രാവിലെ തന്നെ ബാലേട്ടനെ വിളിച്ചു. എന്തൊരു മനുഷ്യനാണത് ! 20 വർഷം കൊണ്ട് നൂറേക്കറിലായി 20 ലക്ഷം മരങ്ങൾ നട്ട് വളർത്തി പരിപാലിക്കുന്നു ബാലേട്ടൻ. അൻപതാം വയസ്സിലുണ്ടായ ഒരുൾവിളിക്ക് ശേഷമാണ് അദ്ദേഹം വനവൽക്കരണത്തിലേക്ക് കടന്നത്. ഒരു കോടി മരങ്ങളാണ് ബാലേട്ടൻ്റെ ലക്ഷ്യം. അധികം സമയമൊന്നും ബാക്കിയില്ല. അതുകൊണ്ട്, ഓടിനടന്ന് ചെയ്ത് തീർക്കണമെന്ന മട്ടിലാണ് സംസാരം.

മരം നടൽ മാത്രമല്ല, കാട്ടിൽ നിന്ന് മൃഗങ്ങൾ നാട്ടിലേക്ക് കടക്കാതിരിക്കാൻ, പാലക്കാട്ടെ കടകളിൽ നിന്ന് ശേഖരിക്കുന്ന പഴങ്ങൾ കാട്ടിൽ കൊണ്ടുപോയി ഇടുന്ന പരിപാടിയടക്കം പ്രകൃതിയോട് ചേർന്ന് നിൽക്കുന്ന പലപല ഏർപ്പാടുകളുണ്ട് അദ്ദേഹത്തിന്. 2011 സർക്കാറിൻ്റെ വനമിത്ര അവാർഡും നേടിയിട്ടുണ്ട് ബാലേട്ടൻ.

8 മിനിറ്റ് സംസാരത്തിനിടയിൽ പല കാര്യങ്ങളിലും ധാരണയായിട്ടുണ്ട്. പാലക്കാട് ചെന്ന് തങ്ങി 2 ദിവസം ബാലേട്ടൻ്റെ പരിപാടികൾക്കൊപ്പം നടക്കുക, കാണുക, പഠിക്കുക, അതെല്ലാം ശൂലഗിരിയിലും പരിസരങ്ങളിലും സോമനടിക്കുക. ബാലേട്ടനെ ശൂലഗിരിയിൽ കൊണ്ടുവന്ന് താമസിപ്പിച്ച് അദ്ദേഹത്തിൻ്റെ അഭിപ്രായങ്ങൾ ആരാഞ്ഞ് അപ്രകാരം നടപ്പിലാക്കുക. പറ്റുന്നത് പോലെ അദ്ദേഹത്തിൻ്റെ പ്രവർത്തനങ്ങൾക്ക് താങ്ങാകുക. വനവൽക്കരണത്തിന് നടന്ന് 5 ലക്ഷം കടത്തിലാണ് കക്ഷി. 10 സെൻ്റ് സ്ഥലം വിറ്റ് ധനസമാഹരണം നടത്താൻ പോകുന്നെന്നാണ് പറഞ്ഞത്.

അരോഗ്യം സംരക്ഷിച്ചുകൊള്ളണം, യോഗ ചെയ്യണം, എന്നൊക്കെ എന്നെ ഉപദേശിച്ചു. ചുവരില്ലാതെ ചിത്രമെഴുതാൻ പറ്റില്ലെന്ന് കടുപ്പിച്ച് പറഞ്ഞു. നേരിട്ട് ചെന്ന് ബാലേട്ടൻ ചെയ്യുന്ന യോഗയെല്ലാം പഠിച്ച് ചെയ്യുന്നതാണെന്ന് ഉറപ്പ് നൽകിയിട്ടുണ്ട്.

മെഡിമിക്സ് അനൂപ്, ബാലേട്ടനെപ്പറ്റി ഒരു ഡോക്യുമെൻ്ററി തയ്യാറാക്കിക്കൊണ്ടിരിക്കുന്നുണ്ട്. അത് പുറത്തുവന്നാൽ ബാലേട്ടൻ്റെ പ്രവർത്തനങ്ങൾ കൂടുതൽ ജനങ്ങളിലേക്ക് എത്തുമെന്ന് പ്രതീക്ഷിക്കാം.

ഫോൺ കട്ട് ചെയ്ത്, ഇത് എഴുതിക്കൊണ്ടിരിക്കുമ്പോൾ ബാലേട്ടൻ തിരിച്ച് വിളിച്ചു. നക്ഷത്രം എന്താണെന്ന് ചോദിച്ചു. അത്തം ആണെന്ന് പറഞ്ഞപ്പോൾ ബാലേട്ടനും അത്തമാണത്രേ! അമ്പഴമാണ് അത്തക്കാരുടെ മരമെന്നത് അറിയാമോ എന്ന് ചോദിച്ചു. ചിലയിടങ്ങളിൽ, നക്ഷത്രവനങ്ങൾ ഉണ്ടാക്കാൻ സഹകരിച്ചിട്ടുള്ളതുകൊണ്ട് അക്കാര്യം അറിയാം. പക്ഷേ, അമ്പഴമെന്നത് പ്ലാവാക്കി മാറ്റാൻ വല്ല മാർഗ്ഗവുമുണ്ടോ എന്ന് നേരിൽ കാണുമ്പോൾ ബാലേട്ടനോട് തിരക്കണം.

വയനാട്ടിലെ ബത്തേരിക്കടുത്ത് കൊമ്പൻമൂല കാടിനുള്ളിൽ ആദിവാസി യുവതിയും കുടുംബവും പട്ടിണിയിലാണെന്ന് ഏഷ്യാനെറ്റ് വാർത്ത വന്നത് ചിലരെങ്കിലും കണ്ടു കാണുമല്ലോ ?
അതിനുപിന്നാലെ ട്രൈബൽ വകുപ്പ് ഉദ്യോഗസ്ഥർ ആദിവാസി കുടിയിൽ ചെന്ന് ആ സ്ത്രീയെ ചീത്ത പറഞ്ഞ് പോകുന്നു. അതും ചാനലിൽ വരുന്നു. അതോടെ കളി കാര്യമായി.

പിന്നീടുണ്ടായത് ഗുണകരമായ സംഭവങ്ങളാണ്. ഭക്ഷ്യ വകുപ്പ് ഉദ്യോഗസ്ഥർ, സ്ഥലം MLA ഐ.സി. ബാലകൃഷ്ണൻ തുടങ്ങി പലരും കാട്ടിനുള്ളിൽ എത്തി കുടുംബത്തെ സന്ദർശിക്കുന്നു. അവർക്ക് ഉടൻ തന്നെ റേഷൻകാർഡ് ഉണ്ടാക്കിക്കൊടുക്കാമെന്ന് അറിയിക്കുന്നു.

പരാതി പറഞ്ഞ ആദിവാസി യുവതി ബിന്ദുവിന് ആധാർ കാർഡ് ഇല്ലാത്തതുകൊണ്ടാണ് റേഷൻ കാർഡ് കിട്ടാതെ പോയത്. യുവതിയുടെ ഭർത്താവിന് ആധാർ കാർഡ് ഉണ്ട്. അത് വെച്ച് 24 മണിക്കൂറിനുള്ളിൽ, റേഷൻകാർഡ് കിട്ടുന്നു.

ഇത്രയും നാൾ അവർക്ക് കിട്ടാതെ പോയ റേഷൻ കാർഡ്, മണിക്കൂറുകൾക്കുള്ളിൽ ഉണ്ടാക്കിക്കൊടുക്കാൻ ആയെങ്കിൽ അതിനർത്ഥം, വേണമെന്ന് വെച്ചാൽ ചക്ക മരത്തിൽത്തന്നെ കായ്ക്കുമെന്നും അത് പ്ലാവ് നട്ടതിന് പിറ്റേന്നുതന്നെ കായ്ക്കുമെന്നുമാണ്.

ഈ പട്ടിണി വിവരം വാർത്തയാക്കിയ ഏഷ്യാനെറ്റിനും ഇക്കാര്യം ഏഷ്യാനെറ്റിലേക്ക് എത്തിച്ച കുഞ്ഞഹമ്മദിക്കയ്ക്കും അഭിനന്ദനങ്ങൾ!!

കൂട്ടത്തിൽ ചില കാര്യങ്ങൾ കൂടെ പങ്കുവെക്കട്ടെ. ഇപ്പറയുന്നതിന്റെ സത്യാവസ്ഥ എത്രത്തോളം ആണെന്ന് അറിയില്ല. വയനാട്ടിലെ എംപിയും കോൺഗ്രസ് നേതാവുമായ രാഹുൽ ഗാന്ധി പട്ടിണി വാർത്ത കാണാൻ ഇടയായെന്നും അദ്ദേഹം വയനാട് ജില്ലാ കളക്ടറെ വിളിച്ച് വിവരങ്ങൾ തിരക്കിയെന്നും ഉടനടി കുടുംബത്തിന് റേഷൻകാർഡ് കൊടുക്കാനുള്ള നടപടിയുണ്ടാകണമെന്ന് ആവശ്യപ്പെട്ടു എന്നുമാണ് അറിയാൻ കഴിഞ്ഞത്.

സംഭവം സത്യമാണെങ്കിൽ രാഹുൽ ഗാന്ധിയോട് ഒരു കാര്യം പറഞ്ഞോട്ടെ. രാഹുൽഗാന്ധിക്ക് മലയാളം വായിക്കാൻ സാദ്ധ്യതയില്ല എന്നതുകൊണ്ട് ഏതെങ്കിലും കോൺഗ്രസ്സുകാർ അദ്ദേഹത്തെ ഈ വിവരം ധരിപ്പിച്ചാൽ ഉപകാരമായിരുന്നു.

റേഷൻ കാർഡ് ഇല്ലാത്തതുകൊണ്ട് സർക്കാരിന്റെ സൗജന്യ റേഷനും ഓണക്കിറ്റും അടക്കം പല സൗജന്യങ്ങളും കിട്ടാതെ പോകുന്ന ഒരുപാട് ആദിവാസി കുടുംബങ്ങളുണ്ട് വയനാട്ടിൽ. ബത്തേരിയിലും പരിസരങ്ങളിലും മാത്രം അത്തരത്തിൽ പതിനഞ്ചോളം കുടുംബങ്ങളാണുള്ളത്.

ഇതിന് പിന്നിൽ രാഹുൽഗാന്ധിയുടെ കരങ്ങൾ ഉണ്ടെങ്കിൽ, അദ്ദേഹത്തിന്റെ നിർദ്ദേശം ഉണ്ടെങ്കിൽ, ഇനിയവിടെ ബാക്കിയുള്ള 15ൽപ്പരം കുടുംബങ്ങൾക്കും റേഷൻകാർഡ് നേടി കൊടുക്കാൻ രാഹുൽഗാന്ധിക്ക് കഴിയും. വയനാട്ടിലെ കോൺഗ്രസ് പ്രവർത്തകരോ നേതാക്കന്മാരോ ഒന്ന് മനസ്സ് വെച്ച് റേഷൻകാർഡ് ഇല്ലാത്ത ആദിവാസി കുടുംബങ്ങളുടെ ലിസ്റ്റ് എടുത്ത് രാഹുൽഗാന്ധിയിലേക്ക് എത്തിച്ചാൽ മാത്രം മതിയാകും. അതിനായി അധികം ബുദ്ധിമുട്ടണമെന്നില്ല. ലിസ്റ്റ് നിങ്ങളുടെ കയ്യിൽ എത്തിച്ച് തരാം.

എന്റെ അറിവിൽ ഓണത്തിനും പ്രളയത്തിനുമെല്ലാം ഈ കുടുംബങ്ങൾക്ക് കൃത്യമായി ഭക്ഷ്യക്കിറ്റ് എത്തിക്കുന്നത് കുഞ്ഞഹമ്മദിക്കയാണ്. റേഷൻകാർഡ് ഇല്ലാത്ത 15 കുടുംബങ്ങളുടെയെങ്കിലും വാർഡും പഞ്ചായത്തും പേരും വിലാസവുമൊക്കെ 3 ദിവസത്തിനകം ഇതേയിടത്തിൽ പങ്കുവെക്കാം. അവർക്ക് കൂടെ ഓരോ റേഷൻകാർഡ് ഉണ്ടാക്കി കൊടുക്കാൻ നിങ്ങൾക്ക് ആകുമെങ്കിൽ അതൊരു ഒരു വലിയ സേവനം തന്നെയായിരിക്കും. ക്രെഡിറ്റ് മുഴുവനായി നിങ്ങൾക്ക് തന്നെ എടുക്കാം; ചാനലുകാർക്ക് വേണമെങ്കിൽ അവർക്കും പകുത്തു കൊടുക്കാം.

ഈ ജോലി അങ്ങനെ രാഹുൽഗാന്ധിക്കോ കോൺഗ്രസുകാർക്കോ മാത്രമായി വിട്ടുകൊടുക്കണമെന്നില്ല. ഏത് കക്ഷിരാഷ്ട്രീയക്കാരനും ഇടപെടാം. കാര്യം നടക്കണമെന്ന് മാത്രം. കാര്യമായ വോട്ട് ലാഭമൊന്നും ഉണ്ടാകില്ലെന്ന് അറിഞ്ഞിരിക്കുക. അതുകൊണ്ടാണല്ലോ ഇത്രയും നാൾ ഇതൊന്നും നടക്കാതെ പോയതും.

വാൽക്കഷണം:- കൂട്ടത്തിൽ ഒരു വിവരാവകാശ കണക്ക് കൂടി കേട്ടോളൂ. 2006 മുതൽ 2016 വരെയുള്ള 10 വർഷത്തിനുള്ളിൽ ആദിവാസികൾക്ക് വേണ്ടി വകയിരുത്തിയത് 42 കോടി രൂപയാണ്. അതിൽ ചിലവഴിച്ചത് 20 കോടി രൂപ മാത്രം. അത്രയും തുക കട്ടും മോട്ടിച്ചും പോകാതെ ഈ അയ്യോ പാവം ആദിവാസികളിലേക്ക് നേരെചൊവ്വേ എത്തിയിട്ടുണ്ടായിരുന്നെങ്കിൽ, അവരോരോരുത്തരും ഇന്ന് മിഡിൽ ഇൻകം ഗ്രൂപ്പിലാണ്.

വയനാട്ടിലെ കുറുവ ദ്വീപിലേക്കുള്ള പ്രധാന കടവിന്റെ ഒരു ദൃശ്യം.

ഒരു കാടിന്റെ ഏകാന്തത സമ്മാനിച്ചിരുന്ന, അരുവിയുടെ കളകള ശബ്ദം കേട്ടിരിക്കാൻ അവസരമുണ്ടാക്കിയിരുന്ന കുറുവയിലേക്ക് ഇപ്പോൾ പോകാൻ തന്നെ തോന്നില്ല. ഒന്നൊന്നര മണിക്കൂർ തിക്കിത്തിരക്കി നിന്നാലാണ് അങ്ങോട്ടും ഇങ്ങോട്ടും കടത്ത് കടക്കാനാവുന്നത്. 125ല്‍പ്പരം പക്ഷികൾ ഉണ്ടായിരുന്ന ദ്വീപിൽ ഇപ്പോൾ കുരങ്ങുകൾ അല്ലാതെ മറ്റൊരു ജീവിയും ഇല്ല. ഒരു കാടിന്റെ അന്ത്യം എന്ന് ഒറ്റവാക്കിൽ പറയാം. എന്നാലെന്താ പെട്ടി നിറയെ പണം വീഴുന്നില്ലേ ? പണമല്ലേ നമുക്കാവശ്യം. പണത്തിന് മേലെ പരുന്തുപോലും പറക്കില്ലല്ലോ ? പിന്നല്ലേ 125 ഇനം പക്ഷികൾ.

പ്രകൃതിയേക്കാളും വലിയ കലാകാരൻ ആരെങ്കിലുമുണ്ടോ ?
വയനാട്ടിലെ കുറുവ ദ്വീപിൽ നിന്നൊരു ചിത്രം ആ മഹാനായ കലാകാരന്റെ വക ഇതാ….

കുറുവ ദ്വീപുകൾക്ക് ചുറ്റുമുള്ള കബനീ നദി നിറഞ്ഞൊഴുകുന്ന സമയത്ത്, വെള്ളത്തിനടിയിലുള്ള പാറകളിൽ പന്നൽ ഇലകൾ പോലുള്ള പായലുകൾ പറ്റിപ്പിടിക്കും. വേനൽക്കാലമാകുമ്പോൾ അതൊക്കെയും വെള്ളത്തിന് മുകളിൽ വരുകയും വെയിലേറ്റ് വാടിക്കരിയുകയും ചെയ്യും. കറുത്ത ഷേഡുകളിൽ കാണുന്നത് മിനുസമുള്ളതും ചെറുതായി നനഞ്ഞിരിക്കുന്നതുമായ പാറയാണ്. ദൂരെ നിന്ന് നോക്കിയാൽ ഫോസിലുകൾ ആണെന്ന് തോന്നിപ്പോകും.

പറമ്പികുളം ഡാമിന്റെ കാച്ച്മെന്റ് ഏരിയയില്‍ ബാംബൂ റാഫ്റ്റിങ്ങിന് തയ്യാറെടുക്കുന്ന ഫോറസ്റ്റ് ഗാര്‍ഡും തുഴക്കാരും. നാല് തുഴക്കാരെങ്കിലും വേണം ഒരു റാഫ്റ്റിനെ മുന്നോട്ട് നീക്കാന്‍. മുളകള്‍ കൂട്ടിക്കെട്ടി ഉണ്ടാക്കിയ ബാംബൂ റാഫ്റ്റില്‍ കയറി യാത്ര ചെയ്യാന്‍, കോരിച്ചൊരിയുന്ന മഴയത്ത് ആരും വരില്ലെന്ന് കരുതുന്നവര്‍ക്ക് തെറ്റി.

പ്രകൃതിയിലേക്കുള്ള മടക്കമാണ് ഇത്തരം യാത്രകള്‍. പറമ്പികുളത്ത് ഇതുപോലുള്ള നിരവധി വിസ്‌മയങ്ങള്‍ സഞ്ചാരികളേയും കാത്തിരിക്കുന്നുണ്ട്. കണ്ടില്ലെന്ന് എത്രനാള്‍ നടിക്കാനാവും യാത്രികര്‍ക്കും പ്രകൃതിസ്നേഹികള്‍ക്കും ?

“ക്യാമറ ഒരെണ്ണം എന്റെ കയ്യിലും ഉണ്ട്. ഇയാള്‍ടെ പുട്ടുകുറ്റിയില്‍ മര്യാദയ്ക്ക് പടമൊന്നും പതിഞ്ഞില്ലെങ്കില്‍, എന്റെ കൈയില്‍ വേറൊന്നുകൂടെ ഇരിക്കുന്നത് കാണാല്ലോ ? ബാക്കി ഞാന്‍ പറയണോ ? ഹ…. വിട് മാഷേ കയ്യീന്ന്, ഞാനൊന്നും ചെയ്യില്ല, ചുമ്മാ ചെക്കനെ ഒന്ന് വിരട്ടിയതല്ലേ ? “

ഭാവാനിപ്പുഴയ്ക്ക് നടുവില്‍ ഒരു ഫോട്ടോ സെഷന്‍. പതിഞ്ഞുകൊണ്ടിരിക്കുന്നത് പ്രശസ്ത പ്രകൃതിസ്നേഹിയും, ഗുരുവായൂരപ്പന്‍ കോളേജിലെ പ്രൊഫസറുമായിരുന്ന ശ്രീ.ശോഭീന്ദ്രന്‍ സാര്‍. പതിപ്പിക്കുന്നത് എന്റെയൊരു സുഹൃത്തും ഒന്നാന്തരമൊരു ഫോട്ടോഗ്രാഫറുമായ ശ്രീ.വേണു ഗോപാലകൃഷ്ണന്‍

(മുകളില്‍പ്പറഞ്ഞ അടിക്കുറിപ്പ് ഈ പടം എടുത്തതിന് ശേഷം എനിക്ക് തോന്നിയ ഒരു കുസൃതി മാത്രം. ശോഭീന്ദ്രന്‍ സാര്‍ അങ്ങനൊന്ന് ചിന്തിക്കുക പോലുമില്ല.)

ഇനി വേണു എടുത്ത ശോഭീന്ദ്രന്‍ മാഷിന്റെ ചൈതന്യമുള്ള ആ ചിത്രമിതാ താഴെ കണ്ടോളൂ.

“ മോള് അപ്പൂപ്പന്‍ താടി കണ്ടിട്ടുണ്ടോ ?“

“ അതിന് അപ്പൂപ്പന് താടീല്ലല്ലോ ! “

“ അതല്ല മോളേ, പറന്നു നടക്കുന്ന അപ്പൂപ്പന്‍ താടി കണ്ടിട്ടുണ്ടോ ? “

“ ഈ അച്ഛനൊന്നും അറീല്ല, അപ്പൂപ്പന്റെ താടി എങ്ങനാ പറന്ന് നടക്കാ ?“

അപ്പൂപ്പന്‍ താടി കാണാത്ത, മുത്തശ്ശിക്കഥകള്‍ കേള്‍ക്കാത്ത പുതുതലമുറയ്ക്കായി ഇതാ ഒരപ്പൂപ്പന്‍ താടി.