ഗോവയുടെ ടൂറിസം ചിത്രങ്ങളിൽ എപ്പോഴും ശ്രദ്ധിച്ചിരുന്ന, കടലിലേക്ക് തള്ളി നിൽക്കുന്ന ഒരു വലിയ കൊത്തളത്തിൻ്റെ കാഴ്ച്ചയുണ്ട്.

അര ഡസണിലേറെ തവണ ഗോവ സന്ദർശിച്ചിട്ടുണ്ടെങ്കിലും അറിഞ്ഞോ അറിയാതെയോ പോലും, അറബിക്കടൽ നിരന്തരം തിരകളടിച്ച് ചിതറുന്ന ആ കൊത്തളത്തിൻ്റെ ഭാഗത്തേക്ക് എത്തിപ്പെട്ടിട്ടില്ല. കടലമ്മ മുത്തമിടുന്ന ബേക്കൽ കോട്ടയുടെ കൊത്തളത്തിൻ്റെ ഇരട്ടിയിലേറെ വലിപ്പമുണ്ട് ഈ കൊത്തളത്തിന്.

അവസാനത്തെ രണ്ട് പ്രാവശ്യവും ചിത്രത്തിന്റെ സഹായത്തോടെ ലക്ഷ്യം കണ്ടെത്താൻ ശ്രമിച്ചു നോക്കി. പക്ഷേ പരാജയപ്പെട്ടു. പടം പറയുന്നത് അഗ്വാഡ കോട്ട എന്നാണ്. അഗ്വാഡ എനിക്കറിയാത്ത കോട്ടയല്ല. മൂന്ന് പ്രാവശ്യം ഞാനത് സന്ദർശിച്ചിട്ടുണ്ട്. ‘കഥ പറയുന്ന കോട്ടകൾ’ എൻ്റെ പുതിയ പുസ്തകത്തിലെ ഒരദ്ധ്യായവും പുറചട്ടയും *അഗ്വാഡ കോട്ടയാണ്.

ചിത്രത്തിൽ കാണുന്ന കൊത്തളം ഒരു സമസ്യയായി തുടർന്നു.

ലക്ഷ്യമില്ലാത്ത യാത്രകൾ ചിലപ്പോൾ, തേടി നടന്ന ചിലയിടങ്ങളിലേക്ക് അവിചാരിതമായി കൊണ്ടെത്തിക്കും. അങ്ങനെ ഇന്നത് സംഭവിച്ചു. ഉച്ച ഭക്ഷണത്തിന് ശേഷം, പനാജിയിൽ നിന്ന് ഏതോ വഴികളിലൂടെ വെറുതെ ഇറങ്ങിത്തിരിച്ചതാണ്.
ചെന്നെത്തിയത് ‘ലോവർ അഗ്വാഡ’ എന്ന കോട്ടയുടെ പരിസരത്ത്. അഗ്വാഡയുടെ തന്നെ ഭാഗമാണത്. അഗ്വാഡയിൽ നിന്ന് 3.5 കിലോമീറ്റർ മാത്രം ദൂരം; 10 മിനിറ്റ് സഞ്ചാരം.

ഒരു കാര്യം ഉറപ്പാണ്. പിടിതരാതെ നിൽക്കുന്ന എല്ലാ കോട്ടകളുടേയും ഒളിച്ചു കളി ഇതോടെ തീരുകയാണ്.

* അഗ്വാഡ എന്നാൽ, പറങ്കി ഭാഷയിൽ ‘ജലമുള്ള ഇടം’. കപ്പലുകൾക്ക് ജലം നിറയ്ക്കുന്ന കേന്ദ്രമായും ജയിൽ ആയിട്ടും അഗ്വാഡ കോട്ട പ്രയോജനപ്പെടുത്തിയിട്ടുണ്ട്.

#greatindianexpedition
#fortsofgoa
#gie_by_niraksharan
#boleroxl_motor_home

കര്‍ണ്ണാടകയിലെ ഗോകര്‍ണ്ണത്തിനടുത്തുള്ള ‘ഓം‘ ബീച്ച്.

ബീച്ചിന്റെ നടുവിലെ ഭാഗം കടലിലേക്ക് തള്ളിനില്‍ക്കുന്നതുകൊണ്ട് ‘ഓം‘ അഥവാ ‘ഉ‘ എന്ന ഹിന്ദി അക്ഷരം പോലെയാണ് ബീച്ചിന്റെ ആകൃതി. പേര്‍ വീഴാന്‍ അതില്‍ക്കൂടുതലെന്ത് കാരണം വേണം?

ഓം ബീച്ചിന്റെ കുറേക്കൂടെ നല്ല ഒരു ചിത്രം കാണാന്‍ ഇതു വഴി പോകൂ.

സണ്‍ബാത്ത് ഈ സായിപ്പിന്റേം മദാമ്മേന്റേം കുത്തകയൊന്നുമല്ലല്ലോ ?
എണ്ണതേക്കാതെ കിടന്നാലും ഉണങ്ങാന്‍ പറ്റ്വോന്ന് ഞങ്ങളൊന്ന് നോക്കട്ടെ.

നോര്‍ത്ത് ഗോവയിലെ ബീച്ചുകളൊന്നില്‍ നിന്നൊരു കാഴ്ച്ച.

വഴി തെറ്റി ആഴക്കുറവുള്ള കടലില്‍ പെട്ടുപോയതാണവള്‍ . ഇപ്പോള്‍ നെഞ്ചോളം വെള്ളത്തിലൂടെ നടന്നാല്‍ കരയില്‍ നിന്ന് കഷ്ടി 100 മീറ്റര്‍ മാത്രം അകലെ കിടക്കുന്ന അവളുടെ അടുത്തെത്താം, കയറേണി വഴി മുകളിലേക്ക് പിടിച്ച് കയറാം.

തിരകളോട് തോറ്റ് കടല്‍ക്കരയില്‍ അടിഞ്ഞ അവളെ ലൈഫ് ഇന്‍ഷൂറന്‍സ് കമ്പനിയും തോല്‍പ്പിച്ചു. ഇന്‍ഷൂറന്‍സ് പണം കിട്ടാത്തതുകൊണ്ട് പൊളിച്ചടുക്കി നേരേ ചൊവ്വേ ഒരു ശവസംസ്ക്കാരത്തിനുപോലും സാദ്ധ്യതയില്ലാതെ തുരുമ്പെടുത്ത് നാശമായിക്കൊണ്ടിരിക്കുന്നു ‘റിവര്‍ പ്രിന്‍സസ്സ് ‘ എന്ന ഈ കപ്പല്‍ .

നോര്‍ത്ത് ഗോവയിലെ കാന്‍‌ഡോലിം ബീച്ചില്‍ നിന്നൊരു കാഴ്ച്ച.

ഗോവയിലെ ഒരു കടല്‍ക്കരയില്‍ കണ്ടതാണീ കാസില്‍.

പത്തും ആറും വയസ്സുള്ള രണ്ട് സായിപ്പ് കുട്ടികള്‍ 2 ദിവസം എടുത്തു ഇത് ഉണ്ടാക്കിത്തീര്‍ക്കാന്‍. വൈകുന്നേരങ്ങളില്‍ മാത്രമായിരുന്നു കേട്ടോ ഈ കലാപരിപാടി. ഉണ്ടാക്കലും,പൊളിച്ച് പണിയലുമൊക്കെയായി അവരതില്‍ മുഴുകിയിരിക്കുന്നത് നോക്കി സന്ധ്യാസമയത്ത്‍ ആ കടല്‍ക്കരയിലിരിക്കാന്‍തന്നെ ഒരു രസമായിരുന്നു.

നമ്മളാരും ഒരു ബീച്ചില്‍ പോയി ഇത്രയൊക്കെ സമയം ചിലവഴിച്ച് ആസ്വദിച്ച് അര്‍മ്മാദിച്ച് നടക്കാത്തതെന്താണെന്ന് പലപ്പോഴും അത്ഭുതം തോന്നിയിട്ടുണ്ട്!!

ഗോവയിലെ പല ബീച്ചുകളിലും പാരാ സെയിലിങ്ങ് ചെയ്യാനുള്ള സൌകര്യമുണ്ട്. പാരാ സെയിലിങ്ങ് നല്ലൊരു അനുഭൂതിയാണ്. അത് ചെയ്യാനുള്ള ധൈര്യമില്ലെങ്കില്‍ ആ കാഴ്ച്ച കണ്ട് നിന്നാലും മതി. നല്ലൊരു കൌതുകക്കാഴ്ച്ചയാണത്.

ഹണിമൂണ്‍ കപ്പിള്‍സ്‍ ഒരുപാട് എത്തും ഗോവയില്‍. അതിലൊരു കൂട്ടര്‍ പാരാസെയിലിങ്ങിന് തയാറെടുക്കുന്നത് നോക്കി ഒരിക്കല്‍ കുറെ നേരം നിന്നു, ഞാനും എന്റെ സഹപ്രവര്‍ത്തകന്‍ നിഷാ‍ദും.

എന്റെ കയ്യില്‍ ക്യാമറ കണ്ടപ്പോള്‍, പടം എടുത്ത് കൊടുക്കാമോന്ന് അവര്‍ ചോദിച്ചു. ബോട്ട് കെട്ടിവലിച്ച് നീങ്ങുന്ന പാരച്ച്യൂട്ടില്‍ ആ യുവമിഥുനങ്ങള്‍ ആകാശത്ത് പറന്ന് പൊങ്ങുന്നത് തുരുതുരാ ക്ലിക്ക് ചെയ്തു. ആ പടങ്ങള്‍ അവര്‍ക്ക് പിന്നീട് അയച്ച് കൊടുക്കുകയും ചെയ്തു. അതില്‍ ചില പടങ്ങള്‍ അവരുടെ അനുവാദത്തോടെതന്നെ മുകളില്‍ ഇട്ടിരിക്കുന്നു.

പക്ഷെ, എനിക്കിപ്പോഴും മനസ്സിലാകാത്ത ഒരു കാര്യമുണ്ട്. ഈ ഹണിമൂണ്‍ കപ്പിള്‍സും, ഭാര്യാഭര്‍ത്താക്കന്മാരുമൊക്കെ പാരാസെയിലിങ്ങ് നടത്തുന്നിടത്ത് സംഘാടകരില്‍ ഒരുത്തനെന്തിനാണ് സ്വര്‍ഗ്ഗത്തിലെ കട്ടുറുമ്പായി ആ ചിത്രത്തില്‍ കാണുന്നതുപോലെ തൂങ്ങിക്കിടക്കുന്നത് ?

24 നവംബര്‍ 2006, സൌത്ത് ഗോവയിലെ മനോഹരമായ കോള്‍വ ബീച്ച്.

പാരാ സെയിലിങ്ങിനുവേണ്ടി ലൈഫ് ജാക്കറ്റും മറ്റും വാരിക്കെട്ടി മുകളിലേക്ക് പൊങ്ങാന്‍‍ തയാറെടുക്കുമ്പോള്‍, സംഘാടകരുടെ വക മുന്നറിയിപ്പ്, “ക്യാമറയ്ക്ക് എന്തെങ്കിലും സംഭവിച്ചാല്‍ ഞങ്ങള്‍ക്കൊരു ഉത്തരവാദിത്വവും ഇല്ല.“
പറയുന്നത് കേട്ടാല്‍ തോന്നും എനിക്കെന്തെങ്കിലും പറ്റിയാല്‍ അവന്മാര്‍ക്ക് ഭയങ്കര ഉത്തരവാദിത്വമാണെന്ന്!!

നീളമുള്ള കയറിന്റെ ഒരറ്റം സ്പീഡ് ബോട്ടില്‍ കെട്ടി, മറ്റേയറ്റത്ത് ഉയര്‍ന്ന് പൊങ്ങുന്ന പാരച്യൂട്ടില്‍ തൂങ്ങിക്കിടന്ന്, കോള്‍വ ബീച്ചിന്റെ സുന്ദരദൃശ്യം പകര്‍ത്താന്‍ നടത്തിയ വിഫലശ്രമത്തിന്റെ അന്ത്യത്തില്‍ കിട്ടിയ ഒരു ചിത്രമാണ് മുകളില്‍.