Monthly Archives: April 2012

ഈ നാടെന്താ ഇങ്ങനെ ?

സാമൂഹികം

സ്ഥലം, ഒരു പ്രമുഖ പഞ്ചായത്ത് ആപ്പീസിന്റെ അന്വേഷണവിഭാഗം കൌണ്ടർ.

‘ഒരു സ്ഥാപനം തുടങ്ങാൻ ലൈസൻസിന് അപേക്ഷ തരേണ്ടത് എങ്ങനാ ?‘

‘ഒരു അപേക്ഷാ ഫോം ഉണ്ട്. അത് പൂരിപ്പിച്ച് താ.‘

‘ഫോം ഒരെണ്ണം തരാമോ’

‘സ്ഥാപനം തുടങ്ങിയോ ?‘

‘ലൈസൻസ് കിട്ടാതെങ്ങനാ സ്ഥാപനം തുടങ്ങുന്നത് ?‘

‘നിങ്ങൾ സ്ഥാപനം നടത്തുന്നുണ്ടോന്ന് അറിയാതെ ഞങ്ങളെങ്ങനെ ലൈസൻസ് തരും, എന്തിന് തരണം ?‘

‘ലൈസൻസ് എന്നു പറഞ്ഞാൽ ഒരു സ്ഥാപനം തുടങ്ങാനുള്ള അനുവാദമല്ലേ ? അനുവാദം കിട്ടാതെ സ്ഥാപനം തുടങ്ങാൻ പറ്റുമോ ? അത് നിയമപരമാണോ ? ഡ്രൈവിങ്ങ് ലൈസൻസിന് അപേക്ഷിക്കുന്നവരോട്, നിങ്ങളങ്ങ് വാഹനം ഓടിക്ക്. നന്നായിട്ട് ഓടിക്കുന്നുണ്ടെങ്കിൽ ഞങ്ങൾ ലൈസൻസ് തരാം. എന്നാണോ പറയാറ് ? എന്തിന് ലൈസൻസ് തരണമെന്ന് ചോദിച്ചാൽ…. ലൈസൻസ് തന്നാൽ, വർഷാവർഷം അതിന്റെ ഫീസ് പഞ്ചായത്തിന് കിട്ടുമല്ലോ ? ’

‘ആർ.ടി.ഓഫീസിലെ കാര്യം വിട്. നമുക്കിവിടത്തെ കാര്യം സംസാരിക്കാം. സ്ഥാപനം നിങ്ങളങ്ങ് തുടങ്ങണം. എന്നിട്ട് ഞങ്ങൾ വന്ന് നോക്കും. ഒക്കെ ഭംഗിയായിട്ട് നടക്കുന്നുണ്ടെന്ന് കണ്ടാൽ ലൈസൻസ് തരും. അല്ലെങ്കിൽ തരില്ല. അതാണിവിടത്തെ നടപടിക്രമം.‘

‘ശരി അങ്ങനായിക്കോട്ടെ. പക്ഷെ, ഈ അപേക്ഷയിൽ ഒരു ദിവസം എത്ര വിറ്റ് വരവ് ഉണ്ടാകും എന്നൊരു ചോദ്യം ഉണ്ടല്ലോ ? തുടങ്ങാത്ത സ്ഥാപനത്തിന്റെ വിറ്റുവരവ് ഞാനെങ്ങനെ പറയും ?’

‘ഒരു സ്ഥാപനം തുടങ്ങുമ്പോൾ എത്ര വിറ്റുവരവ് ഉണ്ടാകുമെന്ന് നിങ്ങൾക്കൊരു കണക്കുകൂട്ടലൊക്കെ ഉണ്ടാകില്ലേ? അതെഴുതണം.‘

‘എന്റെ കണക്കുകൂട്ടൽ അംബാനിയെപ്പോലെ ദിവസവും കോടികളുടെ ഇടപാട് നടത്തണമെന്നാണ്. പക്ഷെ, നമ്മളാഗ്രഹിക്കുന്നത് പോലെയൊക്കെ നടക്കണമെന്നില്ലല്ലോ ?’

‘നിങ്ങളൊരു തുകയങ്ങ് എഴുത്, ബാക്കിയൊക്കെ നമുക്ക് പിന്നെ നോക്കാം.’

‘എന്നാലും, തുകയെത്ര എഴുതണമെന്ന് എനിക്കൊരു പിടിയുമില്ല.’

‘നിങ്ങളൊരു 1000 രൂപയങ്ങ് എഴുത്.’

‘ശരി, അങ്ങനായിക്കോട്ടെ.’

അപേക്ഷയും അനുബന്ധ രേഖകളും സമർപ്പിക്കപ്പെട്ടു. രേഖകൾ പ്രാഥമിക പരിശോധനയ്ക്ക് വിധേയമായി. എതിർഭാഗത്തിന്റെ നെറ്റി ചുളിയുന്നു.

‘സ്ഥാപനം നടത്തുന്ന കെട്ടിടത്തിന്റെ വാടകക്കരാർ 11 മാസത്തേക്ക് മാത്രമേ ഉള്ളല്ലോ ?’

‘അത് പിന്നെ അങ്ങനല്ലേ ? വാടകക്കരാർ 11 മാസത്തേക്കല്ലേ എല്ലാവരും എഴുതാറ് ?’

‘അതുപറ്റില്ല, ഞങ്ങൾ ലൈസൻസ് തരുന്നത് 12 മാസത്തേക്കാണ്. 11 മാസത്തെ വാടകക്കരാർ വെച്ച് 12 മാസത്തെ ലൈസൻസ് തരാനാകില്ല’

‘എന്നാൽ 11 മാസത്തെ ലൈസൻസ് തന്നാൽ മതി’

‘അതുപറ്റില്ല, ലൈസൻസൊക്കെ 12 മാസത്തേക്കാണ് നൽകാറ് ‘

‘11 മാസത്തേക്ക് വാടകക്കരാർ എഴുതുന്നത് ഞാനായിട്ട് കൊണ്ടുവന്ന നാട്ടുനടപ്പല്ല. എല്ലാവരും ചെയ്യുന്നതേ ഞാനും ചെയ്തിട്ടുള്ളൂ. കെട്ടിടത്തിന്റെ ഉടമസ്ഥനും 11 മാസത്തെ വാടകക്കരാർ എന്നാണല്ലോ പറഞ്ഞത്. ’

‘അങ്ങനെ പറഞ്ഞാൽ എങ്ങനാ ശരിയാകുക? നിങ്ങൾ പോയി 12 മാസത്തെ വാടകക്കരാറുമായി വരൂ.’
……………..
………
….
ഏതെങ്കിലും പഞ്ചായത്ത് മെമ്പർമാരെയോ, അല്ലെങ്കിൽ പഞ്ചായത്ത് പ്രസിഡന്റിനെത്തന്നെയോ അതുമല്ലെങ്കിൽ ഏതെങ്കിലും രാഷ്ട്രീയക്കാരെയോ കണ്ട് സങ്കടം ബോധിപ്പിച്ചാൽ, കൈക്കൂലി വല്ലതും കൊടുത്താൽ, കാര്യം നടക്കുമോ ? എന്നൊക്കെയുള്ള ചിന്തയുമായി മ്ലാനമുഖത്തോടെ അപേക്ഷകൻ തൽക്കാലത്തേക്ക് പഞ്ചായത്താപ്പീസിന്റെ പടിയിറങ്ങുന്നു.

ഇതുപോലെ പല അപേക്ഷകരുടേയും മനസ്സ് ഒരു നിമിഷത്തേക്കെങ്കിലും വാളയാർ ചെക്ക് പോസ്റ്റിനപ്പുറത്തേക്ക് പാഞ്ഞുപോയിട്ടുണ്ടെങ്കിൽ കുറ്റം പറയാനാവില്ല. ചുവപ്പുനാടകളിൽ കുടുങ്ങിക്കഴിഞ്ഞിരിക്കുന്ന സ്ഥാപനത്തിന്റെ ഭാവി എന്താകുമോ എന്തോ ? ഈ നാടെന്താ ഇങ്ങനെ ? അപേക്ഷകന്റെ ചിന്തകൾ ഇപ്പോഴും കാടിറങ്ങിയിട്ടില്ല.