ഭൂമി ചുറ്റിയുള്ള പായ് വഞ്ചി സഞ്ചാര മത്സരമാണ് ‘ഗോൾഡൻ ഗ്ലോബ് റേസ്‘.

പായ് വഞ്ചിയിൽ ഏകനായി ലോകം ചുറ്റി വന്ന ആദ്യത്തെ ഇന്ത്യക്കാരനായ കമാൻഡർ അഭിലാഷ് ടോമി, ഗോൾഡൻ ഗ്ലോബ് മത്സരത്തിനായി, സ്പോൺസർമാരെ തേടുന്നു എന്ന വാർത്ത, ഇന്ത്യയ്ക്ക് ഇത്ര ദാരിദ്യമോ എന്ന ആശങ്കയോടെയാണ് വായിച്ചത്.

സ്വാതന്ത്ര്യലഭ്ദ്ധിക്ക് ശേഷം ഇന്ത്യയിൽ നിന്ന് എത്ര പേർ ഇതുവരെ പങ്കെടുത്തിട്ടുണ്ട് അതീവ സാഹസികമായ ഈ കടൽ റേസിൽ ? കണക്ക് കൈവശമില്ല. എങ്കിലും ഒരൂഹം പറഞ്ഞാൽ ചിലപ്പോളത് വിരലിൽ എണ്ണാവുന്നവർ മാത്രമായിരിക്കാം. അല്ലെങ്കിൽ കമാൻഡർ അഭിലാഷ് ടോമി മാത്രമായ്രിക്കാം.

2018 ൽ ഇതേ മത്സരത്തിൽ ഇന്ത്യയിൽ നിന്ന് പങ്കെടുത്തത് അദ്ദേഹം മാത്രമായിരുന്നു. അന്ന് 150 കിലോമീറ്റർ വേഗത്തിൽ വീശിയടിച്ച കാറ്റിൽ പായ് വഞ്ചി തകരുകയും പായ് മരം വീണ് നടുവിന് ഗുരുതരമായി പരുക്കേൽക്കുകയും ചെയ്തപ്പോൾ മൂന്ന് ദിവസം അതേ പരിക്കുകളോടെ കടലിനെ അതിജീവിച്ച സാഹസികനാണ് അദ്ദേഹം. ചികിത്സകളെല്ലാം കഴിഞ്ഞ് വീണ്ടും ഗോൾഡൻ ഗ്ലോബ് മത്സരത്തിൽ (2022) പെങ്കെടുക്കാൻ ശ്രമിക്കുമ്പോളാണ് അദ്ദേഹത്തിന് സാമ്പത്തികം പ്രശ്നമാകുന്നത്.

ഇന്ത്യൻ സർക്കാറിന് തന്നെ ചിലവഴിക്കാവുന്നതല്ലേയുള്ളൂ ഇപ്പറഞ്ഞ 4 കോടി പണം ? സേനയിൽ സേവനമനുഷ്ടിച്ചിരുന്ന, റെക്കോഡ് ജേതാവായ ഒരു നാവികനോട് ചെയ്യാവുന്ന ആദരവ് കൂടെ ആകില്ലേ അത് ? ഇന്ത്യൻ സർക്കാറിന് പറ്റുന്നില്ലെങ്കിൽ 4 കോടി രൂപ ചിലവഴിക്കാൻ കേരള സർക്കാരിന് ആകില്ലെന്നുണ്ടോ ?

ഇന്ന് മുതൽ ഗ്യാസ് സ്റ്റേഷനുകളിൽ ഇന്ധനം നിറക്കാൻ എത്തുന്ന മലയാളികൾ അഭിലാഷ് ടോമിക്ക് വേണ്ടി 1 രൂപ ഒറ്റ പ്രാവശ്യം കൂടുതലായി അവിടെ കൊടുക്കാൻ തയ്യാറായാൽ ചിലപ്പോൾ അര ദിവസം കൊണ്ട് സമാഹരിക്കാവുന്നതേയുള്ളൂ ഈ തുക. 110 രൂപ പെട്രോളിന് നൽകുന്ന കൂട്ടത്തിൽ ഒരു സാഹസിക സ്പോർട്ട്സിന് 1 രൂപ കൂടുതൽ കൊടുക്കാൻ കുറഞ്ഞപക്ഷം സ്പോർട്ട്സ് പ്രേമികളെങ്കിലും തയ്യാ റാകും.

ഇതൊന്നും പറ്റുന്നില്ലെങ്കിൽ കേരളത്തിലെ പേരുകേട്ട വ്യവസായികൾ ആരെങ്കിലും ഒരാൾ വിചാരിച്ചാൽ അവരുടെ സ്ഥാപനത്തിൻ്റെ സ്പോൺസർഷിപ്പിൽ നടക്കാവുന്നതല്ലേയുള്ളൂ ഇക്കാര്യം. യൂസഫലിയും രവി പിള്ളയുമൊക്കെ ഇക്കാര്യം അറിഞ്ഞിട്ടില്ല എന്ന് കരുതാനാനിഷ്ടം.

ഇതിനേക്കാൾ വലിയ കാര്യങ്ങളുണ്ട് നടത്താൻ. അരപ്പട്ടിണിക്കാരൻ്റേയും കൂരയില്ലാത്തവൻ്റേയും പ്രശ്നങ്ങളുണ്ട് തീർക്കാൻ, അതിനിടയ്ക്ക് ഇയാളുടെ ആഡംബരച്ചുറ്റലിന് ഖജനാവിൽ നിന്ന് കൊടുക്കുന്നതും പിരിവിട്ട് കൊടുക്കുന്നതുമൊക്കെ ശുദ്ധ അസംബന്ധമാണെന്ന വാദങ്ങളും ഉയർന്ന് വന്നേക്കാം. അവരോട് പറയാനുള്ളത് ഇത്രമാത്രം. കഷ്ടപ്പാടുകാരുടേയും ദുരിതം അനുഭവിക്കുന്നവരുടേയും പ്രശ്നങ്ങളും പിരിവിട്ട് ഏറ്റെടുക്കുന്നുണ്ടല്ലോ നമ്മൾ. അതിനിടയിൽ ഒളിമ്പിക്സ് അടക്കമുള്ള കാര്യങ്ങളും രാജ്യം നടത്തുന്നില്ലേ ? ചൊവ്വയിലേക്ക് റോക്കറ്റ് വിടുന്നില്ലേ ? അത്തരത്തിലൊന്നായി കണ്ടാൽ മതി ഇതും. അല്ലെങ്കിൽപ്പിന്നെ നാളെ മുതൽ പട്ടിണി പ്രശ്നങ്ങൾ മാത്രം തീർപ്പാക്കിയാൽ മതി എന്ന് വെക്കണം.

വാൽക്കഷണം:- സോഷ്യൽ മീഡിയ കയറി വല്ല ഹാഷ് ടാഗ് ധനസമാഹരണ ചാലഞ്ച് തുടങ്ങുന്നതിനും മുന്നേ പണമിറക്കുന്നവർക്ക് സംഭവത്തിൻ്റെ മുഴുവൻ ക്രെഡിറ്റും സ്വന്തമാക്കാം. ഒരു മലയാളിയാണ് കമാൻഡർ അഭിലാഷ് ടോമി എന്ന നിലയ്ക്ക് കേരള സർക്കാർ തന്നെ പണമിറക്കണമെന്നാണ് എൻ്റെ പക്ഷം.

ഫാനി ചുഴലിക്കാറ്റ് കേരളത്തിലേക്ക് എത്താൻ പോകുന്നതിനാൽ ഇക്കഴിഞ്ഞ ദിവസങ്ങളിൽ സർക്കാർ തലത്തിൽ നിന്ന് ലഭിച്ച ജാഗ്രതാ മുന്നറിയിപ്പ് ഒന്നുമാത്രമാണ് ഈ കുറിപ്പിനാധാരം.

വളരെ വിശദമായ ഒരു ജാഗ്രതാ നിർദ്ദേശമായിരുന്നു ലഭിച്ചത്. അതിൽ മൂന്ന് കാര്യങ്ങൾ വ്യക്തമായിത്തന്നെയുണ്ട്. അഥവാ മൂന്ന് പ്രത്യേക സ്ഥലങ്ങളിൽ ജീവിക്കുന്നവരെയോ ബാധിക്കുന്ന കാര്യങ്ങളാണ് മുന്നറിയിപ്പിൽ പറയുന്നത്.

1. കടൽത്തീരത്ത് താമസിക്കുന്നവർ, മത്സ്യബന്ധനത്തിന് പോകുന്നവർ. അവർക്കുള്ള ജാഗ്രതാ നിർദ്ദേശങ്ങൾ. കൊള്ളാം നല്ലത് തന്നെ.

2. നദിക്കരയിൽ ജീവിക്കുന്നവർക്കുള്ള ജാഗ്രതാ മുന്നറിയിപ്പ്. മുൻപ് വെള്ളം കയറിയ പ്രദേശത്തുള്ളവർ അത്യാവശ്യം വേണ്ട സാധനങ്ങൾ ചേർത്ത് ഒരു പൊതി ഉണ്ടാക്കി വെക്കുന്നതിനെപ്പറ്റി വരെ നിർദ്ദേശിക്കുന്നുണ്ട്. എന്നുവെച്ചാൽ ഈ കാറ്റ് കാരണം ഒരു വെള്ളപ്പൊക്കം ഉണ്ടായാൽ ചെയ്യേണ്ട കാര്യങ്ങൾ വരെ മുന്നറിയിപ്പായി നൽകിയിരിക്കുന്നു. നല്ലത്, വളരെ നല്ലത്, ഇങ്ങനെ തന്നെ വേണം.

3. മലമ്പ്രദേശത്ത് ജീവിക്കുന്നവർക്കും ആ പ്രദേശങ്ങളിൽ ഉല്ലാസ സവാരി പോകാനിരിക്കുന്നവർക്കും വേണ്ടി നൽകുന്ന മുന്നറിയിപ്പ്. ഉരുൾ‌പൊട്ടൽ അടക്കമുള്ള കാര്യങ്ങൾ ഉണ്ടാകാം. ശ്രദ്ധിക്കുക. നല്ലത്..

ഇനി ഒരുകാര്യം ചോദിക്കട്ടെ. ഒന്നുകിൽ കടലോരം, അല്ലെങ്കിൽ മലയോരം, അല്ലെങ്കിൽ നദീതടങ്ങൾ. ഈ മൂന്ന് സ്ഥലങ്ങളല്ലാതെ വേറെ മറ്റേത് സ്ഥലമാണ് കേരളത്തിലുള്ളത് ?

എന്നുവെച്ചാൽ, ഇപ്പോൾ സർക്കാരിൽ നിന്ന് കിട്ടുന്ന മുന്നറിയിപ്പ്. ഓഖി വന്നാലും പ്രളയം വന്നാലും സുനാമി വന്നാലും ഒരുപോലെ എടുത്തുപയോഗിക്കാൻ പറ്റുന്ന ഒരു മുന്നറിയിപ്പ് മാത്രമാണ്. മുൻ‌കാലങ്ങളിൽ ചില പ്രകൃതിക്ഷോഭങ്ങൾ ഉണ്ടായപ്പോൾ മുന്നറിയിപ്പ് നൽകിയില്ല എന്ന പരാതി ഇനിയങ്ങോട്ട് സർക്കാരിനെതിരെ ഉണ്ടാകാൻ പോകുന്നില്ല. പതിവ് വിട്ട് പ്രകൃതി എന്തെങ്കിലും അനക്കമുണ്ടാക്കുമെന്ന് തോന്നിയാലുടനെ ഈ മുന്നറിയിപ്പ് എല്ലാവർക്കും കിട്ടുന്നതാണ്. പിന്നെ സർക്കാരും
ഉദ്യോഗസ്ഥന്മാരും സുരക്ഷിതർ. ആനന്ദലബ്ദ്ധിക്കിനി എന്തുവേണം ? ഈ ചുഴലിക്കാറ്റ് വന്നതിന്റെ പേരിൽ ഇവിടെ വെള്ളപ്പൊക്കമുണ്ടാകുമെന്ന് ആരെങ്കിലും കരുതുന്നുണ്ടോ ? വെള്ളപ്പൊക്കം ഉണ്ടാകാൻ എത്ര ദിവസം എത്രത്തോളം മഴ പെയ്തെന്നും മറ്റ് ഘടകങ്ങളും എല്ലാവർക്കും ബോദ്ധ്യമുള്ളതാണല്ലോ. പിന്നെന്തിന് ഈ മുന്നറിയിപ്പിൽ വെള്ളപ്പൊക്കവുമായി ബന്ധപ്പെട്ട കാര്യങ്ങൾ ?

എല്ലാ പ്രകൃതിക്ഷോഭങ്ങൾക്കും ഇങ്ങനെ ഒരേ മുന്നറിയിപ്പ് നൽകിക്കൊണ്ടിരുന്നാൽ ഒരു കുഴപ്പമുണ്ട്. പുലി വരുന്നേ പുലി എന്ന കഥ പോലെയാകും. കൂടുതൽ വിശദമാക്കണ്ടല്ലോ ? ജനം ഇത്തരം മുന്നറിയിപ്പുകൾക്ക് പുല്ലുവില പോലും കൊടുക്കില്ല. അല്ലെങ്കിലും വില കൊടുക്കാറില്ല. പക്ഷെ പ്രളയത്തിന്റെ ചുവടുപിടിച്ച് ഒന്ന് ശ്രദ്ധിക്കാൻ സാദ്ധ്യതയുണ്ടായിരുന്നു. അതാണ് ഇല്ലാതാക്കിക്കൊണ്ടിരിക്കുന്നത്.

ഇനി ഇപ്പോൾ ഉണ്ടായ കാലാവസ്ഥാ വ്യതിയാനത്തിന്റെ അല്ലെങ്കിൽ ഫാനി ചുഴലിക്കാറ്റിന്റെ കാര്യമെടുക്കാം. 28, 29, 30 തീയതികളിൽ ആഞ്ഞ് വീശുമെന്ന് പറഞ്ഞെങ്കിലും അതിന്റേതായ ഒരനക്കവും ഇന്നലെ വരെ കാണിച്ചില്ല, ഇന്നും കാണിക്കുന്നില്ല. അപ്പോഴേക്കും മറ്റൊരു നിരീക്ഷണം വന്നു.  കാറ്റ് തീരത്തെത്താൻ മെയ് 2 എങ്കിലുമാകും. ഏറ്റവും പുതിയ നിരീക്ഷണം കുറേക്കൂടെ കേമമാണ്. ചുഴലിക്കാറ്റ് ദിശമാറി, തീരം വിട്ട് ബംഗാൾ ഉൾക്കടൽ ഭാഗത്തേക്ക് കടക്കുന്നു. എങ്ങനെയുണ്ട് കാലാവസ്ഥാ നിരീക്ഷണം ?

ചില വിദേശരാജ്യങ്ങളിൽ അന്നന്നത്തെ കാലാവസ്ഥ ഒരു മണിക്കൂറിന്റെ പോലും വ്യത്യാസമില്ലാതെ കൃത്യം കൃത്യമായി പറയുന്നത് അനുഭവത്തിലുണ്ട്. അവിടങ്ങളിൽ ജനങ്ങൾ പുറത്ത് പോകുമ്പോൾ കുടയെടുക്കണോ കോട്ടിട്ട് പോകണോ എന്നൊക്കെ തീരുമാനിക്കുന്നത് കാലാവസ്ഥാ നിരീക്ഷണത്തെ ആശ്രയിച്ചാണ്.

സാങ്കേതിക വിദ്യ ഇത്ര പുരോഗമിച്ചിട്ടും ചൊവ്വയിലേക്ക് വരെ വിക്ഷേപണം നടത്തിയിട്ടും ഉപഗ്രഹങ്ങളെ വരെ തകർക്കാൻ പോന്ന മുന്നേറ്റമുണ്ടാക്കിയിട്ടും സാധാരണമായ ഒരു മഴ പ്രവചിക്കുന്ന കാര്യത്തിൽ വരെ നമുക്കിപ്പോഴും തപ്പിപ്പിഴയാണ്. ഉപഗ്രഹങ്ങളുടെ കുഴപ്പമാണോ ഉപകരണങ്ങളുടെ കുഴപ്പമാണോ അതൊക്കെ പ്രവർത്തിപ്പിക്കുന്നവരുടെ കുഴപ്പമാണോ അതോ പൊതുജനത്തിന്റെ കുഴപ്പമാണോ, എന്തരോ എന്തോ ?

പെയ്യാനും പെയ്യാതിരിക്കാനും സാദ്ധ്യതയുണ്ട് എന്നുള്ള ആ പഴയ നിരീക്ഷണമുണ്ടല്ലോ ? അതിന് ഇതിനേക്കാൾ പതിന്മടങ്ങ് അന്തസ്സും ആഭിജാത്യവുമുണ്ട്.

എന്നെങ്കിലും നന്നാകുമായിരിക്കും അല്ലേ ? പരാജയപ്പെടുന്നതിന്റെ തൊട്ട് മുൻപുള്ള നിമിഷം വരെ,…. ക്ഷമിക്കണം പ്രതീക്ഷകൾ അസ്ഥാനത്താണെന്ന് മനസ്സിലാക്കുന്നതിന് തൊട്ട് മുൻപുള്ള നിമിഷം വരെ പ്രതീക്ഷയുണ്ടാകുന്നതുകൊണ്ട് കുഴപ്പമൊന്നുമില്ലല്ലോ ? ഓരോരോ പ്രതീക്ഷകളാണല്ലോ ജീവിതത്തെ മുന്നോട്ട് കൊണ്ടുപോകുന്നത് !

വാൽക്കഷണം:- പശ്ചിമഘട്ടത്തിലൂടെ ഒരു ദീർഘയാത്ര പുറപ്പെടാനിരുന്നവന്റെ വഴി മുടക്കിയ കാലാവസ്ഥാ മുന്നറിയിപ്പിനോടുള്ള കലിപ്പായിട്ട് ഈ കുറിപ്പിനെ കണ്ടാലും തെറ്റ് പറയാനാവില്ല.

ചിത്രം:- Media Graamam

ആഴിക്കങ്ങേക്കരയുണ്ടോ ?
ആഴങ്ങള്‍ക്കൊരു …….?
അനങ്ങാത്തിരമാല വഴിയേ വന്നാലീ
അല്ലിനു തീരമുണ്ടോ ?
അല്ലിനു തീരമുണ്ടോ ?

കടലിലൊഴുകി നടക്കുന്ന കൊച്ചു നൌകകളും പായ്‌വഞ്ചികളുമൊക്കെ കാണുമ്പോള്‍ എന്നും ഓര്‍മ്മവരുന്നത് ഈ ഗാനശകലമാണ്. (രണ്ടാമത്തെ വരി ഓര്‍മ്മ വരുന്നുമില്ല.)

മെയിന്‍ ലാന്റ് ബ്രിട്ടണിനും, ഐല്‍ ഓഫ് വൈറ്റിനും(Isle of Wight) ഇടയിലുള്ള ഇംഗ്ലീഷ് ചാനലിന്റെ ഭാഗമായ സോളന്റ് (Solent) കടലിടുക്കില്‍ നിന്നൊരു ദൃശ്യം.