ഇപ്രകാരമാണ് 2023ലെ ഹർത്താലുകൾ.

മൊത്തം ഹർത്താലുകൾ 9 എണ്ണം.

ദേശീയം – 0
കേരളം – 0
പ്രാദേശികം – 9
————————————————
യു. ഡി. എഫ്. – 2
എൽ. ഡി. എഫ് – 0
ബി. ജെ. പി. – 2
കോൺഗ്രസ്സ് – 1
ഇടത്/വലത്/ബി.ജെ.പി. സംയുക്തം – 1
മറ്റുള്ളവർ – 3
————————————————
2017 – 120 ഹർത്താലുകൾ
2018 – 98 ഹർത്താലുകൾ
2019 – 12 ഹർത്താലുകൾ
2020 – 11 ഹർത്താലുകൾ
2021 – 08 ഹർത്താലുകൾ
2022 – 22 ഹർത്താലുകൾ
2023 – 09 ഹർത്താലുകൾ

#SayNoToHarthal
#Say_No_To_Harthal

വാർത്ത 1:- ലോക്ഡൗണ്‍ കാലത്ത് ഗര്‍ഭിണികളായത് 46 പെണ്‍കുട്ടികള്‍; പോക്‌സോ കേസുകളില്‍ ഞെട്ടിക്കുന്ന വര്‍ദ്ധന.
കമൻ്റ് 1:- വീട്ടിനകത്തും രക്ഷയില്ലാതായിരിക്കുന്നു.

വാർത്ത 2:- അലബാമയില്‍ ഇപ്പോഴും തീ, ബ്രഹ്മപുരത്തേത്‌ അണയ്ക്കാന്‍ കഴിഞ്ഞത് അഭിമാനകരമായ നേട്ടം- പി. രാജീവ്.
കമൻ്റ് 2:- സ്വന്തം ആസനത്തിൽ തീ പിടിച്ച് വേവുമ്പോളും ഒരു കണ്ണ് അമേരിക്കയുടെ കുറ്റങ്ങളും കു റവുകളും കണ്ടുപിടിക്കാൻ ഡെഡിക്കേറ്റഡ് ആണ്.

വാർത്ത 3:- മെഡിക്കല്‍ കോളേജിലെ പീഡനം: യൂറിന്‍ബാഗ് ഉണ്ടോയെന്ന് നോക്കിയതാണെന്ന് പ്രതി; ശകാരിച്ചെന്ന് നഴ്‌സ്‌.
കമൻ്റ് 3:- തൈറോയിഡ് രോഗിക്ക് യൂറിൻ ബാഗ് ഉണ്ടാകില്ലെന്ന് അറിയാത്ത, റിട്ടയർമെൻ്റ് കാലമായ (55 വയസ്സ്) അറ്റൻ്ററെ പറഞ്ഞുവിടുന്നത് തന്നെയാകും നല്ലത്.

വാർത്ത 4:- രാഹുലിന്റെ അയോഗ്യത: പ്രകടനത്തിന്റെ മുൻനിരയിൽ നിൽക്കുന്നതിനെച്ചൊല്ലി തർക്കം,കോൺഗ്രസുകാർ തമ്മിൽത്തല്ലി.
കമൻ്റ് 4:- രാഹുൽ ജയിലിൽ പോകുന്നതാകും ഭേദം.

വാർത്ത 5:- മാപ്പ് പറയാന്‍ എന്റെ പേര് സവര്‍ക്കറെന്നല്ല, ഗാന്ധിയെന്നാണ്’- രാഹുല്‍ ഗാന്ധി.
കമൻ്റ് 5:- ചരിത്രം ഓർമ്മിപ്പിച്ചുകൊണ്ട് ഇത്രയും ശക്തമായ മറുപടി ഈ പതിറ്റാണ് കേട്ടിട്ടില്ല.

വാർത്ത 6:- ഒരു കുടുംബത്തിന് വേണ്ടിയല്ലാതെ രാജ്യത്തിന് വേണ്ടി പ്രവർത്തിക്കാനാണ് കോൺഗ്രസ്സ് വിട്ട് ബി. ജെ. പി. യിൽ ചേർന്നതെന്ന് അനിൽ ആൻ്റണി.
കമൻ്റ് 6:- ഒരു കുടുംബത്തിന് വേണ്ടിയാണ് കോൺഗ്രസ്സ് നിലനിൽക്കുന്നതെന്ന് മനസ്സിലാക്കാൻ ഇത്രയും വർഷങ്ങളോ ? സ്വന്തം പിതാവ് ഇനിയുമത് മനസ്സിലാക്കിയിട്ടില്ലല്ലോ ?

വാർത്ത 7:- വീണാ ജോര്‍ജിനെതിരെ പോസ്റ്റര്‍ ഒട്ടിച്ച സംഭവം; കലാപാഹ്വാനത്തിന് കേസ്, കാര്‍ പോലീസ് കസ്റ്റഡിയില്‍.
കമൻ്റ് 7:- കേന്ദ്രത്തിൽ പ്രധാനമന്ത്രി മോദിക്കെതിരെ പോസ്റ്റർ ഒട്ടിച്ചപ്പോഴും കേസുണ്ടായിരുന്നു. വന്ന് വന്ന് മന്ത്രിമാരെ വെച്ച് നടത്തുന്ന ജനാധിപത്യ ഭരണമാണോ, രാജഭരണമാണോ എന്ന് മനസ്സിലാക്കാൻ പറ്റാതായിരിക്കുന്നു.

വാർത്ത 8:- കൂടുതല്‍ കോണ്‍ഗ്രസ്,CPM നേതാക്കള്‍ BJPയില്‍ ചേരും;കേരളത്തില്‍ സര്‍ക്കാര്‍ രൂപീകരിക്കും – കെ. സുരേന്ദ്രന്‍.
കമൻ്റ് 8:- ഇതിനിടയ്ക്ക് തിരഞ്ഞെടുപ്പ് എന്നൊരു പ്രക്രിയ ബാക്കിയുണ്ടല്ലോ നേതാവേ.

വാർത്ത 9:- കോഴിയിറച്ചി വന്‍വിലക്കുറവില്‍; തുലാസ് റിമോട്ട് ഉപയോഗിച്ച് നിയന്ത്രിച്ച് തട്ടിപ്പ്.
കമൻ്റ് 9:- മാവേലിയുടെ പഴയ കേരളത്തിൽ കള്ളത്തരങ്ങളും റിമോട്ട് കണ്ട്രോൾ ചെറുനാഴിയും സുലഭം.

വാർത്ത 10:- പുസ്തകം വായിക്കാനാവില്ല, സ്‌കൂളിൽ പോകാനാവില്ല; ഇരുളടഞ്ഞ്‌ അഫ്ഗാൻ പെൺകുട്ടികളുടെ ഭാവി.
കമൻ്റ് 10:- താലിബാനെ വാഴ്ത്തിയവർ ആരും കാണുന്നില്ലേ ഈ മനുഷ്യാവകാശ ലംഘനം ?

#Say_NO_To_Harthal

കോൺഗ്രസ്സ് പാർട്ടി ഇനി മുതൽ ഹർത്താൽ നടത്തില്ല എന്ന് സംസ്ഥാന പ്രസിഡൻ്റ് കെ. സുധാകരൻ പറഞ്ഞതായി വാർത്ത കണ്ടു. വ്യക്തിപരമായി ഞാനാ പ്രസ്താവന മുഖവിലയ്ക്കെടുക്കുന്നില്ല, കാര്യമായിട്ടെടുക്കുന്നില്ല. കാരണങ്ങൾ പലതാണ്.

ഒന്നാമതായി കോൺഗ്രസ്സ് എന്നതൊരു കെട്ടുറപ്പുള്ള പാർട്ടിയല്ല. നിലവിൽ ഒട്ടുമല്ല. പ്രസിഡൻ്റായ സുധാകരൻ പറയുന്നത് പോലെ തന്നെ, ആർക്കും എത്ര വലിയ അഭിപ്രായങ്ങളും പറയാനുള്ള സ്വാതന്ത്ര്യം ആ പാർട്ടിക്കുള്ളിലുണ്ട്. ആരും ഒരു നടപടിയും അതിൻ്റെ പേരിൽ എടുക്കില്ല. എടുത്താൽപ്പിന്നെ ഇപ്പോഴുള്ള പാർട്ടി പോലും ഇല്ലെന്ന് അവർക്കെല്ലാവർക്കും നന്നായറിയാം. ആയതിനാൽ കെ. സുധാകരൻ പറഞ്ഞതുകൊണ്ടൊന്നും കോൺഗ്രസ്സുകാർ ഹർത്താലിന് ആഹ്വാനം ചെയ്യാതിരിക്കാൻ പോകുന്നില്ല. 2023 തീരുന്നതിന് മുന്നേ തന്നെ അത്തരമൊരു ഹർത്താൽ കോൺഗ്രസ്സിൽ നിന്ന് നമുക്ക് പ്രതീക്ഷിക്കാം. അന്ന് ഞാൻ ഈ പോസ്റ്റിൻ്റെ ലിങ്കുമായി തീർച്ചയായും വരും.

രണ്ടാമതായി കോൺഗ്രസ്സ് എന്ന പേരിൽ ഹർത്താലിന് ആഹ്വാനിച്ചില്ലെങ്കിലും UDF എന്ന പേരിൽ പല ഹർത്താൽ ആഹ്വാനങ്ങൾക്കും പഴുതുണ്ട്. അത് സംഭവിക്കുക തന്നെ ചെയ്യും. കോൺഗ്രസ്സിൻ്റെ തീരുമാനമല്ല കൂട്ടുകക്ഷികളുള്ള മുന്നണി എന്ന നിലയ്ക്കുള്ള തീരുമാനമാണെന്ന് പറഞ്ഞ് പിലാത്തോസാകാൻ വളരെയെളുപ്പം.

മൂന്നാമത്തെ കാരണം…, രമേഷ് ചെന്നിത്തല ഒരിക്കൽ ഹർത്താലിനെതിരെ ഞങ്ങൾ Say NO to Harthal പ്രവർത്തകരുമായി ചില ചർച്ചകളും നീക്കങ്ങളുമൊക്കെ നടത്തിയതാണ്. നിയമസഭ വരെ അതിൻ്റെ ഒരു സംസാരം കൊണ്ടെത്തിച്ചു എന്നല്ലാതെ അതങ്ങ് നടപ്പാക്കിയെടുക്കാൻ അദ്ദേഹത്തിനായില്ല. അതിൻ്റെ കാരണങ്ങൾ പലതാണ്. കോൺഗ്രസ്സ് എന്ന പ്രസ്ഥാനത്തിൻ്റെ ആദ്യം പറഞ്ഞ പ്രശ്നങ്ങളും ചെന്നിത്തലയ്ക്ക് സ്വയം അക്കാര്യത്തിൽ ഒരു ആത്മാർത്ഥത ഇല്ലാതായിപ്പോയതുമൊക്കെ അക്കൂട്ടത്തിൽപ്പെടും. ഈ നീക്കങ്ങൾ നടന്നതിന് ശേഷം ആദ്യം നടന്ന ഹർത്താൽ കോൺഗ്രസ്സിൻ്റെ വക ആയിരുന്നു എന്നാണെൻ്റെ ഓർമ്മ.

ഏതെങ്കിലും ഒരു മണ്ഡലത്തിലോ പഞ്ചായത്തിലോ ഒരു ഛോട്ടാ ഖദർ നേതാവ് ഹർത്താലിനാഹ്വാനം ചെയ്യുന്ന സാഹചര്യം ഇനിയുമുണ്ടാകുമെന്ന് തന്നെ ഞാൻ കരുതുന്നു. ആ നേതാവിനെതിരെ ഗീർവാണം അടിക്കാമെന്നല്ലാതെ വിരലനക്കാനോ സംഘടനാപരമായി എന്തെങ്കിലും ശിക്ഷാ നടപടി കൈക്കൊള്ളാനോ പ്രസിഡന്റായ സുധാകരനെക്കൊണ്ട് പറ്റില്ല. അതാണ് കോൺഗ്രസ്സ്, അങ്ങനെ ആകാനേ കോൺഗ്രസ്സിന് പറ്റൂ. അതിനി സുധാകരൻ ഭരിച്ചാലും മുരളീധരൻ ഭരിച്ചാലും മുല്ലപ്പള്ളി ഭരിച്ചാലും അങ്ങനെ തന്നെ.

ഇതൊക്കെ എൻ്റെ മാത്രം നിരീക്ഷണങ്ങളും അഭിപ്രായങ്ങളും മാത്രമാണ്. മറ്റൊരു തരത്തിൽ പറഞ്ഞാൽ കോൺഗ്രസ്സുകാരെ വാശിപിടിപ്പിച്ച് പ്രകോപിപ്പിച്ച് പറഞ്ഞ വാക്ക് പാലിപ്പിക്കുക എന്ന കുതന്ത്രം കൂടെയാണിത്. നടന്ന് കിട്ടിയാൽ നല്ലത് തന്നെ. എല്ലാവർക്കും ഗുണം ചെയ്യും.

എന്തൊക്കെ പറഞ്ഞാലും ഒരു പാർട്ടിയുടെ അദ്ധ്യക്ഷസ്ഥാനത്തിരുന്ന്, മറ്റ് നേതാക്കന്മാരോട് കൂടിയാലോചിച്ചോ അല്ലാതെയോ ഇങ്ങനൊരു തീരുമാനമെടുത്തതിന് സുധാകരന് അഭിനന്ദനങ്ങൾ! ഇനിയത് നടത്തിക്കാണിക്കുക കൂടെ വേണമെന്ന് അഭ്യർത്ഥിക്കുന്നു. ഏതെങ്കിലുമൊരു പാർട്ടിയദ്ധ്യക്ഷൻ ഇങ്ങനെ പറയുകയെങ്കിലും ചെയ്തെന്ന ക്രെഡിറ്റ് സുധാകരനുള്ളത് തന്നെയാണ്. തർക്കമില്ല.

വാൽക്കഷണം:- ഹർത്താലിനെ തള്ളിപ്പറയാതെ ജീവിക്കാനാവാത്ത അവസ്ഥ ഇന്നല്ലെങ്കിൽ നാളെ എല്ലാപ്പാർട്ടിക്കാർക്കും വരും. അതിൻ്റെ തുടക്കം മാത്രമാണിത്.

ഇപ്രകാരമാണ് 2022ലെ ഹർത്താലുകൾ.
.
മൊത്തം ഹർത്താലുകൾ *22 എണ്ണം.
ദേശീയം – 2
കേരളം – 1
പ്രാദേശികം – 19
————————————————-
യു. ഡി. എഫ്. – 5
എൽ. ഡി. എഫ് – 4
ബി. ജെ. പി. – 2
കോൺഗ്രസ്സ് – 3
സി. പി. എം. – 2
മറ്റുള്ളവർ – 8
————————————————
*ചില ഹർത്താലുകൾ പലരും കൂട്ടായിട്ടുള്ളതുകൊണ്ടാണ് ഇവിടെ മൊത്തം 24 എന്ന് കാണിക്കുന്നത്.
————————————————
2017 – 120 ഹർത്താലുകൾ
2018 – 98 ഹർത്താലുകൾ
2019 – 12 ഹർത്താലുകൾ
2020 – 11 ഹർത്താലുകൾ
2021 – 08 ഹർത്താലുകൾ
2022 – 22 ഹർത്താലുകൾ

#SayNoToHarthal
#Say_No_To_Harthal

ഒരു ഭരണാധികാരിയെ കറുത്ത തുണിവീശിക്കാണിക്കുന്നത് ഏത് സർക്കാർ ഭരിക്കുന്ന കാലത്തും വലിയ പ്രശ്നമായിട്ട് തന്നെ നിരീക്ഷിച്ചിട്ടുണ്ട്. കോലം കത്തിക്കുന്നത് പോലും അത്ര വലിയ അവഹേളനമായി ശ്രദ്ധയിൽപ്പെട്ടിട്ടില്ല.

പ്രതിപക്ഷത്തിരുന്നപ്പോൾ കറുപ്പ് വീശുന്നത് പ്രശ്നമല്ലാത്തവർക്ക്, ഭരണപക്ഷത്തിരിക്കുമ്പോൾ അതേ കറുപ്പ് സഹിക്കാൻ പറ്റാത്തത് തരംതാണ കക്ഷിരാഷ്ട്രീയമെന്ന നിലയ്ക്ക് തന്നെ മനസ്സിലാക്കിയിട്ടുമുണ്ട്. അതേപ്പറ്റിയൊന്നും ഒരു സംശയം പോലും അവശേഷിക്കുന്നില്ല.

ഇക്കാര്യങ്ങളെല്ലാം പരിഗണിച്ചുകൊണ്ടുതന്നെ ഒരു ചോദ്യമുന്നയിക്കുകയാണ്.

പ്രതിഷേധ മാർഗ്ഗങ്ങൾക്ക് ദാരിദ്ര്യം നേരിടുന്നതുകൊണ്ട് സകലമാന കക്ഷിരാഷ്ട്രീയക്കാരും ഒരേപോലെ നെഞ്ചേറ്റുന്ന സമരമുറയാണല്ലോ ഹർത്താൽ? കറുപ്പ് വീശുന്നത് ഇത്രയ്ക്കേറെ പ്രശ്നമുണ്ടാക്കുന്ന ഒരു സംഗതിയാണെങ്കിൽ, പ്രതിഷേധിക്കാൻ, പ്രതികരിക്കാൻ, വിയോജിപ്പ് പ്രകടിപ്പിക്കാൻ, എന്തുകൊണ്ട് ഹർത്താലിനെ ഒഴിവാക്കി കറുപ്പിനെ കൂട്ടുപിടിച്ചുകൂട ? കറുത്ത തൂവാലകൾ, വീട്ടിലും ഓഫീസിലും വാഹനത്തിലും പോക്കറ്റിലും മറ്റും, ഏത് അത്യാവശ്യ സമയത്തും പുറത്തെടുക്കാൻ പാകത്തിൽ സൂക്ഷിക്കണമെന്ന് മാത്രം. സത്യത്തിൽ, ചുറ്റുവട്ടത്തുള്ള രണ്ടാമതൊരാൾക്ക് ശാരീരികമായോ ജോലിസംബന്ധമായോ സഞ്ചാരസ്വാതന്ത്ര്യപരമായോ യാതൊരു ബുദ്ധിമുട്ടും ഉണ്ടാക്കാത്ത പ്രതിഷേധ സമരമുറയാണ് കറുത്ത തുണിവീശൽ. അതേസമയം, മാനസ്സികമായി ഒരാൾക്ക്, കറുത്ത തുണി വീശൽ ക്ലേശമുണ്ടാക്കുക തന്നെ വേണം. അതാണല്ലോ ആ പ്രതിഷേധത്തിൻ്റെ ധർമ്മവും ലക്ഷ്യവും.

പറഞ്ഞ് വന്നപ്പോളാണ് ഓർത്തത്. പണ്ട് കാലത്ത്, പ്രതിഷേധത്തിൻ്റെ ഭാഗമായി കറുത്ത ശീല നെഞ്ചത്ത് കുത്തി ക്ലാസ്സിലും ഓഫീസിലുമൊക്കെ മനുഷ്യർ പോയിരുന്നു. ഹർത്താലുകൾ തന്നെ ആകണമെന്ന് തോന്നുന്നു, ആ പരിപാടിക്ക് അന്ത്യം കുറിച്ചത്. ഹർത്താലാകുമ്പോൾ ശീതീകരിച്ച മുറിയിലിരുന്ന് തീരുമാനിച്ച് വാർത്താക്കുറിപ്പായി അറിയിച്ചാൽ മതിയല്ലോ? വിയർപ്പ് പൊടിയേണ്ടതേയില്ല. പണിയെടുക്കാതെ ശബളം കിട്ടുകയോ, പണിക്ക് വരാൻ പറ്റില്ലെന്ന അവസ്ഥയുള്ളതുകൊണ്ടോ, ശമ്പളത്തോടുകൂടെയുള്ള ഒരു അവധി തരമാകുകയോ ചെയ്യും. കറുപ്പിൻ്റെ പ്രതിഷേധത്തെ ഹർത്താലുകളും ബന്ദുകളും കടത്തി വെട്ടിയത് മറ്റൊരു കാരണം കൊണ്ടാകാൻ ഒരു വഴിയുമില്ല.

ഹർത്താലുമായി കറുപ്പിൻ്റെ പ്രതിഷേധത്തെ താരതമ്യം ചെയ്യാൻ കാരണം, പരിസ്ഥിതിലോല വിഷയവുമായി ബന്ധപ്പെട്ട് കേരളത്തിൽ ഈ മാസം മാത്രം (ഇന്നടക്കം) 3 പ്രാദേശിക ഹർത്താലുകൾ നടന്ന് കഴിഞ്ഞു. ജൂൺ 16ന് ഒരെണ്ണം കൂടെ വരുന്നുണ്ട്. അപ്പോൾ നാലെണ്ണമാകും. ഭരണകക്ഷിയും പ്രതിപക്ഷവും കേന്ദ്രത്തിനെതിരെ നടത്തിയതും നടത്തുന്നതുമായ ഹർത്താലുകളാണിതെല്ലാം. എങ്കിൽപ്പിന്നെ ഒരുമിച്ചൊരു ഹർത്താലായോ അല്ലെങ്കിൽ രണ്ട് കൂട്ടർക്കും വേറെ വേറെ രണ്ട് ഹർത്താലുകളായോ പ്രതിഷേധിക്കാൻ പറ്റുമായിരുന്നില്ലേ ? അത്രയും ബുദ്ധിമുട്ട് ജനങ്ങൾക്ക് കുറയുമായിരുന്നില്ലേ ? എന്തിനാണ് നാല് ഹർത്താലുകൾ ? നാലെണ്ണം കൊണ്ട് പരിസ്ഥിതി ലോല പ്രശ്നം തീരുമോ ആവോ ?

വീണ്ടും കറുപ്പിൻ്റെ പ്രതിഷേധത്തിലേക്ക് വരാം. ഇങ്ങനെ ഒന്നും രണ്ടും നാലും പ്രാവശ്യമൊക്കെ പ്രതിഷേധിച്ചാലും മതിയാകാത്ത അവസരങ്ങളിലാണ് കറുപ്പിൻ്റെ പ്രതിഷേധത്തിന് പ്രസക്തി. കൈയിലുള്ള കറുത്ത ശീല, പ്രതിഷേധിക്കണമെന്ന് തോന്നുന്ന സമയത്തൊക്കെ, തോന്നുന്ന ദിവസങ്ങളിലൊക്കെ, തോന്നുന്നവർക്ക് മുന്നിൽ, സമയവും കാലവും നോക്കാതെ വീശാം. പ്രതിഷേധം കൊഴുപ്പിക്കാം. ഉദാഹരണത്തിന് പരിസ്ഥിതിലോല പ്രശ്നം തന്നെ എടുക്കാം. ആ പ്രശ്നം തീരുന്നതുവരെ മലയോര മേഖലയിൽ ഉള്ളവർ ഏതുനിമിഷവും അവരുടെ സൗകര്യാർത്ഥം കറുപ്പ് ശീല വീശിക്കാണിക്കുന്നു. ഏത് ഭരണാധികാരിക്ക് മുന്നിലും എപ്പോൾ വേണമെങ്കിലും. നാല് ദിവസം ഹർത്താൽ നടത്തുന്നതിനേക്കാൾ കേമമാകില്ലേ അത് ?

കറുത്ത വസ്ത്രം, മാസ്ക്ക് എന്നിങ്ങനെയുള്ള മറ്റ് ഏച്ചുകെട്ടുകൾ അണിഞ്ഞ് വന്നിട്ട് കാര്യമില്ല. ഊരിയെടുത്തായാലും വലിച്ചെടുത്തായാലും, കറുപ്പ് വീശുമ്പോൾ മാത്രമേ പ്രതിഷേധമായി പരിഗണിക്കൂ. ഉടുതുണി ഇക്കൂട്ടത്തിൽ പെടുത്തിയാൽ പ്രതിഷേധത്തിൻ്റെ തീവ്രത കുറഞ്ഞതായി കണക്കാക്കപ്പെടും. മാത്രമല്ല, പൊതുസ്ഥലത്ത് ഉടുതുണി ഉരിഞ്ഞതിന് വേറെ കേസ് നേരിടേണ്ടി വരും.

കറുത്ത മാസ്ക്ക്, വസ്ത്രം എന്നിവയ്ക്ക് ഒരു വിലക്കുമില്ല എന്ന് മുഖ്യമന്ത്രി പറയുന്നത് പൂർണ്ണമായും മുഖവിലയ്ക്കെടുത്തിട്ടുണ്ട്. ആയതിനാൽ അതേപ്പിടിച്ചിട്ടുള്ള ചർച്ച, ന്യായീകരണം, ക്യാപ്സൂൾ എന്നിവ ഈ പോസ്റ്റിന് കീഴെ ആവശ്യമില്ല. പോസ്റ്റിലെ മുദ്ര ശ്രദ്ധിക്കുക.

കേരളത്തിൽ, ഏത് ദിവസവും എവിടെയെങ്കിലും ഒരാൾ കറുത്ത ശീല വീശുന്ന കിനാശ്ശേരിയാണെൻ്റെ സ്വപ്നം. 120 ഹർത്താലുകൾ നടന്നിരുന്ന പടവലങ്ങാ സംസ്ഥാനത്ത് 10ൽ താഴെയായി അത് ചുരുങ്ങി വന്നതായിരുന്നു. 6 മാസം കൊണ്ട് വീണ്ടും 10 ഹർത്താലുകൾ എന്ന തോതിലേക്ക് അത് പൊങ്ങിവരുന്നതിലും ഭേദമായിരിക്കും ഏത് നിമിഷവും എവിടെയും ഒരു കറുത്ത തൂവാല വീശപ്പെടുന്നത്.

വാൽക്കഷണം:-  നിറങ്ങളൊന്നും ഒരു പാർട്ടിക്കും ഒരു സമുദായത്തിനും നമ്മൾ തീറെഴുതിക്കൊടുത്തിട്ടില്ല. ഏതെങ്കിലും നിറത്തിന് ഏതെങ്കിലും സ്വഭാവം ആരെങ്കിലും സങ്കൽപ്പിച്ച് നൽകിയിട്ടുണ്ടെങ്കിൽ അത്തരം ഭോഷ്ക്കിനോട് ഒരു തരത്തിലും യോജിപ്പില്ല. കറുപ്പ് വെറുപ്പിൻ്റെ നിറമാണെങ്കിൽ ശബരിമല തീർത്ഥാടകരെ ഏത് ഗണത്തിൽ പെടുത്തണം ?

ഇക്കൊല്ലത്തെ ഹർത്താൽ കണക്കുകൾ വർഷം തീരാൻ ഒരാഴ്ച്ച ബാക്കി നിൽക്കേ അവതരിപ്പിക്കുന്നു. ഇനിയുള്ള 7 ദിവസത്തിനുള്ളിൽ, അഥവാ ഹർത്താലുകൾ എന്തെങ്കിലും നടന്നാൽ കണക്ക് പുതുക്കുന്നതായിരിക്കും.

8 ഹർത്താലുകളാണ് ദേശീയമായും സംസ്ഥാനവ്യാപകമായും പ്രാദേശികമായുമൊക്കെ കേരളത്തിൽ നടന്നത്. ഏതൊക്കെ കൂട്ടർ എത്ര വീതം ഹർത്താലുകൾ നടത്തി എന്ന വിശദമായ കണക്ക് താഴെ ചേർക്കുന്നു.

യു.ഡി.എഫ്./കോൺഗ്രസ്സ് – 4 എണ്ണം
സി.പി.എം. – 1 എണ്ണം
ബി.ജെ.പി. – 2 എണ്ണം
വിവിധ സംഘടനകൾ – 1 എണ്ണം

കഴിഞ്ഞ വർഷങ്ങളിലെ ഹർത്താൽ കണക്കുകൾ താഴെ ചേർക്കുന്നു. ഹർത്താലുകളുടെ കാര്യത്തിൽ കഴിഞ്ഞ 5 വർഷത്തിനുള്ളിൽ കേരളത്തിലുണ്ടായ അഭൂതപൂർവ്വമായ വ്യതിയാനം മനസ്സിലാക്കാൻ ആ കണക്കുകൾ തീർച്ചയായും ഉപകരിക്കും.

2017 – 120 ഹർത്താലുകൾ
2018 – 98 ഹർത്താലുകൾ
2019 – 12 ഹർത്താലുകൾ
2020 – 11 ഹർത്താലുകൾ
2021 – 8 ഹർത്താലുകൾ

2020 ൽ ഒറ്റ അക്കത്തിലേക്ക് ഹർത്താലുകൾ ഒതുങ്ങുമെന്ന പ്രതീക്ഷയുണ്ടായിരുന്നെങ്കിലും കോവിഡ് കാലമാണെന്ന് പോലും വകവെക്കാതെ വർഷത്തിൻ്റെ അവസാന പകുതിയിൽ മാസത്തിൽ രണ്ട് ഹർത്താലുകൾ എന്ന തോതിൽ പെട്ടെന്ന് ഹർത്താൽ എണ്ണം കൂടുകയും 11 ഹർത്താലുകൾ 2020ൽ ഉണ്ടാകുകയും ചെയ്തു.

ഒറ്റയക്കം എന്ന കഴിഞ്ഞ വർഷത്തെ ആ പ്രതീക്ഷയാണ് ഇക്കൊല്ലം സാക്ഷാൽക്കരിക്കപ്പെട്ടിരിക്കുന്നത്. 2017ൽ 120 ഹർത്താലും 2018ൽ 98 ഹർത്താലും നടന്ന നിലയിൽ നിന്ന് ഒറ്റയക്കത്തിലേക്ക് ഹർത്താലുകൾ ഒതുങ്ങുമ്പോൾ ജനങ്ങൾ തള്ളിപ്പറയുകയും ശക്തമായി എതിക്കുകയും ചെയ്ത ഒരു സമരമുറയെ കക്ഷിരാഷ്ട്രീയക്കാരും കൈവിട്ടുതുടങ്ങി എന്ന് തന്നെ വേണം മനസ്സിലാക്കാൻ. ഇതെല്ലാം സാദ്ധ്യമായത് കോടതിയുടെ ശക്തമായ ഇടപെടലും Say NO To Harthal അടക്കമുള്ള പല പല ഹർത്താൽ വിരുദ്ധ സംഘടനകളുടെ പ്രവർത്തനവും കൊണ്ടുതന്നെയാണ്.

സമരം ചെയ്യാനുള്ള സ്വാതന്ത്ര്യം എല്ലാവർക്കും ഉള്ളപ്പോൾത്തന്നെ അത് മറ്റുള്ളവരുടെ സ്വര്യജീവിതത്തേയും സമരത്തിൽ നിന്ന് വിട്ട് നിൽക്കാനുമുള്ള സ്വാതന്ത്ര്യത്തേയും ഹനിച്ചുകൊണ്ടാകരുത് എന്ന സന്ദേശം തന്നെ വീണ്ടും വീണ്ടും മുഴങ്ങിക്കേൾക്കട്ടെ. പുതുതലമുറയിലേക്ക് അത് ആഴത്തിൽ ഇറങ്ങിച്ചെന്ന് പ്രാവർത്തികമാക്കപ്പെടട്ടെ. #Say_NO_To_Harthal.

വാൽക്കഷണം:- ഓരോ ഹർത്താലുകളും പ്രാദേശിക ഹർത്താലുകളും വാർത്താ ലിങ്കുകൾ അടക്കം അയച്ച് തന്ന് ഈ കണക്ക് പൂർണ്ണതയിലേക്ക് എത്തിക്കാൻ ഒപ്പം നിന്ന എല്ലാ ഓൺലൈൻ/ഓഫ്ലൈൻ സുഹൃത്തുക്കൾക്കും പ്രത്യേകം പ്രത്യേകം നന്ദി.
———————————————
അപ്ഡേറ്റ് (29.12.2021):- ഡിസംബർ 24 ന് ഈ പോസ്റ്റ് ഇടുമ്പോൾ ഈ വർഷം 8 ഹർത്താലുകൾ ആണ് ഉണ്ടായിരുന്നത്. ഒറ്റയക്കത്തിൽ ഹർത്താലുകൾ ഒതുങ്ങി എന്ന സന്തോഷം അവസാനിപ്പിക്കാൻ ബോധപൂർവ്വം ചെയ്തതാണെന്ന് തോന്നിപ്പിക്കുന്ന മട്ടിൽ, ഇന്ന് ഒറ്റയടിക്ക് രണ്ട് പഞ്ചായത്തുകളിൽ ഹർത്താലിന് ആഹ്വാനം ചെയ്യപ്പെട്ടിരിക്കുന്നു. അതായത് ഈ മാസം 1 ഹർത്താൽ എന്നത് 3 ഹർത്താൽ ആയി മാറുകയും ഈ വർഷം 10 ഹർത്താലുകളായി വീണ്ടും ഇരട്ടയക്കത്തിലേക്ക് കണക്കുകൾ കടന്നിരിക്കുന്നു.

വീട്ടിൽ നിന്ന് ഓഫീസിലേക്ക് ഇറങ്ങാൻ അഞ്ച് മിനിറ്റ് വൈകി. എത്ര നേരത്തേ ഇറങ്ങുന്നോ അത്രയും തിരക്ക് കുറവായിരിക്കും നിരത്തിൽ. ഓഫീസ് സമയത്തിന് എത്താൽ എപ്പോൾ ഇറങ്ങണമെന്നതിനേക്കാൾ പതിനഞ്ച് മിനിറ്റെങ്കിലും മുന്നേ ഇറങ്ങുന്നതാണ് പതിവ്. അതുകൊണ്ടുതന്നെ റോഡുകളിൽ പതിവിൽക്കവിഞ്ഞ തിരക്കുണ്ടായിട്ടും ഓഫീസിലെത്താൻ വൈകിയില്ല. ബാംഗ്ലൂർ നഗരം എല്ലാ പതിവ് തിങ്കളാഴ്ച്ചകളേയും പോലെ തിരിക്കോട് തിരക്കുമായി മുന്നോട്ട്.

ഇത്രയും പറയാൻ കാരണം ഇന്ന് കർഷക സമരത്തെ അനുകൂലിച്ച് ഭാരത് ബന്ദ് നടക്കുന്നതുകൊണ്ടാണ്. കർഷക സമരത്തോട് അനുകൂലിക്കുന്നു. പക്ഷേ അതിനൊപ്പമോ അതിനേക്കാൾ ന്യായമായതോ ആയ വിഷയത്തിൻ്റെ പേരിലായാലും ബന്തോ ഹർത്താലോ നടത്തിയാൽ അനുകൂലിക്കാൻ നിർവ്വാഹമില്ല. നിലപാടിൽ ഒരു മാറ്റവുമില്ല.

ഇന്ന് ഈ ബന്ദ് കഴിയുമ്പോൾ രാജ്യത്ത് ഏതൊക്കെ സംസ്ഥാനങ്ങളിൽ ബന്ദ് നടന്നെന്ന് അറിയാൻ താൽപ്പര്യമുണ്ട്. കർണ്ണാടകത്തിൽ 1% പോലും ഈ ബന്ദ് ബാധിച്ചിട്ടില്ലെന്ന് മനസ്സിലാക്കാൻ വേണ്ടിയാൻ ആദ്യ പാരഗ്രാഫ് കുറിച്ചത്.

കേരളത്തിൽ പൊതുഗതാഗതം നിശ്ചലമാണെന്ന് വാർത്ത കണ്ടു. സ്വകാര്യ വാഹനങ്ങൾ എത്രത്തോളം നിരത്തിലിറങ്ങുമെന്ന് കഴിഞ്ഞ 10 വർഷത്തിലധികമായി Say NO To Harthal പ്രവർത്തകനായതിനാൽ നല്ല ബോദ്ധ്യമുള്ള കാര്യമാണ്. വാഹനങ്ങൾ നിരത്തിലിറങ്ങാതെയും സ്വകാര്യ വാഹനങ്ങൾ ഓടാതെയും കടകൾ തുറന്ന് പ്രവർത്തിക്കില്ലല്ലോ ? പ്രവർത്തിച്ചിട്ട് കാര്യമില്ലല്ലോ ? ജോലി ചെയ്യേണ്ടവർക്ക് ചെയ്യാം, ബന്ദിൽ പങ്കെടുക്കാൻ ആരും നിർബന്ധിക്കില്ല എന്നൊക്കെ പറയുന്നുണ്ടെങ്കിലും ആരെങ്കിലും കടകൾ തുറക്കുകയോ വാഹനമോടിക്കുകയോ ചെയ്താൽ കേരളത്തിലെ ബന്ദ് അനുകൂലികൾ നേരിടുന്നത് എങ്ങനെയെന്നും നല്ല ബോദ്ധ്യമുണ്ട്.

ഇത്യാദി കാരണങ്ങളാൽ, കേരളത്തിൽ ഈ ബന്ദ് പരിപൂർണ്ണ വിജയമായിരിക്കുമെന്ന കാര്യത്തിൽ ഒരു തർക്കവും വേണ്ട.

ഇത്രനാൾ കൊറോണ കാരണം അടച്ചിരിക്കേണ്ടി വരുകയും സ്വന്തം ജോലിയും നിലനിൽപ്പുമൊക്കെ അവതാളത്തിലാകുകയുമൊക്കെ ചെയ്തിട്ടും ഏതൊരു ന്യായമായ സമരത്തിനും കേരളജനതയ്ക്ക് ഹർത്താലോ ബന്ദോ തന്നെ വേണമെന്നത് ആശ്ചര്യം ജനിപ്പിക്കുന്ന കാര്യമാണ്.

എന്തായാലും ബന്ദ് ദിനത്തിൽ നിരത്തിൽ കുടുങ്ങിപ്പോകുന്നവരെ സഹായിക്കാനായി കോവിഡ് മാനദണ്ഡങ്ങൾ പാലിച്ചുകൊണ്ട് തന്നെ Say NO to Harthal പ്രവർത്തകരുടെ വാഹനങ്ങൾ ഇന്നും എറണാകുളത്തെ നിരത്തുകളിലുണ്ടാകും. കഴിഞ്ഞ 20 മാസങ്ങളായി തൊഴിലും പൊറുതിയും ബാംഗ്ലൂരായതുകൊണ്ട് ആ പ്രവർത്തനങ്ങളിൽ ഇന്ന് പങ്കെടുക്കാനാവില്ല എന്നതിൽ ഖേദിക്കുന്നു.

കർഷക സമരത്തിന് ഒരിക്കൽക്കൂടെ അഭിവാദ്യമർപ്പിക്കുന്നതിനൊപ്പം ഹർത്താലുകളുടെ ഇതുവരെയുള്ള ഒരു കണക്ക് കൂടെ അവതരിപ്പിക്കുന്നു.

2017 ലെ ഹർത്താലുകൾ – 120 എണ്ണം.
2018 ലെ ഹർത്താലുകൾ – 98 എണ്ണം.
2019 ലെ ഹർത്താലുകൾ – 12 എണ്ണം
2020 ലെ ഹർത്താലുകൾ – 11 എണ്ണം
2021 ൽ ഇതുവരെ ഹർത്താലുകൾ – 6 എണ്ണം

മൂന്ന് ദിവസം മുന്നേ നോട്ടീസ് നൽകാതെ ഹർത്താലുകൾ നടത്താൻ പാടില്ല എന്ന് 2019 ജനുവരിയിൽ ഹൈക്കോടതി പിടിമുറുക്കിയതോടെയാണ്, സെഞ്ച്വറി തികച്ച് ഓടിക്കൊണ്ടിരുന്ന ഹർത്താലുകൾ വിരലിൽ എണ്ണാവുന്ന നിലയിലേക്ക് ഒതുങ്ങിയത്. ഇതൊന്നും വകവെക്കാതെ ഒരു നേതാവ് പിന്നെയും ഹർത്താലിന് ആഹ്വാനം ചെയ്യുകയും ‘എഴുത്തും വായനയുമില്ലേ‘ എന്ന നിലയ്ക്ക് വക്കീൽ കൂടെയായ ആ നേതാവിനോട് കർശനമായി ഹൈക്കോടതി ഇടപെട്ട് കേസ് മുന്നോട്ട് നീക്കിയതും ഹർത്താലുകൾക്ക് എതിരെയുള്ള ഘടകമായി വർത്തിച്ചു എന്നാണ് വ്യക്തിപരമായ വിലയിരുത്തൽ.

വാൽക്കഷണം:- ലോക ടൂറിസം ദിനമായ സെപ്റ്റംബർ 27 ന്, കേരളത്തിലെ ഹർത്താൽ പ്രേമികൾക്ക് ടൂറിസം മേഖലയോട് ചെയ്യാൻ പറ്റുന്ന ഏറ്റവും വലിയ കാരുണ്യവും ഈ ഹർത്താൽ തന്നെയാണ്.

എക്കാലത്തും ഹർത്താലിന് എതിരെ പറയുകയും പ്രവർത്തിക്കുകയും ചെയ്തിട്ടുള്ള വ്യക്തിയാണ് ഞാൻ. കർഷകരേയും അവരുടെ സമരത്തേയും അനുകൂലിക്കുന്നതിനോപ്പം തന്നെ രാജ്യവ്യാപകമായി അവരിന്ന് നടത്തുന്ന ഹർത്താലിനോട് സമ്പൂർണ്ണ വിയോജിപ്പാണ്. എത്ര ന്യായമായ സമരത്തിന്റെ പേരിലായാലും കാലഹരണപ്പെട്ടത്തും ജനദ്രോഹപരവുമായ സമരമുറ മാത്രമാണ് ഹർത്താൽ. സെലൿറ്റീവായി ഹർത്താലിനെ അനുകൂലിക്കൽ എന്റെ നയമല്ല.

പക്ഷേ, രാജ്യത്തിന്റെ ഏതെങ്കിലും മൂലയിൽ ആരെങ്കിലും ഒരു കൂട്ടർ പണിമുടക്കെന്ന് പറഞ്ഞാൽ അതിനെ ഹർത്താലോ ബന്ദോ ആക്കി മാറ്റാൻ പ്രത്യേക വൈദഗ്ദ്ധ്യമുള്ള കേരളത്തിലെ പാർട്ടിക്കാർ ആരും ഇന്ന് കർഷകർ രാജ്യവ്യാപകമായി നടത്തുന്ന ബന്ദിനോട്  സഹകരിക്കുന്നില്ല. ആ ഹർത്താൽ വിരോധത്തിന്റെ കാരണം ആലോചിച്ച് തലപുണ്ണാക്കാനൊന്നുമില്ല.

പാർട്ടിക്കാരുടെ അന്നത്തിലേക്കും അഴിമതിയിലേക്കുമുള്ള ആദ്യചുവടാണ് തിരഞ്ഞെടുപ്പ്. സ്വന്തം കഞ്ഞി…. ക്ഷമിക്കണം ബിരിയാണിയിൽ പാറ്റയിറ്റാൻ അവർക്ക് താൽപ്പര്യമില്ല. അല്ലാതെ ഇതിൽ ജനതാൽപ്പര്യം ഏതുമില്ല. തിരഞ്ഞെടുപ്പിന് ഇനിയും പതിനൊന്ന് ദിവസത്തോളം ബാക്കിയുള്ളപ്പോൾ അതിൽ നിന്ന് ഒരു ദിവസം നഷ്ടപ്പെട്ടാലും ജനങ്ങൾക്ക് തിരഞ്ഞെടുപ്പ് ഇല്ലാതാകുന്നില്ലല്ലോ ? പാർട്ടിക്കാർക്കല്ലേ വോട്ട് പിടിക്കാനും ചാക്കിടാനും കുതന്ത്രങ്ങൾ മെനയാനുമായി ഒരു ദിവസം നഷ്ടപ്പെടുന്നുള്ളൂ.

ചുരുക്കിപ്പറഞ്ഞാൽ അവനവൻ കഴിഞ്ഞേ ഇക്കൂട്ടർക്ക് മറ്റെന്തുമുള്ളൂ. അന്നന്നത്തെ അന്നത്തിനായി കൂലിപ്പണി ചെയ്യുന്ന ജനങ്ങളുടെ കഞ്ഞിയിൽ (ബിരിയാണിയല്ല കഞ്ഞി തന്നെ) പാറ്റയിടാൻ വേണ്ടി വർഷത്തിൽ 100ൽ അധികം ഹർത്താലുകൾ നടത്താൻ ഇവർക്കാർക്കും രണ്ടാമതൊന്ന് ആലോചിക്കേണ്ടതുപോലുമില്ല. (പ്രാദേശികം സംസ്ഥാനം ദേശീയം എന്നീ ഇനങ്ങളിലായി 2017ൽ 120 ഹർത്താലുകൾ, 2018ൽ 98 ഹർത്താലുകൾ)

ഇതൊന്നും മനസ്സിലാക്കാതെ പാർട്ടിക്കാർക്ക് വേണ്ടി ഉറഞ്ഞുതുള്ളാൻ അഭ്യസ്തവിദ്യരും അല്ലാത്തവരുമായി ലക്ഷങ്ങൾ പിന്നിലുള്ളപ്പോൾ പിന്നെന്ത് നിലപാടും അവർക്ക് സ്വീകരിക്കാമല്ലോ ? തലച്ചോറിന്റെ നല്ലൊരു ഭാഗം ഇത്തരം  പാർട്ടിക്കാർക്ക് വേണ്ടി പണയം വെച്ചിരിക്കുന്ന ജന്മങ്ങളെയോർത്ത് സഹതപിച്ചിട്ട് പോലും ഒരു കാര്യവുമില്ല.

ഇങ്ങനെയൊക്കെ ആരെങ്കിലും പറഞ്ഞാലുടൻ അരാഷ്ട്രീയവാദിപ്പട്ടം ചാർത്തിക്കിട്ടും. എന്നുവെച്ചാൽ രാഷ്ട്രത്തിനും ജനങ്ങൾക്കും സമൂഹത്തിനും നല്ലത് വരണമെന്ന് ആഗ്രഹിക്കുകയും പ്രവർത്തിക്കുകയും ചെയ്യുന്ന എല്ലാവരും അരാഷ്ട്രീയ വാദികൾ! ഏതെങ്കിലും പാർട്ടി കൊടിയുടെ കീഴെ അണിനിരന്ന് അതിന്റെ (വിവരദോഷിയായ) നേതാവ് പറയുന്നതിന് റാൻ മൂളുകയും അയാൾക്ക് കീ ജെയ് വിളിക്കുകയും ചെയ്യുന്നവരൊക്കെ മുറ്റ് രാഷ്ട്രീയക്കാർ! എന്തൊരു വിരോധാഭാസം.

നിങ്ങൾ കക്ഷിരാഷ്ട്രീയക്കാർ എത്രതവണ പറഞ്ഞ് പരത്തിയാലും പ്രചരിപ്പിച്ചാലും അതങ്ങനെയല്ല. നിങ്ങൾ മറ്റൊരു പണിയും അറിയാത്ത, അറിഞ്ഞാലും മറ്റൊരു പണിയും ചെയ്യാത്ത, ജനസേവനം എന്ന പേരിൽ പൊതുജനത്തിന്റെ ചോരകുടിച്ച് ചീർക്കുന്ന കക്ഷിരാഷ്ട്രീയക്കാർ മാത്രം. രാഷ്ട്രത്തിന്റേയും ജനങ്ങളുടേയും നന്മ നിങ്ങളിൽ ബഹുഭൂരിപക്ഷത്തിനും വിഷയമേയല്ല. അത് വിഷയമായിട്ട് കാണുന്നവർ പിൻ‌നിരയിലേക്ക് തള്ളപ്പെട്ട് കഴിഞ്ഞു. അല്ലെങ്കിൽ പറയൂ, ഈ തിരഞ്ഞെടുപ്പിൽ മത്സരിക്കുന്ന 30% സ്ഥാനാർത്ഥികളെങ്കിലും സ്വന്തമായി മറ്റൊരു തൊഴിൽ ചെയ്ത് ജീവിക്കുന്നതിനൊപ്പം ജനസേവനമോ രാഷ്ട്രസേവനമോ നടത്തുന്നവരാണോ ?

ഇതൊക്കെ നിങ്ങളോടോ നിങ്ങളുടെ അണികളോടോ പറഞ്ഞ് സ്ഥാപിച്ചെടുക്കാൻ ബുദ്ധിമുട്ടാണ്. കാരണം നിങ്ങൾ ഏതോ ഒരു പാർട്ടിക്ക് തലച്ചോർ പണയം വെച്ചവരാണ്. ബോക്സിന് വെളിയിൽ നിന്ന് ചിന്തിക്കാനുള്ള കഴിവ് നിങ്ങൾക്ക് നഷ്ടപ്പെട്ടിരിക്കുന്നു.

എന്തായാലും ഒരു ഹർത്താൽ വിരോധി എന്ന നിലയ്ക്ക്, തിരഞ്ഞെടുപ്പിന്റെ കാരണം പറഞ്ഞിട്ടായാലും ഇന്നത്തെ ഹർത്താലിൽ പങ്കെടുക്കുന്നില്ല എന്ന് തീരുമാനിച്ച ഇരട്ടത്താപ്പുകാരായ എല്ലാ കക്ഷിരാഷ്ട്രീയക്കാർക്കും അഭിവാദ്യങ്ങൾ !!

പണിമുടക്കുന്നതിൽ തെറ്റില്ല. പണിയെടുക്കുന്നവർക്ക് പണിമുടക്കാനുള്ള സ്വാതന്ത്ര്യവുമുണ്ട്. ഭരണഘടന അതനുവദിച്ച് കൊടുക്കുന്നുമുണ്ട്. പക്ഷേ പണിയെടുക്കുന്ന ഒരാളുടെ പണി തടസ്സപ്പെടുത്താനുള്ള അവകാശമോ അധികാരമോ പണിമുടക്കുന്നവർക്കില്ല.

ഒരുവശത്ത്, പൗരത്വഭേദഗതി നിയമത്തെ എതിർത്തുകൊണ്ട് ഭരണഘടനയിൽ പറഞ്ഞിരിക്കുന്ന കാര്യങ്ങൾക്ക് വേണ്ടി മുറവിളി കൂട്ടുന്ന സമയത്ത് തന്നെ, പണിയെടുക്കുന്നവരെ തടഞ്ഞുകൊണ്ട്, അവർക്ക് ഭരണഘടന നൽകുന്ന സ്വാതന്ത്ര്യത്തെ നിഷേധിച്ച് ഇരട്ടത്താപ്പ് കാണിക്കാൻ ചിലർക്ക് ഒരു ലജ്ജയുമില്ല എന്നതാണ് സങ്കടകരം.

പറഞ്ഞുവരുന്നത് 2020 ജനുവരി 8 ന് നടന്ന ദേശീയ പണിമുടക്കിൽ ആലപ്പുഴയിൽ ഉണ്ടായ അങ്ങേയറ്റം നാണംകെട്ട ഒരു സംഭവത്തെക്കുറിച്ചാണ്.

അന്നേ ദിവസം കേരള സർവ്വകലാശാലയുടെ അതിഥിയായി ആലപ്പുഴയിൽ ഉണ്ടായിരുന്ന മൈക്കിൾ ലെവിറ്റ് തങ്ങിയ ഹൗസ് ബോട്ട്, പണിമുടക്ക് അനുകൂലികൾ രണ്ട് മണിക്കൂറോളം തടഞ്ഞുവച്ചു. 2013ലെ രസതന്ത്ര നോബൽ സമ്മാനജേതാവായ മൈക്കിൾ ലെവിറ്റിന് കേരളത്തിലെ ഇത്തരം കലാപരിപാടികളെപ്പറ്റി അറിവുണ്ടാകാൻ സാദ്ധ്യതയില്ലല്ലോ. അതുകൊണ്ടുതന്നെ പരിഭ്രമിച്ച് പോയ അദ്ദേഹം ആദ്യം പോലീസിൽ പരാതി നൽകിയെങ്കിലും അടുത്തദിവസം മലയാളികളെ പുകഴ്ത്തിപ്പറഞ്ഞുകൊണ്ട് പരാതി പിൻവലിച്ചു. ഇവിടന്ന് എങ്ങനെയെങ്കിലും ജീവനോടെ തിരിച്ചുപോകണമെന്ന് ആരായാലും ആഗ്രഹിച്ചു പോകുമല്ലോ.

ഈ സംഭവം ഉണ്ടായ ഉടനെ സാംസ്കാരിക വകുപ്പ് മന്ത്രി ബഹു:കടകംപള്ളി സുരേന്ദ്രൻ പറഞ്ഞത്, ‘ഇത് ചില സാമൂഹ്യവിരുദ്ധർ ചെയ്തതാകാനേ വഴിയുള്ളൂ’ എന്നാണ്. ചെയ്തത് സാമൂഹ്യവിരുദ്ധമായ കാര്യമാണെന്ന് കടകംപള്ളി സഖാവ് സമ്മതിച്ചല്ലോ. വളരെ സന്തോഷം.

ഈ സാമൂഹ്യവിരുദ്ധത ചെയ്ത നാല് കുറ്റവാളികളെ ഇന്ന് പിടികൂടിയിട്ടുണ്ട്. നാലുപേരും കടകംപള്ളി സഖാവിന്റെ പാർട്ടി പ്രവർത്തകരും ചുമതലയുള്ളവരും തന്നെയാണ്.

ഇനിയെങ്കിലും സമരമെന്താണെന്നും സാമൂഹ്യവിരുദ്ധ എന്താണെന്നും വേർതിരിച്ച് ഒന്ന് പഠിപ്പിച്ചു കൊടുക്കണം പാർട്ടി പ്രവർത്തകർക്കും അണികൾക്കും ഛോട്ടാ നേതാക്കന്മാർക്കും. സഖാവ് കടകംപള്ളി സുരേന്ദ്രനെങ്കിലും അതിന് മുൻകൈ എടുക്കുമല്ലോ.

ഈ സംഭവം രാജ്യന്തര തലത്തിൽ സംസ്ഥാനത്തിന് ഉണ്ടാക്കി കൊടുത്തിട്ടുള്ള നാണക്കേട് ചില്ലറയൊന്നുമല്ല. കള്ള് കച്ചവടം കഴിഞ്ഞാൽപ്പിന്നെ നാല് ചക്രമുണ്ടാക്കാൻ പറ്റിയിരുന്നത് ടൂറിസത്തിലൂടെ ആയിരുന്നു. അതിന്റെ കാര്യം ഏതാണ്ട് തീരുമാനമായിക്കഴിഞ്ഞിരിക്കുന്നു.

നിക്ഷേപകരുടെ തലയെറിഞ്ഞ് പൊളിക്കുകയും വിഐപി വിദേശികളെപ്പോലും വഴിയിൽ തടയുകയും ചെയ്യുന്ന ഈ സംസ്ഥാനത്തേക്ക് നിക്ഷേപകരേയും ടൂറിസ്റ്റുകളെയും ക്ഷണിച്ചുകൊണ്ട് നടത്തുന്ന പൊറാട്ട് നാടകങ്ങൾ ഇനിയെങ്കിലും സർക്കാർ ഒഴിവാക്കണം. അതിന്റെ ചിലവെങ്കിലും ലാഭിക്കാമല്ലോ. അത്രയെങ്കിലും ദാരിദ്ര്യം കുറയ്ക്കാമല്ലോ.

കുറ്റവാളികൾക്കെതിരെ നടപടിയെടുക്കുമെന്ന് ആലപ്പുഴ ജില്ലാ നേതൃത്വം പറഞ്ഞുകഴിഞ്ഞു. ഈ അവസരത്തിൽ ഒരു കാര്യം ചോദിക്കട്ടെ. വിദേശിയും നോബൽ സമ്മാന ജേതാവുമായ ഒരു പ്രശസ്തൻ വന്നപ്പോൾ, അയാൾക്ക് ഇങ്ങനെയൊരു ദുരനുഭവം ഉണ്ടായപ്പോൾ, കുറ്റവാളികൾക്കെതിരെ നടപടികളിലേക്ക് നീങ്ങാൻ നിങ്ങൾ തയ്യാറാണെന്ന് പറയുന്നു. ഇതേ ദിവസം സാധാരണക്കാരായ ധാരാളം പേരെ സമരക്കാർ വഴിയിൽ തടഞ്ഞിട്ടുണ്ട്. ആ സാമൂഹ്യവിരുദ്ധർ ആർക്കെങ്കിലുമെതിരെ നടപടിയെടുക്കാൻ നിങ്ങൾ തയ്യാറാണോ ? വിഐപികൾ ഉപദ്രവിക്കപ്പെട്ടാൽ മാത്രമേ നടപടിയുണ്ടാകൂ എന്നാണോ ? പാവപ്പെട്ടവന്റേയും അപ്രശസ്തരുടേയും സമയത്തിനും സ്വാതന്ത്ര്യത്തിനുമൊന്നും ഒരു വിലയുമില്ല എന്നാണോ ?

സ്വന്തം പ്രതിഷേധങ്ങളും സമരങ്ങളും മറ്റുള്ളവരെ ബാധിക്കാത്ത തരത്തിൽ നടത്താൻ എന്നാണ് നിങ്ങളിനി പഠിക്കുക ? എതിർപക്ഷത്തുള്ളവർ ഫാസിസ്റ്റുകളാണെന്ന് മുറവിളി കൂട്ടുമ്പോൾ, നിങ്ങളീ കാണിച്ച് കൂട്ടുന്നതും ഫാസിസം തന്നെയല്ലേ ?

വാൽക്കഷണം:- ഇതടക്കം പൊതുജനങ്ങളെ വഴിയിൽ തടഞ്ഞ പലപല സംഭവങ്ങളും കണക്കിലെടുത്ത് ജനുവരി 8ന് നടന്ന പണിമുടക്ക്, ഹർത്താലായിത്തന്നെയാണ് കണക്കാക്കപ്പെടുക. Say NO to harthal.

രാവിലെ 06:30ന് കെ.ആർ.പുരം (ബാംഗ്ലൂർ) സ്റ്റേഷനിൽ തീവണ്ടിയിറങ്ങി. അവിടന്ന് സർക്കാർ ബസ്സ് കയറി(₹10) ബൈപ്പനഹള്ളി മെട്രോ സ്റ്റേഷനിലെത്തി. മെട്രോയിൽ ഇന്ദിരാനഗർ വരെ യാത്ര ചെയ്തു. അവിടന്ന് ഓട്ടോ (₹70) പിടിച്ച് വീട്ടിലെത്തി.

ബാംഗ്ലൂരിൽ പൊതുവാഹനങ്ങൾ, സ്വകാര്യവാഹനങ്ങൾ, മെട്രോ, ഓട്ടോ, ടാക്സി എന്നിങ്ങനെ എല്ലാ ഗതാഗത സൗകര്യങ്ങളും പതിവുപോലെ പ്രവർത്തിക്കുന്നുണ്ട്. ട്രാഫിക് ബ്ലോക്കും പതിവുപടിയുണ്ട്. സ്കൂളുകൾക്കും ബാങ്കുകൾക്കും അവധി പ്രഖ്യാപിച്ചിട്ടില്ല.

ഇതിനിടയിൽ കേന്ദ്ര സർക്കാർ നയങ്ങൾക്കെതിരെ ആരെങ്കിലും പണിമുടക്കുന്നുണ്ടെങ്കിൽ അവർക്ക് അഭിവാദ്യങ്ങൾ. പണിമുടക്കിനെ രാജ്യത്തെവിടെയെങ്കിലും ഹർത്താലാക്കി മാറ്റുന്നുണ്ടെങ്കിൽ അതിനോട് ഒരുതരത്തിലും യോജിപ്പില്ല. പ്രതിഷേധമോ സമരമോ ആണ് ഉദ്ദേശിക്കുന്നതെങ്കിൽ, അടച്ചുപൂട്ടി വീട്ടിൽ ഇരിക്കുകയല്ല വേണ്ടത്. പൗരത്വഭേദഗതി നിയമത്തിനെതിരെ ശബ്ദമുയർത്തിയത് പോലെ, അനുകൂലികൾ ഓരോരുത്തരും റോഡിലിറങ്ങി പ്രതിഷേധിക്കണം, ശബ്ദമുയർത്തണം.

കണക്ക് സംബന്ധിയായ അറിയിപ്പ്:- എവിടെയെങ്കിലും നിർബന്ധിച്ച് കടകൾ അടപ്പിക്കുകയോ വാഹനങ്ങൾ തടയുകയോ അക്രമം അഴിച്ചുവിടുകയോ ചെയ്യുന്നുണ്ടെങ്കിൽ, ഈ പണിമുടക്കിനെ (കഴിഞ്ഞവർഷം ചെയ്തതുപോലെ) ഹർത്താലിന്റെ വിക്കിപ്പീഡിയ കണക്കിലേക്ക് ചേർക്കുന്നതാണ്.

ബന്ദും ഹർത്താലും പണിമുടക്കും തമ്മിലുള്ള വ്യത്യാസം അറിയാത്തവർക്ക് വേണ്ടി.

പണിമുടക്ക്:- ഏതെങ്കിലും ഒരു വിഷയത്തിൽ തങ്ങളുടെ എതിർപ്പ് അറിയിക്കാൻ തങ്ങളുടെ ജോലിയിൽ നിന്ന് സ്വമേധയാ വിട്ടുനിന്ന് പ്രതിഷേധം അറിയിക്കുന്ന സമരരീതി.

ഹർത്താൽ:- തങ്ങളുടെ അഭിപ്രായം മറ്റുള്ളവരിൽ അടിച്ചേൽപ്പിക്കാൻ ബലം പ്രയോഗിച്ചും ഭീഷണിപ്പെടുത്തിയും അക്രമം അഴിച്ചു വിട്ടും നടത്തുന്ന ഗുണ്ടായിസം. ഹർത്താൽ എന്ന ആശയം ആദ്യമായി നടപ്പിലാക്കിയ ഗാന്ധിജിയാകട്ടെ സമാധാനപരമായ ഒരു സമരമുറയായാണ് ഇതിനെ ആവിഷ്കരിച്ചത്.

ബന്ദ്:- ഹർത്താലിന്റെ പഴയ പേര്. കോടതി ബന്ദ് നിരോധിച്ചപ്പോൾ, ഹർത്താൽ എന്ന പേരിൽ നടപ്പിലാക്കാൻ തുടങ്ങി.

വാൽക്കഷണം:- ഇന്നലെ രാത്രി തീവണ്ടിയിൽ ഉറക്കെ ഫോണിൽ സംസാരിച്ചിരുന്ന ഒരു മനുഷ്യൻ ആവർത്തിച്ചാവർത്തിച്ച് പറഞ്ഞത് ‘നാളെ ഹർത്താലാണ്, നാളെ ഹർത്താലാണ് ‘ എന്നാണ്. അൽപ്പം മുൻപ് ജയ്ഹിന്ദ് ചാനലിലെ റിപ്പോർട്ടർ പറഞ്ഞതും ഹർത്താൽ എന്നാണ്. ഇങ്ങനെയൊക്കെയാണ് ഒരു പണിമുടക്കിനെ സമ്പൂർണ്ണ സാക്ഷര പ്രബുദ്ധ മലയാളി ഹർത്താലാക്കി മാറ്റുന്നത്.

#Say_NO_to_Harthal