ഞാൻ ഏറെ ഇഷ്ടപ്പെടുകയും ബഹുമാനിക്കുകയും വായിക്കുകയും ചെയ്യുന്ന ശ്രീ.സി.രാധാകൃഷ്ണൻ സാർ അറിയുന്നതിന്, ഒരു തുറന്ന കത്ത്.

‘കാറ്റിൽ പറക്കുന്ന പന്തുകൾ‘ എന്ന ഒരു പുസ്തകത്തെ പ്രകീർത്തിച്ച് താങ്കൾ ജൂൺ 26ന് കലാകൗമുദിയിൽ എഴുതിയ ലേഖനം വായിച്ചു.

ആ പുസ്തകം എഴുതിയ കാരൂർ സോമൻ എന്ന വ്യക്തി, ഭൂമിമലയാളം ഇതുവരെ കണ്ട ഏറ്റവും വലിയ സാഹിത്യ ചോരനാണെന്ന് താങ്കൾ മറന്നുപോയതാണെന്ന് വിശ്വസിക്കാനാണ് ഞാനിഷ്ടപ്പെടുന്നത്.

2018ൽ ഞാനെഴുതിയ ഈ ലേഖനം ഒന്ന് ശ്രദ്ധിച്ചാൽ താങ്കൾക്കത് മനസ്സിലാകും. കാരൂർ സോമൻ കോപ്പിയടിച്ച 38 പേരിൽ പതിനഞ്ചാമത്തെ നമ്പർ താങ്കളുടേതായിരുന്നു. ചന്ദ്രയാൻ വിക്ഷേപണവുമായി ബന്ധപ്പെട്ട് പ്രമുഖ പത്രങ്ങളിൽ ഒന്നിൽ താങ്കൾ എഴുതിയ ശാസ്ത്ര ലേഖനം അതേപടി കട്ടെടുത്താണ് കാരൂർ സോമൻ എന്ന സാഹിത്യ മോഷ്ടാവ് മാതൃഭൂമി വഴി ചന്ദ്രയാൻ എന്ന പുസ്തകം അച്ചടിച്ചിറക്കിയത്. ആ പുസ്തകത്തിലുള്ള മറ്റ് പേജുകളാകട്ടെ വിക്കിപീഡിയയിലെ ചന്ദ്രൻ എന്ന ലേഖനത്തിൻ്റെ ഈച്ചക്കോപ്പിയാണ്. വിക്കിയിൽ നിന്ന് പകർത്തി എഴുതുന്നതിന് പ്രശ്നമൊന്നും ഇല്ല. പക്ഷേ വിക്കിപ്പീഡിയയ്ക്ക് കടപ്പാട് വെക്കണം എന്നൊരു നിബന്ധനയുണ്ട്.

പക്ഷേ ചന്ദ്രൻ എന്ന വിക്കി ലേഖനം കാരൂർ സോമൻ മോഷ്ടിച്ച് അതിനൊപ്പം താങ്കളെപ്പോലുള്ളവരുടെ ലേഖനവും കുത്തിത്തിരുകി അത് മാതൃഭൂമി അച്ചടിച്ചപ്പോൾ വിക്കിപ്പീഡിയയ്ക്ക് കടപ്പാട് ഇല്ലെന്ന് മാത്രമല്ല, മാതൃഭൂമിക്ക് പകർപ്പവകാശം ഉണ്ടെന്നാണ് പുസ്തകത്തിൻ്റെ ക്രെഡിറ്റ് പേജിൽ രേഖപ്പെടുത്തിയിരിക്കുന്നത്. കടപ്പാട് വെക്കുന്നുമില്ല, പകർപ്പവകാശം തങ്ങൾക്കാണെന്ന മാതൃഭൂമിയുടെ നിലവാരത്തകർച്ചയും കാണേണ്ടി വന്നു.

കാരൂർ സോമൻ്റെ കോപ്പിയടി വിശദമാക്കിക്കൊണ്ട് ഞാൻ എഴുതിയ ലേഖനം വായിച്ച താങ്കൾ, അതിനടിയിൽ വന്ന് “ Wish it does not prove infectious! “ എന്ന് ഇംഗ്ലീഷിൽ ഒരു കമൻ്റും ഇട്ടിരുന്നു. (ചിത്രം നോക്കുക)

രാധാകൃഷ്ണൻ സാറിന് കാരൂർ സോമൻ എന്ന മോഷ്ടാവിനെ അറിയാം, പക്ഷേ നാലഞ്ച് വർഷങ്ങൾ കഴിഞ്ഞപ്പോൾ മറന്ന് പോയതാകാം എന്ന് വിശ്വസിക്കാനേ അങ്ങയോടുള്ള നിസ്സീമമായ സ്നേഹം എന്നെ അനുവദിക്കുന്നുള്ളൂ.

കാരൂർ സോമൻ എന്ന കുത്സിതജന്മം എല്ലാം മാർഗ്ഗങ്ങളിലൂടെയും മലയാള സാഹിത്യത്തെ മലീമസമാക്കാനുള്ള നടപടികൾ തുടർന്നുകൊണ്ടേയിരിക്കും. അതുകൊണ്ടാണല്ലോ അങ്ങയുടെ ലേഖനം കോപ്പിയടിച്ച അയാളുടെ കൃതിയെ അങ്ങ് പ്രശംസനീയമെന്ന് പറയേണ്ട ഗതികേട് ഉണ്ടായിരിക്കുന്നത്; അങ്ങ് ആ മോഷ്ടാവിന് എല്ലാ ഭാവുകങ്ങളും നേർന്നിരിക്കുന്നത്.

അയാളും മാതൃഭൂമിയും ഭാഷാ ഇൻസ്റ്റിറ്റ്യൂട്ടും എനിക്കും എൻ്റെ സുഹൃത്തുക്കൾക്കും എതിരെ നടത്തിയ കോപ്പിയടിക്കെതിരെ, ലക്ഷക്കണക്കിന് രൂപ കോടതിയിൽ കെട്ടി വെച്ചാണ് ഞങ്ങൾ കേസ് നടത്തിക്കൊണ്ടിരിക്കുന്നത്. അത് ഞങ്ങൾക്ക് വേണ്ടി മാത്രമല്ല, മറിച്ച്, ഇതുപോലുള്ള കാട്ടുകള്ളന്മാർക്ക് മൂക്കുകയറിട്ട് മലയാളസാഹിത്യത്തെ രക്ഷിക്കാനുള്ള ഒരു എളിയ ശ്രമം കൂടെയാണ്.

അങ്ങയെപ്പോലുള്ളവർ മലയാള സാഹിത്യത്തിൽ നേടാവുന്ന എല്ലാ നേട്ടങ്ങളും എത്തിപ്പിടിച്ച് കഴിഞ്ഞവരാണ്. ഞങ്ങളാരും അതിന് ശ്രമിക്കുന്നവരോ അതിനുള്ള യോഗ്യത ഉള്ളവരോ പോലുമല്ല. പക്ഷേ, ഓൺലൈനിൽ അവനവന് സ്വന്തം അക്ഷരങ്ങൾ പ്രകാശിപ്പിക്കാം എന്ന സൗകര്യം വന്നപ്പോൾ അൽപ്പസ്വൽപ്പം ലേഖനങ്ങളും കുറിപ്പുകളും എഴുതിയിട്ടിട്ടുണ്ട്. അതൊന്നും മലയാളസാഹിത്യമോ ഭാഷയോ നന്നാക്കിക്കളയാമെന്ന് വെച്ചിട്ടോ അതിൽ നിന്ന് എന്തെങ്കിലും നേട്ടങ്ങൾ ഉണ്ടാക്കാമെന്ന് കരുതിയിട്ടോ അല്ല. സോമൻ ഒരു വർഷം കോപ്പിയടിച്ച് പന്ത്രണ്ട് പുസ്തകങ്ങൾ വരെ ഇറക്കുമ്പോൾ അഞ്ച് വർഷത്തിനുള്ളിൽ രണ്ട് പുസ്തകമിറക്കാൻ മാത്രമാണ് എനിക്ക് കഴിഞ്ഞത്. ആ ഒരൊറ്റ കണക്ക് നോക്കിയാൽ മനസ്സിലാക്കാം സോമൻ്റെ മോഷണത്തിൻ്റെ ആഴം.

ഇത്രയൊക്കെ മോഷ്ടിച്ചിട്ടും ഇക്കഴിഞ്ഞ ആഴ്ച്ചയിൽ പോലും സോമൻ വാദിക്കുന്നത് ഇന്ത്യൻ കോപ്പി റൈറ്റ് നിയമപ്രകാരം ഓൺലൈനിൽ ഉള്ളത് ആർക്കും സ്വന്തമാക്കി എടുത്തെഴുതാം, അതിന് കോപ്പി റൈറ്റില്ല എന്നാണ്. (അതിൻ്റെ സ്ക്രീൻ ഷോട്ട് താഴെ ചേർക്കുന്നു.)

ഈ മഹാൻ ഇംഗ്ലണ്ടിൽ ജീവിച്ചുകൊണ്ടാണ് ഇതുപോലുള്ള വിഡ്ഢിത്തങ്ങൾ എഴുന്നള്ളിക്കുന്നത് എന്നതാണ് തമാശ. അന്നാട്ടിലെ ഏതെങ്കിലും ഒരു സായിപ്പിൻ്റെ ഒരു ഓൺലൈൻ പേജ് സോമൻ കോപ്പിയടിച്ചാൽപ്പിന്നെ അഴിക്കുള്ളിൽ നിന്ന് പുറത്ത് വരാൻ വലിയ പാടാകും. മനുഷ്യൻ ഏത് രാജ്യത്ത് ഏത് സാഹചര്യത്തിൽ ജീവിച്ചാലും വിവരക്കേട് ഭൂഷണമായി കൊണ്ടുനടന്നാൽപ്പിന്നെ എത്ര പറഞ്ഞാലും മനസ്സിലാകില്ലല്ലോ. അത്രയും ശക്തമായ നിയമം തന്നെയാണ് ഇന്ത്യയിലും. പക്ഷേ ഇവിടെയത് കാര്യമായി നടപ്പിലാക്കപ്പെട്ടിട്ടില്ല ഇതുവരെ. ആർക്കും കോടതി കയറിയിറങ്ങാനുംപണം ചിലവഴിക്കാനും മെനക്കെടാനും വയ്യ എന്നത് തന്നെ കാരണം.

അവസാന പ്രതീക്ഷയെന്ന നിലയ്ക്കാണ് കോടതിയിൽ ചെന്നിരിക്കുന്നത്. കോവിഡും ബഹളവുമൊക്കെ തീർന്ന് അഞ്ച് വർഷത്തിന് ശേഷം കേസ് സജീവമായി വരുന്നതേയുള്ളൂ. അപ്പോളാണ്, സോമനെ പ്രകീർത്തിച്ചുള്ള സാറിൻ്റെ ഈ ലേഖനം കാണാനിടയായത്. വലിയ വിഷമമായി അത് കണ്ടപ്പോൾ.

സി. രാധാകൃഷ്ണൻ സാറിനെ ഞാനടക്കമുള്ള എല്ലാ മലയാളി വായനക്കാരനും കാണുന്നത്, ടി. റ്റി. പി. അടക്കമുള്ള സാങ്കേതിക വിദ്യകൾ ആദ്യമായി സ്വന്തം പുസ്തകങ്ങളിൽ സന്നിവേശിപ്പിച്ച, ശാസ്ത്രത്തിൻ്റേയും സാങ്കേതികത്ത്വത്തിൻ്റേയും കാര്യത്തിൽ കൃത്യമായ അവബോധമുള്ള ആളെന്ന നിലയ്ക്കാണ്. അങ്ങനെയുള്ള ഒരാളിൽ നിന്ന് ഇതുപോലുള്ള ആഘാതങ്ങൾ ഏൽക്കാനുള്ള ശേഷി ഞങ്ങൾക്കില്ല സാർ.

താങ്കൾ സ്വന്തം നിലയ്ക്ക് ഇന്ത്യൻ കോപ്പി റൈറ്റ് ആക്റ്റ് എന്താണെന്ന് ഒന്ന് പരിശോധിക്കണമെന്ന് അപേക്ഷയുണ്ട്. അത് ഓൺലൈൻ ലേഖനങ്ങളെ എത്തരത്തിൽ ക്യത്യമായി സംരക്ഷിക്കുന്നുണ്ടെന്ന്, എഴുത്തുകാരനാണെന്ന് ഗീർവാണം വിട്ട് നടക്കുന്ന കാരൂർ സോമനെ ഒന്ന് പറഞ്ഞ് മനസ്സിലാക്കി കൊടുക്കാൻ ഒരുപക്ഷേ രാധാകൃഷ്ണൻ സാറിന് പറ്റിയെന്നിരിക്കും. താങ്കൾ അത് ചെയ്ത്, അറിവില്ലായ്മയുടെ പര്യായമായ അയാളിൽ നിന്ന് ശ്രേഷ്ഠമലയാളത്തെ രക്ഷിക്കണമെന്നാണ് എനിക്കപേക്ഷ. ഈ പുസ്തകത്തിന് ആസ്വാദനം എഴുതണമെന്ന് പറഞ്ഞ് കാരൂർ സോമൻ അങ്ങയെ സമീപിക്കുകയും പലകുറി വിളിക്കുകയുമൊക്കെ ചെയ്തിരിക്കുമല്ലോ? സോമൻ്റെ ഫോൺ നമ്പർ എന്തായാലും സാറിൻ്റെ പക്കൽ ഉണ്ടാകും.

അവസാനമായി ഒരുകാര്യം കൃത്യമായി ബോധിപ്പിച്ചുകൊണ്ട് നിർത്താം. കാരൂർ സോമൻ ആക്ഷേപിക്കുന്നത് പോലെ, എന്തെങ്കിലും സാഹിത്യ നേട്ടം ഉണ്ടാക്കാൻ വേണ്ടിയല്ല വല്ലതുമൊക്കെ എന്നെപ്പോലുള്ളവർ ഓൺലൈനിൽ കുറിക്കുന്നത്. “നേട്ടമല്ല നോട്ടമാണ് ഇവർക്കുള്ളത്. സാഹിത്യത്തിൽ കുരുടൻ പിടിച്ച വടിപോലെ അവർ ജീവിക്കുന്നു.“ എന്നൊക്കെയാണ് സോമൻ്റെ അധിക്ഷേപങ്ങൾ. ‘അരിയും തിന്ന് ആശാരിച്ചീനേം കടിച്ചിട്ട് നായയ്ക്ക് തന്നെ ഇപ്പോഴും മുറുമുറുപ്പ് ‘ എന്നൊരു ചൊല്ല് മലയാളത്തിലുള്ളത് ഞാനായിട്ട് അങ്ങയോട് പറയേണ്ടതില്ലല്ലോ? (ഈയടുത്ത കാലത്ത് അത് പൊളിറ്റിക്കലി കറക്റ്റ് അല്ലാതെയുമായി) സത്യത്തിൽ അതാണ് കാരൂർ സോമൻ ചെയ്തുകൊണ്ടിരിക്കുന്നത്. അളമുട്ടിയാൽ ചേരയും കടിക്കും എന്ന് വേറൊരു ചൊല്ല് കൂടെയുണ്ട്. 13 ഇടങ്ങളിൽ എൻ്റെ ഭാര്യയുടേയും മകളുടേയും പേരുകൾ അതേപടി കോപ്പിയടിച്ച് വെച്ച് പുസ്തകമിറക്കിയവൻ കൂടുതൽ തത്വജ്ഞാനം വിളമ്പാൻ നിന്നാൽ ചേരയായിട്ടാകില്ല കടിക്കുന്നത് മൂർഖനായിട്ട് തന്നെ ആയിരിക്കും. ഒരു സംശയവും വേണ്ട.

കോപ്പിയടി ഭൂഷണമായി കൊണ്ടുനടക്കുന്ന അൽപ്പനായ ആ മനുഷ്യനെ ഏതെങ്കിലും തരത്തിൽ പറഞ്ഞ് തിരുത്താൻ സാറിനെക്കൊണ്ട് ആകുമെങ്കിൽ അതൊരു വലിയ ഉപകാരമാകും. ഇനി അതൊന്നും ചെയ്തില്ലെങ്കിലും അയാൾ പടച്ചുവിടുന്ന ചവറുകളെ പ്രകീർത്തിക്കുന്നത് അയാളുടെ കോപ്പിയടിക്ക് പാത്രമായിട്ടുള്ള അങ്ങ് തന്നെ ആകുന്നത് കാണുമ്പോൾ നല്ല വിഷമമുണ്ട്.

അങ്ങയോടുള്ള എല്ലാ ബഹുമാനവും ഇപ്പോഴും അതേപടി നിലനിർത്തിക്കൊണ്ട്….

സസ്നേഹം
മനോജ് രവീന്ദ്രൻ (നിരക്ഷരൻ)

സർക്കാർ ഉദ്യോഗസ്ഥർ സെക്രട്ടറിയേറ്റിൽ മാലിന്യം കൊണ്ടുവന്ന് നിക്ഷേപിക്കുന്നത്, നല്ല ലക്ഷണമായാണ് അഥവാ നല്ല സംസ്ക്കാരമായാണ് കാണേണ്ടത്. അവർക്കെതിരെ നടപടി എടുക്കും എന്നുള്ള സർക്കാരിന്റെ നിലപാട് ശോചനീയമാണ്.

എന്തുകൊണ്ടാണ് ജീവനക്കാർ സെക്രട്ടറിയേറ്റിൽ മാലിന്യം കൊണ്ടുവന്ന് നിക്ഷേപിക്കുന്നതെന്ന് മനസ്സിലാക്കാൻ ആദ്യം ശ്രമിക്കണം. സെക്രട്ടറിയേറ്റിലെ ഒരു കുപ്പത്തൊട്ടിയിൽ അല്ലേ അവർ മാലിന്യം നിക്ഷേപിക്കുന്നത്? അവരത് നിരത്തിൽ എവിടെയെങ്കിലും കൊണ്ടുപോയി കളയുന്നില്ല എന്നതൊരു നല്ല കാര്യമല്ലേ?

അവർ ജീവിക്കുന്ന ഇടങ്ങളിൽ കൃത്യമായി മാലിന്യ സംസ്ക്കരണമോ മാലിന്യ ശേഖരണമോ നടക്കാത്തത് കൊണ്ടായിരിക്കാം അവർ സ്വന്തം വീട്ടിലെ മാലിന്യം സെക്രട്ടറിയേറ്റിലേക്ക് കൊണ്ടുവരുന്നത്; അവിടെയുള്ള ഒരു കുപ്പത്തൊട്ടിയിൽ ആ മാലിന്യം നിക്ഷേപിക്കുന്നത്.

അവർ മാലിന്യം നിക്ഷേപിക്കുന്ന കുപ്പയ്ക്കരുകിൽ ക്യാമറ സ്ഥാപിച്ച് ‘കുറ്റക്കാരായ’ ജീവനക്കാരെ കണ്ടെത്താൻ സർക്കാർ കാണിക്കുന്ന ശുഷ്കാന്തിയുടെ നാലിലൊന്നു മതി, അവരുടെ മാലിന്യ പ്രശ്നം എന്താണെന്ന് മനസ്സിലാക്കാൻ. ക്യാമറ വാങ്ങാനുള്ള പണച്ചിലവും ഒഴിവാക്കാം. (ഓ മറന്നു…. ക്യാമറകൾ വാങ്ങിക്കൊണ്ടിരുന്നാലല്ലേ കമ്മീഷനുകളും അഴിമതിയും കൊഴുത്ത് പടർന്ന് പന്തലിക്കൂ.)

ഇതെല്ലാം എടുത്തു കാണിക്കുന്നത്, അഞ്ഞൂറോ ആയിരങ്ങളോ പണിയെടുക്കുന്ന സെക്രട്ടറിയേറ്റിലെ ജീവനക്കാരുടെ മാലിന്യം പോലും കൈകാര്യം ചെയ്യാൻ ഇനിയും നമ്മുടെ ഭരണകൂടത്തിന് കഴിയുന്നില്ല, അതിനുള്ള സംവിധാനമില്ല എന്നാണ്.

എവിടന്ന് കൊണ്ടുവന്നിട്ടായാലും, ഏതെങ്കിലുമൊരു കുപ്പത്തൊട്ടിയിൽ മാലിന്യം നിക്ഷേപിക്കുന്നത് എങ്ങനെ കുറ്റമാകുമെന്ന് ആരെങ്കിലും പറഞ്ഞ് തന്നിരുന്നെങ്കിൽ!

ബ്രഹ്മപുരത്തെ തീയും ഒച്ചപ്പാടും ബഹളങ്ങളും അഴിമതിയും കഴിഞ്ഞു. പുതിയ ഏതെങ്കിലും മാലിന്യ കൂമ്പാരത്തിന് തീ പിടിക്കുമ്പോൾ നമുക്ക് വീണ്ടും ചൂടൻ ചർച്ചകൾക്ക് തുടക്കമിടാം.

വാൽക്കഷണം:- അവനവന്റെ മാലിന്യം കൈകാര്യം ചെയ്യാനോ സംസ്ക്കരിക്കാനോ പറ്റാത്ത ഒരു ജനതയേയും അവർ തിരഞ്ഞെടുക്കുന്ന ഭരണകൂടത്തേയും പരിഷ്കൃതസമൂഹമായി ഒരിക്കലും കണക്കാക്കാൻ ആവില്ല.

ഒരു കഥ സൊല്ലട്ടുമാ ?

2017 ൽ സംഭവിച്ചതാണ്. മറവി നന്നായുള്ള മലയാളിക്ക് വർഷങ്ങൾ പഴക്കമുള്ള കാര്യങ്ങൾ കഥകളാണല്ലോ ? അത്തരമൊരു കഥയാണിത്. ഒരുപക്ഷേ മാദ്ധ്യമങ്ങൾ പോലും മറന്നുകഴിഞ്ഞിരിക്കുന്ന കഥ.

കൊച്ചി മെട്രോയുടെ പില്ലറുകളിൽ വെർട്ടിക്കൽ ഗാർഡൻ, പദ്ധതിയുടെ ഭാഗമായി ഉണ്ടായിരുന്നു. (ഉദ്ദേശിച്ചത് പോലെ അതും നടന്നില്ല. അത് വേറേ കഥ. എന്നാലും, അതിൽ ചിലതെങ്കിലും ഇപ്പോഴും കൊച്ചി നഗരത്തിലെ മെട്രോ പില്ലറുകളിൽ കാണാനാകും.)

ഇപ്പറഞ്ഞ വെർട്ടിക്കൽ ഗാർഡനുകൾക്കായി ഉപയോഗിക്കാൻ വേണ്ടിയിരുന്നത് ജൈവമാലിന്യമായിരുന്നു. അഥവാ ജൈവമാലിന്യം സംസ്ക്കരിച്ചുകൊണ്ടായിരുന്നു ആ പദ്ധതി.

ഇതിനായി കൊച്ചി മെട്രോ, കൊച്ചിൻ കോർപ്പറേഷനെ സമീപിച്ചു. മാലിന്യത്തിൽ നിന്ന് വൈദ്യുതി ഉണ്ടാക്കുന്ന ബൃഹത് പദ്ധതിയുമായി നീങ്ങിക്കൊണ്ടിരിക്കുകയാണ് തങ്ങളെന്നും പ്രതിദിനം 300 ടൺ മാലിന്യം ഇതിലേക്കായി ആവശ്യമുണ്ടെന്നും, പക്ഷേ കൊച്ചിയിൽ 150 – 200 ടൺ മാലിന്യമേ ലഭിക്കുന്നുള്ളൂ എന്നും ആയതിനാൽ പഴയ മാലിന്യമൊക്കെ വെച്ച് അഡ്ജസ്റ്റ് ചെയ്തേ ആ പദ്ധതി മുന്നോട്ട് കൊണ്ടുപോകാനാവൂ എന്നും ഇക്കാരണത്താൽ വെർട്ടിക്കൽ ഗാർഡന് വേണ്ടിയുള്ള മാലിന്യം തരാനാകില്ലെന്നും അന്നത്തെ മേയറായിരുന്ന ശ്രീമതി സൗമിനി ജയിൻ കൊച്ചി മെട്രോയെ അറിയിച്ചു.

കൊച്ചി മെട്രോ പിന്നീട് വർക്കലയിൽ നിന്ന് മാലിന്യം സംഘടിപ്പിച്ച് കൊണ്ടുവന്ന് അവരുടെ പദ്ധതി നടപ്പിലാക്കി.

അങ്ങനെ 2017 മുതൽ വൈദ്യുതി ഉണ്ടാക്കാൻ വേണ്ടി കൂട്ടിയിട്ട് കൂട്ടിയിട്ട് ശേഖരിച്ച് ശേഖരിച്ച് സംഭരിച്ച് സംഭരിച്ച് വെച്ചിരുന്ന മാലിന്യമാണ് കഴിഞ്ഞ അഞ്ച് ദിവസത്തിലധികമായി കത്തുപിടിച്ച് കൊച്ചിക്കാരുടെ മനുഷ്യജീവിതം ദുസ്സഹമാക്കി ക്യാൻസർ പോലും കൊണ്ടുവരാൻ സാദ്ധ്യതയുള്ള വിഷപ്പുകയായി മൂടി നിൽക്കുന്നത്.

കഥ കഴിഞ്ഞു.
———————————
ഇനി ഈ കഥയുടെ തുടക്ക കാലത്ത്  ‘മാലിന്യത്തിന് അടയിരിക്കുന്ന കൊച്ചിൻ കോർപ്പറേഷൻ‘ എന്ന തലക്കെട്ടിൽ ഈയുള്ളവൻ എഴുതിയ ഒരു പഴയ ലേഖനം അതേപടി താഴെ എടുത്തെഴുതുന്നു. അതിൻ്റെ ഒറിജിനൽ ലിങ്ക് ഇതാണ്.
———————————
01 ഒക്ടോബർ 2017:- കൊച്ചി മെട്രോയ്ക്ക് വെർട്ടിക്കൽ ഗാർഡന് ആവശ്യമായ മാലിന്യം കൊടുക്കാൻ കൊച്ചിൻ കോർപ്പറേഷന് കഴിയുന്നില്ല. ആയതിനാൽ കൊച്ചി മെട്രോ അവരുടെ മോടിപിടിപ്പിക്കൽ പരിപാടിക്കുള്ള മാലിന്യം സംഘടിപ്പിക്കുന്നത് ജില്ലയ്ക്ക് വെളിയിൽ വർക്കലയിൽ നിന്നാണ്. ഇന്നത്തെ പത്രവാർത്തയാണിത്. മാലിന്യവുമായോ കൊച്ചി മെട്രോയുമായോ ബന്ധപ്പെട്ടുനിൽക്കുന്നവർക്ക് ഇത് വാർത്തയായി വന്ന് അങ്ങാടിപ്പാട്ടാകുന്നതിന് മുന്നേ തന്നെ പരസ്യമായിട്ടറിയാവുന്ന അരമനരഹസ്യം തന്നെയാണ്.

മാലിന്യം സംസ്ക്കരിക്കുകയുമില്ല, അതാവശ്യമുള്ളവർക്ക് അതൊട്ട് കൊടുക്കുകയുമില്ല. ഈ പത്രവാർത്ത വായിച്ചപ്പോൾ മനസ്സിലാക്കാനായത് അങ്ങനെയാണ്. കേരളജനത ഇങ്ങനെ നാറ്റവും രോഗവും ദുരിതവുമൊക്കെ സഹിച്ച് കാലാകാലം മുന്നോട്ട് പൊയ്ക്കൊണ്ടിരിക്കണമെന്ന് ആർക്കൊക്കെയോ നിർബന്ധമുള്ളത് പോലെ. എന്തൊരു കഷ്ടമാണിത് ?!

ഈ പത്രവാർത്തയുടെ അടിസ്ഥാനത്തിൽ ചില ചോദ്യങ്ങൾ കോർപ്പറേഷനോടും മേയറോടും ചോദിച്ചാൽ, ഭാവിയിൽ ചോദ്യകർത്താവിന് എതിരെ കേസൊന്നും എടുക്കില്ലെന്ന് (മുൻ അനുഭവം അതാണ്) വിശ്വസിച്ചുകൊണ്ട് ചോദിക്കട്ടെ ?

ചോദ്യം 1:- മാലിന്യത്തിൽ നിന്ന് വൈദ്യുതി ഉണ്ടാക്കുമെന്ന് പറയുന്ന ഈ പദ്ധതി എന്ന് നിലവിൽ വരും ? ഏത് ഏജൻസിയുമായാണ് ഇതിനായുള്ള ധാരണ ഉണ്ടാക്കിയിട്ടുള്ളത് ?

ചോദ്യം 2:- നഗരത്തിൽ നിന്ന് ഒരു ദിവസം 120 – 200 ടൺ മാലിന്യമേ കിട്ടുന്നുള്ളൂ എങ്കിൽ വൈദ്യുതി ഉണ്ടാക്കുന്നവർക്ക് നിത്യേന നൽകേണ്ട 300 ടൺ മാലിന്യം എത്രനാൾ ഇതുപോലെ ശേഖരിച്ച് വെക്കുമെന്നാണ് ഉദ്ദേശിക്കുന്നത്. ഉദാഹരണത്തിന് ഒരു ദിവസം 80 ടൺ മാലിന്യത്തിന്റെ കുറവുണ്ട്. അതായത് ഒരു മാസം 2400 ടൺ മാലിന്യത്തിന്റെ കുറവ്. കുറഞ്ഞത് 3 മാസത്തെ കാര്യമെടുത്താൽ 7200 ടൺ മാലിന്യത്തിന്റെ കുറവ്. മൂന്ന് മാസത്തിനകം വൈദ്യുത ഉൽ‌പ്പാദനം തുടങ്ങിയില്ലെങ്കിൽ ശേഖരിക്കുന്ന മാലിന്യത്തിന്റെ അളവ് പ്രതിമാസം 2400 എന്ന നിലയ്ക്ക് വർദ്ധിച്ചുവരും. ഇത്രയും മാലിന്യം ശേഖരിച്ച് വെച്ചാൽ ഉണ്ടാകുന്ന ദുരിതങ്ങളെപ്പറ്റി വല്ല ധാരണയുമുണ്ടോ ?

ചോദ്യം 3:- മൂന്ന് മാസത്തിനകം വൈദ്യുതി ഉൽ‌പ്പാദിക്കാനായാൽ, അടുത്ത മൂന്ന് മാസം കൊണ്ട് നിങ്ങൾ ശേഖരിച്ചുവെച്ച മാലിന്യം തീരുകയും വീണ്ടും 80 ടൺ മാലിന്യം നിത്യേന കുറവുണ്ടാകുകയും ചെയ്യും. അപ്പോൾ ആ മാലിന്യമുണ്ടാക്കാൻ നിങ്ങളെന്ത് ചെയ്യും ? ആവശ്യത്തിനുള്ള മാലിന്യം കോർപ്പറേഷൻ തരുന്നില്ല എന്ന് പറഞ്ഞ് പദ്ധതി നടപ്പിലാക്കുന്നവർ അതുപേക്ഷിച്ച് പോകാൻ സാദ്ധ്യതയില്ലേ ?

ചോദ്യം 4:- ആ സമയത്ത് കൂടുതൽ മാലിന്യം കണ്ടെത്താനുള്ള ഏർപ്പാട് സ്വീകരിക്കും എന്നാണ് നിലപാടെങ്കിൽ ഇപ്പോളെന്തിന് ഈ മാലിന്യം കൂട്ടിക്കൂട്ടി വെക്കുന്നു ? നിലവിലുള്ള മാലിന്യം ആർക്കെങ്കിലും പ്രയോജനപ്പെടുന്നുണ്ടെങ്കിൽ അത് കൊടുത്തൊഴിവാക്കുകയല്ലേ ഭേദം ? വൈദ്യുതി ഉൽ‌പ്പാദനം തുടങ്ങുമ്പോൾ അതിനാവശ്യമായ മാലിന്യം അന്ന് കണ്ടെത്തിയാൽ പോരേ ?

ചുരുക്കിപ്പറഞ്ഞാൽ, ഇപ്പോൾ ഈ മാലിന്യം മുഴുവൻ ശേഖരിച്ച് വെച്ചിരിക്കുന്നത് ശുദ്ധ പോഴത്തരമാണ്. തെല്ലെങ്കിലും ദീർഘവീക്ഷണത്തോടെ മാലിന്യവിഷയം ഇന്നുവരെ ഈ കേരളത്തിൽ ഒരു സർക്കാരും തദ്ദേശസ്വയംഭരണസ്ഥാപനങ്ങളും വിഷയവിദഗ്ദ്ധന്മാരും കൈകാര്യം ചെയ്തിട്ടില്ല. ഉണ്ടെങ്കിൽ ഈ ഗതികേട് സംസ്ഥാനത്തിന് ഉണ്ടാകുമായിരുന്നില്ലല്ലോ.

ഒരു കാര്യം കൃത്യമായി മനസ്സിലാക്കുക. മാലിന്യത്തിൽ നിന്ന് വൈദ്യുതി ഉണ്ടാക്കിക്കളയും എന്ന് പറയുന്ന ഈ പദ്ധതി നേരെ ചൊവ്വേ നടപ്പിലാക്കപ്പെട്ടിട്ടില്ലെങ്കിൽ, കൂട്ടിവെച്ചിരിക്കുന്ന ഈ മാലിന്യത്തിന് കൂടെ കോർപ്പറേഷൻ സമാധാനം പറയേണ്ടി വരും.

വാൽക്കഷണം:- സമ്പൂർണ്ണ സാക്ഷരരായ ഒരു ജനതയും അവരുടെ ഭരണാധികാരികളും, അവർ സ്വയം സൃഷ്ടിക്കുന്ന മാലിന്യത്തിന്റെ പേരിൽ കാട്ടിക്കൂട്ടുന്ന പേക്കൂത്തുകൾ അസഹനീയമാണ്.
——————————–
ഈയവസരത്തിൽ ഗ്യാസ് ചേമ്പറിൽ പെട്ട് കിടക്കുന്ന ഓരോ കൊച്ചിക്കാരനും കോർപ്പറേഷനോട് ചോദിക്കേണ്ട അര ഡസൻ ചോദ്യങ്ങളുണ്ട്.

ചോദ്യം 1:- എന്തായി ഇപ്പറയുന്ന 300 ടൺ മാലിന്യത്തിൽ നിന്ന് വൈദ്യുതി ഉൽപ്പാദിപ്പിക്കുന്ന പദ്ധതി?

ചോദ്യം 2:- എത്ര ടൺ മാലിന്യം ഇതിനകം അത്തരത്തിൽ ഉപയോഗിച്ചു?

ചോദ്യം 3:- ഏതാണ് മാലിന്യത്തിൽ നിന്ന് വൈദ്യുതി ഉൽപ്പാദിപ്പിക്കുന്ന ആ കമ്പനി?

ചോദ്യം 4:- എത്ര മെഗാവാട്ട് വൈദ്യുതി ഇതിനകം അത്തരത്തിൽ ഉൽപ്പാദിപ്പിച്ചു?

ചോദ്യം 5:- പഴയ കോർപ്പറേഷൻ ഭരണകൂടം ഈ പദ്ധതി ഉപേക്ഷിക്കുകയായിരുന്നോ അതോ പുതിയ ഭരണകൂടമാണോ ഉപേക്ഷിച്ചത് ?

ചോദ്യം 6:- പദ്ധതി ഉപേക്ഷിച്ചെങ്കിൽ, എന്തുകൊണ്ട് ഇത്രയും മാലിന്യം സംസ്ക്കരിച്ച് നീക്കിയില്ല?

ചോദ്യങ്ങൾ ബാക്കിയാകും. മാലിന്യം ഇനിയും കുമിഞ്ഞ് കൂടി കത്തുപിടിക്കും. സംസ്ഥാനത്ത് മാലിന്യസംസ്ക്കരണം ഫലപ്രദമായി നടത്തുമെന്നും അത് എപ്രകാരം നടത്തുമെന്നും കൃത്യമായി ജനങ്ങളെ ബോദ്ധ്യപ്പെടുത്തുന്നവരെ മാത്രമേ നിയമസഭയിലേക്ക് പറഞ്ഞയക്കൂ എന്ന് ശഠിക്കാൻ ആർജ്ജവമുള്ള സമ്മതിദായകർ ഉണ്ടാകണം ആദ്യം. അതവർ നിശ്ചിത സമയത്തിനുള്ളിൽ ചെയ്തില്ലെങ്കിൽ, പിടിച്ച് താഴെയിറക്കാനുള്ള സമരങ്ങൾ വോട്ട് ചെയ്ത അതേ പൊതുജനം നടത്തണം. അത്രേം സാധിച്ചാൽ എന്തെങ്കിലും മാറ്റമുണ്ടായെന്ന് വരും. അല്ലെങ്കിൽ…. അല്ലെങ്കിൽ കവി പാടിയത് പോലെ…. ‘ചത്തുചത്തു പിരിഞ്ഞിടാമിനി തമ്മിലൂതിയണച്ചിടാം‘.

ചിത്രങ്ങൾ തന്നെ കഥ പറയും. എന്നാലും രണ്ട് വാക്ക് പറയാതെ വയ്യ.

പാതയോരങ്ങളും കുന്നുകളും മലകളുമൊക്കെ ഇത്തരം കൂറ്റൻ കട്ടൗട്ടുകളും പരസ്യപ്പലകകളും കൊണ്ട് മലീമസമായിട്ട് കാലം ഏറെയായി. പുഴകളും നദികളുമൊക്കെ ചാക്കിൽ കെട്ടിയ മാലിന്യം തള്ളാനുള്ള ഇടങ്ങൾ തന്നെയായിട്ടാണ് പ്രബുദ്ധ കേരള ജനത ഉപയോഗിക്കുന്നതെങ്കിലും അൽപ്പം ദൂരെ മാറി നിന്ന് നോക്കിയാൽ ആ വൃത്തികേടും നാറ്റവുമൊന്നും അറിയില്ലായിരുന്നു.

ഇപ്പോൾ ദാ അവിടന്നും പോയി കാര്യങ്ങൾ. നദികളും പുഴകളും കായലുകളും പോലും, സ്വാഭാവികവും നൈസർഗ്ഗികവുമായ പ്രകൃതി സൗന്ദര്യം ഇനി നമുക്ക് നൽകില്ല.

അതിന് കാരണം തിരഞ്ഞെടുപ്പുകളാകാം, പത്താം ക്ലാസ്സ് പന്ത്രണ്ടാം ക്ലാസ്സ് പരീക്ഷാഫലങ്ങളാകാം, ലോകകപ്പ് ഫുട്ബോൾ ആകാം, ലോകകപ്പ് ക്രിക്കറ്റ് ആകാം, സിനിമകളാകാം, താരാരാധനയാകാം, നമ്മുടെ വന്യമായ ചിന്തകളിൽപ്പോലും ഇല്ലാത്ത മറ്റെന്തെങ്കിലും ഒരു കാരണമാകാം.

കാരണമെന്തായാലും ഇതിൽ നിന്നൊരു തിരിച്ചു പോക്ക് ഇനിയാരും പ്രതീക്ഷിക്കേണ്ടതില്ല.

മൂന്നാമത്തെ ചിത്രത്തിൽ, മുഖ്യമന്ത്രി പറയുന്നത്, അദ്ദേഹത്തിന്റെ ആരാധകർക്കും അണികൾക്കും നടപ്പിലാക്കാൻ കഴിഞ്ഞെങ്കിലെന്ന് വൃഥാ ആഗ്രഹിച്ച് പോകുന്നു. കുറഞ്ഞപക്ഷം അദ്ദേഹത്തിന്റെ ചിത്രമെങ്കിലും ഇത്തരം ഏർപ്പാടുകളിൽ നിന്ന് ഒഴിവാക്കിയിരുന്നെങ്കിൽ!

ആരെങ്കിലുമൊക്കെ കാണാൻ വരുമ്പോൾ, വലിയ വാചകക്കസർത്തുകൾ എഴുതിയ പ്ലക്കാർഡുകൾ പിടിച്ച് അവർക്കൊപ്പം നിന്ന് ഫോട്ടോ എടുക്കുന്നത് പോലെ എളുപ്പമുള്ള കാര്യമല്ല, സംസ്ഥാനത്ത് അതൊക്കെ നടപ്പിലാക്കുന്നതെന്ന കാര്യം മുഖ്യമന്ത്രിയും മനസ്സിലാക്കിയിരുന്നെങ്കിൽ എത്ര നന്നായിരുന്നു.

വാൽക്കഷണം:- വേറൊരു ഫുട്ബോൾ താരത്തിന്റെ കൂറ്റൻ കട്ടൗട്ടും നദിക്കരയിൽ ഉയർന്നിട്ടുണ്ട്. ഇനിയും ഉയരും പല തലകൾ. എല്ലാം തിരഞ്ഞ് പിടിച്ച് നിരത്തുന്നത് എൻ്റെ ജോലിയല്ല. കാര്യം മനസ്സിലാക്കാൻ ഇത് മതിയാകും.

മായം കലർന്ന വെളിച്ചെണ്ണയെപ്പറ്റി പല റിപ്പോർട്ടുകളും കാലങ്ങളായി കേൾക്കുന്നു. നിരോധിച്ച പല വെളിച്ചെണ്ണ ബ്രാൻഡുകളും സുലഭമായി ഇപ്പോഴും മാർക്കറ്റിലുണ്ട്.

ഇന്ന് മാതൃഭൂമി ചാനലിൽ കാണാനിടയായ റിപ്പോർട്ട് കൂടുതൽ ഞെട്ടിപ്പിക്കുന്നതായിരുന്നു. കൊപ്ര പുകയ്ക്കാൻ തമിഴ്നാട് വെളിച്ചെണ്ണ മാഫിയ ഉപയോഗിക്കുന്നത് സൾഫർ ആണ്. മാരകമായ രോഗങ്ങളിൽ നമ്മൾ ചെന്നവസാനിക്കുന്നതിൻ്റെ പ്രധാന കാരണങ്ങളിൽ ഒന്ന് നിത്യോപയോഗ സാധനമായ ഇത്തരം വെളിച്ചെണ്ണ ബ്രാൻഡുകൾ തന്നെയല്ലേ ?

തമിഴ്നാട്ടിൽ നിന്ന് പാക്കറ്റിലാക്കി വരുന്ന ഇത്തരം വെളിച്ചെണ്ണകൾക്ക് കേരളത്തിൽ കാര്യമായ പരിശോധനകളില്ല. ഇനി അഥവാ ഒരെണ്ണം നിരോധിച്ചാൽ, പേരുമാറ്റി അതേ കമ്പനിയിൽ നിന്ന് തന്നെ മറ്റൊരു ബ്രാൻഡ് ഇറങ്ങും.

ഇങ്ങനെ വെളിച്ചെണ്ണയിൽ മായം കലർത്തുന്നവർ അവൻ്റെ ആവശ്യത്തിനായി നല്ല വെളിച്ചെണ്ണ ഉണ്ടാക്കുന്നുണ്ടാകും. പക്ഷേ, അവൻ തീർച്ചയായും മറ്റൊരു മായത്തിൽ പെടും. ഇതൊക്കെ ചെയ്ത് കൊള്ളലാഭം ഉണ്ടാക്കുന്ന മനുഷ്യത്വം ഇല്ലാത്തവൻ, ഏതെങ്കിലും മായത്തിൻ്റെ പേരിലോ അല്ലാതെയോ രോഗങ്ങൾ ഉണ്ടായാൽ, പണം മുടക്കി നല്ല ചികിത്സ നേടും. പണമില്ലാത്തവനാണ് പെടുക.

ജീവൻ രക്ഷിക്കാൻ ഒരേയൊരു മാർഗ്ഗമേ നമുക്ക് മുന്നിലുള്ളൂ. ഗ്രാമങ്ങളിലും പഞ്ചായത്തുകളിലും ഇപ്പോഴുമുണ്ട് വെളിച്ചെണ്ണ ആട്ടിക്കൊടുക്കുന്ന മില്ലുകൾ. ചക്ക് ഉപയോഗിച്ച് ആട്ടുന്ന ഇടങ്ങളും ഉണ്ടാകാം. അൽപ്പം സമയവും പണവും കൂടുതൽ ചിലവഴിച്ചാൽ ഇത്തരം മില്ലുകളിൽ കൊപ്ര കൊടുത്ത് വെളിച്ചെണ്ണ ആട്ടിയെടുക്കുകയോ, അവർ വിശ്വസിക്കാൻ പോന്നവരാണെന്ന് ഉറപ്പുണ്ടെങ്കിൽ, അവിടെ നിന്ന് ആട്ടിയ വെളിച്ചെണ്ണ വാങ്ങുകയോ ചെയ്യണം. ആശുപത്രിയിൽ ചിലവഴിക്കുന്ന സമയവും പണവും ഇതിനേക്കാൾ കുറവ് തന്നെയായിരിക്കും.

മല്ലി മഞ്ഞൾ മുളക് എന്നിങ്ങനെ എല്ലാ സാധനങ്ങളും നമ്മൾ നോക്കി നിൽക്കേ പൊടിച്ച് കൊടുക്കുന്ന സ്ഥാപനങ്ങൾ ഇപ്പോൾ നിലവിലുണ്ട് നഗരങ്ങളിൽപ്പോലും. പഴയ പല സംവിധാനങ്ങളിലേക്കും തിരികെ പോകേണ്ടിയിരിക്കുന്നു സ്വയരക്ഷയ്ക്കായി. അത്തരം സംരംഭങ്ങളെ പ്രോത്സാഹിപ്പിക്കുക.

ആയതിനാൽ ഒരു തരത്തിലുള്ള മായം കലർത്തലുകൾക്കും കൂട്ട് നിൽക്കാതിരിക്കുക. അത്തരം ജോലികൾ ചെയ്യാതിരിക്കുക, അത് റിപ്പോർട്ട് ചെയ്യുക. നടക്കുന്ന കാര്യമല്ലെന്ന് അഭിപ്രായം ഉണ്ടാകാം. പക്ഷേ കുറഞ്ഞ പക്ഷം അവനവൻ ഉപയോഗിക്കുന്ന ഭക്ഷ്യവസ്തുക്കൾ മായം കലരാത്തതാണെന്ന് ഉറപ്പ് വരുത്തി വാങ്ങാനുള്ള നടപടികളെങ്കിലും സ്വീകരിച്ചില്ലെങ്കിൽ ഇനിയങ്ങോട്ട് ആരോഗ്യവും ജീവിതവും വലിയ ബാദ്ധ്യത തന്നെയായി മാറിയെന്നിരിക്കും.

നിരോധിച്ച വെളിച്ചെണ്ണ ബ്രാൻഡുകൾ താഴെ. ഈ ബ്രാൻഡുകൾ തന്നെ വിപണിയിൽ ഇപ്പോഴും ലഭിക്കുന്നുണ്ടാകാം. അല്ലെങ്കിൽ ഇതെല്ലാം മറ്റൊരു പേരിൽ വീണ്ടും വിൽക്കപ്പെടുന്നുണ്ടാകാം.

1. എസ്.ടി.എസ്.
2. കേര പ്രീമിയം ഗോൾഡ് കോക്കനട്ട് ഓയിൽ
3.എസ്.ടി.എസ്. കേര 3 ഇൻ 1
4. എസ്.ടി.എസ്. പരിമിത്രം
5. കേര ഗ്രൈസ് ഡബിൾ ഫിൽറ്റേർഡ് കോക്കനട്ട് ഓയിൽ
6. കെ.കെ.ഡി. പരിശുദ്ധം ശുദ്ധമായ വെളിച്ചെണ്ണ
7. ബ്രില്യന്റ് ഗ്രേഡ് ഒൺ അഗ്മാർക്ക് കോക്കനട്ട് ഓയിൽ
8. കെ.എസ്. കേര സുഗന്ധി പ്യൂർ കോക്കനട്ട് ഓയിൽ
9. കേര പ്രൗഡി കോക്കനട്ട് ഓയിൽ
10. കേര പ്രിയം കോക്കനട്ട് ഓയിൽ
11. ഗോൾഡൻ ഡ്രോപ്‌സ് കോക്കനട്ട് ഓയിൽ
12. കൈരളി ഡ്രോപ്‌സ് ലൈവ് ഹെൽത്തി ആന്റ് വൈസ് പ്യുർ കോക്കനട്ട് ഓയിൽ
13. കേരള കുക്ക് കോക്കനട്ട് ഓയിൽ
14. കേര ഹിര കോക്കനട്ട് ഓയിൽ
15. കേരളത്തിന്റെ സ്വന്തം വെളിച്ചെണ്ണ നാളികേര പ്യൂർ കോക്കനട്ട് ഓയിൽ
16. കേര സ്വാദിഷ് 100% പ്യൂർ & നാച്വറൽ കോക്കനട്ട് ഓയിൽ
17. കിച്ചൺ ടേസ്റ്റി കോക്കനട്ട് ഓയിൽ.
18. കേര സുലഭ കോക്കനട്ട് ഓയിൽ
19. കേര ഫാം കോക്കനട്ട് ഓയിൽ
20. കേര ഫ്‌ളോ കോക്കനട്ട് ഓയിൽ
21. കൽപ കേരളം കോക്കനട്ട് ഓയിൽ
22. കേരനാട്
23. കേര ശബരി
24. കോക്കോബാർ കോക്കനട്ട് ഓയിൽ
25. എൻഎംഎസ് കോക്കോബാർ
26. സിൽവർ ഫ്‌ളോ കോക്കനട്ട്
27. കേര സ്‌പൈസ് കോക്കനട്ട് ഓയിൽ
28. വി.എം.ടി. കോക്കനട്ട് ഓയിൽ
29. കേര ക്ലിയർ കോക്കനട്ട് ഓയിൽ
30. മലബാർ റിച്ച് കോക്കനട്ട് ഓയിൽ
31. എസ്.ജി.എസ്. കേര
32. എസ്.ജി.എസ്
33. കേര സൗഭാഗ്യ
34. കേര പ്രൗഡ് കോക്കനട്ട് ഓയിൽ
35. കേര ക്യൂൺ
36. കേര ഭാരത്
37. കേര ക്ലാസിക് അഗ്മാർക്ക്
38. എവർഗ്രീൻ കോക്കനട്ട് ഓയിൽ
39. കോക്കോ ഗ്രീൻ
40. കേര പ്രീതി
41. ന്യൂ എവർഗ്രീൻ കോക്കനട്ട് ഓയിൽ
42. കേര ശുദ്ധം
43. കൗള പ്യൂർ കോക്കനട്ട് ഓയിൽ
44. പരിമളം
45. ധനു ഓയിൽസ്
46. ധനു അഗ്മാർക്ക്
47. ഫ്രഷസ് പ്യൂർ
48. കേര നട്ട്‌സ്
49. കേര ഫ്രഷ് കോക്കനട്ട് ഓയിൽ
50. അമൃതശ്രീ
51. ആർ.എം.എസ്. സംസ്‌കൃതി
52. ബ്രിൽ കോക്കനട്ട് ഓയിൽ
53. കേരള ബീ & ബീ
54. കേര തൃപ്തി
55. കൺഫോമ്ഡ് ഗ്ലോബൽ ക്വാളിറ്റി കോകോ അസറ്റ്
56. കേര കിംഗ്
57. എബിസി ഗോൾഡ്
58. കെ.പി. പ്രീമിയം
59. ന്യൂ കേരള ഡ്രോപ്
60. കേര മലബാർ
61. ആവണി വെളിച്ചെണ്ണ
62. എസ്.എഫ്.പി. കോക്കനട്ട് ഓയിൽ
63. ഗോൾഡൻ ലൈവ് ഹെൽത്തി
64. എ.ഡി.എം. പ്രീമിയം
65. എസിറ്റി മലബാർ നാടൻ
66. കേര സമൃദ്ധി
67. കേര ഹെൽത്തി ഡബിൾ ഫിൽട്ടർ
68. ലൈഫ് കുറ്റിയാടി
69. ഫേമസ് കുറ്റിയാടി
70. ഗ്രീൻ മൗണ്ടൻ
71. കേരള സ്മാർട്ട്
72. കേര കിംഗ്
73. സുപ്രീംസ് സൂര്യ
74. സ്‌പെഷ്യൽ ഈസി കുക്ക്
75. കേര ലാന്റ്

75 ബ്രാൻഡുകൾ നിരോധിച്ചു എന്നാൽ, 75 നരാധമന്മാർ ഈ മാഫിയയുടെ ഭാഗമാണ് എന്നാണർത്ഥം.

കമൻ്റിൽ ഇട്ടിരിക്കുന്ന വാർത്താലിങ്കുകളിലൂടെ ഒന്നോടിച്ച് പോയാൽ വെളിച്ചെണ്ണ തന്നെ പിന്നീട് ഉപയോഗിച്ചെന്ന് വരില്ല.

വാൽക്കഷണം:- കേരവൃക്ഷങ്ങൾ കാരണം കേരളം എന്ന് പേരുള്ള ഒരു സംസ്ഥാനത്തുനിന്ന് വെളിച്ചെണ്ണ അയൽസംസ്ഥാനത്തേക്ക് പോയി, അവിടന്ന് മായം കലർത്തി വീണ്ടും കേരളത്തിലേക്ക് വരുന്ന അവസ്ഥയെ എന്ത് പേരിട്ട് വിശേഷിപ്പിക്കണമെന്ന് അറിയില്ല.

PC:- Malayalam News Daily

ദൈവത്തിൽ വിശ്വസിക്കുന്നവരുണ്ട്. വിശ്വാസിക്കാത്തവരും ഉണ്ട്. രണ്ടാമത് പറഞ്ഞ കൂട്ടത്തിലാണ് ഈയുള്ളവൻ.

ഈ രണ്ടുകൂട്ടർക്കും അവരവരുടെ ഭാഗങ്ങളും വാദങ്ങളും ചിന്തകളും കാഴ്ച്ചപ്പാടുകളും, ദേവാലയങ്ങളിലോ പൊതുവിടങ്ങളിലോ ആൾക്കൂട്ടം ഉള്ളയിടങ്ങളിലോ ഇല്ലാത്തയിടങ്ങളിലോ കമ്മ്യൂണിറ്റി ഹാളുകളിലോ സ്വകാര്യ ഇടങ്ങളിലോ, ഉച്ചഭാഷിണി വെച്ചോ വെക്കാതെയോ പ്രചരിപ്പിക്കാനും പ്രസംഗിക്കാനുമുള്ള സ്വാതന്ത്ര്യം ഈ രാജ്യത്തുണ്ട്.

ഒരു കൂട്ടർ അവരുടെ ഭാഗം പ്രചരിപ്പിക്കുമ്പോൾ കേട്ടിരിക്കണമെന്നുണ്ടെങ്കിൽ ഏതൊരാൾക്കും കേട്ടിരിക്കാം. താൽപ്പര്യമില്ലാത്തവർക്ക് ഒഴിഞ്ഞ് പോകുകയും ആവാം. അതിനുള്ള സ്വാതന്ത്ര്യവും ഇന്നാട്ടിലുണ്ട്. അങ്ങനെയങ്ങോട്ട് പോയാൽ ഒരു പ്രശ്നവുമില്ല ഹേ. അതിന് പകരം ഒറ്റയ്ക്കിരിക്കുന്ന ഒരാളിലേക്ക് കടന്നുകയറി സ്വന്തം വിശ്വാസമോ അവിശ്വാസമോ അടിച്ചേൽപ്പിക്കാനും ചെലുത്താനും നിൽക്കരുത്. സ്പർദ്ധ അവിടെത്തുടങ്ങുകയായി. വെറുതെ എന്തിനാണ് ചുമ്മാ ചൊറിഞ്ഞ് പുണ്ണാക്കി അതിൽ മുളകുപൊടി വിതറി രസിക്കുന്നത് ?

നാലര ബില്ല്യൺ വർഷങ്ങളായി ഇങ്ങനെ കറങ്ങിക്കൊണ്ടിരിക്കുന്ന ഭൂമിയിൽ മനുഷ്യനെന്ന ജന്തുവിന് കിട്ടിയിരിക്കുന്ന ശരാശരി ആയുസ്സ് എൺപതായോ നൂറായോ കണക്കിലാക്കിയാലും മനുഷ്യൻ അൽപ്പ ജീവിയാണ്. ഈ കുറഞ്ഞ നാളുകൾ ദൈവത്തിന്റെ പേര് പറഞ്ഞ് ഇടിച്ചുകയറി പരസ്പരം പോരടിക്കാതെ ജീവിച്ചു കൂടെ ? അതേപ്പറ്റിയുള്ള പ്രചരണങ്ങളും മറുപ്രചരണങ്ങളും ആയിക്കോളൂ. പക്ഷേ, സ്വകാര്യതയിലേക്ക് കടന്നു കയറി പ്രചരിപ്പിക്കാനോ ഉണ്ടാക്കാനോ വരരുത് എന്നാണ് ഉദ്ദേശിച്ചത്.

വിശ്വാസിയല്ലെങ്കിലും, സമയവും സൗകര്യവും പോലെ രണ്ട് കൂട്ടരുടേയും പ്രചാരണങ്ങളും വാദപ്രതിവാദങ്ങളും കേട്ടിരിക്കാറുണ്ട് ഞാൻ. വിശ്വാസിയല്ലെന്ന് ക്ലബ്ബ് ഹൗസ് പ്രൊഫൈലിൽ എഴുതി പ്രദർശിപ്പിച്ചിട്ടുമുണ്ട്. എന്നുവെച്ച്, അങ്ങനെയുള്ള ഒരാളെ മെസ്സേജ് ബോക്സിലൂടെ വന്ന് ഉദ്ധരിക്കേണ്ട കാര്യമൊന്നും ആർക്കുമില്ല. അങ്ങനെ ചെയ്താൽ അത് സ്വകാര്യതയിൽ ഇടിച്ച് കയറി നിങ്ങളുടെ ചിന്തകളും അഭിപ്രായങ്ങളും വിശ്വാസങ്ങളും ചെലുത്തുന്ന നടപടിയായി മാറുന്നു. അതനുവദിച്ച് തരുന്ന പ്രശ്നമില്ല. പ്രത്യേകിച്ച് ഏതെങ്കിലുമൊരു അപരിചിതന്.

അങ്ങനെയൊരു സംഭവം ഇന്നുണ്ടായി. അതാണ്  മുകളിലെ ചിത്രത്തിലുള്ളത്. അതിന് തക്ക മറുപടി (താഴെയുള്ള ചിത്രം നോക്കൂ) കൈയോടെ നൽകുകയും ചെയ്തു.

നാസ്തികനായ സനൽ ഇടമറുകിൻ്റെ ക്ലബ്ബ് ഹൗസ് പ്രഭാഷണങ്ങൾ സ്ഥിരമായി കേൾക്കുന്ന വരെ ടാർഗറ്റ് ചെയ്താണ് വിശ്വാസികളുടെ ഈ നീക്കമെന്ന് ഊഹിക്കുന്നതിൽ തെറ്റില്ലല്ലോ. അദ്ദേഹം പറഞ്ഞോട്ടെ. നിങ്ങൾക്ക് പറയാനുള്ളത് പരസ്യമായി നിങ്ങളും പറയുന്നുണ്ടല്ലോ.

അവസാനമായി അൽപ്പം കൂടെ വ്യക്തത തരാം. വിശ്വാസികളും അവിശ്വാസികളും അടക്കം പലതരക്കാരുള്ള സമൂഹത്തിലാണ് ജീവിക്കുന്നതെന്ന് നല്ല ബോദ്ധ്യമുണ്ട്. ഒരു കൂട്ടരെ മാറ്റി നിർത്തി മറ്റേ കൂട്ടർക്ക് മാത്രമായി നിലനിൽക്കാനാവില്ല. വിശ്വാസി ഓടിക്കുന്ന ബസ്സിൽ കയറില്ലെന്ന് അവിശ്വാസിയും, അവിശ്വാസിയുടെ മെഡിക്കൽ ഷോപ്പിൽ നിന്ന് മരുന്ന് വാങ്ങില്ലെന്ന് വിശ്വാസിയും തീരുമാനിച്ചാൽ സർവ്വതും അവതാളത്തിലാകുമെന്ന കാര്യത്തിൽ ഒരു സംശയവും വേണ്ട. ഇതൊക്കെ വിശ്വാസികളും അവിശ്വാസികളും ചെയ്യുന്നുണ്ട്. ആ ബസ്സുകൾ തിങ്ങിനിറഞ്ഞു തന്നെ ഓടുന്നുണ്ട്. അതിന്റെ പേരിൽ ഒരു മരുന്നു കടയും ഇന്നേവരെ പൂട്ടിപ്പോയിട്ടില്ല.

അവിശ്വാസിയാണെങ്കിലും ഒരു വിശ്വാസിക്കൊപ്പം അയാളുടെ ദേവാലയത്തിൽ പോകുന്നതിനോ വിശ്വാസപരമായ ചടങ്ങിന്റെ ഭാഗമാകുന്നതിനോ അതിൽ സഹകരിക്കുന്നതിനോ വ്യക്തിപരമായി യാതൊരു എതിർപ്പോ ബുദ്ധിമുട്ടോ എനിക്കില്ല. അത് ഞാനെന്ന സമൂഹജീവി വിശ്വാസികൾക്ക് തരുന്ന ബഹുമാനമാണ്, മാന്യതയാണ്. അങ്ങനെയൊന്ന് അതേ നാണയത്തിൽ തിരിച്ച് തന്നില്ലെങ്കിലും ഇടിച്ച് കയറി വിശ്വാസം അടിച്ചേൽപ്പിക്കുന്ന പരിപാടിയിൽ നിന്ന് ഒഴിവാകണം. അഭ്യർത്ഥനയാണ്. മനസ്സിലായിക്കാണുമെന്ന് കരുതുന്നു

വാൽക്കഷണം:- ലോകത്തിലെ സകല മനുഷ്യരും ദൈവത്തിൽ വിശ്വസിക്കുകയോ ഏതെങ്കിലും പ്രത്യേക മതത്തിന്റെ ദൈവത്തിൽ വിശ്വസിക്കുകയോ ചെയ്താൽ നാളെ മുതൽ, അല്ലെങ്കിൽ വേണ്ട, ഒരു വർഷത്തിനുള്ളിൽ ഈ ഭൂമിയിൽ കഷ്ടപ്പാടുകളും ദുരിതങ്ങളും പട്ടിണിയും കവർച്ചകളും കൊലപാതകങ്ങളും പീഡനങ്ങളുമെല്ലാം ഒഴിഞ്ഞ് ശാന്തിയും സമാധാനവും അഭിവൃദ്ധിയും പൂണ്ട് വിളയാടുമെന്ന് ഉറപ്പ് തരാമെങ്കിൽ, മറുത്തൊന്നും പറയാതെ, നിങ്ങൾ പറയുന്ന ദൈവത്തിൽ, പറയുന്ന മതത്തിന്റെ കീഴിൽ നിന്ന് വിശ്വാസമർപ്പിക്കാൻ ഞാൻ തയ്യാറാണ്.

തദ്ദേശ തിരഞ്ഞെടുപ്പിന്റെ ഒച്ചപ്പാടും ബഹളവും വീക്ഷിച്ചപ്പോൾ ശ്രദ്ധിക്കാനായ പ്രധാനം കാര്യം, തേഞ്ഞ് തേഞ്ഞ് ഇല്ലാതായ വികസനം എന്ന വാക്ക് തന്നെയാണ്.

‘ഇന്നാട്ടിൽ വികസനം ഒന്നും ഉണ്ടായിട്ടില്ല; അവർ ചെയ്യാത്ത വികസനം ഞങ്ങൾ ചെയ്യും; വികസനത്തുടർച്ചയുണ്ടാകാൻ ഞങ്ങളെ വിജയിപ്പിക്കൂ‘ എന്നിങ്ങനെ പോകുന്നു വികസനത്തെ വലിച്ചിഴച്ചുള്ള വോട്ട് പിടുത്തവും കസർത്തുകളും ?

അറിയാഞ്ഞിട്ട് ചോദിക്കുകയാണ്. പശ്ചിമഘട്ടത്തിനും അറബിക്കടലിനും ഇടയിൽ നിന്ന് എങ്ങോട്ടാണ് നിങ്ങളിനി ഈ സംസ്ഥാനത്തെ വികസിപ്പിക്കാൻ പോകുന്നത് ? വികസനമെന്നാൽ നിർമ്മിതികൾ മാത്രമാണ് നിങ്ങൾക്ക്. റോഡ്, കാന, പാലം, ബസ്സ് ഷെഡ്, പാവങ്ങൾക്ക് വീട്, സ്കൂൾ കെട്ടിടം എന്നിങ്ങനെ വിവിധതരം നിർമ്മിതികൾ മാത്രമല്ലേ നിങ്ങളുദ്ദേശിക്കുന്ന വികസനം ?

ഇപ്പറഞ്ഞ നിർമ്മിതികൾക്കെല്ലാം നിങ്ങൾ കമ്മീഷൻ അടിക്കുന്നില്ലേ ? ഏത് കോണ്ട്രാൿടറുടെ ബില്ലാണ് കമ്മീഷൻ വാങ്ങാതെ നിങ്ങൾ പാസ്സാക്കി കൊടുത്തിട്ടുള്ളത്. പാവങ്ങൾക്ക് വീടുണ്ടാക്കി കൊടുക്കുന്നതിൽ പോലും കോടികൾ കമ്മീഷനടിച്ച് അതിന്റെ പങ്കും പറ്റി ബാക്കിയുള്ള തുകയ്ക്ക് നിർമ്മിതി നടത്തിയതിന്റെ പേരിലല്ലേ ഇപ്പോൾ അന്വേഷണങ്ങൾ നടക്കുന്നത് ? പാലാരിവട്ടം പാലത്തിന്റെ കഥ ഇനിയും പറയിപ്പിക്കരുത്. വികസനമെന്ന് പറഞ്ഞ് നിങ്ങൾ പണിത ഏത് റോഡാണ് ഒരു കൊല്ലത്തിലധികം നിലനിന്നിട്ടുള്ളത്. നല്ലൊരു റോഡ് ഏതെങ്കിലും കേരളത്തിൽ ഉണ്ടെങ്കിൽ അതിന്റെ കോണ്ട്രാൿടർ ആത്മഹത്യ ചെയ്തിട്ടുമില്ലേ ?

സ്ക്കൂളുകളുണ്ടാക്കി എന്ന് കൊട്ടിഘോഷിക്കുന്നുണ്ട് കുറേ വികസനക്കാർ. കൈകൊണ്ട് അമർത്തുമ്പോൾ ആ സ്ക്കൂൾ കെട്ടിടങ്ങളുടെ ചുമർ അടർന്ന് വീഴുന്ന രംഗങ്ങൾ ഇഷ്ടം പോലെ പ്രചരിക്കുന്നുണ്ട് ഓൺലൈനിൽ. അതിനകത്തേക്ക് കുട്ടികളെ പഠിക്കാൻ വിടുന്ന മാതാപിതാക്കളുടെ ആർത്തലച്ചുള്ള കരച്ചിലിന്റെ രംഗങ്ങളാകും അധികം വൈകാതെ കാണേണ്ടി വരുക. അങ്ങനെ സംഭവിക്കാതിരിക്കണമെങ്കിൽ ആ കെട്ടിടങ്ങലെല്ലാം ബഹു: ഈ. ശ്രീധരനെപ്പോലെ ആരെങ്കിലും പരിശോധിച്ച് ഉപയോഗ യോഗ്യമാണെന്ന് ഉറപ്പ് വരുത്തേണ്ടിയിരിക്കുന്നു.

ഇതൊക്കെയല്ലേ നിങ്ങൾ പറയുന്ന വികസനം ? നിങ്ങളുടെ സ്വന്തം പോക്കറ്റ് വികസനവും പാർട്ടിഫണ്ട് വികസനവുമാണ് യഥാർത്ഥത്തിൽ നടക്കുന്നതെന്ന് ആർക്കാണ് അറിയാത്തത്.

കുറ്റം സമ്മതിദായകരുടെ പക്ഷത്തും ഉണ്ട്. വികസനമെന്ന് പറഞ്ഞ് വോട്ട് പിടിക്കാൻ വരുന്നവരോട് ഏതെങ്കിലും സമ്മതിദായകൻ ഇതുവരെ ചോദിച്ചിട്ടുണ്ടോ, വികസിച്ച് വികസിച്ച് പൊട്ടാറായി നിൽക്കുന്ന ഇന്നാട്ടിലെ മാലിന്യസംസ്ക്കരണത്തിന്റെ കാര്യത്തിൽ നിങ്ങളെന്ത് നിലപാടാണ് സ്വീകരിക്കുകയെന്ന്. അങ്ങനെ മാലിന്യനിർമ്മാജ്ജനത്തെക്കുറിച്ച് സംസാരിക്കുന്ന, മാലിന്യസംസ്ക്കരണത്തിന് നടപടി ഉറപ്പ് തരുന്ന ഏതെങ്കിലും സ്ഥാനാർത്ഥിയെ നിങ്ങളിതുവരെ ടീവിയിലോ പത്രത്തിലോ കണ്ടോ ? കണ്ടെങ്കിൽ എനിക്ക് കൂടെ കാണിച്ച് തരൂ. ഞാനെങ്ങും അങ്ങനെ ഒരു സ്ഥാനാർത്ഥിയേയോ പാർട്ടിയേയോ കണ്ടില്ല.

ജയിച്ചാൽ, സ്വന്തം വാർഡിലെ മാലിന്യസംസ്ക്കരണ വിഷയം പരിഹരിക്കാൻ ആകുന്നില്ലെങ്കിൽ മാലിന്യം മുഴുവൻ അവരുടെ വീട്ടുപടിക്കൽ കൊണ്ടിട്ടോളൂ എന്ന് സമ്മതിച്ച് വരുന്ന സ്ഥാനാർത്ഥിക്കുള്ളതാണ് നിങ്ങളുടെ വോട്ട്, എന്ന് നേരിട്ടും സോഷ്യൽ മീഡിയ വഴിയും പറയാനും പ്രവർത്തിക്കാനും സമ്മതിദായകർ തയ്യാറാണോ?

പ്രശ്നങ്ങൾ അവതരിപ്പിച്ചപ്പോൾ റോഡിനും പാലത്തിനും വീടിനും ചോർന്നൊലിക്കുന്ന കൂരയ്ക്കും പുറമേ മാലിന്യവിഷയം കൂടെ അവതരിപ്പിച്ചിട്ടില്ലെങ്കിൽ കുറ്റം സമ്മതിദായകന്റേത് തന്നെയാണ്. അങ്ങനെയാണ് നിങ്ങളർഹിക്കുന്ന ഭരണകർത്താക്കളെ നിങ്ങൾക്ക് കിട്ടുന്നത്, അഥവാ നിങ്ങൾ തിരഞ്ഞെടുക്കുന്നത്.

വികസനം എന്ന് പറഞ്ഞാൽ കുറേ നിർമ്മിതികൾ മാത്രമല്ല. ആ നിർമ്മിതികളിൽ ജീവിക്കുകയും പെരുമാറുകയും ചെയ്യുന്ന മനുഷ്യന്മാർ അവിടെ സൃഷ്ടിക്കുന്ന മാലിന്യം, പ്രകൃതിയ്ക്കും സ്വയം അതേ മനുഷ്യർക്കും ശല്യമാകാൻ ഇടവരുത്താതെ സംസ്ക്കരിക്കുന്നതും വികസനമാണ്.

വാൽക്കഷണം:- മാലിന്യക്കൂമ്പാരങ്ങൾ നന്നായി വികസിച്ചിട്ടുണ്ട്. അത് പറയാതിരിക്കാൻ വയ്യ.

നടൻ കൃഷ്ണകുമാറിനോട് ഒരു ആർത്തവ കാര്യം പറയാനാഗ്രഹിക്കുന്നു.

താങ്കൾക്ക് ആരെ വേണമെങ്കിലും ആരാധിക്കാം, പ്രകീർത്തിക്കാം, ന്യായീകരിക്കാം, പൂവിട്ട് പൂജിക്കാം. അതിനുള്ള സ്വാതന്ത്ര്യം ഈ രാജ്യം തരുന്നുണ്ട്.

പക്ഷേ, നിർദ്ധനരായ സ്ത്രീകൾക്ക് 1 രൂപയ്ക്ക് സാനിറ്ററി നാപ്‌കിൻ നൽകുമെന്നുള്ള പ്രധാനമന്ത്രിയുടെ വാഗ്‌ദാനം വലിയ സംഭവമാണെന്നും ഓരോ ചെറിയ കാര്യത്തിലും ശ്രദ്ധ ചെലുത്തുന്ന ആളാണ് അദ്ദേഹം എന്നൊക്കെ തട്ടിവിടുമ്പോൾ, അദ്ദേഹത്തെപ്പോലെ തന്നെ താങ്കൾക്കും, ഏറ്റവും കുറഞ്ഞപക്ഷം മാലിന്യവിഷയത്തിൽ ഇന്ത്യയുടെ പോക്ക് എങ്ങോട്ടാണെന്ന് യാതൊരു പിടിയുമില്ല എന്ന് മനസ്സിലാക്കേണ്ടിയിരിക്കുന്നു.

സാനിറ്ററി നാപ്ക്കിനുകൾ സൃഷ്ടിക്കുന്ന മാലിന്യ സംസ്ക്കരണപ്രശ്നത്തെപ്പറ്റി ഒരു സ്ത്രീസമൂഹത്തിൽ, (താങ്കളുടെ തന്നെ വാക്കുകൾ) ജീവിക്കുന്ന താങ്കൾക്ക് അറിയില്ലെന്നത് പരിതാപകരമായ അവസ്ഥയാണ്.

അത്തരത്തിലുള്ള മാലിന്യപ്രശ്നങ്ങളും ഉപയോഗിക്കാനുള്ള സൗകര്യവുമെല്ലാം കണക്കിലെടുത്ത്, പറയുന്ന പണം കൊടുത്ത് സാനിറ്ററി നാപ്‌കിൻ വാങ്ങാൻ കഴിവുള്ള സ്ത്രീകൾ പോലും ‘മെനസ്‌ട്രൽ കപ്പ് ‘ എന്ന മാർഗ്ഗത്തിലേക്ക് തിരിഞ്ഞുകൊണ്ടിരിക്കുകയാണ്. ഉപയോഗിക്കാനുള്ള സൗകര്യം, പാർശ്വഫലങ്ങൾ ഇല്ല, ഒരുപാട് തവണ കഴുകി ഉപയോഗിക്കാം, ആയതിനാൽ മാലിന്യപ്രശ്നം ഒഴിവാകുന്നു, എന്നീ ഗുണങ്ങളാണ് സാനിറ്ററി പാഡുകളെ അപേക്ഷിച്ച് മെനസ്‌ട്രൽ കപ്പുകൾക്കുള്ളത്.

ഇന്ത്യപോലുള്ള ഒരു രാജ്യം മാലിന്യപ്രശ്നം കൊണ്ട് എത്രയാണ് ബുദ്ധിമുട്ടുന്നതെന്ന് വല്ല ധാരണയുമുണ്ടോ താങ്കൾക്ക്? എല്ലാക്കാര്യത്തിലും ശ്രദ്ധചെലുത്തുന്ന താങ്കളുടെ ആരാധ്യപുരുഷന് അതേപ്പറ്റി എത്ര ബോധമുണ്ടെന്ന് വല്ല പിടിപാടുമുണ്ടോ ?

മെനസ്‌ട്രൽ കപ്പുകളെപ്പറ്റി നിങ്ങൾ രണ്ട് പേരും കേട്ടിട്ട് പോലും ഉണ്ടാകില്ല എന്നാണ് മനസ്സിലാക്കേണ്ടത്. പ്രധാനമന്ത്രി ഭാര്യയ്ക്കൊപ്പം കഴിയുന്ന ആളല്ല. അദ്ദേഹത്തിന് പെൺ‌മക്കളുമില്ല. അതുകൊണ്ടുതന്നെ അദ്ദേഹത്തിന് അതേപ്പറ്റി കുടുംബത്തിൽ നിന്ന് പോലും സാമാന്യജ്ഞാനം ഉണ്ടാകണമെന്നില്ല. അങ്ങനെയല്ലല്ലോ താങ്കളുടെ അവസ്ഥ. 5 സ്ത്രീജനങ്ങൾ താങ്കളുടെ വീട്ടിൽ ഇല്ലേ ? അപ്പോൾ താങ്കളതേപ്പറ്റി മനസ്സിലാക്കിയിട്ടില്ലെങ്കിൽ അത് സാമാന്യവിജ്ഞാനത്തിന്റേയും പൊതുബോധത്തിന്റേയും കുറവാണ്.

ഒരു രൂപയ്ക്ക് സാനിറ്ററി പാഡുകൾ നൽകാൻ തുടങ്ങുമ്പോൾ, പണമില്ലാത്തതുകൊണ്ട് ഇക്കാലമത്രയും അത് ഉപയോഗിക്കാതിരുന്ന സ്ത്രീകൾ കൂടെ അതിലേക്ക് കടക്കുമ്പോൾ, എത്രയധികം മാലിന്യമാണ് ഭൂമുഖത്തേക്ക് കൂടുതലായി എത്തുന്നതെന്ന് ചിന്തിക്കുക. അവിടെയാണ് പ്രധാനമന്ത്രിക്കും ഇക്കാര്യം എടുത്ത് പറഞ്ഞ് അദ്ദേഹത്തെ വാഴ്‌ത്തുന്ന താങ്കൾക്കും തെറ്റിയിരിക്കുന്നത്.

ആയതിനാൽ ഇനിയെങ്കിലും മേൽപ്പറഞ്ഞ മെനസ്റ്റ്രൽ കപ്പിനെപ്പറ്റി മനസ്സിലാക്കാൻ ശ്രമിക്കുക. അത് പ്രചരിപ്പിക്കാൻ ശ്രമിക്കുക. നാട്ടിലെ മാലിന്യ പ്രശ്നങ്ങൾ ഒരു ശതമാനമെങ്കിലും കുറഞ്ഞെന്ന് വരും. അതല്ല അഭിനയരംഗത്തുനിന്ന് കക്ഷിരാഷ്ട്രീയത്തിലേക്ക് കടക്കാനുള്ള ശ്രമത്തിന്റെ ഭാഗമായാണ് കണ്ണടച്ചുള്ള ഇത്തരം വാഴ്ത്തലുകളെങ്കിൽ, ആയിക്കോളൂ; ഞാൻ പറഞ്ഞത് മൊത്തമായി തിരിച്ചെടുത്തിരിക്കുന്നു.

മാലിന്യത്തിന്റെ വിഷയം വരുമ്പോൾ ഇടപെടാറുണ്ട്, സംസാരിക്കാറുണ്ട്, അഭിലഷണീയമായ കാഴ്ച്ചപ്പാടുകൾ പങ്കുവെക്കാറുണ്ട്. അതുകൊണ്ട് മാത്രമാണ് ഈ കുറിപ്പ്. താങ്കളെപ്പോലുള്ള ഒരു സെലിബ്രിറ്റിയെങ്കിലും തിരുത്തപ്പെട്ടാൽ ഒരുപാട് സാധാരണക്കാരെ തിരുത്തുന്നതിന് തുല്യമാണ്. സെലിബ്രിറ്റികൾ പറയുന്നത് വെള്ളം തൊടാതെ വിഴുങ്ങുന്നവരുണ്ടെന്നത് തന്നെ കാരണം.

വാൽക്കഷണം:- താങ്കളുടെ പെൺ‌മക്കൾക്ക് നേരെ സൈബർ ആക്രമണം ഉണ്ടായിട്ടുണെന്ന് അറിയാം. പക്ഷേ, വള്ളിപുള്ളി വിടാതെ അതേപ്പറ്റി അറിയില്ല. ഞാൻ അത്തരം ആക്രമണങ്ങളുടെ ഭാഗമല്ല, അതിനോട് യോജിക്കുന്ന ആളുമല്ല. ആ അക്രമികൾക്ക് താങ്കളുടെ മകളും നടിയുമായ അഹാന കൃഷ്ണകുമാർ നൽകിയ മറുപടി വീഡിയോയ്ക്ക് ഞാൻ കൈയടിച്ചിട്ടുമുണ്ട്. ആയതിനാൽ ഞാനിത്രയും പറഞ്ഞതിനെ മേൽപ്പടി സൈബർ ആക്രമണങ്ങളുമായി കൂട്ടിക്കെട്ടാൻ ശ്രമിക്കരുതെന്ന് ഒരപേക്ഷയുണ്ട്.

ഒരൊറ്റ മഴയിൽ എറണാകുളം മുങ്ങിപ്പൊങ്ങിയത് എല്ലാവരും കണ്ടില്ലേ ? കോർപ്പറേഷനും ജില്ലാ ഭരണകൂടവും പരസ്പരം പഴിചാരിയത് എല്ലാവരും കേട്ടല്ലോ ? കുറ്റം മുഴുവൻ മുല്ലശ്ശേരി കനാലിന്റെ മേൽ കെട്ടിവെച്ചത് എല്ലാവരും അറിഞ്ഞല്ലോ ? നാല് പതിറ്റാണ്ടായി എല്ലാ മഴയത്തും വീടിനകത്ത് കക്കൂസ് മാലിന്യവും അറവ് മാലിന്യവും അടക്കമുള്ള മലിനജലം കയറുന്ന കോളനിക്കാരുടെ ദുരിതവും നെഞ്ച് പൊട്ടിയുള്ള പരാതികളും കണ്ടല്ലോ ?

ഇനി ഈ വീഡിയോ കണ്ണ് തുറന്ന് കാണുക. പാലാരിവട്ടത്തെ ഓടകളുടെ സ്ലാബ് മാറ്റി ആയിരക്കണക്കിന് പ്ലാസ്റ്റിക്ക് കുപ്പികൾ പുറത്തെടുക്കുന്ന ദൃശ്യമാണതിലുള്ളത്. ലിങ്ക് ഇവിടെ. ഇത് കണ്ടതിന് ശേഷം എല്ലാവരും സ്വയം ചോദിക്കേണ്ടതും പരസ്പരം ചോദിക്കേണ്ടതുമായ ചില ചോദ്യങ്ങളുണ്ട്.

ചോദ്യം 1:- ഒരു പ്ലാസ്റ്റിക് കാലിക്കുപ്പി ഒരിക്കലെങ്കിലും റോഡിലോ ഓവുചാലിലോ പുഴയിലോ കടലിലോ എറിഞ്ഞു കളയാത്തവർ ആരെങ്കിലും വെള്ളക്കെട്ട് അനുഭവിക്കുന്നവരുടെ കൂട്ടത്തിലുണ്ടെന്ന് നെഞ്ചിൽ കൈ വെച്ച് പറയാനാകുമോ ?

ചോദ്യം 2:- ഇപ്പറഞ്ഞ ഒഴിഞ്ഞ പ്ലാസ്റ്റിക്ക് കാലിക്കുപ്പി പൊതുസ്ഥലത്ത് കൃത്യമായി ഉപേക്ഷിക്കാനുള്ള എന്തെങ്കിലും സംവിധാനം, കുറഞ്ഞത് എല്ലാ ഒരു കിലോമീറ്ററിനുള്ളിൽ എവിടെയെങ്കിലും എറണാകുളം നഗരത്തിൽ കോർപ്പറേഷൻ വക ഉണ്ടോ ? നിറയുമ്പോൾ കൃത്യമായി നീക്കം ചെയ്ത് റീസൈക്കിളിങ്ങിലേക്ക് മുതൽക്കൂട്ടാകുന്ന ഒരു കുപ്പത്തൊട്ടിയാണ് ഉദ്ദേശിച്ചത്.

ചോദ്യം 3:- എങ്ങനെയാണ് ജൈവമാലിന്യവും റീസൈക്കിൾ മാലിന്യവും വേർതിരിച്ച് സംസ്കരിക്കേണ്ടതെന്ന് ചെറിയ കുട്ടികൾ മുതൽ മുകളിലേക്കും, മുൻപ് അത് പഠിച്ചിട്ടില്ലാത്ത സമ്പൂർണ്ണ സാക്ഷരർക്കും മറ്റ് പൊതുജനങ്ങൾക്കും വകതിരിവുണ്ടാക്കുന്ന എന്തെങ്കിലും പാഠ്യപദ്ധതിയോ ബോധവൽക്കരണ പദ്ധതിയോ സംസ്ക്കാരമോ നമുക്കുണ്ടോ ?

ചോദ്യം 4:- കേരളത്തിൽ എല്ലാ ജില്ലകളിലും കൃത്യമായ മാലിന്യസംസ്ക്കരണ പദ്ധതികൾ എന്തെങ്കിലുമുണ്ടോ ?

ഈ നാല് ചോദ്യങ്ങൾക്കും ‘ഇല്ല’ എന്ന് തന്നെയാകും ഉത്തരം. അങ്ങനെയാകുമ്പോൾ പ്രതിസ്ഥാനത്ത് വരുന്നത് 3 കൂട്ടരാണ്.

1.വെള്ളക്കെട്ട് അനുഭവിക്കുന്ന പൊതുജനമെന്ന കഴുത. ഈ മാലിന്യമെല്ലാം ഓടകളിലേക്ക് തള്ളുന്നത് അവർ തന്നെയാണല്ലോ.

2.ആ കഴുതകൾ, അവരാൽ അവർക്ക് വേണ്ടി, കീ ജെയ് വിളിച്ച് വരി നിന്ന് തിരഞ്ഞെടുത്ത് അധികാരത്തിൽ ഏറ്റിയിരിക്കുന്ന കക്ഷിരാഷ്ട്രീയ പുംഗവർ.

3.ഒരു സർക്കാർ ജോലി കിട്ടിയാൽ ജീവിതം ഭദ്രമായെന്ന് കരുതുന്നതിനപ്പുറം, ശമ്പളം വാങ്ങുന്ന ജോലിയോട് യാതൊരു ആത്മാർത്ഥതയും ഇല്ലാത്ത പാഴ് ജന്മങ്ങളായ ഉദ്യോഗസ്ഥർ.

ഇനി എന്നും പറയാറുള്ള നിദ്ദേശങ്ങൾ ആവർത്തിക്കാം.

നിർദ്ദേശം 1:- പാഠ്യപദ്ധതിയിൽ മാലിന്യസംസ്കരണം മാത്രം (പ്രാക്ടിക്കൽ അടക്കം) ഒരു വിഷയമായി ചേർക്കുക. പൊതുസ്ഥലങ്ങളിൽ നിന്ന് മാലിന്യം പെറുപ്പിക്കുന്നത് തന്നെയാണ് പ്രാക്ടിക്കൽ. സ്വന്തം കുട്ടി റോഡിലെ മാലിന്യം പെറുക്കുന്നത് കാണുമ്പോളെങ്കിലും രക്ഷകർത്താക്കൾ പൊതുസ്ഥലത്ത് മാലിന്യമെറിയുന്നത് നിർത്തിക്കോളും.

നിർദ്ദേശം 2:- പൊതുസ്ഥലങ്ങളിൽ ആവശ്യത്തിന് കുപ്പത്തൊട്ടികൾ സ്ഥാപിക്കുകയും അതിലെ മാലിന്യം കൃത്യമായി നീക്കുകയും സംസ്ക്കരിക്കുകയും ചെയ്യുക.

നിർദ്ദേശം 3:- കുപ്പത്തൊട്ടികളിൽ അല്ലാതെ മറ്റെവിടെയെങ്കിലും മാലിന്യം എറിയുന്നവരെ കണ്ടെത്തി കനത്ത പിഴയും തടവും നൽകുക.

നിർദ്ദേശം 4:- ഭരണത്തിലേറി ഒരു വർഷത്തിനകം കേരളത്തിലെ മാലിന്യ പ്രശ്നങ്ങൾ മൊത്തം പരിഹരിക്കുമെന്ന് പറഞ്ഞ നേതാക്കന്മാരെ കണ്ടെത്തി, ഇനിയൊരു കാലത്തും അതുപോലുള്ളവർ തിരഞ്ഞെടുക്കപ്പെടില്ലെന്ന് ഉറപ്പുവരുത്തുക.

നിർദ്ദേശം 5:- എന്റെ മാലിന്യം എന്റെ ഉത്തരവാദിത്വമാണെന്നും നല്ല രീതിയിൽ അത് സംസ്കരിക്കപ്പെടേണ്ടതുണ്ട് എന്ന ബോധം വെള്ളക്കെട്ട് അനുഭവിക്കുന്നവനും അനുഭവിക്കാത്തവനും സ്വയം ഉണ്ടാക്കുക. അതിനനുസരിച്ച് പ്രവർത്തിക്കുക.

ഇതൊന്നും പറ്റില്ലല്ലേ ? എങ്കിൽപ്പിന്നെ ഭേഷായിട്ട് അനുഭവിച്ചു കൊള്ളുക.

വാൽക്കഷണം:- മാലിന്യത്തിൽ നിന്നും ഊർജ്ജം ഉൽപാദിപ്പിച്ച് ഊർജ്ജ പ്രതിസന്ധിയടക്കം പരിഹരിച്ച് കളയുമെന്ന് സർക്കാർ വീമ്പിളക്കിയിരുന്നല്ലോ ? ഇപ്പോൾ അതേപ്പറ്റി ഒന്നും കേൾക്കാനേയില്ല. വല്ലതും നടക്കുമോ ? അതോ അടുത്ത ഇലക്ഷൻ വാഗ്ദാനങ്ങളിൽ വീണ്ടും ഇതുതന്നെ കേൾക്കേണ്ടി വരുമോ ?
—————————————-
വീഡിയോയ്ക്ക് കടപ്പാട്:- ഇത് എടുത്തിരിക്കുന്ന, ഇതിൽക്കാണുന്ന, പേര് പറയാത്ത സഹോദരനോട്.

കൈക്കൂലി വാങ്ങി ഏത് നിയമവും മറികടക്കാനുള്ള മാർഗ്ഗമുണ്ടാക്കിക്കൊടുക്കുന്ന സർക്കാർ ഉദ്യോഗസ്ഥരും ആ വഴിക്ക് നീങ്ങുന്ന കെട്ടിട നിർമ്മാതാക്കളും ഇവർക്കെല്ലാം സകല സഹായങ്ങളും ചെയ്തുകൊടുത്ത് കൂടെ നിൽക്കുന്ന കക്ഷിരാഷ്ട്രീയക്കാരുമാണ് എറ്റവും വലിയ പരിസ്ഥിതി ഭീഷണികൾ. അങ്ങനെയുണ്ടാക്കപ്പെടുന്ന കെട്ടിടം പൊളിച്ച് നീക്കുമ്പോൾ പുതിയ പല പരിസ്ഥിതി പ്രശ്നങ്ങൾ ഉയർന്ന് വരുന്നു.

1. കെട്ടിടം പൊളിക്കുമ്പോൾ ഭൂമിക്കുണ്ടാകുന്ന ദുരിതങ്ങൾ. പ്രത്യേകിച്ചും പുതിയ ഒരു കെട്ടിടം പൊളിക്കുമ്പോൾ.

2. കെട്ടിടം നിർമ്മിക്കുമ്പോൾ, പരിസരവാസികൾ തിന്നതും ശ്വസിച്ചതുമായ പൊടിയും കുലുക്കവും ദുരിതവും പൊളിക്കുമ്പോളും അനുഭവിക്കേണ്ടി വരും.

3. മരട് ഫ്ലാറ്റുകൾ പൊളിച്ചുണ്ടാകുന്ന അവശിഷ്ടങ്ങൾ അവിടെത്തന്നെ കിടക്കുമെന്നല്ലാതെ പൊളിക്കുന്നവരോ പൊളിക്കാൻ ഉത്തരവിറക്കിയ കോടതിയോ മരട് മുൻസിപ്പാലിറ്റിയോ തൂത്തുവാരി കൊണ്ടുപോകില്ല.

4. ടൺ കണക്കിന് പ്രകൃതി വിഭവങ്ങളാണ് പാഴാക്കപ്പെടുന്നത്.

(കൂടുതൽ ഉണ്ടെങ്കിൽ ആർക്കും പൂരിപ്പിക്കാം)

രണ്ട് കോടി രൂപയോ മറ്റോ ഫൈനടിച്ച് (ആ ഫൈൻ കുറവ് തന്നെ) ചിലവന്നൂർ DLF ഫ്ലാറ്റ് കേസ് അവസാനിപ്പിച്ച കോടതിക്ക് (അത് വേറെ കോടതിയാണ്. എന്നാലും) ഇവിടെയെന്തുകൊണ്ട് അതേ നിലപാട് സ്വീകരിക്കാനാവുന്നില്ല.

ഇനിയിങ്ങനെ ഒരു ഫ്ലാറ്റുണ്ടാക്കാൻ ഏതൊരു ബിൽഡറും ഒന്ന് മടിച്ചേക്കാം. ഏഴെഴുപത് വട്ടം ചിന്തിച്ചും പഠിച്ചുമല്ലാതെ ഇത്തരമിടങ്ങളിൽ ആരും ഫ്ലാറ്റ് വാങ്ങില്ല എന്നൊക്കെ ചില ഗുണങ്ങളുണ്ടായേക്കാമെങ്കിലും അതിന് കുറേ ഫ്ലാറ്റുടമകൾ കൊടുക്കേണ്ടി വന്നേക്കാവുന്ന വില താങ്ങാവുന്നതിലുമധികം തന്നെയാണ്.

പറഞ്ഞുവന്നത് പരിസ്ഥിതി വിഷയമാണല്ലോ. അതിലേക്ക് മടങ്ങിവരാം. ഉദ്യോഗസ്ഥരുടേയും രാഷ്ട്രീയക്കാരുടേയും കൂട്ടുപിടിച്ച് നിയമലംഘനങ്ങൾ ഇനിയും നടന്നുകൊണ്ടിരിക്കും. ഒന്നുകിൽ മേൽപ്പറഞ്ഞ വരെ നിലക്ക് നിർത്താനുള്ള നടപടികൾ കോടതിയുടെ ഭാഗത്തുനിന്ന് ഉണ്ടാകണം. അല്ലെങ്കിൽ അത്തരം മാഫിയകൾ പടച്ചുണ്ടാക്കുന്ന ഇതുപോലുള്ള അനധികൃത കെട്ടിടങ്ങൾ സർക്കാരിലേക്ക് കണ്ടുകെട്ടി സർക്കാരിന്റെ ആവശ്യങ്ങൾക്കായി ഉപയോഗിക്കുക. പൊളിച്ചുകളയുമ്പോൾ ഉണ്ടാകുന്ന പരിസ്ഥിതി പ്രശ്നങ്ങൾ മറികടക്കാൻ അതേ മാർഗ്ഗമുള്ളൂ.