ആഗസ്റ്റ് 29ന് സജിത മഠത്തിലിൻ്റെ ഓർമ്മക്കുറിപ്പുകളുടെ സമാഹാരമെന്നോ ആത്മകഥാപരം എന്നോ വിശേഷിക്കാവുന്ന ‘വെള്ളിവെളിച്ചവും വെയിൽനാളങ്ങളും’ എന്ന പുസ്തകത്തിന്റെ പ്രകാശനം ചങ്ങമ്പുഴ പാർക്കിൽ വെച്ച് നടന്നു.

ബഹുമാനപ്പെട്ട കൊച്ചി മേയർ അഡ്വക്കേറ്റ് അനിൽകുമാർ, നടിയും നർത്തകിയുമായ ശ്രീമതി റീമ കല്ലിങ്കലിന് പുസ്തകം നൽകിക്കൊണ്ടാണ് പ്രകാശനം നിർവഹിച്ചത്. സംവിധായകൻ ശ്രീ.കമൽ മുഖ്യപ്രഭാഷണം നടത്തി. ഡോ:പീയൂഷ് ആന്റണി പുസ്തക പരിചയം നടത്താൻ വേണ്ടി മാത്രം ലക്നൗവിൽ നിന്ന് എത്തി എന്നത് എന്നെ ശരിക്കും അതിശയിപ്പിച്ചു. സംവിധായിക ശ്രീമതി വിധു വിൻസെന്റ് സ്വാഗതം ആശംസിച്ചു . ഡോ:സംഗീത ജനചന്ദ്രൻ, ഡോ:മുത്തുമണി, എന്നിവർ ആശംസകൾ നേർന്നു. ശ്രീമതി അന്നപൂർണ്ണ മൊത്തം പരിപാടിയെ മനോഹരമായി നിയന്ത്രിച്ചു. നന്ദി പറയാൻ അവസരം കിട്ടിയത് എനിക്കാണ്.

IE മലയാളം ഓൺലൈനിൽ ഖണ്ഡശ്ശ പ്രസിദ്ധീകരിച്ച ഈ കുറിപ്പുകൾ, പുസ്തകമാക്കുന്നതിൻ്റെ ഭാഗമായി അതിൽ ചില തിരുത്തുകളുമായി ഇടപെടാൻ എനിക്ക് അവസരം ലഭിച്ചിരുന്നു. അതുകൊണ്ടുതന്നെ വള്ളി പുള്ളി വിടാതെ പുസ്തകം നേരത്തെ വായിക്കാനും സാധിച്ചിരുന്നു.

3 വയസ്സിൽ അച്ഛൻ മരിച്ചുപോയ ഒരു പെൺകുട്ടി, നാടകം, സിനിമ, ശാസ്ത്രസാഹിത്യ പരിഷത്ത്, കലാരൂപങ്ങളുടെ ഡോക്യുമെന്റേഷൻ, ക്യൂറേഷനുകൾ, പഠനങ്ങൾ, അദ്ധ്യാപനം, സാമൂഹികമായ ഇടപെടലുകൾ എന്നിങ്ങനെ പല തരത്തിൽ മുന്നേറി ഡോക്ടറേറ്റ് വരെ എത്തിപ്പിടിച്ച ഒരു സ്ത്രീ ആയി മാറിയ കൗതുകകരവും അതേ സമയം അമ്പരപ്പിക്കുന്നതുമായ ഒരു വഴിത്താര ഈ പുസ്തകത്തിൽ തെളിഞ്ഞ് നിൽക്കുന്നു. പറയാനുള്ളതെന്ന് ഗ്രന്ഥകാരിക്ക് ഉറച്ച ബോദ്ധ്യമുള്ള കാര്യങ്ങൾ പരത്തിപ്പറയുകയും തള്ളിപ്പറയേണ്ട കാര്യങ്ങളെ ഒഴിവാക്കിയുമാണ് രചന നിർവ്വഹിച്ചിരിക്കുന്നത്. “സജിതയുടെ ജീവിതാനുഭവങ്ങൾ വെച്ച് നോക്കിയാൽ മറ്റൊരു വലിയ ആത്മകഥയ്ക്ക് തന്നെ ഇനിയും ഇടമുണ്ട് “എന്ന, സംവിധായകൻ കമലിന്റെ അഭിപ്രായം ശരിയാണെന്ന്, ഗ്രന്ഥകാരിയെ നേരിട്ട് പരിചയമുള്ള ആർക്കും തോന്നുന്നത് സ്വാഭാവികം.

പുസ്തകത്തിലെ മനോഹരവും രസകരവുമായ വരകൾ സംവിധായിക വിധു വിൻസെന്റിന്റേത് ആണ്. വിധു, അതിനെ കുത്തിവരകൾ എന്ന് സ്വയം വിശേഷിപ്പിക്കുന്നു. കുത്തിവരകൾക്ക് ഇത്രയും ഭംഗിയോ എന്ന് ഞാൻ വീണ്ടും അത്ഭുതം കൂറുന്നു. നാല് സ്ത്രീകൾ, ഒരാൾക്ക് പിന്നിൽ ഒരാളായി ഇരുന്ന് തലയിലെ പേൻ നോക്കുന്ന ചിത്രമാണ് എനിക്കതിൽ ഏറ്റവും ഇഷ്ടമായത്.

പ്രകാശന ദിവസം ആയപ്പോഴേക്കും മൂന്ന് പതിപ്പുകൾ വിറ്റു കഴിഞ്ഞ പുസ്തകം, ഇനിയും ഏറെ സഞ്ചരിക്കുകയും വായിക്കപ്പെടുകയും ചെയ്യുമെന്ന് ഉറപ്പ്. സജിതയ്ക്കും ഡി.സി. ബുക്സിനും ആശംസകൾ!

വാൽക്കഷണം:- ഞാൻ വളരെ ഗൗരവത്തിൽ സംസാരിക്കുമ്പോൾ എല്ലാവരും ചിരിക്കുന്നത് (ചിത്രം 2) എന്തിനാണെന്ന് എത്ര ആലോചിച്ചിട്ടും പിടി കിട്ടുന്നില്ല. എവിടെ പരിപാടി അവതരിപ്പിച്ചാലും ഇതു തന്നെയാണല്ലോ എന്റെ അവസ്ഥ

ഇന്ന് വിഷു ആണല്ലോ? ആയതിനാൽ വിഷുവുമായി ബന്ധപ്പെട്ട ഒരു പഴഞ്ചൊല്ലിലെ ചില കാര്യങ്ങൾ പറയാം.

“കാട്ടുകോഴിക്കെന്ത് വിഷുവും സംക്രാന്തിയും?” ചൊല്ല് ഇങ്ങനെയാണ്.

അജ്ഞന്മാർക്ക് എന്ത് മതാനുഷ്ഠാനം, എന്നാണ് സാധാരണ ഗതിയിൽ ഈ ചൊല്ല് ഉപയോഗിക്കുന്നവർ ഉദ്ദേശിക്കുന്നത്.

മലബാർ ഭാഗങ്ങളിൽ സംക്രാന്തി പൂജയ്ക്ക് കോഴിയെ വെട്ടുന്നത് പതിവായിരുന്നു. (കൊടുങ്ങല്ലൂരിലെ കോഴിവെട്ടുമായി സംക്രാന്തിക്ക് ബന്ധമുണ്ടോ എന്ന് അറിയില്ല.) പക്ഷേ ഈ കോഴി വെട്ടിന് ഉപയോഗിക്കുന്നത് നാട്ടുകോഴിയെ ആണ്. അതുകൊണ്ട് സംക്രാന്തി സമയത്ത് നാട്ടുകോഴികൾക്കേ ഭയപ്പെടേണ്ടതുള്ളൂ. കാട്ടുകോഴികൾ സുരക്ഷിതരാണ്. ഇതാണ് ഈ ചൊല്ലിന്റെ ആന്തരാർത്ഥം.

പക്ഷേ ഈ ചൊല്ലിന് മറ്റൊരു വശവും ഉണ്ടെന്ന് ഈയടുത്ത് പറഞ്ഞുതന്നത് സുധീർ Sudheer Kumar ആണ്.

സത്യത്തിൽ മേൽപ്പറഞ്ഞ ചൊല്ലിന് അല്പം വ്യത്യാസമുണ്ട്, അഥവാ താഴെപ്പറയുന്നതാണ് ശരിയായ ചൊല്ല് എന്ന് തർക്കമുണ്ട്.

‘”കാട്ടുകോവിൽക്കെന്ത് വിഷുവും സംക്രാന്തിയും” എന്നാണത്. കോഴിയല്ല കോവിലാണ്. കാട്ടിലെ കോവിലിൽ പൂജ ഒന്നും നടക്കാറില്ല, നടക്കണമെന്നും ഇല്ല. വല്ലപ്പോഴും ഒരു പൂജ നടന്നാലായി. വിഷുവും സംക്രാന്തിയും ഒന്നും അവിടെ ഉണ്ടായെന്ന് വരില്ല. ഈ അർത്ഥത്തിലാണ് ആ ചൊല്ല് പോകുന്നത്.

പക്ഷേ, രണ്ടും രണ്ട് ചൊല്ലായി കണക്കാക്കണമെന്നാണ് ഭാഷാ പണ്ഡിതന്മാരുടെ അഭിപ്രായം.

“കാട്ടുകോവിലും കാട്ടുകോഴിയും നിലനിൽപ്പുള്ള വ്യത്യസ്ത വസ്തുക്കൾ തന്നെ. ഒന്ന് തെറ്റാണെന്നും മറ്റേതിന്റെ പാഠഭേദം ആണെന്നും പറയുന്നത് ശരിയല്ല. രണ്ട് ചൊല്ലുകളും ഒരേ ആശയം ഉൾക്കൊള്ളുന്നു എന്ന് പറയാം.”……. എന്നാണ് പണ്ഡിതർ എടുത്ത് പറയുന്നത്.
ഇനി ഇതുമായി ബന്ധപ്പെട്ട മറ്റു ചില ചൊല്ലുകൾ കൂടെ പറഞ്ഞ് അവസാനിപ്പിക്കാം.

* കാട്ടുജാതിക്കുണ്ടോ മാസപ്പിറപ്പും സംക്രാന്തിയും.

* ചാത്തപ്പനെന്തു മഹശറ. (മുസ്ലീം വിശ്വാസമായ മഹശറയിൽ ഹിന്ദുവായ ചാത്തപ്പന് കാര്യമില്ല എന്നാണ് ധ്വനി.)

ചുഴിഞ്ഞു നോക്കിയാൽ, മേൽപ്പറഞ്ഞ രണ്ട് ചൊല്ലുകളും വർഗ്ഗീയമാണ്.
എല്ലാ ജാതിക്കും എല്ലാ മതത്തിനും എല്ലാ ആഘോഷങ്ങളും ഉൾക്കൊള്ളാനും അനുഭവിക്കാനും കഴിയണം. ജാതിക്കും മതത്തിനും അപ്പുറത്തുള്ള മാനവികത അപ്പോഴാണ് ഉണ്ടാവുക.
എല്ലാവർക്കും വിഷു ആശംസകൾ!

വാൽക്കഷണം:- അക്ഷരാഭ്യാസമില്ലാത്ത കാട്ടുകോഴിക്ക് വിഷുവും സംക്രാന്തിയും ഇല്ലേയില്ല.

Jungle Fowl PC:- Pinterest

കൊളംബിയൻ ഫുട്ബോളറാണ് റോസ് റെനെ ഹിഗ്വിറ്റ. എൻ. എസ്. മാധവന്റെ പ്രശസ്തമായ ഒരു കഥയുണ്ട്, ഹിഗ്വിറ്റ എന്ന പേരിൽ. ഇപ്പോൾ ദാ അതേ പേരിൽ സുരാജ് വെഞ്ഞാറമൂട് നായകനായി ഒരു സിനിമ വരുന്നു.

അതിൽ എൻ. എസ്. മാധവന് വലിയ വിഷമം. അദ്ദേഹത്തിന്റെ കഥയുടെ പേരാണത്രേ സിനിമയുടെ പേരായി വരുന്നത്! എൻ. എസ്. മാധവനെ പിന്തുണച്ച് പല സാഹിത്യകാരും രംഗത്ത് വന്നു കഴിഞ്ഞു.

ഒരു വ്യക്തിയുടെ പേര്, എൻ. എസ്. മാധവന് തന്റെ കഥയുടെ തലക്കെട്ടായി ഉപയോഗിക്കാമെങ്കിൽ, അതേ പേര് മറ്റൊരു കൂട്ടർ സിനിമയുടെ തലക്കെട്ടായി ഉപയോഗിച്ചാൽ എന്താണ് കുഴപ്പം? ആ പേരിൽ എൻ.എസ്. മാധവന് എങ്ങനെയാണ് അധികാരമോ ബൗദ്ധിക അവകാശമോ നിസ്സാരമായി പോലും വിഷമിക്കാനുള്ള വകുപ്പോ ഉണ്ടാകുക? ഒരു പിടിയും കിട്ടുന്നില്ല. എൻ. എസ്.ൻ്റെ കഥയല്ല സിനിമയുടെ കഥ എന്നും കേൾക്കുന്നു. പേരിൽ മാത്രമേ കഥയും സിനിമയും തമ്മിൽ സാമ്യമുള്ളൂ. പിന്നെന്തോന്ന് ഇത്രയ്ക്ക് വേദനിക്കാൻ?

ഹിഗ്വിറ്റയുടെ പേർ കഥയ്ക്ക് ഇടുന്നതിന് മുൻപ് എൻ.എസ്.മാധവൻ ഹിഗ്വിറ്റയോടോ അദ്ദേഹത്തിൻ്റെ മാതാപിതാക്കളോടോ അനുവാദം വാങ്ങിയിരുന്നോ? ഹിഗ്വിറ്റ എന്ന പേർ മലയാളി കേൾക്കുന്നത് എൻ.എസ്.മാധവൻ്റെ കഥയിലൂടെയാണ് എന്നൊക്കെ എൻ.എസ്. നെ അനുകൂലിക്കുന്നവരുടെ ന്യായീകരണങ്ങൾ കേൾക്കുന്നുണ്ട്. ഹിഗ്വിറ്റ എന്ന ഫുട്ബോൾ കളിക്കാരനെപ്പറ്റി നല്ല ധാരണയുള്ള മലയാളികൾ എൻ.എസ്.ൻ്റെ കഥ വരുന്നതിന് മുന്നേ തന്നെയുണ്ട്. ഇവർ കുറച്ച് വല്ല്യേട്ടൻ സാഹിത്യകാരന്മാർ മാത്രമാണ് വിദേശങ്ങളിൽ നടക്കുന്ന കാര്യങ്ങൾ അറിയുന്നത്, അത് മലയാളിയെ പരിചയപ്പെടുത്തുന്നത് എന്നൊക്കെയുള്ള മിഥ്യാധാരണയും ഹുങ്കും മാത്രമാണ് അവരെക്കൊണ്ടത് പറയിപ്പിക്കുന്നത്. അങ്ങനെയൊക്കെ പറയുന്നതിലൂടെ അവർ തീരെയങ്ങ് ചെറുതായിപ്പോകുകയും ചെയ്യുന്നു.

എൻ്റെ ഭാര്യയുടേം മകളുടേം പേരടക്കം നൂറ് കണക്കിന് പേജുകൾ കാരൂർ സോമൻ കോപ്പിയടിച്ച് പ്രസിദ്ധീകരിച്ചത് എൻ.എസ്.ൻ്റെ ഇപ്പറഞ്ഞ വാർത്ത വന്നിരിക്കുന്ന ഇതേ മാതൃഭൂമിയുടെ അച്ചടിശാലയിലാണ്. പത്രസമ്മേളനം നടത്തിയിട്ട് പോലും, മാതൃഭൂമിയിലൊന്നും അതേപ്പറ്റി ഒരു വാർത്തയും ഇതുവരെ വന്നിട്ടില്ല. ഓ…മോഷ്ടിച്ചവന്, സ്വന്തം പത്രത്തിൽ, മോഷണ വാർത്ത കൊടുക്കാൻ പറ്റിലല്ലോ. അത് മറന്നു.

എൻ.എസ്. ൻ്റെ വേദനയുടെ തോത് വെച്ചാണെങ്കിൽ കോപ്പിയടിക്കപ്പെട്ട സുരേഷ് നെല്ലിക്കോടും വിനീത് എടത്തിലും  ഈയുള്ളവനും, എത്ര ടൺ(അതോ ഗ്യാലനോ) വിഷമിക്കണമെന്ന്, എൻ. എസോ അദ്ദേഹത്തെ അനുകൂലിക്കുന്നവരോ ഒന്ന് പറഞ്ഞു തന്നിരുന്നെങ്കിൽ!.

‘അതിന് നീ, എൻ. എസ്. അല്ലല്ലോ നിരക്ഷരൻ അല്ലേ’ എന്ന് ആർക്കെങ്കിലും ചോദ്യമുണ്ടെങ്കിൽ, കൃത്യം ചോദ്യമാണ്.

ഒൿടോബർ 27 മാതൃഭൂമി ആഴ്ച്ചപ്പതിപ്പിൽ പകർപ്പവകാശവുമായി ബന്ധപ്പെട്ട് വന്ന 9 പേജ് ലേഖനം വായിച്ച് കോരിത്തരിക്കുകയുണ്ടായി. സർവ്വശ്രീ സി.രാധാകൃഷ്ണൻ, എം.ടി.വാസുദേവൻ നായർ, അഡ്വ: കാളീശ്വരം രാജ് എന്നിവരുടെ അനുഭവങ്ങളും അഭിപ്രായങ്ങളും നിയമപരമായ നിർദ്ദേശങ്ങളും പകർപ്പവകാശങ്ങളുമൊക്കെയാണ് ‘സർഗ്ഗാത്മകതയുടെ കൂലി’ എന്ന ഈ ലേഖനത്തിലൂടെ മാതൃഭൂമി പങ്കുവെച്ചിരിക്കുന്നത്.

തന്റെ എഴുത്തിന്റെ തുടക്കകാലത്ത്, പകർപ്പവകാശം നേടിയ ശേഷം ഇംഗ്ലീഷിൽ നിന്ന് മലയാളത്തിലേക്ക് തർജ്ജിമ ചെയ്ത ഒരു പുസ്തകം പിന്നീട് മറ്റാരുടെയോ പേരിൽ വിൽക്കപ്പെടുന്നത് കണ്ടപ്പോൾ ഉണ്ടായ ഹൃദയവേദന നിശബ്ദ്ദം സഹിച്ചു എന്നാണ് സി.രാധാകൃഷ്ണൻ എഴുതിയിരിക്കുന്നത്. അവിടന്നങ്ങോട്ട് പിന്നീട് ധാരാളം പുസ്തകങ്ങൾ എഴുതുകയും അതിൽ നിന്നുള്ള വരുമാനം ജീവിതത്തെ സുഗമമാക്കുകയും ചെയ്തെന്ന് മലയാളി വായനക്കാരെ നന്ദിപൂർവ്വം സ്മരിച്ചുകൊണ്ടുതന്നെ അദ്ദേഹം കുറിച്ചിരിക്കുന്നു. തന്റെ പുസ്തകങ്ങൾ എപ്പോഴും അച്ചടിയിൽ ഉണ്ടായിരിക്കണമെന്ന ആഗ്രഹം അദ്ദേഹം ഡീസി യോട് ആവശ്യപ്പെടുമ്പോൾ അപ്രകാരം ചെയ്യാൻ പറ്റാത്തതിന്റെ ബുദ്ധിമുട്ട് ഡീസി തുറന്നു പറയുന്നു. അവിടെ നിന്നാണ് ഹൈ-ടെക് ബുക്സ് എന്ന പ്രസാധകന്റെ തുടക്കം. അതുകൊണ്ടുതന്നെയാണ് സി.രാധാകൃഷ്ണന്റെ പുസ്തകങ്ങളെല്ലാം ഇന്നും കമ്പോളത്തിൽ സ്ഥിരമായി ലഭ്യമാകുന്നത്.

ഒരുപാട് ഡിമാന്റ് ഉണ്ടായിട്ടും പുസ്തകങ്ങൾ മാർക്കറ്റിൽ ലഭ്യമാക്കാൻ പ്രസാധകന്റെ കൈയ്യും കാലും പിടിക്കേണ്ടി വരുന്ന ധാരാളം പ്രമുഖ എഴുത്തുകാർ കേരളത്തിലുണ്ട്. അവർക്ക് പ്രയോജനപ്പെടുത്താവുന്ന ഒരു പരിഹാരമാർഗ്ഗമാണ് സി.രാധാകൃഷ്ണൻ വിജയകരമായി നടപ്പിലാക്കി കാണിച്ചുകൊടുത്തത്. പ്രിന്റിങ്ങ് സ്വന്തം ചിലവിലും വിതരണം, കേരളത്തിൽ അങ്ങോളമിങ്ങോളം സ്റ്റോറുകളുള്ള ഏതെങ്കിലും പ്രമുഖ പ്രസാധകൻ വഴിയുമാണ് ഇത് സാദ്ധ്യമാക്കുന്നത്.

എം.ടിയുടെ ലേഖനത്തിൽ, പുസ്തകപ്രസാധനരംഗത്തോടൊപ്പം ഗാനങ്ങളുടേയും സിനിമകളുടേയുമൊക്കെ പകർപ്പവകാശ രംഗത്തുള്ള പ്രശ്നങ്ങളെ ചുരുങ്ങിയ വരികളിലെങ്കിലും അദ്ദേഹം ചൂണ്ടിക്കാണിക്കുന്നു. സാഹിത്യത്തിൽ പകർപ്പവകാശനിയമം ശരിക്കും നടപ്പിലാക്കിയാൽ എഴുത്തുകാർ സംഘടിതമായി അതിനുവേണ്ടി ശ്രമിച്ചാൽ, റീഡിങ്ങ് റൈറ്റ്സ് സൊസൈറ്റി എന്നൊന്ന് ഉണ്ടാകാനുള്ള സാദ്ധ്യത അദ്ദേഹം മുന്നോട്ട് വെക്കുന്നു. അങ്ങനെയുണ്ടായാൽ വായനശാലകളും ലെൻഡിങ്ങ് ലൈബ്രറികളുമൊക്കെ ഈ സൊസൈറ്റിക്ക് റോയൽറ്റി കൊടുക്കേണ്ടി വരുന്ന സാഹചര്യമുണ്ടാകുമെന്നും നിലവിലെ നിയമപ്രകാരം തന്നെ അതിന് സാദ്ധ്യതയുണ്ടെന്നുമാണ് അദ്ദേഹം പറയുന്നത്. എങ്കിൽ‌പ്പിന്നെ എന്തുകൊണ്ട് അങ്ങനെയൊരു സൊസൈറ്റിയെപ്പറ്റി ആലോചിച്ചുകൂട ?

ഞാൻ ഒരെഴുത്തുകാരനോ സാഹിത്യകാരനോ അല്ല. എന്നിരുന്നാലും ഒരു സഞ്ചാരിയെന്ന നിലയ്ക്ക് ഞാനെഴുതിയ ഒരുപാട് ഓൺലൈൻ പേജുകൾ മോഷ്ടിക്കപ്പെടുകയും എന്റെ ഭാര്യയുടേയും മകളുടേയും പേരുകൾ പോലും ഈച്ചക്കോപ്പിയായി അച്ചടിക്കപ്പെടുകയും ചെയ്തതിന്റെ പേരിൽ ക്രിമിനൽ കേസും സിവിൽ കേസും നടത്തിക്കൊണ്ടിരിക്കുകയാണ്. ആ കേസിലെ ഒരു പ്രതിസ്ഥാനത്ത് വരുന്നത് ഈ ലേഖനം അച്ചടിച്ചിരിക്കുന്ന മാതൃഭൂമി ആഴ്ച്ചപ്പതിപ്പിന്റെ സഹോദരസ്ഥാപനമായ മാതൃഭൂമി ബുക്ക്സ് ആണ്. എനിക്കീ വിഷയത്തിലുള്ള അതീവ താൽ‌പ്പര്യവും അതുതന്നെയാണ്.

ഈ ലേഖനത്തിലൂടെ അഡ്വ:കാളീശ്വരം രാജ് കോപ്പിറൈറ്റ് നിയമത്തിന്റെ സാധുതകൾ പന്ത്രണ്ടോളം അക്കങ്ങളിട്ട് നിരത്തിയാണ് സംസാരിക്കുന്നത്. മാതൃഭൂമി സ്വയം മനസ്സിലാക്കാൻ അതിൽ ചിലത് എടുത്തെഴുതാം.

4. എഴുത്തുകാരന്റെ അഥവാ കലാകാരന്റെ രചനകളെ ദുരുപയോഗം ചെയ്ത് നിയമലംഘനം നടത്തുന്നത് നഷ്ടപരിഹാരം നൽകാനുള്ള ബാദ്ധ്യത സൃഷ്ടിക്കും.

5. അതിലുപരി അത്തരം പ്രവൃത്തികൾ കൃമിനൽ കുറ്റം കൂടെയാണ്.

9. 2012ൽ വരുത്തിയ ചില ഭേദഗതികളിലൂടെ ആധുനിക ഡിജിറ്റൽ-വിവരസാങ്കേതിക വിദ്യയുടെ സങ്കേതങ്ങളെക്കൂടി ഉൾക്കൊള്ളാൻ നിയമം ശ്രമിക്കുകയുണ്ടായി.

“ചുരുക്കത്തിൽ, ഒരു പരിഷ്കൃത സമൂഹം സർഗാത്മക രംഗത്തെ വ്യക്തികളോട് കാണിക്കുന്ന മര്യാദയുടേയും ആദരവിന്റേയും മൂർത്തവും ക്രിയാത്മകവുമായ രൂപമാണ് പകർപ്പവകാശ നിയമം“ എന്നും അഡ്വ:കാളീശ്വരം രാജ് എടുത്ത് പറയുന്നു.

ഒരു വശത്ത് ഇക്കാര്യങ്ങളെല്ലാം കാറ്റിൽ‌പ്പറത്തി സാഹിത്യചോരണം വഴിയുള്ള അച്ചടിക്ക്, അതായത് കാരൂർ സോമൻ ‘എഴുത്തുകാരനായ’, സ്പെയിൻ കാളപ്പോരിന്റെ നാട്ടിൽ, ചന്ദ്രയാൻ എന്നീ രണ്ട് പുസ്തകങ്ങൾ അച്ചടിക്കുകയാണ് മാതൃഭൂമി ചെയ്തിരിക്കുന്നത്. മേൽ‌പ്പറഞ്ഞ ലേഖനമെഴുതിയ ബഹുമാന്യ സി.രാധാകൃഷ്ണന്റെ ലേഖനം പോലും അത്തരത്തിൽ കാരൂർ സോമൻ കോപ്പിയടിച്ചിട്ടുണ്ട്.

ഈ പകർപ്പവകാശ അനീതികളുടെ കാര്യത്തിൽ, ആദ്യം മാതൃഭൂമി എന്തെങ്കിലും തീർപ്പുണ്ടാക്കണം. അതല്ലാതെ ഈ വിഷയത്തിൽ മാതൃഭൂമി പറയുന്ന ഏതഭിപ്രായവും വ്യഭിചരിക്കുന്നവരുടെ സദാചാരപ്രസംഗമായി മാത്രമേ കാണാനാകൂ. എന്തായാലും ഇത്തരം ലേഖനങ്ങൾ പ്രസിദ്ധീകരിച്ച്, എന്റെ കേസിന്റെ ചൂടും ചൂരും കെട്ടുപോകാതെ നിലനിർത്തുന്നതിന് മാതൃഭൂമിയോടുള്ള നന്ദി മറച്ച് വെക്കുന്നില്ല.

വാൽക്കഷണം:- ചേറിൽ ഇറങ്ങിയാൽ കൊയ്തേ കേറാവൂ എന്ന കൃഷിക്കാരന്റെ പ്രമാണത്തെപ്പറ്റി സി.രാധാകൃഷ്ണൻ സൂചിപ്പിക്കുന്നുണ്ട് ഈ ലേഖനത്തിൽ. കള്ളൻ കാരൂർ സോമനും മാതൃഭൂമിക്കും എതിരായുള്ള നിയമപോരാട്ടത്തിൽ ആ ഉപദേശം എന്നേ നെഞ്ചേറ്റിക്കഴിഞ്ഞിരിക്കുന്നു ഈയുള്ളവൻ.
——————————————————————————————————–
ഇതേ വിഷയത്തിൽ മാതൃഭൂമിയോട് മുൻപ് പറഞ്ഞത് ഇവിടെ വായിക്കാം

പൊളിറ്റിക്കൽ കറൿറ്റ്നെസ്സിന്റെ കാലമാണ്. ചൊല്ലുകളായിട്ടും പഴമൊഴികളായിട്ടും തമാശകളായിട്ടും പ്രത്യേകിച്ച് അപകടമോ അലോസരമോ ഒന്നുമില്ലാതെ നമ്മൾ പറഞ്ഞ് പോന്നിരുന്ന പല പദങ്ങളും, പല ശീലുകളും, പല വാക്കുകളും ഇന്ന് പൊളിറ്റിക്കൽ കടൿറ്റ്‌നെസ്സ് എന്ന പുറമ്പോക്കിൽ തള്ളപ്പെട്ട് കഴിഞ്ഞു. പഴയ ശീലം വെച്ച് അറിഞ്ഞോ അറിയാതെയോ അങ്ങനെന്തെങ്കിലും പറഞ്ഞുപോയാൽ ആ ഒറ്റക്കാരണം കൊണ്ട് പറയുന്നവർ ആജീവനാന്ത മോശക്കാരായെന്ന് വരും. അങ്ങനെയാണ് കാര്യങ്ങളുടെ പോക്ക്. എനിക്കത്തരം അനുഭവങ്ങൾ ധാരാളമുണ്ട്.

എന്നാൽ‌പ്പിന്നെ പൊളിറ്റിക്കലി കറൿറ്റ് അല്ലാത്തത് (മലയാളത്തിൽ) എന്തൊക്കെയാണെന്ന് ഒരു കണക്കെടുപ്പ് നടത്തിയാലോ ? കുറഞ്ഞപക്ഷം അറിഞ്ഞിരിക്കുകയെങ്കിലും ചെയ്യാമല്ലോ. നമ്മളെല്ലാവരും മര്യാദാ പുരുഷോത്തമന്മാർക്കും, മര്യാദാ വനിതോത്തമമാർക്കും, മര്യാദാ ഭിന്നലിംഗോത്തമർക്കും പഠിക്കുകയാണെങ്കിൽ മാത്രമേ ഇതൊക്കെ പ്രാവർത്തികമാക്കണമെന്നുള്ളൂ. അതൊക്കെ ഓരോരുത്തരുടെ സൌകര്യവും പോളിസിയും ഇഷ്ടവും പോലെ ആയിക്കോളൂ. എന്തായാലും കണക്കെടുപ്പ് നടത്തിക്കളയാം.

പൊളിറ്റിക്കലി തെറ്റായത് ആദ്യം പറയുന്നു. അതിന്റെ കാരണം ബ്രാക്കറ്റിൽ പറയുന്നു. ശരിയായത് രണ്ടാമത് പറയുന്നു. ശരിക്കുള്ള പദം അറിയാൻ പാടില്ലാത്തത് വെറുതെ വിടുന്നു. കമന്റുകളായി നിർദ്ദേശിക്കപ്പെടുന്നത് പോസ്റ്റിലേക്ക് എഡിറ്റ് ചെയ്ത് ചേർക്കുന്നതാണ്.

1. വികലാംഗർ – ഭിന്നശേഷിക്കാർ.

2. പാണ്ടി (വംശീയ അധിക്ഷേപം) – തമിഴൻ.

3. ആണ്ടി (വംശീയ അധിക്ഷേപം) – തെലുങ്കൻ.

4. മല്ലു (വംശീയ അധിക്ഷേപം) – മലയാളി.

5. അന്യസംസ്ഥാന തൊഴിലാളികൾ (ആരും അന്യരല്ല) – ഇതര സംസ്ഥാന തൊഴിലാളികൾ.

6. വേശ്യയുടെ സദാചാര പ്രസംഗം (സ്ത്രീത്വത്തെ അപമാനിക്കൽ, ലിംഗസമത്വം ഇല്ല) – വ്യഭിചരിക്കുന്നവരുടെ സദാചാര പ്രസംഗം.

7. ആണുങ്ങൾക്ക് ചേർന്ന പണിയല്ല (ലിംഗസമത്വം ഇല്ല) – മനുഷ്യന്മാർക്ക് ചേർന്ന പണിയല്ല.

8. കീഴ്‌ജാതിക്കാർ (ജാതീയ അധിക്ഷേപം) – കീഴ്ജാതിക്കാരെന്ന് പറയപ്പെടുന്നവർ.

9. മേൽജാതിക്കാർ (ജാതീയ വാഴ്ത്തൽ) – മേൽജാതിക്കാരെന്ന് പറയപ്പെടുന്നവർ.

10. കണ്ട ചെമ്മാനും ചെരുപ്പുകുത്തിയും (വംശീയ അധിക്ഷേപം) – ‘കണ്ട അലവലാതികൾ‘ എന്ന് പറയുന്നതിൽ തെറ്റില്ലെന്ന് തോന്നുന്നു. അലവലാതി എന്ന ഒരു വംശമോ ജാതിയോ ഇല്ലല്ലോ.

11. കണ്ട ആണ്ടനും അടുകോടനും (വംശീയ അധിക്ഷേപം) – ‘കണ്ട അലവലാതികൾ‘ എന്ന് പറയുന്നതിൽ തെറ്റില്ലെന്ന് തോന്നുന്നു. അലവലാതി എന്ന ഒരു വംശമോ ജാതിയോ ഇല്ലല്ലോ.

12. എന്റെ പട്ടി വരും (പട്ടിയെ അധിക്ഷേപിക്കൽ)

13. എന്റെ പേര് നിന്റെ പട്ടിക്ക് ഇട്ടോളൂ (പട്ടിയെ അധിക്ഷേപിക്കൽ)

—————————————————————————
കമന്റുകളിൽ നിന്ന് പോസ്റ്റിലേക്ക് ചേർത്തത്.
—————————————————————————
1. ആണും പെണ്ണും കെട്ടവൻ/ൾ/ർ (ലിംഗസമത്വം ഇല്ല‌) – ആണും പെണ്ണും ഭിന്നലിംഗവും കെട്ടവൻ/ൾ/ർ

2. അച്ചിയും നായരും (ജാതീയ അധിക്ഷേപം, സ്ത്രീവിരുദ്ധത)

3. ഒരു മാതിരി പെണ്ണുങ്ങളെപ്പോലെ (സ്ത്രീവിരുദ്ധത, ലിംഗസമത്വം ഇല്ല) -

4. ഒരു മാതിരി ചന്ത സ്വഭാവം (ചന്തയിലുള്ളവരെ അധിക്ഷേപിക്കൽ)

5. നീ ഒരു ചെറ്റ ആണല്ലോ (ചെറ്റക്കുടിലുകളിൽ ജീവിക്കുന്നവരെ അധിക്ഷേപിക്കൽ)

6. ചെരക്കാൻ പൊയ്ക്കൂടെ (വംശീയ അധിക്ഷേപം)

7. തെക്കനേം മൂർഖനേം ഒരുമിച്ച് കണ്ടാൽ (ഭൂമിശാസ്ത്രപരമായ അധിക്ഷേപം, പാമ്പിനെ അധിക്ഷേപിക്കൽ).

8. പച്ച (രാഷ്ട്ര അധിക്ഷേപം) – പാക്കിസ്ഥാനി

9. നീഗ്രോ (വംശീയ അധിക്ഷേപം) – ബ്ലാക്ക് എന്ന് പറയാമെന്നാണ് കേട്ടിട്ടുള്ളത്. നിറം പറഞ്ഞുള്ള അധിക്ഷേപമാണ് അതും എന്നാണ് വ്യക്തിപരമായ അഭിപ്രായം.

10. മന്ദബുദ്ധി (പല തരത്തിൽ അധിക്ഷേപമാണിത്).

11. മേത്തൻ(മതപരമായ അധിക്ഷേപം) – ഇസ്ലാം/മുസ്ലീം