സെപ്റ്റംബർ മാസം 25ന് അരുണേഷിന്റെ ഒരു മെയിൽ വന്നു. ഓൺലൈനിലൂടെ പരിചയപ്പെടുകയും പിന്നീട് ഓഫ്‌ലൈൻ ആകുകയും ചെയ്ത സുഹൃത്താണ് അരുണേഷ്.

അരുണേഷിനൊപ്പം

*********************************
“ ഹായ് മനോജേട്ടന്‍….

എങ്ങനെ പോകുന്നു ജീവിതവും ജീവിതാന്വേഷണങ്ങളും? വെർച്ച്വൽ & ഓണ്‍ലൈന്‍ ജീവിതം നന്നായി പോകുന്നു എന്ന് പോര്‍ട്ടലില്‍ നിന്നും മനസ്സിലാക്കുന്നു. സന്തോഷം. ജൂത ജീവിതാന്വേഷണങ്ങള്‍, ഗ്രീന്‍വെയിന്‍ പ്രവര്‍ത്തനങ്ങള്‍, ശങ്കുണ്ണിയേട്ടന്‍ സീരീസ് വിപുലീകരണം എന്നിവയൊക്കെ ഭംഗിയായി മുന്നേറുന്നു എന്നുതന്നെ കരുതുന്നു. ഇനി കത്തിന്റെ ഉദ്ദേശ്യത്തിലേക്ക്….

കൂടെയുള്ള ചിത്രത്തിലെ കല്ലറ തിരിച്ചറിയാന്‍ കഴിയുമോ? ഉത്തരം കൃത്യമാണെങ്കില്‍ ‘കല്ലറകളുടെ തോഴന്‍’ എന്ന പേര് ചാര്‍ത്തി നല്‍കുന്നതായിരിക്കും.

സസ്നേഹം
- അരുണേഷ്

കല്ലറയുടെ ചിത്രങ്ങൾ

********************************

ഞാനൊരു ശ്മശാനം നിരങ്ങിയാണെന്ന് അരുണേഷ് എങ്ങനെയോ ഗ്രഹിച്ചിരിക്കുന്നു. ചത്തുപോയവർ ഉപദ്രവം ഒന്നും ഉണ്ടാക്കില്ലെന്ന് മാത്രമല്ല അൽ‌പ്പം മനഃസമാധാനവും തരും എന്നതുകൊണ്ടാണ് ശ്മശാനങ്ങളോട് കൂടുതൽ അടുപ്പം. എന്തായാലും ‘കല്ലറ നിരങ്ങി‘ എന്ന പദവി കിട്ടിയാൽ അതുവെച്ച് ഒന്ന് വിലസാമല്ലോ ? ഒരു കൈ ശ്രമിക്കാൻ തന്നെ തീരുമാനിച്ച് തലച്ചോറും ചകിരിച്ചോറും വലിച്ച് വെളിയിലിട്ട് ചികഞ്ഞു തുടങ്ങി.

കണ്ടിട്ടുള്ളതും ഒരുപാട് നേരം ചാരി ഇരുന്നിട്ടുള്ളതുമായ കല്ലറയൊന്നുമല്ല ഇത്. ജൂതന്മാരുടെ കല്ലറകളിൽ കുരിശ് കാണില്ല. പകരം നക്ഷത്രമായിരിക്കും.  ചരിത്രപ്രാധാന്യമുള്ള ഏതെങ്കിലും കല്ലറയെപ്പറ്റിയാകാം അരുണേഷ് ചോദിക്കുന്നത്.  എനിക്ക് ഈ കല്ലറയുടെ ചരിത്രം അറിയാമെന്ന് അരുണേഷ് കരുതുന്നുമുണ്ടാകാം. അതായിക്കൂടേ എന്നോട് ചോദിക്കാനുള്ള കാരണം ?  ആ വഴിക്ക് പോയി ആദ്യ ചിന്തകൾ.

അങ്ങനെയാണെങ്കിൽ അതേത് കല്ലറയായിരിക്കും ? കൂടുതലുള്ള ചകിരിച്ചോറിനിടയിൽ കുറവുള്ള തലച്ചോറ് പിടിതരാതെ തെന്നിക്കളിച്ചു, ഏറെ നേരം.

പിന്നൊരു ഊഹം മാത്രം വെച്ചുകൊണ്ട് മറുപടി കൊടുത്തു.

“ ജൂതന്മാരുടെ കല്ലറയാണെന്ന് തോന്നുന്നില്ല. കണ്ണന്‍ ദേവന്‍ കമ്പനിയുടെ ആദ്യത്തെ ജനറല്‍ മാനേജറായിരുന്ന സായിപ്പിന്റെ, ഭാര്യ ഇസബെല്ലിനെ മൂന്നാറിലെ സി.എസ്.ഐ. പള്ളിക്ക് പുറകിലുള്ള സെമിത്തേരിയിൽ അടക്കം ചെയ്തിട്ടുണ്ടെന്നറിയാം. ഞാനത് അടുത്ത് ചെന്ന് കണ്ടിട്ടില്ല. അതാണോ ? അത് ആയാലും അല്ലെങ്കിലും കല്ലറകളുടെ തോഴൻ എന്ന പട്ടത്തിന് യോഗ്യത കൈവരിക്കാൻ ഇനീം സമയമെടുക്കും “

ഉടനെ തന്നെ അരുണേഷിന്റെ മറുപടി വന്നു.

കലക്കി മറിച്ചു… സംഗതി ദതന്നെ. സമ്മതിച്ചിരിക്കുന്നു.

അപ്പോൾ അത് തന്നെ സംഭവം. ശ്മശാനത്തിൽ അട്ട ശല്യമുണ്ടെന്ന് പറഞ്ഞ് വാച്ച്മാൻ കടത്തിവിട്ടില്ല ഒരിക്കൽ ആ വഴി പോയപ്പോൾ. പിന്നീട് പലവട്ടം മൂന്നാറ് പോയിട്ടുണ്ടെങ്കിലും സെമിത്തേരിയിൽ കടക്കാൻ സൌകര്യപ്പെട്ടിട്ടുമില്ല. എന്നാലെന്താ ഒരു സുഹൃത്ത് വഴി എനിക്കാ കല്ലറയുടെ പടം കാണാനുള്ള ഭാഗ്യമുണ്ടായിരിക്കുന്നു !!

ഒരു കുന്നിന്റെ ചരുവില്‍ നില്‍ക്കുന്ന പുരാതനമായ സി.എസ്.ഐ. പളളിയുടെ ചരിത്രം കൌതുകം ജനിപ്പിക്കുന്നതും അതേസമയം ചെറുതായി നൊമ്പരപ്പെടുത്തുന്നതുമാണ്. ഈ പള്ളി വരുന്നതിനും 17 വര്‍ഷത്തിന് മുന്‍പ് തന്നെ അവിടത്തെ സെമിത്തേരി വന്നിരുന്നു. അതാണ് ആ പള്ളിയുടെ കഥയിലെ കൌതുകരമായ ഭാഗം.

സി.എസ്.ഐ. പള്ളി – മൂന്നാർ

കണ്ണന്‍ ദേവന്‍ കമ്പനിയുടെ ആദ്യത്തെ ജനറല്‍ മാനേജറായിരുന്ന ഹെന്‍‌റി മാന്‍സ് ഫീല്‍ഡ് നൈറ്റ് എന്ന സായിപ്പിന്റെ, 23 കാരിയായ ഭാര്യയായ എലനര്‍ ഇസബെല്‍ മൂന്നാറിലെത്തിയപ്പോള്‍ ആ സ്ഥലത്തിന്റെ ഭംഗി കണ്ടിട്ട് …

“ഞാന്‍ മരിച്ചാല്‍ എന്നെ ഈ കുന്നിന്റെ മുകളില്‍ അടക്കം ചെയ്യണം” എന്ന് പറയുന്നു.
അത് പറഞ്ഞ് മൂന്നാം ദിവസം എലനര്‍ ഇസബെല്‍ കോളറ വന്ന് മരിക്കുന്നു. അവരെ ആ കുന്നിന്റെ മുകളില്‍ ഇപ്പോള്‍ പള്ളിയിരിക്കുന്നതിന്റെ പുറകിലായി അടക്കം ചെയ്യുന്നു. പിന്നീട് 17 വര്‍ഷങ്ങള്‍ക്കുശേഷമാണ് കുന്നിന്‍ ചെരുവില്‍ പള്ളി വന്നത്. സെമിത്തേരിയിലാകട്ടെ വിദേശികളുടേയും സ്വദേശികളുടേയുമായി കൂടുതല്‍ ശവമടക്കുകള്‍ നടക്കുകയും ചെയ്തു.

സ്മശാനത്തിന്റെ ഒരു ഭാഗം.

ഇപ്പോഴിത് പറയാൻ കാരണമെന്താണെന്നാവും ?!

ഈ മാസം 23ന് കൊളുക്കുമലൈ ട്രക്കിങ്ങിനായി മധു തങ്കപ്പനും കൂട്ടർക്കുമൊപ്പം മൂന്നാറിലേക്ക് പോകുന്നുണ്ട്. സി.എസ്.ഐ. പള്ളിക്ക് മുന്നിലൂടെയാണ് കടന്നുപോകേണ്ടത്. 10 മിനിറ്റ് സമയം വാഹനം അവിടെ നിർത്തിക്കിട്ടിയാൽ, 23കാരി ഇസബെല്ലിനോട് അൽ‌പ്പം ലോഹ്യം പറഞ്ഞ് വരാമായിരുന്നു. അരുണേഷ് അയച്ചുതന്ന ഫോട്ടോ കണ്ടപ്പോൾ മുതൽ, “ഇവിടെ അന്തിയുറങ്ങണം” എന്നുപറഞ്ഞ ഇസബെല്ലിനെ കാണണമെന്ന ആഗ്രഹം വല്ലാതെയുണ്ട്.

കാട് കയറിക്കിടക്കുന്ന കല്ലറകൾ, കായ്ച്ചുലഞ്ഞ് നിൽക്കുന്ന പ്ലാവുകൾ, തേനൂറുള്ള ചക്കച്ചുളകൾ എന്നിവയുടെയൊക്കെ പടങ്ങൾ അയച്ചുതന്ന് സ്നേഹ  പരീക്ഷണങ്ങൾ നടത്തുന്ന സുഹൃത്തുക്കൾക്കെല്ലാം നന്ദി. ഒരു കല്ലറ കാണുമ്പോഴും ഒരു ചുള  ചക്ക കാണുമ്പോളും ഈയുള്ളവനെ ഓർക്കുന്നുണ്ടല്ലോ ? അതിൽ‌പ്പരം എന്ത് വലിയ സന്തോഷമാണ് വേണ്ടത് ? ഏത് പട്ടമാണ് ചാർത്തിക്കിട്ടേണ്ടത് ?

വാൽക്കഷണം:-  ചരിത്രപ്രാധാന്യമുള്ള ഒരു കല്ലറയുടെ അവസ്ഥ കണ്ടിട്ട് സഹിക്കാനാവുന്നില്ല. ഇതേ കിടപ്പാണെങ്കിൽ അധികം വൈകാതെ അത് പൂർണ്ണമായും നാശമാകും. അതിന് മുന്നേ ഒന്ന് പോയി കാണണം ഇസബെല്ലിനെ.

ശ്രീരംഗപട്ടണത്ത് ചെന്നാല്‍ പ്രധാന കാഴ്ച്ചകളെല്ലാം ടിപ്പു സുല്‍ത്താനെ ചുറ്റിപ്പറ്റിത്തന്നെയാണ്.  ടിപ്പു കൊല്ലപ്പെട്ട ഇടം, ടിപ്പുവിന്റെ സമ്മര്‍ പാലസ്, ടിപ്പുവിന്റെ വാട്ടര്‍ ജെയില്‍, ടിപ്പുവിന്റെ ശവകുടീരം അങ്ങനെ നീളുന്നു കാഴ്ച്ചകള്‍. ശവകുടീരത്തിനകത്ത് സായിപ്പിന്റെ ഉറക്കം കെടുത്തിയ ടിപ്പുവിനൊപ്പം  പിതാവ് ഹൈദരാലിയും മാതാവ് ഫക്രുനിസ്സയും അന്ത്യവിശ്രമം കൊള്ളുന്നുണ്ട്.

1612ല്‍ ആണ് വടക്കന്‍ ഗോവയില്‍ പോര്‍ച്ചുഗീസുകാര്‍ അഗ്വാഡാ (Aguada) ഫോര്‍ട്ട് നിര്‍മ്മിക്കുന്നത്. അഗ്വാഡാ (Aguada) എന്നാല്‍ Watering Place എന്നാണ് പോര്‍ച്ചുഗീസ് ഭാഷയിലെ അര്‍ത്ഥം.

കോട്ടയ്ക്കകത്തുകൂടെ ഒഴുകുന്ന ഒരു ശുദ്ധജല ഉറവ് കോട്ടയില്‍ത്തന്നെ ശേഖരിക്കപ്പെടുകയും ഈ വഴി കടന്നുപോകുന്ന കപ്പലുകള്‍ക്ക് വിതരണം ചെയ്യുകയുമായിരുന്നു പതിവ്. 23,76,000 ഗാലന്‍ വെള്ളം ശേഖരിക്കാന്‍ കോട്ടയ്ക്കുള്ളിലെ ടാങ്കിന് ശേഷിയുണ്ട്. ജലശേഖരണവും വിതരണവും നടത്തുന്ന മറ്റൊരു കോട്ട ഞാന്‍ കണ്ടിട്ടില്ല. അതുകൊണ്ടുതന്നെ അഗ്വാഡാ ഫോര്‍ട്ട് എനിക്കൊരു കാണാക്കാഴ്ച്ച തന്നെയായിരുന്നു.

1505 ല്‍ കോട്ട ഉണ്ടാക്കിയത് പോര്‍ച്ചുഗീസുകാരാണെങ്കിലും ഇപ്പോള്‍ കൈവശം വെച്ചിരിക്കുന്ന ആര്‍ക്കിയോളജിക്കല്‍ സര്‍വ്വേ ഓഫ് ഇന്ത്യയുടെ കൈയ്യില്‍ എത്തുന്നതിന് മുന്നേ ഇത് പല കൈകള്‍ മറിഞ്ഞിട്ടുണ്ട്.

1663ല്‍ പോര്‍ച്ചുഗീസുകാരുടെ കൈയ്യില്‍ നിന്ന് ഡച്ചുകാര്‍ കോട്ട പിടിച്ചടക്കി. ഡച്ചുകാരുടെ കൈയ്യില്‍ നിന്നും 1772ല്‍ അറയ്ക്കല്‍ രാജവംശം കോട്ട വിലയ്ക്ക് വാങ്ങുകയായിരുന്നു. 1790 ല്‍ ബ്രിട്ടീഷുകാര്‍ അറയ്ക്കലിന്റെ കൈയ്യില്‍ നിന്നും കോട്ട പിടിച്ചടക്കി മലബാര്‍ തീരത്തെ ബ്രിട്ടീഷ് പട്ടാളത്തിന്റെ പ്രധാന കേന്ദ്രമാക്കി മാറ്റി.

എത്ര പതാകകള്‍ കേറി ഇറങ്ങിയിട്ടുണ്ടാകും ആ കൊടിമരത്തില്‍ ? എത്രയെത്ര വെടിയുണ്ടകള്‍ തീതുപ്പി പാഞ്ഞിറങ്ങിയിട്ടുണ്ടാകും ആ പീരങ്കിയില്‍ നിന്ന് ? ചരിത്രത്തില്‍ രേഖപ്പെടുത്താതെ പോയ എത്രയെത്ര കഥകള്‍ പറയാനുണ്ടാകും കോട്ടയിലെ ഓരോ മണ്‍‌തരികള്‍ക്കും ?

കണ്ണൂര്‍ കോട്ട, അഥവാ സെന്റ് ആഞ്ചലോസ് കോട്ടയില്‍ നിന്ന് ഒരു ദൃശ്യം.

ഇംഗ്ലണ്ടിലെ ഗില്‍‍ഡ്‌ഫോ‍ഡ് (Guildford) പട്ടണത്തില്‍ പതിനൊന്നാം നൂറ്റാണ്ടില്‍ ‘വില്യം ദ കോണ്‍കറര്‍’ ഉണ്ടാക്കിയ കോട്ട. ചുറ്റും ഉദ്യാനമൊക്കെ വെച്ചുപിടിപ്പിച്ച് ഇന്നും മനോഹരമായി സംരക്ഷിച്ചിരിക്കുന്നു. സ്വദേശികളും വിദേശികളുമായിട്ടുള്ള സഞ്ചാരികള്‍ ഉദ്യാനത്തിലെ പച്ചപ്പുല്‍‌പരവതാനിയില്‍ മണിക്കൂറുകളോളം വെയില്‍ കാഞ്ഞും പുസ്തകം വായിച്ചുമൊക്കെ ചിലവഴിക്കുന്നു.

കോട്ടയുടെ രൂപം കണ്ടപ്പോള്‍ പെട്ടെന്ന് മനസ്സിലേക്കോടി വന്നത് നാട്ടില്‍ വീടിനടുത്തുള്ള ടിപ്പുസുല്‍ത്താന്റെ(പള്ളിപ്പുറം) കോട്ടയാണ്. മൂന്നാം ക്ലാസ്സില്‍ പഠിക്കുന്ന കാലത്ത് സ്കൂളില്‍ നിന്നും കോട്ടയില്‍ കൊണ്ടുപോയത് ഇപ്പോഴും ഓര്‍മ്മയുണ്ട്. കാട് പിടിച്ച് കാലുകുത്താന്‍ പറ്റാത്തവിധമായിരുന്നു അന്ന് കോട്ടയുടെ അവസ്ഥ. ഇപ്പോള്‍ കോട്ടയിലേക്ക് പ്രവേശനം ഇല്ലെന്നാണ് കേട്ടിട്ടുള്ളത്. കോട്ടയുടെ താക്കോല്‍ തൊട്ടടുത്തുള്ള പള്ളിപ്പുറം പൊലീസ് സ്റ്റേഷനിലാണുള്ളത്.

ഇനിയെന്നെങ്കിലും ആ കോട്ടയുടെ അകത്ത് കയറി കാണാന്‍ സാധിക്കുമോ ? നമ്മുടെ ഭരണവര്‍ഗ്ഗം ആ കോട്ടയെ വേണ്ടവണ്ണം സംരക്ഷിക്കുമോ ? അതോ, നാട്ടിലുള്ള ചരിത്ര സ്മാരകങ്ങളുടെ ഓര്‍മ്മ പുതുക്കാന്‍ ഇതുപോലുള്ള വിദേശസ്മാരകങ്ങളില്‍ കയറി ഇറങ്ങി നടക്കേണ്ടി വരുമോ ?

കേരളത്തിന്റെ ചരിത്രത്തില്‍ ഇടം പിടിച്ചിട്ടുള്ള ഒരു വിളക്കാണിത്. തമ്പുരാട്ടി വിളക്ക് എന്ന പേരിലാണിത് അറിയപ്പെട്ടിരുന്നത്.

പ്രശസ്തമായ അറയ്ക്കല്‍ കെട്ടിലെ ബീവിയുടെ ഓര്‍മ്മയ്ക്കായി ഈ തമ്പുരാട്ടിവിളക്ക് കെടാതെ സൂക്ഷിച്ചുപോന്നിരുന്നു ഒരു കാലത്ത്. ഈ വിളക്ക് കെട്ടാല്‍ ലോകാവസാനമായെന്ന് ഒരു വിശ്വാസവും ഉണ്ടായിരുന്നു അക്കാലത്ത്. എന്തൊക്കെയായാലും ഈ വിളക്കണഞ്ഞിട്ടിപ്പോള്‍ നാളൊരുപാടായിരിക്കുന്നു.

പഴയ ആ വിശ്വാസത്തിന്റെ ചുവട് പിടിച്ച് നോക്കിയാല്‍ ദജ്ജാലെന്ന ഒറ്റക്കണ്ണന്‍ രാക്ഷസന്റെ വരവടുത്തിരിക്കുന്നതിന്റെ ലക്ഷണങ്ങളല്ലേ നാമിന്ന് ചുറ്റിനും കാണുന്നത് ?

‘കിയാം കരീബ് ‘. ജാഗ്രതൈ.

ഗേറ്റ് വേ ഓഫ് ഇന്ത്യാ, മുംബൈ. രാത്രി കരയില്‍ നിന്നുള്ള ദൃശ്യവും പകല്‍ വെള്ളത്തില്‍ നിന്നുള്ള ദൃശ്യവും പലപ്പോഴായി പകര്‍ത്തിയത്.