും അഭിലാഷ് ടോമി എന്നത് ചെറിയ നേട്ടമൊന്നുമല്ല.

ആയതുകൊണ്ട് അദ്ദേഹം ഈ റേസ് അപകടങ്ങളൊന്നുമില്ലാതെ പൂർത്തിയാക്കണമെന്ന് അതിയായി ആഗ്രഹിക്കുന്നു. ഒന്നാം സ്ഥാനത്തേക്കാളുപരി, റേസ് പൂർത്തിയാക്കുക എന്നതാണ് ഏതൊരു സ്പോർട്ടിസിൻ്റേയും സന്ദേശം.കമാൻഡർ അഭിലാഷ് ടോമിക്ക് ആ സന്ദേശം ഉയർത്തിപ്പിടിക്കാനാവട്ടെ, ദൗത്യം പൂർത്തിയാക്കാനാവട്ടെ. ഇത്തരമൊരു യാത്ര ഒരിക്കൽപ്പോലും സ്വപ്നം കാണാൻ പറ്റാത്ത കോടിക്കണക്കിന് വരുന്ന ലോകജനതയ്ക്കും ഇന്ത്യക്കാർക്കും സർവ്വോപരി മലയാളികൾക്കും ഊർജ്ജം പകരാൻ അദ്ദേഹത്തിനാകുമാറാകട്ടെ. വിജയാശംസകൾ!!

വാൽക്കഷണം:- ക്ലബ്ബ് ഹൗസിലെ ഒരു റൂമിൽ അദ്ദേഹവുമായി സംസാരിക്കാൻ അവസരം കിട്ടിയിട്ടുണ്ട്. റേസ് കഴിഞ്ഞുവന്നാൽ കേരളത്തിൽ അദ്ദേഹത്തിന് നൽകുന്ന ആദ്യസ്വീകരണത്തിൽച്ചെന്ന് കാണണമെന്നും ഹസ്തദാനം ചെയ്യണമെന്നും ഒരാഗ്രഹമുണ്ട്. എനിക്കറിയുന്ന, മലയാളിയായ ഏറ്റവും വലിയ സാഹസിക സഞ്ചാരി കമാൻഡർ അഭിലാഷ് ടോമിയല്ലാതെ മറ്റാരുമല്ല എന്നതാണ് ഈ ആഗ്രഹത്തിന് കാരണം.

ഭൂമി ചുറ്റിയുള്ള പായ് വഞ്ചി സഞ്ചാര മത്സരമാണ് ‘ഗോൾഡൻ ഗ്ലോബ് റേസ്‘.

പായ് വഞ്ചിയിൽ ഏകനായി ലോകം ചുറ്റി വന്ന ആദ്യത്തെ ഇന്ത്യക്കാരനായ കമാൻഡർ അഭിലാഷ് ടോമി, ഗോൾഡൻ ഗ്ലോബ് മത്സരത്തിനായി, സ്പോൺസർമാരെ തേടുന്നു എന്ന വാർത്ത, ഇന്ത്യയ്ക്ക് ഇത്ര ദാരിദ്യമോ എന്ന ആശങ്കയോടെയാണ് വായിച്ചത്.

സ്വാതന്ത്ര്യലഭ്ദ്ധിക്ക് ശേഷം ഇന്ത്യയിൽ നിന്ന് എത്ര പേർ ഇതുവരെ പങ്കെടുത്തിട്ടുണ്ട് അതീവ സാഹസികമായ ഈ കടൽ റേസിൽ ? കണക്ക് കൈവശമില്ല. എങ്കിലും ഒരൂഹം പറഞ്ഞാൽ ചിലപ്പോളത് വിരലിൽ എണ്ണാവുന്നവർ മാത്രമായിരിക്കാം. അല്ലെങ്കിൽ കമാൻഡർ അഭിലാഷ് ടോമി മാത്രമായ്രിക്കാം.

2018 ൽ ഇതേ മത്സരത്തിൽ ഇന്ത്യയിൽ നിന്ന് പങ്കെടുത്തത് അദ്ദേഹം മാത്രമായിരുന്നു. അന്ന് 150 കിലോമീറ്റർ വേഗത്തിൽ വീശിയടിച്ച കാറ്റിൽ പായ് വഞ്ചി തകരുകയും പായ് മരം വീണ് നടുവിന് ഗുരുതരമായി പരുക്കേൽക്കുകയും ചെയ്തപ്പോൾ മൂന്ന് ദിവസം അതേ പരിക്കുകളോടെ കടലിനെ അതിജീവിച്ച സാഹസികനാണ് അദ്ദേഹം. ചികിത്സകളെല്ലാം കഴിഞ്ഞ് വീണ്ടും ഗോൾഡൻ ഗ്ലോബ് മത്സരത്തിൽ (2022) പെങ്കെടുക്കാൻ ശ്രമിക്കുമ്പോളാണ് അദ്ദേഹത്തിന് സാമ്പത്തികം പ്രശ്നമാകുന്നത്.

ഇന്ത്യൻ സർക്കാറിന് തന്നെ ചിലവഴിക്കാവുന്നതല്ലേയുള്ളൂ ഇപ്പറഞ്ഞ 4 കോടി പണം ? സേനയിൽ സേവനമനുഷ്ടിച്ചിരുന്ന, റെക്കോഡ് ജേതാവായ ഒരു നാവികനോട് ചെയ്യാവുന്ന ആദരവ് കൂടെ ആകില്ലേ അത് ? ഇന്ത്യൻ സർക്കാറിന് പറ്റുന്നില്ലെങ്കിൽ 4 കോടി രൂപ ചിലവഴിക്കാൻ കേരള സർക്കാരിന് ആകില്ലെന്നുണ്ടോ ?

ഇന്ന് മുതൽ ഗ്യാസ് സ്റ്റേഷനുകളിൽ ഇന്ധനം നിറക്കാൻ എത്തുന്ന മലയാളികൾ അഭിലാഷ് ടോമിക്ക് വേണ്ടി 1 രൂപ ഒറ്റ പ്രാവശ്യം കൂടുതലായി അവിടെ കൊടുക്കാൻ തയ്യാറായാൽ ചിലപ്പോൾ അര ദിവസം കൊണ്ട് സമാഹരിക്കാവുന്നതേയുള്ളൂ ഈ തുക. 110 രൂപ പെട്രോളിന് നൽകുന്ന കൂട്ടത്തിൽ ഒരു സാഹസിക സ്പോർട്ട്സിന് 1 രൂപ കൂടുതൽ കൊടുക്കാൻ കുറഞ്ഞപക്ഷം സ്പോർട്ട്സ് പ്രേമികളെങ്കിലും തയ്യാ റാകും.

ഇതൊന്നും പറ്റുന്നില്ലെങ്കിൽ കേരളത്തിലെ പേരുകേട്ട വ്യവസായികൾ ആരെങ്കിലും ഒരാൾ വിചാരിച്ചാൽ അവരുടെ സ്ഥാപനത്തിൻ്റെ സ്പോൺസർഷിപ്പിൽ നടക്കാവുന്നതല്ലേയുള്ളൂ ഇക്കാര്യം. യൂസഫലിയും രവി പിള്ളയുമൊക്കെ ഇക്കാര്യം അറിഞ്ഞിട്ടില്ല എന്ന് കരുതാനാനിഷ്ടം.

ഇതിനേക്കാൾ വലിയ കാര്യങ്ങളുണ്ട് നടത്താൻ. അരപ്പട്ടിണിക്കാരൻ്റേയും കൂരയില്ലാത്തവൻ്റേയും പ്രശ്നങ്ങളുണ്ട് തീർക്കാൻ, അതിനിടയ്ക്ക് ഇയാളുടെ ആഡംബരച്ചുറ്റലിന് ഖജനാവിൽ നിന്ന് കൊടുക്കുന്നതും പിരിവിട്ട് കൊടുക്കുന്നതുമൊക്കെ ശുദ്ധ അസംബന്ധമാണെന്ന വാദങ്ങളും ഉയർന്ന് വന്നേക്കാം. അവരോട് പറയാനുള്ളത് ഇത്രമാത്രം. കഷ്ടപ്പാടുകാരുടേയും ദുരിതം അനുഭവിക്കുന്നവരുടേയും പ്രശ്നങ്ങളും പിരിവിട്ട് ഏറ്റെടുക്കുന്നുണ്ടല്ലോ നമ്മൾ. അതിനിടയിൽ ഒളിമ്പിക്സ് അടക്കമുള്ള കാര്യങ്ങളും രാജ്യം നടത്തുന്നില്ലേ ? ചൊവ്വയിലേക്ക് റോക്കറ്റ് വിടുന്നില്ലേ ? അത്തരത്തിലൊന്നായി കണ്ടാൽ മതി ഇതും. അല്ലെങ്കിൽപ്പിന്നെ നാളെ മുതൽ പട്ടിണി പ്രശ്നങ്ങൾ മാത്രം തീർപ്പാക്കിയാൽ മതി എന്ന് വെക്കണം.

വാൽക്കഷണം:- സോഷ്യൽ മീഡിയ കയറി വല്ല ഹാഷ് ടാഗ് ധനസമാഹരണ ചാലഞ്ച് തുടങ്ങുന്നതിനും മുന്നേ പണമിറക്കുന്നവർക്ക് സംഭവത്തിൻ്റെ മുഴുവൻ ക്രെഡിറ്റും സ്വന്തമാക്കാം. ഒരു മലയാളിയാണ് കമാൻഡർ അഭിലാഷ് ടോമി എന്ന നിലയ്ക്ക് കേരള സർക്കാർ തന്നെ പണമിറക്കണമെന്നാണ് എൻ്റെ പക്ഷം.

ആഗസ്റ്റ് 18 ന് തുടങ്ങി നവംബർ 26 (ഞായർ) വരെ തുടർച്ചയായി 100 ദിവസം സൈക്കിളിങ്ങ് ചെയ്യാൻ താൽ‌പ്പര്യമുള്ളവരെ ക്ഷണിച്ചുകൊള്ളുന്നു.

പദ്ധതി ഇപ്രകാരമാണ്.

1. ഓരോ ദിവസവും ഏറ്റവും കുറഞ്ഞത് 10 കിലോമീറ്ററെങ്കിലും റൈഡ് ചെയ്യണം.

2. കൂടിയ ദൂരം അവരവരുടെ സൌകര്യം പോലെ എത്രവേണമെങ്കിലും ആകാം.

3. എല്ലാ ദിവസവും എല്ലാവരും ഒരുമിച്ച് റൈഡ് ചെയ്യണമെന്ന് നിർബന്ധമില്ല. അവരവരുടെ ഇടങ്ങളിലും റൂട്ടുകളിലും റൈഡ് ചെയ്യാം. ഒരുമിച്ച് ചെയ്യുന്നവർക്ക് അങ്ങനെയുമാകാം.

4. നൂറാമത്തെ ദിവസം, അതായത് നവംബർ 26ന് എല്ലാവരും കൂടെ ഒരു സ്ഥലത്തുനിന്ന് തുടങ്ങി 100 കിലോമീറ്റർ റൈഡ് ചെയ്ത് പരിപാടി അവസാനിപ്പിക്കുന്നു. ഈ 100 കിലോമീറ്ററിന്റെ റൂട്ട് ഇവിടെ ഉരുത്തിരിഞ്ഞ് വരുന്ന അഭിപ്രായത്തിനനുസരിച്ച് പിന്നാലെ തീരുമാനിക്കാം.

5. ഈ റൈഡ് ഇവന്റ് വിജയകരമായി പൂർത്തിയാക്കുന്നവർക്ക് മെഡൽ ഉണ്ടായിരിക്കുന്നതാണ്.

6. നൂറ് ദിവസത്തിനുള്ളിൽ ഏറ്റവും കൂടുതൽ ദൂരം റൈഡ് ചെയ്ത ആദ്യത്തെ മൂന്ന് പേർക്ക് പ്രത്യേകം മെഡൽ ഉണ്ടായിരിക്കുന്നതാണ്. (റൈഡിന്റെ ദൂരം തെളിയിക്കുന്ന രേഖകൾ ഹാജരാക്കേണ്ടി വരും.)

7. ഏതെങ്കിലും ഒരു ദിവസം റൈഡ് ചെയ്യാൻ പറ്റാത്തവർ സ്വാഭാവികമായും ഇവന്റിൽ നിന്ന് പുറത്താകുമെങ്കിലും അവർക്ക്
ബാക്കി ദിവസങ്ങളിൽ റൈഡ് തുടർന്നുകൊണ്ടേയിരിക്കുന്നതിനും നൂറാമത്തെ ദിവസത്തെ റൈഡിൽ ചേരുന്നതിനും തടസ്സമൊന്നും ഇല്ല. ( 100 ദിവസം പൂർത്തിയാക്കിയവർക്കുള്ള മെഡൽ കിട്ടില്ല എന്ന് മാത്രം.) 100 ൽ 80 ദിവസം റൈഡ് ചെയ്താലും അതൊരു വലിയ നേട്ടം തന്നെയാണ്.

8. നൂറാമത്തെ ദിവസത്തെ റൈഡിന് (100 കിലോമീറ്റർ) ഒരു ദിവസം പോലും ഈ ഇവന്റിൽ പങ്കെടുക്കാത്തവർക്ക് പോലും പങ്കുചേരാം. എല്ലാവരും പങ്കുചേർന്ന് ഒരു വിജയമാക്കണം എന്നഭ്യർത്ഥിക്കുന്നു.

9 *** – നൂറ് ദിവസം എന്നത് വലിയൊരു കാലയളവാണ്. ഔദ്യോഗിക യാത്രകൾ, കുടുംബവുമായുള്ള അവധിദിനയാത്രകൾ, എന്നിങ്ങനെയുള്ള കാര്യങ്ങൾ വരുമ്പോൾ സൈക്കിളിങ്ങ് മുടങ്ങിയെന്ന് വരാം. ഇത്യാദി കാരണങ്ങളാൽ 10 കിലോമീറ്റർ സൈക്കിൾ ചെയ്യാൻ പറ്റാത്ത ദിവസങ്ങളിൽ 5 കിലോമീറ്റർ ഓടിയാലും മതി. ഈ ഇളവ് അല്ലെങ്കിൽ വ്യതിയാനം 100 ദിവസത്തിൽ പരമാവധി 10 ദിവസം മാത്രമേ അനുവദിക്കൂ. അങ്ങനെ ചെയ്യുന്നവർ ഇവന്റിൽ നിന്ന് പുറത്താകുന്നില്ല. മെഡലിന് അർഹരുമാണ്.

വാൽക്കഷണം:- തൽക്കാലം ഇത്രേയുള്ളൂ. കൂടുതൽ കാര്യങ്ങൾ റൈഡേർസിന്റെ അഭിപ്രായങ്ങൾ ഉരുത്തിരിഞ്ഞ് വരുന്നതിന് അനുസരിച്ച് എഴുതിച്ചേർക്കുന്നതാണ്.

*** – പങ്കെടുക്കുന്നവരുടെ താൽ‌പ്പര്യവും സൌകര്യവും നിർദ്ദേശവും അനുസരിച്ച് മാറ്റം വരുത്തിയ അഥവാ കൂട്ടിച്ചേർത്ത നിബന്ധനകൾ.

#100‌_Days_Cycling

ഇന്ന് (15 നവംബർ 2015) കൊച്ചി – സ്പൈസ് കോസ്റ്റ് മാരത്തോണിൽ ഹാഫ് മാരത്തോൺ(21.1കി.മീ) ഓടി. ഇത് സ്പൈസ് കോസ്റ്റിലെ എന്റെ രണ്ടാമത്തെ ഹാഫ് മാരത്തോൺ. മൊത്തം കണക്കെടുത്താൽ അഞ്ചാമത്തെ ഹാഫ് മാരത്തോൺ.അടുത്തടുത്ത രണ്ട് ഞായാറാഴ്ച്ചകളിൽ രണ്ട് ഹാഫ് മാരത്തോണുകൾ ഓടുന്നത് ഇതാദ്യം. എല്ലാത്തിനും നന്ദി പറയാനുള്ളത് സോൾസ് ഓഫ് കൊച്ചിനോടാണ്. സോൾസിൽ ചെന്ന് ചേർന്നില്ലായിരുന്നെങ്കിൽ ദീർഘദൂര ഓട്ടമൊക്കെ എന്നും സ്വപ്നമായി അവശേഷിക്കുമായിരുന്നു.

കഴിഞ്ഞ ആഴ്ച്ചയിലെ 2:57:19 എന്ന സമയം 18 മിനിറ്റ് മെച്ചപ്പെടുത്തി 2:39:55 ആക്കാൻ സാധിച്ചു എന്നത് ഒരു സന്തോഷം. മറ്റൊരു വലിയ സന്തോഷം ബ്ലേഡ് റണ്ണർ മേജർ ഡി.പി.സിങ്ങിനൊപ്പം ഓട്ടം ഫിനിഷ് ചെയ്യാനായി എന്നതാണ്.

അവസാനത്തെ 300 മീറ്റർ ആയപ്പോൾ, മീറ്റ് ഒഫീഷ്യലും സുഹൃത്തുമായ നൌഷാദ് അസനാർ ഒരു വിലപ്പെട്ട സൂചന തന്നു. “മേജർ മുന്നിലുണ്ട്. അദ്ദേഹത്തിനൊപ്പം ഫിനിഷ് ചെയ്യാൻ ശ്രമിക്കൂ.“ ഒന്ന് ശ്രമിക്കാതിരിക്കുന്നത് ശരിയല്ലല്ലോ ? ഇല്ലാത്ത ശ്വാസം ആഞ്ഞുവലിച്ച് ചെറിയൊരു കുതിപ്പ് നടത്തിയപ്പോൾ മുന്നിൽ മേജറിനെ കാണാമെന്നായി. വീണ്ടുമൊരു കുതിപ്പിനുള്ള ആവേശം പിന്നെവിടുന്നാണ് വന്നതെന്നറിയില്ല. അദ്ദേഹത്തിന്റെ ഒപ്പം തന്നെ ഫിനിഷ് ചെയ്യാൻ സാധിച്ചു. കൈയ്യിൽ ദേശീയപതാകയും ഏന്തി ‘ഭാരത് മാതാ കീ ജയ് ‘ എന്ന് ഒരു സൈനികന്റെ കുരവള്ളി പൊട്ടുന്ന ശബ്ദത്തിൽ അലറിവിളിച്ചുകൊണ്ടാണ് അദ്ദേഹത്തിന്റെ ഓട്ടം.

ഇനി മേജൽ ഡി.പി.സിങ്ങ് ആരാണെന്ന സംശയം ദുരീകരിക്കാം. കാർഗിൽ യുദ്ധത്തിൽ ഗുരുതരമായി പരുക്കേറ്റ്, മരിച്ചെന്ന് തന്നെ ആർമി ആശുപത്രിയിലുള്ളവർ വിധിയെഴുതിയ, മേജറെ പിന്നീട് ഒരു കാല്, മുറിച്ചുമാറ്റി ജീവിതത്തിലേക്ക് തിരികെ കൊണ്ടുവരികയായിരുന്നു. തുടർന്നങ്ങോട്ട് 13 ഹാഫ് മാരത്തോണുകൾ ഇതുവരെ അദ്ദേഹം ഓടിക്കഴിഞ്ഞു. (അതിനിടയിലാണ് 2 കാലുമുള്ള ഓരോരുത്തന്റെയൊക്കെ 5 ഹാഫ് മാരത്തോൺ വീരസ്യം.)

രാവിലെ ഓട്ടം തുടങ്ങുന്നതിന് മുൻപ് ഗ്രൌണ്ടിൽ മുഴങ്ങിക്കേട്ട അദ്ദേഹത്തിന്റെ പ്രചോദനപരമായ വാക്കുകൾ, എല്ലാ അവയവങ്ങൾക്കും കുഴപ്പമൊന്നുമില്ലാത്തവരെ ഒട്ടേറെ ചിന്തിപ്പിക്കാൻ പോന്നതായിരുന്നു.

“ വൈകല്യമുണ്ടെന്ന് കരുതി ഒരു കാര്യം നമ്മൾ ചെയ്യാതിരുന്നാൽ ആ ഭാഗത്തിന്റെ വൈകല്യം നമ്മൾ സമ്മതിച്ചുകൊടുക്കുകയാണ്. അപ്പോളാണ് നാം ശരിക്കും വികലാംഗനാകുന്നത്. “

സല്യൂട്ട് മേജർ ഡി.പി.സിങ്ങ്!!!! ഒരു പട്ടാളക്കാരന്റെ വീര്യം ഇപ്പോഴും കാത്തുസൂക്ഷിക്കുന്നതിന്. അത് മറ്റുള്ളവരിലേക്ക് പകർന്ന് നൽകുന്നതിന്. ശത്രുക്കളിൽ നിന്ന് ഞങ്ങളെപ്പോലുള്ള അലസന്മാരെ കാത്തുരക്ഷിക്കാൻ സ്വന്തം ജീവിതം തന്നെ നഷ്ടപ്പെടുത്തി പോരാടിയതിന്. ഉള്ളിന്റെ ഉള്ളിൽ നിന്നൊരു വലിയ സല്യൂട്ട് !!!

08 നവംബർ 2015:- തിരുവനന്തപുരത്ത്, എന്റെ നാലാമത്തെ ഹാഫ് മാരത്തോൺ(21.09കിലോമീറ്റർ) 2:57:19 മണിക്കൂറിൽ പൂർത്തിയാക്കി. മഴയ്ക്കൊപ്പം ഓടാനായി എന്നതാണ് ഇപ്രാവശ്യത്തെ ഓട്ടത്തിന്റെ സൌന്ദര്യം വർദ്ധിപ്പിച്ചത്. ഷൂസിനകത്ത് വെള്ളം കയറി, കാൽ‌പ്പാദം ‘ഉപ്പിൽച്ചത്ത’ പല്ലിയെപ്പോലെയായത് അൽ‌പ്പം ബുദ്ധിമുട്ടുണ്ടാക്കി എന്നതൊഴിച്ചാൽ ആരോഗ്യപരമായ പ്രശ്നങ്ങൾ ഒന്നുമുണ്ടായില്ല.

ഒരിക്കലെങ്കിലും ഒരു ഫുൾ മാരത്തോൺ ഓടണമെന്ന ആഗ്രഹ സാഫല്യത്തിലേക്ക് ഇനിയുമൊരുപാട് ദൂരമുണ്ടെന്നറിയാം. 64 വയസ്സിന് ശേഷവും ഫുൾ മാരത്തോൺ ഓടുന്ന ശ്രീ.ആദിത്യ‌നെ‌പ്പോ‌ലുള്ള‌വർ (Adithyan EM ) മാതൃകയായി കൺ‌മുന്നിലുള്ളപ്പോൾ, ആ ദൂരം വെണമെങ്കിൽ ചേർത്തടുപ്പിക്കാവുന്ന അത്രയ്ക്കടുത്താണെന്ന തോന്നലും ശക്തമാണ്.

വേണമെങ്കിൽ സമയം അൽ‌പ്പം കൂടെ മെച്ചപ്പെടുത്താനാകുമായിരുന്നു. പക്ഷേ, എനിക്ക് 100 മീറ്റർ മുന്നിലായി ഓടിക്കൊണ്ടിരുന്ന 15 വയസ്സുകാരി പെൺകുട്ടി, ഫിനിഷിങ്ങ് ലൈനിലേക്ക് 1കിലോമീറ്റർ മാത്രം ദൂരമുള്ളപ്പോൾ, പേശികൾ വെട്ടിക്കയറി ഒരടി മുന്നോട്ട് വെക്കാൻ പറ്റാതെ കരച്ചിലിന്റെ വക്കത്ത് നിൽക്കുന്നു. അത് കണ്ടില്ലെന്ന് നടിച്ച് ഓടിപ്പോകാനായില്ല. ഒരു മുൻ‌കരുതലെന്നോണം കൈയ്യിൽ കരുതിയിരുന്ന ബാൻഡ് ആ കുട്ടിയുടെ കാലിൽ കെട്ടിക്കൊടുത്ത്, ‘എങ്ങനെയെങ്കിലും ഓട്ടം ഫിനിഷ് ചെയ്തേ മടങ്ങാവൂ‘ എന്ന് പ്രോത്സാഹിപ്പിച്ച് മുന്നോട്ട് നീങ്ങിയപ്പോഴേക്കും 2 മിനിറ്റെങ്കിലും നഷ്ടപ്പെട്ടത് കാര്യമാക്കുന്നില്ല. അല്ലെങ്കിലും ഇത്തരം കായികപ്രകടനങ്ങൾ കൊണ്ട്, മാനവർ ഉദ്ദേശമാക്കുന്നതും ഉദ്ദേശമാക്കേണ്ടതും ഇതൊക്കെത്തന്നെയാണ്. സായിപ്പിന്റെ ഭാഷയിൽ സ്പോർട്ട്സ്‌മാൻ സ്പിരിറ്റ് എന്നും പറയാം. അത്തരത്തിലുള്ള ഒരു കഥ കൂടെ പറഞ്ഞുകൊണ്ട് ഈ മാരത്തോൺ വീമ്പ് അവസാനിപ്പിക്കാം.

ലിജോ സ്റ്റീഫൻ ചാക്കോ എന്ന നാവികന്റെ എവറസ്റ്റ് ഡയറിയായിരുന്നു, മടക്കയാത്രയിൽ ട്രെയിനിലിരുന്ന വായിക്കാൻ കൈയ്യിലെടുത്തിരുന്ന പുസ്തകം. എവറസ്റ്റിലേക്കുള്ള കയറ്റത്തെപ്പറ്റി വിവരിക്കാൻ തുടങ്ങുന്നതിന് മുന്നേ, അദ്ദേഹത്തിന്റെ നാവികസേനയിലെ അനുഭവങ്ങൾ പുസ്തകത്തിൽ പറയുന്നുണ്ട്. അതിലൊന്ന്, സന്ദർഭവശാൽ മാരത്തോൺ ഓട്ടങ്ങളെപ്പറ്റിയാണ്. അതിങ്ങനെ…….

“ ദീർഘദൂര ഓട്ടത്തിൽ മിക്കപ്പോഴും ഞാൻ മികച്ച പ്രകടനം കാഴ്ച്ച വെച്ചു. കേഡറ്റുകളുടെ ക്രോസ്‌കണ്ട്രി മത്സരത്തിൽ മെഡലുകളും ലഭിച്ചു. ഇപ്പോൾ ഉന്നത പദവി വഹിക്കുന്ന സുഹൃത്ത് ഇ.ഡേവിഡും ഞാനും മാരത്തോൺ ഓട്ടത്തിൽ രണ്ടാം സ്ഥാനം പങ്കിട്ടു. മത്സരം തുടങ്ങിയപ്പോൾ മുതൽ ഞങ്ങൾ രണ്ടും ഒരുമിച്ചാണ് ഓടിയത്. കിലോമീറ്ററുകൾ കഴിഞ്ഞപ്പോൾ കൂട്ടുകാരെല്ലാം പിന്നിലായി. ഫിനിഷിങ്ങ് പോയന്റിന് ഏതാനും കിലോമീറ്ററുകൾ പിന്നിൽ‌ വച്ച് ഒരാൾ മാത്രമാണ് മുന്നിലെന്ന് അറിഞ്ഞു. ഞങ്ങൾ വേഗം കൂട്ടി. ഒടുവിൽ ഒരുമിച്ച് രണ്ടാം സ്ഥാനക്കാരായി ഫിനിഷ് ചെയ്യാൻ ഞങ്ങൾ തീരുമാനിച്ചു. 42.2 കിലോമീറ്ററിന്റെ അവസാനം ഞങ്ങൾ ഒരുമിച്ച് നിന്ന് ഫിനിഷിങ്ങ് ലൈനിൽ തൊട്ടു. അപ്പോൾ കാണികളുടെ നിർത്താത്ത കൈയ്യടി.”

ഒരുപക്ഷേ ഈ ലോകത്ത് കായികതാരങ്ങൾക്ക് മാത്രം ചെയ്യാൻ പറ്റുന്ന ഒരു വലിയ കാര്യം. ഹാറ്റ്സ് ഓഫ് ലിജോ സ്റ്റീഫൻ ചാക്കോ !!! ഹാറ്റ്സ് ഓഫ് ഇ.ഡേവിഡ് !!!

ലോകപ്രശസ്തനായ ഒരു വ്യക്തിയുടെ കണ്ണുകളാണിത്.

അദ്ദേഹം തന്നെയാണ് കടലാസില്‍ ദ്വാരമുണ്ടാക്കി പൂച്ചയുടെ പടം വരച്ച് മാസ്ക്ക് ഉണ്ടാക്കി അതിനുപിന്നില്‍ ഒളിച്ചിരിക്കുന്നത്. ഇത് ഞാനെടുത്ത പടമല്ല. കാരണം ഈ വ്യക്തി ഇപ്പോള്‍ ജീവിച്ചിരിപ്പില്ല. ഒരു പോസ്റ്റ് കാര്‍ഡിന്റെ രൂപത്തില്‍ ഈ പടം എന്റെ കൈയ്യിലുണ്ട്

ഇതില്‍ക്കൂടുതല്‍ ക്ലൂ വേണമെന്നുള്ളവര്‍ക്ക് വഴിയേ വഴിയേ ക്ലൂ തരാം. ആരാണ് ഈ വ്യക്തി ?
——————————————-
ഉത്തരം കണ്ടുപിടിക്കാന്‍ സന്ധ്യ നടത്തിയ ശ്രമത്തിന് ശേഷം സന്ധ്യയുടെ മെയിലില്‍ നിന്നുള്ള വരികളും ചിത്രസഹിതമുള്ള തെളിവുകളും ഇതാ താഴെയുണ്ട്.
——————————————-


നിരക്ഷരന്‍

ഞാന്‍ എന്റെ ഒന്നരമണിക്കൂര്‍ ഇത് പിക്കാസയുടെ കണ്ണുകളാണോന്ന് അന്വേഷിച്ചുകോണ്ട്, റിസേര്‍ച്ച് ചെയ്തിരിക്കുവാരുന്നു.
നോക്ക് അറ്റാച്ച്മെന്റ്. എനിക്ക് 100% തൃപ്തിയാകാത്തതുകോണ്ട് പൊസ്റ്റുന്നില്ലാ.എന്റെ അഭിപ്രായവ്യത്യാസം എന്താണെന്നു വെച്ചാല്‍, മാസ്കിലെ കണ്ണൂകള്‍ ഇത്തിരി കൂടി റൌണ്ട്, തടിച്ചതാണ്.ഈ ഫോട്ടോയിലെ കണ്ണുകളുടെ താഴ്‌ഭാഗം റൌണ്ടല്ലാ…

ആ പോട്ട്….

വെറുതെ ഒന്നറിയിക്കാം എന്നോര്‍ത്തു…

-സന്ധ്യ
——————————————-
കുറേയധികം മിനക്കെട്ടിട്ടാണെങ്കിലും ഉത്തരത്തില്‍ എത്തിച്ചേര്‍ന്ന അനുപമയ്ക്കും, സന്ധ്യയ്ക്കും അഭിനന്ദനങ്ങള്‍. മത്സരത്തില്‍ പങ്കെടുത്ത എല്ലാവര്‍ക്കും പ്രത്യേകം നന്ദി.

കേരളത്തിലെ ഒരു പ്രശസ്ത ആരാധനാലയത്തിന്റെ മുന്നിലെ കാഴ്ച്ചയാണിത്. പ്രധാന കവാടത്തിനുമുന്നില്‍ ഒരു സ്റ്റാന്‍ഡില്‍, ചിത്രത്തില്‍ കാണുന്നതുപോലെ നല്ല മുറ്റുള്ള ചൂലുകള്‍ എപ്പോഴും ഉണ്ടായിരിക്കും. അതിനുമുന്നില്‍ ചില വിശ്വാസങ്ങളും ആചാരങ്ങളുമൊക്കെയുണ്ട്.

അതെന്താണെന്നും ഈ ആരാധനാലയം എവിടെയാണെന്നും പറയുന്ന എല്ലാവര്‍ക്കും ഓരോ ചൂല് വീതം സമ്മാനമുണ്ട്.

ഇക്കഴിഞ്ഞ മഴക്കാലത്ത് മുഴങ്ങോടിക്കാരി പെമ്പിളേന്റെ ആപ്പീസില് “മണ്‍സൂണ്‍ ഫോട്ടോഗ്രാഫി” എന്ന പേരില് പടംപിടുത്തമത്സരം. കുടുംബക്കാര്‍ക്കും പങ്കെടുക്കാമെന്നായിരുന്നു നിയമാവലി. എനിക്കു പണിയായെന്നു പറഞ്ഞാല്‍ മതിയല്ലോ!!

പെരുമഴയത്ത്‌ പെരുമ്പാവൂരും, മാനന്തവാടിയിലും, കണ്ണീക്കണ്ട പാടത്തും, ചേറിലുമെല്ലാം, അറിയാന്‍പാടില്ലാത്ത ഓരോരോ അഭ്യാസങ്ങള് നടത്തിക്കിട്ടിയ ചില ” പോട്ട” ങ്ങളുമായി വീട്ടീച്ചെന്നപ്പോള്‍, അതിനൊക്കെ അടിക്കുറിപ്പ് വേണം പോലും!

എന്റെ വ്യാകുല മാതാവേ…ഞാനെന്നാ പാപം ചെയ്തിട്ടാ??

കുറേക്കൂടെ നല്ല അടിക്കുറിപ്പ്‌ ആര്‍ക്കെങ്കിലും നിര്‍ദ്ദേശിക്കാനുണ്ടോ ??

വെള്ളിയുരുക്കിയൊഴിച്ചൂ മാനം, കാട്ടുചേമ്പിലക്കൈക്കുമ്പിള്‍ നിറയെ.
അടുത്ത മഴയ്ക്കുമുന്‍പ്‌ ഒരു ശ്രമം കൂടെ.
(വയനാട്ടിലൊരു സുഹൃത്തിന്റെ പൂന്തോട്ടത്തില്‍ നിന്നൊരു ദൃശ്യം.)

കാടും, പുഴയും, മഴയും. അന്യമായിക്കൊണ്ടിരിക്കുന്ന ഒരു കാഴ്ച.
(വയനാട്ടിലെ കുറുവ ദ്വീപില്‍ ‍നിന്നൊരു ദൃശ്യം.)

മഴയ്ക്കും, ഇരപിടിക്കലിനുമിടയില്‍ ഒരു ഇടവേള.

മഴയത്താണെങ്കിലും കൊയ്ത്തു കഴിഞ്ഞു. ഇനി കളപ്പുരയിലേക്ക്.

മഴയത്തൊരു കടത്ത്‌. കുറുവ ദ്വീപില്‍ ‍നിന്നും മറ്റൊരു ദൃശ്യം.

അന്യമായിക്കൊണ്ടിരിക്കുന്ന മറ്റൊരു ദൃശ്യം.

ഇതെവിടെയാണ് ഫോക്കസായിരിക്കുന്നതെന്ന് എനിക്കുതന്നെ അറിയില്ല. അതുകൊണ്ടുതന്നെ അടിക്കുറിപ്പും ഇല്ല.

മഴയുടെ താളത്തിനൊത്ത് ഒരു കൊയ്ത്തുപാട്ടിന്റെ ഈണം കേള്‍ക്കുന്നില്ലേ??